Yosiya Ŵacinonyelaga Cilamusi ca Mlungu

Yosiya ŵaŵele mwenye jwa ku Yuda ali akwete yaka 8. Masiku gelego, ŵandu ŵatendega ya masenga, soni kulambila milungu jakupanganyidwa. Yosiya ali akwete yaka 16, jwalijiganyisye litala lyakuŵajilwa lyakumlambilila Yehofa. Paŵayice yaka 20, Yosiya jwatandite konanga milungu jakupanganyidwajo soni malo gakupelecela mbopesi gagaliji m’cilambo cosopeco. Kaneko Yosiya ali akwete yaka 26, jwatesile yakuti nyumba jakulambilila ja Yehofa jilinganyidwesoni.

Jwamkulungwa jwa ŵambopesi Hilikiya, jwawusimene mpukutu wa Cilamusi ca Yehofa m’nyumba jakulambilila. Komboleka kuti mpukutuwo walembedwe ni Mose. Safani juŵaliji mlembela jwa mwenye jwajigele mpukutu wula ni kwawula nawo kwa Yosiya. Jwalakwe jwatandite kuŵalanga Cilamusico mwakwesya maloŵe. Panyuma pakuŵalanga yayaliji mu mpukutu mula, Yosiya ŵayimanyi kuti kwa yaka yejinji ŵandu nganampikanilaga Yehofa. Kaneko mwenye Yosiya ŵamsalile Hilikiya kuti, ‘Yehofa atumbile mnope ni uweji. Mjawule mkaŵecetane najo. Yehofa catusalile yatukusosekwa kutenda.’ Kupitila mwa jwakulocesya Hulida, Yehofa jwajanjile kuti, ‘Ŵandu ŵa ku Yuda alesile kumbikanila. Jemanjaji cinjapa cilango nambo ngaŵa pandaŵi ja mwenye Yosiya, ligongo jwalakwe ali jwakulinandiya.’

Mwenye Yosiya ali apikene utengawo, jwapite kunyumba jakulambilila kula ni ŵasongangenye ŵandu wosope wa mu Yuda. Kaneko jwalakwe ŵaŵalanjile ŵanduwo Malamusi ga Yehofa mwakwesya maloŵe. Yosiya yalumo ni ŵanduwo ŵatesile cilanga cakuti cacimpikanila Yehofa ni mitima jawo josope.

Kwa yaka yejinji ŵandu ŵa ku Yuda nganatendaga cindimba ca Pasaka. Nambo Yosiya paŵagambile kuŵalanga m’cilamusi mula yakuti cindimba ca Pasaka citendekweje caka cilicose, jwalakwe jwasalile ŵanduwo kuti, ‘Citumtendele Yehofa cindimba ca Pasaka.’ Kaneko Yosiya ŵatandite kulinganya mbopesi syejinji soni ŵalingenye yakuti cikupagwe ŵakwimba kunyumba jakulambilila pandaŵijo. Mtundu wosopewo ŵatesile cindimba ca Pasaka, kaneko ŵatesile cindimba ca Mkate wangali Cakusasaŵilisya, cacatendekwe kwa masiku 7. Kutandila m’masiku ga Samuyele, nganipatendekwa Pasaka jakulandana ni jajatendekwe pandaŵiji. Kusala yisyene Yosiya jwanonyelaga Cilamusi ca Mlungu. Ana mkusasangalala kulijiganya yakwamba Yehofa?