Akamulicisyeje Masengo Cenene Ndaŵi Jawo Pali mu Undumetume
M’caka ca undumetume ca 2014, Mboni sya Yehofa syamalile maawala gakwaka 1,945,487,604 pa masengo gakulalicila. Yeleyi yikulosya kuti tuli ŵakulipeleka mnope kutumicila Yehofa! (Sal. 110:3; 1 Akoli. 15:58) Pakuŵa ‘ndaŵi jajisigeleji jinandipe,’ ana yili yakomboleka kumalila ndaŵi jetu mu undumetume kuti tulalicile ŵandu ŵajinji?—1 Akoli. 7:29.
Kamulicisya masengo cenene ndaŵi jetu mu undumetume kukusasaka kuti mundu aŵe jwakoseka kucenga. Mwambone, naga ndaŵi syejinji akusamalila ndaŵi pa mtundu wine wa undumetume nambo ngakusaŵecetana ni jwalijose, ana mpaka yikombolece kucenga kuti aŵecetaneje ni ŵandu ŵajinji? Yindu yikusaŵa yakulekanganalekana mwakamulana ni malo gakwe. M’yoyo yindu yakuyicisyayi mpaka yakamucisye kamulicisya masengo cenene ndaŵi jawo, soni kuŵambala ‘kuputa mbungo.’—1 Akoli. 9:26.
Kulalicila ku Nyumba ni Nyumba: Kwa yaka yejinji, ŵakulalicila aŵele ali mkutenda undumetume wawo wa ku nyumba ni nyumba. Nambope pakuŵa ŵandu ŵajinji akusakamula masengo lisiku lyosope, uli ngalinga kulalicila kutenda undumetume welewu musi kapena ligulo pandaŵi jele ŵandu ŵajinji akusaŵa ali panyumba? Nambosoni, kulalicila mumsewu kapena pamalo gakusatendela malonda mpaka kukole yakuyicisya yambone.
Kulalicila Pamalo Gakusimanikwa Ŵandu Ŵajinji: Akusosekwa aŵiceje matebulo ni mashelefu kumalo kwakukusimanikwa ŵandu ŵajinji mu mkuli wa mpingo wawo. (Alole Undumetume wa Ucimwene wa July 2013 pa peji 5.) Naga akuyiwona kuti kumalo kwasimanikweje ŵandu ŵajinji akunandipilanandipila, Komiti ja Undumetume ja Mpingo mpaka jisagule kutyosya matebulo ni mashelefugo ni kugaŵikasoni kwine kwakukusimanikwa ŵandu ŵajinji.
Maulendo Gakuwilisya ni Majiganyo ga Baibulo: Yili yakomboleka kulinganya yakutenda maulendo gakuwilisya pa ndaŵi syele mtundu wine wa undumetume ngawukusajenda cenene. Mwambone, naga kulalicila ku nyumba ni nyumba kukusaŵa cenene Lyakuŵeluka kundaŵi, ana mpaka atendesyeje lijiganyo lyaBaibulo musi kapena kumagulo? Pakutenda ulendo wakuwilisya, mpaka agaŵane m’tumakuga kuti alalicile malo gekulungwa.
Atamose kuti mpaka tuŵalanjileje ndaŵi jetu patukulalicila, nambope tukusaŵa ŵakusangalala mnope patukulipeleka. Naga akuyiwona kuti kutenda undumetume winewakwe ngakukukamula mtima ndaŵi jinejakwe, alinje litala line. Apopeleje kwa Yehofa, jwali ‘Msyene yakugowola’ kuti ŵakamucisye pakukamulicisya masengo cenene ndaŵi jawo mu undumetume!—Mat. 9:38.