Matala Gakulalichilila Ngani Syambone

MPELA jwakulalichila ngani syambone jwakulimbichila, Yesu ŵapele chisyasyo chambone ŵakumkuya ŵakwe. Jwalakwe ni juŵatandaga kwajawulila ŵandu kukwalalichila, soni kukwajiganya kunyumba syawo soni mmalo mwaŵasimanikwaga ŵandu ŵajinji. (Mat. 9:35; 13:36; Luk. 8:1) Yesu ŵamlalichilaga mundu pajikapajika, ŵajiganyaga ŵakulijiganya ŵakwe pakasyepela, soni ŵalalichilaga pali ŵandu ŵajinji. (Maliko 4:10-13; 6:35-44; Yoh. 3:2-21) Jwalakwe ŵakamulichisyaga masengo lipesa lililyose pakuŵecheta yakulimbikasya, soni kwapa ŵandu chembecheyo. (Luk. 4:16-19) Atamose ndaŵi jaŵasakaga kupumula, jwalakwe ŵajikamulichisyaga masengo pakulalichila. (Maliko 6:30-34; Yoh. 4:4-34) Patukuŵalanga ngani sya m’Baibulo syakwamba ya utumiki wa Yesu, ana ngasikusatulimbikasya kuti tumsyasyeje? Mwangakayichila sikusatulimbikasya, mpela muyaŵelelesoni ni ŵandumetume.—Mat. 4:19, 20; Luk. 5:27, 28; Yoh. 1:43-45.

² Kwende tulole matala gakusakuya Aklistu masiku agano pakukamula masengo gakulalichila gaŵagatandisye Yesu Klistu yaka chiŵandika 2,000 yipiteyo.

KULALICHILA KUNYUMBA NI NYUMBA

³ M’weji ŵa Mboni sya Yehofa, tukusamanyilila kusosekwa kwa kulalichila chenene ngani syambone sya Uchimwene kunyumba ni nyumba. Tuŵele tuli mkamulichisya masengo litalali kwandaŵi jelewu, mwamti tukusamanyikwa nalyo. Kukamulichisya masengo litala lyakwayichila ŵandu ŵajinji kwa ndaŵi jamnonoku, kuwoneche kuti kwana yakuyichisya yambone. (Mat. 11:19; 24:14) Kulalichila kunyumba ni nyumba lili litala lyambone lyakulosya kuti tukusamnonyela Yehofa soni ŵandu.—Mat. 22:34-40.

⁴ Kulalichila kunyumba ni nyumba nganiliŵa litala lyasambano lyatandisye ŵa Mboni sya Yehofa ŵa masiku agano. Ndumetume Paulo ŵasasile kuti ŵajiganyaga ŵandu kunyumba syawo. Pakwasalila achakulungwa ŵa mumpingo wa ku Efeso yakwamba undumetume wakwe, Paulo ŵatite, “Kutandila lisiku lyandanda linayiche ku Asiya, . . . pangali kinamsisile kalikose kakuti kamkamuchisye jemanja. Namlalichile . . . m’nyumba syenu.” Kamulichisya masengo litala lyeleli soni gane kwamkamuchisye Paulo, ‘kwasalichisya kusyesyene [“kutendela umboni mwakwanila,” NWT] Ayuda ni ŵandu ŵamitundu jine kuti apitikuchile kwa Mlungu ni kumkulupilila Ambuje Yesu Klistu.’ (Mase. 20:18, 20, 21) Pandaŵiji, mayimwene ga ku Loma galimbikasyaga ŵandu kuti alambileje milungu jakupanganyidwa ni ŵandu, soni ŵajinji ‘ŵapopelaga mnope’ kwa milunguji. Myoyo yaliji yakusosekwa mnope kuti ŵandu asosesose “Mlungu juŵapanganyisye chilambo chapasi ni yindu yosope yili mwelemo,” jwele pandaŵijo ‘ŵalamulaga ŵandu wosope kulikose kuti apitikuche mitima jawo.’—Mase. 17:22-31.

⁵ Masiku agano, tukusosekwa kwayichila ŵandu ni ngani syambone mwachitema mnope, ligongo mbesi ja chilambo chakusakala jikuŵandichila mnope. Ligongo lya yeleyi, tukusosekwa kulimbichila mnope pa masengo gakulalichila. Pangalisoni litala lyaliwoneche kuŵa lyakamuchisya kusosasosa ŵandu ŵakusaka usyesyene, kupunda lyatuŵele mkulikamulichisya masengo kwa ndaŵi jelewu, lyalili kulalichila kunyumba ni nyumba. Litalali lili lyakamuchisya mpela mulyaŵelele m’masiku ga Yesu soni ŵandumetume.—Maliko 13:10.

⁶ Ana akusajigala nawo mbali mwakwanila pa kulalichila kunyumba ni nyumba? Aŵe ŵakusimichisya kuti naga akutenda masengoga mwakwanila, Mlungu akusiŵayamichila. (Esek. 9:11; Mase. 20:35) Kulalichila kunyumba ni nyumba mpaka kuŵe kwakusawusya kwa wawojo. Yeleyi mpaka yitendekwe ligongo lya kulwala kapena naga akusalalichila mu dela jele ŵandu ŵajinji ŵangasaka kupikanila utenga wawo. Kombolekasoni kuti Boma jikusalekasya masengo gakulalichilaga. Kombolekasoni kutendaga sooni mwamti mpaka yasawusyeje kutanda kuŵecheta ni ŵandu. Ligongo lya yeleyi, ndaŵi jilijose jakulalichila kunyumba ni nyumba, mpaka atendeje woga. Nambo akajasa mtima. (Eks. 4:10-12) Nganaŵa jika ŵakusimana ni yakusawusya yeleyi. Abale m’yilambo yejinji akusimana nayosoni.

⁷ Yesu ŵatesile chilanga ni ŵakulijiganya ŵakwe kuti, “Unejo ndili ni jemanja masiku gosope, mpaka mbesi ja chilambo chapasi chino.” (Mat. 28:20) Chilanga cha Yesuchi chikusatulimbikasya kamula masengo gakupanganya ŵakulijiganya. Tukusalipikana mpela muŵapikanile ndumetume Paulo juŵasasile kuti, “Ngukomboleka kutenda yosope yene ligongo Klistu akusandendekasya kuti mbeje jwakulimbangana pa yiliyose yangusimana nayo.” (Afi. 4:13) Atendeje yiliyose yampaka akombole kuti alalichileje kunyumba ni nyumba pampepe ni mpingo. Pakulalichila ni ŵane, chachalimbikasya, soni kwakamuchisya. Am’ŵendeje Mlungu mwipopelo kuti ŵakamuchisye kumalana ni yakusawusya yampaka asimane nayo, soni kuti ŵakamuchisye kuŵa ŵakulipeleka mnope pakulalichila ngani syambone.—1 Yoh. 5:14.

⁸ Pakwasalila ŵane ngani syambone, akusakola upile wakwajanga ŵandu ‘ŵakuwusya yakwembecheya’ wawojo. (1 Pet. 3:15) Chachimanyilila chenene kulekangana pasikati pa ŵandu ŵakwete chembecheyo cha Uchimwene ni ŵanganakola chembecheyo chilichose. (Yes. 65:13, 14) Chachisangalala ligongo lyakumanyilila kuti apikanile lilamusi lya Yesu lyakuti ‘alosyeje lilanguka lyawo,’ soni kuti akwete upile wakwakamuchisya ŵane kummanyilila Yehofa soni usyesyene wawukusalongolela ku umi wangamala.—Mat. 5:16; Yoh. 17:3; 1 Tim. 4:16.

⁹ Mpingo ukusalinganya kuti kumbesi kapena mkati mwa wiki paŵe kulalichila kwa kunyumba ni nyumba. M’madela gele ŵandu ngakusasimanikwa panyumba kutandila kundaŵi mpaka musi, mipingo jine jikusalinganya yakulalichila kwigulo. Ŵandu mpaka asachilileje kupochela achalendo kwigulo kulekangana ni kundaŵi.

KUSOSASOSA ŴANDU ŴAKUŴAJILWA

¹⁰ Yesu ŵasalile ŵakulijiganya ŵakwe kuti akasosesose ŵandu ŵakuŵajilwa. (Mat. 10:11) Jwalakwe nganagambagape kusosasosa ŵandu ŵakuŵajilwa kunyumba ni nyumba. Kusala yisyene, Yesu ŵalalichilaga ndaŵi jilijose jajaliji jakuŵajilwa, chinga mwakutenda kulinganya kapena mwaupile. (Luk. 8:1; Yoh. 4:7-15) Nombenawo ŵandumetume ŵalalichilaga ŵandu mmalo gakulekanganalekangana.—Mase. 17:17; 28:16, 23, 30, 31.

¹¹ Masiku aganosoni, chakulinga chetu chili kum’yichila jwalijose ni utenga wa Uchimwene. Yeleyi yikugopolela kuti tujigalileje yiŵatendaga Yesu ni ŵandumetume ŵakwe pamasengo gakwiganya ŵandu, soni kuŵa ŵakoseka kutenda yindu mwakamulana ni ndaŵi soni mwayiŵelele yindu ni ŵandu ŵa mu dela jetu. (1 Akoli. 7:31) Mwachisyasyo, ŵakulalichila yikusiyajendela pakulalichila pa malo gakutendela malonda. M’yilambo yejinji, kulalichila mu msewu kuŵele kwakamuchisya mpela mwakuŵelelesoni kulalichila ku malo gakusalala gakusakunguluchila ŵandu (mapaki), malo gakwimika magalimoto, kapenasoni kulikose kwakukusasimanikwa ŵandu. Mipingo jine jikusalinganya yakuti jilalichileje m’madela gawo mwakuŵika mabuku pa matebulo. Ofesi ja nyambi mpaka jilinganyesoni ya kulalichila mwapajika m’malo mwakusajenda ŵandu ŵajinji m’misinda jekulungwakulungwa pakamulichisya masengo ŵakulalichila ŵa m’mipingo jakulekanganalekangana. Yeleyi yikusakamuchisya kuti ŵandu ŵangatukusasimana kunyumba syawo, twayichile ni ngani syambone.

¹² Patusimene ni ŵandu ŵalosisye chidwi ni utenga wa m’Baibulo pa malo gakusimanikwa ŵandu ŵajinji, tukusosekwa kwapa chakuŵalanga chakuŵajilwa. Kuti akusye chidwi cha ŵanduwo akusosekwa kwapa adilesi jawo soni kulinganya yakwajendela, kwasalila adilesi ja pa jw.org, kapenasoni kwasalila malo gakusonganilana gagaŵandichile. Kulalichila ku malo kwakukusaŵa ŵandu ŵajinji mpaka kuŵe litala lyakusangalasya lyakonjechesya utumiki wawo.

¹³ Nambope, kuwandisya ngani syambone kugambile kuŵa mbali jimo ja masengo gakwete Aklistu masiku agano. Kuti akombole kwakamuchisya ŵandu ŵane kupochela usyesyene wawukusalongolela ku umi, akusosekwa kwajawulilaga ŵandu ŵachidwi ndaŵi ni katema kuti ajawule pasogolo ni kuŵa Aklistu ŵakomangale.

KUTENDA MAULENDO GAKUWILISYA

¹⁴ Yesu ŵasalile ŵakumkuya ŵakwe kuti, “Timchindendela umboni . . . mpaka kumbesi kwachilambo.” (Mase. 1:8) Ŵasalilesoni kuti, “Ni ligongo lyakwe jemanja mjawule mkajiganye ŵandu ŵa ngosyo syosope. . . . Ni kwajiganya yosope yele yinamlamulile.” (Mat. 28:19, 20) Kutenda maulendo gakuwilisya mpaka kuŵe kwakusangalasya mnope patukumtumichila Yehofa. Ŵandu ŵaŵatesile chidwi ni ngani syambone paulendo wandanda, mpaka asangalale mnope ali ŵawenisoni. Pakupitilisya kwasalila utenga wa m’Baibulo, chachakamuchisya ŵanduwo kulimbisya chikulupi chawo pa Mlungu soni kwakamuchisya kumanyilila yindu yausimu yakusosechela. (Mat. 5:3) Naga akosechela chenene soni kulinganya yakutenda maulendo gakuwilisya pa ndaŵi jakuŵajilwa kwa ŵanduwo, yichiŵa yangasawusya kutandisya lijiganyo lya Baibulo. Mwangakayichila chelechi chichiŵa chakulinga chawo pakutenda maulendo gakuwilisya. Patupandile mbeju sya usyesyene tukusasosekwa kusijitililaga.—1 Akoli. 3:6.

¹⁵ Ŵandu ŵane mpaka yasawusyeje kutenda maulendo gakuwilisya. Komboleka kuti apano akusakombola kumlalichila mundu paulendo wandanda, soni mwine akusasangalala kutenda mbali ja utumikiji. Nambo paganisisye yakwawulasoni kukambilana ya m’Baibulo ni mundu juŵamlalichile paulendo wandanda, mpaka ayiwoneje kuŵa yakusawusya mnope. Kosechela chenene kuli kwakamuchisya. Akamulichisyeje masengo yakusalijiganya pa msongano wamkati mwa wiki. Mpaka amŵendesoni jwakulalichila jwa luso kuti alongane najo.

KUTENDESYA MAJIGANYO GA BAIBULO GA PANYUMBA

¹⁶ Jwakulalichila Filipi paŵaŵechetaga ni mundu jwine juŵagalawuchile ku Chiyuda, juŵaliji mkuŵalanga Maloŵe ga Mlungu, ŵam’wusisye kuti, “Ana mkuyipikana yele yimkuŵalangayi?” Mundujo ŵajanjile kuti, “Ana tinayipikane uli pali pangali jwine jwakungopolela?” Chaputala 8 cha buku ja Masengo, ukusatusalilasoni kuti Filipi “ŵatandite kumlalichila ngani syambone” mundujo pakamulichisya masengo ngani jaŵaŵalangagajo. (Mase. 8:26-36) Ngatukumanyilila winji wa ndaŵi jele Filipi ŵamlalichile munduju, nambope, jwalakwe ŵamlondechesye chenene ngani syambone mpaka mundujo ŵakulupilile ni kuŵenda kuti abatisidwe. Mundujo ŵaŵele jwakulijiganya jwa Yesu Klistu.

¹⁷ Ŵandu ŵajinji masiku agano ngakujimanyilila chenene Baibulo, myoyo mpaka pasosekwe kutenda maulendo gakuwilisya, soni kwajiganya kwa ndaŵi jelewu mwine mawiki, miyesi, chaka atamosesoni yaka kuti ayikane pakola chikulupi soni kuti aŵajilwe kubatisidwa. Nambo kuŵa ŵakuwusimana mtima, soni kutenda nawo yindu mwachinonyelo patukwajiganya ŵandu ŵa mitima jambone kuti aŵe ŵakulijiganya, kwana umbone wakwe. Yesu ŵasasile kuti, “Kupeleka kukusampa upile mundu kulekangana ni kupochela.”—Mase. 20:35.

¹⁸ Mwangakayichila pakutendesya lijiganyo lya Baibulo lya panyumba chachikamulichisya masengo mabuku gaŵagapanganyisye kuti tugakamulichisyeje masengo pakwiganya. Kukamulichisya masengo yakusalijiganya pa msongano wamkati mwa wiki soni kulalichila yalumo ni ŵandu ŵakumanyilila yejinji pa masengo gakulalichilila mpaka yakamuchisye kuti atendekasyeje majiganyo gakwawula pasogolo yayichakamuchisya ŵane kuŵa ŵakulijiganya ŵa Yesu Klistu.

¹⁹ Naga akusaka kumanyilila mwampaka atandichisye soni kutendesya lijiganyo lya Baibulo lya panyumba, aŵe ŵagopoka kumwusya jumo jwa achakulungwa ŵa mumpingo kapena Mboni jijawo, jajikusatenda chenene yeleyi. Yindu yakamuchisya yaŵele mkusala mu kabuku ka Utumiki ni Umi Wetu wa Chiklistu—Pologalamu ja Misongano soni yilosyo yakwe yakusayitenda pa Msongano wa Utumiki mpaka yakamuchisyesoni. Amdalileje Yehofa, soni amsalileje yakusaka mwipopelo. (1 Yoh. 3:22) Naga yili yakomboleka, chiŵe chakulinga chawo kutendesya lijiganyo lya Baibulo kupwatika pa lijiganyo lililyose lyakusatenda ni ŵamwiŵasa mwawo. Kutendesya majiganyo ga Baibulo, kuchakamuchisya kuti aŵeje ŵakusangalala mu utumiki.

KULONGOLELA ŴANDU ŴACHIDWI KU GULU JA YEHOFA

²⁰ Patukwakamuchisya ŵandu kumanyilila Yehofa Mlungu, soni kuŵa ŵakulijiganya ŵa Yesu Klistu, jemanjajo akusaŵa mbali ja gulu ja Yehofa. Ŵakulijiganya Baibulo chachijawula pasogolo mwausimu soni chachiŵa ŵakomangale, naga akujimanyilila chenene gulu ja Yehofa ni kamulanaga najo. Kuli kwakusosekwa mnope kwajiganya mwampaka ajimanyile gulu soni kamulana najo. Mafidiyo soni kabuku kakuti Ana Ŵani Ŵakutenda Lisosa lya Yehofa Lelo Jino? ŵayipanganyisye kuti yikamuchisyeje mu mbalisi. Mtwe 4 wa buku ajino ukwetesoni yine yampaka yakamuchisye.

²¹ Pagambile kutanda kambilana ya m’Baibulo ni mundu, amkamuchisye jwakulijiganyajo kumanyilila kuti Yehofa akukamulichisya masengo likuga lyakwe pakusaka kuti masengo gakulalichila gatendekwe pachilambo chapasi. Amsalile kusosekwa kwa mabuku gakusala ya m’Baibulo, soni asale mwakusagapanganyila soni mwagakusawandila pachilambo chosope. Ŵakusakamula masengoga ali ŵandu ŵaŵalipeleche kwa Mlungu, jemanjaji akusakamula masengoga mwakwamba kulipeleka. Amŵende jwakulijiganya Baibulo kuti alongane najo ku misongano ja ku Nyumba ja Uchimwene. Mpaka asosekwesoni kumkamuchisya kumanyigana ni abale ni alongo pamisongano jekulungwakulungwa. Payakutendekwa yeleyi soni yine, jwakulijiganyajo akusalilolela jika mwakusatendela ŵandu ŵa Yehofa pakulosyana chinonyelo, chachili chimanyilo cha Aklistu ŵasyesyene. (Yoh. 13:35) Jwakulijiganyajo pakupitilisya kujimanyilila chenene gulu ja Yehofa, chachimŵandichila mnope Yehofa.

KAMULICHISYA MASENGO MABUKU GAKUSALA YA M’BAIBULO

²² Aklistu ŵandanda ŵaliji ŵakulimbichila pakulalichila Maloŵe ga Mlungu. Jemanjaji ŵalembaga Malemba gakuti akamulichisyeje masengo jika soni gakulijiganyila ku mpingo. Ŵalimbikasyaga ŵane kuti aŵalanjeje Maloŵe ga Mlungu ga usyesyene. Yaŵalembaga jemanjaji payala yaliji yamnono, soni ŵayiwonaga kuŵa yakusosekwa mnope. (Akolo. 4:16; 2 Tim. 2:15; 3:14-17; 4:13; 1 Pet. 1:1) Mboni sya Yehofa masiku agano, sikusakamulichisya masengo matala gasambano gakulembela Mabaibulo mamiliyoni gejinji soni yindu yejinji yakutukamuchisya kulijiganya Baibulo. Yinduyi yili tumapepala, tumabuku, mabuku, soni magasini yakusayipanganya m’yiŵecheto yejinji.

²³ Pakulalichila ngani syambone, alolechesye kuti akukamulichisya masengo yindu yakutukamuchisya kulijiganya Baibulo yajikusatupa gulu ja Yehofa. Kumanyilila umbone wapatile ligongo lyakuŵalanga soni kulijiganya mabuku ga Mboni sya Yehofa kuchalimbikasya kwagaŵila ŵane mabukugo.—Ahe. 13:15, 16.

²⁴ Intaneti lili litala lyekulungwa lyakusakamulichisya masengo ŵandu ŵajinji pakusaka kumanyilila yindu. Myoyo, konjechesya pa mabuku gakusala ya m’Baibulo, webusayiti jetu ja jw.org jilisoni litala lyakamuchisya mnope lyakuwandichisya ngani syambone. Ŵandu ŵajinji pachilambopa mpaka akamulichisye masengo makompyuta gawo pakusaka kuti apikanile maloŵe gejambule ga m’Baibulo soni m’mabuku gane m’yiŵecheto yejinji. Ŵandu ŵangakusasaka kukambilana nawo utenga wetu, soni ŵandu ŵakusatama mmadela gele kukusasoŵa ŵa Mboni sya Yehofa, mpaka akombole kumanyilila yatukusakulupilila kupitila pa webusayiti jetu ja jw.org msimangwawo.

²⁵ Myoyo tukusasalila ŵandu ya webusayiti jetu ja jw.org pandaŵi jilijose jatupatile upile wakutenda yeleyo. Naga msyenenyumba atuwusisye chiwusyo chakwamba ya yikulupi yetu, mpaka tukamulichisye masengo foni ja m’myala kapena kompyuta pakusaka kumlosya kwanga kwa chiwusyocho ndaŵi jijojo. Naga tuchingangene ni mundu jwakusaŵecheta chiŵecheto chine, kupwatikapo chiŵecheto chamakono, tukusosekwa kumsalila kuti ajawule pa webusayiti jetu kuti akapate Baibulo ni mabuku gakusala ya m’Baibulo m’chiŵecheto chakwe. Ŵakulalichila ŵajinji akusakamulichisya masengo mafidiyo ga pa webusayitiji pakusaka kutanda kukambilana ya m’Baibulo.

KULALICHILA MWAUPILE

²⁶ Yesu ŵasalile ŵandu ŵaŵampikanilaga kuti, “Jemanja mli mpela lilanguka lya chilambo chosope. . . . Mlosyeje lilanguka lyenu pameso pa ŵandu, kuti pitagawone masengo genu gambone ŵachimbichisye Atati ŵenu ŵakwinani.” (Mat. 5:14-16) Ŵakulijiganyawo ŵalosisye ndamo sya Mlungu mwakumsyasya Yesu, juŵatite, “Une ndili lilanguka lya ŵandu ŵa chilambo chapasi.” Yesu ŵapele chisyasyo chambone Aklistu mwakulosya “lilanguka lyakupeleka umi” kuti lyakamuchisye ŵandu ŵaŵampikanilaga.—Yoh. 8:12.

²⁷ Ndumetume Paulo ŵatupelesoni chisyasyo chakuti tukuyeje. (1 Akoli. 4:16; 11:1) Paŵaliji ku Atene, jwalakwe ŵalalichilaga ŵandu ŵiŵasimanaga nawo pamsika lisiku ni lisiku. (Mase. 17:17) Aklistu ŵa ku Filipi, ŵakuyaga chisyasyo chakwe. Ligongo lya yeleyi, Paulo ŵalembele jemanjajo kuti ŵatamaga “sikati ja ŵandu ŵa unami ni ŵakwasokonasya achimjawo.” Pasikati pa ŵanduŵa jemanjajo ŵasosekwaga “kulosya lilanguka mpela mwasikusaŵalila ndondwa pasi pano kutyochela kwinani.” (Afi. 2:15) Lelo jinosoni mpaka tulosye lilanguka lya usyesyene wa Uchimwene mukaŵechete soni yitendo yetu patupatile upile wakwasalila ŵane ngani syambone. Kusala yisyene, kulosya chisyasyo chambone mwakutenda yindu mwachilungamo, soni mwakulupichika mpaka kwakamuchisye ŵandu kumanyilila kuti tuli ŵakulekangana ni chilambochi. Nambope, naga tukwasalila ngani syambone jemanjaji chachimanyilila ligongo lyakwe tuli ŵakulekangana ni chilambo.

²⁸ Ŵandu ŵa Yehofa ŵajinji akusiŵasalila ngani syambone ŵandu ŵakusakamula nawo masengo, ŵakusalijiganya nawo sukulu, ŵali nawo paulendo, nambosoni ŵakusasimana nawo kulikose pakutenda yindu ya lisiku ni lisiku. Patuli paulendo, mpaka tukomboleche kwasalila ngani syambone ŵatuli nawo. Mundu jwalijose akusosekwa alolechesyeje upile wampaka awukamulichisye masengo kuti achenje kunguluka wamba kuŵa kutendela umboni. Kwende ndaŵi syosope tuŵeje ŵakoseka kumlalichila jwalijose pandaŵi jilijose jakuŵajilwa.

²⁹ Kumbuchila kuti patukulalichila tukusaŵa tuli mkumlumba Mkupanganya jwetu soni kuyikasya uchimbichimbi ku lina lyakwe, kuchitulimbikasya kuti tulalichileje ndaŵi jilijose. Konjechesya pelepa, tuchikombola kwakamuchisya ŵandu ŵamtima wambone kummanyilila Yehofa, kuti nombenawo amtumichileje ni kola chembecheyo cha umi chatukusakola mwakumkulupilila Yesu Klistu. Yehofa akusasangalala ni kulimbichila kwatukusalosya soni akusawuwona kuŵa utumiki wapajika.—Ahe. 12:28; Chiw. 7:9, 10.

DELA JAKULALICHILA

³⁰ Chakulinga cha Yehofa chili chakuti utenga wa Uchimwene ulalichidwe pachilambo chosope, m’misinda ni m’misi mwakwe. Pa ligongoli, ofesi ja nyambi jikusapeleka dela ku mpingo uliwose soni kwa jwakulalichila jwalijose jwakusatumichila m’madela jakutalichila. (1 Akoli. 14:40) Yeleyi yikulandana ni yaŵalinganyisye Mlungu m’yaka 100 yandanda. (2 Akoli. 10:13; Aga. 2:9) Ligongo lyakuti masengo gakulalichila ya Uchimwene gakutupa m’masiku gakumalisya gano, kulinganya chenene madela gakulalichila ga mpingo mpaka kukamuchisye kuti tukomboleje kutenda yejinji.

³¹ Jwakulolela utumiki ni jwakusalinganya madela gakulalichila ga mumpingo. Jwakutumichila jwakamuchisya mpaka akamuchisye pa masengo gakugaŵa madela. Pana mitundu jiŵili ja madela, dela ja kagulu ka utumiki soni ja mundu jika. Kumalo kwele mpingo ukwete dela jamwana, ŵakulolela tumagulu chachipochela kadela kele ŵakulalichila ŵa mkagulu kawo chakalalichileje. Naga mpingo ukwete dela jekulungwa jakulalichila, jwakulalichila jwalijose mpaka apochele kadela kakwe kakuti alalichileje.

³² Jwakulalichila jwakwete kadela kakwe kakulalichila mpaka akombole kulalichila atamose pali pangali msongano wakosechela utumiki wamumgunda kapena naga ngakombola kuja kusimanikwa ku kagulu kakwe. Mwambone, ŵakulalichila ŵane mpaka asagule kadela kakali chiŵandika malo gakusakamulila masengo kuti akombolecheje kulalichila musi pandaŵi jakupumula kapena paŵelwiche ku masengo. Maŵasa gane gakusasagula kadela kakulalichila chiŵandika ni kwakusatama, kuti gakomboleje kulalichila kwigulo. Kola kadela kakulalichila kapakuŵandika mpaka kumkamuchisye jwakulalichila kamulichisya masengo chenene ndaŵi jakwe pakulalichila. Mpaka yikombolechesoni kuti kagulu ka utumiki kalalichileje mu kadela ka jwakulalichila jwine. Naga akusaka kola kadela kakulalichila kajika, mpaka akaŵende kwa jwakusamalila dela ja mpingo.

³³ Chinga kadela kakulalichilako kali kakakuga ka utumiki kapena ka jwakulalichila jika, jwakulalichilajo akusosekwa kulolechesya kuti alalichile mundu pa nyumba jilijose. Kadela kalikose kakusosekwa kulalichidwa mwadongosolo. Jwakulolela kagulu kapena jwakulalichila jwapochele kadela akusosekwa kulolechesya kuti amalisisye kulalichila mu kadelako kwa miyesi mcheche. Pamalisisye kulalichila kadela kosope akusosekwa kumsalila jwakusamalila madela. Mwakamulana ni mwayiŵelele yindu jwakulolela kagulu kapena jwakulalichilajo mpaka asagule kuti apitilisye kulalichila mu kadelako kapena kuwusya kadelako kwa jwakusamalila dela ja mpingo

³⁴ Naga ŵakulalichila wosope mu mpingo akutenda yindu mwakamulana, mpaka yikamuchisye kuti alalichile dela josope wa mpingo wawo. Mpaka yikamuchisyesoni kuti ŵakulalichila ŵane akawilisyaga kulalichila mu kadela kakusalalichila kala jwine, ligongo yikusiyatengusya ŵandu ŵatukusalalichila. Kutenda yeleyi kukusalosya kuti tukusaganichisya abale ŵetu soni ŵandu ŵa mu kadelako.

KULALICHILA KWA ŴANDU ŴA YIŴECHETO YOSOPE

³⁵ Mundu jwalijose akusasosekwa kulijiganya yakwamba Yehofa Mlungu, Mwanagwe, soni Uchimwene wakwe. (Chiw. 14:6, 7) Tukusasachilila kwakamuchisya ŵandu ŵa yiŵecheto yosope kolanga lina lya Ambuje kuti chakulupuche, soni kwakamuchisya kuti awale umundu wa Chiklistu. (Alo. 10:12, 13; Akolo. 3:10, 11) Ana pakusapagwa yakusawusya yamtuli patukulalichila m’madela gagakwete ŵandu ŵa yiŵecheto yejinji? Ana mpaka tutende uli kuti twakamuchisye ŵandu ŵajinji kupikana utenga wa Uchimwene m’chiŵecheto chakusachipikana chenene?—Alo. 10:14.

³⁶ Dela jakulalichila ja mpingo uliwose akusajigaŵa mwakamulana ni chiŵecheto. Myoyo m’madela gele ŵandu akusaŵecheta yiŵecheto yakulekangana, ŵakulalichila ŵakutyochela m’mipingo jakulekanganalekangana mpaka alalichileje mudela jimo. Muyakutendekwa yeleyi, ŵakulalichila akusosekwa kulolechesya kuti akwalalichila ŵandu ŵa chiŵecheto chawo. Yeleyi yikupwatikaposoni pakuŵilanjila ŵandu ku yakutendekwa yine yapachaka. Nambo pakulalichila pelanga soni mwaupile, ŵakulalichila mpaka aŵechete ni mundu jwalijose, soni kumgaŵila mabuku gakusala ya m’Baibulo ga m’chiŵecheto chilichose.

³⁷ Ndaŵi sine, mipingo ja yiŵecheto yine mpaka jilepeleje kumalisya kulalichila madela gawo gakutalichila. Naga yeleyi yitendekwe, ŵakulolela utumiki ŵa mipingo jakwayidwajo akusosekwa kambilana kuti akamulile pamo masengo gakulalichila delajo. Yeleyi mpaka yikamuchisye kuti jwalijose mu delajo apikane utenga wa Uchimwene nambosoni kuti masengo gakulalichila gatendekwe mwadongosolo.—Mis. 15:22.

³⁸ Nambi uli naga mundu jwatumsimene pa mlango akuŵecheta chiŵecheto chine? Tukamlekaga pakuganisya kuti jwakulalichila jwakusakombola chiŵecheto chakwe chachiyika ni kumlalichila. Ŵakulalichila ŵane alijiganyisye kulalichila mwachidule mu chiŵecheto changakuchimanyilila chenene chachikusimanikwa mu dela jawo. Mpaka tumlosye mundujo mwampaka ajigalile mabuku ga mchiŵecheto chakwe pa jw.org, kapena mpaka tumpatile buku ja mu chiŵecheto chakwe.

³⁹ Naga mundujo akulosya chidwi chisyesyene, tukusosekwa kupata mundu jwakuŵajilwa jwampaka amkamuchisyeje mu chiŵecheto chakusapikana. Mpaka tuwusalile mpingo wapakuŵandichila wawukusatenda misongano m’chiŵecheto chakwe. Naga jwalakwejo akusaka kuti asimane ni mundu jwakusaŵecheta chiŵecheto chakwe, mpaka tumlosye mwampaka alembele adilesi jakwe pa webusayiti ja jw.org. Ofesi ja nyambi tijichipata jwakulalichila, kagulu kapena mpingo wapakuŵandichila wampaka umkamuchisyese mundujo.

⁴⁰ Tukusosekwa tumjendelejepe mundu jwachidwijo mpaka pachachitusalila kuti jwakulalichila jwine jwakusaŵecheta chiŵecheto chakwe amjendele. Ndaŵi sine, ofesi ja nyambi mpaka jasalile achakulungwa ŵa mumpingowo kuti mundu jwakusaŵecheta chiŵecheto cha mundujo nganapatikana. Naga yeleyi yitendekwe, tukusosekwa kutenda yampaka tukombole kuti tumkamuchisyejepe msyenenyumbajo. Naga yili yakomboleka mpaka tulijiganyeje najo Baibulo, mwine pakamulichisya masengo mabuku ga m’chiŵecheto chakwe. Patukukamulichisya masengo yiwulili soni kumsalila mundujo kuti aŵalanjeje malemba gagaŵisile, mpaka tumkamuchisye mundujo kupikanichisya yijiganyo yine ya m’Baibulo. Mundu jwine jwamwiŵasa mwakwe jwakusamanyilila chenene chiŵecheto chakwe soni chiŵecheto chetu, mpaka akamuchisyeje kugopolela pakulijiganya.

⁴¹ Kuti tumlongolele mundu jwachidwi ku gulu ja Mlungu, tukusosekwa kumŵilanjila ku misongano jetu jampingo atamose kuti nganaŵa apikanichisye yosope yampaka yiŵechetedweje. Patukuŵalanga malemba, mpaka tumkamuchisye kupata malembago mu Baibulo ja chiŵecheto chakwe naga jipali. Kusongana ni ŵandu ŵane mumpingo mpaka kumlimbikasye mnope soni kumkamuchisya kuti ajawule pasogolo mwausimu.

⁴² Tumagulu: kali kagulu ka ŵakulalichila kakakusalalichila mu chiŵecheto changachikuŵechetedwa mu mpingo wawo atamose kuti mu kaguluko muli mwangali jwamkulungwa kapena jwakutumichila jwakamuchisya jwakuti atendesyeje misongano mu chiŵechetocho. Nyambi mpaka jijitichisye mpingo kuti ukole kaguluka naga:

1. (1) Kakwete ŵandu ŵapawinji mu dela ja chiŵecheto cha mpingowo.

2. (2) Pana ŵakulalichila ŵakusamanyilila kapena ŵakusachilila kulijiganya chiŵechetocho.

3. (3) Achakulungwa wosope ŵa mumpingo ali ŵakusachilila kulongolela pa masengo gakulalichila mu chiŵechetocho.

Naga achakulungwa wosope ŵa mumpingo akusaka kukakamuchisya kaguluka akusosekwa kukambilana kaje ni jwakulolela dela. Jwalakwe mpaka amanyilile mipingo jine jajikulalichila ŵandu ŵachiŵecheto chelecho. Jwalakwe ni jwampaka amanyilile mpingo wampaka uŵe pa malo gambone kukakamuchisya kaguluka. Yeleyi payitendekwe, mpingo wampaka usagulidwewo ukusosekwa kulembela chikalata ofesi ja nyambi chakuŵenda kuti awujitichisye kuti ukamuchisyeje kaguluko.

⁴³ Magulu: Ofesi ja nyambi mpaka jijitichisye mpingo kuti ukole gulu naga:

1. (1) Ŵandu ŵajinji akwete chidwi soni yikuwoneka kuti gulu ja chiŵechetocho mpaka jikuleje..

2. (2) Pana ŵakulalichila ŵane ŵakusamanyilila kapena ŵakulijiganya chiŵechetocho.

3. (3) Pana jwamkulungwa jwa mumpingo kapena jwakutumichila jwakamuchisya jwampaka atendesyeje atamose msongano umo m’chiŵechetocho kapena kutendesya mbali jimo ja misongano mpela ngani ja wosope kapena Lijiganyo lya Sanja ja Mlonda mu chiŵecheto cha gulujo.

Naga mpingowo ukwanilisya yeleyi pa mlingo wambone, achakulungwa wosope ŵa mumpingo akusosekwa kutumisya chikalata ku ofesi ja nyambi chakuŵenda kuti awujitichisye kulongolela guluji. Akusosekwa kulondesya yosope yakusosechela kukwanilisya. Jwamkulungwa kapena jwakutumichila jwakamuchisya jwakulolela guluji akusakolanjidwa “jwakulolela gulu” kapena “jwakutumichila gulu.”

⁴⁴ Guluji pajitamilikasisye, achakulungwa ŵa mu mpingo ŵakulolela guluji akusasagula naga mpaka ajonjesye mbali ja misongano jine kuti jitendekweje mu guluji soni kuti jitendekweje kalingwa pa mwesi. Mpaka alinganyesoni yakuti atendeje misongano jakosechela utumiki. Masengo gosope ga guluji gakusalongoleledwa ni achakulungwa ŵakulolela gulujo. Achakulungwaŵa akusosekwa kuti apelecheje malangiso soni chikamuchisyo pa yakusosechela ya guluji. Jwakulolela dela pakukunguluka ni guluji mkati mwa wiki jakungulusya mpingo wawukulolela guluji chachilemba lipoti lyakujisalila ofesi ja nyambi mwajikwawulila pasogolo guluji soni chikamuchisyo chachikusosechela. Pandaŵi jakuŵajilwa naga yili yakomboleka, guluji akusajijitichisya kuŵa mpingo. Naga wosope akukamulichisya masengo yakusasala Yehofa Mlungu, jwalakwe akusasangalala.—1 Akoli. 1:10; 3:5, 6.

KULALICHILA NI GULU

⁴⁵ Aklistu ŵaŵalipeleche kwa Mlungu akwete udindo wakwasalila ŵane ngani syambone. Pana matala gamajinji gakulalichilila, nambo ŵajinjiwe tukusasangalala kwawula mu utumiki wa mumgunda ni achimjetu. (Luk. 10:1) Ligongo lya yeleyi, mpingo uliwose ukusachingangana mkati soni kumbesi kwa wiki kuti ujawule kulalichila. Masiku gakupumula pamasengo gakusaŵasoni upile wambone wakulalichila ni gulu, ligongo lyakuti ŵajinji akusakola lipesa. Komiti ja Utumiki ja Mpingo jikusalinganya misongano jakosechela utumiki wa mumgunda mwakamulana ni ndaŵi soni malo gakuŵajilwa kwa ŵandu wosope. Komitiji mpaka jilinganye yakuti misonganoji jitendekweje musi ni kwigulo.

⁴⁶ Kulalichila ni gulu kukusakamuchisya ŵakulalichila kuti ‘alimbikasyaneje jwine ni mjakwe.’ (Alo. 1:12) Ŵakulalichila ŵasambano mpaka ajendeje yalumo ni ŵakulalichila ŵasyoŵelele soni ŵakusamanyilila chenene kulalichila, kuti ŵajiganyeje. Mmadela gakogoya, mpaka yiŵe yakusosekwa kuti jwakulalichila ajendeje ni mjakwe. Atamose palingenye yakwenda jika mu kadela kawo, nambo kusimanikwa pa msongano wakosechela utumiki kukusalimbikasya wosope. Kwamba kumanyilila kuti ŵane akulalichilasoni mbali jine mu dela jijojo mpaka kwalimbikasye. Apayiniya soni ŵane ngakusosekwa kuti asimanikweje pa msongano uliwose wakosechela utumiki wa mumgunda wawulinganyisye mpingo, naga misongano jeleji jikusatendekwa lisiku lililyose. Nambope, jemanjaji mpaka asosekwe kusimanikwaga pamisongano jine jakosechela utumiki wa mumgunda jajikusatendekwa wiki jilijose.

⁴⁷ Kwende wosope tukuyeje chisyasyo chaŵatupele Yesu soni ŵandumetume ŵakwe. Ngatukukayichila kuti naga tukamula nawo mwakulimbichila masengo gakulalichila ngani syambone sya Uchimwene, Yehofa chachitujaliwawa pamasengo getu.—Luk. 9:57-62.