Tukamulicisyeje Masengo Kabuku Kakuti Ngani Syambone
1. Ana kabuku kakuti Ngani Syambone ŵakalinganyisye catuli?
1 Mpela mwatwalijiganyicisye mu Undumetume wa Ucimwene wa mwesi wa July, cimo mwayindu yatukusosekwa kuyikamulicisya masengo patukulalicila cili kabuku kakuti Ngani Syambone Kutyocela Kwa Mlungu! Malemba gagakusimanikwa m’kabukuka nganagakamula maloŵe, m’yoyo, msyene nyumba mpaka asangalale pakulijiganya malembago kutyocela m’Baibulo. Mabuku gejinji akusagalinganya m’litala lyakuti jwakuŵalanga mpaka alijinganye pajika, nambo kabukuka kuti mundu akapikanicisye, akusosekwa kumjiganyaga. M’yoyo, patumpele mundu tukusosekwa kulinjilila katende kalijiganyo lya Baibulo ni cakulinga cakuti msyene nyumbajo asace kulijiganya ngani syambone kutyocela m’Baibulo.—Mat. 13:44.
2. Ana mpaka akamulicisye masengo catuli kabuku ka Ngani Syambone paulendo wandanda?
2 Paulendo Wandanda: mpaka aŵecete kuti, “ŵandu pacilambopa akudandawula mwatiyiŵele yindu kusogoloku. Ana akuganisya kuti yindu ciŵe cenene? [Ajembeceye kuti ajanje.] Baibulo jikwete ngani syambone syampaka situpe cembeceyo. Yiwusyo yine yajikusajanga Baibulo yili ayi.” Ampe msyene nyumbajo kabukuko, soni amsalile kuti asagule ciwusyo cacinonyele pa yiwusyo yayikusimanikwa kumbesi kwa kabukuko. Kaneko alinjilile kutenda lijiganyo lya Baibulo pakamulicisya masengo ndime jandanda ja mtwe wasagwile. Litala line ni kum’wusya msyene nyumbajo kuti asagule ciwusyo cacinonyele pa mtwe wampaka asagule wawojo soni alinjilile mwampaka apatile kwanga kwa m’Baibulo pakamulicisya masengo kabukuko. Naga lijiganyolyo likwete mbali jakamulana ni fidiyo jine jakwe ŵane akusajilosya pakulijiganya.
3. Asale mwampaka tutendele lijiganyo lya Baibulo pakamulicisya masengo kabuku kakuti Ngani Syambone.
3 Mwampaka Atendele Lijiganyo: (1) Aŵalanje ciwusyo cacikwete nambala jepiliwu mnope kuti amkamucisye msyene nyumbajo kumanyilila cakusosekwa mnope kulijiganya. (2) Aŵalanje ndime. (3) Aŵalanje malemba gagalembile kuti aŵalanje, soni akamulicisyeje mwalundu yiwusyo kuti amkamucisye msyene nyumbajo kumanyilila kwanga kwa ciwusyo candanda cacikwete nambala cila. (4) Naga jipali ndime jine paciwusyo cicoco awilisye kutenda yatusasile pa 2 soni 3. Naga ciwusyo cine cikukamulana ni fidiyo jine jakwe nambo nganajilosyepo kwa msyene nyumbajo, komboleka kutenda yeleyi mkati mwakutagulilana kwawo. (5) Pambesi pakwe am’wusye msyene nyumbajo kuti asale kwanga kwa ciwusyo cila ni cakulinga cakuti alole naga jupikanicisye cenene.
4. Ana cici campaka citukamucisye kamulicisya masengo kabukuka cenene?
4 Akamanyilileje cenene kabukuka. Akakamulicisyeje masengo pa ndaŵi jakuŵajilwa. Mkanatendesye lijiganyo lya Baibulo lililyose aganicisyeje ya jwakulijiganyajo, soni litala lyambone lyakumkamucisya kuganicisya pakamulicisya masengo malemba gagali mu lijiganyolyo. (Miy. 15:28; Mase. 17:2, 3) Pakumanyilila yejinji soni pakukombola kutenda cenene, cacilola kuti kabukuka kali kambone kamulicisya masengo pakwajiganya ŵandu usyesyene.