Akusosekwa kukosechela apano kuti chatame m’chilambo chasambano
Chilambo Chasambano Chiŵandichile
Yehofa ŵapanganyisye chilambochi ni chakulinga chakuti ŵandu ŵambone atamejemo kwangamala. (Salimo 37:29) Jwalakwe ŵaliŵisile liŵasa lyandanda lya Adamu ni Hawa mumgunda wakusalala wa Edeni. Yehofa ŵapele jemanjaji soni ŵanache ŵawo udindo wakusamalila chilambochi.—Genesesi 1:28; 2:15.
Apano chilambochi nganichiŵasoni paladaiso mpela muŵasachilaga Mlungu. Nambotu jwalakwe nganachenga nganisyo syakwe. Ana Mlungu chachitenda chichi kuti chilambochi chiŵesoni paladaiso? Mpela mwatuyiwonele mungani sipite sila, jwalakwe ngasajonanga chilambochi. Mmalo mwakwe alinganyisye yakuti ŵandu ŵakulungama chatame pachilambopa. Ana pandaŵiji umi uchiŵa wamtuli?
Tuchikola boma jimo
Pachangakaŵapa uchimwene wakwinani chiwutande kulamulila pachilambopa. Pandaŵiji ŵandu pachilambopa chachiŵa ŵakusangalala, ŵakamulana soni chachisangalalaga ni masengo gawo. Mlungu ŵamsagwile Yesu kuti chaŵe mwenye. Yesu chachitendaga yindu yakuti ŵandu asangalaleje. Yeleyi yili yakulekangana ni yakusatenda ŵakulamulila ŵa masiku agano. Jwalakwe chachalamulilaga ŵandu mwachinonyelo, chachiŵa jwachanasa, jwambone mtima soni jwachilungamo.—Yesaya 11:4.
Tuchiŵa ŵakamulana
Ŵandu ngasasagulanaga ligongo lyakulekangana mtundu kapena chilambo. Ŵandu wosope pachilambopa chachiŵa ŵakamulana. (Chiwunukuko 7:9, 10) Jemanjaji chachimnonyelaga Mlungu soni chachinonyelanaga jwine ni mjakwe. Chachitendaga yindu mwakamulana pakusaka kukwanilisya chakulinga cha Mlungu, chachili kusamalila chilambochi.—Salimo 115:16.
Ngasikupagwa ngosi syachilengedwe
Uchimwene wa Mlungu pawuchitanda kulamulila chilambo chapasichi, Mlungu chachimasya ngosi sya chilengedwe. (Salimo 24:1, 2) Yesu paŵaliji pachilambopa ŵakamulichisye masengo machili gaŵampele Mlungu pakujitondoya mbungo jamachili. (Maliko 4:39, 41) Mu ulamusi wa Klistu pangali juchachijogopaga kuti chikutendekwe ngosi sya chilengedwe. Pandaŵiji ŵandu ngasajonangaga yindu ya chilengedwe soni tachiŵa pamtendele ni yinyama.—Hoseya 2:18.
Tuchikola yilu yambone soni yakulya yejinji
Pandaŵiji pangali juchachidandawula kuti ngulwala, juchachikalambala kapena kuwa. (Yesaya 35:5, 6) Ŵandu chachisangalalaga ni yindu ya m’chilengedwe mpela muyaŵelele ni liŵasa lyandanda mumgunda wa Edeni. M’chilambo chasambano muchimela yakulya yejinji mpela muyaŵelele mumgunda wa Edeni. (Genesesi 2:9) Mpela muyaŵelele ni Aisalaeli, m’chilambo chasambano jwalijose ‘chachikola yakulya yejinji.’—Lefitiko 26:4, 5.
Tuchiŵa pabata soni pamtendele
Mu ulamusi wa Mlungu ŵandu chachiŵa pamtendele soni chachitendelanaga yindu mwachinonyelo ni mwachilungamo. Kuchiŵa kwangali ngondo, maulamusi ga kwalagasya ŵandu soni jwalijose chachikola yindu yakusosechela paumi. Baibulo jasasile kala kuti, “Jwalijose tachitama mu mtendele pasikati pa mgunda wakwe wa mipeleya ni ngunju, soni pangali jutachajogoya.”—Mika 4:3, 4.
Tuchikola nyumba syambone soni tuchisangalalaga ni masengo getu
Jwalijose tachitaŵa nyumba ni kutamamo soni tuchisangalalaga ni masengo getu. Baibulo jikusati wosope ŵachachitama m’chilambo chasambano “ngasakamula masengo pachabe.”—Yesaya 65:21-23.
Tuchikola majiganyo gambone
Baibulo jasasile kala kuti, “Ŵandu pa chilambo chosope chapasi tachiŵa wegumbale ni lunda lwakwamanyilila AMBUJE.” (Yesaya 11:9) Ŵandu ŵachachitama m’chilambo chasambano, chachilijiganya lunda lwapenani kutyochela kwa Yehofa soni kutyochela ku yindu yiŵapanganyisye jwalakwe. Ŵanduŵa ngasakamulichisya masengo lunda lwawo pakupanganya yida ya ngondo. (Yesaya 2:4) M’malo mwakwe chachilijiganya yampaka atende kuti atameje mwamtendele soni kuchisamalila chilambo.—Salimo 37:11.
Tuchikola umi wangamala
Mlungu ŵachipanganyisye chenene chilambochi ni chakulinga chakuti tusangalaleje lisiku lililyose. Jwalakwe jwasakaga kuti tutameje ni umi mpaka kalakala. (Salimo 37:29; Yesaya 45:18) Kuti chakulinga chakwechi chikwanilichikwe, Mlungu “tachichimasya chiwa mpaka ndaŵi jangali mbesi.” (Yesaya 25:8) Baibulo jasasile kala kuti, “Ngasipapagwa chiwa, chanasa, kulila, kapena kupikana yipwetesi.” (Chiwunukuko 21:4) Mlungu chachapa upile wakutama ni umi wangamala ŵandu ŵachachikulupuka mbesi ja chilambochi nambosoni ŵachachijimuka ku ŵawe.—Yohane 5:28, 29; Masengo 24:15.
Apano ŵandu mamiliyoni gejinji akukosechela kutama m’chilambo chasambano. Chilambochi chisigele panandi kwika. Ŵanduŵa akusalemwesya yindu yine nambope akutenda yampaka akombole kuti aŵe ŵandu ŵambone. Ana akusatenda yeleyi chamtuli? Akusalijiganya yakwamba Yehofa Mlungu nambosoni Yesu Klistu juŵamtumile jwalakwe.—Yohane 17:3.
Awungunye yampaka atende kuti chakulupuche ni kutama m’chilambo chasambano. Aŵende kuti jwa Mboni sya Yehofa ŵajiganyeje Baibulo pakamulichisya masengo buku ja Asangalaleje Mpaka Kalakala.