LIJIGANYO 12
Cinonyelo Soni Kwaganicisya Ŵane
1 Atesalonika 2:7, 8
YACITULIJIGANYE: Kaŵecete kawo kalosyeje yisyesyene mwakupikanila mumtima kwa ŵakupikanila ŵawo, soni ŵalosyeje kuti akusaka kwakamucisya.
MWAMPAKA ATENDELE:
Ŵaganicisyeje ŵakupikanila ŵawo. Pakukosecela ngani jawo, aganicisyeje ya ŵakupikanila ŵawo soni kumanyilila yakusawusya yakusasimana nayo. Aganicisyejesoni mwakupikanila mumtima.
Asaguleje maloŵe gawo mwakusamala. Awungunyeje maloŵe gagali gakamucisya, gakulimbikasya soni gakupeleka macili kwa ŵakupikanila ŵawo. Aŵambaleje kuŵeceta yindu yampaka yakuŵasye soni ngakusosekwa kuŵeceta mwangaŵajilwa kwa ŵandu ŵangakusakulupilila Yehofa kapena kunyosya yikulupi yawo.
Atendeje lung’wanu ni ŵane. Kaŵecete soni kakamulicisye masengo ka makono gawo pakuŵeceta kalosyeje kuti akusaŵaganicisya yisyesyene ŵakupikanila ŵawo. Akusosekwa kulosyasoni yeleyi pangope jawo mwakumwetulila ndaŵi ni katema.