ATENDEJE MAULENDO GAKUWILISYA
LIJIGANYO 8
Aŵeje Ŵakuwusimana Mtima
Lilemba: “Chinonyelo chili chakuwusimana mtima.” —1 Akoli. 13:4.
Yaŵatesile Yesu
1. Alolele FIDIYO, kapena aŵalanje Yohane 7:3-5 soni 1 Akolinto 15:3, 4, 7. Kaneko ajanje yiwusyo ayi:
Ana achalongo achimjakwe ŵa Yesu ŵawupochele chamtuli utenga wakwe pandanda?
Ana chichi chachikulosya kuti Yesu nganaleka kumkamuchisya Yakobo juŵaliji mlongo mjakwe?
Ana Yaŵatesile Yesu Yikutujiganya Chichi?
2. Tukusasosekwa kuŵa ŵakuwusimana mtima ligongo lyakuti ŵandu ŵane yikusiyajigalila ndaŵi jelewu kuti apikanile ngani syambone.
Amsyasyeje Yesu
3. Alinjeje matala gane gakulalichilila. Naga mundu jwine ngakwitichisya mwachitema kuti amjiganyeje Baibulo, akamkanganichisyaga. Naga yili yakomboleka, akamulichisyeje masengo mafidiyo soni ngani syampaka simkamuchisye kupikanichisya yayikusatendekwa pa lijiganyo lya Baibulo.
4. Akalandanyaga ŵandu. Amanyilileje kuti mundu jwalijose ali jwakulekangana ni mjakwe. Naga mundu jwa m’liŵasa lyawo kapena mundu jwine juŵakamulene najo ulendo wakuwilisya akukana kuti alijiganyeje najo Baibulo, amanyilileje chachikumtendekasya kukanako. Ana jwalakwe akukana ligongo lya yindu yine yakusakulupilila kudini jakwe? Ana jwalakwe akwajogopa ŵachibale ŵakwe kapena achimjakwe? Ampeje ndaŵi jakuti aganichisyeje yindu yamjiganyisyeyo soni amkamuchisyeje kumanyilila kusosekwa kwakulijiganya Baibulo.
5. Ampopeleleje mundu juŵalosisye chidwi. Amŵendeje Yehofa kuti ŵakamuchisyeje kola nganisyo syambone soni kuti atendeje yindu mwakusamala. Amŵendeje Yehofa kuti ŵakamuchisye kumanyilila ndaŵi jambone jampaka aleche kulijiganya ni mundu jwangakulosya chidwi.—1 Akoli. 9:26.