Yiwusyo Yakutyochela Kwa Ŵakuŵalanga
Mwakamulana ni Salimo 61:8, NWT, ana jwamasalimo Daudi pajwaŵechetaga kuti chachililumba lina lya Mlungu mpaka “kalakala” jwagopolelaga kuti ngasawa?
Iyayi. Daudi pakulemba maloŵega nganagopolelaga kuti ngasawa.
Aganichisye maloŵe gajwalembile jwalakwe mu ndime jeleji soni mu ndime sine. Jwalakwe jwatite, “Tinjijimba nyimbo syakulilumba lina lyawo mpaka kalakala, kuti lisiku ni lisiku nayikwanilisye yanalumbile.” “Ŵalakwe AMBUJE Mlungu jwangu, ngwatogolela ni mtima wangu wosope, tinjililumba lina lyawo yaka yosope.” “Tinalichimbichisye lina lyawo kwa yaka yosope.”—Sal. 61:8; 86:12; 145:1, 2.
Daudi pakulemba ndime syelesi nganagopolelaga kuti ngasawa. Jwalakwe jwamanyililaga kuti Yehofa jwasasile kuti yakuyichisya ya ulemwa wa ŵandu yili chiwa. Mwamti Daudi jwamanyililaga kuti ali jwakulemwa. (Gen. 3:3, 17-19; Sal. 51:4, 5) Jwamanyililagasoni kuti atamose achalume ŵakulupichika mpela Abulahamu, Isaki, soni Yakobo ŵawile. Nambosoni Daudi jwamanyililaga kuti lisiku line chachiwa. (Sal. 37:25; 39:4) Nambope maloŵe gakwe gagakusasimanikwa pa Salimo 61:8, gakusalosya kuti jwalakwe jwaliji jwakusachilila kumlumba Mlungu mpaka kalakala. Yeleyi yikugopolela kuti kwa umi wakwe wosope.—2 Sam. 7:12.
Ndaŵi sine, Daudi jwalembaga yindu yaŵasimanaga nayo paumi wakwe, mpela mwatukusayiwonela pa tumaloŵe twatuli kundanda kwa Salimo chaputala 18, 51, soni 52. Mu Salimo chaputala 23, Daudi akumlondesya Yehofa kuti ali mpela m’busa jwakusapeleka malangiso, maloŵe gakutamika mtima pasi, soni jwakusamchenjela. Daudi jwaliji mpela m’busa jweleju. Nambosoni jwalakwe jwasakaga kumtumichila Mlungu ‘kwa umi wakwe wosope.’—Sal. 23:6.
Akumbuchile kuti Yehofa ni juŵamsalilaga Daudi kulemba yindu yosope yajwalembaga. Yine mwa yindu yajwalembileyi, yaliji yakulochesya yakwamba yindu yayichitendekwa msogolo. Mwachisyasyo, mu Salimo 110, Daudi jwalembile yakwamba ndaŵi jele Ambuje ŵakwe ‘chachitama kumkono wamlyo wa [Mlungu]’ kwinani ni kupochela machili gekulungwa. Kuti atende chichi? Kuti ŵagomeche adani ŵa Mlungu soni ‘kulamula ngosyo sya ŵandu’ pachilambopa. Daudi jwaliji nangolo jwa Mesiya, juchachilamulila ali kwinani soni chachiŵa ‘jwakutaga mbopesi kwa yaka yosope.’ (Sal. 110:1-6) Yesu jwasasile kuti yakulochesya ya pa Salimo 110 yagambaga ya jwalakwejo, soni yaliji yakuti yichikwanilichikwa kusogolo.—Mat. 22:41-45.
Pelepatu, Yehofa ŵamlongolele Daudi kulemba yindu yayatendekwe mundaŵi jakwe soni yindu yayichitendekwa kusogoloku pandaŵi jichachimjimusya kuŵawe. Pandaŵijo, jwalakwe chachisangalala kumlumba Yehofa mpaka kalakala. Yeleyi yikutukamuchisya kumanyilila kuti, pa Salimo 37:10, 11, soni 29 pakusasala ya yindu yayatendekwe kala, soni yayichitendekwa kusogoloku pachilambo chosope Mlungu pachachikwanilisya maloŵe gakwe.—Alole ndime 8 mungani jajili m’magasiniji ja mtwe wakuti, “Chimchiŵa ni Une mu Paladaiso.”
Myoyo pa Salimo 61:8, soni pa ndime sine syakulandana ni ndimeji pakusalosya kuti Daudi jwasakaga kumchimbichisya Yehofa mpaka chiwa chakwe. Pakusalosyasoni yachachitenda Daudi pandaŵi jele Yehofa chachimjimusya jwalakwe kuŵawe.