Guruy Ni 3

Ngan Pagan’Uy Ngak “Fare Tapigpig Nib Yul’Yul’ Mab Gonop”

“Mini’ e en ni ir fare tapigpig nib yul’yul’ mab gonop?” I fith Jesus Kristus e re deer nem me tamilangnag reb e fanathin nib ga’ fan. Aram bang ko ‘fare pow’ ni ke pi’ u murung’agen e “ngiyal’ ni tomren e fayleng.” (Matt. 24:3, 42-47) I tamilangnag Jesus ni fare “tapigpig” e ra par ni boor pa’ u puluwon u nap’an e ngiyal’ ko tomur. Ra mil fan ngak “fare tapigpig” urngin ban’en nib l’ag ko Gil’ilungun Got u fayleng ma mmil fan ngak ni nge duruw’iy girdien Got ko ggan nib spiritual “ko ngiyal’ nib puluw.” Miki gaar Jesus: “Rib ga’ ba felfelan’ nra tay e re tapigpig nem ni faanra sul e masta rok nga tabinaw me pirieg ni ereray e n’en ni be rin’! Nggog ngomed nrib mudugil nra tay fare tapigpig ni ir e nge fil fan urngin ban’en rok ngak.”

Bay boch e deer ni sum u murung’agen e re fanathin ney. Mini’ e “fare tapigpig”? Mang “urngin ban’en rok”? Uw rogon ni bay rogodad ko re fanathin ney ni aram e thin ko profet? Pi deer ney e gathi dariy fan. Ya faan gad ra nang e pi n’en nem ma nge pagan’dad ko “fare tapigpig nib yul’yul’ mab gonop” ma ra ayuwegdad ngad rin’ed e tin nib m’agan’ Jehovah ngay.

NGAN TAMILANGNAG KO MINI’ “FARE TAPIGPIG NIB YUL’YUL’ MAB GONOP”

I weliy Jesus ko fare fanathin ni re “tapigpig” nem e ra pi’ e ggan nib spiritual nib t’uf riy. Mini’ e dugliy Jesus ni nge duruw’iy pi gachalpen u nap’an e bin som’on e chibog? Ma mini’ e ke pirieg ni ka be pigpig ni aram rogon u nap’an ni ke sul ko 1914 u nap’an ni ke mang pilung ko Gil’ilungun Got? Dabi siy ni dariy reb e girdi’ ni ke par nib fas ko pi chibog nem. Me ere “fare tapigpig nib yul’yul’ mab gonop” e be yip’ fan pi gachalpen Kristus ni kan dugliyrad ko kan ni thothup ni yad bay u fayleng ndemtrug e ngiyal’. (Luke 12:42) Ma fanay Kristus e re ulung ney ni nge wereg e thin ni be lebug e thin ni kan yiiynag u lan e Bible me pow’iy e girdi’ ni ngar folgad ko Bible u gubin e rran. Ma aram ma yibe wereg e re ggan ney nib spiritual ko urngin e ulung ko Pi Mich Rok Jehovah.​—Isa. 43:10; Gal. 6:16.

Ma mang e pi n’en ni “urngin ban’en rok”? Aram urngin ban’en nib l’ag ko tirok Got ban’en u fayleng ni bay u tan pa’ Kristus ni ir Pilung. Pi n’en ney e ba muun ngay fare tochuch ko Pi Mich Rok Jehovah nge pi branch ofis, nge pi Kingdom Hall nge Assembly Hall u ga’ngin e fayleng. “Urngin ban’en rok” e kub muun ngay fare maruwel ni ngan machibnag “fare thin nib fel’ ko Gil’ilungun Got” u ga’ngin yang u fayleng ma ngan ayuweg e piin ni baadag. Ma fanay Got “fare tapigpig” ni nge kunuy u taabang e “girdi’ ni ke muulung ni pire’ ni pire’ . . . nra bad u gubin e nam, nge ganong, nge gubin mit e girdi’, ngu gubin e thin,” ma yad ra magay ni yad ba fas u fithik’ fare gafgow ni baga’. (Luke 12:42-44; Matt. 24:14; Rev. 7:9-14) Ba riyul’ ni pi girdi’ nem ni yad be muulung ni pire’ ni pire’ e yad ma un ko fare maruwel ni ngan wereg fare thin nib fel’ u polo’ u fayleng. Yad bang “urngin ban’en rok” Kristus ma yad ba t’uf rok fare tapigpig ya yad be ayuweg fare maruwel u fithik’ e pasig nge yul’yul’.

MARUWEL ROK FARE GOVERNING BODY

Fare “tapigpig nib yul’yul’ mab gonop” e be guy rogon ni nge par e ulung nib taab lanin’rad ma beyarmiy ni ‘urngin ban’en ma thingar nrin’ nib fel’ rogon ma ba yaram.’ (1 Kor. 14:40) Ran rin’ e re n’ey u nap’an e bin som’on e chibog, ma kan dugliy boch e Kristiano u fithik’ fare tapigpig nib yul’yul’ mab gonop ni yad owchen fare ulung. Ma dar puruygad u taabang ko urngin e piin ni piilal ni kan dugliyrad ko kan ni thothup u ga’ngin e fayleng u m’on ni kanturguy ban’en. Yad bang ko fare ulung nu Jerusalem ma yad fare governing body ko ulung ko Kristiano ni ga’ngin.

Ka nap’an Pentekost 33 C.E. iyib ngaray ma pi apostal nib yul’yul’ rok Jesus Kristus e kar pow’iyed fare ulung ko Kristiano nib biech. “Me fulweg Peter nge fa tin ni ka bay e apostal ni lungurad, “Thingar gu folgad rok Got ko bin ni nggu folgad rok e girdi’.” (Acts 4:33, 35, 37; 5:18, 29) Sogonapan 49 C.E. ma ke ga’ fare governing body ma gathi ke mus ni pi apostal rok Jesus e yad bang riy. Nap’an ni kan turguy ban’en ko maadad ma re ulung nem e ba muun ngay e “pi apostal nge piin piilal u Jerusalem.” (Acts 15:1, 2) Mmil fan ngorad ni ngar turguyed e pi n’en ni fan ko pi Kristiano u gubin yang. Kar pied e babyor nge thin ko pi ulung ma kan gelnagrad ma aram rogon ni par pi gachalpen nib taab lanin’rad mar maruwelgad u taabang. Pi ulung e kar folgad ko fare governing body ma aram me flaabnagrad Jehovah me yib angin ngorad.​—Acts 8:1, 14, 15; 15:22-31; 16:4, 5.

Rogon fene ga’ fan e re yaram ney e ba tamilang ko ngiyal’ ney. Girdien fachi ulung ni yad bang ko fare ulung ni Governing Body ko Pi Mich Rok Jehovah ko ngiyal’ ney e kar pigpiggad u boor e duw ni fan ko tirok Got ban’en. Yad ma pow’iy e girdi’ rok Jehovah ko tirok Got ban’en ni bod ni rin’ fare governing body u nap’an e bin som’on e chibog. Ku mil fan ngak fare Governing Body ni nge mon’ognag fare maruwel ko machib ma nge fl’eg e pi babyor ko Bible, ma nge yarmiy rogon ni ngan dugliy e piin ni ra rin’ boch ban’en u lan e ulung. Aram boch ban’en ni tirok Kristus ko Gil’ilungun Got ni yibe ayuweg e ngiyal’ ney. Bod rogon e tin som’on e Kristiano ma gad ma sap ko piin nib ilal ko tirok Got ban’en ngar pow’iyed gadad u daken e Bible ni fan ko liyor.

Bod rogon u nap’an e bin som’on e chibog ma fare Governing Body ko ngiyal’ ney e yad e piin nde flont. Machane i fanay Jehovah e piin nde flont kafram ni ngar rin’ed e tin nib m’agan’ ngay. I yog ngak Noah ni nge toy fare arke ma nge wereg e thin u murung’agen e magothgoth ni ra yib. (Gen. 6:13, 14, 22; 2 Pet. 2:5) (Gen. 6:13, 14, 22; 2 Pet. 2:5) Kan dugliy Moses ni nge pow’iy e girdi’ rok Jehovah ngar chuwgad u Egypt. (Ex. 3:10) Kan thagthagnag nga laniyan’ e piin nde flont ni ngar yoloyed e thin ko Bible. (2 Tim. 3:16; 2 Pet. 1:21) Gathi dabiyog ni nge pagan’dad ko ulung rok Got ko ngiyal’ ney yabe fanay Jehovah e piin nde flont ni ngar pow’iyed fare maruwel ko machib. Ya re n’em e ma gelnag e michan’ rodad ya goo gad manang ni faanra dariy e ayuw rok Jehovah riy ma dabiyog rok fare Governing Body ni ngar rin’ed urngin ban’en ni yad ma rin’.

“FAN NI NGAN PAGAN’UY NGAK FARE TAPIGPIG NIB YUL’YUL’ MAB GONOP”

Bay boor fan ni ngan pagan’uy ngak girdien fare tapigpig. Ya som’on ma i dugliyrad Jesus me mil fan ngorad urngin ban’en nib t’uf rok ni “tirok.” Aram e be tamilangnag ni kari pagan’ Jesus ngorad.

Bin l’agruw ma be yog e Thin rok Got ko pi Kristiano ni ngar folgad ko piin ni be yog e thin. Mang fan ni ra yib angin ngodad? Be weliy apostal Paul ko Hebrews 13:17 ni gaar: “Mu folgad ko thin rok e piin ni yad be yog e thin romed. Ya yad be matanagiy lanin’med ndarir talgad, ni bochan e thingar rogned ngak Got rogon e maruwel rok ni ur ngongliyed. Ya faan gimed ra fol rorad ma ra ur ngongliyed e maruwel rorad nib felan’rad ngay; ya faanra dangay ma bay ur ngongliyed nib taganan’rad, ma aram e dabi fel’ rogomed riy.” Ra yib angin ngodad ma ra ayuwegdad ko tirok Got ban’en ni faan gad ra fol ko piin piilal ya yad be ‘matanagiy lanin’med ndarir talgad.’

Rogon ni be yog ko 1 Korinth 16:14, ma be weliy Paul ni gaar: “Mu ngongliyed urngin e maruwel romed u fithik’ rogon nib t’uf e girdi’ romed.” Pi n’en ni yibe turguy ni fan ko girdi’ rok Got e yibe rin’ u fithik’ e t’ufeg. 1 Korinth 13:4-9 e be weliy u murung’agen e t’ufeg ni gaar: “En nib t’uf Got rok nge girdi’ e ba gum’an’ ma ba gol; ma en nib t’uf Got rok nge girdi’ e der ma awan’, ma de uf, ma de tolngan’; en nib t’uf Got rok nge girdi’ e de kireb daken, ara ke mus ni ir e ma lemnag ir, ara ba papey e damumuw ngak; ma en nib t’uf Got rok nge girdi’ e der ma aw nga laniyan’ e n’en nib kireb ni kan rin’ ngak; en nib t’uf Got rok nge girdi’ e de fel’ u wan’ e ngongol nib kireb, machane ba felfelan’ ko tin nib riyul’. Be’ nib t’uf Got rok nge girdi’ e dabiyog ni nge pag ir ndab ki michan’, ma dab ki l’agan’, ma dab ki gum’an’. Rogon ni gadad ba t’uf rok Got nge rogon nib t’uf Got rodad nge girdi’ e ban’en nra par ndariy n’umngin nap’an.” T’ufeg e ma gagiyegnag urngin ban’en ni yibe turguy ni fan ni nge yib angin ko pi tapigpig rok Jehovah, me ere rayog ni nge pagan’dad ko rogon ni yibe pow’iydad. Maku aram e be dag ni ma t’ufeg Jehovah urngin e girdi’ rok.

Boor e magawon nge gafgow ni yib ngak fare tapigpig ma kan micheg ni bay gelngin Got rorad. Ke yoor e flaab ni kan pi’ ngak fare ulung rok Jehovah u fayleng ko ngiyal’ ney, me ere gad ma pagan’ ngorad u polo’ i gum’ercha’dad, ma gad ma tay tangirad.

ROGON NI GAD MA DAG NI GAD MA PAGAN’ NGORAD

Piin ni kan dugliyrad ko boch ban’en u lan e ulung e yad ma dag ni yad ma pagan’ ngorad ni faanra yad ma rin’ e pi n’en nib mil fan ngorad u fithik’ e falfalan’. (Acts 20:28) Gad e pi tamachib nib pasig, me ere gad ma un ko machib u mit e tabinaw iyan u fithik’ e pasig, ma gad ma sul ngak e girdi’, ma gad ma fil e Bible ko girdi’. (Matt. 24:14; 28:19, 20) Ma yib angin ngodad fare ggan nib spiritual ni ma pi’ “fare tapigpig nib yul’yul’ mab gonop” ya gad ma fl’eg rogon ko pi muulung ko Kristiano ma gad ma un ko urngin. Ba muun ngay e pi assembly nge convention ni yibe tay u gubin e duw. Ma yib angin ngodad ni bochan ni gad ma chag ko pi walagdad ni ra bagadad e ma fl’eg laniyan’ bagadad u nap’an e pi muulung ney ko Kristiano. (Heb. 10:24, 25)

Ku gad ma dag ni gad be pagan’ ko ‘fare tapigpig nib yul’yul’’ u nap’an ni gad ma pi’ e ayuw ko ulung. (Prov. 3:9, 10) Nap’an nib t’uf e pi walag e ayuw rodad, ma gad ma pi’ e salpiy. (Gal. 6:10; 1 Tim. 6:18) Gad ma rin’ e re n’ey u fithik’ e t’ufeg, ma gad ma tiyan’ ko ngiyal’ nrayog ni ngad daged ku Jehovah ni gad ma tay fan e ulung rok ko urngin e tin nib fel’ ni kan pi’ ngodad.​—John 13:35.

Ku reb e kanawo’ ni gad ma pagan’ ngak fare tapigpig ko ngiyal’ ney e gad ma fol ko pi n’en ni kan turguy. Yugu demtrug ni dad nanged fan urngin ban’en ni kan nog, machane goo gad manang ni faanra gad ra fol riy ma ra yib angin ngodad ndariy n’umngin nap’an. Yu ngiyal’ ma kan tamilangnag boch ban’en nib ga’ fan, ma gad ma tay fan e pi n’en ni kan turguy u polo’ i gum’ercha’dad. Ere ma flaabnagdad Jehovah ya kad folgad ko Thin Rok nge girdien fare tapigpig. Ere gad be dag ni gad be fol rok Jesus Kristus ni ir fare Masta rodad.

Arrogon, bay fan ni nge pagan’dad ko “fare tapigpig nib yul’yul’ mab gonop nge mus rogon. Satan ni ir fare got ko re m’ag ney ma be athamgil ni nge dariy fannag fithingan Jehovah nge ulung rok. (2 Kor. 4:4) Dab mu aw ko wup rok Satan. (2 Kor. 2:11) Ya goo manag ni kari lich e tayim rok ma ran nin’ nga lan e low, ma be guy rogon ni nge kol e girdi’ rok Jehovah ngar uned ngak. (Rev. 12:12) Ma nap’an ni be gelnag Satan e athamgil ni be tay ma ngad chugurgad ngak Jehovah ngad pagedan’dad ngak fare ulung ni be fanay ni nge pow’iy e girdi’ Rok ko ngiyal’ ney. Be mahl Satan ngak e “piin ni yad ba’” ni girdien fare tapigpig, ni kan dugliyrad nib mil fan ngorad ngar wereged “fare thin nib riyul’ ni yib i yog Jesus ngan nang.” (Rev. 12:17) Gad ra pagan’ ngak Jehovah nge pi n’en ni ke yarmiy ma aram rogon nra par e pi walag ni taab lanin’dad.