Guruy Ni 7

Organized to Do Jehovah’s Will

CONGREGATION BOOK STUDY

Fare Congregation Book Study e ma ayuweg nge yib angin ko girdi’ ko ulung nge piin ni ma un ngay ya aram ba muulung ni yima tay ni yu ulung ni ba achig ni aram e ba thil ko tin ni ka bay e muulung. Girdien boch e tabinaw nge yugu boch e girdi’ e ma un ko pi muulung ney. Yad ma muulung u yu gin u lan e binaw ma sana aram tabinaw ku be’. Ku yima fanay e Kingdom Hall ni fan ko re n’ey.

Pi muulung ney e ma ayuweg e ulung ko boch ban’en ngathi ri rayog ni nge rin’ fare ulung. Mang fan ni aram rogon? Ya fare yaram ko Congregation Book Study e ma fil e thin ko Bible nib fel’ rogon maku rayog ni ngan tiyan’ ko ra reb e girdi’ u lan e pi muulung ney nib achig ma ngan ayuwegrad ko tirok Got ban’en. Yibe pi’ e fonow ko Bible ko girdi’, ma yibe pi’ e athamgil nga lanin’rad ma yibe pow’iyrad ko machib ma yibe pi’ e ayuw uw rogon nib m’ag ko ra reb e girdi’. U daken e re ayuw ney ma be dag Jehovah ni girdi’ rok e yad ba t’uf rok.​—Isa. 40:11.

Fa en ni Congregation Book Study overseer e ir be’ ni ta ma fil e Thin Rok Got ma rayog ni nge ayuweg e girdi’ nge tamilangan’rad ko Thin Rok Got mar folgad riy. Ma gathi ke mus ni ma conductnag fare muulung ya ku ma lemnag salpen e girdi’ ni rogon fithik’ i dowrad nge rogon salperad ko tirok Got ban’en, ma ma yan nga taferad nge guyrad nge girdi’ ko ulung u nap’an nib t’uf. Ma rayog ni ngan dugliy be’ ni ministerial servant nge conductnag fare bookstudy ni faanra dariy e piilal.

Re muulung ney e aram ba ulung ni ma fil e Bible u daken ba ken e babyor ni fl’eg e Pi Mich Rok Jehovah. Yibe conductnag uw rogon ni yibe conductnag fare Watchtower Study. Ma ngan meybil u m’on nge tomren fare book study ma ngan bieg urngin e paragraph ma ngan fith e pi deer ni bay riy ma ngan weliy boch e thin ma ngan bieg e thin ko Bible uw rogon ni bay e tayim riy. Ra guy fare conductor rogon nra taw e pi thin nib ga’ fan nga laniyan’ e girdi’ me ere rayog ni nge fith boch e deer me sul nga daken e n’en ni kan fil. Gad ra un ngay u gubin e wik ma ra tamilangan’dad ma gad ra nang fan boch ban’en. Gad ra fil ko mang fan boch e thin ni bay ko fare babyor nge uw rogon nib ba m’ag ko thin ko Bible ma gad ra fil rogon ni ngan fil e pi thin nem ko girdi’ ko machib. Re muulung ney e ra ayuwegdad ngad salapgad i machibnag e Thin Rok Got.

Bochan ni buch uw e girdi’ ko re muulung ney ma rayog ko urngin e girdi’ ngar pied e fulweg. Ere rayog rodad nge tin biech e girdi’ ni ngad weliyed e michan’ rodad u fithik’ e girdi’. (Heb. 13:15) Ffel’ ni ngad filed rogon ni ngad pied e fulweg ko thin rodad ma gathi ke mus ni ngad bieged e thin u lan fare babyor.

Demtrug be’ ma rayog ni nge bieg e thin ko Bible machane ke mus ni taabe’ ni ngan dugliy ni nge bieg e thin ko pi paragraph. U m’on riy ma fare Congregation Book Study overseer e ra yarmiy ni reb e walag ni pumoon e ra bieg e pi paragraph. U reb e wik nge reb ma rayog ni nge thil e walag ni pumoon ni ra bieg e pi paragraph. Faanra dariy e walag ni pumoon ma fare overseer e ra bieg e pi paragraph fa ra dugliy e walag ni ppin nge bieg.

Yibe tay e pi muulung ko book study u yu gin u lan e binaw ko ulung me ere mom rodad nge tin biech e girdi’ u lan e binaw ni ngad uned ngay. Susun ni ngad athamgilgad ni nge un boch e girdi’ ngodad ko muulung ma aram ma rayog ni ngar nanged e falfalan’ rodad u nap’an ni gad ma chag ko pi walag nge rogon ni yibe ubingdad ko tirok Got ban’en.

Gin ni yima tay fare Congregation Book Study e ku rayog ni ngan tay e muulung ko machib. Rayog ni nge muulung e girdi’ ko ngiyal’ nib m’ag u m’on ni nga ranod ko machib. Girdien e book study group e ra fol ko pi n’en ni kan yarmiy ma aram ma yad be maruwel u taabang ko fol babyor nge machib.

PI MUULUNG KO MACHIB

Bay boch e ngiyal’ u nap’an e wik ni ma muulung e Pi Mich Rok Jehovah ni ngar fl’eged rogon ni ngar uned ko machib. Baga’ ni yima fil e thin ko Bible u nap’an e pi muulung ney​—ni sana fare daily text ni faanra ba m’ag—​fan ngan weliy ko mang e ngan nog ko girdi’ ko machib, fa ngan tamilangnag boch e thin ko Machib Rodad Ni Fan Ko Gil’ilungun Got. Yima yarmiy rogon e machib ma ra fek be’ e meybil. Ma aram me ke bung rogon fapi cha’ ni ngar uned ko machib. Pi muulung ney e ma pi’ e fonow nib m’ag ma ma pi’ e athamgil nga laniyan’ e girdi’ ni yad be un ko maruwel ko machib. Rayog ni ngan yarmiy ni ngan ayuweg e tin biech e girdi’ fa piin nib t’uf e ayuw ni ngar uned ko machib. N’umngin nap’an e pi muulung ney e 10 fa 15 e minit.

ROGON E YARAM KO PI MUULUNG KO TIN BIECH FA TIN BA ACHIG E ULUNG

Be yoor iyan pi gachalpen Jesus me ere be yoor iyan e pi ulung. Demtrug ni ka fin tababnag e ulung nib biech ya kaygi ga’ reb e ulung ma aram e kan ruw raba’nag fa kan tababnag reb e ulung ko pi publisher u lan ba binaw nib palog, ma susun ni girdien e ulung e yad e pi publisher ni kar taufegad nge piin ni ma tay fan fare tapigpig nib yul’yul’ mab gonop ma yad ba adag ni ngar folgad ngorad. Baga’ ni fare circuit overseer e ra pi’ e application ni ngan tababnag e ulung nib biech. Boch e ngiyal’ mab puluw ni nge un boch e ulung nib achig ko reb e ulung nib chugur ngorad.

Yu ngiyal’ ma ke mus ni piin ni ppin ni bay ko reb e ulung nib achig. Faanra er rogon ma reb e walag ni ppin e ra fek e meybil ko ulung fa ra conductnag e muulung ma ra upunguy lolugen ni bod ni be yog ko Bible. (1 Kor. 11:3-16) Ma baga’ ni yad ra par ko chiya’ ma yad be sap ko girdien e ulung. Dabi pi’ e walag ni ppin e welthin ko muulung. Yad ra bieg ma yad ra weliy e pi thin ko pi babyor ni fl’eg e Pi Mich Rok Jehovah fa rayog ni ngan deeriy e ulung fa ngar fl’eged e demonstration.

U lan e ulung nib biech ma fare branch ofis e ra yog ko mini’ e rayog ni ngan dugliy ni ngar manged piilal ara ministerial servant. Faanra dariy be’ ni ke bung rogon ni bod ni faanra ke mus ni walag ni ppin ni bay ko ulung ma aram ma ra dugliy fare branch ofis reb e ppin ni nge ayuweg e pi babyor ko post ni yib ko branch ofis ma nge tay e pi muulung. Ma nap’an nrayog ni ngan dugliy e pi walag ni pumoon ma yad ra rin’ e pi maruwel nem.

SPECIAL ASSEMBLY DAY NGE CIRCUIT ASSEMBLY

Rogon e pi muulung ko pi tapigpig rok Jehovah ma bay boch ni ke mus ni l’agruw ara dalip ni’ ni be un ngay ma bay boch ni bokum biyu’ e girdi’ e be un ngay. Gubin e duw ma yibe yarmiy ni pi ulung ko reb e circuit e ra muulung u taabang ko reb e rran ko special assembly nge l’agruw e rran ko circuit assembly. Aram e pi ngiyal’ nib falfalan’ ma rayog ko girdi’ ni ngar “golgad” ngak e pi Kristiano. (2 Kor. 6:11-13) Fare “tapigpig nib yul’yul’ mab gonop” e ma lemnag ko mang e ba t’uf ko girdi’ ma yad ma fl’eg rogon kenggin e muulung u daken e Bible nge yugu boch ban’en ko fare program. Yibe fil e thin u boch e kanawo’ ni ngan welthin, ngan fith e deer, ngan dag e demonstration, ngan yaannag ban’en fa ngan interviewnag e girdi’. Baga’ ni pi program ney e ma tamilangnag boch ban’en nib m’ag ko binaw ara ma pi’ e fonow ni fan ko reb e circuit. Pi thin nem nib m’ag e ma ubing urngin e girdi’ ni ma un ngay.

Nap’an e special assembly day nge circuit assembly ma rayog ni nge un e tin biech pi gachalpen Jesus ko taufe mar daged ni kar ognaged yad ku Jehovah. Ma yibe weliy e report nge experience u murung’agen e rogon ni yibe wereg fare thin nib fel’ ma aram e ma pi’ e athamgil nga laniyan’ urngin e girdi’.

PI DISTRICT CONVENTION

Taab yay u gubin e duw ma ma tay e Pi Mich Rok Jehovah e pi muulung nib ga’. Baga’ ni aram e convention ni dalip e ran, ma pi ulung ko boch e circuit e ra un ngay. Machane pi branch nib achig ma yad ma tay taareb e convention ni fan ko urngin e ulung ko reb e branch. Rayog ni nge thiliyeg fare Governing Body e yaram ko pi muulung ney nge m’ag ko binaw. Ku yima yarmiy e pi convention ni fan ko reb e nam. Yu ngiyal’ ma yima tay e international convention u yu yang u fayleng ma bokum biyu’ e Pi Mich ko yugu boch e nam e ra un ngay. Boor e girdi’ ni kar nanged fare thin nib fel’ ni bochan e kan wereg e thin u murung’agen e pi muulung ney nib ga’ ko Pi Mich Rok Jehovah.

Pi district nge national, nge international convention e aram e ngiyal’ nib gel e falfalan’ riy ya rayog ko girdi’ rok Jehovah ni kar ognaged yad ngak ni ngar liyorgad ngak u taabang. Nap’an e pi convention ma yima tamilangnag e thin nriyul’, ma yima pi’ boch e babyor nib biech ni fan ko fol babyor ko ra be’ nge fan ko ulung nge fan ni ngan wereg ko girdi’ ko machib, maku yima taufenag e girdi’. Ma lemnag e Pi Mich Rok Jehovah ni pi district convention e ri baga’ fan ya ma mon’ognag e tirok Got ban’en ma ma weliy ko uw rogon ni yibe fol ko motochiyel ko Kristiano ni ngan wereg fare thin nib fel’. Boch e branch nib achig ma fare district convention e aram e national convention. Pi convention nib ga’ e ma micheg ni girdi’ rok Jehovah e rriyul’ ni yad e ulung ko pi walag u gubin e nam, ni yad e pi Kristiano ni kar ognaged yad ku Got ma aram e pow ni yad pi gachalpen Jesus Kristus.​—John 13:35.

Gad ra un ko pi muulung nge pi assembly nge pi convention ko girdi’ rok Jehovah ma aram e ma gelnagdad ngad rin’ed e tin nib m’agan’ Jehovah ngay ma ra ayuwegdad ndabi suwey lanin’dad e tin ko fayleng ni ra kirebnag e michan’ rodad. Rayog ni ngad pininged e magar ku Jehovah ya ke pi’ e pi n’ey ni ma ayuweg e girdi’ ni kar ognaged yad ngak ko ngiyal’ ney ko tomur.

FARE ABICH ROK SOMOL KO BALAYAL’

Taab yay u gubin e duw ko rorran ni yim’ Jesus Kristus ma urngin e ulung ko Pi Mich Rok Jehovah e ma madenomnag e Puguran ko yam’ ni tay Kristus ni aram fare Abich Rok Somol ko Balayal’. (1 Kor. 11:20, 23, 24) Aram e bin th’abi ga’ fan e muulung u lan e duw ko girdi’ rok Jehovah. Kan tay chilen ngodad ni ngad uned ko re Puguran ney.​—Luke 22:19.

Rorran ko Puguran e ba puluw ko rorran ko Palukaf ni bay ko Bible. (Ex. 12:2, 6; Matt. 26:17, 20, 26) Yibe tay fare Palukaf u gubin e duw ni ngan tay fan e ngiyal’ ni chuw yu Israel u Egypt ko duw ni 1513 B.C.E. Ngiyal’ nem ma i dugliy Jehovah e bin 14 e rran ko bin som’on e pul ni aram e rran ni ngar ked fare fak e saf ko Palukaf mar chuwgad u Egypt. (Ex. 12:1-51) Rogon ni ngan turguy e rorran nem e ngan theeg 14 e rran u tomren e bin biech e pul ni th’abi chugur ko spring equinox u rogon ni yibe guy u Jerusalem. Baga’ ni yibe madenomnag fare Puguran u gubin e duw ko rorran ni bin som’on e full moon u tomren fare spring equinox.

Matthew 26:26-28 e be weliy e thin ni yog Jesus ko uw rogon ni ngan tay fan fare Puguran. Gathi aram ban’en ni ngan rin’ nib l’ag ko pig, ya be yip’ fan e abich ni fan ko piin ni kan dugliyrad ngar uned ngak Jesus Kristus u tharmiy ko gagiyeg ko Gil’ilungun Got. (Luke 22:28-30) Yibe pining e tin ni ka bay e Kristiano nge piin ni ba adag e machib ni ngar uned ko Abich Rok Somol ko Balayal’ ni ngar guyed. Yad ra un ngay ya yad ma tay fan e n’en ni pi’ Jehovah Got ni fan ko urngin e girdi’ u daken fak ni Jesus Kristus. Rogon fare Puguran u wan’ e Pi Mich Rok Jehovah ma aram ban’en nib ga’ fan ma yad ma athamgil ni ngar uned ngay u gubin e duw.

U tabolngin e duw ko ngiyal’ nib chugur ko Puguran ma yibe pi’ e welthin ko pi ulung ko Pi Mich Rok Jehovah. Yad ma athamgil ni ngar pininged urngin e girdi’ ngar uned ngay. Fare welthin e ma weliy e thin nib m’ag ko piin ni ba adag ni ngar felan’naged Got ma ma k’aringrad ni ngar adaged ni ngar filed e Bible.

Ma falfalan’ e Pi Mich Rok Jehovah ko ngiyal’ ni ngad muulunggad u taabang ko pi muulung ni “nge bagadad ma ngi i lemnag bagadad ma nge bagadad ma ngi i ayuweg bagadad ma be dag ngak nib t’uf rok ma be rin’ e tin nib fel’ ngak.” (Heb. 10:24) Ma tiyan’ “fare tapigpig nib yul’yul’ mab gonop” ni ngar fl’eged e pi muulung ni ra pi’ e tin nib t’uf rodad ko tirok Got ban’en. Yibe pining urngin e Pi Mich Rok Jehovah nge piin ni ba adag e machib ni ngar muulunggad u taabang u gubin ngiyal’. Faanra ra dag e pi tapigpig rok Got ni yad ma tay fan e pi n’en ni pi’ Jehovah u daken e ulung rok, ma aram ma yad ra par nib taab lanin’rad.