Dariy E Gapas Ko Pi Mol’og Ni Googsur!

“Piin ni yad ba kireb e bay ni tulufrad ngar chuwgad u daken e nam . . . Machane piin ni yad sobut’an’ e bay ra pired u daken e fayleng, mu ur pired u fithik’ e gapas ni yad ba falfalan’.”​—PSALM 37:9, 11, New World Translation.

1. Mang fan ni bay e tin nib riyul’ nge tin ni googsur e mol’og ko “ngiyal’ ko tomur”?

PI MOL’OG​—tin riyul’ ara googsur? Immoy lagruw mit u nap’an e ngiyal’ ko Bible. Machane uw rogon e ngiyal’ ney? Daniel 12:9, 10 e be weliy ni reb e mol’og nu tharmiy e yog ngak e profet rok Got ni gaar: “Pi thin ney e ngan tay ndab nnang ma mmith nge yan i mada’ ko tungun. Boor e girdi’ ni bay ni machalbognagrad mi yad par ni kar yal’uwgad. Girdi’ nib kireb e bay dab ra nanged fan, nguur pired ni yad be ngongliy e kireb; ma piin ni yad ba gonop e bay ra nanged fan.” Gad be par ko “ngiyal’ ko tungun.” Ere ke gagiyel ko mini’ e “piin nib kireb” nge “piin gonop”? Dabiy siy ni arrogon!

2. Uw rogon ni be lebug e thin ko Isaiah 57:20, 21 ko ngiyal’ ney?

² Guruy ni 57, ko verse 20 nge 21, e bay e thin rok Isaiah ni mol’og rok Got riy ni begaar: “‘Piin nib kireb e yad bod e day ni be wagey, ma dabiyog ni nge mocha’, ma ma wageynag e day e lem nge mada’ nga t’ay e rigur.’ Ke gaar e Got rog, ‘Dariy e gapas ko piin nib kireb.’” Rib puluw e pi thin ney ko ngiyal’ ney ni gad be chugur iyan nga bin 21 e chibog! Boch e girdi’ e ma fith ni gaar, ‘Mog, gad ra taw ko re chibog nem fa?’ Mang e ma yog e pi mol’og nib gonop u morngaagen?

3. (a) Mang e yibe taarebnag reb nga reb u 1 John 5:19? (b) Mang e be yog u Revelation guruy ni 7 u morngaagen e “piin nib gonop”?

³ Kan thagthagnag e gonop nga laniyan’ apostal John. Be yog u 1 John 5:19 ni gaar: “Gadad manang nib mil fadad ngak Got, ma tin ni ka ba’ e girdi’ nu fayleng e ke suweyrad faanem nib kireb.” Ma fapi girdien fare 144,000 ni yad yu Israel nib spiritual e ba math keru’ ko re fayleng ney, ma tin ni ka bay u fayleng e yad be pillibthir iyan. Ma bay fare “ulung ni baga’” ni be un ngorad, “nra bad u gubin e nam nge ganong, nge gubin mit e girdi’, ngu gubin e thin,” ma chiney ma yad boor ko lal i milyon, maku yad ba gonop. “Pi cha’nem e fapi girdi’ ni kar thapgad ngaray u fithik’ fare gafgow ni baga’ ntay ngorad.” Ma mang fan ni ran taw’athnagrad? Ya kar “lukniged e mad rorad kar wechwechniged nga rachaen fare Fak e Saf” ya ke michan’rad ko fare biyul’ ni pi’ Jesus. Yad e pi mol’og ko tamilang, ma yad be “pigpig ngak [Got] ni rran nge nep’.”​—Revelation 7:4, 9, 14, 15.

Pi Ta Dake Mol’og ko Gapas

4. (a) Mang fan dabi m’ag e n’en nra rin’ e piin ni yima pining mol’og ko gapas ngorad ko fayleng rok Satan? (b) Uw rogon nib puluw e thin ko Efesus 4:18, 19 ko ngiyal’ ney?

⁴ Ma uw rogon e piin ni ma dake yad e mol’og ko gapas u lan e m’ag rok Satan? Isaiah guruy ni 33 ko verse 7 e begaar: “Pumoon nib falu’ e yad be pong ni ngan ayuwegrad! Piin ni owchen e pi nam nga boch e nam ni yad be guy rogon ni nge aw e gapas u thilin e nam e ba gel e meyor ni yad be tay.” Ri aram rogon e piin ni be yan nga reb e tochuch nge reb ni ngar awnaged e gapas u thilin e pi nam! Rib m’ay fan! Mang fan? Ya re fayleng ney e gowa mm’ar, ma ke mus ni yad be yaliy e pow riy ma dar lemnaged tapgin me m’ar. Ya lanin’rad e bay u fithik’ e lumor ya dar nanged ni ba’ Satan, ni ir e en ni yog apostal Paul ni ir “fare got ko re m’ag ney.” (2 Korinth 4:4) Ke yung Satan awochngin e kireb nga fithik’ e girdi’, ma wenegan riy e boor e girdi’ nge pi tayugang ko fayleng e ba puluw e pi thin ney ko Efesus 4:18, 19 ngorad ni gaar: “Ma be par lanin’rad u fithik’ e lumor. Dawori yog ngorad e bin ni ma pi’ Got e wok, ni fan e dar nanged ma yad ba gelan’. Ma dakurir tamra’gad; ma kar paged yad nga pa’ e kireb, ma yad be ngongliy urngin mit e puwlag ndakir yog ni ngar taleged yad riy.”

5. (a) Mang fan ni dabiyog ko pi ulung ko girdi’ ni ngar feked iyib e gapas? (b) Mang thin ko Psalm 37 ni ma fl’eg lanin’uy?

⁵ Dariy reb e ulung ko girdi’ nde flont nrayog ni nge chuweg e dogol nge siin u gumerchaen e girdi’ nge rogon ni ma fanenikay e girdi’ e yug girdi’. Kari mus ni En Tasunumiydad ni Somol Jehovah e rayog ni nge rin’ e re n’em! Ma yigoo tin nib sobut’an’ e girdi’ ni yad buch uw e ke m’agan’rad ngay ni ngar folgad rok. Psalm 37:9-11 e be weliy ko mang e ra buch ko pi girdi’ nem nib math keru’ ko piin nib kireb ni gaar: “Piin nib pagan’rad ngak Jehovah e bay ur pired u daken e fayleng, machane piin ni yad ba kireb e bay ni tulufrad ngar chuwgad u daken e fayleng. Dabki n’uw nap’an me yan e piin nib kireb nga bayang . . . Machane piin ni yad sobut’an’ e bay ra pired u daken e fayleng, mu ur pired u fithik’ e gapas ni yad ba falfalan’.”

6, 7. Uw rogon e ngongol ko pi yuraba’ i teliw u fayleng ni be dag ni gathi yad e mol’og ko gapas?

⁶ Ere rayog ni ngan pirieg e pi mol’og ko gapas u fithik’ e pi yuraba’ i teliw ko re fayleng ney ni be kireb iyan fa? Mang e be rin’ e pi yuraba’ i teliw ke mada’ ko ngiyal’ ney? Chepin e girdi’ e ma dag ni ke un e pi yuraba’ i teliw ko mahl u lan in e chibog ma boor e mahl ni yad tapgin. Susun, fare babyor ni Christian Century ko August 30, 1995, e ke weliy morngaagen e magawon u lan fare binaw ni ka nog yu Yugoslavia ngay faram e gaar: “Bosnia e bay u tan pa’ yu Serb ma pi prist e be par u m’on ko am rorad, maku yad ba m’on ko gin ni yibe cham riy ma yad be yibilay e pi talin e cham u m’on ni ngan cham ngay.”

⁷ Maku de fel’ e machib ni tay yu Kristendom u Africa u lan reb e chibog, ya arrogon ni be m’ug riy ko n’en ni buch u Rwanda, ni aram reb e binaw ni 80-percent e girdi’ riy e ma un ko Katolik. Weliy fare The New York Times ko July 7, 1995, ni gaar: “Golias ni reb e magazine ko Katolik ni yibe fl’eg u Lyons [France], e be yog ni ra yog fithingan 27 e pi prist nge sibester u Rwanda ni ur lied e girdi’ ngar m’ad ara ur pied e athamgil nga laniyan’ e girdi’ ngar uned ko ma li’ girdi’ ko fa binem e duw.” Reb e ulung ni African Rights, ni bay u London, e ke weliy ni gaar: “Pi yuraba’ i teliw e ba kireb e rorad ya da ur rogned ban’en ni nge taleg e cham maku boch e prist nge pastor nge sibester e kar uned ko ma li’ girdi’.” Aram rogon yu Israel u nap’an Jeremiah ni ir e bin nib riyul’ e mol’og rok Jehovah me weliy ni ke “tamra’” yu Israel, nge pi tayugang, nge pi prist, nge pi profet ni gaar: “Mad rom e ke mada’ e racha’ riy nga lang, ni rachaen e piin ni gafgow nge piin ndawor ra bucheged ban’en nge rachaen e piin ni pumoon ni gathi mpiriegrad ni ka ranod nga lan e pi naun rom ngar moro’ro’gad.”​—Jeremiah 2:26, 34.

8. Mang fan ni rayog ni ngan nog ni Jeremiah e mol’og ko gapas?

⁸ Yima yog ni yigoo tin nib kireb ban’en e ke yiiynag Jeremiah morngaagen, machane ku rayog ni ngan nog ni ir e mol’og ko gapas rok Got. Boor yay ni ke weliy morngaagen e gapas ni bod rogon ni rin’ Isaiah faram. I fanay Jehovah Jeremiah ni nge pufthinnag yu Jerusalem, ni gaar: “Ka nap’an e rofen ni kan toy e re mach ney iyib ngaray, ma ke k’aring e damumuw ngog ma ke m’agan’ug ngay ni nge chuw u p’eowcheg ni bochan urngin e tin nib kireb ni be rin’ pi fak yu Israel nge pi fak yu Judah ni kar k’aringed e damumuw ngog ni yad nge pi pilung rorad, nge piin pi fak e pilung, nge pi prist, nge pi profet, nge pi pumoon nu Judah nge piin ni ma par u Jerusalem.” (Jeremiah 32:31, 32) Re n’ey e ma sor fan ko ngiyal’ nra pufthinnag Jehovah e pi tayugang ko am nge Kristendom ko ngiyal’ ney. Ni nge aw e bin riyul’ e gapas ma thingarni chuweg e pi girdi’ ney ni yad ma k’aring e tin nib kireb ban’en nge cham! Ma gathi yad e pi mol’og ko gapas.

Fare UN e Ra Fl’eg e Gapas fa?

9. Uw rogon ni tay fare UN ir ni mol’og ko gapas?

⁹ Rayog ko fare United Nation ni nge mang e bin riyul’ e mol’og ko gapas fa? Ya arrogon ni weliy e babyor ko re ulung nem ni kan fl’eg ko June 1945, ni aram 41 e rran u m’on ko rofen ni kan nin’ fare donmach ni atom u Hiroshima, me gaar riy: “ngan ayuweg e tin bay yib e mfen ndabkur mahlgad.” Immoy 50 e nam ko fare United Nation ma susun ni nge “taareb gelngirad ni ngar fl’eged e gapas u thilin e pi nam.” Chiney ma bay 185 e nam ni be un ko fare UN, ma yad gubin e susun ni kar ognaged yad nga taa ban’en.

10, 11. (a) Uw rogon ni dag e pi tayugang ko teliw ni yad be tay tanggin fare UN? (b) Uw rogon ni de puluw e n’en ni yog e pi papa u morngaagen “fare Thin Nib Fel’ ko Gil’ilungun Got”?

¹⁰ U lan in e duw ni yibe pining e sorok ko fare UN ma baga’ ni pi tayugang ko teliw e ur yodoromgad. Nap’an e April 11, 1963, me yoloy Pope John XXIII e babyor ni “Pacem in Terris” (Gapas u Fayleng) me gaar riy: “Gamad ba adag ni fare United Nations​—ni pi n’en ni be nameg nge pi n’en ni be yarmiy​—e ra mon’og iyan mar lubeged e tin yad be nameg.” Ma boch nga tomren e June 1965, ma pi tayugang ko teliw ni yad owchen baley e girdi’ u fayleng, e kar madenomnaged e bin 20 e duw rok fare UN, u San Francisco. Maku nap’an e 1965, me yan Pope Paul VI nga tagil’ fare UN me yog ni “kari mus ni ir e athap ko girdi’ ni ba’.” Ma nap’an e 1986, me ayuweg Pope John Paul II i mon’eg fare UN International Year of Peace.

¹¹ Maku nap’an ni yan fare papa ngaram ko October 1995, me yog ni gaar: “Daba’ e gad be madenomnag fare Thin nib Fel’ ko Gil’ilungun Got.” Machane rriyul’ ni ir e mol’og ko thin nib fel’ ko Gil’ilungun Got fa? Ke weliy morngaagen e magawon u fayleng me gaar: “Boor e magawon e bay u p’eowchedad, ere uw rogon nrayog ndabda sapgad ko fare United Nation?” Ke mel’eg fare papa fare UN, ma gathi Gil’ilungun Got.

Fan ni ‘Ba Gel e Meyor ni Yad Be Tay’

12, 13. (a) Uw rogon ni ngongol fare UN nib puluw ko n’en ni be yog u Jeremiah 6:14? (b) Mang fan ni ba l’ag e pi tayugang ko fare UN ko pi thin ko Isaiah 33:7?

¹² Fare madenom ko bin 50 e duw ko fare UN e de fek iyib e “gapas nga fayleng.” Ma reb i fan e re n’em e weliy be’ ko fare shimbung ni The Toronto Star nu Canada me yoloy ni gaar: “Fare U.N. e bod ba layon ni dariy nguwelen, ma ra tolul u nap’an ni ke guy e kireb ni be rin’ boch e girdi’ machane thingari son ni nge tay e girdi’ ko re ulung nem nguwelen nib wagsum nga l’ugun u m’on nrayog ni nge k’ad ban’en ara rin’ ban’en.” Ma ke yoor yay ni kayigi sowath ni nge rin’ ban’en. Pi mol’og ko gapas ko re m’ag ney e baga’ ni pi mol’og nu Kristendom ni yad be yog fa pi thin ku Jeremiah 6:14 ni gaar: “Yad be guy rogon ni ngar ayuweged e girdi’ rog nib meewar ni be lungurad, ‘Bay e gapas! Bay e gapas!’ machane dariy e gapas.”

¹³ Pi secretaries-general ko fare UN e ur maruwelgad nib elmirin ni nge yibnag fare UN angin ko girdi’ ma dabi siy ni ur yul’yul’gad ngay. Machane fapi nam ko re ulung nem ni 185 u gubin e ra bagayad ma bay ban’en ni be nameg nib thil reb nga reb ma yad ma maluagthinnag morngaagen rogon ni ngan taleg e mahl, nge pi n’en ni ngan tay chilen, nge rogon e n’en ngan rin’ ko salpiy, me ere de yog ni nge yib angin ngorad. Fare secretary-general u nap’an e 1995 e ke yoloy e report u morngaagen rogon ni “be chugur iyan ko ngiyal’ ni yira chubeg e pi donmach ni nuclear u gangin e fayleng” me ere aram tapgin ni “nge maruwel e pi nam u taabang mi yad mon’og iyan ko par nib fel’ rogon ni fan ko urngin e girdi’.” Machane ki gaar: “Bay e kireban’ riy ya rogon e ngongol ko fayleng u lan in e duw e ba math keru’ ko re n’em.” Rriyul’ ni piin ta dake yad e mol’og ko gapas e ‘ba gel e meyor ni yad be tay.’

14. (a) Mang fan nrayog ni ngan nog ni fare UN e ke puth ko salpiy nge gafarig? (b) Uw rogon ni be lebug e thin ko Jeremiah 8:15?

¹⁴ Ba thin ko fare shimbung ni The Orange County Register nu California e ke gaar: “Ke Lus fare U.N. ko Salpiy nge Gafarig.” Miki weliy ni thilin e duw ni 1945 nge 1990, ma ke pag 80 e mahl ni kan tay, ma boor ko 30 milyon e girdi’ ni yim’ riy. Ma ke weliy e thin ni yog be’ u lan e babyor ni Reader’s Digest ko October 1995 ni “rogon ni ma fl’eg rogon fare U.N. ko mahl e be dag ni ‘pi tayugang riy e dar nanged ko mang e yad be rin’, ma pi salthaw rorad e dan fonownagrad nrogon, ma yad ma fl’eg thilrad e pi nam ni ta cham, ma dar taleged boch ban’en nib kireb ma yu ngiyal’ ma kar uned ngay.’ Maku ‘kayigi pag rogon fene gel’ ni yad ma adbey ban’en, ma yad ma sasalap, ma yad ma gafgownagey.’” Reb e thin ko fare simbung ni The New York Times e kenggin riy e “Ke 50 e duw ko fare U.N.,” ma kan weliy e thin ni “De M’ag e N’en ni i Athamgiliy fare U.N. ya Dariy e Yaram Rorad nib Fel’ ma Yad ma Adbey Boor Ban’en.” Ma fare shimbung ni The Times nu London, England, e ke yoloy e thin ni “Ke Taw ko Wugem e Duw Ma Be Meewar​—Ba Tuf ko fare UN ni nge un ko Exercise ni nge Sul Nga Rogon.” Bin riyul’ riy e bod rogon ni be yog u Jeremiah guruy ni 8, ko verse 15: “Kan athapeg e gapas machane dariy ban’en nib fel’ ni ke yib; ma kan athapeg e ngiyal’ nran golnagey, machane ke yib e gafgow!” Maku yibe par u fithik’ e marus ko donmach ni nuclear. Ere ba tamilang ni fare UN e gathi ir e mol’og ko gapas nib t’uf ko girdi’.

15. Uw rogon ni ke k’aring Babylon nkakrom nge pi yuraba’ i teliw e magothgoth mar k’aringed e girdi’ ni gowa kar uned ko drug?

¹⁵ Ma mang wenegan nra yib ko urngin e pi n’ey? Pi thin ni i yiiynag Jehovah u daken e pi profet e rib tamilang. Som’on ma mang e ra buch ko pi yuraba’ i teliw nu fayleng ni ke m’ag fager ko fare UN? Kar sumgad rok Babylon nkakrom ni aram tagil’ e liyor ko liyos. Rib puluw e n’en ni kan pining ngorad u Revelation 17:5 ni “Babylon nib Gilbuguwan, ni ir chitingin urngin e ppin ni yad ma chuway’ ngorad nge urngin e kireb nu fayleng.” I weliy Jeremiah ko mang e ra buch ko re ulung ney ni ma ta dake moding. Bod e ppin ni ma chuway’ ngak ma ur wawliyed e pi tayugang ko am, mi yad fl’eg thilrad fare UN mara m’aged fager ko pi nam. Kar uned ko mahl nib elmirin. Ke yog be’ u morngaagen e pi mahl ni ke tay e teliw u India ni gaar: “Yog Karl Marx ni teliw e bod e opium ni aram mit e drug ko girdi’ ni gangin. Machane gathi rib puluw e re thin nem ya opium e ma k’aring e chingnag ma ma n’igin e girdi’ nge sowath lanin’rad. Machane teliw e bod rogon fare drug ni crack cocaine. Ya ma n’igin nge wagey laniyan’ e girdi’ mi yad ba adag e cham ma rib gel e magothgoth ni ma k’aring.” Machane ku gathi rib puluw e n’en ni yog e cha’ nem. Ya teliw ni googsur e yow l’agruw ni ma chingnag ma ma k’aring e magothgoth.

16. Mang fan ni susun ni nge chuw e piin nib yul’yul’ rok Babylon nib Gilbuguwan? (Ku mu guy Revelation 18:4, 5.)

¹⁶ Ere susun mang e nge rin’ e piin nib yul’yul’? Jeremiah ni mol’og rok Got e ma pi’ e fulweg ni gaar: “Mu chuwgad u Babylon, ma aram e ra be’ ma nge ayuweg e pogofan rok. . . . Ya ereray e ngiyal’ nra fulweg Jehovah taban e kireb.” Gad ba falfalan’ ya bokum milyon e girdi’ e kar chuwgad rok Babylon nib Gilbuguwan, ni aram pi yuraba’ i teliw ni googsur u gangin e fayleng. Me gur bagayad e pi cha’ ney fa? Ere kam nang fan ko uw rogon ni be suwey Babylon nib Gilbuguwan laniyan’ e pi nam nu fayleng: “Pi nam e kar unumed e wain rok. Ar fan ni yad be ngongol ni bod e piin nib aliliy.”​—Jeremiah 51:6, 7.

17. Mang pufthin ni yira tay ko Babylon nib Gilbuguwan, ma mang e ra buch nga tomren?

¹⁷ Dabki n’uw nap’an ma ra k’aring Jehovah e pi nam ni yad ba “aliliy” ni yad bang ko fare UN ni ngar togopuluwgad ko pi yuraba’ i teliw ni googsur, ni rogon ni be weliy u Revelation 17:16 ni gaar: “Bay ra fanenikayed fare ppin ni ma chuway’ ngak; bay ra feked urngin ban’en rok mi yad pag ndakuriy e mad u daken; ma bay ra longuyed e ufin u downgin mi yad li’ ko nifiy ngem’.” Aram e ra tabab fare gafgow ni baga’ ni be weliy morngaagen u Matthew 24:21 ma ra sor iyan ko Armageddon, ni fare mahl rok Got Nth’abi Gel. Bod rogon Babylon nkakrom, ma ra bibiy e riya’ Babylon nib Gilbuguwan ko fare gechig ni kan weliy morngaagen u Jeremiah 51:13, 25 ni gaar: “Begaar Jehovah, ‘Gur fare ppin ni be par u daken e day, ni byoor e machaf rom, ma chiney e ke taw ko ngiyal’ nran thang e fan rom, min taleg e folchuway’ rom. Gu be togopuluw ngom, ni gur e ga be kirebnag e fayleng ni polo’; ma gu ra k’iyag paag nib togopuluw ngom ma gu ra lolbiyem nga orel ko yiy ma ga ra bod e burey ni kan urfeg ni gangin.’” Pi nam nib sasalap ma yad ma un ko mahl e ra un ko pi yurba’ i teliw ni googsur ko magothgoth ya ku ra taw e chirofen rok Jehovah u dakenrad.

18. Wuin nge uw rogon nra lebug e thin ko Isaiah 48:22?

¹⁸ Be weliy 1 Thessalonika 5:3 u morngaagen e piin nib kireb ni gaar: “Ngiyal’ nem e ra gaar e girdi’ e ke gapas ndariy ban’en nra buch, ma yad ra da’da’ ni ke taw e riya’ ngorad! Ma dabiyog ni ngar milgad riy​—ya bod e amith ni ma yib ngak be’ ni ppin ni be n’en ni nge gargel.” Ereray e piin ni weliy Isaiah morngaagen ni gaar: “Mu sap! . . . Pi mol’og ko gapas e bay ra yorgad nib elmirin.” (Isaiah 33:7) Arrogon, bod ni be yog u Isaiah 48:22 ni gaar: “Begaar Jehovah, ‘Dariy e gapas ko piin nib kireb.’” Machane ra uw rogon e ngiyal’ nga m’on ko piin ni yad e tin riyul’ e mol’og ko gapas rok Got? Aram e n’en nran weliy ko bin migid e thin.

Boch e Deer

◻ Mang thin nib gel ni yog e pi profet rok Got u morngaagen e pi mol’og ni googsur?

◻ Mang fan ndabiyog ko pi ulung ko girdi’ ni ngar feked iyib e gapas ndabi m’ay?

◻ Uw rogon ni ba math keru’ e tin riyul’ e mol’og ko gapas ko piin ni ma tay tanggin fare UN?

◻ Mang e thingari rin’ e piin nib sobut’an ni ngar uned ko gapas ni micheg Jehovah ni bayi yib?

[Sasing ko page 23]

Isaiah, Jeremiah, nge Daniel e ur yiiynaged ni dabi m’ag e n’en ra rin’ e girdi’ ni fan ko gapas

[Sasing ko page 24]

“Girdi’ nu fayleng e ke suweyrad faanem nib kireb.”​—John ni apostal

[Sasing ko page 25]

“Lanin’rad e bay u fithik’ e lumor.”​—Paul ni apostal