“Faanra Ba’ Got U Ba’ Rodad, Me Mini’ E Rayog Rok Ni Nge Togopuluw Ngodad?”
“Mang e bay ni ka gadad ra weliy u murung’agen e pi n’ey? Faanra ba’ Got u ba’ rodad, me mini’ e rayog rok ni nge togopuluw ngodad?”—ROMA 8:31.
1. Mini’ e ke un ngak piyu Israel u nap’an ni kar chuwgad u Egypt, ma mang e ke k’aringrad ni ngar yodoromgad?
NAP’AN piyu Israel ni yad be milekag ni yad be sor i yan nga bang ni ba puf rogorad riy u tomren 215 e duw ni ur pared u Egypt, ma boor u fithik’ e pi duw nem e ur pared ni yad e sib, ma “reb e ulung ni ri baga’ nib thilthil e girdi’ riy e kar uned ngorad.” (Exodus 12:38) Pi cha’ ney ni gathi yad piyu Israel e kar uned ko fa ragag i gafgow ni ma k’aring e marus ni ke aw nga Egypt ke tamra’nag e pi got rorad ni googsur. Kare ngiyal’ i n’em e ra guyed—gelngin Jehovah ni nge ayuweg e girdi’ rok—ni baga’ ni tabab ko fa bin aningeg e gafgow nge mada’ ko bin ragag. (Exodus 8:23, 24) Yugu aram rogon ni buchuw e n’en ni yad manang ko tin nib m’agan’ Jehovah ngay, ma taa ban’en e ke riyul’ u wan’rad: Fapi got nu Egypt e de yog rorad ni ngara ayuweged piyu Egypt, machane Jehovah e ke micheg ni bay gelngin nib gel ni fan ngak piyu Israel.
2. Mang fan ni ke ayuweg Rahab fa gal spy nu Israel, ma mang fan ni de oloboch ni ke pagan’ ko birorad e Got?
2 Aningeg i ragag e duw nga tomren, u m’on ni dawori taw piyu Israel ko fare binaw ni kan Micheg, me Joshua, ni ir e en ni ke yan nga luwan Moses, e l’og l’agruw ni’ ni ngar damiteg fare binaw. Ma kara mada’nagew Rahab u rom, ni ir be’ nu Jericho. Bochan e tin ni ke rung’ag u murung’agen gelngin Jehovah ni i dag ni fan ni nge ayuweg piyu Israel u lan 40 e duw u tomren ni kar chuwgad u Egypt, me nang ni faanra baadag ni nge fal’eg Got waathan, ma thingari ayuweg e girdi’ rok. Bochan ni ke dugliy ban’en u fithik’ e gonop, me ir nge chon e tabinaw rok e dani thang e pogofan rorad u nap’an ni ke kol piyu Israel fare mach u fithik’ e yargel. Bochan ni kara magaygad nib fas u fithik’ e maangang e aram e mich riy nib tamilang ni bay Got rorad. Ere, tin ni ke rin’ Rahab ni ke pagan’ ngak e Got rok piyu Israel e ba mat’aw.—Joshua 2:1, 9-13; 6:15-17, 25.
3. (a) Mang maangang ni ke ngongliy Jesus ko gin nib chuchugur ko fare mach ni Jericho ni kan toy biyay, ma mang e ke rin’ e re n’ey ngak fapi clergy rok piyu Jew? (b) Mang e ke yib ngan’ boch piyu Jew, nge piin gathi piyu Jew ni munmun me un boor e girdi’ me riyul’ u wan’rad?
3 Ragag nge lal e chibog nga tomren, me golnag Jesus Kristus be’ nib taman mab malmit ni immoy u chuchugur ko fare mach ni Jericho ni kan toy biyay. (Mark 10:46-52; Luke 18:35-43) I wenig e re moon ney ngak Jesus ni nge runguy, ni aram e n’en ni be micheg ni manang ni ba’ Got ni be ayuweg Jesus. N’en nib thil riy, e fapi tayugang ko teliw rok piyu Jew nge piin ni ma fol rorad, e baga’ ni de michan’rad ni fapi maangang ni be fal’eg Jesus e ir e n’en ni be dag ni be rin’ Jesus e maruwel rok Got. N’en ni kar rin’ed e kar gayed e kireb e rok. (Mark 2:15, 16; 3:1-6; Luke 7:31-35) Mus ko chirofen ni kar nanged ni kan faseg Jesus ko yam’ u tomren ni kar lied kem’, ma dubrad ni nge michan’rad ngay ni ereram e maruwel rok Got. N’en ni kara rin’ed, e kara pow’iyed e girdi’ ni ngara togopuluwgad ngak pi gachalpen Jesus, ya yad be guy rogon ni ngar taleged e maruwel rorad ni “yad be wereg fare thin nib fel’ u murung’agen Jesus ni ir e Somol.” Machane boch piyu Jew, nge piin ni gathi yad piyu Jew, e munmun ma kar tiyan’rad ko tin ni ke buch ma kar nanged ni pi n’em e ba riyul’. Ke tamilang u wan’rad ni ke n’ag Got e pi tayugang rok piyu Jew ni yad be lemnag ni yad ba mat’aw ma ke ayuweg pi gachalpen Jesus Kristus nib sobutan’rad.—Acts 11:19-21.
Be Ayuweg Got Mini’ ko Ngiyal’ Ney?
4, 5. (a) Uw rogon u wan’ boch e girdi’ e tin ni baaray ni ngan mel’eg reb e teliw? (b) Ra ngan nang e baan riyul’ e teliw, ma mang deer e rib ga’ fan?
4 Dawori n’uw nap’an faram min fith ngak reb e tayugang ko teliw u TV murung’agen e baan riyul’ e teliw, me fulweg ni gaar: “Ri gu ra yog ni reb e teliw ni ba riyul’ e faanra ayuweg be’ nge fel’ pangin me par ni aram rogon.” Riyul’, ni teliw nib riyul’ e ra ayuweg e girdi’ nge fel’ pangirad. Machane bochan ni teliw e ke fal’eg pangin e girdi’ ma ir e mich riy ni bay Got u ba’ rorad ni be ayuwegrad? Gur aram e n’en ni ra turguy ni ke mudugil ni ir e baan riyul’ e teliw?
5 Urngin e girdi’ ma ke falfalan’rad nrayog ni ngar mel’eged e tin ni yad baadag, nib muun ngay e teliw ni yad baadag ni ngara uned ngay. Machane bochan ni ke puf rogon e girdi’ ni ngar mel’eged ban’en ma dagathi ke mudugil nra be’ me mel’eg e tin mmat’aw. Ni bod e tin ni baaray, ni ra boch e girdi’ ma kar mel’eged reb e teliw nbochan e boor e girdi’ riy, mab fel’ rogon, ma yad ma rin’ boch e madenom ni yima fanay ban’en nib tolang pulwon, ara aram e teliw ko girdi’ rorad. Dariy reb u fithik’ e pi n’en ney ni ra dugliy ni rogon ni ngan nang ko ba riyul’ barba’ e teliw fa danga’. Reb e deer ni rib ga’fan nib m’ag ko re n’ey e: Bin ngan e teliw e ri be tay chilen ngak e girdi’ rorad ni ngara rin’ed e tin nib m’agan’ Got ngay ma yad be dag e mich riy nib gel ni bay Got u ba’ rorad ni be ayuwegrad, ma arfan ni girdi’ riy e rayog ni nga rogned ni ke pagan’rad ni nge lungurad, “Bay Got rodad”?
6. Mang e thin rok Jesus ni ke ayuweg ni nge tamilang min nang e baan riyul’ e teliw nge teliw ni googsur?
6 I pi’ Jesus reb e motochiyel ni fan ni ngan nang e liyor nib riyul’ u fithik’ e tin ni googsur ko ngiyal’ ni gaar: “Mu ayuwgad ko pi profet nde riyul’ nra yib ngomed ni yad bod e saf u wuru’ i dowrad, machane u fithik’ i lanin’rad e ri yad bod e wolf ni ma k’ad. Gimed ra nangrad ko woomngirad.” (Matthew 7:15, 16, New World Translation; Malachi 3:18) Ngada sulod nga daken boch e “woomngin,” ara boch e pow, ko teliw nib riyul’ ni ngari tamilang u wan’dad ko mini’ e girdi’ ni ba’ Got u ba’ rorad.
Fapi Pow ko Piin ni Ba’ Got u Ba’ Rorad
7. Kemus ni thin ni kan fek u Bible e ngan fil ma be yip’ fan e mang?
7 Fare Bible e ir e def ko fapi machib rorad. I yog Jesus ni gaar: “N’en ni gu be machibnag e gathi gag i yib rog, yi yib rok Got, ni ir e ke l’ugeg ku gub. En nib m’agan’ ngay ni nge rin’ e tin ni baadag Got e ra nang ko tin ni gu be machibnag e yib rok Got ara gu be weliy ni gag e thin rog.” Maku i yog ni gaar: “En ni yib rok Got e ma motoyil ko tin ma yog Got.” (John 7:16, 17; 8:47) Baaray e tin nib mat’aw, be’ ni baadag ni nge par Got u ba’ rok e thingari machibnag ni kemus e tin ni be dag Got ko Thin rok me n’ag e machib ni sum ko llowan’ ko girdi’ ara yalen.—Isaiah 29:13; Matthew 15:3-9; Colossians 2:8.
8. Mang fan ni baga’ fan ni ngan fanay fithingan Got ko liyor ngak?
8 Yad ma fanay ma yad ma machibnag fithingan Got, ni Jehovah. Ke yog Isaiah u m’on riy ni gaar: “Chirofen nem e ri bay moged ni ngam gaargad: ‘Gimed e girdi’, mu pininged e magar ngak Jehovah! Mu pininged fithingan. Mu weliyed ngak e girdi’ e tin ni ke rin’. Mu weliyed ni ngan tolangnag fithingan. Nga mon’ed e tang ni fan ku Jehovah, ya bochan ni boor ban’en ni ke rin’. Kan nang e re n’ey nga gubin yang u fayleng.’ ” (Isaiah 12:4, 5, NW) I fil Jesus ngak pi gachalpen rogon ni ngar meybilgad ni nge lungurad: “Chitamangimad ni ga bay u tharmiy: Ngan tay fan fithingam nib thothup.” (Matthew 6:9) Ere, demtrug be’ ni Jew ara be’ ni gathi Jew, ma piin Kristiano e bat’uf ni ngar pigpiggad ni yad e “girdi’ ni fan ko ngochol rok [Got].” (Acts 15:14) Ba tamilang ni ba falfalan’ Got ni nge ayuweg e piin ni yad ba falfalan’ ya kar manged “girdien ni fan ko ngochol rok.”
9. (a) Mang fan ni fare falfalan’ e ir reb e pow ko girdi’ ni yad bang ko teliw nib riyul’? (b) Uw rogon ni ke taarebnag Isaiah e tin riyul’ e teliw ko teliw ni googsur?
9 Yad be dag rarogon Got nib falfalan’. Bochan Jehovah ni ir e tabolngin e “thin nib fel’,” ir e “Got nib falfalan’.” (1 Timothy 1:11, NW) Ere uw rogon ni ra par e pi tapigpig rok nib kireban’rad ara de mudugil lanin’rad? Yugu aram rogon ni ke wagagey e fayleng ma bay boch e magawon rorad, ma fapi Kristiano nib riyul’ e be par ni yad ba falfalan’ ya bochan ni gubin ngiyal’ ma yad ma kay e ggan nib spiritual nib boor. I taarebnag Isaiah e pi cha’ nem ngak e piin ni yad be fol ko teliw ni googsur ni gaar: “Ereray e n’en ni yog Jehovah ni ir e Somol ni Tha’bi Tolang ni gaar: ‘Am sap! Pi tapigpig rog e yad ra ka’ ban’en, machane gimed e gimed ra yim’ ko bilig. Am sap! Pi tapigpig rog e yad ra garbod, machane gimed e gimed ra yim’ ko belel. Am sap! Pi tapigpig rog e ra falfalan’rad, machane gimed ra gafgow ko tamra’. Amsap! Pi tapigpig rog e ra tolul u fithik’ e falfalan’ ya ba fel’ rarogon gum’ircha’rad, machane gimed ra yor ni gimed be gawel ko amith u gum’ircha’med ma ra m’ay gelngimed.’”—Isaiah 65:13, 14, NW.
10. Uw rogon ni piin ni yad be un ko teliw nib riyul’ e ngar paloggad ko tin ni baaray ni ngan rin’ ban’en ni ngan nang ko ra fel’ fa ba kireb?
10 Yad be puluwnag e ngongol rorad nga rogon ni ngara duguliyed ban’en ko kenggin e motochiyel u Bible. “Mu pagan’um ngak Somol u polo’ i lanin’um, ma ri dab mu tor ko tin ni ga be finey ni ga manang,” Fa en ni yoloy e Proverbs e be fonownagdad ni gaar, “Nguum lemnag Somol u fithik’ urngin ban’en ni ga be rin’, me dag ngom e bin nib mat’aw e kanawo’.” (Proverbs 3:5, 6) Ma ayuweg Got e piin ni ma sap ngak ni nge pow’iy ya der ma fol ko llowan’ ko girdi’ ni be dariyfannag e gonop rok Got. Rogon feni fel’ u wan’ be’ ni nge puluwnag e yafas rok ko thin rok Got, ku aram rogon gelngin e lem rok ni ra siyeg ni nge dabi fil ban’en ko tin ni dawori tamilang u wan’ ko ba fel’ fa ba kireb.—Psalm 119:33; 1 Korinth 1:19-21.
11. (a) Mang fan ni piin ni ma un ko baan riyul’ e teliw e dabiyog ni ngan ruwraba’nagrad ngar manged piin ni clergy nge laity? (b) Mang ngongol nra dag e piin ni ma ayuweg e girdi’ rok Got ni fan e nge fol girdien e ulung riy?
11 Yad ba yaram ni taabrogon ko fare ulung ni Kristiano ko fa bin som’mon e chibog. Ke ta’ Jesus fare kenggin e motochiyel ni gaar: “Dabni pining Rabbi ngomed, ya gimed gubin nra bigimed ma walagen bigimed. Maku, dab mpininged be’ u roy u but’ ni Chitamangiy, ya ri taareb e Chitamangimed ni bay u tharmiy. Ara ni pining ‘e Tayog e thin ngomed,’ ya taabe’ e ba’ ni ir e be yog e thin romed, ni ir Kristus. Machane en th’abi tolang u fithik’med e thingari mang tapigpig romed.” (Matthew 23:8-11) Fare ulung i walag e dubrad e piin ni kan nog e clergy ngorad ni yad ba uf ma yad ma tolangnaged yad min tayrad ni yad ba tolang ko laity. (Job 32:21, 22, NW) Piin ni ta chuguliy yu ran’ i saf rok Got e ka nog ngorad ni ngara rin’ed e maruwel rorad ni “dabra suweyed yad, ya nge m’agan’rad ngay; ma gathi bochan e salpiy, ya ri yad baadag ni ngar uned ko fare maruwel; ara dabra guyed rogon ni ngara suweyed e piin ni kan pi’rad ngorad ni ngara gafaliyed yad, machane ngar pared nib fel’ pangirad ya nguur folwokgad rorad.” (1 Peter 5:2, 3) Fapi Kristiano ni tachugul saf nib riyul’ e yad be gagiyegnag lanin’rad ndabra guyed rogon ni ngara tayed yad ngar manged masta ko michan’ rok yugu boch e girdi’. Bochan ni yad be maruwel u taabang ko pigpig ku Got, ma yad be athamgil ni ngar daged e ngongol nib fel’.—2 Korinth 1:24.
12. Mang liw nib thabthabel ko am ko girdi’ ni be ning Got ngak e piin ni baadag ni ra ayuwegrad Got?
12 Yad ma fol ko am ko girdi’ machane yad ma par ni yad bay u mathilin. En ni dabi “fol ko am” e dabi ayuweg Got e cha’ nem. Mangfan? Ya bochan “fapi tayugang ko am e Got e ke tayrad ko liw rorad. Arfan ni en nra togopuluw ko am e be togopuluw ko yaram rok Got.” (Roma 13:1, 2) Machane, manang Jesus nrayog ni nge sum e togopluw riy ko ngiyal’ ni gaar: “Mu pied ngak e am e tirok ban’en, mi gimed pi’ ngak Got e tirok Got ban’en.” (Mark 12:17) Piin ni yad baadag ni nge ayuwegrad Got e thingara “m’oneged . . . u wan’rad e gagiyeg [rok Got] nge tin nib mat’aw ban’en,” maku yad ra fol ko pi motochiyel ko am ni ba puluw ko maruwel rorad ni yib rok Got ni kab ga’fan. (Matthew 6:33; Acts 5:29) I dag Jesus feni ga’fan ni ngan par u mathilin ko ngiyal’ ni gaar: “Gathi yad e girdi’ nu roy u fayleng ni bod gag ni gathi gag e girdi’ nu fayleng.” Munmun miki gaar: “Gin nsuwog e dariy u roy u fayleng.”—John 17:16; 18:36.
13. Mang ni t’ufeg e ra micheg ni ngan poy e girdi’ rok Got?
13 Gathi yad ba laniyan’ nrogon ni ngara ngongliyed e ngongol nib fel’ ngak urngin e girdi’.” (Galatia 6:10) Rogon e t’ufeg ni Kristiano e gathi ba laniyan’, mab fel’ urngin e girdi’ u wan’rad ndemtrug ramaen dow, ma demtrug ko ba fel’ rogon fa danga’ ara ke un ko skul nib tolang fa danga’, nge nam ni ma par riy, ara rogon e thin rorad. Ngan ngongliy e ngongol nib fel’ ngak urngin e girdi’ ma nge ga’ farad ngak e piin ni yad bang ko ulung e ra ayuweg ni ngan nang e piin ni bay Got rorad ni be ayuwegrad. I yog Jesus ni gaar: “Faanra um pired nib t’uf bigimed rok bigimed, ma aram e urngin e girdi’ ni yad ra nang ni gimed pi gachalpeg.”—John 13:35; Acts 10:34, 35.
14. Girdi’ ni ba’ Got u ba’ rorad e susun yad e girdi’ ni yad ba fel’ u wan’ e girdi’ ni yoor? Mu weliy.
14 Mm’agan’rad ko gafgow ko togopluw nbochan e yad be rin’ e tin nib m’agan’ Got ngay. I yog Jesus ngak pi gachalpen u m’on riy ni gaar: “Faanra kar gafgownaged gag, ma bay kur gafgowniged gimed; ma faanra kar folgad ko thin rog, ma bay kur folgad ko thin romed.” (John 15:20; Matthew 5:11, 12; 2 Timothy 3:12) Gubin ngiyal’ ma piin ni ba’ Got u ba’ rorad e yad e girdi’ ni de gilbuguwrad, ntaabrogon ku Noah, ni i gagiyelnag nib kireb e rok e girdi’ nu fayleng u daken e michan’ rok. (Hebrews 11:7) Ngiyal’ ney, ma piin ni yad baadag ni nge ayuwegrad Got e dabra warnaged e Thin rok Got ara ngar n’aged kenggin e motochiyel ni fan e ngara paloggad ko togopuluw. Yad manang, ni numngin nap’an ni nfaan yad ra pigpig ku Got u fithik’ e yul’yul’ ma ra “gin e girdi’ ma yad ra yog nib kireb e ngongol rorad”.—1 Peter 2:12; 3:16; 4:4.
Ngal’an ni Ngan Thabthabelnag e Thin Riyul’
15, 16. (a) Mang boch e deer ni ra ayuwegdad ni ngada nanged e teliw ni ba’ Got u ba’ rorad? (b) Mang e ke mich u wan’ e girdi’ ni yad bokum milyon, ma mangfan?
15 Mu fithim, ‘Mang teliw nib lingagil nib chuchugur ni yad be fol ko Thin rok Got, nyugu aram rogon ni machib rorad e ba thil ko tin ni ke mich u wan’ e girdi’ ni boor ko baley ko girdi’? Mini’ e be gagiyelnag feni ga’ fan fithingan Got, ma yad be fanay ni fan e ngan nangrad? Mini’ e ma weliy ni Gil’ilungun Got e kari mus ni ir e ra pithig urngin e magawon ko girdi’? Mini’ e be fol ko thin ni be yog e Bible u murung’agen e ngongol, nyugu aram rogon ni ma yog e girdi’ ni yad be fol ko tin ni ke kakrom? Mang ulung nib gagiyel ni dariy e en ni ka nog e clergy ngak u fithik’rad ni yima pi’ pulwon, ma yad urngin e tamachib? Chon mini’ e ka nog e sorok ngorad ya yad e girdi’ ni ma fol ko motochiyel ko am, nyugu aram rogon ma dar uned ko politics? Chon mini’ e be fanay e tayim nge salpiy rorad ni fan e ngara ayuweged yugu boch e girdi’ ni ngar nanged murung’agen Got nge tin nib m’agan’ ngay? Ma yugu aram rogon ni ba’ rorad e pi ‘ney nib fel’, ma ka yibe dariyfannagrad, ma yibe moningnagrad, ma yibe togopuluw ngorad?’
16 Bokum milyon e girdi’ u ga’ngin yang u fayleng e kara guyed fel’ngin e tin riyul’ ma ke riyul’ u wan’rad ni goo Pi Mich rok Jehovah e yad be fol ko teliw nib riyul’. Ereray e n’en ni kara duguliyed nbochan e tin ni be machibnag e Pi Mich rok Jehovah nge rogon ni yad be dag ko ngongol rorad, maku bochan e tin nib fel’ ni ke yibnag e teliw rorad. (Isaiah 48:17) Ere bokum milyon e girdi’ e ka rogned ni bod rogon e thin ni bay ko Zechariah 8:23 ni gaar: “Gamad ra un ngomed, ya kug rung’aged ni gimed e girdi’ ni ba’ Got romed.”
17. Mang fan ni gathi pag rogon ni ma yog e Pi Mich rok Jehovah ni yad be fol ko teliw nib riyul’?
17 Pi Mich rok Jehovah e gathi ba pag rogon ni yad be lemnag murung’agrad ma yad be yog ni goo yad e bay Got u ba’ rorad? Riyul’, ni ka rogned e thin ni taabrogon ko thin ni ke yog piyu Israel u Egypt ni gaar bay Got u ba’ rorad nyugu aram rogon ni piyu Egypt e bay boch ban’en ni ke michan’rad ngay, ara fapi kristiano u nap’an e bin som’mon e chibog ni ka rogned ni ba’ Got u ba’ rorad ma piyu Jew ni ku bay e teliw rorad e dariy. Pi Mich rok Jehovah e yad be rin’ fare maruwel ni i yog Jesus ni ereray e maruwel ni pi gachalpen nib riyul’ e ra un ngay ko ngiyal’ ni tin tomren e rran ni gaar: “Ma re Thin rok Got ney Nib Fel’ ni murung’agen e gagiyeg rok Got e bay ni machibnag u gubin yang nge gubin e girdi’ me nang, ma aram mfini taw nga tomren e fayleng.”—Matthew 24:14.
18, 19. (a) Mang fan ni dariy rogon min taleg e Pi Mich rok Jehovah ko machib ni yugu aram rogon ni yibe togopuluw ngorad? (b) Uw rogon ni be dag e Psalm 41:11 nriyul’ ni Pi Mich e ba’ Got u ba’ rorad?
18 Pi Mich rok Jehovah e yad be ulul ko re maruwel ney, ma dabra paged e gafgow nge togopuluw ni nge talegrad ko maruwel rorad. Thingarni mu’nag e maruwel rok Jehovah. De yib angin urngin e skeng ni ke rin’ yugu boch e girdi’ ni ngar taleged e Pi Mich ko maruwel ni ke pi’ Got ngorad ni ka nap’an fa binem e chibog i yib, ya ke micheg Jehovah ni gaar: “Machane dariy ba talin e cham nni ngongliy nra maadad ngom; urngin e piin ni yad ra yog ni gab kireb e bay e fulweg riy ni ga ra pi’ ngorad. Ereray e n’en ni kan pi’ ngak e pi tapigpig rok Jehovah, ma mat’awrad e yib rog.”—Isaiah 54:17, NW.
19 Bochan ni Pi Mich rok Jehovah e ba gel ma yad ba pasig e chiney ko kafram—ya ereray e tayim ni yibe togopluw ngorad u ga’ngin yang e fayleng—re n’ey e be micheg ni ke falfalan’ Jehovah ko n’en ni yad be rin’. I yog David ni pilung ni gaar: “Bochan e re n’ey ma kug nang ni ke fel’an’um ngog, ya ani toogor rog e dabi tolul ngog ni bod ni ke gel ngog.” (Psalm 41:11, NW; 56:9, 11) Fapi toogor rok Got e dabra tolulgad ngak e girdi’ rok Jehovah ni bod ni kar gelgad ngorad, ya ani Tayog e thin rorad, e Jesus Kristus, ni be yan nga m’on nge mada’ nga tomuren ni ke gel ko mahl.
Rayog ni Ngam Pi e Fulweg?
• Mang boch ban’en ni buch kakrom ni be dag e piin ni bay Got u ba’ rorad?
• Mang boch e pow ko baan riyul’ e teliw?
• Mang fan ni ba mich u wan’um ni Pi Mich rok Jehovah e ba’ Got rorad?
[Picture on page 22]
Piin ni yad baadag ni nge par Got u ba’ rorad e thingara puluwnaged e machib rorad ko Thin rok Got
[Picture on page 23]
Piin ni piilal ni Kristiano e ra dag e ngongol nib fel’ ngak girdien e ulung