Piin Nib Fel’yangaren​—Dabi Pagtalin Jehovah E Maruwel Romed!

“Got e gathi de mat’aw ni nge pagtalin e maruwel ni kam rin’ed nge t’ufeg ni kam daged ni fan ko ngochol rok, ya bochan nkam pigpiggad ngak e piin nib thothup ma ka gimed be pigpig i yan.”​—HEBREWS 6:10, NW.

1. Uw rogon ni fa gali ke babyor ko Bible ni Hebrew nge Malaki e be dag nib ga’ fan e pigpig ni kam tay u wan’ Jehovah?

KAAM rin’ ban’en ngak e fager rom u fithik’ e gol ma de pining e magar ngom? Rib gel e kireban’ riy ni faanra tin ni kan rin’ u fithik’ e gol e kan dariyfannag, ara kan pagtalin ni gubin. Machane, rib thil nfaanra gad be pigpig ku Jehovah u polo’ i gum’irchadad! Fare Bible e be yog ni gaar: “Got e gathi de mat’aw ni nge pagtalin e maruwel ni kam rin’ed nge t’ufeg ni kam daged ni fan ko ngochol rok, ya bochan kam pigpiggad ngak e piin nib thothup miki gimed be pigpig i yan.” (Hebrews 6:10, NW) Mu lemnag ko mang fan e re n’en ney. Ra tay Jehovah ni ireray e ngongol ni de mat’aw​—ma reb e denen—​nfaanra nge pagtalin e n’en ni kam rin’ nge n’en ni ka ga be rin’ i yan ko pigpig ngak. Riyul’ ni ir e Got ni ma chaariy e tin nib fel’ ni kan rin’!​—Malaki 3:10.

2. Mang fan ni pigpig ku Jehovah e riyul’ ni ireray e n’en nib fel’ ma yu gub thil?

² Kari mab e kanawo’ ngom ni ngam pigpig ko re Got ney ni ri ma pining e magar. Bochan ni karimus ni sogonapan nel’ milyon e girdi’ ni bay e michan’ rorad ni bod gur ma ra ngan taarebnag ko nel’ bilyon e girdi’ u ga’ngin yang u fayleng, ma riyul’ ni ri buch’uw e girdi’ ni ke yog ngak e taw’ath ni aram rogon. Maku, bochan e ga ma motoyil ma ga ma fol ko fare thin nib fel’ ma ireray e mich riy ni ri gab t’uf rok Jehovah. Ma aram fan, ni yog Jesus ni gaar: “Dariy be’ nrayog ni nge yib ngog ni faanra gathi en ni Chitamangiy e pow’iy nge yib ngog, ni ir e l’ugeg ku gub.” (John 6:44) Arrogon, ma ayuweg Jehovah e girdi’ rok ni be’ nge be’ ma rayog ni nge fel’ rogon u daken e maligach rok Kristus.

Ngam Pining e Magar ko Taw’ath nib Ga’ ni Keb Ngom

3. Uw rogon ni dag pifak Korah nib ga’ fan u wan’rad fare taw’ath ko pigpig ku Jehovah?

³ Rogon e n’en ni kan weliy ko fare article ni ke yan, e kam taw’ath ya bay rogom ni ngam felfelan’ag gum’irchaen Jehovah. (Proverbs 27:11) Ireray e n’en ni thingar dabmu dariyfannag. Reb u fithik’ e pi psalms ni kan thagthagnag, e pi fak Korah e ka rogned boch e thin ni be dag ni kar felfelan’gad ko pigpig ku Jehovah. Be yog ni gaar: “Taareb e rran ni yira par u tempel rom ma kab fel’ nga bbiyu’ e rran nni par u yugu bang; kug ba adag ni nggu sak’iy u langan e garog ko naun rok e Got rog ko bin ni nggu par u tafen e girdi’ ni kireb.”​—Psalm 84:10.

4. (a) Mang fan ni be lemnag boch e girdi’ ni mo’maw’ ni ngan pigpig ku Jehovah? (b) Mang e kanawo’ ni dag Jehovah ni ri ma yaliy ma ma taw’athnag e pi tapigpig rok?

⁴ Ireray e n’en ni ga be thamiy ko taw’ath rom ni ga ma pigpig ko Chitamam nu tharmiy? Riyul’, ni yu ngiyal’ ma pigpig ku Jehovah e ra m’ug ni gowa be magawonnag mat’awum ni ngam mel’eg ban’en. Ba riyul’ ni ra ngan par ni bod rogon kenggin e motochiyel u Bible ma ba t’uf ni ngan pagfay. Machane tomur riy, ma urngin ban’en ni ma ning Jehovah ngom e ra fel’ rogom riy. (Psalm 1:1-3) Maku, be guy Jehovah e maruwel ni ga ma rin’ ma ma dag ni ke felfelan’ ko yul’yul’ ni kam ta’ ni fan ngak. Tin riyul’ riy, e i yoloy Paul ni Jehovah e ma “taw’athnag e piin ni yad be gayiy Got.” (Hebrews 11:6) Jehovah e ma gay ba ngiyal’ ni nge rin’ e re n’en ney. Reb e profet u Israel kakrom nib mat’aw e i yog ni gaar: “Rogon murung’agen Jehovah, e lan owchen e ma changar nga urngin yang u fayleng ni nge dag gelngin ngak e piin ni kari polo’ gum’ircharad ngak Got.”​—2 Chronicles 16:9, NW.

5. (a) Mang e kanawo’ ni rib fel’ nrayog ni ngam dag ni kari polo’ gum’irchaem ngak Jehovah? (b) Mang fan ni sana mo’maw’ ni nga mog ngak yugu boch e girdi’ murung’agen e michan’ rom?

⁵ Reb e kanawo’ nib th’abi fel’ ni rayog ni ngam dag ni kari polo’ gum’irchaem ngak Jehovah e nguum weliy ngak yugu boch e girdi’ murung’agen. Kam pirieg e tayim ni ngam weliy ngak e girdi’ ni gimed nga skul murung’agen e michan’ rom? Rayog ni ngam rus ko yay ni som’mon, ma yira lemnag murung’agen ma rayog ni nge k’aring bochi marus. ‘Ra uw rogon nfaan yad ra minmin ngog?’ sana ga ra fith ni aram rogon. ‘Uw rogon ni faan yad ra lemnag ni teliw rog e yugu ban’en?’ Manang Jesus ni gathi urngin e girdi’ e ra motoyil ko fare thin ko Gil’ilungun. (John 15:20) Machane, biney e dagathi be yip’ fan ni urngin e girdi’ e ra ur thibthibnaged gur muur moningniged gur. N’en nib thil riy, e boor e Pi Mich ni fel’ yangaren ni ke motoyil e piin ni ku ba fel’ yangaren ngorad ma ri kar tayed farad ya bochan ka ra folgad ko tin ni ke mich u wan’rad.

“Ra Ayuwegem Jehovah”

6, 7. (a) Uw rogon reb e rugod ni 17 e duw rok ni ke yog rok ni nge machibnag e piin yad nga ba thal e skul? (b) Mang e kam fil ko n’en ni ke rin’ Jennifer?

⁶ Machane uw rogon ni ngari bung rogom ni ngam weliy murung’agen e michan’ rom ndab mu rus? Mang fan ni dab mog u fithik’ e yul’yul’ mab tamilang u nap’an ni ra fith e girdi’ ngom murung’agen e teliw rom? Mu lemnag e tin ni buch rok Jennifer ni 17 e duw rok. “Ngiyal’ nem e gu be abich ni misiw u skul. Piin ni rugod ni ur moyed u tebel rog e yad be weliy murung’agen e teliw, ma bagayad e fith ngog ko mang e teliw ni gu ma un ngay,” ireray e n’en ni ke yog. Ke rus Jennifer ni nge pi’ e fulweg fa? “Arrogon,” aram e n’en ni ke yog, “ya bochan dawori mudugil lanin’ug ko mang e ngara rin’ed.” Ere mang e ke rin’ Jennifer? Miki yog ni gaar, “Ku gog ngorad ni gag bagayad e Pi Mich rok Jehovah”. Me ulul ngay ni gaar, “Som’mon e gowa kar gingad ngay. Baga’ ni, kar lemnaged ni Pi Mich Rok Jehovah e yad e girdi’ nib thil rogorad. Me k’aringrad ni ngar fithed boch e deer, me yog rog ni nggu tamilangnag ngorad boch ban’en ni ur lemnaged ni de puluw. Mus nga tomuren e re rran nem, ma boch e rugod e yad ma yib ngog nguur fithed e deer.”

⁷ Ke kal Jennifer ngan’ ni ke yog rok ni nge weliy murung’agen e tin ni ke mich u wan’? Ri danga’! I gaar, “Kari felan’ug ngay u tomren e abich ko misiw.” “Chiney e ke tamilang u wan’rad ko ri mini’ e Pi Mich Rok Jehovah.” Chiney e ba mom e fonow ni pi’ Jennifer ni gaar: “Faanra mo’maw’ ngom ni ngam machibnag e piin gimed nga ba thal e skul ara pi sensey, mu meybil nib ngoch. Ra ayuwegem Jehovah. Ma ga ra felfelan’ ya karim fanay e tayim ni ke mab e kanawo’ ngom ni ngam wereg e machib.”​—1 Peter 3:15.

8. (a) Uw rogon ni ke ayuweg e meybil Nehemiah u nap’an ni ke mada’nag e magawon ni dan lemnag? (b) Mang boch e magawon u skul ni sana ba t’uf rom ni ngam meybil ku Jehovah nib ngoch ndariy lamam?

⁸ Mu tiyan’um ngay ni Jennifer e ke yog ni ‘ngam meybil’ ngak Jehovah nib ngoch u nap’an ni ke mab e kanawo’ ni ngam machibnag murung’agen e michan’ rom. Ri aram e n’en ni rin’ Nehemiah, ngak Artaxerxes ni pilung nu Persia, u nap’an ni keb e magawon ni dan lemnag. Kan guy ni ke kireban’ Nehemiah ya ka nog ngak murung’agen rarogon piyu Jew me nang ni fare yoror nge garog u Jerusalem e ke kireb. I naab fare pilung ngay ni ke magafan’ Nehemiah, ere ke fith ngak Nehemiah ko mang e magawon. U m’on ni dawori pi’ e fulweg, me yibilay Nehemiah ni ngan pow’iy. Ngemu’ ma de rus ni nge wenig ngak ni nge sul nga Jerusalem nge ayuweg i fal’eg fare mach ni ke puth. Me pag Artaxerxes ni nge rin’ Nehemiah e tin ke wenignag ngak. (Nehemiah 2:1-8) Mang e kam fil riy? Faanra kam rus u nap’an ni kan bing e wo’ ngom ni ngam weliy murung’agen e michan’ rom, dabmu pagtalin nrayog ni ngam meybil ni dabni rung’ag lamam. “Mpaged fan urngin e magafan’ romed ngak [Jehovah],” aram e n’en ni yoloy Peter, “ya be lemnag rogomed.”​—1 Peter 5:7; Psalm 55:22, NW.

“Kan Fal’eg Rogon ni Ngan Pi’ e Fulweg”

9. Uw rogon ni ke yog Leah ni 13 e duw rok ni nge wereg 23 ken fare babyor ni Young People Ask?

⁹ Mu lemnag yugu reb ni ke buch. Leah, ni 13 e duw rok, e be bieg fare babyor ni Questions Young People Ask​—Answers That Worka u skul ko ngiyal’ ni ngan abich ko misiw. “Boch e girdi’ e yad be sap ngog,” ireray e n’en ni ke yog, “me taaboch mab ulung e girdi’ e yad be sak’iy u toobeg ni yad be yaliyeg. Kar tababgad ni ngar fithed gag ko mang e be weliy fare babyor murung’agen.” Nap’an ni ke m’ay e re rran nem, ma immoy aningeg e rugod ni kar ninged ngak Leah ba ken fare babyor ni Young People Ask. De n’uw nap’an ma picha’ nem e ka ra pied e re ke babyor nem ngak yugu boch e girdi’ ngar bieged, me munmun maku ka ra adaged ni nge yog yu ken ngorad. Tomren ni ke yan in e wik, ma ke gaman 23 ken ko fare babyor ni Young People Ask ni ke wereg Leah ngak e piin ni yad nga skul nge pi tafager rok. Mom rok Leah ni nge weliy ngorad u nap’an ni kar fithed murung’agen fare ke babyor ni be bieg? Ri danga’! “Som’mon, ma kug rus,” ireray e n’en ni ke yog. “Machane, kug meybil, ma kug nang ni ba’ Jehovah ni be ayuwegeg.”

10, 11. Uw rogon ni ke yog rok fare buliyel nu Israel ni nge ayuweg reb e ga’ ko salthaw nu Syria ni nge fil murung’agen Jehovah, ma tomur riy ma mang boch ban’en ko yafas rok ni ke thiliyeg?

¹⁰ Tin ni buch rok Leah e rayog ni nge yibnag ngan’um e n’en ni buch rok reb e buliyel ni be’ nu Israel ni kan fek nga Syria ke mang sib u rom. Naaman, ni reb e ga’ ko pi salthaw nu Syria, e ke daraw. Sana leengin Naaman e ir ke tababnag e sabethin ni ireray e n’en ni ke k’aring e re buliyel nem ni nge weliy murung’agen e michan’ rok. Baaray e n’en ni yog, “Faan manga ra yan e masta rog i guy fare profet nu Samaria!” ireray e n’en ni yog. “Ma ra chuweg e daraw rok.”​—2 Kings 5:1-3.

¹¹ Ma angin nib ni bochan e de rus e chi pin nem ni nge weliy ban’en, e ke nang Naaman ni “dariy yugu reb e Got nga bang, ya ke mus ni Got nu Israel e ba’.” Maku ke dugliy ni dabki “pi’ e maligach fa gamanman ni kan urfiy ni maligach ngak yugu reb e kan ya kemus ni go’ Jehovah.” (2 Kings 5:15, 17, NW) Mmutrug ni ke taw’athnag Jehovah e chi ppin nem ni der rus. Ku aram e n’en ni ra rin’ ngak e piin ni ka yad ba fel’ yangaren e ngiyal’ ney. Aram e n’en ni ke buch rok Leah. Me munmun, ma boch ko fapi cha’ ni yad nga skul e kar bad ngak ma ka rogned ni fare babyor ni Young People Ask e ke ayuwegrad ke fel’ boch pangirad. “Kug felfelan’,” ireray e n’en ni yog leah, “ya bochan ni gu manang ni gu be ayuweg yugu boch e girdi’ ni ngari tamilang murung’agen Jehovah u wan’rad ma gu be ayuwegrad ni ngar thiliyeged e yafas rorad.”

12. Uw rogon ni ngam gel ngam pi’ e fulweg u murung’agen e michan’ rom?

¹² Ku rayog ni nge buch rom e n’en ni buch rok Jennifer nge Leah. Mu fol ko fonow ni pi’ Peter, ya ir e ke yoloy ni gaar, ni bochan e gur reb e Kristiano ma susun gubin ngiyal’ ni ngam “fal’eg rogom ni ngam pi’ e fulweg ngak urngin e girdi’ ni baadag ni ngar nanged fan e athap ni bay rom, machane ngam rin’ e re n’en nem u fithik’ e sumunguy nge ta’ fan nib gel.” (1 Peter 3:15, NW) Uw rogon ni ngam rin’ e n’en ni aram rogon? Mu folwok rok e Kristiano ko fa bin som’mon e chibog ni ka ra meybilgad ku Jehovah ni nge ayuwegrad ngar machibgad ndabra “rusgad.” (Acts 4:29) Dab mu rus ni ngam weliy ngak yugu boch e girdi’ murung’agen e tin ke mich u wan’um. Ma angin nra yib e rayog ni ngam gin ngay. Maku, ra mu felfelan’nag gum’irchaen Jehovah.

Videos nge Tin Yima Rin’ nib Thil

13. Mang boch ban’en ara tayim ni ke bing e kanawo’ ke fanay boch e girdi’ ni ka yad ba pagal ni fan ni ngar machibgad? (Mu guy e kahol ko page 20 nge 21.)

¹³ Boor e piin ni fel’ yangaren e kar weliyed e michan’ rorad ngak e piin ni yad nga skul ara sensey rorad ni yad ma fanay fapi videos. Yu ngiyal’, ma fare n’en ni ka nog e school projects ngay e ma bing e wo’ ni ngan pining e sorok ngak Jehovah. Ni bod, fa gali pagal ni 15-e duw-rorow, ni yow l’agruw e Mich Rok Jehovah, ni kan pi’ e maruwel ngorow ni ir bang fare world history class rorad ni ngar yoloyew reb e report ni murung’agen reb e pi teliw nu fayleng. Gali pagal ney e kar maruwelgow u taabang ni ngar yoloyew e report rorow u murung’agen e Pi Mich Rok Jehovah, ni yow be fanay e thin ni ba’ ko fare babyor ni Jehovah’s Witnesses​—Proclaimers of God’s Kingdom.b Maku ba t’uf ni ngar pied e report u l’ugunrad u lan lal e minit. Tomur riy, ma fare sensey nge fapi student e bay boor e deer rorad ma arfan ni kan uneg 20 e minit ngay ni ngki par fa gali pagal u p’eowchen fa piin yad nga ba thal e skul. U lan in e wik nga tomren, ma pi cha’ nem ni yad nga skul e kar ululgad ni yad be fith boch e deer u murung’agen e Pi Mich Rok Jehovah!

14, 15. (a) Mang fan ni marus ko girdi’ e ba wup? (b) Mang fan ni susun ni ngari pagan’um ni ngam weliy murung’agen e michan’ rom ngak yugu boch e girdi’?

¹⁴ Rogon ni dag e pi n’en nem ni kan weliy, e ra nga mog ngak yugu boch e girdi’ murung’agen e tin ni ke mich u wan’um ni gur reb e Mich Rok Jehovah ma ra yib e flaab ngom riy. Dab mu pag e marus ko girdi’ nge talegem ya dabi yib ngom e re taw’ath ney nge fare felfelan’ ni ma yib nbochan e kam ayuweg boch e girdi’ ni ngar nanged murung’agen Jehovah. Be weliy e Bible ni gaar: “Ngan dada’ ko marus ngak e girdi’ e reb e wup, machane en ni be pagan’ ngak Jehovah e yira ayuweg.”​—Proverbs 29:25, NW.

¹⁵ Dabmu pagtalin, nbochan gur reb e pagal ni Kristiano, ma bay ban’en rom ni rib t’uf rok e piin ni bod gur ni kab pagal​—ni aram e yafas nth’abi fel’ e chiney nge fare yafas ni manemus boch nga m’on ni kan micheg. (1 Timothy 4:8) U Meriken​—e sana ga ra lemnag ni girdi’ u rom e baga’ ni dar ma tiyan’ ko machib ara girdi’ ni ri ma tiyan’ ko fayleng—​ma survey ni kan ta’ u rom e be dag ni baley ko piin fel’ yangaren e ri ma tiyan’ ko teliw rorad, ma ba guruy u dalip guruy e ka rogned ni michan’ ko teliw e ireray e n’en ni “rib ga’fan ni be gagiyegnag” e yafas rorad. Ma baga’ ni boor yang u fayleng ni aram rogon. Ere baga’ ni piin fel’ yangaren ni gimed nga skul e yad baadag ni ngar motoyilgad ko thin ni ngam weliy u murung’agen e Bible.

Mu Chuchugur Ngak Jehovah ni Ka Gab Pagal

16. Mang e n’en nib muun ko ngan falan’ag Jehovah ma gathi kemus ni nga un weliy mrung’agen ngak yugu boch e girdi’?

¹⁶ Riyul’ ni, rogon ni ngan felfelan’nag gum’irchaen Jehovah e gathi kemus ni ngan weliy murung’agen. Ya kub t’uf ni ngam puluwnag e ngongol rom ko kenggin e motochiyel rok. John ni apostal e ke yoloy ni gaar: “Ya baaray fan ni nge t’uf Got rodad: fan e ngad folgad ko tin ni ke yog ni ngad rin’ed. Ma tin ni ke yog ni ngad rin’ed e gathi rib mo’maw’.” (1 John 5:3) Rayog ni ngam guy ni riyul’ ni aram rogon ni faanra ngam chugur ngak Jehovah. Uw rogon ni ngam rin’ e re n’en nem?

17. Uw rogon ni ngam chuchugur ngak Jehovah?

¹⁷ Mu fanay boch e tayim rom ni ngam bieg e Bible nge boch e babyor ni kan fek ko thin nu Bible. Nap’an ni ra yoor e tamilangan’ rom u murung’agen Jehovah, ma ke mom ni ngam fol rok ma ku ra mom ni ngam weliy ngak yugu boch e girdi’ murung’agen. “Girdi’ nib fel’ e ma yib e tin nib fel’ ko tin ke kunuy nga gum’irchaen,” ireray e n’en ni yog Jesus, “ya bochan ni ke sug gum’irchaen ko tin nib fel’ ma ra yog l’ugun murung’agen.” (Luke 6:45, NW) Ere mu suguy gum’irchaem ko tin nib fel’. Mang fan ni dabmu nameg ban’en ni ngam rin’ nib l’ag ngay? Sana rayog ni ngam mon’og u rogon ni ngam fal’eg rogom ni fan ko muulung e bin migid e wik. Ma bin migid e rayog ni ngam nameg ni ngam pi’ e fulweg nib ngoch ni keb u gum’irchaem. Maku riyul’ nib ga’ fan ni ngam fol ko tin ni kam fil.​—Filippi 4:9.

18. Yugu aram rogon ni keb e togopuluw ngom, ma mang e rayog ni ngam pagan’um ngay?

¹⁸ Fapi taw’ath ni ma yib ko pigpig ku Jehovah e ra par-​nib n’uw nap’an​—ma tin riyul’ riy, e ra par ndariy n’umngin nap’an. Riyul’, ni yu ngiyal’ e rayog ni ngan togopuluw ngom ara ngan moningnagem ya kam mang bagayad e Pi Mich Rok Jehovah. Machane mu lemnag Moses. Be yog e Bible ni “ke yip’ owchen ko tin ni ka ba’ nga m’on ni bayi pi’ Got ni puluwoy.” (Hebrews 11:24-26) Me gur e ku rayog ni nge pagan’um ngay ni Jehovah e ra pi’ puluwom ko maruwel ni kam tay ni ngam fil murung’agen ma ngam weliy ngak be’. Riyul’, ni dabi “pagtalin e maruwel rom nge t’ufeg ni kam dag ni fan nga fithingan.”​—Hebrews 6:10.

[Footnote]

Ka Ga Manang?

• Mang fan ni ke mudugil lanin’um ni baga’ fan e pigpig ni kam ta’ u wan’ Jehovah?

• Mang boch e kanawo’ ni ngan machib u skul ni ke pirieg boch e girdi’ ni ke yib angin?

• Uw rogon ni nge gel lanin’um ngam machibnag e piin gimed nga ba thal e skul?

• Uw rogon ni ngam chuchugur ngak Jehovah?

[Kahol ko page 14]

Boch e Tayim ni Ke Fanay Boch e Girdi’ ni Ngar Weliyed Murung’agen e Michan’ Rorad Riy

Nap’an ni yira pi’ e maruwel ni ngan pi’ reb e report ara project u skul, ma boch e girdi’ e yad ra mel’eg reb e kenggin ni rayog ni ngar weliyed e machib riy.

Boor e piin nib fel’ yangaren e kar pied reb e video ara reb e babyor ngak e sensey rorad ni be weliy murung’agen fare kenggin ni yibe weliy u skul

Boch e piin fel’ yangaren u nap’an ni yad be bieg e Bible ara babyor nni fek ko thin nu Bible u nap’an e recess rorad ma ma yib ngorad yugu boch e piin fel’ yangaren ngaur fithed boch e deer

[Sasing ko page 12]

Piin ni boor ban’en ni yad manang e rayog ni ngar ayuweged e piin ni ka yad ba pagal ni ngar pigpiggad ngak Jehovah