Reference ko Fare Babyor ni Tin Gad Ma Rin’ nge Machib Rodad
© 2024 Watch Tower Bible and Tract Society of Pennsylvania
NOVEMBER 4-10
TIN NIB GA’ FAN KO THIN ROK GOT PSALM 105
“M’ag ni Ke Ngongliy . . . e Bay i Par Ndariy N’umngin Nap’an”
Uw Rogon ni Ngari Mich u Wan’dad e Bin nib Beech e Fayleng ni Ke Micheg Jehovah?
11 Am lemnag boch ban’en ni micheg Jehovah ko girdi’ rok kakrom ni un lemnag ndabiyog ni nge buch. I micheg ngak Abraham nge Sarah ni yow ra fakay bochi pagel u pilibthir. (Gen. 17:15-17) Ki yog ngak Abraham nra tafanay e piin owchen fare nam nu Kanaan. Nap’an e pi duw ni i par piyu Israel ni yad e piin owchen Abraham u Egypt ni yad e sib, mab mudugil ni ur lemnaged ndabi riyul’ e re n’em ni kan micheg. Machane ke riyul’. Boch nga tomuren, me yog Jehovah ngak Elizabeth nra fakay bochi tir ni yugu aram rogon ni ke pilibthir. Ki yog ngak Maria ni be’ ndawori nang e pumoon nra fakay bbitir ni Fak. Re n’ey e ra lebguy e n’en ni micheg u lan fare milay’ nu Eden ni ke yan bokum biyu’ e duw!—Gen. 3:15.
12 Nap’an ni gad ra lemnag urngin ban’en ni ke micheg Jehovah nge rogon ni ke lebguy, ma aram e rra mich u wan’dad ni bay gelngin ni nge yibnag e bin nib beech e fayleng. (Mu beeg e Joshua 23:14; Isaiah 55:10, 11.) Re n’ey e ra ayuwegdad ni nge bung rogodad ni ngad ayuweged e girdi’ ni nge tamilang u wan’rad ni bin nib beech e fayleng ni kan micheg e gathi ban’en ni yibe athapeg ndabi buch. Nap’an ni weliy Jehovah murung’agen e bin nib beech e lan e lang nge bin nib beech e fayleng, me yog ni gaar: “Pi thin ney e ba riyul’ ma rayog ni ngan pagan’uy ngay.”—Rev. 21:1, 5.
it-2 1201 ¶2
Fare Thin
Tin kan sunmiy ni tin nib fos nge tin ndariy e yafos riy e ma fol ko thin rok Got, ma rayog ni nge fanay e pi n’ey ni nge lebguy e tin nib m’agan’ ngay. (Ps 103:20; 148:8) Rayog ni ngan taga’ ko thin rok, ma n’en ke micheg e ku der ma pagtalin ni nge rin’. (De 9:5; Ps 105:42-45) I yog ni thin rok e “dabi thil,” ma dabiyog ni nge dabi rin’ e tin ni ke m’ay i lemnag rok.—Isa 40:8; 55:10, 11; 1Pe 1:25.
Ngan Fil Ban’en Riy
Ga Be Lemnag Mab T’uf ni Ngkum Mon’og Boch, Fa?
13 Mu pag Jehovah ni nge yal’uwegem. Mang e rayog ni ngam rin’ ni faanra bay boch ban’en nde mat’aw ni ke rin’ boch e girdi’ ngom? Sana rayog ni ngam pithig fare magawon ni ka chingiyal’ nem. Machane, bay yu ngiyal’ ni faanra mu guy rogon ni ngam micheg ni gathi gur e ba kireb e rom, ma rayog ni ngam ga’nag e magawon ni ke sum. Am lemnag e n’en ni buch rok Josef. I rin’ fapi pumoon ni walagen boch ban’en nib kireb ngak, machane de tay e pi n’em u laniyan’. Ma boch nga tomuren mu kun t’ar e thin nga daken mi non’ nga kalbus. Yugu aram rogon, ma i pag Jehovah ni nge pow’iy u fithik’ e pi magawon ni i mada’nag. Ere, mang angin ni yib riy? “Thin rok Jehovah e aram e n’en ni i yal’uweg.” (Ps. 105:19, NW) Ere, nap’an ni m’ay fapi skeng ni i yan u fithik’ ma ke yag boch e fel’ngin ngak nra ayuweg u rogon ni nge rin’ e maruwel ni kan pi’ ngak ni nge rin’. (Gen. 41:37-44; 45:4-8) Faanra ga be mada’nag boch e magawon nib mo’maw’, mag meybil ngak Jehovah ni nge pi’ e gonop ngom, mu um non ma ga be rin’ boch ban’en u fithik’ e sumunguy, mag pag ni nge pi’ gelngim, ya ra ayuwegem.—Mu beeg e 1 Peter 5:10.
NOVEMBER 11-17
TIN NIB GA’ FAN KO THIN ROK GOT PSALM 106
“Ra Paged Talin Got ni Ir e Ayuwegrad”
“Mini’ e Bay u Ba’ rok Somol?”
13 I rus piyu Israel ko fagi manileng nrib dub’ag, nge uluch ni be mat, nge yugu boch ban’en ni rin’ Got ni yira ngat ngay. Ra weniggad ngak Moses ni nge mang ir e non ngak Jehovah u daken fare Burey nu Sinai ni owcherad, ma aram me m’agan’ Moses ngay. (Ex. 20:18-21) I par Moses u daken e burey nib n’uw nap’an. Ere gur, nge par piyu Israel u rom u daken e ted ndariy be’ ni nge pow’iyrad nrayog ni nge pagan’rad ngak? Rayog nsana yigi pag rogon ni i taga’ piyu Israel ngak Moses ni be pow’iyrad ni be’ nib girdi’. I magafan’rad nib pag rogon, ma aram me lungurad ngak Aron: “Mu ngongliy reb e got ngomad nge mang ir e fekdad i yan, ya da gu nanged e n’en ni ke buch rok Moses, ni ir e fekdad nga wuru’ yu Egypt.”—Ex. 32:1, 2.
Ngan Fil Ban’en Riy
Mini’ e En ni Ga Be Sap Ngak?
14 Mang e k’aring Moses ni nge togopuluw ngak Jehovah? Mu tay fanam i yan ko n’en ni be yog faram e Psalm 106:32, 33 (BT) ni be gaar: “Fapi alublub nu Meribah e aram e gin ni k’aring fapi girdi’ e damumuw ngak Somol riy ngari magawon Moses ni bochrad. Ra k’aringed e damumuw ngak me non ndakiyog ni tal nge lem.” Yugu aram rogon ni Jehovah e ir e ke togopuluw piyu Israel ngak, machane Moses e ir e damumuw. Bochan nde yag ni nge k’adan’ u puluwrad ma aram e n’en ni k’aring ni nge non ndaki yag ni tal nge lemnag wenegan nra yib nga tomuren.
15 I pag Moses e ngongol ni ke rin’ yugu boch e girdi’ ni nge k’aring ni nge fek owchen rok Jehovah. Ba puluw rogon ni pithig e bin som’on e magawon ni sum. (Ex. 7:6) Machane, sana rayog ni ke chalban ma ke ngochngochan’ ni bochan e ke yoor e duw ni yugu be togopuluw piyu Israel. Ere sana rayog ni kemus ni yigoo rogon e chalban nge ngochngochan’ ni ke tay e ir e i lemnag, ma daki lemnag rogon ni nge pining e sorok ngak Jehovah.
NOVEMBER 18-24
TIN NIB GA’ FAN KO THIN ROK GOT PSALMS 107-108
“Mu Pininged e Magar Ngak Somol, Ya Ir e Mmangil”
Nge Pining e Ulung e Sorok Ngak Jehovah
2 Fare ulung e gathi bod rogon e ulung ko fayleng. Gathi ba ulung ko binaw ara ba ulung i girdi’ ntaareb rogon e n’en ni yad baadag ni bod e gosgos ara ban’en ni yima rin’ u taabang. Ya, fare yaram ko ulung e fan ni ngan pining e sorok ngak Jehovah Got. Re n’em e ke n’uw nap’an ni yima rin’, ni bod rogon ni be tamilangnag fare babyor ko Psalms. U Psalm 35:18, (NW) e gad ra beeg riy ni gaar: “Gu ra yog e sorok ngom u lan fare ulung ni ba ga’; u fithik’ e girdi’ ni yoor ma gu ra pining e sorok ngom.” Taareb rogon ko Psalm 107:31, 32 e be pi’ e athamgil nga laniyan’dad ni gaar: “Thingar ra pininged e magar ngak Somol ya yugu be par ni yad ba t’uf rok, nge bochan e tin nib fel’ ni ke rin’ ngorad. Thingar ra weliyed u lan e muulung rogon feni sorok, mi yad pining e sorok ngak u p’eowchen e muulung rok e piin ni piilal ni yad ma yog e thin.”
Mu Pining e Magar ngak Jehovah me Tow’athnagem
4 Faanra ngaud pininged e magar ngak Jehovah ni gubin ngiyal’, ma thingar da lemnaged boch e kanawo’ ni ke tow’athnagdad riy, ma gad fal’eg i lemnag rogon ni ke m’ug gelngin e t’ufeg rok ngodad u daken e pi tow’ath ney. Ireray e n’en ni rin’ e en ni yoloy e psalm. Ma aram fan nri ngat nga urngin ban’en nrib manigil ni ke rin’ Jehovah ni fan ngak.—Mu beeg e Psalm 40:5; 107:43.
Ngan Fil Ban’en Riy
Uw Rogon Nra ‘Gelnagem’?
20 Mus ni faanra kad meewargad, ma “ra bay Got u ba’ rodad ma gadad ra gel.” (Ps. 108:13, BT) Ke pi’ Jehovah e n’en nib t’uf rom ya nge yag ni pi’ gelngim. Ere nap’an nra t’uf e ayuw rom ni ngam rin’ reb e maruwel ni kan pi’ ngom, ara ngam athamgil u fithik’ reb e magawon ni ga be mada’nag, ara ngam par ni gab felfelan’, mag meybil ngak mu kum pag ni nge pow’iyem u daken e fol Bible ni ga ma tay ni yigoo gur. Mu pag e pi walag ni ngar pied e athamgil nga lanin’um. Um par ni ga be lemnag e athap rom. Faan ga ra rin’ e re n’ey, ma aram e ra ‘gelnagem Got nga polo’ i gelngin ni ma yib u gelngin ndabi m’ay, nge yog ni mu athamgiliy urngin ban’en u fithik’ e gum’an’ . . . [nge] felfelan’.’—Kol. 1:11, 12.
NOVEMBER 25–DECEMBER 1
TIN NIB GA’ FAN KO THIN ROK GOT PSALMS 109-112
Mu Ayuweg Jesus ni Ir e Pilung!
Tin Baga’ Fan ko Ken Lal e Babyor ko Psalms
110:1, 2—Mang e rin’ e “Somol [rok David],” i Jesus Kristus, u nap’an ni be par u ba’ ni mat’aw rok Got? Tomren ni kan faseg Jesus ko yam’, me yan nga tharmiy me par u ba’ ni mat’aw rok Got ni be sonnag ni nge yib fare duw ni 1914 ni nge tabab ko gagiyeg nib Pilung. Ngiyal’ nem, ma be gagiyegnag Jesus e pi gachalpen ni kan dugliyrad, ni be pow’iyrad ko maruwel rorad ni ngan wereg e machib min pingeg e girdi’ ngar manged gachalpen maku be ayuwegrad ni ngar fal’eged rogorad ni fan ni ngar uned ngak ko gagiyeg u Gil’ilungun.—Matthew 24:14; 28:18-20; Luke 22:28-30.
Piin Ni Ma Cham Ngak Got E Dabiyog Rorad Ni Ngar Gelgad Ngak!
3 Ka nap’an ni kefini tabab fa bin 20 e chibog nge yan i mada’ ko chiney ni yima cham ngak girdien Jehovah. Boor e nam u yu yang, ni bay e piin ni pumoon riy ni ba kireb e lem rorad ni kar athamgilgad ni ngar taleged yad—arrogon, ngar tha’bed gulungan—fare maruwel ni ngan wereg fare thin nib fel’ ni murung’agen Gil’ilungun Got. Fare Moonyan’ e ir e ke k’aringrad ni en Toogor rodad ni ba th’abi gel ni “yugu be yan ni bod ba layon ni be tolul, ni be gayiy be’ ni nge longuy.” (1 Peter 5:8) Tomren ni ke m’ay “fa ngiyal’ ni kan dugliy ni fan ko pi nam” ko duw ni 1914, me ta’ Got Fak ni nge mang Pilung nib biech nu fayleng, me tay chilen ni gaar: “Um gagiyeg u fithik’ e pi toogor rom.” (Luke 21:24, NW; Psalm 110:2) Ke fanay gelngin, me yin’ Kristus Satan u lang nga daken e fayleng. Ma manang fare Moonyan’ ni ke ngoch nap’an, ma aram fan ni kari damumuw ngak e pi Kristiano ni kan dugliyrad nge pi cha’ ni yad ba chag ngorad. (Revelation 12:9, 17) Mang e ke buch ni bochan e togopuluw ni ma ta’ e pi toogor rok Got ni boor yay?
Mu Ayuweg e Ulung Rom
1. Mang boch e kanawo’ nrayog ni ngam fanay e tayim rom nge gelngim riy ni ngam ayuweg e ulung? Gad gubin nrayog ni ngad pied e ayuw u lan e ulung. Bay boch e girdi’ u lan e ulung rom ni kar pilibthirgad ara yad ba m’ar, fa? Gur, rayog ni ngam ayuwegrad ni ngar bad ko muulung? Fa gur, rayog ni ngam ayuwegrad u boch ban’en ni bod ni ngam fek e chuway’ rorad ara ngam ayuwegrad u boch e maruwel u tabinaw, fa? (Mu beeg e James 1:27.) Ku rayog ni ngad ognaged gadad ni ngad klinnaged Tagil’ e Liyor rodad ma gad be ngongliy e yungin ke kireb riy. Dariy be’ ni be towasariydad ni ngad rin’ed e pi n’ey, ya t’ufeg rodad ngak Got nge pi walagdad e aram e n’en ma k’aringdad ni ngad ‘ognaged gadad’ ko pi maruwel ney.—Psalm 110:3.
Piin kar taufegad e ku bay boch e kanawo’ nrayog ni ngar ayuweged e ulung riy. Pi walag ni pumoon ni ke bung rogorad e rayog ni ngar pigpiggad ni yad boch e ministerial servant me munmun mar manged boch e piilal. Pi walag ni pumoon nge ppin e ku rayog ni ngar pied e ayuw ko fare maruwel ni machib ni aram e ngar pigpiggad ni yad boch e pioneer. Bay boch e Pi Mich nrayog ni ngar uned i toy boch e tagil’ e liyor ara ranod ra pied e ayuw nga reb e ulung nib t’uf e ayuw riy u boch ban’en.
Ngan Fil Ban’en Riy
Piin Gallabthir—Mu Ayuweged Pi Fakmed ni ‘Nge Tamilangan’rad u Rogon ni Yima Thap ngak Got’
12 Be weliy fare babyor ni Insight on the Scriptures, ko Volume 2 ni gonop nrogon ni be yog e Bible e ba muun ngay “rogon ni ngad maruwelgad ko tamilangan’ nge rogon ni kad nanged fan boch ban’en nib fel’ rogon ya nge yag nda pithiged ara da siyeged boch e magawon, nge boch ban’en ni bay e riya’ riy, me yag nda rin’ed boch ban’en ni gad be nameg, ara yag ni ngad fonownaged yugu boch e girdi’ u rogon ni ngar rin’ed e re n’ey. Be’ nib gonop e ba thil ngak be’ nib balyang.” Be yog e Bible ni “gubin e bitir ni yad bbalyang, ma yad ba wagagey.” (Prov. 22:15, BT) Ere, bochan nib thil be’ nib gonop ngak be’ nib balyang, ma aram fan ni faanra ba gonop be’ ma aram e ir be’ ni ke ilal ko tirok Got ban’en. Faanra ke ilal be’ ko tirok Got ban’en ma aram e bay madgun Jehovah u wan’, ma baadag ni nge fol ko pi motochiyel rok. Gathi bochan e ir be’ ni ke ilal.—Mu beeg e Psalm 111:10.
DECEMBER 2-8
TIN NIB GA’ FAN KO THIN ROK GOT
PSALMS 113-118
Mang e Rayog ni Ngad Pied Ngak Jehovah ni Nge Yan Nga Puluwon e Tin Ke Rin’?
Mu Pag Ni T’ufeg E Ra Gelnagem
13 Rogon ni yog Jesus, e ba tamilang ni som’on ma thingarda t’ufeged Jehovah. Machane, dan gargelnagdad ni bay e t’ufeg rodad ku Jehovah u polo’ i lanin’dad. Aram e n’en ni ngad maruweliyed. Nap’an ni kad rung’aged u murung’agen ko yay ni som’on, ma ke fel’ Got uwan’dad nbochan. Buchuw nge buchuw, ma aram e kada nanged ko uw rogon ni ke fal’eg rogon e fayleng ni fan ko girdi’. (Genesis 2:5-23) Kada filed ko uw rogon ni ra ayuweg e girdi’, ma de digeydad u nap’an ni ke denen fa bin som’on e tabinaw, machane ke rin’ boch ban’en ni nge biyuliydad. (Genesis 3:1-5, 15) Ke dag e ngongol nib gol ko piin ni ba yul’yul’, ma munmun ma ke pi’ Fak ni kari maagirag rok ni ngan n’ag fan e denen rodad u daken. (John 3:16, 36) Re tamilangan’ ney ni be yoor i yan e ke ga’nag ni ngari fel’ Jehovah u wan’dad. (Isaiah 25:1) I yog David ni Pilung ni ba t’uf Jehovah rok ya bochan ni ma ayuweg. (Psalm 116:1-9) Chiney, e ma ayuwegdad Jehovah, ma pow’iydad, ma gelnagdad, nge ma pi’ e athamgil nga lanin’dad. Ra nge yoor e tamilangan’ rodad u murung’agen, me gel e t’ufeg rodad ngak.—Psalm 31:23; Zefaniah 3:17; Roma 8:28.
w09 7/15 29 ¶4-5
Mu Pining e Magar Mag Pi’ Ban’en u Polo’ i Gum’irchaem
I gaar fare psalmist u wan’: “Mang e rayog ni gu pi’ ngak Somol nge yan nga puluwon urngin e pi n’en nib fel’ ni ke rin’ ngog?” (Ps. 116:12) Mang boch ban’en nib fel’ ni kan rin’ ngak? I ayuweg Jehovah u lan ba ngiyal’ ni i ‘par ni kari rus ma ke magafan’.’ Maku reb e ke ‘chuweg u fithik’ e riya’.’ Baadag ni nge pi’ ban’en ngak Jehovah ni “nge yan nga puluwon.” Ere mang e rayog ni nge rin’? I yog ni gaar: ‘Bay gu pi’ ngak e tin ni ku gog.’ (Ps. 116:3, 4, 8, 10-14) Ke dugliy u wan’ ni nge tay u gil’ urngin e tin ke micheg ngak Jehovah, miki rin’ urngin ban’en nib milfan ngak ni nge rin’ ni fan ngak Jehovah.
Ku rayog ni ngam rin’ e re n’ey. Ni uw rogon? Ni aram e nge gubin ban’en ni ga be rin’ u lan e yafos rom ma nge puluw ko pi motochiyel rok Got nge pi kenggin e motochiyel rok. Ere mu guy rogon ni nge par e liyor rom ngak Jehovah ni aram e n’en th’abi ga’ fan u lan e yafos rom, mag pag gelngin nib thothup ni nge pow’iyem u urngin ban’en ni ga be rin’. (Ekl. 12:13; Gal. 5:16-18) Bin riyul’ riy e dariy ba ngiyal’ nrayog ni ngad pied puluwon urngin ban’en ni ke rin’ Jehovah ni fan ngodad. Machane ra guyem ni ga be pigpig ngak u polo’ i gum’irchaem, ma ma “felfelan’.” (Prov. 27:11, BT) Ri gad ba tow’ath nrayog ni ngad felfelan’naged Jehovah ko biney e kanawo’!
Pi N’en Nrayog ni Ngad Filed ko Fare Babyor ni Levitikus
9 Bin l’agruw e n’en yira fil riy: Gad be pigpig ngak Jehovah ni bochan e gad be pining e magar ngak. Gad ra fil e re n’ey u nap’an ni gad ra weliy murung’agen fapi maligach ni ma ognag piyu Israel ni nge gapaseg thilin Got nge girdi’, ni ku aram ban’en nib ga’ fan ni yima rin’ u Israel kakrom ni fan ko bin riyul’ e liyor. Gad ra fil u lan fare babyor ni Levitikus nrayog ni nge ognag be’ nu Israel e maligach ni nge gapaseg thilin Got nge girdi’ ni nge “og [e] magar ngak Got.” (Lev. 7:11-13, 16-18, BT) Ke ognag e re maligach ney ni gathi bochan e ban’en nthingari rin’, ya bochan e ban’en ni baadag ni nge rin’. Ere biney e maligach e ban’en ni ma ognag be’ ni ir rok ni bochan e ba t’uf Jehovah Got rok. Faen ke pi’ fare maligach, nge chon e tabinaw rok, nge fapi prist e yad ra kay ufin fare gamanman ni kan pi’ ni maligach. Machane, bay yu yang ko fare gamanman nra par ni yigoo Jehovah e fan ngak. Kun yang riy?
10 Bin dalip e n’en yira fil riy: Gad be pi’ e tin th’abi fel’ rodad ngak Jehovah ni bochan e ba t’uf rodad. Mam e aram e gin th’abi fel’ ko gamanman u wan’ Jehovah. Ki yog ni ku bay yu yang ko gamanman ni kub ga’ fan u wan’ ni kub muun fa gal buoy ngay. (Mu beeg e Levitikus 3:6, 12, 14-16.) Ere ri ma felfelan’ Jehovah u nap’an nra ognag be’ nu Israel e yungi n’em ko gamanman ngak ni kub muun e mam ngay ni ir rok e ke dugliy ni nge rin’. Faanra rin’ be’ nu Israel e re n’ey, ma aram e be dag nri baadag ni nge pi’ e tin th’abi fel’ ban’en ngak Got. Ere ku arrogon Jesus nib m’agan’ ngay ni nge pi’ e tin th’abi fel’ rok ngak Jehovah, ni aram e nge pigpig ngak u polo’ i gum’irchaen ni bochan e ba t’uf rok. (John 14:31) Rib felfelan’ Jesus ngay ni nge rin’ e tin nib m’agan’ Got ngay, ma kub ga’ fan u wan’ e pi motochiyel rok Got. (Ps. 40:8) Dariy e maruwar riy ni i felfelan’ Jehovah u nap’an ni be guy Jesus ni be pigpig ngak nib m’agan’ ngay!
11 Pigpig rodad ngak Jehovah e bod fapi maligach ni yima ognag ni nge gapaseg thilin Got nge girdi’ ni bochan e aram rogon ni gad ma dag ngak Jehovah rogon ni gad ma lemnag. Gad ma pi’ e tin th’abi fel’ rodad ngak ni bochan e rib t’uf rodad u polo’ i gum’ircha’dad. Dariy e maruwar riy nri ma felfelan’ Jehovah u nap’an nra guy bokum milyon e tapigpig rok ni yad be pigpig ngak nib m’agan’rad ngay ni bochan e ba t’uf Got rorad nge pi kanawo’ rok! Gathi yigoo tin gad ma rin’ e ma guy Jehovah mab ga’ fan u wan’, ya ku manang fan ni gad ma rin’ e pi n’em ma kub ga’ fan e re n’ey u wan’. Re n’ey e rayog ni ngari fal’eg lanin’dad. Bod ni, faanra kam pilibthir ndabkiyog ni ngam rin’ boch ban’en ni bod rogon ni ga baadag ni ngam rin’, ma nge pagan’um ngay ni manang Jehovah e tin dabiyog rom. Sana rayog ni ga be lemnag nri buchuuw ban’en nrayog ni ngam ognag ngak, machane be guy rogon e t’ufeg rom ngak ni aram e n’en ni be k’aringem ni ngam rin’ e tin rayog rom ni fan ngak. Ba fel’ u wan’ e tin rayog rom ni ngam pi’ ngak.
Ngan Fil Ban’en Riy
Ba Ga’ Fan u Wan’um e Pi Tow’ath ni Ke Pi’ Got Ngom, Fa?
7 Mang e ra ayuwegdad ni nge ga’ fan u wan’dad e fayleng rodad nge urngin ban’en ni bay riy nrib manigil? (Mu beeg e Psalm 115:16.) Reb e kanawo’ e aram e ngad fal’eged i lemnag e pi n’en ke ngongliy Jehovah. Re n’ey e ra k’aringdad ni ngad pininged e magar ngak Jehovah ni gubin e rran ko urngin ban’en nib manigil ni ke pi’ ngodad. Ma faanra ud klinnaged e gin gad ma par riy nib fel’ rogon, ma aram e gad be dag nib ga’ fan u wan’dad e fayleng rodad.
DECEMBER 9-15
TIN NIB GA’ FAN KO THIN ROK GOT PSALM 119:1-56
“Uw Rogon Be’ ni Kab Pagel ni Nge Par e Yafos Rok nib Machalbog?”
w87 11/1 18 ¶10
Ga Be Par ni Gab Beech u Gubin Ban’en, Fa?
10 I ginangey Paul ko Efesus 5:5 ni gaar: “Ngar mu nanged e re bugithin ni baaray: dariy be’ nib darngal, ara ma puwlag, ara ba chogow nrayog e birok e f’oth ngak ko flaab u lan suwon Kristus nge Got.” Yugu aram rogon, ma gubin e duw ni bokum biyu’ e walag ni yibe ginangrad ara yibe chuwegrad ko ulung ni bochan e ngongol ndarngal ara ‘denen nib togopluw ko dowef.’ (1 Korinth 6:18) Ba ga’ ni bochan e darur ‘folgad ko tin ke yog [Got] ni ngan rin’.’ (Psalm 119:9) Bod ni boor e walag nnap’an ni yad ra yan nga bang ni ngar toffangad ara ngar rin’ed boch ban’en ni yibnag e felfelan’ ngorad, ma gathi ri ka yad be tiyan’rad ko ngongol nib fel’ ara ngongol nib kireb ni yad be rin’. Darur chaggad ko pi walag ma yad be m’ag fager ko girdi’ u fayleng ni ku yad be toffan ara yad be rin’ boch ban’en ni nge yibnag e felfelan’ ngorad. Bay boch e Kristiano ni kar uned ko pi girdi’ ney i rin’ boch e ngongol nde fel’ ni bochan e yad be lemnag ni ‘yad boch e girdi’ ni yad ba gol.’ Ku arrogon ni ka bay yugu boch i yad ni kaygi chugur e tha’ u thilrad e piin yad ma maruwel u taabang. Bay reb e piilal ni Kristiano nri chugur e tha’ u thilrow be’ nib pin ni yow ma maruwel taabang, ma aram me digey e tabinaw rok nge yan i par ko fare ppin! Bochan e re n’ey, min chuweg ko ulung. Rib riyul’ fapi thin nu Bible ni be gaar, “Nchag ngak e girdi’ nib kireb me kireb pangiy nib fel’”!—1 Korinth 15:33.
“Puguran Rom E Gu Ma Felfelan’ Ngay”
JEHOVAH e ma ayuweg e girdi’ rok ni ma puguran ngorad boch ban’en nra ayuwegrad ko magawon ko ngiyal’ ney ni ke mo’maw’ e par. Boch e pi puguran ney e ma yib ko ngiyal’ ni be beeg be’ e Bible, ma boch e yima pi’ u nap’an e muulung ko Kristiano. Boch ko pi n’en ni gad ma beeg ara gad ma rung’ag ko yu ngiyal’ i n’ey e gathi aram e som’on ni kad nanged. Baga’ ni, fare thin e kada weliyed bayay. Bochan ni yu ngiyal’ ma gad ma pagtalin ban’en, ere ba t’uf ni ngkun puguran ngodad e tin nib m’agan’ Jehovah ngay nge pi motochiyel rok nge fonow rok. Thingar dogned e magar nbochan e puguran rok Got ngodad. Ma pi’ e athamgil nga lanin’dad ma ma ayuwegdad ni ngada lemnaged rogon e yafas rodad ni nge puluw ko tin mm’agan’ Got ngay. Arfan, ni ke yin’ fare psalmist e tang ni fan ku Jehovah ni gaar: “Tin ga ma puguran e gu ma felfelan’ ngay.”—Psalm 119:24, NW.
Mu Fek Owchem ko Pi N’en ni Dariy Gam’engin!
2 Pi n’en ni gad ma sap ngay e ku rayog ni nge kirebnagdad. Gad ra guy ban’en me yan nga lanin’dad ma aram me gagiyegnag gum’ircha’dad. Maku bochan ni gad be par ko re fayleng ney ni be gagiyegnag Satan, ma aram fan ni bay boch ban’en ni gad ra guy me kirebnagdad. (1 John 5:19) Aram fan ni yog e en ni yoloy e Psalm ngak Got ni gaar: “Mu ayuweg lan owcheg ni nge dab ki guy e tin ni dariy gam’engin; ma ga teg ni gub fos u rogon nib m’agan’um ngay.”—Ps. 119:37.
Ngan Fil Ban’en Riy
Pagan’ Ko Thin Rok Jehovah
2 N’en nrib ga’ fan ni yibe weliy ko Psalm 119 e aram e feni ga’ fan e thin rok Got. Sana fan ni nge dabni pagtalin, ma ani ke yoloy fare tang e ke rin’ e re n’em e be fol ko fare yaram ko yol ara alphabetic. Fare 176 verses e kan fek ko yol ni Hebrew alphabet. Som’mon ma ra reb e 22 e guruy ko psalm ma bay 8 e line riy ni taab yol e be tabab riy. Re psalm ney e be weliy e motochiyel nge kenggin e motochiyel rok Got. U lan e re article ney nge bin migid, e yira weliy murung’agen e Psalm 119 ni rogon nib puluw ko Hebrew Bible ni kan thiliyeg nib fel’ rogon. Faanra ngada fal’eged i lemnag e n’en ni ke dag e pi tapigpig rok Jehovah kakrom nge ngiyal’ ney ma rayog ni nge gelnag e tamilangan’ rodad ko re tang ney ni kan thagthagnag ma ra gelnag i pining e magar ni bochan e Thin rok Got ni kan yoloy, ni fare Bible.
DECEMBER 16-22
TIN NIB GA’ FAN KO THIN ROK GOT PSALM 119:57-120
Rogon ni Ngan K’adan’uy u Fithik’ e Gafgow
“Rib T’uf Rog E Motochiyel Rom!”
2 Thingar mu fithem ko, “Uw rogon ni ke fal’eg e motochiyel rok Got laniyan’ fare psalmist?” N’en ni ke ayuweg e bochan nib mudugil u wan’ nib baga’ fan u wan’ Jehovah. Pi fel’ngin ni yib ni bochan e ke fol ko pi motochiyel ni ke pi’ Got ngak u fithik’ e t’ufeg e ke k’aring e felfelan’ ko fare Psalmist, nyugu aram rogon ni ke yibnag e pi tatogopuluw e gafgow ngak nib gel. Ke guy nib fel’ e n’en ni ke rin’ Jehovah ngak. Maku, bochan ni ke fol ko pi thin ni bay ko motochiyel rok Got ma aram e ke k’aring fare psalmist ni nge gel e llowan’ rok ko pi toogor rok maku ki k’aring ni nge par nib fos. Bochan ni ke fol ko fare motochiyel ma aram e ke yib e gapas ngak ma ke par e nangan’ rok nib beech.—Psalm 119:1, 9, 65, 93, 98, 165.
Rib T’uf Rom E Fonow Ni Ma Pi’ Jehovah?
3 Rib ga’ fan ngak fare psalmist e pi fonow rok Got ma aram fan ni yon’ e tang ni be gaar: “Gu ma papey nguug fol ko motochiyel rom ni dagu sagaal. Fapi gaf ko piin kireb e ke liyegeg. Ma dawor gu pagtalin e motochiyel rom.” (Psalm 119:60, 61, NW) Fapi n’en ni ma puguran Jehovah e ra ayuwegdad ni ngada guman’gad u nap’an ni ke yib e togopuluw ngodad ni bochan e ke l’agan’dad ngay nrayog rok e Chitamangidad nu tharmiy ni nge th’ab fare gaf ni ke m’ag e pi toogor rodad ngodad. Nap’an ni ra taw nga nap’an, ma yira pithigdad u boch ban’en ni be magawonnagdad ma aram e rayog ni ngada lebguyed e maruwel rodad ni ngan machibnag e thin ko Gil’ilungun.—Mark 13:10.
Tin Baga’ Fan ko Ken Lal e Babyor ko Psalms
119:71—Mang e ra fel’ ko ngan un ko gafgow? Par nib mo’maw’ e ra fil ngodad ni ngarda pagedan’dad ngak Jehovah, ma ngad meybilgad ngak u fithik’ e yul’yul’, ma ngad filed e Bible nib gel ma ngad folgad ko n’en ni be yog. Maku, ngongol rodad u nap’an ni keb e magawon e ra dag thibngidad ma rayog ni ngan yal’uweg. Gafgow e dabi k’aring e damumuw ngodad ni faanra ngad paged ni nge machalbognagdad.
‘Mu Uned Ko Meyor ngak e Piin ni Yad Be Yor’
3 Dariy e maruwar riy ni kemus ni yigoo Jehovah ni Chitamangidad ni bay u tharmiy e aram e en nrayog ni ngari fal’eg lanin’dad. (Mu beeg e 2 Korinth 1:3, 4.) Ir e en ni ke dag e bin th’abi fel’ e kanawo’ ngodad u rogon ni ngad nanged rogon gelngin e amith ni ma tay laniyan’ yugu boch e girdi’, ya micheg ko girdi’ rok ni gaar: “Bay gu fal’eg lanin’med.”—Isa. 51:12, BT; Ps. 119:50, 52, 76.
5 Rayog ni nge pagan’dad nra ayuwegdad Jehovah. Ere, susun e dab da magagawongad ni ngad weliyed fiti lanin’dad ngak u daken e meybil, ma gad weliy e kireban’ rodad ngak. Ri ma fel’ lanin’dad u nap’an ni gad ra nang ni manang Jehovah rogon lanin’dad nge kireban’ ni gad ma tay, ma ra fal’eg lanin’dad! Machane, uw rogon ni ma rin’ e re n’ey?
Ngan Fil Ban’en Riy
Tin Baga’ Fan ko Ken Lal e Babyor ko Psalms
119:96—Mang e be yip’ fan e ‘tomur ko urngin ban’en nib flont’? Be weliy fare psalmist murung’agen e flont nrogon ni ma lemnag e girdi’. Sana be lemnag ni lem ko girdi’ u murung’agen e flont e bay e gin ni nge mus riy. N’en nib thil riy, e motochiyel rok Got e dariy e gin ni mus riy. Fonow ni bay riy e ba m’ag ko urngin ban’en ko yafas rodad. Be yog fare New International Version ni gaar, “Urngin nib flont ma gu be guy e gin ni mus riy, machane motochiyel rom e dariy e gin ni mus riy.”
DECEMBER 23-29
TIN NIB GA’ FAN KO THIN ROK GOT PSALM 119:121-176
Rogon ni Ngan Siyeg Boch Ban’en Nra K’aring e Kireban’
Mu Pag e Pi Motochiyel nge Kenggin e Motochiyel rok Got ni Nge Skulnag e Nangan’ Rom
5 Faanra nge yib angin e pi motochiyel rok Got ngodad, ma aram e gathi kemus ni ngaud beeged ya ba t’uf ni ngkud nanged ko mang e pi motochiyel nem. Thingari t’uf e pi motochiyel nem rodad ma gad tayfan. Be gaar e Thin rok Got: “Mu fanenikayed e tin nib kireb, me t’uf romed e tin nib fel’.” (Amos 5:15) Machane, uw rogon ni ngad rin’ed e re n’ey? Reb e ban’en nrayog ni nge ayuwegdad e aram e ngad filed rogon ni ngaud lemnaged boch ban’en ni bod rogon ni ma lemnag Jehovah. Am susunnag nder yag ni ngam mol nib fel’ rogon. Ere ke yog e togta ngom nib t’uf ni ngam kay e ggan nib fel’ nga fithik’ i dowam, mu um rin’ boch ban’en nib chamag ngom, mag thilyeg boch ban’en u rogon e par rom. Nap’an nim fol ko fare fonow, ma aram mag guy ni ke yib angin! Ere dabisiy ni ga ra pining e magar ko togta rom ni ke ayuwegem ni ngam mon’ognag boch ban’en u rogon e par rom.
6 Ku arrogon e En ni Ke Sunmiydad ni ke pi’ boch e motochiyel nrayog ni nge ayuwegdad u wenegan e denen me yag nda mon’ognaged rogon e par rodad. Am lemnag rogon angin ni ma yib ngodad ni faan gad ra fol ko pi motochiyel u Bible ni be yog ndabin ban, ara ni sasalap, ara ni moro’ro’, ara ni un ko ngongol ndarngal, ara cham, ara ngongolen e pig. (Mu beeg e Proverbs 6:16-19; Rev. 21:8) Nap’an ni gad ra guy angin ni ke yib ngodad ni bochan e gad be rin’ boch ban’en u rogon nib m’agan’ Jehovah ngay, ma aram e ra gel e t’ufeg rodad ngak nge pi motochiyel rok miki ga’ fan u wan’dad.
w93 4/15 17 ¶12
Gimed e Piin Fel’ Yangaren, Mang e Gimed Be Nameg?
12 Bin th’abi ga’ fan riy e thingar mu fanenikay e tin nib kireb. (Psalm 97:10) Uw rogon ni ngam fanenikay ban’en nsana rayog nsom’on e ga be lemnag nra yibnag e felfelan’ ngom? Aram e ngam lemnag wenegan nra yib riy! Be gaar e Bible: “Dab mu banniged gimed, ya dariy be’ nrayog ni nge bannag Got. Ra be’ ma mit i n’en ni yung e ir e ra t’ar wom’engin. Faanra yung be’ ban’en nga daken e milay’ ni aram e tin nib kireb ni be ar’arnag, ma wom’engin nra yib riy ngak e yam’.” (Galatia 6:7, 8) Nap’an ni yira waliyem ni ngam pagem ko ar’ar rom, mag lemnag wenegan nra yib riy ni aram e rogon ni ga ra kirebnag laniyan’ Jehovah Got. (Mu taarebrogonnag ko Psalm 78:41.) Kum lemnag rogon nrayog ni ngan fakay e bitir ndan lemnag ara af ba mit e m’ar ngom ni bod e AIDS. Mu lemnag rogon e kireban’ ni ga ra tay nge rogon nra m’ay fam u wan’um. Ku rayog ni bay boch ban’en nra par wenegan rom nib n’uw nap’an. I yog reb e ppin ni Kristiano ni gaar: “Gu unew figirngig ko par ko pumoon nge ppin u m’on ni nggu mada’gow. Yugu aram rogon ni gamow l’agruw e Kristiano e ngiyal’ ney, machane ireray tapgin e luag thin nge taliyeg ni ma buch u lan e mabgol romow.” Maku reb e rayog ni nge mul boch e tow’ath rom u lan e ulung ara nni chuwegem ko ulung ni Kristiano! (1 Korinth 5:9-13) Dariy ban’en nrayog ni nge yan nga lon wenegan e pi n’en kam rin’ ni bochan e ngam felfelan’ riy nib ngoch nap’an.
Ngan Fil Ban’en Riy
Nge Mich u Wan’um nib Riyul’ e “Thin” rok Got
2 Gadad e pi tapigpig rok Jehovah e ba mich u wan’dad ni ir fare ‘Got nib yul’yul’,’ ma gubin ngiyal’ ni baadag e tin nib fel’ ni fan ngodad. (Ps. 31:5; Isa. 48:17) Gad manang nrayog ni nge pagan’dad ko n’en gad ma beeg u Bible, ya “gubin e thin [rok Got] nib riyul’.” (Mu beeg e Psalm 119:160, NW.) Ba puluw u wan’dad e n’en ni yoloy be’ ni boor ban’en u murung’agen e Bible ni manang ni gaar: “Dariy ban’en ni ke yog Got nde riyul’ ara dabi riyul’. Rayog ni nge pagan’ e girdi’ rok ko n’en be yog ni bochan e be pagan’rad ngak.”
DECEMBER 30–JANUARY 5
TIN NIB GA’ FAN KO THIN ROK GOT PSALMS 120-126
Ra Yunged ni Yad Be Yor, Mar T’ared Wom’engin u Fithik’ e Felfelan’
Ba Taw’ath e Piin Yad Be Pining e Sorok Ngak Got
10 Nap’an ni ngada feked fare mat’ rok pi gachalpen Jesus, ma aram e gad be cham ngak Satan. “Mi gimed togopuluw ngak fare moonyan’ me mil romed,” be micheg James 4:7 ni aram rogon. Biney e gathi be yip’ fan nib mom ni ngan togopuluw ngak fare Moonyan’. Ngan pigpig ku Got e ba t’uf ni ngan maruweliy nib elmerin. (Luke 13:24) Machane be micheg e Bible ko Psalm 126:5 (NW ni gaar: “Piin ni be yung e awoch ni yad be yor e yad ra t’ar wom’engin u fithik’ e felfelan’.” Arrogon, gad be pigpig ko reb e Got ni ma pining e magar. Ma “taw’athnag e piin ni be gayiy Got,” ma ma taw’athnag e piin ni ma pining e sorok ngak.—Hebrews 11:6.
Ra Uw Feni Gel e Michan’ Rom?
17 Be kireban’um ni bochan e ke yim’ be’ nib t’uf rom, fa? Mu beeg murung’agen boch e girdi’ u Bible nni fasegrad ko yam’, ya nge yag ni ngari mich u wan’um e athap ko fos ko yam’. Be kireban’um ni bochan e kan tharbog reb i girdien e tabinaw rom, fa? Mu fil e Bible ya nge yag ni ngarim micheg nga lanin’um ni birok Got e kanawo’ u rogon ni ma yal’uwegey e aram e bin nth’abi fel’. Demtrug e re miti magawon ni ga be mada’nag, mag fanay e binem e kanawo’ ni ke mab ngom ni ngam gelnag e michan’ rom riy. Mu weliy gubin ban’en ni bay u lanin’um ngak Jehovah. Dab mu palognagem ko pi walag, ya ngam chugurnagem ngorad. (Prov. 18:1) Yugu aram rogon ni ga ma yor u nap’an ni ga ra lemnag e n’en ke buch rom, machane mu rin’ boch ban’en nra ayuwegem ni ngam athamgil u fithik’ e magawon rom. (Ps. 126:5, 6) Mu ulul ni ngam un ko muulung, nge machib, ma ga be beeg e Bible rom, mu um lemnag e pi tow’ath ni ke micheg Jehovah nra pi’ ngom boch nga m’on. Ga ra guy rogon ni be ayuwegem Jehovah, ma aram e rra gel boch e michan’ rom ngak.
Ngan Ulul Ko Fare Maruwel Ni Ngan Kunuy E Woldug!
13 Thin ni bay ko Psalm 126:5, 6 e ri be fal’eg laniyan’ e piin tamokun woldug ni girdien Got, ma baga’ ni piin ni ke yib e togopuluw ngorad ni be gaar: “Piin ni kar yunged e awoch ni yad be yor e yad ra t’ar woomngin ni yad be tolul u fithik’ e falfalan’. Ani ni gubin ngiyal’ e ma yan ni be yor, ma be fek e dug rok ni bay e awoch riy, e mmtrug ni ra yib ni be tolul u fithik’ e falfalan’, ni be fek e ggan rok ni kan m’ag thuman.” Fare thin ko psalmist u murung’agen e ngan yung ban’en nge ngan t’ar woomngin e be yip’ fan e ayuw nge flaab nra pi’ Jehovah ngak e piin ni ka ba’ ni kan kalbusnagrad u Babylon kakrom min pagrad. Kari felan’rad u nap’an ni kan pagrad, machane sana kara yorgad u nap’an ni kara yunged e awoch nga but’ nde fel’ ndan maruweliy u lan 70 e duw ni kan kalbusnagrad. Machane, piin ni kar ululgad i yung ban’en nge fare maruwel ni ngan toy ban’en e ke felan’rad nga angin ni keb ma yad ba falfalan’ ko maruwel ni kar ted.
14 Sana gadra yor u nap’an ni ra yib e skeng ngodad ara pi walagdad e kar gafgowgad ya bochan ni kara rin’ed e tin nib mat’aw. (1 Peter 3:14) Nap’an e maruwel rodad ni ngan kunuy e woldug, e sana kad gafgowgad ko som’mon ya gowa de yib angin ngodad nrayog ni ngada daged nbochan e maruwel ni kad ted i wereg e machib. Machane faanra ngada ululgad i wereg e awoch ma gad puog e ran ngay, ma ra ayuweg Got ni nge tugul, nge baga’ ni ra pag rogon ko tin ni kad fineyed. (1 Korinth 3:6) Ma kan dag nib tamilang angin ni keb ngodad ko maruwel ni ngan wereg e Bible nge boch e babyor ni kan ngongliy nib puluw ko Thin rok Got.
Ngan Fil Ban’en Riy
Mini’ e En ni Ga Be Sap Ngak?
CHINEY e gad be par u ba ngiyal’ ni kari “mo’maw’” e par, ma gad manang nu m’on ni yira thang e re m’ag nib kireb ney ngu m’on ni nge yib e bin riyul’ e gapas nga fayleng, ma aram e ku ra gel boch e mo’maw’ ko par rodad. (2 Tim. 3:1) Ere ba fel’ ni ngad fithed gadad ni nge lungudad, ‘Mini’ e en ni gu be sap ngak ni nge ayuwegeg me pow’iyeg?’ Sana cha’ nth’abi som’on ni gad ra yog e aram “Jehovah,” ma aram e n’en nib puluw ni nga dogned.
2 Ere mang e ba muun ngay ni ngad sapgad ngak Jehovah? Ma uw rogon ni ngad pared ni ir e gad be sap ngak u nap’an ni kad mada’naged boch e magawon nib mo’maw’ u lan e yafos rodad? Kakrom e yog be’ ni yoloy e psalm nib t’uf ni ngad changargad ngak Jehovah ni nge ayuwegdad u nap’an nra t’uf e ayuw rodad. (Mu beeg e Psalm 123:1-4.) I taareb rogonnag e re n’em ni ngad sapgad ngak Jehovah nga rogon ni ma sap reb e tapigpig ko en ni ir e masta rok. Mang e be yip’ fan e pi thin ney ni yog e en ni yoloy e psalm? Be’ nib tapigpig e gathi kemus ni ma sap ara ma taga’ ko masta rok ni nge pi’ gan me ayuweg ndabi buch ban’en rok, ya kub t’uf ni nga i par ma be yaliy fare masta rok ya nge yag ni nang e n’en ni baadag fare masta ni nge rin’, me rin’ fapi n’em. Ere ku arrogodad nib t’uf ni ngaud sapgad nga lan e Thin rok Got ni gubin e rran, ya nge yag nda nanged e n’en nib m’agan’ ngay ni ngad rin’ed ma gad fol riy. Faan gad ra rin’ ni aray rogon, ma aram e rayog ni nge pagan’dad ngay nra ayuwegdad Jehovah ko ngiyal’ ni ke t’uf e ayuw rodad.—Efe. 5:17.