Rogon ni Um Par ni Nge Pasigan’um Ngay
1 Pasig ni tay Apollos ni fan ko machib e ra puguran ngodad u murung’agen e pi Kristiano ko ngiyal’ ney ni ri yad ba pasig ko maruwel ko machib. (Acts 18:24-28) Machane kan piningdad ni gad gubin ni gaar: “Mmaruwelgad nib gel, ma dab um malmalgad. Mpigpiggad ngak Somol ni gimed ba pasig ngay u lanin’med.” (Rom. 12:11) Mang e ra ayuwegdad nge yog ngodad nguud pired ni gad ba pasig ko machib?
2 Tamilangan’ e Ma K’aring e Pasig: Tomren ni m’ug Jesus ngak l’agruw i gachalpen me “weliy ngorow e tin ni murung’agen ni kan weliy u lan urngin ken e babyor nib thothup,” ma aram me lungurow, “Gathi da thamiyew rodow ni bod ba nifiy ni be yik’ u ngorongordow ni faani i welthin ngodow u daken e kanawo’ me weliy fan fapi thin nu babyor nib thothup ngodow?” (Luke 24:27, 32) Ma gathi da thamiyed rodad ni bod ba nifiy ni be yik’ ko ngiyal’ ni nge yoor i tamilang e Thin Rok Got u wan’dad? Arrogon, tamilangan’ e ma gelnag e michan’. Be weliy Roma 10:17 ni gaar: “Thin rok Got ni yibe machibnag yibe rung’ag e be yognag e michan’ ngak e girdi’.” Faani par gum’ercha’dad nib mudugil ko pi n’en ni i micheg Jehovah, ma ri dabiyog ni nge dab da weliyed u murung’agen e pi n’en ni ke tamilang u wan’dad!—Ps. 145:7; Acts 4:20.
3 Ra nguud pired ni ba gel nib t’uf Got rodad ma gad ba pasig ko machib, ma dabiyog ni ngad pagedan’dad ko tamilangan’ ni ke yib ngodad ko fol Bible kafram. Thingar ud yoornaged e tamilangan’ ko tin riyul’ nge gelnag e t’ufeg rodad ku Jehovah. Ya ra danga’ ma pigpig ni gad be tay e rayog ni nge war me par ndariy fan riy. (Rev. 2:4) Be yog e Thin Rok Got ngodad “mu um . . . ted ni ngii yog ngomed ma gimed be nang rogon Got i yan nge tin ni ba adag.”—Kol. 1:9, 10.
4 Yalen e Fol Bible Rodad: Ere ba puluw ni ngad yaliyed rogon e fol Bible ni gad ma tay. Rayog ni ngad layinnaged e fulweg u lan e Wulyang Ntagil’e Damit ma ngad pied e fulweg nib puluw. Machane gad ma bieg e thin nu Bible ndan yoloy riy ma gad ma fl’eg i lemnag rogon ni gad ra fol riy fa? Ma gad ma athamgil ni ngad fl’eged i gay yugu boch e thin ko Bible reading ma ngad fl’eged i lemnag rogon nib m’ag e thin riy ngodad fa? (Ps. 77:11, 12; Prov. 2:1-5) Uw fene fel’ ni ngan tiyan’uy ko Thin Rok Got! (1 Tim. 4:15, 16) Faan gad ra tiyan’dad ko fol Bible ma ra ayuweg gum’ercha’dad nge par nib gel “me pasigan’dad ni ngad rin’ed e tin nib fel’.”—Titus 2:14.