Wenegan e Mahl
Rib gel e gafgow ni ma tay e girdi’ u tan e mahl. Manang e pi salthaw nge yug girdi’ u ga’ngin yang e fayleng gelngin feni kireb e mahl.
SALTHAW
“Gubin ngiyal’ ni ga be guy e girdi’ ni yad be yim’ ma boch e ba gel e maad’ad ni yad be tay. Dabiyog ni nge pagan’um.”—Gary, Britain.
“I kan keruug nge owcheg, ma boor e girdi’ nug guy ni yim’ nib muun e bitir nge pilibthir ngay. Mahl e ma k’aringem ni nge dabki kireban’um ko girdi’ ni yad be gafgow ma yad be yim’.”—Wilmar, Colombia.
“Nap’an ni yira boyochnag be’ u p’eowchem, ma dabi chuw u lanin’um. Gubin ngiyal’ ni ga be guy ma ga be rung’ag laman facha’ ni be tolul ma be gel’gel’. Dariy ba ngiyal’ ni ga ra pagtalin facha’.”—Zafirah, Meriken.
GIRDI’
“Gu lemnag ndakuriy ba ngiyal’ ni kug ra felfelan’ bayay. Ga be rusnag e yafos rom nge yafos rok chon e tabinaw nge pi fager rom.”—Oleksandra, Ukraine.
“Rib gel e marus ni gamad ma tay u nap’an ni gamad ba sak’iy ni gamad be sonnag e ggan ko l’agruw e kolok ni kakadbul nge mada’ ko ragag nge taareb e kolok nnep’, ya dag nanged e ngiyal’ nra kan bagamad.”—Daler, Tajikistan.
“I yim’ e gallabthir rog u tan e mahl. Ere dariy be’ ni nge fal’eg lanin’ug ara ayuwegeg.”—Marie, Rwanda.
Yugu aram rogon ni i gafgow e pi girdi’ ney u tan e mahl, machane ke yag ni ngar pirieged e gapas e chiney. Ki mich u wan’rad ndab ki n’uw nap’an ma ra tal gubin e mahl nge cham ni yibe tay. Re ke Wulyang ko Damit ney e ra fanay e Bible ni nge tamilangnag rogon nra buch e re n’ey.