Mu “Pining e Piin ni Yad Piilal”

1. Uw rogon ni ke dag Jehovah nib ga’ fan e pi saf rok u wan’?

BA GA’ fan e pi saf rok Jehovah u wan’. I chuw’iyrad nga rachaen Jesus me dugliy e piin piilal u lan e ulung ni ngar ayuweged yad. (Acts 20:28) Baadag Got ni ngaun ayuweg e pi saf rok nib fel’ rogon. Piin piilal e yad ma fol u rogon ni ma pow’iyrad Kristus, mar fal’eged laniyan’ e pi saf mar ayuweged yad u boch ban’en nra kirebnag e tha’ u thilrad Jehovah.​—Isa. 32:​1, 2.

2. Mini’ e piin ma ayuwegrad Jehovah? (Ezekiel 34:​15, 16)

² Ri ma lemnag Jehovah e pi saf rok, machane baadag ni nge ayuweg e pi arorad ni be gafgow. Ma ayuweg e piin kar magawongad ko tirok ban’en u daken e piin piilal. (Mu beeg e Ezekiel 34:​15, 16.) Machane baadag ni ngad ninged e ayuw ko ngiyal’ ni ke t’uf rodad. Aram e ngiyal’ ni ngad meybilgad ngak ni nge ayuwegdad, mu kud ninged e ayuw ko piin kan turguyrad ni ngar manged “pastor [“ngar ayuweged,” NW] ma ngar filed fan e thin rok Got” ko ulung.​—Efe. 4:​11, 12.

3. Faan gad ra lemnag e maruwel nib milfan ko piin piilal, ma uw rogon nra yib angin ngodad ni gad gubin?

³ Re article ney e gad ra weliy riy rogon ni ke yarmiy Got ni nge ayuwegdad ko tirok ban’en u daken e piin piilal. Gad ra weliy e fulweg ko pi deer ni baaray ni be gaar: Mingiyal’ e susun ni ngad ninged e ayuw ko piin piilal? Mang fan nsusun e ngad rin’ed e re n’ey? Ma uw rogon ni yad ma ayuwegdad? Mus ni faanra ba chugur e tha’ u thildad Jehovah e chiney, ma fulweg ko pi deer ney e ra ayuwegdad ni ngari ga’ fan u wan’dad e biney e yaram rok Got, maku rayog ni nge ayuwegdad ba ngiyal’ ni ke t’uf e ayuw rodad.

MINGIYAL’ E SUSUN NI NGAD ‘PININGED E PIIN NI YAD PIILAL’?

4. Mang fan ni gad manang ni fare thin ni bay ko James 5:​14-16, 19, 20 e be weliy murung’agen be’ ni ke magawon ko tirok Got ban’en? (Kum guy e sasing.)

⁴ I weliy James nreb i gachalpen Jesus rogon ni ma fanay Jehovah e piin piilal ni ngar ayuweged gadad ni gaar: “Ba’ be’ u fithik’med nib m’ar? Faanra ba’ ma nge pining e piin ni yad piilal ko galesiya.” (Mu beeg e James 5:​14-16, 19, 20.) Thin ni bay u m’on ngu tomuren e pi thin ney e be dag ni be weliy James murung’agen be’ ni ke magawon ko tirok Got ban’en. Bod ni faen ke m’ar e yibe yog ngak ni nge yan i guy e piin piilal ma gathi togta. Ki weliy James ni cha’nem ni ke m’ar e ki fel’ rogon bayay u nap’an nn’ag fan e denen rok. Bin riyul’ riy e pi n’en nib t’uf ni ngan rin’ ni ngan ayuweg be’ ni ke magawon ko tirok Got ban’en e ku bod e n’en yima rin’ ngak e piin kar m’argad. Nap’an ni gad ra m’ar ma gad ma yan da guyed e togta, ngad weliyed salpedad ngak, ma gad fol ko n’en ke yog ngodad ni ngad rin’ed. Ku arrogon nnap’an ni gad ra magawon ko tirok Got ban’en ma susun e nga darod da guyed reb e piilal, ngad weliyed salpedad ngak, ma gad fol ko fonow nu Bible ni ke pi’ ngodad.

5. Uw rogon nrayog ni ngad nanged ni gad be meewar ko tirok Got ban’en?

⁵ Fare yaram ni kan weliy murung’agen ko James ko guruy ni 5 e be pi’ e athamgil nga lanin’dad ni nga darod da guyed e piin piilal u nap’an ni kad nanged ni kad magawongad ko tirok Got ban’en. Machane gad ba gonop ni ngad ninged e ayuw u m’on ni ngad kirebnaged e tha’ u thildad Got! Thingar da yul’yul’gad ngodad. Be yog e Bible nrayog ni ngad bannaged gadad ngad lemnaged ni ka gad ba fel’ u wan’ Jehovah, machane bin riyul’ riy e danga’. (Jas. 1:22) Ireray e n’en ni buch rok boch e Kristiano u Sardis, machane i yog Jesus ngorad nda kur fel’gad u wan’ Jehovah. (Rev. 3:​1, 2) Reb e kanawo’ nrayog ni ngad nanged ko ke uw rogodad ko tirok Got ban’en e aram e ngad taareb rogonnaged fadad pasig ko pigpig ni gad be tay e chiney ko kafram. (Rev. 2:​4, 5) Rayog ni ngad fithed gadad ni nge lungudad: ‘Gur, gathi ri kug baadag nug ma beeg e Bible rog mug fal’eg i lemnag e chiney ni bod kafram, fa? Gur, gathi ri kug ma fal’eg rogog ni fan ko muulung maku bay yu ngiyal’ nug ma digey e muulung, fa? Gur, gathi ri ku gub pasig ko machib, fa? Ma gur, pi n’en nug baadag nug ma rin’ ara chugum e ir e gu ma par nug ma lemnag ma kug ma tay e tayim rog ni fan ngay, fa?’ Faanra fulweg rom u reb e pi deer ney e arrogon, ma rayog ni be m’ug riy ni bay ban’en ni gab meewar riy ni faanra dab mu rin’ ban’en ngay ma rayog ni nge magawonnagem ko tirok Got ban’en. Faanra der yag ni ngad gelgad nga reb e meewar rodad ni gadad rodad ara ke k’aringdad ni ngad th’abed reb e motochiyel rok Got, ma susun e ngad ninged e ayuw ko piin piilal.

6. Mang e susun ni nge rin’ e piin kar rin’ed reb e denen nib ubchiya’?

⁶ Riyul’ ni piin kar rin’ed reb e denen nib ubchiya’ nrayog ni ngan tharbograd ko ulung ni bochan e susun ni ngar nonad ngak reb e piilal. (1 Kor. 5:​11-13) Ma be’ ni ke rin’ reb e denen nib ubchiya’ e ba t’uf ni ngan ayuweg ni ngki fel’ e tha’ u thilrow Jehovah bayay. Faanra nge n’ag Jehovah fan e denen rodad u daken fare biyul, ma thingar da ‘ngongliyed e pi n’en ni ir e ra m’ug riy ni kad pied keru’dad ko denen ni gad be rin’.’ (Acts 26:20) Pi n’ey e ba muun ngay ni nga darod da nonad ko piin piilal ni faanra kad rin’ed reb e denen nib ubchiya’.

7. Mini’ e kub t’uf ni nge ayuweg e piin piilal?

⁷ Piin piilal e gathi kemus ni yad ma ayuweg e piin kar rin’ed reb e denen nib ubchiya’, ya ku yad ma ayuweg e piin kar meewargad ko tirok Got ban’en. (Acts 20:35) Bod nsana rayog ni be magafan’um ni bochan e ri be mo’maw’ ni ngam gel ko pi ar’ar nib kireb ni be yib ngom. Rayog ni ngari mo’maw’ e re n’ey ngom ni faanra gur be’ nib mecham ngom ni ngaum fanay e falay ni kireb, ara um yaliy yaan e ngongol ni puwlag, ara um un ko ngongol ndarngal u m’on ni ngam fil e tin riyul’. Dab mu lemnag nthingar mu gel ko pi n’ey ni gur rom. Rayog ni ngam mel’eg ni ngam non ngak reb e piilal nra motoyil ngom, me pi’ boch e fonow nib manigil ngom, miki micheg nga lanin’um ni faan ga ra siyeg ni ngam rin’ e pi n’en nib kireb ni ga be ar’arnag, ma aram e rayog ni ngam felfelan’nag Jehovah. (Ekl. 4:12) Faanra ke mulan’um, ma rayog ni nge puguran e piin piilal ngom nre n’ey e dabisiy ni be m’ug riy nib ga’ fan u wan’um e tha’ u thilmew Jehovah ma ga be guy rogon ni nge dabi pag rogon e pagan’ rom.​—1 Kor. 10:12.

8. Ba miti mang kireb e de t’uf ni ngad ninged e ayuw riy ko piin piilal?

⁸ De t’uf ni ngad weliyed urngin e oloboch rodad ngak e piin piilal. Bod nrayog ni bay ba ngiyal’ ni ka mog ban’en ngak reb e walag ni ke kirebnag laniyan’ ara karim damumuw ngak. Ere rayog ni ngam fol ko fonow ni pi’ Jesus ni aram e ngam awnag e gapas u thilmew ko bin ngam man mu non ko piin piilal. (Matt. 5:​23, 24) Rayog ni ngam gay murung’agen e sumunguy, nge gum’an’, nge t’ar laniyan’ ya nge yag nim mon’og u rogon ni nga i m’ug e pi fel’ngin ney rom. Machane riyul’ ni faanra de yag ni ngam pithig e re magawon ney, ma rayog ni ngam ning e ayuw ngak reb e piilal. Nap’an ni yol apostal Paul ngak piyu Filippi, me yog ngak reb e walag ni pumoon ndariy fithingan u Bible ni nge ayuweg Euodia nge Sintike ni ngar pithigew e magawon ni ke sum u thilrow. Ere ku rayog ni nge ayuwegem reb e piilal ko ulung rom ni ngkum rin’ e re n’ey.​—Fil. 4:​2, 3.

MANG FAN NSUSUN E NGAD PININGED E PIIN PIILAL?

9. Mang fan nsusun e dab da tamra’gad ni ngad nonad ko piin piilal? (Proverbs 28:13)

⁹ Ba t’uf e michan’ rodad maku dab da rusgad ni ngad ninged e ayuw u nap’an ni kad rin’ed reb e denen nib ubchiya’ ara nap’an ni kad nanged ni be mo’maw’ ni ngad gelgad nga reb e meewar rodad. Susun e dab da tamra’gad ni ngad nonad ko piin piilal. Mang fan? Ya faan gad ra fol ko yaram ni ke ngongliy Jehovah, ma aram e gad be dag ni be pagan’dad ngak nge fonow ni ma pi’ ni nge ayuwegdad ni ngad pared ni gad ba gel ko tirok ban’en mab gel e michan’ rodad. Gad manang ni faanra be yan ni ngad rin’ed ban’en nib kireb, mab t’uf ni nge ayuwegdad. (Ps. 94:18) Ma faanra kad denengad, ma ra runguydad ni faan gad ra weliy e denen rodad ma gad tal ndab kud rin’ed.​—Mu beeg e Proverbs 28:13.

10. Mang e rayog ni nge buch ni faan gad ra guy rogon ni ngad mithaged e denen rodad?

¹⁰ Faan gad ra weliy e denen rodad ko piin piilal, ma rayog ni nge n’ag Jehovah fan rodad miki fel’ e tha’ u thildad bayay. Machane faanra dab da nonad ko piin piilal, ma ra gel boch e ubchiya’ ko magawon rodad. Nap’an ni guy David ni Pilung rogon ni nge mithag e denen rok, me magawon e tha’ u thilrow Jehovah, miki par nib kireban’, miki amith laniyan’. (Ps. 32:​3-5) Faanra bay e magawon rodad ko tirok Got ban’en ndab da guyed rogon ni ngad rin’ed ban’en ngay ma rayog ni nge gel e ubchiya’ riy, ni bod rogon ni faanra bay ba mit e m’ar rodad ara bang u dowdad ni ke maad’ad ndab da guyed rogon ni ngan tafalaynag ma rayog ni nge gel e ubchiya’ riy. Manang Jehovah e re n’ey, ere aram fan ni be pi’ e athamgil nga lanin’dad ni nga darod ngak “ngad puruy’gad” u daken e yaram ni ke ngongliy nra ayuwegdad ni ngki fel’ e tha’ u thildad bayay.​—Isa. 1:​5, 6, 18.

11. Faan gad ra mithag e denen, ma uw rogon nrayog ni nge gafgow yugu boch e girdi’?

¹¹ Faan gad ra mithag e denen rodad, ma rayog ni nge gafgow yugu boch e girdi’. Rayog ni ngad taleged gelngin Got nib thothup ndab ki yib ko ulung ni ga’ngin, mu kud magawonnaged e gapas u thilin e pi walag. (Efe. 4:30) Ku arrogon ni faanra kad nanged ni bay be’ u lan e ulung ni ke rin’ reb e denen nib ubchiya’, ma susun e nga dogned ngak ni nge yan i yog ko piin piilal.a Gad ra mithag reb e denen nib ubchiya’ ni ke rin’ be’, maku ra yan i aw nib kireb e rodad. (Lev. 5:1) T’ufeg rodad ngak Jehovah e susun e aram e n’en nra k’aringdad ni nga darod da guyed e piin piilal nga dogned e tin riyul’ ngorad. Faan gad ra rin’ e re n’ey, ma aram e gad be tay e ulung nib beech mu kud ayuweged e piin kar denengad ni ngki fel’ e tha’ u thilrad Jehovah bayay.

UW ROGON NI MA AYUWEGDAD E PIIN PIILAL?

12. Uw rogon ni ma ayuweg e piin piilal e piin kar meewargad ko tirok Got ban’en?

¹² Be yog e Bible ko piin piilal ni ngar ayuweged e piin kar meewargad ko tirok Got ban’en. (1 Thess. 5:14) Faanra kam denen, ma rayog ni nge fith e piin piilal boch e deer ngom ya nge yag nra nanged rogon lanin’um. (Prov. 20:5) Rayog ni ngam ayuwegrad ni aram e ngam weliy urngin ban’en ni bay u lanin’um ni mus ni faanra ba mo’maw’ ngom ni bochan e yalen rom, ara rarogom, ara ga be tamra’ ko magawon rom. Ma dabi magafan’um nri chey ma gog ban’en nde puluw. (Job 6:3) Ra guy e piin piilal rogon ni ngar motoyilgad ngom nib fel’ rogon mar nanged urngin ban’en nrayog ni ngar nanged u murung’agen e magawon rom u m’on ni ngar fonownaged gur, ko bin ngar gurgad ngar dugliyed boch ban’en u rarogom. (Prov. 18:13) Yad manang nib t’uf e tayim ni ngan ayuweg e pi saf rok Got, ere yad manang ndabiyog ni kemus ni taab yay ni ngan non u taabang min pithig boch e magawon nib mo’maw’.

13. Uw rogon nrayog ni nge ayuwegdad e piin piilal u daken e meybil nge thin nu Bible ni yad ra beeg ngodad? (Kum guy e sasing.)

¹³ Nap’an ni ga ra pining e piin piilal, ma yad ra guy rogon ndab ra gelnaged boch e kireban’ rom. Ya yad ra pi’ e meybil ni fan ngom. Rayog ni ngam gin nga feni ‘ga’ angin’ e meybil ni yad ra pi’ ni fan ngom. Ayuw ni yad ra pi’ ngom e kub muun ngay ni ngar ‘liyfed e gapgep nga dakenam u daken fithingan’ Jehovah. (Jas. 5:​14-16) Re “gapgep” ney e be yip’ fan e tin riyul’ ni bay u lan e Thin rok Got. Rayog ni nge fanay e piin piilal e Bible ni ngar fal’eged lanin’um mar ayuweged gur ni ngki fel’ e tha’ u thilmew Jehovah bayay. (Isa. 57:18) Thin nu Bible ni yad ra beeg ngom e rayog ni nge ayuwegem ni ngam dugliy u wan’um ni ngam ulul i rin’ e tin nib fel’. Ku rayog ni ngam rung’ag laman Jehovah ni be non ngom u dakenrad ni be gaar: ‘Baaray e wo’. Mu lek.’​—Isa. 30:21.

14. Uw rogon ni ma ayuweg e piin piilal be’ ni be yan ni nge rin’ “ban’en nib kireb” nrogon ni be yog e Galatia 6:1? (Kum guy e sasing.)

¹⁴ Mu beeg e Galatia 6:1. Reb e Kristiano ni be yan ni nge rin’ “ban’en nib kireb” e der fol ko pi motochiyel rok Got nib mat’aw. Re n’ey nib kireb ni be yan ni nge rin’ e rayog ni be yip’ fan ni ke dugliy ban’en nde puluw ara ke rin’ reb e denen nib ubchiya’. T’ufeg e ma k’aring e piin piilal ni ngar ‘guyed rogon faanem nge sul nga rogon nge par ni ke mat’aw bayay; machane thingar rrin’ed u fithik’ e sumunguy.’ Fare bugithin ni Greek ni kan pilyeg ni “nge sul nga rogon” e yima fanay ni nge tamilangnag rogon ni ma sulweg reb e togta ba yil ni ke m’ing ya nge yag ni ngki sul nge peth bayay nib fel’ rogon. Piin piilal e yad ra guy rogon ni ngar ayuweged be’ ni ke meewar ko tirok Got ban’en u reb e kanawo’ ndabi munnag daken e gafgow ni ke tay, ni bod rogon reb e togta nib salap nra kol ayuw u nap’an ni be guy rogon ni nge sulweg fare yil nga rogon ya nge dabi munnag daken e amith ni be tay facha’ ni ke maad’ad. Ku be yog e Bible ngak e piin piilal ni ‘ku er rogorad ni ngkur guyed rogorad.’ Nap’an ni yad be ayuwegdad ni ngad folgad ko fonow u Bible maku yad manang ni ku arrogorad ndawor ra flontgad maku rayog ni ngar olobochgad. Ere aram fan ni yad ma guy rogon ni ngar nanged rogon lanin’dad ko bin ngar daged ni ka yad ba tolang ara ka yad ba fel’ ngodad, ara ra turguyed rarogodad u wan’rad.​—1 Pet. 3:8.

15. Mang e rayog ni ngad rin’ed ni faanra bay e magawon rodad?

¹⁵ Rayog ni nge pagan’dad ko piin piilal u lan e ulung. Kan skulnagrad u rogon ni nge dab ra weliyed ko girdi’ boch ban’en u murung’agdad nsusun e dab ra weliyed, mar pied e fonow nib puluw ko Bible ko bin ngar weliyed boch ban’en nrogon ni yad be lemnag, mu kur ayuweged gadad i fek gilbadad. (Prov. 11:13; Gal. 6:2) Yugu aram rogon nib thilthil rarogorad nge n’umngin nap’an ni kar manged piilal, machane demtrug bagayad nrayog ni ngad weliyed e magawon rodad ngak. Riyul’ ndab da ninged e fonow ngak boch e piilal nib thilthil ni bochan e gad be athapeg ni manga yigi yog bagayad e n’en gad baadag ni ngad rung’aged. Gad ra rin’ e re n’ey, ma aram e gad be folwok rok e piin yad baadag ni nga nog ngorad e tin “yad be yim’ ni bochan ni ngar rung’aged,” ko bin ngad filed e “bin nib riyul’ e machib” ni bay ko Thin rok Got. (2 Tim. 4:3) Nap’an ni gad ra weliy e magawon rodad ngak reb e piilal, ma rayog ni nge fith ko kad weliyed e re n’em ngak yugu boch e piilal fa dawor, ma mang fonow e kar pied ngodad. Ma bochan ni manang e gin nge mus riy, ma aram e ku rayog ni nge yan i ning e fonow ngak yugu reb e piilal.​—Prov. 13:10.

N’EN NIB MILFAN NGODAD

16. Mang e ba milfan ngodad?

¹⁶ Yugu aram rogon ni ma ayuwegdad e piin piilal ndabi buch ban’en rodad, machane daru rogned ngodad e n’en ngad rin’ed. Ra bagadad mab milfan ngak ni nge par nib yul’yul’ ngak Got. Ra yan i tomur ma ra bagadad ma ra weliy ngak Got rogon e thin nge ngongol ni i rin’. Ma ra ayuwegdad ni ngad dugliyed boch ban’en nib fel’ rogon ma gad par ni gad ba yul’yul’ ngak. (Rom. 14:12) Ere piin piilal e yad ma ayuwegdad ni ngad nanged rogon e lem rok Got u daken e Thin rok ko bin ngar dugliyed e n’en ngad rin’ed. Faan gad ra fol ko fonow ni kar pied nib puluw ko Bible, ma aram e rayog ni ngad “filed rogon” ni ngad dugliyed boch ban’en nib fel’ rogon.​—Heb. 5:14.

17. Mang e susun ni ngad dugliyed u wan’dad ni ngad rin’ed?

¹⁷ Ri gad ba tow’ath ni gad boch e saf rok Jehovah! Ke pi’ Jehovah Jesus ni ir ‘faanem nib fel’ rogon ni ma gafaliy e saf’ ni nge biyuliydad ya nge mab e kanawo’ ngodad ni nge yag e yafos ni manemus ngodad. (John 10:11) Ki pi’ e piin piilal ni ngar ayuweged e ulung ni bod e n’en ni micheg ni gaar: “Bay gu pi’ boch e tayugang’ ngomed ni ma fol rog, ni bay ra gagiyegniged gimed ko gonop nge tamilangan’.” (Jer. 3:​15, BT) Nap’an ni gad ra meewar ko tirok Got ban’en, ma susun e dab da magagawongad ni ngad ninged e ayuw ko piin piilal. Faan gad ra rin’ e re n’ey, ma aram e gad ra guy rogon nra i fanayrad Jehovah ni ngar ayuweged gadad.