N’en Nth’abi Fel’ ni Ngad Rin’ed ko Ngongol Nde Mat’aw ni Be Buch

1-2. Uw rogon e ngongol nde mat’aw u wan’ boor e girdi’? Mang e rayog ni ngaud lemnaged?

GAD be par u ba fayleng nde mat’aw e ngongol ko girdi’ riy. Boor fan ni yima rin’ boch ban’en nde mat’aw ko girdi’. Rayog ni bochan e yad ba gafgow, ara bochan e yad e pumoon ara ppin, ara bochan e gin kar bad riy, ara ramaen dowrad. Yad ma gafgow ni bochan e bay boch i girdien e siyobay ara tayugang’ ko am ni yigoo salpiy e ba m’on u wan’rad. Rayog ni gad be gafgow ara be gafgow be’ ni gad manang ni bochan e ngongol ni be rin’ yugu boch e girdi’ nde mat’aw.

² Aram fan ndarud gingad ngay ni boor e girdi’ ni yad be damumuw ni bochan e ngongol nde mat’aw ni yad be guy ni yibe rin’ u fayleng e ngiyal’ ney. Gad gubin ni gad baadag ni ngaun dag e ngongol nib fel’ ngodad ma gad be par u fithik’ e gapas. Aram fan ni bay boch e girdi’ ni yad ma guy rogon ni ngar pithiged e pi magawon ni yad be guy ni be buch u fayleng ara nam rorad. Yad ma sayinnag yu yang e babyor ni be yog ko am e n’en nge rin’, mar yu ulunggad ngaur togopuluwgad ko am nge boch e motochiyel ni kan ngongliy, ma yad be ayuweg boch e tayugang’ ko am ni kar micheged ni yad ra taleg e ngongol nde mat’aw ni yibe rin’. Machane gadad e piin Kristiano e kan fil ngodad ndab da boded e “girdi’ nu roy u fayleng,” ma ngad sonnaged Gil’ilungun Got ni nge chuweg urngin e ngongol nde mat’aw ni yibe rin’. (John 17:16) Yugu aram rogon ma ma kireban’dad maku gad ma damumuw u nap’an ni gad ra guy be’ ni yibe rin’ boch e ngongol nde mat’aw ngak. Ere rayog ni nge lungudad u wan’dad: ‘Mang e susun ni nggu rin’? Bay ban’en nrayog ni nggu rin’ ko pi n’en nde mat’aw ni be buch e chiney, fa?’ Ra ngad nanged e fulweg ko gal deer ney, ma som’on e ngad weliyed rogon e ngongol nde mat’aw u wan’ Jehovah nge Jesus.

MA FANENIKAN JEHOVAH NGE JESUS E NGONGOL NDE MAT’AW

3. Mang fan ni gad ma damumuw ni bochan e ngongol nde mat’aw ni yima rin’? (Isaiah 5:7)

³ Be weliy e Bible fan ndubdad e ngongol nde mat’aw. Be yog ni ke sunmiydad Jehovah ni gad bod yaan mab “t’uf rok e tin nib mat’aw ma ba yal’uw.” (Ps. 33:5; Gen. 1:26) Dariy ba ngiyal’ ni ma rin’ e ngongol nde mat’aw, maku dabun ni nge ngongol be’ ni aram rogon! (Deut. 32:​3, 4; Mik. 6:8; Zek. 7:9) Bod nnap’an Isaiah ni profet, me rung’ag Jehovah laman boor e girdi’ u Israel ni yad be “wenig ni ngan rin’ ban’en” ko ngongol nde mat’aw ni be rin’ yugu boch e girdi’ ko nam rorad ngorad. (Mu beeg e Isaiah 5:7.) Ere rin’ Jehovah ban’en ngay ni aram e gechignag e piin yugu yad be th’ab e Motochiyel rok ma yad be rin’ boch ban’en nde mat’aw ko girdi’.​—Isa. 5:​5, 13.

4. Uw rogon ni be tamilangnag ban’en ni buch ni bay ko Gospel rogon e ngongol nde mat’aw u wan’ Jesus? (Kum guy e sasing.)

⁴ Ba t’uf e tin nib mat’aw rok Jesus ma ma fanenikan e tin nde mat’aw ni bod Jehovah. Bay bayay u nap’an ni be machib me guy be’ nib pumoon nib marwoth pa’. I ayuweg e re pumoon nem, machane nap’an ni guy e pi tayugang’ ko teliw e re n’ey mar damumuwgad. Rogned ni ke th’ab Jesus e motochiyel ko Sabbath. Dariy fan u wan’rad ndakir gafgow fare pumoon. Uw rogon u wan’ Jesus e n’en nrin’ed? I “kireban’ ngorad nga farad gelan’ nga fithik’ e balyang.”​—Mark 3:​1-6.

5. Faanra gad be damumuw ni bochan ban’en nde mat’aw ni be buch, ma mang e thingar dab da paged talin?

⁵ Bochan ni ma damumuw Jehovah nge Jesus ko ngongol nde mat’aw ni ma buch, ma aram fan nde kireb ni ngkud lemgad ni aram rogon. (Efe. 4:26 nge study note ko fare thin ni “Be wrathful”) Yugu aram rogon ma dab da paged talin ni faan gad ra damumuw ni mus ni faanra bay tapgin, maku dabiyog ni ngad chuweged e ngongol nde mat’aw ni be buch. Bin riyul’ riy e faanra ud pared ni gad ba damumuw ara darud gagiyegnaged e damumuw rodad, ma rayog ni ngad m’argad ara kireban’dad nib pag rogon. (Ps. 37:​1, 8; Jas. 1:20) Ere mang e susun ni ngad rin’ed ko ngongol nde mat’aw? Rayog ni ngad filed ban’en ko n’en ni rin’ Jesus.

N’EN NI I RIN’ JESUS KO NGONGOL NDE MAT’AW NI UN RIN’

6. Mang boch e ngongol nde mat’aw ni un rin’ u nap’an ni immoy Jesus u fayleng? (Kum guy e sasing.)

⁶ Boor e ngongol nde mat’aw ni i guy Jesus ni i buch u nap’an ni immoy u fayleng. I guy rogon ni i gafgownag e pi tayugang’ ko teliw e girdi’. (Matt. 23:​2-4) Manang gelngin e gafgow ni i tay e pi tayugang’ nu Roma ko girdi’. Boor e Jew ni yad baadag ni ngar chuwgad u tan pa’ yu Roma. Ku immoy boch i yad ni sunmiy boch e ulung ni ngar chamgad ngak piyu Roma. Yugu aram rogon ma de sunmiy Jesus boch e ulung ara mang nga boch ni be guy rogon ni nge thilyeg e n’en be rin’ e am. Nap’an ni nang ni be guy e girdi’ rogon ni nge mang pilung, ma aram me chuw rorad.​—John 6:15.

7-8. Nap’an ni immoy Jesus u fayleng, ma mang fan nde guy rogon ni nge taleg e ngongol nde mat’aw? (John 18:36)

⁷ Nap’an ni immoy Jesus u fayleng, ma de guy rogon ni nge un nga ngongolen e am ya nge yag ni taleg e ngongol nde mat’aw. Mang fan? Ya manang ndariy mat’awun e girdi’ ni ngar gagiyegnaged yad maku dabiyog ni ngar rin’ed e re n’ey. (Ps. 146:3; Jer. 10:23) Ku dabiyog ni ngar chuweged tapgin e ngongol nde mat’aw ni be buch. Satan ni Moonyan’ e ir e be gagiyegnag e re fayleng ney. Ir be’ nrib kireb mab ga’ ni boor e girdi’ ko re fayleng ney ni yad ma folwok rok. (John 8:44; Efe. 2:2) Mus ko girdi’ nib manigil ndabiyog ni ngar pithiged e pi magawon ko re fayleng ney, ni bochan e gathi gubin ngiyal’ ni yad ma rin’ e tin nib mat’aw ni bochan e dawor ra flontgad.​—Ekl. 7:20.

⁸ Manang Jesus ni yigoo Gil’ilungun Got e ra chuweg tapgin e ngongol nde mat’aw ni be buch. Ere aram fan ni i fanay e tayim rok nge gelngin ni nge “machibnag ngak e girdi’ e Thin Nib Fel’ ni murung’agen e gagiyeg rok Got.” (Luke 8:1) I micheg nga laniyan’ e piin yad baadag ni “tin ba m’agan’ Got ngay nib mat’aw e nge rin’ e girdi’” nra chuw e ngongol nib kireb nge ngongol nde mat’aw. (Matt. 5:​6, BT nge study note; Luke 18:​7, 8) Dariy reb e am ko girdi’ nrayog ni nge rin’ e re n’ey, ya kemus ni yigoo Gil’ilungun Got ni gathi bang ko re “fayleng” ney e rayog ni nge rin’ e re n’ey.​—Mu beeg e John 18:36.

MU FOLWOK ROK JESUS U NAP’AN NI GA BE GUY BOCH BAN’EN NDE MAT’AW NI BE BUCH

9. Mang e be micheg nga lanin’um ni kemus ni yigoo Gil’ilungun Got e ra chuweg urngin e ngongol nde mat’aw ni yibe rin’?

⁹ Ka boor e ngongol nde mat’aw ni gad ma guy ni ma buch e ngiyal’ ney ko tin ni i guy Jesus ni i buch u nap’an ni immoy u fayleng. Machane Satan nge girdi’ ndawor ra flontgad ni yad bay u tan e gagiyeg rok e yad tapgin e ngongol nde mat’aw ni be buch e ngiyal’ ney ko “tin tomren e rran.” (2 Tim. 3:​1-5, 13; Rev. 12:12) Taareb rogodad ngak Jesus ya gad manang ni kemus ni yigoo Gil’ilungun Got e ra chuweg tapgin e ngongol nde mat’aw. Bochan ni gad ma machibnag murung’agen Gil’ilungun Got, ma aram fan ndarud yu ulunggad ngaud togopuluwgad ko am ara da taga’gad ngorad ni ngar taleged e ngongol nde mat’aw ni yibe rin’. Am lemnag e n’en ni buch rok reb e walag nib pin ni ka nog Stacy ngak.a U m’on ni nge fil e tin riyul’, mab ga’ ni ma un nga yu ulung i girdi’ ni yad be guy rogon ni ngar taleged e ngongol nde mat’aw ni yibe rin’. Machane munmun me tabab ni nge maruwaran’ ko n’en be rin’. I yog ni gaar: “Ra gu be un ko yu ulung i girdi’ nem ko togopuluw, ma ma maruwar u wan’ug ko ba puluw e ba’ ni gub mang ngay fa danga’. Chiney nug be ayuweg Gil’ilungun Got e kug nang nib puluw e ba’ ni gub mang ngay. Gu manang nib fel’ rogon nra ayuweg Jehovah urngin e piin yibe gafgownagrad nga rogon nrayog ni nggu rin’.”​—Ps. 72:​1, 4.

10. Mang fan ndarud guyed rogon ni ngad thilyeged e pi motochiyel ni ke ngongliy e am nge n’en yad be rin’ nrogon nib puluw ko Matthew 5:​43-48? (Kum guy e sasing.)

¹⁰ Boor e girdi’ e ngiyal’ ney e yad ma un nga boch e ulung ni yad ma guy rogon ni ngar thilyeged e n’en be rin’ e am. Machane boor i yad e ri ma damumuw, ma dab kur folgad ko motochiyel mu kur gafgownaged yugu boch e girdi’. Gathi aram e n’en ni fil Jesus ngodad ni ngad rin’ed. (Efe. 4:31) Bay reb e walag ni pumoon ni ka nog Jeffrey ngak ni yog ni gaar: “Gu manang nnap’an nra muulung e girdi’ nga taabang ni ngar togopuluwgad ko am, ma ba papey nrayog ni ngar damumuwgad mar tababgad i kirebnag e chugum, ma yad be iring boch ban’en, mu kur gafgownaged yad.” Machane i fil Jesus ngodad ni ngaud t’ufeged gubin e girdi’ ni kub muun ngay e piin nde m’agan’rad ko n’en gad be rin’ ara yad be gafgownagdad. (Mu beeg e Matthew 5:​43-48.) Gadad e piin Kristiano e gad ma athamgil u rogon nrayog rodad ni ngad siyeged boch ban’en nde puluw ko kanawo’ ni dag Jesus ni ngad folwokgad riy.

11. Mang fan ni bay yu ngiyal’ nrayog ni nge mo’maw’ ngodad ni ngad folwokgad rok Jesus?

¹¹ Yugu aram rogon ni gad manang ni kemus ni yigoo Gil’ilungun Got e ra chuweg urngin e ngongol nde mat’aw ni yibe rin’, machane ka rayog nib mo’maw’ ngodad ni ngad folwokgad rok Jesus u nap’an ni yibe rin’ boch ban’en nde mat’aw ngodad. Am lemnag e n’en ni buch rok Janiya ni un gafgownag ni bochan e ba thil ramaen dow. I yog ni gaar: “Rug damumuw. Ki kireban’ug ma gu baadag ni nggu sulweg taban e ngongol nde mat’aw ni yibe rin’ ngog. Kug lemnag ni nggu un nga reb e ulung ni yad be togopuluw ko piin yad ma laniyan’ ko girdi’ nib thil ramaen dowrad. Gu lemnag ni faan gu ra rin’ e re n’ey, ma aram rogon nrayog ni nggu thilyeg boch ban’en.” Machane munmun me nang nib t’uf ni nge thilyeg rogon e lem ni be tay. I yog ni gaar: “Gu be pag yugu boch e girdi’ ni ngar gagiyegnaged rogon e lem nug be tay, mar k’aringed gag ni nge pagan’ug ko girdi’ ko bin nge pagan’ug ngak Jehovah. Ere gu dugliy ni nggu chuw ko re ulung nem, ma dab kug un nga ban’en ni yad be rin’.” Yugu aram rogon ni gad ma damumuw u nap’an ni yibe rin’ boch ban’en nde mat’aw ngodad ara gad be guy e girdi’ ni yibe gafgownagrad, ma thingar da gagiyegnaged e damumuw rodad ma gubin ngiyal’ ndab da uned ko ngongol ni yibe rin’ u roy u fayleng.​—John 15:19.

12. Mang fan nib fel’ ni ngad fal’eged i mel’eg e pi n’en gad ma beeg, ara pi n’en gad ma yaliy, ara pi n’en gad ma motoyil ngay?

¹² Mang e rayog ni nge ayuwegdad ni ngad gagiyegnaged rogon e damumuw ni gad ma tay ni bochan e pi n’en nde mat’aw ni be buch? Boor e walag ni kar guyed nib fel’ ni ngar fal’eged i mel’eg e pi n’en yad ma beeg, nge pi n’en yad ma motoyil ngay, nge pi n’en yad ma yaliy. Bay boch ban’en ni yima weliy murung’agen ko Internet u reb e kanawo’ ni nge gin e girdi’ ngay mu kun gathibthibnag e n’en be rin’ e am. Ba ga’ ni ma weliy girdien e news boch ban’en ni ke buch u reb e kanawo’ ni nge m’ug riy ni yad be fol ngak be’ ara reb e ulung. Mus ni faanra ba riyul’ e pi n’em ni ka nog, ma faan gad ra ulul i beeg murung’agen e n’en ke buch ma dabiyog ni ngad pithiged e pi magawon nem. Faanra yugu da pared ni gad be motoyil ara gad be beeg murung’agen e pi n’ey, ma rayog ni nge kankanan’dad ara mulan’dad. (Prov. 24:10) Ma bin th’abi gel e kireb riy e rayog ni nge dabki m’on Gil’ilungun Got u wan’dad ni kemus e n’en nrayog ni nge taleg urngin e ngongol nde mat’aw ni be buch.

13. Faanra ud beeged e Bible ni gubin e rran, ma uw rogon nra ayuwegdad ni nge puluw rogon ni ngaud lemnaged e ngongol nde mat’aw ni be buch?

¹³ Faanra ud beeged e Bible ni gubin e rran ma gad be fal’eg i lemnag, ma rayog ni nge ayuwegdad ni ngad athamgilgad u fithik’ e ngongol nde mat’aw ni gad be guy ni be buch. Bay reb e walag nib pin ni ka nog Alia ngak nri magawon laniyan’ ni bochan e gafgow ni i guy ni yibe tay ko girdi’ u lan e binaw rok. I damumuw ni bochan e danir gechignag e piin yad be rin’ e pi ngongol nem. I yog ni gaar: “Ba t’uf ni nggu fitheg ni nge lungug, ‘Ba mich u wan’ug ni Jehovah e ir e ra pithig e pi magawon ney, fa?’ Aram e ngiyal’ nug beeg fapi thin ni bay ko Job 34:​22-29. I puguran e pi thin nem ngog ndariy be’ nrayog ni nge mith rok Jehovah. Kemus ni yigoo ir e manang rogon ni nge pufthinnag e girdi’, ma rayog ni nge pithig urngin e magawon ni be mada’nag e girdi’.” Machane mang e rayog ni ngad rin’ed e chiney u nap’an ni ka gad be sonnag Gil’ilungun Got ni nge pithig urngin e magawon ni gad be mada’nag?

N’EN NRAYOG NI NGAD RIN’ED E CHINEY

14. Mang reb e ban’en nrayog ni ngad rin’ed e chiney? (Kolose 3:​10, 11)

¹⁴ Sana dabiyog ni ngad taleged e girdi’ ndab kur rin’ed boch ban’en nde mat’aw, machane rayog ni ngad gagiyegnaged e ngongol rodad. Kad filed faram nrogon ni ngad folwokgad rok Jesus e aram e ngaud daged e t’ufeg. T’ufeg e rayog ni nge k’aringdad ni ngad ted fan e girdi’ ni kub muun ngay e piin yad be rin’ boch ban’en nde mat’aw. (Matt. 7:12; Rom. 12:17) Ma felfelan’ Jehovah u nap’an ni gad ra dag e sumunguy ko girdi’ mu kud rin’ed e ngongol nib mat’aw ngorad.​—Mu beeg e Kolose 3:​10, 11.

15. Faanra ud weliyed e tin riyul’ ni bay u Bible ko girdi’, ma uw rogon nra ayuwegrad?

¹⁵ Bin th’abi fel’ e kanawo’ nrayog ni ngad athamgilgad u fithik’ e ngongol nde mat’aw e aram e ngad weliyed e tin riyul’ u Bible ko girdi’. Mang fan ni gad be yog e re n’ey? Ya nap’an nra fil e girdi’ murung’agen Jehovah mar adaged ni ngar rin’ed e tin nib m’agan’ ngay, ma aram e rayog ni ngar thilyeged e ngongol rorad mar filed rogon ni ngar daged e sumunguy nge t’ufeg. (Isa. 11:​6, 7, 9) U m’on ni nge nang be’ nib pumoon ni ka nog Jemal ngak e tin riyul’, me un nga reb e ulung ni yad be guy rogon ni ngar thilyeged e n’en be rin’ e am ko nam rorad ni bochan e be lemnag nib kireb e binem e am. I yog ni gaar: “Dabiyog ni ngam towasariy e girdi’ ni ngar thilyeged e ngongol rorad. Dariy be’ ni towasariyeg ni nggu thilyeg e ngongol rog, machane tin riyul’ u Bible nug be fil e ir e be thilyeg e ngongol rog.” N’en ni fil Jemal e ir e k’aring ni nge tal ko cham ni be un ngay. Ra yoor e piin nra paged e tin riyul’ u Bible ni nge thilyegrad, ma aram e ra lich e piin yad be un ko ngongol nde mat’aw ni yibe rin’.

16. Mang fan ni ga baadag ni ngam weliy ko girdi’ e n’en nra rin’ Gil’ilungun Got?

¹⁶ Gad baadag ni ngad weliyed ko girdi’ ni kemus ni yigoo Gil’ilungun Got e ra chuweg e ngongol nde mat’aw ni be buch ni bod e n’en ni i rin’ Jesus. Re n’ey e rayog ni nge pi’ e athamgil nga laniyan’ e piin yibe gafgownagrad. (Jer. 29:11) Stacy ni faan kan weliy murung’agen e yog ni gaar: “Tin riyul’ ni kug fil e aram e n’en ke ayuwegeg ni nggu athamgil u fithik’ e ngongol nde mat’aw ni kug guy ni yibe rin’ ko girdi’ nge tin be buch rog. Ma fanay Jehovah e thin nu Bible ni nge fal’eg lanin’dad.” Ba t’uf ni ngam fal’eg rogom u m’on riy ya nge yag nim weliy ko girdi’ e n’en be yog e Bible u murung’agen rogon nra chuw e ngongol nde mat’aw ni be buch. Faan ga ra guy rogon ni ngari tamilang u wan’um e n’en be yog e Bible u murung’agen e gafgow ni gad be tay, ma aram e rayog ni ngari mich e pi n’ey u wan’um. Faan ga ra rin’ e re n’ey, ma aram e rayog ni ngam weliy ko girdi’ u skul ara tabon e maruwel rom fan ni gad be gafgow nge rogon nra chuweg Jehovah e gafgow ni gad be tay.b

17. Uw rogon ni be ayuwegdad Jehovah ni ngad athamgilgad u fithik’ e pi n’en nde mat’aw ni gad be guy ni be buch e ngiyal’ ney?

¹⁷ Gad manang ni n’umngin nap’an ni ka be “gagiyegnag” Satan e re fayleng ney, maku ra i buch boch ban’en nde mat’aw rodad. Machane nap’an ni gad be sonnag e ngiyal’ ni ngan ‘luf pa’’ ko gagiyeg ni be tay, maku yira ayuwegdad ma ka bay e athap rodad. (John 12:31) Gathi kemus ni be tamilangnag Jehovah u lan e Bible fan ni ke yoor e ngongol nde mat’aw ni be buch, ya ku be tamilangnag rogon laniyan’ ko gafgow ni gad be tay ni bochan e pi n’ey. (Ps. 34:​17-19) Ke fanay Jehovah Fak ni nge fil ngodad e n’en ngad rin’ed ko ngongol nde mat’aw ni gad be guy ni be buch nge rogon nra chuweg Gil’ilungun e pi n’ey boch nga m’on. (2 Pet. 3:13) Ere manga yugu da ululgad i machibnag fare thin nib fel’ ni murung’agen e re Am nem u fithik’ e pasig, ma gad athapeg e ngiyal’ nra sug e re fayleng ney ko tin ni “mmat’aw ma ba yal’uw.”​—Isa. 9:7.