Orí 21

Àwọn Ìyọnu Tó Wá Sórí Àwọn Oníṣọ́ọ̀ṣì Látọ̀dọ̀ Jèhófà

Ìran 5—Ìṣípayá 8:1–9:21

Ohun tó dá lé: Fífun mẹ́fà nínú àwọn kàkàkí méje náà

Ìgbà tó nímùúṣẹ: Látìgbà tí Jèhófà ti gbé Kristi Jésù gorí ìtẹ́ lọ́dún 1914 títí dìgbà ìpọ́njú ńlá

1. Kí ló ṣẹlẹ̀ nígbà tí Ọ̀dọ́ Àgùntàn ṣí èdìdì keje?

ÀWỌN áńgẹ́lì ti dá “ẹ̀fúùfù mẹ́rin” náà dúró títí tí a ó fi fi èdìdì di ọ̀kẹ́ méje ó lé ẹgbàajì [144,000] àwọn ọmọ Ísírẹ́lì Ọlọ́run tí a ó sì fún ogunlọ́gọ̀ ńlá náà láǹfààní láti là á já. (Ìṣípayá 7:1-4, 9) Ṣùgbọ́n, kí ìjì ẹlẹ́fùúùfù líle yẹn tó rọ́ lu ayé, a gbọ́dọ̀ kéde àwọn ìdájọ́ Jèhófà tó ń bọ̀ lórí ayé Sátánì pẹ̀lú! Bí Ọ̀dọ́ Àgùntàn náà ṣe ń ṣí èdìdì keje tó kẹ́yìn, Jòhánù ti ní láti máa fi gbogbo ọkàn bá ohun tó ń ṣẹlẹ̀ bọ̀ kó lè rí ohun tí a ó fi hàn kedere. Ẹ wo ohun tó lóhun rí wàyí: “Nígbà tí ó [ìyẹn Ọ̀dọ́ Àgùntàn náà] sì ṣí èdìdì keje, kẹ́kẹ́ pa ní ọ̀run fún nǹkan bí ààbọ̀ wákàtí. Mo sì rí àwọn áńgẹ́lì méje tí wọ́n dúró níwájú Ọlọ́run, a sì fún wọn ní kàkàkí méje.”—Ìṣípayá 8:1, 2.

Àkókò Àdúrà Àtọkànwá

2. Kí ló ṣẹlẹ̀ nígbà tí kẹ́kẹ́ pa fún ààbọ̀ wákàtí ìṣàpẹẹrẹ ní ọ̀run?

² Àkókò pàtàkì làkókò tí kẹ́kẹ́ pa yìí o! Ààbọ̀ wákàtí lè ti gùn jù nígbà tó o bá ń dúró pé kí ohun kan ṣẹlẹ̀. Kódà, Jòhánù ò tiẹ̀ gbúròó orin ìyìn tí wọ́n ń kọ lọ́run mọ́ báyìí. (Ìṣípayá 4:8) Kí ló fà á? Jòhánù rí ohun tó fà á nínú ìran: “Áńgẹ́lì mìíràn sì dé, ó sì dúró nídìí pẹpẹ, ó ní ajere tùràrí oníwúrà lọ́wọ́; a sì fún un ní ìwọ̀n tùràrí púpọ̀ gan-an láti sun ún pẹ̀lú àdúrà gbogbo ẹni mímọ́ lórí pẹpẹ wúrà tí ó wà níwájú ìtẹ́ náà. Èéfín tùràrí náà sì gòkè láti ọwọ́ áńgẹ́lì náà pẹ̀lú àdúrà àwọn ẹni mímọ́ síwájú Ọlọ́run.”—Ìṣípayá 8:3, 4.

3. (a) Kí ni tùràrí tí wọ́n ń sun rán wa létí rẹ̀? (b) Kí nìdí tí kẹ́kẹ́ fi pa fún ààbọ̀ wákàtí lọ́run?

³ Èyí á rán wa létí pé nínú ètò ìjọsìn àwọn Júù, ojoojúmọ́ ni wọ́n máa ń sun tùràrí nínú àgọ́ ìjọsìn, wọ́n sì ń ṣe bẹ́ẹ̀ nínú tẹ́ńpìlì Jerúsálẹ́mù tí wọ́n kọ́ lọ́pọ̀ ọdún lẹ́yìn náà. (Ẹ́kísódù 30:1-8) Lákòókò tí wọ́n bá ń sun tùràrí báyìí, àwọn ọmọ Ísírẹ́lì tí kì í ṣe àlùfáà máa dúró lẹ́yìn òde ibi mímọ́, wọ́n á máa gbàdúrà. Ó dájú pé àdúrà ìdákẹ́jẹ́ẹ́ látinú ọkàn wọn ni wọ́n ń gbà, ẹni tí èéfín tùràrí náà ń gòkè tọ̀ lọ ni wọ́n sì ń gbàdúrà sí. (Lúùkù 1:10) Jòhánù wá rí ohun tó jọ bẹ́ẹ̀ báyìí, tó ń ṣẹlẹ̀ lọ́run. Tùràrí áńgẹ́lì náà ní í ṣe pẹ̀lú “àdúrà àwọn ẹni mímọ́.” Kódà, nínú ìran kan tó ṣáájú èyí, a rí i pé tùràrí náà dúró fún irú àwọn àdúrà bẹ́ẹ̀. (Ìṣípayá 5:8; Sáàmù 141:1, 2) Tó bá rí bẹ́ẹ̀, a wá rí i kedere pé kẹ́kẹ́ tó pa ní ọ̀run yẹn pa láti jẹ́ kí wọ́n máa gbọ́ àdúrà àwọn ẹni mímọ́ orí ilẹ̀ ayé.

4, 5. Àwọn ìṣẹ̀lẹ̀ wo tá a rí nínú ìtàn ló jẹ́ ká lè mọ àkókò tó bá àkókò tí kẹ́kẹ́ pa fún ààbọ̀ wákàtí ìṣàpẹẹrẹ mu?

⁴ Ǹjẹ́ a lè mọ ìgbà tí èyí ṣẹlẹ̀? A kúkú lè mọ̀ ọ́n tá a bá yẹ àwọn ọ̀rọ̀ tó wà ní àyíká ọ̀rọ̀ náà wò, tá a wá fi wé àwọn ìṣẹ̀lẹ̀ tí ìtàn fi hàn pé ó wáyé lápá ìbẹ̀rẹ̀ ọjọ́ Olúwa. (Ìṣípayá 1:10) Àwọn ìṣẹ̀lẹ̀ tó ṣẹlẹ̀ lórí ilẹ̀ ayé láàárín ọdún 1918 sí ọdún 1919, bá ìran tí Ìṣípayá 8:1-4 ṣàpèjúwe mu rẹ́gí. Láti ogójì [40] ọdún ṣáájú 1914 làwọn Akẹ́kọ̀ọ́ Bíbélì, gẹ́gẹ́ bí wọ́n ṣe ń pe àwọn Ẹlẹ́rìí Jèhófà nígbà yẹn, ti ń kéde láìṣojo pé àwọn àkókò Kèfèrí yóò dópin lọdún yẹn. Àwọn àjálù tó wáyé lọ́dún 1914 fi hàn pé òótọ́ ni wọ́n sọ. (Lúùkù 21:24, Bibeli Mimọ; Mátíù 24:3, 7, 8) Ṣùgbọ́n ọ̀pọ̀lọpọ̀ nínú wọn tún gbà gbọ́ pé ọdún 1914 ni a óò mú wọn kúrò lórí ilẹ̀ ayé yìí lọ síbi ogún wọn lọ́run. Ìyẹn ò ṣẹlẹ̀. Kàkà bẹ́ẹ̀, nígbà Ogun Àgbáyé Kìíní, wọ́n fara da àkókò inúnibíni tó gbóná girigiri. Ní October 31, ọdún 1916, ààrẹ àkọ́kọ́ ti Watch Tower Society, Charles T. Russell, kú. Lẹ́yìn náà, ní July 4, ọdún 1918, wọ́n kó ààrẹ tuntun tó tẹ̀ lé e, Joseph F. Rutherford, àtàwọn aṣojú Society méje mìíràn lọ sí ọgbà ẹ̀wọ̀n tó wà nílùú Atlanta, ní ìpínlẹ̀ Georgia, lórílẹ̀-èdè Amẹ́ríkà lẹ́yìn tí wọ́n dá wọn lẹ́jọ́ tí ò tọ́ sí wọn pé kí wọ́n lọ fi ẹ̀wọ̀n ọlọ́dún gbọọrọ jura.

⁵ Jẹbẹtẹ gbọ́mọ lé àwọn Kristẹni olóòótọ́ ẹgbẹ́ Jòhánù lọ́wọ́. Kí wá ni Ọlọ́run fẹ́ kí wọ́n ṣe lẹ́yìn ìyẹn o? Ìgbà wo la máa gbà wọ́n sókè ọ̀run? Àpilẹ̀kọ kan tí àkòrí rẹ̀ jẹ́ “Ìkórè Dópin—Kí Ni Yóò Tẹ̀ Lé E?” jáde nínú Ilé Ìṣọ́ (Gẹ̀ẹ́sì) ìtẹ̀jáde May 1, 1919. Ó fi hàn pé àwọn nǹkan ò dá wọn lójú ó sì rọ àwọn olóòótọ́ láti máa fara dà á nìṣó, ó wá fi kún un pé: “A gbà nísinsìnyí pé tòótọ́ ni pé ìkórè ẹgbẹ́ ìjọba náà jẹ́ ìṣẹ̀lẹ̀ kan tá a ti ṣe láṣeparí àti pé gbogbo àwọn ẹni bẹ́ẹ̀ ni a ti fi èdìdì dì lọ́nà tó tọ́ àti pé ilẹ̀kùn ni a ti tì.” Ní àkókò ìṣòro yìí, àwọn àdúrà àtọkànwá táwọn ẹgbẹ́ Jòhánù ń gbà ń gòkè lọ, bí ẹni pé èéfín tùràrí tó pọ̀ púpọ̀ ló ń gbé e. Ọlọ́run sì ń gbọ́ àdúrà wọn!

Fífi Iná Sọ̀kò sí Ilẹ̀ Ayé

6. Kí ló ṣẹlẹ̀ lẹ́yìn kẹ́kẹ́ tó pa lọ́run, ìdáhùn kí lèyí sì jẹ́?

⁶ Jòhánù sọ fún wa pé: “Ṣùgbọ́n lẹ́sẹ̀kẹsẹ̀ áńgẹ́lì náà mú ajere tùràrí náà, ó sì fi díẹ̀ nínú iná pẹpẹ kún inú rẹ̀, ó sì fi í sọ̀kò sí ilẹ̀ ayé. Ààrá àti ohùn àti mànàmáná àti ìsẹ̀lẹ̀ sì sẹ̀.” (Ìṣípayá 8:5) Lẹ́yìn tí kẹ́kẹ́ ti pa, àwọn nǹkan àràmàǹdà bẹ̀rẹ̀ sí í ṣẹlẹ̀ lójijì! Ó hàn gbangba pé ìdáhùn àdúrà àwọn ẹni mímọ́ nìyẹn, torí pé iná tí áńgẹ́lì náà mú látorí pẹpẹ tùràrí ló fà á. Nígbà náà lọ́hùn-ún lọ́dún 1513 ṣááju Sànmánì Kristẹni, lórí Òkè Ńlá Sínáì, ààrá pẹ̀lú mànàmáná, ariwo tó pọ̀, iná, àti ìmìtìtì òkè ńlá náà jẹ́ àmì pé Jèhófà ti yí àfiyèsí rẹ̀ sáwọn èèyàn rẹ̀. (Ẹ́kísódù 19:16-20) Irú àwọn ìran bẹ́ẹ̀, èyí tí Jòhánù ròyìn ẹ̀ yìí, fi hàn pé Jèhófà ti yí àfiyèsí rẹ̀ sọ́dọ̀ àwọn ìránṣẹ́ rẹ̀ lórí ilẹ̀ ayé. Ṣùgbọ́n àmì ni àwọn ohun tí Jòhánù rí. (Ìṣípayá 1:1) Nítorí náà báwo la ṣe lè lóye àwọn nǹkan tí iná, ààrá, ohùn, mànàmáná, àti ìsẹ̀lẹ̀ túmọ̀ sí lónìí?

7. (a) Iná ìṣàpẹẹrẹ wo ni Jésù dá lórí ilẹ̀ ayé lákòókò iṣẹ́ òjíṣẹ́ rẹ̀? (b) Báwo làwọn Kristẹni arákùnrin Jésù ṣe mú kí iná kan ràn níbi tí ìsìn àwọn oníṣọ́ọ̀ṣì ti gbilẹ̀?

⁷ Lákòókò kan, Jésù sọ fáwọn ọmọ ẹ̀yìn rẹ̀ pé: “Èmi wá láti dá iná kan sórí ilẹ̀ ayé.” (Lúùkù 12:49) Lóòótọ́ sì ni, ó dá iná kan. Nípasẹ̀ ìwàásù tí Jésù fi ìtara ṣe, ó sọ Ìjọba Ọlọ́run di ọ̀rọ̀ tó ṣe pàtàkì jù lọ táwọn Júù ní láti gbé yẹ̀ wò, èyí sì tanná ran àríyànjiyàn gbígbóná jákèjádò orílẹ̀-èdè yẹn. (Mátíù 4:17, 25; 10:5-7, 17, 18) Lọ́dún 1919 àwọn Kristẹni arákùnrin Jésù lórí ilẹ̀ ayé, ìyẹn agbo kékeré tàwọn ẹni àmì òróró tí wọ́n ti la àwọn ọjọ́ aládàn-án-wò Ogun Àgbáyé Kìíní já, dá irú iná tó jọ ìyẹn náà níbi tí ìsìn àwọn oníṣọ́ọ̀ṣì ti gbilẹ̀. Lóṣù September ọdún yẹn, ó hàn gbangba pé ẹ̀mí Jèhófà ń ṣiṣẹ́, báwọn Ẹlẹ́rìí rẹ̀ adúróṣinṣin ṣe pé jọ láti itòsí àti ọ̀nà jíjìn, sí Cedar Point, Ohio, lórílẹ̀-èdè Amẹ́ríkà. Joseph F. Rutherford, tí wọ́n ṣẹ̀ṣẹ̀ tú sílẹ̀ lẹ́wọ̀n, tí wọn ò sì ní í pẹ́ sọ pé kò jẹ̀bi àwọn ẹ̀sùn tí wọ́n fi kàn án, fi àìṣojo bá àwọn tó pé jọ náà sọ̀rọ̀ pé: “Gẹ́gẹ́ bí àmì ìgbọràn sí àṣẹ Ọ̀gá wa, tá a sì tún mọ àǹfààní tá a ní àti iṣẹ́ wa, pé a ní láti túdìí àṣírí àwọn ohun tó ti ń kó àwọn èèyàn ṣìnà tipẹ́tipẹ́, iṣẹ́ wa ni láti kéde ìjọba Mèsáyà ológo tó ń bọ̀ wá, bẹ́ẹ̀ ẹnu iṣẹ́ náà la ṣì wà.” Ọ̀ràn pàtàkì tó wà nílẹ̀ nìyẹn, ìyẹn Ìjọba Ọlọ́run!

8, 9. (a) Báwo ni J. F. Rutherford ṣe ṣàlàyé báwọn èèyàn Ọlọ́run ṣe ń ṣe àti ìfẹ́ ọkàn wọn ní gbogbo ọdún tí ìṣòro fi dojú kọ wọ́n? (b) Báwo ló ṣe jẹ́ pé a ju iná sí ilẹ̀ ayé? (d) Báwo ni ààrá, ohùn, mànàmáná, àti ìsẹ̀lẹ̀ ṣe wáyé?

⁸ Nígbà tí olùbánisọ̀rọ̀ yìí bá ọ̀rọ̀ rẹ̀ débi àwọn ìnira tó ń kojú èèyàn Ọlọ́run lákòókò yẹn, ó wí pé: “Àwọn ọ̀tá yìí fojú agbo tó jẹ́ ààyò Olúwa rí màbo, débi tó fi ya àwọn tó wà nínú agbo náà lẹ́nu. Wọn ò lè ṣe nǹkan kan, ṣe ló ń ṣe wọ́n ní kàyéfì bí wọ́n ṣe ń gbàdúrà tí wọ́n sì ń fojú sọ́nà sí mímọ ìfẹ́ Olúwa. . . . Àmọ́, láìka ìrẹ̀wẹ̀sì tó bá wọn fúngbà díẹ̀ sí, bí iná ni ìfẹ́ láti wàásù ọ̀rọ̀ Ìjọba náà ṣe ń jó lọ́kàn wọn.”—Wo ìtẹ̀jáde Ilé Ìṣọ́ (Gẹ̀ẹ́sì) ti September 15, 1919, ojú ìwé 280.

⁹ Lọ́dún 1919, ó ṣeé ṣe fún wọn láti ṣe ìfẹ́ ọkàn wọn. Iná tẹ̀mí ran agbo àwọn Kristẹni tí wọ́n kéré ṣùgbọ́n tí wọ́n jẹ́ akíkanjú yìí, èyí sì mú kí wọ́n máa fi ìtara wàásù káàkiri ayé. (Fi wé 1 Tẹsalóníkà 5:19.) A fi iná sọ̀kò sí ilẹ̀ ayé ní ti pé Ìjọba Ọlọ́run di ọ̀rọ̀ tó ń ràn bí iná, bó sì ṣe ń bá a lọ nìyẹn! Dípò kẹ́kẹ́ tó pa, ohùn alágbára ń dún, ó sì ń gbé ọ̀rọ̀ Ìjọba náà jáde ketekete. Àwọn ọ̀rọ̀ ìkìlọ̀ ń dún gbọnmọgbọnmọ bí ààrá látinú Bíbélì bẹ́ẹ̀ ló ń rọ́ yìì bí ìjì. Àfi bíi mànàmáná tó ń kọ mọ̀nà, Ọ̀rọ̀ alásọtẹ́lẹ̀ Jèhófà ń mú kí òtítọ́ tàn yanran, ṣe làwọn ìsìn lápapọ̀ mì jìgìjìgì dórí ìpìlẹ̀ wọn bíi pé ìsẹ̀lẹ̀ alágbára ńlá ló dé. Ẹgbẹ́ Jòhánù rí i pé iṣẹ́ wà láti ṣe. Títí dòní olónìí, iṣẹ́ náà ń bá a lọ láti gbilẹ̀ tògotògo jákèjádò ilẹ̀ ayé tí a ń gbé!—Róòmù 10:18.

Mímúrasílẹ̀ Láti Fun Kàkàkí

10. Kí làwọn áńgẹ́lì méje náà ṣe tán láti ṣe nísinsìnyí, kí ló sì fà á?

¹⁰ Jòhánù tẹ̀ síwájú pé: “Àwọn áńgẹ́lì méje tí wọ́n ní kàkàkí méje lọ́wọ́ sì múra sílẹ̀ láti fun wọ́n.” (Ìṣípayá 8:6) Kí ni fífun àwọn kàkàkí yẹn túmọ̀ sí? Nígbà ayé àwọn ọmọ Ísírẹ́lì, ìró kàkàkí ni wọ́n fi ń sàmì sáwọn ọjọ́ pàtàkì tàbí àwọn ìṣẹ̀lẹ̀ pàtàkì. (Léfítíkù 23:24; 2 Àwọn Ọba 11:14) Bákan náà, àwọn ìró kàkàkí tí Jòhánù máa tó gbọ́ yóò mú káwọn èèyàn kíyè sí àwọn ọ̀ràn pàtàkì tó lè mú ẹ̀mí lọ́wọ́.

11. Láàárín ọdún 1919 sí 1922 iṣẹ́ ìmúrasílẹ̀ wo ni ẹgbẹ́ Jòhánù dáwọ́ lé lórí ilẹ̀ ayé?

¹¹ Báwọn áńgẹ́lì náà ti ṣe tán láti fun àwọn kàkàkí yẹn, kò sí iyè méjì pé wọ́n tún darí iṣẹ́ ìmúrasílẹ̀ kan lórí ilẹ̀ ayé. Láti ọdún 1919 sí ọdún 1922, ẹgbẹ́ Jòhánù tí wọ́n ti gba agbára kún agbára dáwọ́ lé ṣíṣe àtúntò iṣẹ́ ìwàásù ìta gbangba, bẹ́ẹ̀ ni wọ́n sì bẹ̀rẹ̀ sí í kọ́ àwọn ilé tí wọ́n á ti máa tẹ ìwé jáde. Lọ́dún 1919, wọ́n bẹ̀rẹ̀ sí í tẹ ìwé ìròyìn náà, The Golden Age, tá a mọ̀ sí Ji! báyìí gẹ́gẹ́ bí “Ìwé Ìròyìn Tó Ń Gbé Ìròyìn Òtítọ́, Ìrètí, àti Ìgbàgbọ́ Tó Dáni Lójú Jáde.” Òun ni irin iṣẹ́ kan tó dà bíi kàkàkí tó máa ṣe bẹbẹ nínú títú àṣírí bí ìsìn èké ṣe ń lọ́wọ́ sí ìṣèlú.

12. Kí ni ìró kàkàkí kọ̀ọ̀kan ń polongo, ó sì rán wa létí ìṣẹ̀lẹ̀ wo nígbà ayé Mósè?

¹² Bá a ó ṣe rí i nísinsìnyí, bí ọ̀kọ̀ọ̀kan nínú àwọn ìró kàkàkí náà ṣe ń dún, ṣe ló ń polongo àgbàyanu ìran nípa báwọn ìyọnu bíbanilẹ́rù ṣe ń dé bá apá kan ilẹ̀ ayé. Díẹ̀ lára ìyọnu wọ̀nyí rán wa létí àwọn ìyọnu tí Jèhófà lò láti fìyà jẹ àwọn ará Íjíbítì nígbà ayé Mósè. (Ẹ́kísódù 7:19–12:32) Wọ́n jẹ́ ìdájọ́ Jèhófà lórí orílẹ̀-èdè yẹn, wọ́n sì jẹ́ káwọn èèyàn Ọlọ́run ráàyè bọ́ lóko ẹrú. Ohun tó jọ èyí làwọn ìyọnu tí Jòhánù rí mú kó ṣeé ṣe. Àmọ́, àwọn ìyọnu yẹn kì í ṣe ìyọnu gidi tó ṣẹlẹ̀. Kàkà bẹ́ẹ̀, àmì tó ń ṣàpẹẹrẹ àwọn ìdájọ́ òdodo Jèhófà ni wọ́n.—Ìṣípayá 1:1.

Ohun Tí “Ìdá Mẹ́ta” Náà Jẹ́

13. Kí ló ṣẹlẹ̀ nígbà táwọn áńgẹ́lì náà fun kàkàkí mẹ́rin àkọ́kọ́, ìbéèrè wo ló sì jẹ yọ látàrí èyí?

¹³ Gẹ́gẹ́ bá a ṣe máa rí i, nígbà táwọn áńgẹ́lì náà bá fun kàkàkí mẹ́rin àkọ́kọ́, wọ́n á mú ìyọnu wá sórí “ìdá mẹ́ta” ilẹ̀ ayé, òkun, àwọn odò àti àwọn ìsun omi, àti àwọn orísun ìmọ́lẹ̀ ilẹ̀ ayé. (Ìṣípayá 8:7-12) Ìdá mẹ́ta nínú nǹkan kan pọ̀, ṣùgbọ́n kì í ṣe gbogbo nǹkan ọ̀hún. (Fi wé Aísáyà 19:24; Ìsíkíẹ́lì 5:2; Sekaráyà 13:8, 9.) “Ìdá mẹ́ta” wo nínú ayé ni ìyọnu yìí tọ́ sí jù lọ? Sátánì àti irú ọmọ rẹ̀ ti fọ́ àwọn tó pọ̀ jù lọ láàárín aráyé lójú ó sì ti sọ wọ́n dìbàjẹ́. (Jẹ́nẹ́sísì 3:15; 2 Kọ́ríńtì 4:4) Ọ̀ràn náà rí bí Dáfídì ti ṣàpèjúwe rẹ̀, pé: “Gbogbo wọn ti yapa, gbogbo wọn pátá jẹ́ ẹni ìbàjẹ́; kò sí ẹni tí ń ṣe rere, kò tilẹ̀ sí ẹyọ kan.” (Sáàmù 14:3) Bẹ́ẹ̀ ni, ewu ìdájọ́ mímúná rọ̀ dẹ̀dẹ̀ sórí gbogbo aráyé. Ṣùgbọ́n apá kan nínú ayé jẹ̀bi ní pàtàkì. Ì bá mà dáa o ká ní apá kan, ìyẹn “ìdá mẹ́ta” náà mọ̀ pé bọ́rọ̀ ṣe máa rí nìyẹn! Kí ni “ìdá mẹ́ta” yẹn?

14. Kí ni ìdá mẹ́ta táwọn ọ̀rọ̀ alágbára, tí ń kó ìyọnu báni látọ̀dọ̀ Jèhófà ń já bọ́ lé lórí dúró fún?

¹⁴ Àwọn oníṣọ́ọ̀ṣì ni! Láàárín ọdún 1920 sí ọdún 1929, nǹkan bí ìdá mẹ́ta aráyé ló wà nínú ìsìn èké. Àwọn apẹ̀yìndà láti inú ìsìn Kristẹni tòótọ́ ló dá a sílẹ̀, Jésù àti àwọn ọmọ ẹ̀yìn rẹ̀ ti sọ àsọtẹ́lẹ̀ ìpẹ̀yìndà ńlá yẹn. (Mátíù 13:24-30; Ìṣe 20:29, 30; 2 Tẹsalóníkà 2:3; 2 Pétérù 2:1-3) Ẹgbẹ́ àlùfáà àwọn oníṣọ́ọ̀ṣì sọ pé àwọn wà nínú tẹ́ńpìlì Ọlọ́run, wọ́n sì ti sọ pé olùkọ́ni ní ẹ̀kọ́ ìsìn Kristẹni làwọn. Ṣùgbọ́n ẹ̀kọ́ wọn jìnnà pátápátá sí òtítọ́ Bíbélì, nígbà gbogbo ni wọ́n sì ń tàbùkù sí orúkọ Ọlọ́run. Àwọn ọ̀rọ̀ alágbára, tí ń kó ìyọnu báni á máa ti ọ̀dọ̀ Jèhófà bọ́ sórí àwọn oníṣọ́ọ̀ṣì tó dúró fún ìdá mẹ́ta náà. Ìdá mẹ́ta yẹn láàárín aráyé kò yẹ fún ojú rere Ọlọ́run páàpáà!

15. (a) Ǹjẹ́ fífun ọ̀kọ̀ọ̀kan àwọn kàkàkí náà mọ sí àárín ọdún kan pàtó? Ṣàlàyé. (b) Ohùn àwọn wo ló ti dà pọ̀ mọ́ ti ẹgbẹ́ Jòhánù ní pípòkìkí àwọn ìdájọ́ Jèhófà?

¹⁵ Báwọn ìró kàkàkí yìí ṣe ń dún tẹ̀ léra, àwọn ìpinnu pàtàkì pàtàkì làwọn ìránṣẹ́ Jèhófà ń gbé jáde láwọn àpéjọ àgbègbè tó wáyé láàárín ọdún 1922 sí ọdún 1928. Ṣùgbọ́n fífun àwọn kàkàkí náà ò mọ sórí àwọn ọdún yẹn. Wọ́n ṣì ń bá a lọ láìsọsẹ̀ láti máa túdìí àṣírí iṣẹ́ láabi àwọn oníṣọ́ọ̀ṣì, kódà wọ́n ṣì wà lẹ́nu títú àṣírí ọ̀hún bí ọjọ́ Olúwa ti ń tẹ̀ síwájú. A gbọ́dọ̀ kéde ìdájọ́ Jèhófà káàkiri ayé, fún gbogbo orílẹ̀-èdè, láìka ìkórìíra àti inúnibíni tó wà jákèjádò ayé sí. Ó dìgbà tá a bá tó ṣèyẹn kí òpin ètò Sátánì tó dé. (Máàkù 13:10, 13) Inú wa ń dùn pé ogunlọ́gọ̀ ńlá náà nísinsìnyí ti fi ohùn tiwọn kún ti ẹgbẹ́ Jòhánù láti máa jẹ́ kí ìkéde tó ṣe pàtàkì fún gbogbo àgbáyé náà máa dún bí ààrá.

Ìdá Mẹ́ta Ilẹ̀ Ayé Jóná

16. Kí ló ṣẹlẹ̀ nígbà tí áńgẹ́lì kìíní fun kàkàkí ẹ̀?

¹⁶ Nígbà tí Jòhánù tún dẹ́nu lé ìròyìn nípa àwọn áńgẹ́lì náà, ó kọ̀wé pé: “Èyí èkíní sì fun kàkàkí rẹ̀. Yìnyín àti iná tí ó dà pọ̀ mọ́ ẹ̀jẹ̀ sì ṣẹlẹ̀, a sì fi í sọ̀kò sí ilẹ̀ ayé; ìdá mẹ́ta ilẹ̀ ayé sì jóná, ìdá mẹ́ta àwọn igi sì jóná, gbogbo ewéko tútù sì jóná.” (Ìṣípayá 8:7) Eléyìí jọ ìyọnu keje tó wá sórí Íjíbítì, ṣùgbọ́n kí ló túmọ̀ sí lákòókò tiwa yìí?—Ẹ́kísódù 9:24.

17. (a) Kí ni ọ̀rọ̀ náà “ilẹ̀ ayé” tó wà nínú Ìṣípayá 8:7 dúró fún? (b) Báwo ni ìdá mẹ́ta ilẹ̀ ayé tí ó jẹ́ ti ìsìn àwọn oníṣọ́ọ̀ṣì ṣe jóná?

¹⁷ Lọ́pọ̀ ìgbà nínú Bíbélì, ọ̀rọ̀ náà “ilẹ̀ ayé” máa ń tọ́ka sí aráyé. (Jẹ́nẹ́sísì 11:1; Sáàmù 96:1) Níwọ̀n bí ìyọnu kejì ti wá sórí òkun, tí òkun náà sì ní í ṣe pẹ̀lú aráyé, “ilẹ̀ ayé” ní láti tọ́ka sí àgbájọ àwọn èèyàn tí Sátánì gbé kalẹ̀ tó dà bí èyí tó fẹsẹ̀ múlẹ̀, tó sì yẹ fún ìparun. (2 Pétérù 3:7; Ìṣípayá 21:1) Ìran ìyọnu náà fi hàn pé ìdá mẹ́ta ilẹ̀ ayé tó jẹ́ ti ìsìn àwọn oníṣọ́ọ̀ṣì ni ooru ìbínú Jèhófà tó ń bù yìì jó gbẹ. Àwọn jàǹkàn jàǹkàn tó wà nínú àwọn oníṣọ́ọ̀ṣì, tí wọ́n dúró bí igi láàárín rẹ̀, ni ìpolongo ìdájọ́ mímúná Jèhófà dáná sun. Bí ẹgbàágbèje àwọn ọmọ ṣọ́ọ̀ṣì wọ̀nyí bá ń bá a lọ láti máa dúró sínú àwọn ìsìn wọn, lójú Ọlọ́run, wọ́n ti rọ dà nù bí ewé koríko tí ooru jó gbẹ.—Fi wé Sáàmù 37:1, 2.a

18. Báwo làwọn ìránṣẹ́ Jèhófà ṣe pòkìkí ìhìn ìdájọ́ Jèhófà ní ìpàdé tó wáyé ní Cedar Point lórílẹ̀-èdè Amẹ́ríkà lọ́dún 1922?

¹⁸ Báwo ni wọ́n ṣe ń kéde ìdájọ́ yìí? Wọn kì í sábàá lo àwọn ilé iṣẹ́ ìròyìn ayé, tí wọ́n jẹ́ apá kan ayé, tí wọ́n sì sábà máa ń kẹ́gàn “ẹrú” Ọlọ́run. (Mátíù 24:45) Wọ́n pòkìkí rẹ̀ lọ́nà tó gba àfiyèsí ní ìpàdé mánigbàgbé ẹlẹ́ẹ̀kejì táwọn èèyàn Ọlọ́run ṣe ní Cedar Point, Ohio, lórílẹ̀-èdè Amẹ́ríkà ní September 10, ọdún 1922. Pẹ̀lú ìfohùnṣọ̀kan àti ìtara, wọ́n tẹ́wọ́ gba ìpinnu kan tí àkòrí rẹ̀ jẹ́: “Ìpèníjà Fáwọn Aṣáájú Ayé.” Láìfọ̀rọ̀ bọpo bọyọ̀, ó fún ilẹ̀ ayé ìṣàpẹẹrẹ ti òde òní ní ìkìlọ̀ àwítẹ́lẹ̀ yìí pé: “Nítorí náà a ké sí àwọn orílẹ̀-èdè tó wà láyé, àwọn alákòóso wọn pẹ̀lú àwọn aṣáájú wọn, a sì ké sí gbogbo ẹgbẹ́ àlùfáà gbogbo àwọn ṣọ́ọ̀ṣì ilẹ̀ ayé ní ẹlẹ́kajẹ̀ka, àwọn ọmọlẹ́yìn wọn àtàwọn alájọṣepọ̀ wọn, tó fi mọ́ àwọn oníṣòwò aládàá ńlá àtàwọn èèkàn nínú òṣèlú, pé kí wọ́n mú ẹ̀rí wá láti sọ ìdí tí wọ́n fi sọ pé àwọn lè mú kí àlàáfíà àti aásìkí rídìí jókòó àti pé àwọn lè mú ayọ̀ wá fáwọn èèyàn; tí wọn ò bá sì lè mú ẹ̀rí wá, a ké sí wọn láti dẹtí wọn sílẹ̀ sí ẹ̀rí tí àwa ń jẹ́ gẹ́gẹ́ bí ẹlẹ́rìí fún Olúwa, kí wọ́n sì wá sọ bóyá ẹ̀rí wa jẹ́ òótọ́ tàbí èké.”

19. Ọ̀rọ̀ ẹ̀rí wo ni àwọn èèyàn Ọlọ́run gbé jáde fáwọn oníṣọ́ọ̀ṣì nípa Ìjọba Ọlọ́run?

¹⁹ Ọ̀rọ̀ ẹ̀rí wo ni àwọn Kristẹni wọ̀nyí gbé jáde? Òun rèé: “Àwa gbà gbọ́ a sì polongo pé ìjọba Mèsáyà ni yóò fòpin sí gbogbo ìpọ́njú ìran èèyàn, tí yóò mú àlàáfíà wá sórí ilẹ̀ ayé tí yóò sì fi inú rere bá àwọn èèyàn lò, ohun tí gbogbo orílẹ̀-èdè ń fẹ́ nìyí; a polongo pé àwọn tí wọ́n jọ̀wọ́ ara wọn tinútinú fún ìjọba òdodo rẹ̀ tó ti bẹ̀rẹ̀ sí í ṣàkóso nísinsìnyí yóò rí àlàáfíà, ìyè, ìtúsílẹ̀ tí yóò wà títí láé àti ayọ̀ aláìlópin gbà gẹ́gẹ́ bí ìbùkún.” Láwọn àkókò ìdíbàjẹ́ wọ̀nyí, nígbà tíjọba táwọn èèyàn gbé kalẹ̀, pàápàá jù lọ àwọn tó wà ní àwọn ibi tí ìsìn àwọn oníṣọ́ọ̀ṣì ti gbilẹ̀, ń kùnà láti yanjú àwọn ìṣòro ayé tí ẹ̀tẹ́ sì ń bá wọn, ṣe ni ìpèníjà náà ń dún bíi kàkàkí, tí ohùn rẹ̀ sì ròkè ju ti ọdún 1922. Ẹ wo bó ti jẹ́ òótọ́ tó pé Ìjọba Ọlọ́run níkàáwọ́ Kristi aṣẹ́gun rẹ̀ ni ìrètí kan ṣoṣo tó wà fún aráyé!

20. (a) Kí làwọn Kristẹni ẹni àmì òróró lò láti mú àwọn ìhìn ìdájọ́ dún jáde bíi kàkàkí lọ́dún 1922 àti lẹ́yìn náà? (b) Kí ló ṣẹlẹ̀ sí ìsìn àwọn oníṣọ́ọ̀ṣì nígbà tí ìró kàkàkí kìíní dún?

²⁰ Nípasẹ̀ àwọn ìpinnu, àwọn àṣàrò kúkúrú, àwọn ìwé pẹlẹbẹ, àwọn ìwé ńlá, àwọn ìwé ìròyìn, àtàwọn àwíyé, ìjọ àwọn Kristẹni ẹni àmì òróró gbé ìkéde yìí àtàwọn mìíràn lẹ́yìn náà jáde bíi pé nípasẹ̀ kàkàkí ni. Nígbà tí kàkàkí kìíní dún, ṣe ló dà bíi pé ohun tó jọ yìnyín tí ń ya luni ya lu àwọn oníṣọ́ọ̀ṣì. Àṣírí bí wọ́n ṣe jẹ̀bi ẹ̀jẹ̀ tú borokoto. Nítorí bí wọ́n sì ṣe nípìn-ín nínú àwọn ogun tó jà ní ọ̀rúndún ogún, ó ti wá hàn pé wọ́n yẹ fún ìbínú amú-bí-iná ti Jèhófà. Ẹgbẹ́ Jòhánù, tí ogunlọ́gọ̀ ńlá wá ń ṣètìlẹ́yìn fún lẹ́yìn náà, ti ń bá a lọ láti mú kí ìró kàkàkí kìíní yìí máa dún gbọnmọ gbọnmọ, èyí sì ń jẹ́ ká rí ojú tí Jèhófà fi ń wo ìsìn àwọn oníṣọ́ọ̀ṣì, ó kà á sí ohun tó yẹ fún ìparun.—Ìṣípayá 7:9, 15.

Bí Òkè Ńlá Kan Tí Ń Jó

21. Kí ló ṣẹlẹ̀ nígbà tí áńgẹ́lì kejì fun kàkàkí rẹ̀?

²¹ “Áńgẹ́lì kejì sì fun kàkàkí rẹ̀. Ohun kan bí òkè ńlá títóbi tí iná ń jó ni a sì fi sọ̀kò sínú òkun. Ìdá mẹ́ta òkun sì di ẹ̀jẹ̀; ìdá mẹ́ta àwọn ẹ̀dá tí ń bẹ nínú òkun tí wọ́n ní ọkàn sì kú, ìdá mẹ́ta àwọn ọkọ̀ ojú omi sì fọ́ bàjẹ́.” (Ìṣípayá 8:8, 9) Kí ni ìran ẹlẹ́rùjẹ̀jẹ̀ yìí ṣàpẹẹrẹ?

22, 23. (a) Ìpinnu wo ló dájú pé ó jáde nígbà tí kàkàkí kejì dún? (b) Kí ni “ìdá mẹ́ta òkun” dúró fún?

²² A lè lóye ìṣẹ̀lẹ̀ yìí dáadáa bá a bá fi wé ohun tó wáyé ní àpéjọ àgbègbè àwọn èèyàn Jèhófà tí wọ́n ṣe ní nílùú Los Angeles, ìpínlẹ̀ California, lórílẹ̀-èdè Amẹ́ríkà, ní August 18 sí 26, ọdún 1923. Àkòrí àkànṣe àsọyé ọ̀sán Saturday, látẹnu J. F. Rutherford, ni “Àwọn Àgùntàn àti Ewúrẹ́.” Àsọyé náà fi hàn kedere pé “àwọn àgùntàn” ni àwọn tí wọ́n nífẹ̀ẹ́ òdodo tí wọn yóò jogún ilẹ̀ ayé nínú Ìjọba Ọlọ́run. Lẹ́yìn náà làwọn tó wà ní àpéjọ náà wá tẹ́wọ́ gba ìpinnu kan tó jẹ́ ká rí àgàbàgebè “ẹgbẹ́ àlùfáà apẹ̀yìndà àti ‘mọ́gàjí nínú agbo wọn,’ ìyẹn àwọn ẹni ayé tí wọ́n lówó lọ́wọ́ tí wọ́n sì tún lẹ́nu nínú ọ̀rọ̀ ìṣèlú.” Ó ké sí “ògìdìgbó àwọn èèyàn olùfẹ́ àlàáfíà àti ètò, tí wọ́n wà nínú àwọn ṣọ́ọ̀ṣì ní ẹlẹ́kajẹ̀ka . . . pé kí wọ́n dẹ̀yìn lẹ́yìn àwọn ètò aláìṣòdodo ti ẹgbẹ́ àlùfáà tí Olúwa pè ní ‘Bábílónì’” kí wọ́n sì múra sílẹ̀ “láti gba àwọn ìbùkún ìjọba Ọlọ́run.”

²³ Láìsí àní-àní, kàkàkí kejì tó dún ló mú ìpinnu yìí wá. Àwọn tó máa ṣègbọràn sí ìkéde náà tó bá yá máa ya ara wọn sọ́tọ̀ kúrò láàárín àwọn tí Aísáyà sọ ọ̀rọ̀ wọn báyìí pé: “Ṣùgbọ́n àwọn ẹni burúkú dà bí òkun tí a ń bì síwá bì sẹ́yìn, nígbà tí kò lè rọ̀ wọ̀ọ̀, èyí tí omi rẹ̀ ń sọ èpò òkun àti ẹrẹ̀ sókè.” (Aísáyà 57:20; 17:12, 13) A ti rí i báyìí pé “òkun” ṣàpẹẹrẹ ìran èèyàn oníwọ́nranwọ̀nran, aláraàbalẹ̀, ọlọ̀tẹ̀, tí wọ́n ń rúná sí rògbòdìyàn àti ìyípadà oníjàgídíjàgan. (Fi wé Ìṣípayá 13:1.) Àkókò náà ń bọ̀ tí “òkun” yẹn kì yóò sí mọ́. (Ìṣípayá 21:1) Ṣùgbọ́n ní báyìí ná, Jèhófà fi ìró kàkàkí yẹn kéde ìdájọ́ lòdì sí ìdá mẹ́ta rẹ̀, èyí tí ìsìn àwọn oníṣọ́ọ̀ṣì jẹ́ ara rẹ̀.

24. Kí ni nǹkan ràbàtà bí òkè ńlá tó ń jó tá a fi sọ̀kò sínú òkun ṣàpẹẹrẹ?

²⁴ A ju ohun ràbàtà títóbi bí òkè ńlá kan tí iná ń jó sínú “òkun.” Nínú Bíbélì, àwọn òkè ńlá sábà máa ń ṣàpẹẹrẹ àwọn ìjọba. Bí àpẹẹrẹ, Bíbélì fi Ìjọba Ọlọ́run wé òkè ńlá kan. (Dáníẹ́lì 2:35, 44) Bábílónì apanirun di “òkè ńlá jíjóná ráúráú.” (Jeremáyà 51:25) Ṣùgbọ́n ohun ràbàtà bí òkè ńlá tí Jòhánù rí yìí ṣì ń jó síbẹ̀. Jíjù tí wọ́n jù ú sínú òkun ṣàpẹẹrẹ bí ìṣòro àtiyan irú ìjọba tó tọ́ ṣe di àríyànjiyàn tó ń jà ràn-ìn láàárín aráyé ní ìgbà Ogun Àgbáyé Kìíní àti lẹ́yìn náà, pàápàá jù lọ láwọn ilẹ̀ tí ìsìn àwọn oníṣọ́ọ̀ṣì ti gbilẹ̀. Bí àpẹẹrẹ, lórílẹ̀-èdè Ítálì, Mussolini dá ètò ìjọba Aláṣẹ Oníkùmọ̀ sílẹ̀. Àwọn ará ilẹ̀ Jámánì fọwọ́ sí ètò ìjọba Násì ti Hitler, àwọn orílẹ̀-èdè mìíràn sì ń gbìyànjú oríṣiríṣi ètò ìjọba àjùmọ̀ní. Ìyípadà tegbò-tigaga wáyé lórílẹ̀-èdè Rọ́ṣíà, níbi tí àtúntò táwọn Bolshevik ṣe ti mú kí wọ́n gbé ìjọba Kọ́múníìsì àkọ́kọ́ kalẹ̀, èyí sì wá mú kó di pé agbára bọ́ lọ́wọ́ àwọn aṣáájú ìsìn tí wọn ò sì lẹ́nu mọ́ láwọn ibi tó ti fi ìgbà kan rí jẹ́ ibi odi agbára wọn.

25. Báwo ni àríyànjiyàn lórí irú ètò ìjọba tó tọ́ ṣe ń bá a lọ láti dá wàhálà sílẹ̀ lẹ́yìn Ogun Àgbáyé Kejì?

²⁵ Ogun Àgbáyé Kejì fòpin sí ètò ìjọba Aláṣẹ Oníkùmọ̀ àti ìjọba Násì, síbẹ̀ àwọn èèyàn ṣì ń ba ara wọn jiyàn lórí irú ìjọba tó tọ́. Látàrí èyí, ìdàrúdàpọ̀ ṣì ń bá a lọ láàárín aráyé, ìyẹn sì ń mú kí wọ́n gbé oríṣiríṣi ìjọba tó máa ṣàtúntò tipátipá kalẹ̀. Fún ọ̀pọ̀ ọdún lẹ́yìn ọdún 1945, ọ̀pọ̀ orílẹ̀-èdè ló ti ṣètò ìjọba oníjàgídíjàgan, lára wọn ni Ṣáínà, Vietnam, Cuba, àti Nicaragua. Wọ́n dán ìjọba ológun abàṣẹwàá wò lórílẹ̀-èdè Gíríìsì, ṣùgbọ́n ó kùnà. Nígbà tí wọ́n gbìyànjú irú ètò ìjọba Kọ́múníìsì kan lórílẹ̀-èdè Kampuchea (ìyẹn Cambodia), ó ju ọgọ́rùn-ún ọ̀kẹ́ èèyàn lọ tó kú látàrí wàhálà tó tẹ̀yìn ẹ̀ wá.

26. Báwo ni “òkè ńlá títóbi tí iná ń jó” ṣe ń bá a lọ láti máa mú kí ìgbì ru nínú òkun aráyé?

²⁶ “Òkè ńlá títóbi tí iná ń jó” yẹn ń bá a lọ láti mú kí ìgbì máa rú nínú òkun aráyé. Ìròyìn fi hàn pé rògbòdìyàn wà lórí irú ìjọba tí wọ́n fẹ́ ní ilẹ̀ Áfíríkà, ilẹ̀ Amẹ́ríkà, ilẹ̀ Éṣíà, àti láwọn erékùṣù òkun Pàsífíìkì. Àwọn ilẹ̀ tí ìsìn àwọn oníṣọ́ọ̀ṣì ti gbilẹ̀ tàbí níbi táwọn míṣọ́nárì wọn ti di ajàfẹ́tọ̀ọ́ lọ̀pọ̀ rògbòdìyàn yìí ti ṣẹlẹ̀. Kódà, àwọn àlùfáà Ṣọ́ọ̀ṣì Kátólíìkì dara pọ̀ mọ́ àwọn ẹgbẹ́ ọmọ ogun ajàjàgbara ti Kọ́múníìsì tí wọ́n sì jọ ń ja ìjà ọ̀hún. Lákòókò tá à ń sọ yìí, àwọn ajíhìnrere àwọn ṣọ́ọ̀ṣì tó yàtọ̀ sí Kátólíìkì ti ṣakitiyan ní Amẹ́ríkà Àárín láti kojú àwọn Kọ́múníìsì tí wọ́n “forí ṣe fọrùn ṣe láti wá agbára rí ní gbogbo ọ̀nà.” Ṣùgbọ́n kò sí ọ̀kan nínú àwọn ohun tó ń mi òkun aráyé jìgìjìgì yìí tó tíì mú kí ayé wà lálàáfíà àti àìséwu.—Fi wé Aísáyà 25:10-12; 1 Tẹsalóníkà 5:3.

27. (a) Báwo ni “ìdá mẹ́ta òkun” ṣe dà bí ẹ̀jẹ̀? (b) Báwo ni ‘ìdá mẹ́ta àwọn ẹ̀dá nínú òkun’ ṣe kú, báwo ni ó sì ṣe rí fún “ìdá mẹ́ta àwọn ọkọ̀”?

²⁷ Ìrò kàkàkí kejì tó dún fi hàn pé ẹ̀bi ẹ̀jẹ̀ wà lọ́rùn àwọn ọmọ aráyé, tí wọ́n lọ́wọ́ nínú rògbòdìyàn àti ìdàrúdàpọ̀ torí àtigbé ìjọba tó máa tẹ́ aráyé lọ́rùn kalẹ̀, dípò kí wọ́n juwọ́ sílẹ̀ fún Ìjọba Ọlọ́run. “Ìdá mẹ́ta òkun,” ní pàtàkì jù lọ, àwọn oníṣọ́ọ̀ṣì ti dà bí ẹ̀jẹ̀. Gbogbo àwọn ohun alààyè inú ẹ̀ ti kú lójú Ọlọ́run. Kò sí èyíkéyìí nínú àwọn àjọ tó wà nídìí àwọn àtúntò yẹn, tí wọ́n lé téńté bí ọkọ̀ sójú ìdá mẹ́ta agbami òkun yẹn, tí ò ní rì nígbẹ̀yìngbẹ́yín. Inú wa mà dùn o, pé ọ̀kẹ́ àìmọye àwọn èèyàn ẹni bí àgùntàn ń ṣègbọràn báyìí sí ìkìlọ̀ náà tó ń dún bí ìró kàkàkí. Ìró kàkàkí náà ń rọ̀ wọ́n pé kí wọ́n jáde kúrò láàárín àwọn tí wọ́n ṣì ń ri ara wọn bọ inú ìfẹ́ orílẹ̀-èdè ẹni tí wọ́n sì lẹ́jẹ̀ lọ́rùn nínú òkun yẹn!

Ìràwọ̀ Kan Jábọ́ Láti Ọ̀run

28. Kí ló ṣẹlẹ̀ nígbà tí áńgẹ́lì kẹta fun kàkàkí tirẹ̀?

²⁸ “Áńgẹ́lì kẹta sì fun kàkàkí rẹ̀. Ìràwọ̀ ńlá tí ń jó bí fìtílà sì jábọ́ láti ọ̀run, ó sì jábọ́ sórí ìdá mẹ́ta àwọn odò àti sórí àwọn ìsun omi. A sì ń pe orúkọ ìràwọ̀ náà ní Iwọ. Ìdá mẹ́ta àwọn omi sì di iwọ, ọ̀pọ̀ nínú àwọn ènìyàn sì kú láti ọwọ́ àwọn omi náà, nítorí a ti sọ ìwọ̀nyí di kíkorò.” (Ìṣípayá 8:10, 11) Lẹ́ẹ̀kan sí i, àwọn apá mìíràn nínú Bíbélì ràn wá lọ́wọ́ láti rí bí ẹsẹ Ìwé Mímọ́ yìí ṣe kan ọjọ́ Olúwa.

29. Kí ni àpẹẹrẹ “ìràwọ̀ ńlá tí ń jó bí fìtílà” dúró fún, kí sì nìdí?

²⁹ Ṣáájú, nínú àwọn iṣẹ́ tí Jésù rán sáwọn ìjọ méje, a kà nípa bí ìràwọ̀ ṣe jẹ́ àpẹẹrẹ, a rí i pé àwọn ìràwọ̀ méje náà ṣàpẹẹrẹ àwọn alàgbà nínú àwọn ìjọ.b (Ìṣípayá 1:20) Tá a bá fojú tẹ̀mí wò ó lọ́nà àpẹẹrẹ, “àwọn ìràwọ̀” tí wọ́n jẹ́ ẹni àmì òróró pa pọ̀ pẹ̀lú gbogbo àwọn ẹni àmì òróró yòókù, ti bẹ̀rẹ̀ sí í gbé lọ́run látìgbà tá a ti fi èdìdì dì wọ́n pẹ̀lú ẹ̀mí mímọ́ gẹ́gẹ́ bí àmì ogún wọn tọ̀run. (Éfésù 2:6, 7) Síbẹ̀, àpọ́sítélì Pọ́ọ̀lù kìlọ̀ pé àwọn kan látinú irú àwọn ẹni bí ìràwọ̀ bẹ́ẹ̀ máa di apẹ̀yìndà, olùdá-ìyapa-sílẹ̀, wọn sì máa ṣi agbo lọ́nà. (Ìṣe 20:29, 30) Irú àìṣòtítọ́ bẹ́ẹ̀ yóò yọrí sí ìpẹ̀yìndà ńlá, àwọn alàgbà tí wọ́n ṣubú wọ̀nyẹn á sì wá para pọ̀ di ọkùnrin àìlófin kan tó máa gbé ara rẹ̀ ga débi táá fi sọ ara ẹ̀ di ọlọ́run láàárín aráyé. (2 Tẹsalóníkà 2:3, 4) Àwọn ohun tí Pọ́ọ̀lù kìlọ̀ nípa rẹ̀ yìí ní ìmúṣẹ nígbà táwọn àlùfáà ṣọ́ọ̀ṣì bẹ̀rẹ̀ sí í lọ́wọ́ sọ́ràn aráyé. Àbí ẹ ò rí i pé ó bá a mu gẹ́ẹ́, pé àwọn wọ̀nyí ni àpẹẹrẹ “ìràwọ̀ ńlá tí ń jó bí fìtílà” dúró fún.

30. (a) Nígbà tí Aísáyà sọ pé ọba Bábílónì á ṣubú látọ̀run, kí ló ní lọ́kàn? (b) Kí ni ìṣubú láti ọ̀run lè tọ́ka sí?

³⁰ Ìràwọ̀ yìí gan-an ni Jòhánù rí tó já bọ́ látọ̀run. Lọ́nà wo? Ohun tó ṣẹlẹ̀ sí ọba ìgbà àtijọ́ kan á ràn wá lọ́wọ́ láti lóye rẹ̀. Nígbà tí wòlíì Aísáyà ń bá ọba Bábílónì sọ̀rọ̀, ó wí pé: “Wo bí o ti já bọ́ láti ọ̀run, ìwọ ẹni tí ń tàn, ọmọ ọ̀yẹ̀! Wo bí a ti ké ọ lulẹ̀, ìwọ tí ń sọ àwọn orílẹ̀-èdè di aláìlágbára!” (Aísáyà 14:12) Àsọtẹ́lẹ̀ yìí nímùúṣẹ nígbà tí ẹgbẹ́ ọmọ ogun Kírúsì bi Bábílónì ṣubú, tí ọba rẹ̀ sì ré bọ́ lójijì pẹ̀lú ìtìjú látorí ipò tó wà gẹ́gẹ́ bí alákòóso ayé. A lè rí i báyìí pé ìṣubú látọ̀run lè tọ́ka sí ìgbà tí ipò gíga kan bá bọ́ lọ́wọ́ èèyàn tónítọ̀hún sì dẹni ìtìjú tó tẹ́ pátápátá.

31. (a) Nígbà wo ni àwùjọ àlùfáà àwọn oníṣọ́ọ̀ṣì ṣubú láti ipò ti “ọ̀run?” (b) Báwo ni omi táwọn àlùfáà gbé kalẹ̀ ṣe yí padà di “iwọ,” kí nìyẹn sì fà fún ọ̀pọ̀lọpọ̀?

³¹ Nígbà tí ẹgbẹ́ àlùfáà àwọn oníṣọ́ọ̀ṣì pẹ̀yìn dà kúrò nínú ìsìn Kristẹni tòótọ́, wọ́n ṣubú láti ipò gíga fíofío ti “ọ̀run” tí Pọ́ọ̀lù ṣàpèjúwe nínú Éfésù 2:6, 7. Kàkà kí wọ́n fáwọn èèyàn ní omi òtítọ́ títunilára mu, wọ́n gbé “iwọ” kalẹ̀, ìyẹn àwọn irọ́ kíkorò bí ẹ̀kọ́ ọ̀run àpáàdì, pọ́gátórì, Mẹ́talọ́kan, àti àyànmọ́; bákan náà, wọ́n ti kó àwọn orílẹ̀-èdè lọ sógun, nípa kíkùnà láti mú kí wọ́n di ìránṣẹ́ Ọlọ́run tó níwà ọmọlúwàbí. Kí ló tẹ̀yìn ẹ̀ wá? Wọ́n ń fún àwọn tó gba ẹ̀kọ́ èké wọn gbọ́ ní májèlé tẹ̀mí jẹ. Ọ̀ràn wọn jọ tàwọn ọmọ Ísírẹ́lì aláìṣòótọ́ nígbà ayé Jeremáyà, àwọn ẹni tí Jèhófà wí fún pé: “Kíyè sí i, èmi yóò mú, èyíinì ni, àwọn èèyàn yìí, jẹ iwọ, dájúdájú, èmi yóò sì mú wọn mu omi onímájèlé. Nítorí láti ọ̀dọ̀ àwọn wòlíì Jerúsálẹ́mù ni ìpẹ̀yìndà ti jáde lọ sí gbogbo ilẹ̀.”—Jeremáyà 9:15; 23:15.

32. Nígbà wo ni ìṣubú àwọn oníṣọ́ọ̀ṣì kúrò ní ọ̀run tẹ̀mí hàn kedere, kí ló sì fi í hàn?

³² Ọdún 1919 ló hàn gbangba pé àwọn oníṣọ́ọ̀ṣì ti ṣubú látọ̀run tẹ̀mí nígbà tí Jésù yan ìwọ̀nba kéréje ìyókù àwọn Kristẹni ẹni àmì òróró sórí gbogbo ohun tó jẹ́ mọ́ ọ̀ràn Ìjọba náà, dípò ẹgbẹ́ àlùfáà àwọn oníṣọ́ọ̀ṣì. (Mátíù 24:45-47) Àwọn Kristẹni yìí sì fi ìṣubú àwọn oníṣọ́ọ̀ṣì hàn kedere láti 1922 nígbà tí wọ́n ń polongo lákọ̀tun nípa títú àṣírí ibi táwọn àlùfáà àwọn oníṣọ́ọ̀ṣì ti kùnà láìfi ọ̀rọ̀ sábẹ́ ahọ́n sọ.

33. Báwo làwọn akẹ́kọ̀ọ́ Bíbélì ṣe tú àwùjọ àlùfáà àwọn oníṣọ́ọ̀ṣì fó ní àpéjọ àgbègbè ọdún 1924 tí wọ́n ṣe nílùú Columbus, ní ìpínlẹ̀ Ohio, lórílẹ̀-èdè Amẹ́ríkà?

³³ Èyí tó ta yọ nínú pípòkìkí ìṣubú yìí ni ìpolongo táwọn akẹ́kọ̀ọ́ Bíbélì ṣe ní àpéjọ kan tí ìwé ìròyìn The Golden Age pè ní “àpéjọ àgbègbè gíga jù lọ táwọn Akẹ́kọ̀ọ́ Bíbélì tíì ṣe rí.” Ìlú Columbus ní ìpínlẹ̀ Ohio, lórílẹ̀-èdè Amẹ́ríkà ni wọ́n ti ṣe àpéjọ yìí ní July 20 sí 27, ọdún 1924. Kò síyè méjì pé áńgẹ́lì tó fun kàkàkí kẹta ń darí wọn, torí wọ́n fọwọ́ sí ìpinnu lílágbára kan níbẹ̀ wọ́n sì pín àádọ́ta mílíọ̀nù ẹ̀dà ìpinnu náà kiri nígbà tí wọ́n sọ ọ́ di ìwé àṣàrò kúkúrú. Wọ́n tẹ̀ ẹ́ jáde wọ́n sì pe àkọlé rẹ̀ ní Ecclesiastics Indicted (Ẹ̀sùn Tó Wà Lọ́rùn Ẹgbẹ́ Àwọn Àlùfáà). Ìsọ̀rí ọ̀rọ̀ kan gbé àríyànjiyàn náà kalẹ̀, ó sọ pé: “Irú-Ọmọ Ìlérí Ní Ìdojúùjà Kọ Irú-Ọmọ Ejò.” Ẹ̀sùn náà tú ẹgbẹ́ àlùfáà àwọn oníṣọ́ọ̀ṣì fó ní gbogbo ọ̀nà, irú bí wọ́n ṣe ń fi ara wọn jẹ oyè ìsìn kàǹkà-kàǹkà, bí wọ́n ṣe ń fàwọn oníṣòwò tó rọ́wọ́ mú àtàwọn ògbóǹtarìgì olóṣèlú ṣe àwọn ògúnná gbòǹgbò nínú agbo wọn, bí wọ́n ṣe ń fẹ́ láti máa fẹlá níwájú àwọn èèyàn, àti kíkọ̀ tí wọ́n kọ̀ láti wàásù ìhìn rere Ìjọba Mèsáyà fáwọn èèyàn. Ó tẹnu mọ́ ọn pé olúkúlùkù Kristẹni olùṣèyàsímímọ́ ni Ọlọ́run fún níṣẹ́ láti máa pòkìkí “ọjọ́ ẹ̀san níhà ọ̀dọ̀ Ọlọ́run wa; láti tu gbogbo àwọn tí ń ṣọ̀fọ̀ nínú.”—Aísáyà 61:2.

34, 35. (a) Látìgbà tí áńgẹ́lì kẹta ti bẹ̀rẹ̀ sí í fun kàkàkí rẹ̀, kí ló ṣẹlẹ̀ sí àṣẹ àti agbára àwùjọ àwọn àlùfáà? (b) Kí ló máa ṣẹlẹ̀ sí àwùjọ àlùfáà àwọn oníṣọ́ọ̀ṣì lọ́jọ́ iwájú?

³⁴ Láti ìgbà tí áńgẹ́lì kẹta ti bẹ̀rẹ̀ sí í fun kàkàkí rẹ̀ lagbára ti ń bọ́ lọ́wọ́ àwọn àlùfáà, wọn ò sì lè fi bẹ́ẹ̀ jẹ gàba láàárín aráyé mọ́. Ó burú fún wọn débi pé, lóde òní yìí, ìwọ̀nba kéréje nínú wọn ló ṣì ń rí agbára tí wọ́n fi sọ ara wọn di ọlọ́run lò, bẹ́ẹ̀ sì rèé wọ́n nírú agbára bẹ́ẹ̀ láwọn ọ̀rúndún tó kọjá. Nítorí ìwàásù àwọn Ẹlẹ́rìí Jèhófà, ọ̀pọ̀ èèyàn ló ti wá mọ̀ pé májèlé tẹ̀mí, tàbí “iwọ” ni ọ̀pọ̀ ẹ̀kọ́ táwọn ẹgbẹ́ àlùfáà fi ń kọ́ni. Síwájú sí i, láwọn orílẹ̀-èdè tó wà ní àríwá ilẹ̀ Yúróòpù, agbára ti fẹ́rẹ̀ẹ́ tán lọ́wọ́ àwọn àlùfáà, nígbà tó jẹ́ pé ní àwọn ilẹ̀ kan ìjọba ká wọn lọ́wọ́ kò gan-an. Láwọn apá ibi tí ẹ̀sìn Kátólíìkì pọ̀ sí nílẹ̀ Yúróòpù àti nílẹ̀ Amẹ́ríkà, orúkọ ẹgbẹ́ àwọn àlùfáà ti bà jẹ́ nítorí mọ́namọ̀na tí wọ́n ń ṣe nínú ọ̀ràn owó, ìṣèlú, àti nítorí ìwà pálapàla wọn. Láti ìsinsìnyí lọ, ṣe ni wọ́n á kàn máa tẹ́ sí i torí pé àgbákò tó máa bá gbogbo àwọn onísìn èké yòókù láìpẹ́ máa kan àwọn náà.—Ìṣípayá 18:21; 19:2.

³⁵ Ìyọnu tí Jèhófà ń mú wá sórí àwọn oníṣọ́ọ̀ṣì kò tíì tán o. Ìwọ wo ohun tó ṣẹlẹ̀ nígbà tí kàkàkí kẹrin dún.

Òkùnkùn!

36. Kí ló ṣẹlẹ̀ lẹ́yìn tí áńgẹ́lì kẹrin fun kàkàkí rẹ̀?

³⁶ “Áńgẹ́lì kẹrin sì fun kàkàkí rẹ̀. A sì fi agbára lu ìdá mẹ́ta oòrùn àti ìdá mẹ́ta òṣùpá àti ìdá mẹ́ta àwọn ìràwọ̀, kí ìdá mẹ́ta wọn bàa lè ṣókùnkùn, kí ọ̀sán má sì ní ìmọ́lẹ̀ títàn fún ìdá mẹ́ta rẹ̀, àti òru bákan náà.” (Ìṣípayá 8:12) Òkùnkùn gidi ni ìyọnu kẹsàn-án tó wá sórí ilẹ̀ Íjíbítì. (Ẹ́kísódù 10:21-29) Ṣùgbọ́n, kí ni òkùnkùn ìṣàpẹẹrẹ yìí tó mú ìyọnu wá sórí àwọn èèyàn?

37. Báwo ni àpọ́sítélì Pétérù àti Pọ́ọ̀lù ṣe ṣàpèjúwe ipò tẹ̀mí àwọn tí ń bẹ lẹ́yìn òde ìjọ Kristẹni?

³⁷ Àpọ́sítélì Pétérù sọ fáwọn tí wọ́n jọ jẹ́ onígbàgbọ́ pé inú òkùnkùn tẹ̀mí ni wọ́n wà, kí wọ́n tó di Kristẹni. (1 Pétérù 2:9) Pọ́ọ̀lù pẹ̀lú lo ọ̀rọ̀ náà “òkùnkùn” láti ṣàpèjúwe ipò táwọn tó wà lẹ́yìn òde ìjọ Kristẹni wà. (Éfésù 5:8; 6:12; Kólósè 1:13; 1 Tẹsalóníkà 5:4, 5) Ṣùgbọ́n àwọn oníṣọ́ọ̀ṣì ńkọ́, ìyẹn àwọn tí wọ́n sọ pé àwọ́n ní ìgbàgbọ́ nínú Ọlọ́run tí wọ́n sì sọ pé àwọ́n gba Jésù gẹ́gẹ́ bí Olùgbàlà àwọn?

38. Òtítọ́ wo ni áńgẹ́lì kẹrin fi kàkàkí ẹ̀ fun jáde nípa “ìmọ́lẹ̀” àwọn oníṣọ́ọ̀ṣì?

³⁸ Jésù sọ pé èso àwọn Kristẹni tòótọ́ la ó fi mọ̀ wọ́n àti pé ọ̀pọ̀ àwọn tó sọ pé ọmọlẹ́yìn òun làwọn ló máa jẹ́ àwọn “oníṣẹ́ ìwà àìlófin.” (Mátíù 7:15-23) Kò sẹ́nì kankan tó lè máa wo àwọn èso ìdá mẹ́ta ayé tí ìsìn àwọn oníṣọ́ọ̀ṣì gba inú ẹ̀ kan yìí tí ò ní í gbà pé inú òkùnkùn biribiri nípa tẹ̀mí ló ti ń tá ràrà. (2 Kọ́ríńtì 4:4) Ẹ̀bi tiẹ̀ ló pọ̀ jù lọ, torí ó sọ pé Kristẹni lòun. Torí náà, kò sí ṣíṣe kò sí àìṣe, áńgẹ́lì kẹrin ní láti fun kàkàkí ẹ̀ kó lè fi gbé òtítọ́ náà jáde pé òkùnkùn biribiri ni “ìmọ́lẹ̀” àwọn oníṣọ́ọ̀ṣì, ìmọ́lẹ̀ Bábílónì làwọn orísun “ìmọ́lẹ̀” wọn, kì í ṣe ti Kristẹni.—Máàkù 13:22, 23; 2 Tímótì 4:3, 4.

39. (a) Báwo ni ìpinnu táwọn èèyàn Jèhófà tẹ́wọ́ gbà ní àpéjọ àgbègbè ní 1925 ṣe ṣàpèjúwe ìmọ́lẹ̀ èké àwọn oníṣọ́ọ̀ṣì? (b) Ìtúfó síwájú sí i wo ni a ṣe ní 1955?

³⁹ Ní ìbámu pẹ̀lú ohun tí áńgẹ́lì yẹn pòkìkí láti ọ̀run, ogunlọ́gọ̀ àwọn èèyàn Ọlọ́run pé jọ sí àpéjọ àgbègbè kan nílùú Indianapolis, ní ìpínlẹ̀ Indiana, lórílẹ̀-èdè Amẹ́ríkà, ní August 29, ọdún 1925, wọ́n sì tẹ́wọ́ gba ìpinnu kan tó sojú abẹ níkòó, tí àkòrí rẹ̀ jẹ́ “Ìhìn Ìrètí,” èyí tí wọ́n tẹ̀ jáde lẹ́yìn náà. Wọ́n pín nǹkan bí àádọ́ta [50] mílíọ̀nù ẹ̀dà rẹ̀ kiri láwọn èdè mélòó kan. Ó sọ̀rọ̀ nípa ìmọ́lẹ̀ èké tí àpapọ̀ àwọn oníṣòwò elérè àjẹpajúdé, àwọn aṣíwájú òṣèlú, àti àwùjọ àwọn àlùfáà ìsìn ń tàn, èyí tó fi jẹ́ pé “àwọn ènìyàn ti ṣubú sínú òkùnkùn.” Ó sì fi hàn pé Ìjọba Ọlọ́run ni ìrètí tòótọ́ fún rírí “ìbùkún àlàáfíà, aásìkí, ìlera, ìyè, òmìnira àti ayọ̀ ayérayé” gbà. Ó gba ìgboyà kí agbo kékeré àwọn Kristẹni ẹni àmì òróró náà tó lè polongo irú àwọn ìkéde bẹ́ẹ̀ lòdì sí ètò ìsìn àwọn oníṣọ́ọ̀ṣì tó tóbi gbàràmù gbaramu. Ṣùgbọ́n láti bí ọdún mélòó kan lẹ́yìn ọdún 1920, wọ́n ti ń bá ìkéde náà bọ̀ láìdáwọ́ dúró títí di ìsinsìnyí. Kódà lákòókò tí kò tíì pẹ́ tóyẹn, ìyẹn lọ́dún 1955, ìwé pẹlẹbẹ kan táwọn èèyàn Ọlọ́run pín káàkiri àgbáyé ní ọ̀pọ̀lọpọ̀ èdè tú ẹgbẹ́ àlùfáà fó síwájú sí i. Àkòrí ìwé náà ni Kristẹndọm Tabi Jijẹ-Kristian—Ewo Ni “Imọlẹ Aiye”? Lónìí, àgàbàgebè àwọn oníṣọ́ọ̀ṣì ti wá hàn gbangba débi pé ọ̀pọ̀ nínú ayé ti ń rí i fúnra wọn. Ṣùgbọ́n àwọn èèyàn Jèhófà ò tíì dẹ́kun títú u fó nípa jíjẹ́ káwọn èèyàn mọ ohun tó jẹ́ gan-an: ìyẹn ìjọba òkùnkùn.

Idì Tí Ń Fò

40. Kí ni àwọn ìró kàkàkí mẹ́rin náà fi hàn pé ìsìn àwọn oníṣọ́ọ̀ṣì jẹ́?

⁴⁰ Lóòótọ́, àwọn ìró kàkàkí mẹ́rin àkọ́kọ́ wọ̀nyí jẹ́ ká mọ ipò ahoro tó sì ń ṣekú pani tí ìsìn àwọn oníṣọ́ọ̀ṣì wà. Ó hàn gbangba pé apá tó jẹ́ ti ìsìn àwọn oníṣọ́ọ̀ṣì lórí “ilẹ̀ ayé” yẹ fún ìdájọ́ Jèhófà. A ti rí i kedere pé àwọn ìjọba oníyìípadà jàgídíjàgan tó ń rú yọ láwọn ilẹ̀ rẹ̀ àti ní ibòmíràn léwu nípa tẹ̀mí. Àṣírí bí ẹgbẹ́ àlùfáà rẹ̀ ṣe ṣubú ti tú pátápátá, ó sì ti ṣeé ṣe fún gbogbo èèyàn láti rí i kedere pé inú òkùnkùn tẹ̀mí ló wà. Ní tòótọ́, ìsìn àwọn oníṣọ́ọ̀ṣì ló jẹ̀bi jù lọ nínú ètò àwọn nǹkan Sátánì.

41. Nígbà táwọn ìró kàkàkí náà dáwọ́ dúró díẹ̀, kí ni Jòhánù rí tó sì gbọ́?

⁴¹ Kí ló tún kù ńbẹ̀ láti ṣí payá? Ká tó rí ìdáhùn sí ìbéèrè yí, àwọn ìró kàkàkí dáwọ́ dúró díẹ̀ ná. Ohun tí Jòhánù lóun rí nísinsìnyí rèé: “Mo sì rí, mo sì gbọ́ tí idì kan tí ń fò ní agbedeméjì ọ̀run wí pẹ̀lú ohùn rara pé: ‘Ègbé, ègbé, ègbé ni fún àwọn tí ń gbé lórí ilẹ̀ ayé nítorí ìyókù ìró ìpè kàkàkí àwọn áńgẹ́lì mẹ́ta tí wọ́n máa tó fun kàkàkí wọn!’”—Ìṣípayá 8:13.

42. Kí ni idì tí ń fò náà dúró fún, kí ló sì ń polongo?

⁴² Idì a máa fò lókèlókè lójú sánmà, tó fi jẹ́ pé àwọn èèyàn púpọ̀ lórí ilẹ̀ lè rí i. Ojú ẹ̀ ríran ketekete ó sì lè rí nǹkan tó bá wà lọ́nà jíjìn. (Jóòbù 39:29) A fi ẹyẹ idì tí ń fò ṣàpẹẹrẹ ọ̀kan nínú àwọn ẹ̀dá alààyè mẹ́rin tí wọ́n jẹ́ kérúbù, tí wọ́n yí ìtẹ́ Ọlọ́run ká. (Ìṣípayá 4:6, 7) Bóyá kérúbù yẹn ni o, tàbí ìránṣẹ́ Ọlọ́run míì tójú ẹ̀ lè rína jìnnà mìíràn ni o, ó ń fi ohùn rara polongo ìkéde alágbára kan pé: “Ègbé, ègbé, ègbé”! Káwọn tó ń gbé ilẹ̀ ayé kíyè sí i, bí wọ́n bá ti ń gbọ́ àwọn ìró kàkàkí mẹ́ta tó kù wọ̀nyẹn, ègbé kọ̀ọ̀kan ń bá ọ̀kọ̀ọ̀kan wọn rìn ni.

[Àwọ̀n Àlàyé ìsàlẹ̀ ìwé]

[Àtẹ Ìsọfúnnni tó wà ní ojú ìwé 139]

Iwọ Ni Omi Ìsìn Àwọn Oníṣọ́ọ̀ṣì

Ìgbàgbọ́ àti Àṣà Àwọn Oníṣọ́ọ̀ṣì Ohun Tí Bíbélì Wí Gan-an

[Àwòrán tó wà ní ojú ìwé 132]

Ṣíṣí èdìdì méje náà ló ṣáájú fífun àwọn kàkàkí méje

[Àwòrán tó wà ní ojú ìwé 140]

“Ìpèníjà Fáwọn Aṣáájú Ayé” (1922)

Ìpinnu yìí ṣèrànwọ́ láti polongo ìyọnu látọ̀dọ̀ Jèhófà lòdì sí “ilẹ̀ ayé”

[Àwòrán tó wà ní ojú ìwé 140]

“Ìkìlọ̀ fún Gbogbo Kristẹni” (1923)

Ìpinnu yìí la fi pòkìkí ìdájọ́ mímúná Jèhófà lórí “ìdá mẹ́ta òkun”

[Àwòrán tó wà ní ojú ìwé 141]

“Ẹ̀sùn Tó Wà Lọ́rùn Ẹgbẹ́ Àwọn Àlùfáà” (1924)

Pínpín tá a pín ìwé àṣàrò kúkúrú yìí délé dóko jẹ́ káwọn èèyàn mọ̀ pé “ìràwọ̀” tó jẹ́ ẹgbẹ́ àlùfáà àwọn oníṣọ́ọ̀ṣì ti já bọ́

[Àwòrán tó wà ní ojú ìwé 141]

“Ìhìn Ìrètí” (1925)

Ìpinnu tó ṣe tààràtà yìí la fi tú àṣírí àwọn oníṣọ́ọ̀ṣì pé ohun tí wọ́n pè ní orísun ìmọ́lẹ̀ wọn jẹ́ orísun òkùnkùn

Orí 22

Ègbé Àkọ́kọ́—Àwọn Eéṣú

1. Nígbà táwọn áńgẹ́lì bá ti fun kàkàkí wọn, àwọn wo ló ń polongo ìró rẹ̀, kí sì ni ìró kàkàkí karùn-ún kéde?

ÁŃGẸ́LÌ karùn-ún ń múra sílẹ̀ láti fun kàkàkí rẹ̀. Kàkàkí mẹ́rin ló ti dún látọ̀run, ìyọnu mẹ́rin sì ti dà sórí ìdá mẹ́ta tí Jèhófà kà séyìí tó jẹ̀bi jù lọ nínú ayé, ìyẹn àwùjọ oníṣọ́ọ̀ṣì. Àṣírí ti tú pé inú àìsàn tó máa pa á ló wà. Báwọn áńgẹ́lì ṣe ń fọn kàkàkí wọn yìí, àwọn èèyàn ń polongo rẹ̀ lórí ilẹ̀ ayé. Nísinsìnyí kàkàkí áńgẹ́lì karùn-ún máa tó kéde ègbé àkọ́kọ́, tó jẹ́ ẹlẹ́rùjẹ̀jẹ̀ ju àwọn ohun tó ti ṣẹlẹ̀ ṣáájú pàápàá. Ó ní í ṣe pẹ̀lú ìyọnu eéṣú tó ń ṣẹ̀rù bani. Àmọ́ ṣá, ẹ jẹ́ ká kọ́kọ́ ṣàyẹ̀wò àwọn ẹsẹ Ìwé Mímọ́ táá ràn wá lọ́wọ́ láti túbọ̀ lóye ìyọnu ọ̀hún.

2. Ìwé Bíbélì wo ló ṣàpèjúwe ìyọnu àwọn eéṣú kan tó jọ èyí tí Jòhánù rí, ipa wo ló sì ní lórí Ísírẹ́lì ìgbàanì?

² Ìwé Jóẹ́lì nínú Bíbélì, tí wọ́n kọ ní ọ̀rúndún kẹsàn-án ṣááju Sànmánì Kristẹni, ṣàpèjúwe ìyọnu oríṣiríṣi kòkòrò, tó fi mọ́ eéṣú, tó jọ èyí tí Jòhánù rí. (Jóẹ́lì 2:1-11, 25)a Ó máa kó ìrora tó pọ̀ bá Ísírẹ́lì tó ti di apẹ̀yìndà ṣùgbọ́n á tún mú káwọn Júù ronú pìwà dà lọ́kọ̀ọ̀kan, kí wọ́n sì padà rí ojú rere Jèhófà. (Jóẹ́lì 2:6, 12-14) Nígbà tí àkókò yẹn bá tó, Jèhófà á tú ẹ̀mí rẹ̀ jáde “sára gbogbo onírúurú ẹran ara,” bó tilẹ̀ jẹ́ pé àwọn àmì abanilẹ́rù àtàwọn àmì àgbàyanu akódàágìrì-báni ló máa ṣáájú “kí ọjọ́ ńlá àti ọjọ́ amúnikún-fún-ẹ̀rù ti Jèhófà tó dé.”—Jóẹ́lì 2:11, 28-32.

Ìyọnu Ọ̀rúndún Kìíní

3, 4. (a) Ìgbà wo ni Jóẹ́lì orí kejì ní ìmúṣẹ kan, báwo ló sì ṣe ní ìmúṣẹ? (b) Báwo ni ìyọnu tó ń ya luni bí eéṣú ṣe wà ní ọ̀rúndún kìíní Sànmánì Kristẹni, báwo ló sì ṣe pẹ́ tó tí wọ́n fi ń mú ìyọnu náà wá sórí àwọn èèyàn?

³ Jóẹ́lì orí kejì ní ìmúṣẹ lọ́nà kan ní ọ̀rúndún kìíní. Èyí ṣẹlẹ̀ nígbà àjọ̀dún Pẹ́ńtíkọ́sì ọdún 33 Sànmánì Kristẹni, nígbà tá a tú ẹ̀mí mímọ́ jáde, tí ẹ̀mí mímọ́ yan àwọn Kristẹni ẹni àmì òróró àkọ́kọ́ tó sì fún wọn lágbára láti sọ àwọn “ohun ọlá ńlá Ọlọ́run” ní ọ̀pọ̀lọpọ̀ èdè. Látàrí èyí, ogunlọ́gọ̀ ńlá pé jọ. Àpọ́sítélì Pétérù bá àwọn òǹwòran tẹ́nu ń yà sọ̀rọ̀, ó fa ọ̀rọ̀ yọ látinú Jóẹ́lì 2:28, 29 ó sì ṣàlàyé pé ìmúṣẹ rẹ̀ ni wọ́n ń rí yẹn. (Ìṣe 2:1-21) Ṣùgbọ́n kò sí àkọsílẹ̀ pé ìyọnu kòkòrò gidi dé bá ẹnì kankan láti fa ìnira fún wọn kó sì mú kí wọ́n ronú pìwà dà.

⁴ Ǹjẹ́ ìyọnu kankan ṣẹlẹ̀ lọ́nà ìṣàpẹẹrẹ lákòókò yẹn bí? Bẹ́ẹ̀ ni o! Ó ṣẹlẹ̀ látàrí ìwàásù táwọn Kristẹni tá a ṣẹ̀ṣẹ̀ fi òróró yàn ń ṣe láìdáwọ́dúró.b Nípasẹ̀ wọn, Jèhófà ń pe àwọn Júù tó bá máa fetí sílẹ̀ láti ronú pìwà dà kí wọ́n sì gbádùn àwọn ìbùkún rẹ̀. (Ìṣe 2:38-40; 3:19) Àwọn tí wọ́n gbọ́ràn nínú wọn rí ojú rere rẹ̀ dé àyè kan. Ṣùgbọ́n fáwọn tó fi gbígbọ́ ṣaláìgbọ́, ṣe làwọn Kristẹni ọ̀rúndún kìíní dà bí àwọn eéṣú tó ń ya lù wọ́n tó sì ń jẹ wọ́n run. Láti Jerúsálẹ́mù, wọ́n tàn ká gbogbo Jùdíà àti Samáríà. Láìpẹ́ wọ́n tàn débi gbogbo, bí wọ́n sì ṣe ń pòkìkí àjíǹde Jésù ní gbangba, tí wọ́n tún ń sọ ohun tí àjíǹde náà túmọ̀ sí, ṣe ni wọ́n ń dá àwọn Júù aláìgbàgbọ́ lóró. (Ìṣe 1:8; 4:18-20; 5:17-21, 28, 29, 40-42; 17:5, 6; 21:27-30) Wọ́n ń bá a nìṣó láti máa mú ìyọnu náà wá sórí àwọn èèyàn títí di “ọjọ́ ńlá àti ọjọ́ amúnikún-fún-ẹ̀rù,” ìyẹn lọ́dún 70 Sànmánì Kristẹni, nígbà tí Jèhófà mú káwọn ẹgbẹ́ ọmọ ogun Róòmù kọ lu Jerúsálẹ́mù láti pa á run. Kìkì àwọn Kristẹni tó fi ìgbàgbọ́ ké pe orúkọ Jèhófà ló rí ìgbàlà.—Jóẹ́lì 2:32; Ìṣe 2:20, 21; Òwe 18:10.

Ìyọnu Eéṣú Lóde Òní

5. Báwo ni àsọtẹ́lẹ̀ Jóẹ́lì ti ṣe ń ní ìmúṣẹ látọdún 1919 wá?

⁵ Ó bọ́gbọ́n mu láti fojú sọ́nà pé kí àsọtẹ́lẹ̀ Jóẹ́lì ní ìmúṣẹ ìkẹyìn rẹ̀ ní àkókò òpin. Òótọ́ pọ́ńbélé sì nìyẹn wá já sí! Ní àpéjọ àgbègbè àwọn Akẹ́kọ̀ọ́ Bíbélì nílùú Cedar Point, ní ìpínlẹ̀ Ohio, lórílẹ̀-èdè Amẹ́ríkà, ní September 1 sí 8, ọdún 1919, ẹ̀mí Jèhófà tó tú jáde lọ́nà tó kàmàmà mú káwọn èèyàn Jèhófà di alákitiyan lẹ́nu ṣíṣètò iṣẹ́ ìwàásù tó gba ayé kan. Nínú gbogbo àwọn tí wọ́n sọ pé àwọn jẹ́ Kristẹni, àwọn èèyàn Jèhófà nìkan ṣoṣo ló ń ṣe gbogbo ohun tó wà lágbára wọn láti máa kéde ìhìn rere yẹn káàkiri torí wọ́n mọ̀ dájú ṣáká pé Jèhófà ti gbé Jésù gorí ìtẹ́ gẹ́gẹ́ bí Ọba ní ọ̀run. Bí wọ́n ṣe ń wàásù láìdẹwọ́ yẹn, gẹ́gẹ́ bí ìmúṣẹ àsọtẹ́lẹ̀ yìí, ṣe ló dà bí ìyọnu adánilóró fáwọn oníṣọ́ọ̀ṣì apẹ̀yìndà.—Mátíù 24:3-8, 14; Ìṣe 1:8.

6. (a) Kí ni Jòhánù rí nígbà tí áńgẹ́lì karùn-ún fun kàkàkí rẹ̀? (b) Ta ni “ìràwọ̀” yìí ṣàpẹẹrẹ, kí sì nìdí ẹ̀?

⁶ Ìwé Ìṣípayá, tí Jòhánù kọ ní nǹkan bí ọdún mẹ́rìndínlọ́gbọ̀n [26] lẹ́yìn ìparun Jerúsálẹ́mù, tún ṣàpèjúwe ìyọnu yẹn. Kí ló wá fi kún àpèjúwe Jóẹ́lì o? Ẹ jẹ́ ká gbé àkọsílẹ̀ náà yẹ̀ wò gẹ́gẹ́ bí Jòhánù ti ròyìn rẹ̀, pé: “Áńgẹ́lì karùn-ún sì fun kàkàkí rẹ̀. Mo sì rí ìràwọ̀ kan tí ó ti jábọ́ láti ọ̀run sí ilẹ̀ ayé, a sì fún un ní kọ́kọ́rọ́ kòtò ọ̀gbun àìnísàlẹ̀.” (Ìṣípayá 9:1) “Ìràwọ̀” yìí yàtọ̀ sí èyí tó wà nínú Ìṣípayá 8:10 tí Jòhánù rí bó ṣe ń já bọ̀. “Ìràwọ̀ kan tí ó ti jábọ́ láti ọ̀run sí ilẹ̀ ayé” ló rí báyìí àti pé ó ní iṣẹ́ kan tí ìràwọ̀ náà ní í ṣe nínú ọ̀ràn ilẹ̀ ayé yìí. Ṣé ẹni ẹ̀mí ni ẹni yìí àbí èèyàn ẹlẹ́ran ara? Ẹni tó ní “kọ́kọ́rọ́ kòtò ọ̀gbun àìnísàlẹ̀” yìí lọ́wọ́ ni Ìṣípayá wá sọ nígbà tó yá pé ó fi Sátánì sọ̀kò sínú “ọ̀gbun àìnísàlẹ̀.” (Ìṣípayá 20:1-3) Torí ìdí èyí, ó ní láti jẹ́ ẹni ẹ̀mí alágbára ńlá. Nínú Ìṣípayá 9:11, Jòhánù sọ fún wa pé àwọn eéṣú yẹn ní “ọba kan . . . , áńgẹ́lì ọ̀gbun àìnísàlẹ̀.” Níwọ̀n bó sì ti bọ́gbọ́n mu pé áńgẹ́lì tó mú kọ́kọ́rọ́ ọ̀gbun àìnísàlẹ̀ náà dání ní láti jẹ́ áńgẹ́lì ọ̀gbun àìnísàlẹ̀ náà, ẹsẹ Ìwé Mímọ́ méjèèjì yìí ní láti máa tọ́ka sí ẹnì kan náà. Bákan náà, ìràwọ̀ náà ní láti ṣàpẹẹrẹ Ọba tí Jèhófà yàn sípò, níwọ̀n bó ti jẹ́ pé, Jésù Kristi ni Ọba kan ṣoṣo tó jẹ́ áńgẹ́lì táwọn Kristẹni ẹni àmì òróró mọ̀ lọ́ba.—Kólósè 1:13; 1 Kọ́ríńtì 15:25.

7. (a) Kí ló ṣẹlẹ̀ nígbà tí áńgẹ́lì náà ṣí “kòtò ọ̀gbun àìnísàlẹ̀ náà”? (b) Kí ni “ọ̀gbun àìnísàlẹ̀ náà,” ta sì ló lo àkókò kúkúrú nínú rẹ̀?

⁷ Ìròyìn náà ń bá a lọ pé: “Ó sì ṣí kòtò ọ̀gbun àìnísàlẹ̀ náà, èéfín sì gòkè wá láti inú kòtò náà bí èéfín ìléru ńlá, oòrùn sì ṣókùnkùn, àti afẹ́fẹ́ pẹ̀lú, nípasẹ̀ èéfín kòtò náà. Àwọn eéṣú sì jáde wá sórí ilẹ̀ ayé láti inú èéfín náà; a sì fún wọn ní ọlá àṣẹ, irú ọlá àṣẹ kan náà tí àwọn àkekèé ilẹ̀ ayé ní.” (Ìṣípayá 9:2, 3) Bí Ìwé Mímọ́ ṣe máa ń lo ọ̀rọ̀ náà “ọ̀gbun àìnísàlẹ̀,” ó jẹ́ ibi tẹ́nì kan ò ti lè ṣiṣẹ́ mọ́, ipò ikú pàápàá. (Fi wé Róòmù 10:7; Ìṣípayá 17:8; 20:1, 3.) Ẹgbẹ́ àwọn arákùnrin Jésù tí wọ́n kéré lo àkókò kúkúrú nínú irú “ọ̀gbun àìnísàlẹ̀,” níbi tá a ti lè sọ pé wọn ò ṣiṣẹ́ mọ́, ní òpin Ogun Àgbáyé Kìíní (ìyẹn lọ́dún 1918 sí ọdún 1919). Ṣùgbọ́n nígbà tí Jèhófà tú ẹ̀mí rẹ̀ dà sórí àwọn ìránṣẹ́ rẹ̀ tí wọ́n ronú pìwà dà lọ́dún 1919, wọ́n tú jáde láti dàyà kọ iṣẹ́ tó wà níwájú wọn.

8. Báwo ló ṣe jẹ́ pé “èéfín” púpọ̀ làwọn eéṣú náà bá jáde nígbà tí áńgẹ́lì náà tú wọn sílẹ̀?

⁸ Gẹ́gẹ́ bí Jòhánù ṣe kíyè sí i, bí áńgẹ́lì náà ṣe tú àwọn eéṣú yẹn sílẹ̀, ṣe ni èéfín púpọ̀ bá wọn jáde, irú èyí tó dà bí “èéfín ìléru ńlá” kan.c Ohun tó ṣẹlẹ̀ nìyẹn lọ́dún 1919. Gbogbo nǹkan ṣókùnkùn fáwọn oníṣọ́ọ̀ṣì àti fáráyé lápapọ̀. (Fi wé Jóẹ́lì 2:30, 31.) Ìtìjú ńlá gbáà ló jẹ́ fún ẹgbẹ́ àlùfáà àwọn oníṣọ́ọ̀ṣì bí áńgẹ́lì náà ṣe tú àwọn eéṣú, ìyẹn ẹgbẹ́ Jòhánù sílẹ̀ torí pé wọ́n ti di rìkíṣí, wọ́n gbìmọ̀ pọ̀ láti dojú iṣẹ́ Ìjọba Ọlọ́run bolẹ̀ títí láé, tí wọ́n sì ti pa Ìjọba Ọlọ́run tì báyìí. Àmì pé èéfín kan ṣú dẹ̀dẹ̀ bẹ̀rẹ̀ sí í tàn ká orí àwọn oníṣọ́ọ̀ṣì apẹ̀yìndà bí Ọlọ́run ṣe fún agbo eéṣú yẹn ní àṣẹ látọ̀run tí wọ́n sì bẹ̀rẹ̀ sí í lo àṣẹ náà láti pòkìkí àwọn ìkéde ìdájọ́ tó lágbára. “Oòrùn” àwọn oníṣọ́ọ̀ṣì, ìyẹn ohun tó dà bí ìlàlóye tí wọ́n ní, ti wọ òkùnkùn, àwọn ìpolongo ìdájọ́ Ọlọ́run sì ti gba inú “afẹ́fẹ́” kan bó ṣe di pé ó hàn gbangba pé “olùṣàkóso ọlá àṣẹ afẹ́fẹ́” ayé yìí ni ọlọ́run àwọn oníṣọ́ọ̀ṣì.—Éfésù 2:2; Jòhánù 12:31; 1 Jòhánù 5:19.

Àwọn Eéṣú Yẹn Mà Ń Dáni Lóró O!

9. Àṣẹ wo làwọn eéṣú yẹn ní láti máa tẹ̀ lé lójú ogun?

⁹ Àṣẹ wo làwọn eéṣú yẹn ní láti máa tẹ̀ lé lójú ogun? Jòhánù ròyìn pé: “A sì sọ fún wọn pé kí wọ́n má ṣe pa ewéko ilẹ̀ ayé kankan lára tàbí ohun títutùyọ̀yọ̀ èyíkéyìí tàbí igi èyíkéyìí, bí kò ṣe kìkì àwọn ènìyàn tí kò ní èdìdì Ọlọ́run ní iwájú orí wọn. A sì yọ̀ǹda fún àwọn eéṣú náà, láti má ṣe pa wọ́n, ṣùgbọ́n pé kí a mú àwọn wọ̀nyí joró fún oṣù márùn-ún, oró náà lára wọn sì dà bí oró àkekèé nígbà tí ó bá ta ènìyàn. Ní ọjọ́ wọnnì, àwọn ènìyàn náà yóò wá ikú, ṣùgbọ́n wọn kì yóò rí i lọ́nàkọnà, wọn yóò sì fẹ́ láti kú, ṣùgbọ́n ikú yóò máa sá fún wọn.”—Ìṣípayá 9:4-6.

10. (a) Àwọn wo ní pàtàkì ni ìyọnu náà dé bá, ipa wo ló sì ní lórí wọn? (b) Irú ìdálóró wo ló fà fún wọn? (Tún wo àlàyé ìsàlẹ̀ ìwé.)

¹⁰ Kíyè sí i pé kì í ṣàwọn èèyàn tàbí àwọn sàràkí sàràkí láàárín wọn, ìyẹn ‘ewéko àti àwọn igi ilẹ̀ ayé’ ni ìyọnu yìí kọ́kọ́ dé bá. (Fi wé Ìṣípayá 8:7.) Kìkì àwọn táwọn eéṣú náà ní láti pa lára ni àwọn tí kò ní èdìdì Ọlọ́run ní iwájú orí wọn, ìyẹn àwọn oníṣọ́ọ̀ṣì tí wọ́n sọ pé a ti fi èdìdì di àwọn ṣùgbọ́n tí ohun tó wà lákọọ́lẹ̀ pé wọ́n ṣe fi wọ́n hàn ní elékèé. (Éfésù 1:13, 14) Ìdí nìyẹn ló fi jẹ́ pé àwọn aṣáájú ìsìn àwọn oníṣọ́ọ̀ṣì làwọn eéṣú òde òní yẹn dojú àwọn ọ̀rọ̀ tó ń dáni lóró tó ń tẹnu wọn jáde kọ. Àbí ẹ ò rí i báwọn ọkùnrin ajọra-ẹni-lójú yẹn á ṣe máa joró tó nígbà tí wọ́n ń gbọ́ táwọn èèyàn Ọlọ́run kéde ní gbangba pé kì í ṣe pé wọ́n kùnà láti ṣamọ̀nà àwọn agbo wọn lọ sí ọ̀run nìkan ni ṣùgbọ́n àwọn fúnra wọn ò ní í débẹ̀!d Lóòótọ́, àfi bí ‘afọ́jú tó ń fọ̀nà han afọ́jú’!—Mátíù 15:14.

11. (a) Báwo ni àkókò táwọn eéṣú náà láṣẹ láti dá àwọn ọ̀tá Ọlọ́run lóró ti gùn tó, kí sì nìdí tá ò fi lè sọ pé àkókò yẹn kúrú? (b) Báwo ni oró náà á ṣe mú àwọn tí wọ́n ń dá lóró tó?

¹¹ “Oṣù márùn-ún” làwọn eéṣú náà fi dá wọn lóró. Àkókò yẹn ò wa dà bí ẹní kúrú bí? Bá a bá fojú eéṣú gidi wò ó, kò kúrú. Oṣù márùn-ún ṣàpèjúwe bí ẹ̀mí ọ̀kọ̀ọ̀kan àwọn kòkòrò yẹn ṣe máa ń gùn tó. Èyí fi hàn pé níwọ̀n ìgbà táwọn eéṣú òde òní yìí bá ṣì wà láàyè, wọ́n á máa ta àwọn ọ̀tá Ọlọ́run lọ ni ràì. Yàtọ̀ síyẹn, títa náà rorò tó bẹ́ẹ̀ débi táwọn èèyàn fi ń wá ikú. Lóòótọ́, a ò rí àkọsílẹ̀ kankan tó fi hàn pé ẹnikẹ́ni nínú àwọn táwọn eéṣú náà ta gbìyànjú láti pa ara wọn ní ti gidi. Ṣùgbọ́n gbólóhùn yẹn jẹ́ ká lè fojú inú wo bí títa ríro náà á ṣe pọ̀ tó—àfi bí ẹni pé àwọn àkekèé ń ta èèyàn fàì fàì. Ó dà bí ìyà tí Jeremáyà rí tẹ́lẹ̀ pé ó ń bọ̀ lórí àwọn ọmọ Ísírẹ́lì aláìṣòtítọ́ yẹn nígbà táwọn ará Bábílónì ajagunṣẹ́gun bá tú wọn ká, wọ́n á fẹ́ ikú ju ìyè lọ nígbà yẹn.—Jeremáyà 8:3; tún wo Oníwàásù 4:2, 3.

12. Kí nìdí tó fi jẹ́ pé oró nìkan la yọ̀ǹda fáwọn eéṣú náà láti dá àwọn aṣáájú ìsìn àwọn oníṣọ́ọ̀ṣì nípa tẹ̀mí, ṣùgbọ́n kí wọ́n má ṣe pa wọ́n?

¹² Kí nìdí tó fi jẹ́ pé oró nìkan la ní káwọn eéṣú yìí máa dá àwọn wọ̀nyí nípa tẹ̀mí kí wọ́n má ṣe pa wọ́n? Ègbé àkọ́kọ́ rèé nínú títú àwọn irọ́ àtàwọn ìkùnà àwọn oníṣọ́ọ̀ṣì fó. Ṣùgbọ́n nígbà tó bá yá, bí ọjọ́ Olúwa ti ń tẹ̀ síwájú, wọ́n ṣì ń bọ̀ wá kéde gbangba gbàǹgbà pé inú ipò òkú làwọn oníṣọ́ọ̀ṣì wà nípa tẹ̀mí. Ìgbà ègbé kejì ni ìdá mẹ́ta àwọn èèyàn náà máa kú.—Ìṣípayá 1:10; 9:12, 18; 11:14.

Àwọn Eéṣú Tá A Ti Dira Ogun Fún

13. Báwo làwọn eéṣú yẹn ṣe rí?

¹³ Ìrísí àwọn eéṣú yẹn mà pabanbarì o! Jòhánù ṣàpèjúwe ìrísí wọn pé: “Ìrí àwọn eéṣú náà sì jọ àwọn ẹṣin tí a múra sílẹ̀ fún ìjà ogun; àti ní orí wọn ni ohun tí ó rí bí adé tí ó dà bí wúrà wà, ojú wọn sì dà bí ojú ènìyàn, ṣùgbọ́n wọ́n ní irun bí irun obìnrin. Eyín wọn sì dà bí ti kìnnìún; wọ́n sì ní àwo ìgbàyà bí àwo ìgbàyà irin. Ìró ìyẹ́ apá wọn sì dà bí ìró àwọn kẹ̀kẹ́ ẹṣin ti ọ̀pọ̀ ẹṣin tí ń sáré lọ sínú ìjà ogun.”—Ìṣípayá 9:7-9.

14. Kí nìdí tí àpèjúwe Jòhánù nípa ìrísí àwọn eéṣú náà fi bá àwùjọ àwọn Kristẹni tá a mú sọ jí lọ́dún 1919 mu?

¹⁴ Èyí ṣàpèjúwe bí àwùjọ àwọn Kristẹni adúróṣinṣin tá a mú sọ jí lọ́dún 1919 ṣe rí. Àfi bí ẹṣin, wọ́n ti ṣe tán ogun, wọ́n hára gàgà láti jà fún òtítọ́ bí àpọ́sítélì Pọ́ọ̀lù ṣe ṣàpèjúwe ìjà náà. (Éfésù 6:11-13; 2 Kọ́ríńtì 10:4) Jòhánù ráwọn nǹkan tó rí bí adé wúrà lórí wọn. Kò ní í bójú mu fún wọn láti ní adé gidi nítorí wọn ò tíì bẹ̀rẹ̀ sí í ṣàkóso nígbà tí wọ́n ṣì wà lórí ilẹ̀ ayé. (1 Kọ́ríńtì 4:8; Ìṣípayá 20:4) Ṣùgbọ́n lákòókò yẹn lọ́dún 1919, ọlá ọba ti hàn lára wọn. Arákùnrin Ọba náà ni wọ́n, adé wọn sì ń dúró dè wọ́n lọ́run bí wọ́n bá lè jẹ́ olóòótọ́ títí dópin.—2 Tímótì 4:8; 1 Pétérù 5:4.

15. Ní tàwọn eéṣú náà, kí ni ìwọ̀nyí tọ́ka sí (a) àwo ìgbàyà irin? (b) ojú bíi ti èèyàn? (d) irun bíi tobìnrin? (e) eyín bíi ti kìnnìún? (ẹ) pípa ọ̀pọ̀ ariwo?

¹⁵ Nínú ìran náà, àwọn eéṣú náà ní àwo ìgbàyà onírin, tó ń ṣàpẹẹrẹ ìwà òdodo tí kò lè fọ́. (Éfésù 6:14-18) Pẹ̀lúpẹ̀lù wọ́n ní ojú èèyàn, èyí ń tọ́ka sí ànímọ́ ìfẹ́, níwọ̀n bí Ọlọ́run, ẹni tí ó jẹ́ ìfẹ́, ti ṣe èèyàn ní àwòrán rẹ̀. (Jẹ́nẹ́sísì 1:26; 1 Jòhánù 4:16) Irun wọn gùn bíi tobìnrin, èyí tó jẹ́ àpẹẹrẹ pé wọ́n ń tẹrí ba fún Ọba wọn, tí í ṣe áńgẹ́lì ọ̀gbun àìnísàlẹ̀ náà. Eyín wọn sì jọ eyín kìnnìún. Kìnnìún máa ń fi eyín ẹ̀ fa ẹran ya. Látọdún 1919 wá, ẹgbẹ́ Jòhánù tún ti gba agbára láti jẹ oúnjẹ líle látinú ọ̀rọ̀ Ọlọ́run, pàápàá àwọn òtítọ́ nípa Ìjọba Ọlọ́run tí “Kìnnìún tí ó jẹ́ ti ẹ̀yà Júdà,” Jésù Kristi, ń ṣàkóso. Bí kìnnìún ti ṣàpẹẹrẹ ìgboyà gẹ́lẹ́, ìgboyà ńlá ló gbà láti lóye ọ̀rọ̀ ìkéde yìí, ká sì tẹ́ ẹ̀ jáde ká tó wá pín in káàkiri ilẹ̀ ayé. Àwọn eéṣú ìṣàpẹẹrẹ yìí ti pa ariwo púpọ̀, bí “ìró àwọn kẹ̀kẹ́ ẹṣin ti ọ̀pọ̀ ẹṣin tí ń sáré lọ sínú ìjà ogun.” Gẹ́gẹ́ bí àpẹẹrẹ àwọn Kristẹni ọ̀rúndún kìíní tí wọ́n ń tẹ̀ lé, wọn ò ní in lọ́kàn láti dákẹ́ jẹ́ẹ́.—1 Kọ́ríńtì 11:7-15; Ìṣípayá 5:5.

16. Kí ni ìtumọ̀ níní táwọn eéṣú náà ní ‘ìrù, tí wọ́n sì ń tani bí àkekèé’?

¹⁶ Ìwàásù yìí kọjá ọ̀rọ̀ ẹnu lásán! “Pẹ̀lúpẹ̀lù, wọ́n ní ìrù, wọ́n sì ń tani bí àkekèé; àti ní ìrù wọn ni ọlá àṣẹ wọn wà láti ṣe àwọn ènìyàn náà lọ́ṣẹ́ fún oṣù márùn-ún.” (Ìṣípayá 9:10) Kí lèyí lè túmọ̀ sí o? Báwọn Ẹlẹ́rìí Jèhófà ṣe ń ṣe iṣẹ́ ìwàásù Ìjọba Ọlọ́run tí wọn ń ṣe, wọ́n ń fi ọ̀rọ̀ ẹnu àtàwọn ìwé tí wọ́n tẹ̀ sọ àṣẹ ọ̀rọ̀ tó wá látinú Bíbélì tí í ṣe Ọ̀rọ̀ Ọlọ́run. Ọ̀rọ̀ tí wọ́n ń kéde ní oró bíi ti àkekèé nítorí wọ́n ń kìlọ̀ nípa ọjọ́ ẹ̀san Jèhófà tó ń sún mọ́lé. (Aísáyà 61:2) Kí gbogbo àwọn eéṣú tẹ̀mí yìí tó parí ìgbésí ayé wọn, iṣẹ́ tí Ọlọ́run pàṣẹ fún wọn, pé kí wọ́n máa polongo àwọn ìdájọ́ òun, á parí—oró ńlá ló máa jẹ́ fún gbogbo àwọn asọ̀rọ̀-òdì tí wọ́n jẹ́ ọlọ́rùn líle.

17. (a) Kí ni nǹkan tí wọ́n kéde ní àpéjọ àgbègbè àwọn Akẹ́kọ̀ọ́ Bíbélì tọdún 1919, èyí tí yóò máa mú kí oró ìjẹ́rìí wọn gbóná janjan sí i? (b) Báwo ni wọ́n ṣe dá àwùjọ àwọn àlùfáà lóró, báwo sì làwọn àlùfáà ṣe dáhùn padà?

¹⁷ Ayọ̀ agbo eéṣú yẹn kún àkúnwọ́sílẹ̀ nígbà tí wọ́n kéde ní àpéjọ àgbègbè wọn lọ́dún 1919 pé ìwé ìròyìn tuntun kan, ìyẹn The Golden Age ti jáde. Ẹ̀ẹ̀mejì lóṣù ni ìwé ìròyìn yìí á máa jáde, ìdí tí wọ́n sì fi ń tẹ̀ ẹ́ jáde ni láti mú kí oró ìjẹ́rìí wọn múná janjan sí i.e Ìtẹ̀jáde rẹ̀ Nọnba 27, ti September 29, 1920, túdìí àṣírí bí ẹgbẹ́ àwọn àlùfáà ṣe ń fẹ̀jẹ̀ sínú tutọ́ funfun jáde lórí inúnibíni tí wọ́n ṣe sáwọn Akẹ́kọ̀ọ́ Bíbélì lórílẹ̀-èdè Amẹ́ríkà láàárín ọdún 1918 sí 1919. Jálẹ̀ ọdún 1920 wọ ọdún 1930, ìwé ìròyìn The Golden Age tún dá àwùjọ àwọn àlùfáà lóró sí i nípasẹ̀ àwọn àpilẹ̀kọ àtàwọn àwòrán ẹ̀fẹ̀ tó ń tani bí oró, èyí tó túdìí àṣírí báwọn àlùfáà ṣe fi àrékérekè yọjúràn sí ìṣèlú, àti àdéhùn táwọn Kátólíìkì ṣe pẹ̀lú àwọn aláṣẹ bóofẹ́bóokọ̀ ti ìjọba Aláṣẹ Oníkùmọ̀ àti Násì. Èyí mú kí àwùjọ àwọn àlùfáà “fi òfin dìmọ̀ ìwà ìkà” wọ́n sì kó àwọn èèyàn kéèyàn sòdí láti hùwà ipá sáwọn èèyàn Ọlọ́run.—Sáàmù 94:20.

Wọ́n Kìlọ̀ Fáwọn Olùṣàkóso Ayé

18. Iṣẹ́ wo ni àwọn eéṣú náà ní láti ṣe, kí ló sì ṣẹlẹ̀ nígbà tí ìró kàkàkí karùn-ún dún?

¹⁸ Àwọn eéṣú òde òní ní iṣẹ́ pàtàkì láti ṣe. Wọ́n ní láti wàásù ìhìn rere Ìjọba náà. Wọ́n ní láti túdìí àwọn ìṣìnà. Wọ́n ní láti wá àwọn àgùntàn tó sọ nù rí. Báwọn eéṣú náà ti ń bá iṣẹ́ wọ̀nyí lọ, ó di dandan fún ayé láti kíyè sí i. Ní ìgbọràn sí ìró kàkàkí àwọn áńgẹ́lì, ẹgbẹ́ Jòhánù ti ń bá a lọ láti tú àwọn oníṣọ́ọ̀ṣì fó pé wọ́n yẹ fún ìdájọ́ Jèhófà. Nígbà tí kàkàkí karùn-ún dún, wọ́n tẹnu mọ́ apá kan pàtó lára ìdájọ́ wọ̀nyí ní àpéjọ àgbègbè kan táwọn Akẹ́kọ̀ọ́ Bíbélì ṣe nílùú London, nílẹ̀ Gẹ̀ẹ́sì, ní May 25 sí 31, ọdún 1926. Wọ́n tẹ́wọ́ gba ìpinnu kan níbẹ̀, èyí tí wọ́n pè ní “Ẹ̀rí fún Àwọn Olùṣàkóso Ayé,” wọ́n sì gbọ́ àsọyé kan fún gbogbo èèyàn ní gbọ̀ngàn Royal Albert Hall lórí “Ìdí Táwọn Agbára Ayé Fi Ń Ta Gbọ̀n-ọ́n-gbọ̀n-ọ́n—Ojútùú Rẹ̀.” Ọ̀kan nínú ìwé ìròyìn tó gbajúmọ̀ jù lọ nílùú London gbé ẹ̀kún rẹ́rẹ́ ọ̀rọ̀ tó wà nínú ìpinnu àti àsọyé yẹn jáde lọ́jọ́ kejì lẹ́yìn tí àpéjọ náà parí. Lẹ́yìn náà, agbo eéṣú náà pín àádọ́ta mílíọ̀nù [50,000,000] ẹ̀dà ìwé àṣàrò kúkúrú tó gbé ìpinnu yẹn jáde káàkiri ayé. Àbí ẹ ò rí i pé oró ńlá ló dá àwùjọ àwọn àlùfáà! Ọ̀pọ̀ ọdún lẹ́yìn náà làwọn èèyàn ní ilẹ̀ Gẹ̀ẹ́sì fi ń sọ̀rọ̀ nípa ìtúfó tó ń tani yìí.

19. Ohun ìjà mìíràn wo làwọn eéṣú ìṣàpẹẹrẹ náà tún rí gbà, kí sì ló ní í sọ nípa ìpolongo ìlú London náà?

¹⁹ Ní àpéjọ àgbègbè yìí, àwọn eéṣú ìṣàpẹẹrẹ náà tún gba ohun ìjà mìíràn, ìyẹn ìwé tuntun kan tí àkòrí rẹ̀ ń jẹ́ Idande. Ìjíròrò kan wà nínú rẹ̀ tó dá lórí Ìwé Mímọ́ nípa àmì tó fi hàn pé a ti bí ‘ọmọ ọkùnrin’ náà tó jẹ́ ìjọba, ìyẹn Ìjọba ọ̀run ti Kristi, látọdún 1914. (Mátíù 24:3-14; Ìṣípayá 12:1-10) Lẹ́yìn náà, ó gbé ìpolongo kan jáde èyí táwọn àlùfáà mẹ́jọ tí wọ́n sọ pé wọ́n jẹ́ “ara àwọn oníwàásù tó lókìkí jù lọ lágbàáyé,” fọwọ́ sí, tí wọ́n sì tẹ̀ nílùú London lọ́dún 1917. Àwọn àlùfáà náà wá látinú àwọn ìsìn tó lókìkí jù lọ nínú àwọn ẹ̀ka ìsìn Pùròtẹ́sítáǹtì, ìyẹn látinú ijọ Onítẹ̀bọmi, ìjọ Congregational, ìjọ Presbyterian, ìjọ Episcopalian, àti ìjọ Mẹ́tọ́díìsì. Nínú ìpolongo tí wọ́n fọwọ́ sí yìí, wọ́n pòkìkí pé “yánpọnyánrin tó ń lọ lọ́wọ́ yìí fi hàn pé òpin àkókò àwọn Kèfèrí ti dé” àti pé “ìṣípayá Olúwa la lè retí nígbàkigbà.” Dájúdájú, èyí fi hàn pé àwọn àlùfáà yìí ti rí àmì wíwàníhìn-ín Jésù kedere! Ṣùgbọ́n ṣé wọ́n fẹ́ láti ṣe ohunkóhun nípa rẹ̀ bí? Ìwé náà, Idande, sọ fún wa pé: “Eyiti o yani lẹnu julọ nínú ọran na ni eyi pe àwọn ẹni gãn ti o fi ọwọ si ọrọ na tun yipada lẹhinna nwọn si kọ̀ àwọn ẹri ti o tọka si pe a wà li opin aiye àti ni ọjọ dide Olúwa lẹ̃keji.”

20. (a) Kí ni àwùjọ àwọn àlùfáà ti yàn láti ṣe lórí ọ̀ràn agbo eéṣú náà àti Ọba wọn? (b) Ta ni Jòhánù sọ pé ó wà lórí agbo eéṣú náà, kí sì ni orúkọ rẹ̀?

²⁰ Kàkà kí wọ́n kéde Ìjọba Ọlọ́run tó ń bọ̀, àwùjọ àlùfáà àwọn oníṣọ́ọ̀ṣì ti yàn láti fara mọ́ ayé Sátánì. Wọn ò fẹ́ láti ní ìpín kankan pẹ̀lú agbo eéṣú náà àti Ọba wọn, àwọn tí Jòhánù sọ nípa wọn báyìí pé: “Wọ́n ní ọba kan lórí wọn, áńgẹ́lì ọ̀gbun àìnísàlẹ̀ náà. Lédè Hébérù, orúkọ rẹ̀ ni Ábádónì [tó túmọ̀ sí “Ìparun”], ṣùgbọ́n lédè Gíríìkì, ó ní orúkọ náà Ápólíónì [tí ó túmọ̀ sí “Apanirun”].” (Ìṣípayá 9:11) Gẹ́gẹ́ bí “áńgẹ́lì ọ̀gbun àìnísàlẹ̀” àti “Apanirun,” Jésù ti tú ègbé tó ń kó ìyọnu báni sórí àwọn oníṣọ́ọ̀ṣì lóòótọ́. Àmọ́, ó kù ni ìbọn ń ró!

[Àwọ̀n Àlàyé ìsàlẹ̀ ìwé]

[Àwòrán tó wà ní ojú ìwé 143]

Nígbà tí wọ́n fun kàkàkí karùn-ún, ó mú èkíní nínú ègbé mẹ́ta náà wá

[Àwòrán tó wà ní ojú ìwé 146]

Àwọn ọfà rẹ mú ní ọkàn-àyà àwọn ọ̀tá Ọba. (Sáàmù 45:5) Àwòrán ẹ̀fẹ̀ yìí, pẹ̀lú ọ̀rọ̀ yìí, jẹ́ àpẹẹrẹ ọ̀pọ̀lọpọ̀ irú ẹ̀ tá a tẹ̀ jáde láàárín ọdún 1930 sí 1940 èyí tó ta “àwọn èèyàn tí kò ní èdìdì Ọlọ́run”

[Àwọn àwòrán tó wà ní ojú ìwé 147]

Gbọ̀ngàn Royal Albert Hall, níbi tí wọ́n ti mú ìwé náà Idande jáde tí wọ́n sì ti tẹ́wọ́ gba ìpinnu náà “Ẹ̀rí fún Àwọn Olùṣàkóso Ayé”