Buku Yimmuadi yi Samueli
19 Bosi bazabikisa Joabe mambu amama: “Ntinu widi mu kudila ayi widi mu kukuana mu kibila ki lufua lu Absaloni.” 2 Mu kibila akiokio, kheti batu baba ku khonzo Davidi banunga mvita, vayi bayiza ba mu kiunda bo bazaba ti ntinu wuba beni mu kiunda mu kibila ki lufua lu muanꞌandi. 3 Mu kilumbu beni, masodi ma Davidi mavutuka mu kiunda dedi bo masodi babe tina mvita bambelanga mu kiunda ayi mu zitsonyi. 4 Ntinu wufuka busu ayi wutatamana kutuba mambu amama mu mbembu yinangama: “Muanꞌama Absaloni, Absaloni muanꞌama, muanꞌama.”
5 Bosi Joabe wuyenda kuba ntinu ayi wunkamba: “A mfumu ngie widi mu kufuisa tsoni masodi babe vukisa luzingu luaku, lu bana baku boso, lu bakazi ayi bimasi biaku. 6 A mfumu, ngie wunzolanga batu ba kulendanga ayi wunlendanga batu ba kuzolanga, kibila bubu ngie mamonisa ti zimfumu zi masodi maku ayi masodi maku moso basi ko luvalu. Kibila yidi lufiatu ti boti befu tube fua ayi Absaloni bevuka, khanu kuidi ngiewu mamoso madi kuandi buboti. 7 Buabu lemvuka, basika muingi wukindisa bisadi biaku, kibila yinleva phesi mu dizina di Yave ti ngie kumanga vanga mawu, builu abubu, baboso bankuiza kuyekula ayi mawu mankuiza luta kutuadisa ziphasi kena mambu moso maphasi mana viokila, tona mu butoko buaku. 8 Mu phila ayoyo, ntinu wubasika ayi wuyenda kue kala va muelu divula. Bosi bazabikisa mambu amama kuidi dikabu: “Ntinu weka wukala va ndeku muelu wu divula.” Mu kibila akiokio, dikabu dioso bayenda vantuala ntinu.
Vayi masodi ma Isaeli batina ayi bayenda mu zinzo ziawu. 9 Mu mimvila mioso mi Isaeli, batu baba tubanga mambu amama: “Ntinu wutuvukisa mu mioko mi basi Filistea ayi mu mioko mi zimbeni zitu, vayi nandi wutinizi ayi wuyendizi ku tsi yinkaka mu kibila ki muanꞌandi Absaloni. 10 Ayi Absaloni no tusola muingi ka tuyadila wufuidi mu mvita. Buabu kibila mbi tummanga kuvangila dioso diambu, muingi ntinu kavutuka?
11 Ntinu Davidi wufila thumu ayiyi kuidi zinganga nzambi Zadoki ayi Abiatali: “Kambanu mambu amama kuidi bakulutu ba basi Yuda: ‘Minu yiyuwizi mambu basi Isaeli badi mu kukoluka. Buabu kibila mbi benu mu khambu tuamina ntuala muingi kuvutula ntinu ku nzo? 12 Benu muidi zikhomba ziama, mvila wumueka tubutukila. Kibila mbi mu khambu tuamina ntuala muingi kuvutula ntinu ku nzo? 13 Mvandi lufueti kamba mambu amama kuidi Amasa: ‘Ngie wisi ko khombꞌama? Yinleva phesi mu dizina di Nzambi ti, minu yinkuiza kubieka mfumu masodi mama va mvingi Joabe.’”
14 Mu phila ayoyo, ntinu Davidi wuvanga basi Yuda boso muingi bamfiatila. Ayi bawu bamfila thumu ayiyi: “Vutuka ku nzo na batu boso badi yaku.”
15 Bo ntinu kavitila ku muila Yolidani, basi Yuda bavitila ku Gilgal muingi kudengana ntinu ayi kunsadisa kusabuka muila Yolidani. 16 Mvandi Simei muana Gera muisi Benyamini, wunkalanga ku Baurim, wuyenda mu thinu na babakala ba basi Yuda muingi kue dengana ntinu Davidi. 17 Nandi wuba na kivevi ki babakala ba mvila wu benyamini. Ayi mvandi Ziba kisadi ki Sauli na 15 di bana bandi kubunda mvandi 20 di bisadi biandi, baba na Simei. Bawu bayenda mu nsualu ku muila wu Yolidani ava Ntinu kavitila. 18 Ziba wusabuka muila muingi kusadisa batu bankalanga ku nzo ntinu ayi kuvanga mamoso ntinu kantomba. Vayi bo ntinu kaba belama kutaba muila wu Yolidani Simei muana Gera wufukama vantualꞌandi. 19 Nandi wukamba ntinu: “Ndevukila, bika kutebukila monyo mambu mambi yikuvangila mu kilumbu ngie mfumu wubasika ku Yelusalemi ayi bika kufhundisa mu mawu. 20 Minu yinkikinina ti nzimbala yivanga. Diawu bubu, minu mutu wutheti mu dikanda di Yozefi yibe kuiza kudengana.”
21 Muna thangu beni, Abizai muana wu Zeruia wutuba: “Simei kafueti fua kibila nandi wusinga mutu Yave kasola”. 22 Vayi Davidi wutuba: “Kibila mbi benu bana ba Zeruia mu nkuazukila mu mawu? Muntomba kuthombisa mambu? Vafueti fua mutu bubu ku Isaeli? Bubu minu yima vutuka kubue ba ntinu ku Isaeli.” 23 Diawu ntinu wukamba Simei: “Ngiewu wisinkuiza fua ko.” Ayi ntinu, wuleva phesi mu mawu.
24 Mefibozeti ntekulu wu Sauli mvandi wuyenda kue dengana ntinu. Nandi kasa lava ko malu mandi, kasa ludika ko mayedu mandi, ni kusukula bikhutu tona kilumbu ntinu kayenda nati kilumbu kavutuka mu ndembama. 25 Bo Mefibozeti kavitila ku Yelusalemi muingi kedengana ntinu, Ntinu wunyuvula: “Mefibozeti, kibila mbi wukhambu kuendila yama?” 26 Nandi wumvutudila: “A mfumu, kisadi kiama wuphuna. Mu kumona ti yidi malu mabela diawu yikambila kisadi kiama: ‘Yinkuiza tuma bakubika phundꞌama muingi yenda na ntinu’. 27 A ntinu nandi wuphunina mambu kuidi ngiewu, vayi ngie widi buka mbasi yi Nzambi yikiedika. Diawu a mfumu vanga moso mambu wutidi. 28 Ngie ntinu wuba luaku lu kuvonda basi dikanda dioso di khayꞌama vayi kheti bobo, ngiewu wuphana luaku lu kudianga ku nzoꞌaku. Buabu nsua mbi yidi muingi kubue dinda binkaka kuidi ngiewu ntinu?”
29 Vayi ntinu wunkamba: “Bika kubue koluka ni diambu, kibila makani mama madi ngiewu ayi Ziba mu fueti kabana nsitu.” 30 Diawu Mefibozeti wukamba ntinu: “bika kabonga nsitu woso kibila ngie mfumuꞌama ntinu, bevutuka mu ndembama ku nzo.
31 Barzilai musi Ngileadi wunanguka ku Rogelim muingi kue vekisa ntinu nate ku muila Yolidani. 32 Barzilai wuba kiboba ayi wuba 80 di mimvu. Nandi wuba beni busina ayi wuvana ntinu bidia bo kaba ku Maanaim. 33 Ntinu wukamba Barzilai: “Tuenda ku Yelusalemi minu yinkuiza kukiebanga.” 34 Vayi Barzilai wukamba ntinu: “Minu yima nunina ngolo, kibila mbi yifueti kuendila na ntinu ku Yelusalemi? 35 Minu yeka 80 di mimvu, yisiala bue nunga ko kusuasisa mamboti ayi mambi, minu kisadi kiaku yisiala bue mona ko lueki mu bidia, biuma yinnua ayi yisiala bue mona ko lueki lu kukuwa minkunga. Diawu minu kukuenda yaku, kisalu kuandi to yinkuiza kubuela. 36 Minu yidi mu mayangi mu kununga kuiza vekisa mfumu nate ku muila wu Yolidani. Buabu kibila mbi wuntomba kuphanina mfutu awowo? 37 Lemvuka bika minu kisadi kiaku yivutuka ayi bika yifuila ku divula yibutukila, kuziamina tatꞌama ayi mamama. Vayi a mfumuꞌama nata Kimã kisadi kiaku ayi mvangila moso mambu wutidi.”
38 Bosi ntinu wunkamba: “Minu yennata Kimã ayi yinkuiza mvangila mambu moso ngiewu wuntomba yimvangila, mvandi yinkuiza kuvangila mambu moso wuntomba.” 39 Dikabu dioso ditona kusabuka muila wu Yolidani. Bo ntinu kaba belama kusabuka, wuvana Barzilai besu, wunsakumuna ayi Barzilai wuvutuka ku nzo. 40 Bo ntinu kasabuka ayi kayenda ku Gilgal, Kimã mvandi wuyenda yandi. Babakala boso ba basi Yuda ayi ndambu yi babakala ba basi Isaeli mvandi basabuka muila na ntinu.
41 Bosi babakala boso ba Isaeli bayenda ke ntinu ayi banyuvula: “Kibila mbi zikhomba zitu basi Yuda babe kuendila kue landila ngiewu ntinu ayi basi dikanda diaku, na masodi maku moso ayi ku musadisa kusabuka muila wu Yolidani?” 42 Babakala boso ba basi Yuda batambudila basi Isaeli: “Tube vangila mawu kibila ntinu wubutukila mu mvilꞌitu. Nandi kasa tuvana ko bidia ayi kasa tuvana ko nkhailu mu mambu tube vanga. Buabu kibila mbi benu mundasukila mu mawu?”
43 Vayi babakala ba basi Isaeli batambudila babakala ba mvila wu Yuda: “Ku khonzoꞌitu kuidi 10 di mimvila, diawu befu tulutidi vua ntinu Davidi kena benu. Buabu kibila mbi mube tulenzila? Khanu befu batu batheti tube kue landa ntinu ayi kumvutula ku nzo.” Vayi basi Yuda, bawu banunga mu ziphaka bafindana na basi Isaeli.