Deutelonomi
29 Amama mawu mambu madi mu luwawanu Yave kakamba Mose kavanga na dikabu di Isaeli ku ntoto wu Moabi, kubotula kuandi luwawanu kavanga yawu ku Horebe.
2 Bosi Mose wukutikisa dikabu di Isaeli ayi wuba kamba: “Benu lumona mambu moso Yave kavanga ku Ngipiti, mambu kavangila Falawo, bisadi biandi ayi batu boso banzingilanga kuna. 3 Benu lumona bidimbu, zitsingulu ayi mangitukulu Nzambi kavanga. 4 Vayi Yave wu lutula nkaku muingi lubika visa, kumona ayi kukuwa mawu nate mu kilumbu akiki. 5 Bo minu yaba ku lutuadisanga ku thandu mu 40 di mimvu, bikhutu binu bisa bakuka ko ayi zisandali zinu zisa vavuka ko. 6 Benu luabasa dianga ko mapha, luabasa nuanga ko vinyu ne malavu mankaka mankolusuanga, muingi luzaba ti minu yidi Yave Nzamb′inu.’ 7 Bosi benu lutuka ku kibuangu akiki ayi Siom ntinu wu Hesbom ayi Ogue ntinu wu Bazan, bayiza ku tudengana muingi ba tunuanisa, vayi befu tuba nunga. 8 Befu tuvua ntoto′awu ayi tuvana wawu muingi wuba kiuka kuidi mvila wu Rubem, wu Gadi ayi ndambu makanda mu mvila wu Manase. 9 Diawu, lundanu ayi tumukinanu mambu moso madi mu luwawanu alulu, muingi lubaka ndandu mu luzingu.
10 “Bubu, benu boso luidi vantuala Yave, kuba kuandi bakulutu ba mimvila, bakulutu ba dikabu, zimfumu zi masodi, babakala boso badi mu dikabu di Isaeli, 11 bana ba bilezi, bakazi binu ayi zinzenza zinkalanga yinu, kubunda mvandi bo ba lutebilanga bisuadi* ayi batu ba lutekilanga nlangu. 12 Benu luididi avava, muingi kukanikisa ti lunkuiza dukisa luwawanu luidi mu kuvanga na Yave Nzamb′inu ayi Yave mvandi widi mu kuleva phesi ti wunkuiza dukisa luwawanu kadi mu kuvanga yinu bubu, 13 muingi luba dikabu diandi ayi nandi kaba Nzamb′inu, dedi bo ka lukanikisila ayi kalevila phesi kuidi zikhaya zinu Abalahami, Izaki ayi Yakobi.
14 Bakana ko to kuidi benu yimvanga luwawanu alulu ayi yinlevila phesi, 15 vayi yimvanga luawu kuidi benu luidi yitu vava bubu vantuala Yave ayi kuidi bankaka bakhambulu yitu vava bubu. 16 (Kibila benu luzebi buboti buidi luzingu luinu lubela bo luaba kalanga ku Ngipiti ayi mambu lumonikina mu viage bo luvioka mu bizunga bi makabu mawombo. 17 Ayi benu lumona bitumba biawu bi khenya bivangulu mu mabaya, mamanya, palata ayi mu wola. 18 Diawu, banu keba keba muingi va khat′inu vabika monika ne dibakala, ne nkietu, dikanda voti mvila, wumbanda mbusa Yave muingi kusambidila zinzambi zi makabu amomo ayi muingi ne mutu kabika ba buka kititi ki ndudi ayi kiyimbu.
19 “Woso mutu makuwa mambu amama tuma levila phesi ayi na kutona kukinyemisa, mu kutuba: ‘Yinkuiza baka ndembama, kheti minu kuvangila mambu mu phila yinyindudila,’ ayi na kutuadisa ziphasi kuidi naveka ayi kuidi bankaka, 20 Yave kalasa ba ko wukubama muingi kunlemvukila. Yave wala dasukila mutu beni ayi zitsingulu zioso zidi zisonama mu buku ayiyi, ziala kunkuizila ayi Yave wala kubula dizina diandi ayi balasa bue kuntebukilanga ko monyo. 21 Bosi Yave wala kumbotula va khati mimvila mioso mi Isaeli, muingi naveka katovuka zitsingulu zi luwawanu zidi zisonama mu buku ayiyi yi Minsiku.
22 “Bo zimbandu zinkuiza zi bana binu ayi zinzenza zinkalanga kinanu bala mona zitsingulu zi ntoto awuwu, ayi zimbela Yave kankuiza lutuadisa— 23 sofolo,* tsalu ayi mbazu biala vanga muingi ntoto woso wubika ba mbozi ne kumena bititi, dedi bo Yave kasingila divula di Sodoma, Ngomola, Admá ayi Zeboim mu kibila ki nganzi′andi, 24 bawu ayi makabu moso mankaka bala tuba: ‘Kibila mbi Yave kavangidi mambu amomo ku ntoto awuwu? Mambu mbi mamvengi muingi nandi kaba mu nganzi yiwombo?’ 25 Bawu bala tuba: ‘Kibila basa tumukina ko luwawanu Yave Nzambi yi zikhaya ziawu kavanga yawu, bo kaba kula ku ntoto wu Ngipiti. 26 Vayi bawu babuongimina kuawu zinzambi zinkaka, zinzambi zio bakhambu zaba ayi zio baba kandimina kubuongimina. 27 Diawu Yave kaba fuemina ayi katuadila zitsingulu zioso zidi zisonama mu buku ayiyi, ku ntoto awuwu. 28 Ayi Yave wuba botula ku ntoto awuwu mu kibila ki nganzi′andi ayi kaba natina ku ntoto wunkaka wo badi mu kuzingila bubu.’
29 Yave Nzamb′itu, zebi mambu moso masuama, vayi nandi wuzabikisa kuidi befu ayi bana bitu mu zithangu zioso mambu mo nandi katomba kutuzabikisa, muingi befu tutumukina mambu moso madi mu Minsiku amimi.