Mintuadisi

15 Bo thangu yi kuvela trigu yifuana, Sansão wuyetala nkazi′andi ayi wunata khombo yimueka. Nandi wukamba kikuekizi kiandi: “Yintomba kukota ku kivinga ki nkazi′ama.” Vayi kikuekizi kiandi wumanga. 2 Kikuekizi ki Sansão wutuba: “Minu yimuena ti ‘ngie wuzolanga ko nkazi′aku.’ Diawu yinkuedisidi kuidi wumueka mu babakala baba yaku mu nkungi. Vayi minu yidi muana wunkaka wu kilezi ayi nandi lutidi kitoko, nkuela kuaku.” 3 Vayi Sansão wutuba: “Minu yisinkuiza ba ko fotu mu mambu yemvangila basi Filistea.”

4 Bosi Sansão wubuila 300 di miḿbaku ayi wukanga miḿbaku miodi miodi mu minkila miawu, wutula mvandi mu minkila beni bisuadi. 5 Bosi wutatika mbazu mu bisuadi beni kakanga mu minkila ayi wubikidila miḿbaku beni mu zitsola zi basi Filistea. Mu phila ayoyo, nandi wuvika biabioso kuba kuandi mbongu yo bavela, bakanga mu minko ayi mbongu yo bakhambu vela. Mvandi wuvika minti mioso mi makundi ma vinyu ayi mi makundi ma olive.

6 Basi Filistea baba kuyikuvusa: “Nani mavanga mambu amomo?” Bosi bazaba ti Sansão kikuekizi ki musi Timina, nandi wuvanga mambu amomo, kibila kikuekizi kiandi wuvana nkazi Sansão kuidi dibakala dinkaka.” Mu phila ayoyo, basi Filistea bayevika nkazi Sansão ayi tat′andi. 7 Sansão wuba kamba: “Mu kumona ti benu luma vanga mambu amomo, minu yala tatamana kulunuanisa nate yala mana kuluvonda. 8 Bosi nandi wunuanisa basi Filistea ayi wuvonda bawombo mu bawu. Bo kamana kuvanga mawu, nandi wuyenda ku khati dimanya di Etan.

9 Buviokila thangu, masodi ma basi Filistea batombuka ku Yuda ayi bayezungidila divula di Leí. 10 Ayi basi Yuda bayuvula masodi ma basi Filistea: “Kibila mbi benu luntombila kutunuanisina?” Basi Filistea baba vutudila: “Befu tuntomba kubuila Sansão, muingi tumvangila momawu mambu katuvangidi.” 11 Diawu 3.000 di babakala ba basi Yuda bayenda ku khati dimanya di Etan ko Sansão kayesuamina ayi bankamba: “Kibila mbi mavangila mambu amomo? Ngie matutuadisa ziphasi. Wusa zaba ko ti basi Filistea bawu badi mu kutuyadila?” Sansão wuba kamba: “Minu yima bavangila momawu mambu bawu baphangila.” 12 Vayi bawu bankamba: “Befu tuma kuiza kubuila muingi tukuvana kuidi basi Filistea.” Sansão wuba kamba: “Levanu phesi ti luisinkuiza phonda ko.” 13 Bawu bankamba: “Befu kukanga to tua kukanga muingi tu kunata kuidi basi Filistea, vayi tuisi kuvonda ko.”

Diawu, bawu babonga minsinga miodi bankanga ayi bambasisa ku khati dimanya beni. 14 Bo Sansão kavitila ku Leí ayi bo basi Filistea bammona, bawu bayangalala beni. Bosi Yave wuvana Sansão mangolo ayi minsinga bankangila miyiza ba buka minsinga mi linho bamvika ku mbazu ayi minsinga beni miduka mu mioko miandi. 15 Bosi Sansão wubonga mvesi wu masokoto ma phunda. Ayi mu mvesi beni, nandi wuvonda 1.000 di masodi ma basi Filistea. 16 Bosi Sansão wutuba mambu amama:

“Mu kusadila mvesi wu masokoto ma phunda, yinungini kuvonda zimbeni ayi kukhupika zinyitu ziawu mu bikhuku.

Ayi mu kusadila mvesi beni, yivondizi 1.000 di masodi.”

17 Bo kamana kutuba mambu amomo, Sansão wuloza mvesi beni ayi wuvana kibuangu beni dizina Ramati-Leí. 18 Bosi Sansão wuyiza ba beni phuila yi nlangu, diawu kadindila lusadusu kuidi Yave mu kutuba: “Ngie mavukisa kisadi kiaku mu mioko mi zimbeni, buabu bukiedika ti wekumbika yifuila mu phuila yi nlangu ayi kufuila mu mioko mi batu bakhambu kubuongiminanga?” 19 Mu kibila akiokio Nzambi wubasisa nlangu mu dibulu kazibula ku Leí. Bo Sansão kanua nlangu wubasika mu dibulu beni, nandi wuyiza baka mangolo. Diawu kavanina kibuangu beni dizina En-Hakoré, kibuangu beni kidi ku Leí nate bubu.

20 Sansão wutuadisa basi Isaeli mu 20 di mimvu, mu thangu basi Filistea baba kuba yadilanga.