Mintuadisi
19 Mu thangu beni, ku Isaeli kusa ba ko ntinu. Ayi dibakala dimueka musi Levi wukuela nkietu musi Betelemi yidi ku Yuda. Nandi wuyenda kue zingila ku kinanu, ku kibuangu kidi miongo ki mvila wu Efraim. 2 Vayi nkietu beni kasa ba ko wukuikama mu nnuni′andi. Ayi nandi wuyenda kuidi tat′andi ku Betelemi ayi wutatamana kuna zingonda zinna. 3 Bosi nnuni′andi wubaka makani ma kulandakana nkazi′andi ku nzo tat′andi muingi kudinda nkazi′andi kavutuka ku nzo′andi. Dibakala beni, wunata ziphunda wadi ayi wuyenda na kisadi kiandi. Bo kavitila kuna, nkazi′andi wunyamba buboti ku nzo tat′andi. Ayi bo kikuekizi kiandi kammona wuyangalala. 4 Diawu kikuekizi kiandi kandindila muingi kakala kuna bilumbu bitatu. Bawu badia ayi banua.
5 Mu kilumbu kinna bo bakotuka meni meni muingi benda, kikuekizi kiandi wunkamba: “Ava kukuenda dia kioso kiuma muingi wubaka mangolo.” 6 Mu phila ayoyo, ba babuadi bakala, badia ayi banua. Bosi kikuekizi kiandi wunkamba: “Lemvuka bue lala kuku.” 7 Ayi bo dibakala beni katuba ti wenkuenda, kikuekizi kiandi wundinda muingi kabue lala kuna.
8 Mu kilumbu kintanu va meni, bo dibakala beni kakubama muingi kenda, kikuekizi kiandi wubue nkamba: “Lemvuka dia kioso kiuma muingi wubaka mangolo.” Mu kibila akiokio, bawu batatamana kudia ayi bakala vana nate va masika. 9 Bo dibakala beni kakubama muingi kenda na nkazi′andi ayi kisadi kiandi, kikuekizi kiandi wubue nkamba: “Buisi buenkuila, diawu lemvuka bue lala kuku muingi yono va meni luenda.” 10 Vayi dibakala beni kasa bue kikinina ko kulala kuna, bawu bayenda nate ku Jebus voti ku Yelusalemi. Dibakala beni wunata nkazi′andi, kisadi kiandi ayi ziphunda ziandi ziwadi.
11 Bo baba fikama va ndeku divula di Jebus buisi buaba belama kukuila, diawu kisadi kiandi kanyuvudila: “A mfumu, mboti tulala va divula di Jebus ve?” 12 Vayi mfumu′andi wunkamba: “Ndamba, tulendi lala ko ku divula dikhambulu di basi Isaeli. Tuentatamana nate tumvitila ku Gibeá.” 13 Nandi wubue kamba kisadi kiandi: “Ndoku′anu tuvanga mangolo muingi tuvitila ku Gibeá voti ku Ramá ayi kuawu tunkuiza lala.” 14 Bawu batatamana kudiata ayi bo thangu yitona kudiama, bavitila va ndeku divula di Gibeá didi ku kizunga ki Benyamini.
15 Bosi bawu bakota ku divula di Gibeá ayi bo bavitila kuna, bakala va dizandu dinneni kibila ne mutu kasa batumisa ko ku nzo muingi balala kuna. 16 Bo buisi buaba kuila, vamonika dibakala dimueka wufumina ku nsitu. Nandi waba kalanga ku kizunga kidi miongo ki mvila wu Efraim, vayi mu mua thangu, wuyenda kue kala ku divula di Gibeá. Batu baba kalanga ku divula beni baba basi Benyamini. 17 Bo dibakala beni kamona batu va dizandu dinneni, nandi wuba yuvula: “Kuidi luma fumina ayi kuawu lunkuenda?” 18 Dibakala beni no wuba na nkazi′andi wumvutudila: “Tube fumina ku Betelemi yidi ku Yuda ayi tuidi mu kukuenda ku kibuangu kidi miongo ki mvila wu Efraim, kuawu befu tunkalanga. Tuidi mu kukuenda ku nzo yi Yave, vayi tona tube kuiza akuku, ne mutu kasa tutumisa ko ku nzo′andi. 19 Befu tube nata bititi muingi ziphunda zitu badia, tuidi mapha ayi vinyu muingi minu, nkazi′ama ayi kisadi kiama tudia.” 20 Vayi dibakala beni wufumina ku nsitu wutuba: “Bika Nzambi kalusakumuna. Yizanu ku nzo′ama. Minu yinkuiza kieba zitsatu zinu, vayi bikanu kulala va dizandu dinneni.” 21 Dibakala beni wufumina ku nsitu wuba nata ku nzo′andi, ayi wuvana ziphunda ziawu bititi. Bosi basukula malu, badia ayi banua.
22 Vayi bo baba dia ayi bo baba nua, babakala badi mavanga mambi baba kalanga ku divula beni, bazungidila nzo′andi, baba lulumuna muelu ayi baba kamba dibakala vuidi nzo: “Basisa babakala babe kota ku nzo′aku muingi befu tubundana yawu nyitu.” 23 Dibakala beni vuidi nzo wubasika ayi wuba kamba: “Zikhomba ziama, bikanu kuvanga mambu amomo matsoni kibila babakala abobo badi zinzenza babe kuiza vikila ku nzo′ama. 24 Yeluvana muan′ama wu nkietu no kaka bundiniabu ko nyitu, mvandi yeluva nkazi wu dibakala beni muingi benu lu bavangila moso mambu luntomba. Vayi bikanu kuvangila babakala abobo mambu amomo matsoni.”
25 Vayi babakala beni baba mavanga mambi bamanga, diawu nzenza beni kabongila nkazi′andi ayi wumvana kuidi babakala beni. Bawu babuila nkietu beni ayi babundana yandi nyitu builu boso nate buisi buaba belama kukia. Ayi bo buisi bukia, bawu bambikidila muingi kenda kuandi. 26 Meni meni nkietu beni wuvitila va muelu nzo yi mutu wuba yamba, ayi wubua va muelu beni nate buisi bumana kukia. 27 Bo nnuni′andi kakotuka va meni ayi kazibula muelu muingi kutatamana viage, nandi wumona nkietu′andi bebua va muelu nzo. 28 Dibakala beni wukamba nkazi′andi: “Telema muingi tuenda.” Vayi nkietu beni kasa tambudila ko. Bosi dibakala beni wunanguna nkazi′andi, wuntula mu phunda ayi batatamana viage.
29 Bo kavitila ku nzo, dibakala beni wubonga mbedi ayi wuzenga nkazi′andi mu 12 di bitini, ayi wufila kitini ki mueka ki mueka kuidi mimvila mioso mi Isaeli. 30 Batu boso bamona mawu baba tuba: “Tumueniabu ko ntindu mambu amomo ku Isaeli tona tubasika ku Ngipiti. Ndokuanu tuyindula buboti mambu amomo muingi tuzaba mbi tufueti vanga.”