Landakana Kifuani ki Yave ki Kukikulula

1. Kibila mbi tunkuitukilanga mu kuzaba ti Yave wuyikululanda?

BUKIEDIKA ti batu badi kimfumu mu nza bayikulunga? Ndamba. Vayi kheti Yave widi Nzambi wulutidi zangama, nandi wuyikululanga. (Minku. 113:​5-8) Kuyikulula widi wumueka mu khati zikhadulu ziandi, vasi ko ni kivisa kimueka kimmonisa ti nandi wuyinangikanga. Mu dilongi adidi, tunkuiza baka ndandu mu kulonguka zikhadulu zinna zi kukikulua kuandi ayi buidi tulenda monisina zikhadulu beni. Mvandi tunkuiza mona buidi Yesu kalandikina kifuani ki tat’andi ki kukikulula. Kufiongunina mambu amomo, kunkuiza tusadisa kubuela fikama Yave ayi kulandakana kifuani kiandi ki kukikulula.

YAVE WUNTOMBA TUMFIKAMA

2. Mbi lutangu lu Minkunga 62:8 lu tulonga matedi Yave? (Tala mvandi foto va levista.)

² Batu bawombo bammonanga phasi kufikama batu ba kinangikanga, kibila lungundayi bammonisanga lumvanganga bawombo kuba tatuka. Vayi Yave widi disuasana. Tatʹitu yi diyilu wukikululanga ayi wuntumisanga batu bawombo muingi banfikama ayi banzabikisa mambu ma kuba tatisa mu nzila nsambu. (Tanga Minkunga 62:8.) Dedi bo tata yi luzolo kambelanga wukubama muingi kukuwa mambu mankuazula bana bandi, Yave wunkuwanga mu mvibudulu nsambu wu bisadi biandi, ayi mvandi wutula minsambu mi bisadi biandi mu Kibibila. Mawu mammonisa ti nandi wukikululanga. (Yosua 10:​12-14; 1 Samu. 1:​10-18) Buabu, kibila mbi thangu zinkaka tunyindulanga ti tuisi ko bafuana muigi kufikama Yave?

3. Kibila mbi tulenda bela lufiatu ti Yave wuntomba muingi tunfikama?

³ Tulenda fikama Yave mu nzila nsambu kheti thangu zinkaka tuyimuenanga ti tuisi ko bafuana muingi kutambula luzolo luandi. Kibila mbi tuntubila mawu? Kibila mu kinongo ki muana wuzimbala Yesu kata, nandi wudedikisa Yave na tata yi luzolo, kibila wumonisa kiadi kuidi muan’andi bo kaba tomba kuvutuka va dikanda. Bo tata kammona ku kinanu, nandi wuduma muingi kuendengana, “wumbumbakana ayi wumvuna besu.” (Luk. 15:​17-20) Yave widi buka tata beni. Bo kankuwa minsambu mi batu badi mintima mi kofakana mu kibila ki mambu maphasi bamviokila, mu kukikulula nandi wu kuba vuanga nkinza. (Manio. 3:​19, 20) Yave wummonisanga kiadi kuidi batu abobo, wuba vumbikanga, wu kuba bombanga ayi mu luzolo wu kuba lemvukilanga. (Yesa. 57:15) Buidi Yave katu bombilanga bubu? Khumbu ziwombo, nandi wumvangilanga mawu mu nzila bakulutu ba kimvuka, basi dikanda ditu badi baklistu ayi zikhomba zitu zi kipheve. (Tia. 5:​14, 15) Yave wu tuvananga lusalusu loso alolo, kibila nandi wuntomba muingi tunfikama.

4. Buidi Yesu kamonisina ti waba tomba batu bamfikama?

⁴ Yesu wulandakana kifuani ki tat’andi. Dedi Yave, Yesu mvandi wuyikululanga. Mu kibila akiokio, bo kaba va ntoto batu babasa monanga ko phasi kumfikama. Bawu baba luaku lu kuvana biuvu kuidi Yesu. (Mala. 4:​10, 11) Ayi mvandi Yesu waba vananga luaku kuidi batu muingi bazabikisa mayindu mawu. (Mat. 16:​13-16) Ayi bo batu baba vanganga zinzimbala, babasa banga ko boma bu kufikama Yesu, kibila bazaba ti nandi wuba mutu wu mamboti, wummonisanga kiadi ayi mvibudulu. (Mat. 17:​24-27) Bo Yesu kalandikikina mu phila yivedila kifuani ki tat’andi, mawu masadisa minlandikini miandi kuzaba buboti Yave. (Yoa. 14:9) Bawu balonguka ti Yave kasi ko dedi mueka na zimfumu zi binganga bi basi Yuda baba lunangu ayi babasa vuanga ko nkinza batu bankaka. Vayi bavisa ti Yave wuyikululanga ayi wuntomba batu bamfikama.

5. Buidi kukikulula kulenda sadisila bakulutu ba kimvuka?

⁵ Buidi tulenda landikinina kifuani ki Yave? Tulenda vanga mawu mu kukuna khadulu yi kukikulula. Kibila khadulu ayoyo, yala tusadisa kubika monisa zikhadulu zintatulanga batu dedi, kumona nsoki, kukinangika ayi kuba bankua makhema. Kukikulula mvandi kunkuiza tusadisa kuba bankua mamboti, kuba mvibudulu ayi kulemvukilanga bankaka. (Kolo. 3:​12-14) Bakulutu ba kimvuka bafueti vanga mangolo muingi kumonisa zikhadulu zinkuiza sadisa zikhomba kuba fikama. Muingi mawu mamonika, bawu bafueti banga va kimueka na zikhomba. Mawu mansundula ti bakulutu ba kimvuka bafueti vanga mangolo muingi kulandakananga zikhutukunu zioso ku Nzo yi Kintinu, kubika kuandi mu videoconferência. Ayi bafueti sadila luaku loso bambaka muingi kusamuna va kimueka mu nzo ka nzo na zikhomba. Bo zikhomba bankuiza zaba bakulutu ba kimvuka, mawu mankuiza vanga baba fiatila, bulutidi mu thangu bankuiza tomba lusalusu.

YAVE KAKUIKANGA KO NI MUTU

6-7. Vana kifuani kimmonisa buidi Yave kayikuludila bo bisadi biandi bandinda lusalusu.

⁶ Batu badi lungundayi, bankuikanga bankaka bavangila mambu mu phil’awu. Vayi, kheti Yave widi mangolo mawombo, nandi wukikululanga ayi kakuikanga ko batu bavangila mambu mu phil’andi. Dedi, mona mambu nandi kavanga bo Miriam, khomba wunkulutu wu Mose va kimueka na Aloni banyungutila Mose, mutu Yave kasola. Miriam kasa monisa ko lukinzu kuidi Mose ayi kuidi Yave. Mu kibila akiokio, Yave wufuema ayi wumvanga kuba mbela yi buazi. Vayi bo Aloni ayi Mose bandinda muingi kabelusa Miriam mbi nandi kavanga? Mu kukikulula Yave wuvanga mambu Aloni ayi Mose bandinda ayi wubelusa Miriam.—Zit. 12:​1-15.

⁷ Yave mvandi wumonisa khadulu yi kukikulula mu mambu kavangila Ntinu Ezekiasi. Mu nzila mbikudi’andi, Yave wukamba Ezekiasi ti wunkuiza fua. Mu kiunda Ezekiasi wulomba Yave muingi kambelusa. Mu kuba Nzambi nkua kiadi Yave wumbelusa ayi wumbuela 15 di mimvu. (2 Minti. 20:​1, 5, 6) Bukiedika, kukikulula kumvanganga Yave kumona batu kiadi ayi kuba vangila mambu mamboti.

8. Kifuani mbi kimmonisa ti Yesu waba vuanga nkinza bankaka? (Malaku 3:​1-6)

⁸ Yesu wulandakana kifuani ki Tat’andi. Bo kaba va ntoto, nandi wusadila luaku loso kaba muingi kusadisa batu baba tomba lusalusu luandi. Dedi, nandi wubelusa batu mu kilumbu ki kisabala kheti zimfumu zi binganga bi basi Yuda babasa zolanga ko mawu. (Tanga Malaku 3:​1-6.) Yesu mvandi mu kuba mfumu yi kimvuka, kakuikanga ko bankaka kuvanga mambu mu phil’andi. Dedi, mu thangu bankaka mu kimvuka bamvola disumu dingolo, mu mvibudulu nandi wu kuba vananga luaku lu kubalula mavanga mawu.—Nzai. 2:​2-5.

9. Buidi tulenda monisa ti tukuikanga ko bankaka bavangila mambu mu phil’itu? (Tala mvandi zifoto.)

⁹ Buidi tulenda landikinina kifuani ki Yave? Tufueti vanga mangolo ma kukikulula ayi kuyindula dedi bo Yave kanyindudilanga. (Tia. 3:17) Dedi, matata bakikululanga, babikanga ko bana bawu bavanga moso kua mambu batidi, vayi mvandi baba kuikanga ko kuvanga mambu bazebi ti balendi nunga ko. Yakobi wubikila kifuani kimboti matata bafueti landakana mu Ngenesi 33:​12-14. Matata bayikululanga mvandi bafueti vanga mangolo muingi kubika dedikisa mambu muana wumueka kamvanga na muan’awu wunkaka. Ayi bakulutu ba kimvuka mvandi bafueti vanga mangolo muingi kubika kuika zikhomba bavangila mambu mu phila bawu bantombila. Phila yimueka balenda vangila mawu yidi mu kukikinina mayindu ma bakulutu bankaka, boti mawu masinlevula ko minsua mi Kibibila. (1 Ti. 3:​2, 3) Ayi befu mvitu, tufueti vanga mangolo ma kuvisa mayindu ma bankaka kheti tuidi mayindu maviakana. (Lom. 14:1) Bukiedika, befu boso mu kimvuka, tufueti vanga mangolo muingi tuba bazabakana batu bakhambu kuikanga bankaka bavangila mambu mu phil’itu.—Fil. 4:5.

YAVE WIDI NKUA MVIBUDULU

10. Mu ziphila mbi Yave kamonisina mvibudulu?

¹⁰ Ḿba ngie mana mona ti batu bakinangikanga, bamonisanga ko mvibudulu. Vayi Yave widi disuasana kibila nandi widi nkua mvibudulu. Dedi mu bilumbu bi Nowa, Yave wutuba ti wuvana 120 di mimvu kuidi batu bazinga ava katulula bankua mambi. (Ngene. 6:3) Mu phila ayoyo, Nowa wubaka thangu muingi kuyonzula bana ayi kutunga nzaza mu lusalusu lu dikanda diandi. Kuntuala mu kusadila mbasi yimueka, Yave wuyuwa mu mvibudulu bo Abalahami kaba kunkuvula matedi makani mandi ma kutulula divula di Sodoma ayi Ngomola. Boti mbasi beni wuba dedi mueka na batu bayinangikanga, khanu wukamba Abalahami: Nani bekuvana nsua wu kuphana biuvu? Vayi mu kulandakana kifuani ki Yave, mbasi beni wummonisa mvibudulu.—Ngene. 18:​20-33.

11. Dedi bummonisa 2 Petelo 3:​9, kibila mbi Yave kammonisinanga mvibudulu?

¹¹ Yave mvandi wummonisanga mvibudulu’andi bubu. Nandi wunteliminanga thangu katsikika muingi kubunga nza ayiyi. Vayi kibila mbi kadi mu kuvibidila? “Kibila nandi kasintomba ko ni mutu kabungu, vayi wuntomba baboso babalula mavanga mawu.” (Tanga 2 Petelo 3:9.) Bukiedika ti mu phamba kuandi kamvibidilanga? Ndamba. Bivevi na bivevi bi batu badi mintima mikubama badi mu kumfikama. Ayi tuntomba muingi batu bankaka mvandi bavanga mawu. Vayi mvibudulu wu Yave widi ndilu. Nandi wunzolanga batu vayi kalasa bika ko batu bantuadisanga mambi batatamana.—Haba. 2:3.

12. Buidi Yesu kanlandikininanga kifuani ki Yave ki kumonisa mvibudulu?

¹² Yesu wulongukila mu kifuani ki Tat’andi. Mu kibila ki mimvu mioso Yesu kaviokisa na tat’andi, nandi mvandi wulonguka kumonisa mvibudulu. Nandi wumona Satana kuvueza Yave ayi bisadi biandi bikuikama. (Ngene. 3:​4, 5; Yobi 1:11; Nzai. 12:10) Yesu mvandi wumona ziphasi zioso batu bamviokilanga. Yindula phila nandi kaba yi kumanisa mambu moso Satana kantuadisanga. (1 Yoa. 3:8) Mbi binsadisanga Yesu kuvibidila ayi kutelimina thangu kala tambudila nsua wu kumanisa mambu moso maphasi Satana kantuadisanga? Theti, mu kukikulula nandi wubika mamoso mu mioko mi Yave, muingi naveka Yave kavangila mambu mu thangu’andi.—Mav. 1:7.

13. Buidi Yesu kamonisina mvibudulu kuidi bapostolo bandi?

¹³ Bo kaba va ntoto, Yesu mvandi wumonisa mvibudulu kuidi bapostolo bandi. Dedi, mu thangu bapostolo bandi baba kuambila matedi nani wulutidi mu bawu, Yesu kasa bafuemina ko, vayi wutatamana kumonisa mvibudulu. (Luk. 9:46; 22:​24-27) Nandi wuba lufiatu ti bumviokila thangu, bawu bala balula mayindu mawu. Ngie mana vanga zioziawu zinzimbala khumbu ziwombo? Boti buawu, wulenda ba mayangi mu kuzaba ti ntinu’itu Yesu Klistu wukikululanga ayi wummonisanga mvibudulu.

14. Buidi tulenda kunina mvibudulu?

¹⁴ Buidi tulenda landikinina kifuani ki Yave? Bo tumvanga mangolo ma kuyindula mu phila Yesu kanyindudilanga, tunluta visanga mayindu ma Yave. (1 Ko. 2:16) Buidi tulenda visila mayindu ma Yesu? Tufueti tanga zibuku zinna zintubila matedi luzingu luandi. Bosi, tufueti botula thangu muingi tuyindula mambu tube tanga ayi buidi mawu mammonisa phila Yesu kanyindudilanga. Mvandi, tufueti sambila kuidi Yave muingi nandi katusadisa kuyindula mu phila Yesu kanyindudilanga. Bo tumvanga mangolo ma kuvisa mayindu ma Yesu, tunkuiza visa mvandi phila Yave kanyindudilanga, tunkuiza monisa mvibudulu kuidi zikhomba zitu zi kipheve.—Mat. 18:​26-30, 35.

YAVE WUMVUANGA NKINZA BATU BA KIKULULANGA

15. Buidi Yave kandukisilanga mambu madi mu Minkunga 138:6?

¹⁵ Tanga Minkunga 138:6. Luidi luaku lunneni kuidi batu bayikululanga kuba bazabakana kuidi Nzambi wulutidi zangama. Mona kifuani ki Baklistu mu thangu bapostolo, kimonisa ti Yave wumvuanga nkinza batu bayikululanga. Bawombo mu bawu ḿba tubatubilanga ko beni, vayi kifuani kiawu kidi mu Kibibila. Yave wutuadisa Mose kasonika mu Kibibila dizina di mfelimi wumueka baba tedilanga Debora wuzingila mu thangu Abalahami. Nandi wusadila mu lukuikumunu ku nzo Isaki ayi Yakobi mu nduka 125. Kheti tusa zaba ko mambu mawombo matedi nkietu awowo, Yave wutuadisa minsoniki mi Kibibila basonika phila batu baba zolanga nkietu awowo. (Ngene. 24:59; 35:8.) Kuntuala, Yave wuyiza sola Davidi mu butoko buandi muingi kaba Ntinu wu Isaeli. (2 Samu. 22:​1, 36) Bo Yesu kabutuka, Yave wufila zimbasi kuidi minsungi mi mamemi baba kukikululanga, muingi baba batheti mu kuzaba mbutukulu yi Mesia ku divula di Betelemi. (Luk. 2:​8-11) Ayi mu kubika Simioni ayi Ana bamona Yesu, bo bannata ku tempelu, Yave wumonisa ti waba kuba vuanga nkinza, kheti bawu baba biboba. (Luk. 2:​25-30, 36-38) Bukiedika, kheti Yave widi Nzambi wulutidi zangama, nandi wumvuanga nkinza batu bayikululanga.

16. Buidi Yesu kalandikinina kifuani ki Tat’andi ki kuvua nkinza bankaka?

¹⁶ Yesu wunlandananga kifuani ki Tat’andi. Dedi tat’andi, Yesu waba vuanga nkinza batu bayikululanga. Nandi wuzabikisa zitsangu zimboti zitedi Nzambi kuidi batu bakhambu longuka beni. (Mav. 4:13; Mat. 11:25) Ayi mvandi Yesu wubelusa batu ayi wuba monisa mamboti. (Luk. 5:13) Va builu bu tsuka ava kafua, Yesu wuvana kifuani ki kukikulula, mu kusukula malu ma bapostolo bandi. (Yoa. 13:5) Ayi ava kavutuka ku diyilu, nandi wumonisa ti waba vuanga nkinza minlandikini miandi, mu kuba vana kiyeku kilutidi nkinza, ki kusadisa batu bankaka kubaka luzingu lu mvu ka mvu.—Mat. 28:​19, 20.

17. Buidi tulenda monisa ti tumvuanga nkinza bankaka? (Tala mvandi foto.)

¹⁷ Buidi tulenda landikinina kifuani ki Yave? Tummonisanga ti tumvuanga nkinza bankaka, mu kuba zabikisa zitsangu zimboti mu khambu tsikika thalu’itu mu nkanda’awu wu nyitu, mu mambu bazebi kuvanga, bikhulu biawu voti biuma badi. Ayi mvandi tummonisanga ti tunzolanga zikhomba zitu, mu kuba monisanga lukinzu kheti tuidi biyeku biwombo mu kimvuka. (Fil. 2:3) Yave wunkuangalalanga beni mu kumona ti tuyikululanga ayi tuntuamanga ntuala muingi kuzitisa bankaka.—Lom. 12:10; Sefa. 3:12.

18. Kibila mbi ngie wuntomba kulandakana kifuani ki Yave ki kukikululanga?

¹⁸ Befu kuvanga mangolo ma kulandakana kifuani ki Yave, batu bankuiza tufikama, tunkuiza monisanga mvibudulu ayi tuisinkuiza kuika ko bankaka bavangila mambu mu phil’itu. Ayi mvandi, tunluta vuanga nkinza bankaka dedi bo Yave kamvangilanga. Bika kadika mutu mu befu katatamana kuvanga mangolo ma kufikama Nzambi’itu wuyikululanga, muingi tuluta ba luvalu va mesu mandi.—Yesa. 43:4.