DILONGI 49
NKUNGA 44 Nsambu wu Kisadi Kidi Kiunda Kingolo
Buku yi Yobi Yilenda Tusadisa Kuvana Malongi Mamboti
‘Buabu, Yobi lemvuka, yuwa mambu yintuba.’—YOBI 33:1.
MAMBU TUANLONGUKA
Tuemmona buidi buku yi Yobi yilenda ku tusadisila kuvana malongi mu nduenga.
1-2. Buidi bakundi ba Yobi babela, bo bamona mambu Yobi kaba viokila?
BO Yobi kazimbisa biuma bioso kaba, batu boso va kizunga kiandi bayiza zaba mawu. Ayi bo bakundi bandi Elifasi, Bilidadi ayi Zofar babakula mambu kamonikina, bayenda muingi kuembomba. Vayi bawu basa ba ko bakubama muingi kubomba Yobi mu ntindu mambu kaba viokila.
2 Yindula mambu amama: Yobi wuzimbisa biuma bioso kaba, bavonda bibulu biandi ayi binkaka bayiba biawu, bavonda bisadi biandi ayi kumi di bana bandi. Ayi nzo bana boso ba Yobi baba, yituluka. Kubotula kuandi mambu moso amomo maphasi, Yobi wuyiza bakana kimbevu kingolo. Ku kinanu, bakundi bandi batatu bamona Yobi mu kiunda wukala va mbata dibombi. Mbi bawu bavanga? Bawu baviokisa sambuadi di bilumbu mu khambu tuba ni diambu kibila bamona ziphasi zioso Yobi kaba viokila. (Yobi 2:12, 13) Bo vavioka mua thangu, ditoko dimueka baba tedilanga Elihu, mvandi wufikama vo baba. Bosi Yobi wutona kusinga kilumbu kabutukila ayi waba tomba kufua. (Yobi 3:1-3, 11) Bukiedika, nandi waba tomba lusalusu. Mambu bakundi bandi abobo batuba, ayi phila batubila mawu, maba monisa boti bawu baba bakundi bakiedika ba Yobi ayi baba tomba kunsadisa voti ndamba.
3. Mbi tunkuiza longuka bubu?
3 Yave wutuadisa Mose muingi kasonika mambu bakundi batatu ba Yobi ayi Elihu batuba ayi bavanga. Bivisa bimmonisa ti, mambu Elifasi katuba, matuadusu kuidi pheve yimbi. Vayi Yave nandi wutuadisa mambu Elihu katuba. (Yobi 4:12-16; 33:24, 25) Diawu tuyitukanga ko kumona ti mu buku yi Yobi, muidi malongi mawombo mamboti ayi mvandi malongi mambi. Buku yi Yobi yilenda ku tusadisa kuzaba buidi bu kuvanina malongi mamboti. Dedi, tuemmona kifuani kimbi bakundi batatu ba Yobi bavana. Bosi, tunkuiza tubila kifuani kimboti ki Elihu. Mvandi tunkuiza mona ndandu bawombo mu basi Isaeli bayiza baka mu buku yi Yobi, ayi ndandu tumbakanga bubu.
MALONGI MA BAKUNDI BATATU BA YOBI
4. Kibila mbi bakundi batatu ba Yobi basa nunga ko kumbomba? (Tala mvandi fikula.)
4 Kibibila kintuba ti, bo bakundi batatu ba Yobi bayuwa mambu Yobi kaba viokila, bawu bayenda kuna muingi kumbomba. (Yobi 2:11) Vayi bawu basa nunga ko kubomba Yobi. Kibila mbi? Mu bibila bitatu. Kitheti, bawu bafika baka mayindu makhambu fuana matedi Yobi. Dedi, bawu batuba ti Yobi waba viokila mu mambu maphasi kibila mambu mambi kavanga.a (Yobi 4:7; 11:14) Kimmuadi, nduka mambu moso batuba, masa sadisa ko Yobi. (Yobi 13:12) Mu khumbu wadi, Bilidadi wutuba ti mambu Yobi kaba tuba maba maphamba. (Yobi 8:2; 18:2) Ayi Zofar wutedila Yobi, kivungisi. (Yobi 11:12) Kintatu, kheti bawu ḿba basa nanguna ko mbembu bo baba koluka na Yobi, vayi bikuma basadila biaba lueka ntima wu Yobi. (Yobi 15:7-11) Bukiedika, babakala abobo, babasa tomba ko kubomba Yobi, vayi kumonisa ti bawu bannunga mu mambu baba koluka.
Bo wumvana bankaka malongi, vanga mangolo muingi wubika yoluka mu nganzi. Makani maku mafueti ba, kukindisa ayi kusadisa (Tala lutangu 4)
5. Mambu mbi malongi ma Elifasi, Bilidadi ayi Zofar matuadisa kuidi Yobi?
5 Mambu Elifasi, Bilidadi ayi Zofar batuba, mabuela ziphasi kuidi Yobi, diawu nandi kaba tomba kuyikakidila. Mu kibila akiokio, nandi wuyoluka mu khambu yindula. (Yobi 19:2) Mambu bakundi batatu ba Yobi bayoluka, masa ba ko nguizani na mayindu ma Yave. (Yobi 6:3, 26) Bawu basa mona ko Yobi kiadi, mu kibila akiokio bawu babika muingi Satana kaba tuadisa. (Yobi 2:4, 6) Ndandu mbi kinongo akiokio kituadisa kuidi basi Isaeli mu thangu yikhulu, ayi ndandu mbi tulenda baka bubu?
6. Mbi bakulutu ku Isaeli balonguka mu kifuani kimbi ki bakundi batatu ba Yobi?
6 Ndandu kinongo ki Yobi kituadisa kuidi basi Isaeli. Bo Yave kasola dikabu di Isaeli, nandi wubieka babakala badi bafuana muingi kufundisa dikabu mu kulandakana minsua miandi misonga. (Deute. 1:15-18; 27:1) Vaba tombulu babakala abobo, bayuwa mu mvibudulu ava kuvana malongi voti kufundisa bankaka. (2 Bi 19:6) Vaba tombulu mvandi bawu kubaka bivisa bioso ayi kuvana biuvu. (Deut. 19:18) Ayi mvandi, kubika kukoluka mu nganzi na batu baba tomba lusalusu luawu. Kibila kukoluka mu nganzi kulenda vanga bankaka babika zibudila ntim’awu. (Mba 22:22-24) Ḿba bakulutu ku Isaeli babaka ndandu yiwombo mu kinongo ki Yobi.
7. Kubotula kuandi bakulutu ku Isaeli, banani mvandi baba luaku lu kuvana malongi, ayi buidi kinongo ki Yobi ki basadisila? (Zingana 27:9)
7 Ku Isaeli, bakana ko to bakulutu baba luaku lu kuvana bankaka malongi. Vayi, matoko, biboba, bakietu ayi babakala mvandi baba luaku lu kuvana malongi kuidi bankaka muingi kuba sadisa batatamana mu nzila yi Yave. (Minku. 141:5) Nkundi wukiedika wumvananga malongi kuidi wunkaka. (Tanga Zingana 27:9.) Kifuani kimbi ki bakundi batatu ba Yobi, kiba ndubu kuidi basi Isaeli matedi mambu balendi tuba ko voti balendi vanga ko mu thangu bamvana malongi kuidi bankaka.
8. Mambu mbi tufueti bika kuvanga bo tumvana bankaka malongi? (Tala mvandi zifoto.)
8 Ndandu tulenda baka bubu. Mu kuba Baklistu, tuntomba kusadisa zikhomba zitu bo bamviokila mu mambu maphasi. Vayi muingi tununga kuba kindisa, tufueti bika kuvanga mambu bakundi batatu ba Yobi bavanga. Theti, tufueti ba bivisa bioso mu mambu tuntuba. Dimmuadi, tulendi sadila ko ndueng’itu veka voti mambu tuzebi muingi kuvana bankaka malongi dedi bo Elifasi kaba vangilanga. Vayi, tufueti sadilanga Diambu di Nzambi. (Yobi 4:8; 5:3, 27) Dintatu, tufueti bika kukoluka mu nganzi voti kufundisa mutu tumvana malongi. Tebuka moyo ti mambu mankaka Elifasi katuba maba makiedika, ayi minsoniki minkaka mi Kibibila batubila mambu beni. (Dedikisa na Yobi 5:13; ayi 1 Ko. 3:19.) Vayi, nduka mambu moso katuba, masa ba ko kithuadi na mayindu ma Yave, ayi malueka ntima wu Yobi. Diawu Yave kanfundisila mu mambu katuba. (Yobi 42:7, 8) Malongi mamboti malendi vanga ko batu bayindula ti Yave widi nkua makhema ayi ti nandi kazolanga ko bisadi biandi. Buabu, tuemmona mbi tulenda longuka mu kifuani ki Elihu.
Bo wumvana malongi, (1) baka bivisa bioso, (2) sadila Diambu di Nzambi, ayi (3) yolukila mu luzolo (Tala lutangu 8)
MALONGI ELIHU KAVANA KUIDI YOBI
9. Sudikisa kibila mbi Yobi kaba tombila mbombolo kheti bo kamana kukoluka na bakundi bandi batatu, ayi buidi Yave kansadisila?
9 Bo Yobi ayi bakundi bandi batatu bamana kukoluka, bawu bafuema. Mambu bakundi batatu ba Yobi batuba malenda wesa 28 di zikapu zi Kibibila, vayi nduka mambu moso batuba, batubila mawu mu nganzi. Diawu tulenda tuba ti ziphasi zi Yobi zibuelama ayi nandi waba tomba kutambula mbombolo ayi tsembolo. Buidi Yave kasadisila Yobi? Nandi wusadila Elihu muingi kumvana malongi. Kibila mbi Elihu kasa fika kolukila ko na Yobi? Naveka wutuba: ‘Benu muidi bakulutu, ayi minu yidi ditoko, diawu yivuena sui.’ (Yobi 32:6, 7) Elihu wuvisa ti bawu baluta zinga mimvu miwombo, ayi baluta ba nzailu mu mambu mawombo ma luzingu kuvioka matoko. Bo kamana kukuwa mu mvibudulu mambu Yobi ayi bakundi bandi batatu batuba, kasa bue nunga ko kuvuena sui. Nandi wutuba: ‘Mimvu mituadisanga ko nduenga ayi bakana ko to bakulutu badi luzabu.’ (Yobi 32:9) Mambu mbi mankaka Elihu katuba, ayi buidi katubila mawu?
10. Mambu mbi Elihu kavanga ava kuvana Yobi malongi? (Yobi 33:6, 7)
10 Ava Elihu kavana Yobi malongi, nandi wukubama theti. Buidi kavangila mawu? Nandi wuyala mabanza mandi. Dedi bo Kibibila kimmonisa, Elihu wudasuka mu mambu Yobi kaba tuba. (Yobi 32:2-5) Kheti bobo, nandi kasa sadila ko bikuma bilueka ntima wu Yobi. Vayi wuyolukila yandi mu luzolo. Dedi, nandi wutuba: ‘Vantuala Nzambi minu yidi dedi mueka ayi ngiewu.’ (Tanga Yobi 33:6, 7.) Elihu wumonisa ti wuyuwa mambu Yobi kankamba ayi wuvanga mangolo muingi kunkindisa. (Yobi 32:11; 33:8-11) Nandi wuvanga mawu mu thangu kavana Yobi malongi.—Yobi 34:5, 6, 9; 35:1-4.
11. Buidi Elihu kavanina Yobi malongi? (Yobi 33:1)
11 Elihu wumonisa lukinzu mu thangu kavana Yobi malongi. Dedi, nandi wutedila Yobi mu dizina diandi, vayi bakundi bandi batatu basa vanga ko mawu. (Tanga Yobi 33:1.) Elihu wulubula Yobi mu kunkamba ti mayindu mandi masa ba ko kithuadi na mayindu ma Yave, ayi wuntebula moyo zikhadulu zi Yave dedi mangolo, busonga ayi luzolo lukuikama. (Yobi 32:4; 33:32) Malongi mamboti ma Elihu, masadisa Yobi kuba wukubama muingi kutambula zithuadusulu zi Yave. (Yobi 36:18, 21-26; 37:23, 24) Bukiedika, kifuani ki Elihu kisadisa bawombo mu basi Isaeli kuntuala ayi mvandi kilenda tusadisa bubu.(Yobi 38:1-3)
12. Buidi Yave kasadila mimbikudi muingi kusadisa basi Isaeli, ayi ndandu mbi babaka mu kifuani ki Elihu?
12 Ndandu basi Isaeli babaka. Bo vavioka mua thangu, Yave wusola mimbikudi muingi kuzabikisa lukanu luandi kuidi dikabu di Isaeli. Dedi mu thangu yi minfundisi, Débora wuvana zithuadusulu zi Nzambi kuidi dikabu. Ayi mvandi Yave wusadila Samueli tona mu bumuana buandi muingi kuzabikisa mayindu ma Nzambi kuidi dikabu diandi. (Mit. 4:4-7; 5:7; 1 Samu. 3:19, 20) Bosi kuntuala mu thangu mintinu, Yave wutatamana kusadila mimbikudi muingi kukindisa kipheve ki dikabu diandi, ayi kuvana malongi kuidi batu baba vekuka mu zinzila ziandi. (2 Samu. 12:1-4; Mav. 3:24) Kifuani ki Elihu kisadisa bakietu ayi babakala baba bakuikama mu Nzambi mu thangu beni bavisa mambu mbi bafueti tuba, ayi buidi bafueti tubila mawu bo bamvana bankaka malongi.
13. Buidi Baklistu bubu, balenda kuyikindasana?
13 Ndandu tulenda baka bubu. Mu kuba Baklistu, befu tunzabikisanga luzolo lu Nzambi kuidi bankaka mu kusadila Kibibila, tunkindisanga zikhomba zitu mu kipheve mu phila tunkolukilanga yawu. (1 Ko. 14:3) Bakulutu ba kimvuka bafueti ba bakubama muingi kubomba zikhomba bamviokila mu mambu maphasi, bulutidi mu thangu bankoluka mambu makhambu fuana mu kibila ki mambu maphasi bamviokila.—1 Te. 5:14; Yobi 6:3.
14-15. Fuanikisa buidi nkulutu wu kimvuka kalenda landikinina kifuani ki Elihu bo kamvana malongi.
14 Yindula mambu amama: Nkulutu mueka wu kimvuka wubakula ti vadi khomba mueka wunkietu mu kimvuka widi kiunda kingolo. Diawu nandi ayi khomba wunkaka bayendila kuetala khomba beni. Vayi mu thangu bankoluka, khomba beni wu kunzabikisa mayindu mambi kambanga. Wuntuba mvandi ti kheti nandi wumbasikanga mu kisalu ki kusamuna ayi wunlandakananga zikhutukunu, vayi kasiedi ko mayangi. Mambu mbi nkulutu wu kimvuka kafueti vanga?
15 Ḿba diambu ditheti kankuiza vanga didi, kutomba kuzaba kibila mbi khomba beni kadidi mu kiunda. Muingi kuzaba mawu, nandi kafueti kuwa mu mvibudulu ayi kuyikuvusa: Bukiedika ti khomba wuyimuena ti kasi ko wufuana muingi kutambula luzolo lu Nzambi? Ziphasi zi luzingu, ziawu zidi mu kudekula mayangi mandi? (Luk. 21:34) Dimmuadi, nkulutu wu kimvuka kafueti sadila luaku alolo muingi kunyunga khomba beni, kibila kheti mu mambu maphasi khomba kamviokila, nandi wuntatamananga kulandakananga zikhutukunu ayi kusamuna zitsangu zimboti. Dintatu, na kuvisa kibila mbi khomba kadidi mu kiunda, nkulutu wu kimvuka kafueti sadila Kibibila muingi kusadisa khomba beni kamona ti Yave wu kunzolanga.—Nga. 2:20.
TATAMANA KUBAKA NDANDU MU BUKU YI YOBI
16. Buidi tulenda tatiminina kubaka ndandu mu buku yi Yobi?
16 Tunkuiza baka ndandu yiwombo befu kutatamana kufiongunina buku yi Yobi. Dedi bo tulongukidi mu dilongi dibedi, buku yi Yobi yilenda ku tusadisa kuvisa kibila mbi Nzambi kambikilanga ziphasi, ayi buidi tulenda kindama mu mambu maphasi. Mvandi, dedi bo tuma longuka mu dilongi adidi, befu boso tulenda longuka buidi tulenda vanina malongi mamboti mu khambu landakana kifuani kimbi ki bakundi batatu ba Yobi. Vayi mu kulandakana kifuani kimboti ki Elihu. Buidi wummuena kubue fiongunina buku yi Yobi ava kuvana malongi bankaka? Boti wusiala bue tanga buku yi Yobi, buidi wummuena kubue tanganga buku ayoyo? Ngie wunkuiza baka ndandu yiwombo bubu, dedi bo bankaka babakila ndandu mu thangu basonika yawu.
NKUNGA 125 “Mayangi Kuidi bo Badi Kiadi”
a Bivisa bi Kibibila bimmonisa ti pheve yimbi yawu yituadisa Elifasi kutuba ti Nzambi kavuanga ko nkinza batu bamvanganga mangolo muingi kumonisa busonga. Mambu amomo ma luvunu, matuadisa mayindu moso ma Elifasi, ayi khumbu ziwombo nandi wutuba mawu mu thangu kayoluka na Yobi.—Yobi 4:17; 15:15, 16; 22:2.