Longa Kiedika Kuidi Bankaka mu Lukinzu

1. Mambu mbi tufueti vanga muingi tuba mu khati dikanda di Yave?

BO tunzabasana ayi zikhomba zinkaka, kiuvu kimueka tu kuba vanganga kidi, buidi wuzabila kiedika? Bawombo bantubanga ti babutukila mu kiedika, vayi bankaka ḿba bantubanga ti vasa vioka ko thangu yiwombo tona bakikinina kiedika. Tumvananga mimvutu amiomio kibila, tumbikanga kiedika ki Diambu di Nzambi kituadisa phila tunzingilanga. Kibila mbi? Kibila tuzebi ti tulenda ba to mu khati dikanda di Yave befu kumonisa ti tunzolanga kiedika ayi kubika kiawu ki tutuadisa.—Minku. 15:​1-3.

2. (a) Buidi Yesu kabela wuzabakana? (b) Mambu mbi kiedika kaba longanga, kivanga kuidi batu?

² Yesu waba tubanga kiedika. Zimbeni ziandi bazaba ti nandi waba tubanga kiedika mu mambu moso, kheti bankaka babasa zolanga ko mawu. (Mat. 22:16) Matedi mambu kaba longanga, Yesu wutuba: “Kibila yiyiza vambisa dibakala na tat’andi, muana wu nkietu na ngudi’andi ayi kikuekizi na nkuekizi’andi.” (Mat. 10:35) Yesu kabasa tomba ko muingi batu bamanga zitsangu minlandikini miandi baba longanga, vayi nandi wuzaba phila batu bankuiza tadila zitsangu beni. (Mat. 23:37) Nandi wuvisa ti kiedika kaba longanga, kinkuiza vasa batu mu mangumba muadi: Ditheti, dingumba di batu bankuiza kikinina kiedika ayi dimmuadi, dingumba di batu babasa zolanga ko kiedika.—2 Te. 2:​9-11.

3. Mambu mbi tunkuiza longuka mu dilongi adidi?

³ Dedi Yesu, befu tumvanganga mangolo muingi kutuba kiedika mu mambu moso, kheti bankaka basinkuiza zola ko mawu. Ayi tunlonganga kiedika kheti bawombo bankuiza dasuka mu kukuwa kiawu. Bukiedika ti mawu mansundula ti vasintombulu ko kuzaba thangu mbi ayi buidi tufueti longila kiedika beni? Ndamba. Mu dilongi adidi tuembaka mvutu wu kiuvu akiki ki nkinza: Kuidi tulenda bakudila kiedika? Bosi, tunkuiza baka mvandi mvutu wu kiuvu akiki: Kibila mbi ayi thangu mbi tufueti tubila kiedika? Mvutu wu biuvu abiobio, wunkuiza tusadisa kubuela pisuka mu kulonga kiedika mu lukinzu ayi mu thangu yifuana.

KUIDI TULENDA BAKUDILA KIEDIKA?

4. Kibila mbi tulenda tubila ti Yave widi tho yi kiedika?

⁴ Yave widi tho yi kiedika. Mambu moso kantubanga madi makiedika. Dedi, mamoso katuba matedi mamboti ayi mambi madi makiedika. (Minku. 19:9; 119:​142, 151) Ayi mamoso katuba ti mala monika kuntuala, mala salama. (Yesa. 55:​10, 11) Nandi kavunzikisanga ko makani mandi. (Zit. 23:19) Bukiedika, Yave kalendi vuna ko. (Ebe. 6:18) Mvandi mu Kibibila, Yave bakuntedilanga, Nzambi yikiedika.—Minku. 31:5.

5. Kibila mbi disi ko diambu diphasi kufikama Nzambi yikiedika? Sudikisa. (Mavanga 17:27)

⁵ Batu bawombo bantubanga ti didi diambu diphasi kufikama Nzambi yikiedika. Vayi bivangu biandi bimmonisa ti disi ko diambu diphasi kumfikama. (Lom. 1:20) Bo mvuala Polo kayoluka na batu balonguka beni ku Atena, nandi wuba kamba ti Nzambi wuntomba muingi batu bamfikama kibila nandi kasi ko kinanu. (Tanga Mavanga 17:27.) Bukiedika, Yave wuntumisanga batu bakikululanga ayi ba kuntombanga mu bukiedika.—Yoa. 6:44.

6. Kiedika mbi ki Kibibila tulonguka, ayi kibila mbi tumvutudilanga matondo mu kulonguka kiawu?

⁶ Phila yimueka tulenda fikama Yave yidi, mu kulonguka Kibibila. Batu basonika Kibibila batuadusu mu pheve yinlongo. (2 Pet. 1:​20, 21) Diawu mambu moso madi masonama mu Kibibila, madi makiedika ayi ma lufiatu. Dedi, tulenda fiatila mu mambu Kibibila kintuba matedi phila Nzambi kavangila ntoto ayi biuma bioso. (Ngene. 1:​1, 26) Tulenda kikinina mu mambu kiawu kintuba matedi buidi batu bayiza bela batu ba masumu, ayi kibila mbi tuntovukilanga ayi tumfuilanga. (Lom. 5:12; 6:23) Tulenda fiatila mvandi bo Kibibila kintuba ti Yave mu nzila muan’andi wala manisa mambu moso maphasi Satana kantuadisanga. (Yoa. 8:44; Lom. 16:20) Ayi tulenda fiatila mu lukanu lu Kibibila ti Yesu wala bunga batu boso bambi, kuvulubusa bafua, kukitula ntoto woso paladizu ayi kusadisa batu baba bavedila. (Yoa. 11:​25, 26; 1 Yoa. 3:8) Luaku lunneni Yave ka tuvana. Nandi wutulonga kiedika ayi wu tuvana luaku muingi tulonga bankaka mvandi.—Mat. 28:​19, 20.

BEFU TUNTUBANGA KIEDIKA

7-8. Bukiedika ti Yave wumvuanga nkinza bibila bi tuvanganga kutuba kiedika? Vana kifuani. (Malaku 3:​11, 12) (Tala mvandi foto.)

⁷ Dedi bo tuma tubila, boti tuntomba kuba mu khati dikanda di Yave, tufueti tubanga kiedika. Vayi muingi kukuangidika ntim’andi, befu tufueti vanga mambu mankaka. Yave wumvuanga nkinza kibila ki tuvanganga kutubanga kiedika. Mona mambu mamonika mu kisalu ki kusamuna Yesu kavanga bo kaba va ntoto. (Tanga Malaku 3:​11, 12.) Bo nandi kaba samuna va ndeku ḿbu wu Ngalili, mangumba manneni ma batu bamfikama ayi banzungidila. Mu khati mangumba beni muba batu bawombo baba tuadusu kuidi zipheve zimbi, bafukama vantuala Yesu ayi bankamba: “Ngie widi muana wu Nzambi.” Kibila mbi bawu batubila kiedika matedi Yesu? Makani mawu maba, kuvunzikisa mayindu ma batu baba kuwa malongi ma Yesu, muingi kuba tatula kuidi Yave. Kheti va thonono zipheve zimbi batuba kiedika, vayi bibila bi banata kuvanga mawu biba bimbi. Vayi bawu basa nunga ko kuvuna Yesu, diawu Yesu kaba kandimina muingi babika kutubila matedi nandi.

⁸ Mambu mbi tulenda longuka? Yave wunzolanga bo tuntuba kiedika. Vayi wunluta vuanga nkinza kibila ki tuvanganga kutuba kiedika. Mvandi wuntomba muingi tumvana nzitusu yoso bo tunlonga bankaka kiedika, kubika kuandi kuyizitisa befu veka.—Mat. 5:16; dedikisa na Mavanga 14:​12-15.

9. Mbi tufueti bika kuvanga ayi kibila mbi?

⁹ Tala mambu mankaka mafueti ku tuvanga kubika tambula nzitusu Yave kafueni mu tambula. Yindula boti khomba widi biyeku biwombo mu kimvuka, wu tuzabikisa mambu bankaka bakhambulu nsua wu kuzaba, ayi befu tunzabikisa mawu kuidi bankaka. Batu ba tukuwa, ba kumona ti mambu tutuba madi makiedika, ḿba bankuiza yituka ayi kuyindula ti befu tuzebi mambu mawombo bankaka bakhambu zaba. Mawu malenda vanga bankaka kuyindula ti befu tulutidi nkinza, ayi kubika kuvana nzitusu kuidi Yave Nzambi. (Zinga. 11:13) Kibila mbi? Kibila basa tuvana ko nsua muingi kuzabikisa mawu kuidi bankaka, ayi kibila kibe tuvanga kutuba mawu kisa ba ko kimboti.

BUIDI BU KUTUBILA KIEDIKA

10. Mbi binsundula kutuba mambu mamboti? (Kolosai 4:6)

¹⁰ Tanga Kolosai 4:6. Mvuala Polo wukindisa Baklistu bayolukanga mambu mamboti. Mbi mawu mansundula? Mawu mansundula ti mambu tunkoluka mafueti tuadisa ndandu kuidi batu bankuwa ayi matubulu mu lukinzu.

11-12. Kibila mbi tufueti bela keba keba bo tunlonga bankaka kiedika? Vana kifuani. (Tala mavandi zifoto.)

¹¹ Tufueti sadila dilongi di mvuala Polo di kumonisa mamboti bo tunlonga kiedika kuidi bankaka. Kibibila kindedikisa kiedika kidi muawu na mbedi yinnunganga kumonisa disuasana didi, kimutu kitu ki mbata na mayindu mitu ma tsi ntima. Mu bikuma binkaka, kiedika ki Kibibila kilenda ku tusadisa kuvisa mayindu mitu ayi bibila bi tunatanga kuvanga mambu. (Ebe. 4:12) Vayi befu khambu sadila buboti Kibibila, tulenda lueka mintima mi batu ba tukuwa. Buidi mawu malenda monika?

¹² Yindula befu kudengana mu kisalu ki kusamuna dibakala dimueka widi ntima wumboti vayi wunsambilanga bitumba ayi wunkemba Nuela na dikanda diandi. Mu kusadila Kibibila, khanu tunkuiza mmonisa ti Yave wunkandiminanga mambu amomo. (Yesa. 44:​14-20; 2 Ko. 6:​14-17) Vayi befu kuvanga mawu mu kilumbu kitheti tuntona yandi masolo, tunkuiza tuba kiedika vayi tuisinkuiza sadila ko mu nduenga Diambu di Nzambi.

13. Buidi tulenda zabila mambu tufueti koluka?

¹³ Mvuala Polo mvandi wukamba kuidi batu baba kunkuwa, muingi bazaba mambu bafueti tuba. Nandi kabasa tomba ko kutuba ti bafueti sueka kiedika muingi kukuangidika batu. Vayi, wu bakindisa batuba kiedika mu phila yinkuiza tuadisila ndandu kuidi bankaka. (Yobi 12:11) Kuvanga mawu disi ko diambu di luelu. Bo tunlamba bidia, thangu zinkaka tunyindulanga ti bankaka bankuiza zola phil’itu yi kulambila. Bobuawu mvandi, tulenda yindula ti, phila tunkolukila yinkuiza kindisa baboso, vayi bakana ko mawu. Dedi, bawombo mu kikhulu kiawu badi kifu ki kutubanga kiedika voti kuzabikisa mayindu mawu mu phil’awu kheti bo bankoluka na bakulutu. Vayi mu bikhulu binkaka, kuvanga mawu yidi mbonosono yi kukhambu ku lukinzu. Diawu mvuala Polo katuba ti tufueti kolukanga mambu mamboti muingi tununga kuvana mvutu kuidi woso kua mutu. Mawu mansundula, kubika tubila mambu mu phil’itu vayi mu phila yintuadisila ndandu kuidi batu bankuwa mambu tunkoluka.

THANGU TUFUETI TUBANGA KIEDIKA

14. Bukiedika ti Yesu wulonga minladikini miandi mambu moso kazaba? Sudikisa.

¹⁴ Yesu waba monisanga mamboti mu thangu kaba longa kiedika kitedi mambu mawombo kuidi minlandikini miandi. (Mala. 6:34) Vayi, vaba mambu mankaka nandi kasa balongila ko. Nandi kasa balongila ko mambu moso kazaba, kibila wukinzika zindilu ziawu. Nandi wuvisa ti yisa ba ko thangu yifuana muingi kuba longa mambu mankaka. Diawu nandi katuba ti mu thangu beni khanu bawu basa nunga ko kuvisa mambu moso. (Yoa. 16:12) Mbi mawu ma tulonga?

15. Tufueti longa minlongiki mitu mi Kibibila mambu moso tuzebi mu khumbu yimueka? Sudikisa. (Zingana 25:11) (Tala mvandi foto.)

¹⁵ Kifuani ki Yesu kimmonisa ti, kuzaba kiedika kuisinsundula ko ti tufueti longa mambu moso tuzebi mu khumbu yimueka. Buidi tulenda landikinina kifuani ki Yesu? Tufueti kinzika ndilu yi batu bankoluka yitu. Wubue yindula mu kifuani ki dibakala wunkembanga Nuela va kimueka na dikanda diandi. Tuzebi ti nkungi awowo wisi ko kithuadi ayi Diambu di Nzambi. Buabu, boti mu sabala mueka tutona kulonguka Kibibila na dibakala beni tukunzabikisa ti Kibibila kinkandimina kukemba Nuela. Kheti mawu madi makiedika, bukiedika ti yidi mbonosono yi mamboti kunkuika muingi nandi muna thangu kabika kubue kembanga Nuela? Befu tuzebi ti minlonguki minkaka mi Kibibila bamfika sadilanga mambu badi mu kulonguka, vayi bankaka bamviokisanga thangu yiwombo muingi kubalula mayindu ayi mavanga mawu. Tulenda sadisa minlonguki mitu mi Kibibila bayonzuka mu kipheve, befu kuba kamba mambu bafueti zaba mu thangu yifuana ayi ku bazabikisa to mambu balenda nunga visa.—Tanga Zingana 25:11.

16. Buidi tulenda sadisa minlonguki mitu mi Kibibila batatamana kudiatila mu kiedika?

¹⁶ Kusadisa bankaka kulonguka kiedika kitedi Yave, ki tutuadisanga beni mayangi. Tulenda sadisa batu batatamana kudiatila mu kiedika befu kuba vana kifuani kimboti. (3 Yoa. 3, 4) Tufueti ku basadisa bamona ti befu tunkikininanga mu mambu tu kubalonga mu diambu di Nzambi. Mvandi, bibila bituvanganga kuba longa kiedika bifueti ba bimboti. Tufueti ku batuadisa mamboti mu kutuba mambu mamboti ayi ku balonga kiedika mu thangu yi fuana. Mvandi tufueti vananga nzitusu yoso kuidi Nzambi. Befu kuvanga mawu, tunkuiza sadisa batu bakikinina ti Yave widi Nzambi tho yi kiedika.