23-29 NGONDA YINTATU, 2026
NKUNGA 18 Vutula Matondo mu Khudulu
Vutula Matondo mu Nkhailu wu Khudulu
“Luzolo Klistu kadi mu befu lu tukindisanga.”—2 KO. 5:14.
MAMBU TUANLONGUKA
Tuemmona buidi kadika mutu mu befu kalenda monisa ti wumvuanga nkinza nkhailu wu khudulu.
1-2. Mbi khudulu yi Yesu yifueti ku tunata tuvanga ayi kibila mbi? (2 Kolintu 5:14, 15) (Tala mvandi fikula.)
BOTI bama kubotula ku tsi nzo yituluka, tuidi lufiatu ti ngie wunkuiza vanga mamoso muingi kutonda mutu wu kusadisa. Kheti bankaka mvawu balenda vanga mawu, vayi ngie wunkuiza tomba ziphila muingi kumonisa kuidi mutu beni ti ngie wumvutula matondo mu mambu ka kuvangila.
2 Dedi bo tulongukizi mu dilongi dibedi, befu tulendi nunga ko kuyivukisa befu veka mu kibila ki disumu tutambakana. Vayi khudulu yi Yesu Klistu yilenda ku tusadisa kubaka (1) nlemvu wu masumu, (2) kivuvu ti befu tuala vuka mu kivika ki masumu ayi (3) kuvutuka kubue ba kikundi kimboti na Nzambi. Mu kibila akiokio, befu tuidi luaku lu kuzinga mvu ka mvu mu nza yimona. Bukiedika, khudulu yimmonisa luzolo Yesu kadi mu batu. Ayi nandi wutona kuba luzolo alolo bo kaba ku diyilu ava kiza va ntoto. (Zinga. 8:30, 31) Mvuala Polo wusonika ti “luzolo Klistu kadi mu befu lu tukindisanga.” (Tanga 2 Kolintu 5:14, 15.) Mawu mansundula ti tufueti vanga dioso diambu muingi kumonisa ti tumvutulanga matondo mu khudulu beni.
Kheti ba tusadisa kubotuka ku khati nzo yituluka voti ba tukula ku kivika ki disumu tutambakana, befu tufueti vutula matondo kuidi mutu wu tuvukisa (Tala lutangu 1-2)
3. Kibila mbi phila mutu kamvutudila matondo mu khudulu yilenda bela disuasana?
3 Mu ziphila mbi khudulu yi Yesu yi kukindisilanga? Mvutu ngie wumvana, wulenda ba disuasana na mvutu wu mutu wunkaka. Muingi kufuanikisa, yindula batu batatu bantomba kuvanga viaje muingi bayenda ku kiokiawu kibuangu. Vayi kadika mutu mu bawu wumfumina mu divula diviakana. Zinzila bankuiza viokila zidi disuasana. Bobuawu mvandi, phila wummonisina ti wumvuanga nkinza khudulu yilenda ba disuasana mu kutala ntindu kikundi ngie widi na Yave. Mu kibila akiokio, dilongi adidi dinkuiza tubila mangumba matatu ma batu balenda vutula matondo mu khudulu: (1) Minlonguki mi Kibibila, (2) Baklistu babotama ayi (3) batu ba vekuka mu kimvuka.
MINLONGUKI MI KIBIBILA
4. Mabanza mbi Yave kadi matedi minlonguki mi Kibibila?
4 Boti ngie widi nlonguki yi Kibibila, yindula diambu adidi: Mu kulonguka zitsangu zimboti, ngie wummonisanga ti widi mu khati dingumba di batu Yave kadi mu kusadisa kuba yandi kikundi. Yave wumfionguninanga mintima mi batu. (Yoa. 6:44; Mav. 13:48) Mawu mansundula ti nandi wummonanga mangolo moso wumvanganga muingi kulonguka matedi nandi, ayi wunkuangalalanga mu kumona ndionzukulu’aku yi kipheve bo wumvanga mangolo muingi wuzingila mu phila nandi kantombila. (Zinga. 17:3; 27:11) Khudulu yi Yesu, yawu yinzibula nzila muingi wubaka kikundi kimboti na Yave. (Lom. 5:10, 11) Diawu vutulanga matondo mu khudulu.
5. Buidi minlonguki mi Kibibila balenda landikinina dilongi didi mu Filipi 3:16?
5 Mu kuba nlonguki wu Kibibila, buidi wulenda monisina ti wumvutulanga matondo mu khudulu? Phila yimueka yidi mu kulandakana dilongi mvuala Polo kavana kuidi basi Filipi bo katuba: “Boso kua bubela phila tuma konzukila mu kiphevi, tufueti tatamana kudiatila mu nzila ayoyo.” (Fil. 3:16) Mu tsekudulu yinkaka yi Kibibila, basekudila abubu lutangu alolo: “Tufueti tatamana kukuenda ntuala mu nzila yo befu tuidi mu kudiata.” Mu kulandakana dilongi adiodio, kawubika ni kiuma ki kuvutula mbusa mu nzila ngie widi, yilenda kusadisa kubaka luzingu lu mvu ka mvu.—Mat. 7:14; Luk. 9:62.
6. Mbi minlonguki mi Kibibila balenda vanga ba kumona phasi kubalula zikhadulu ziawu? (Deutelonomi 30:11-14) (Tala mvandi foto.)
6 Buabu, ngie kumona phasi kukikinina diambu dimueka ngie wulongukizi? Fiongunina diambu beni ayi sambila kuidi Yave muingi ka kusadisa kuvisa diambu beni. (Minku. 86:11) Ngie kutatamana kumona phasi kuvisa diambu beni, tula diawu va khonzo mu mua thangu, vayi kawubika kulonguka Kibibila. Buabu, ngie kumona phasi kubika diambu dimueka Kibibila kinkandimina? Tebuka moyo ti Yave kadindanga ko muingi batu ba masumu bavangila mambu balendi nunga ko. Ngie wulenda nunga kuzingila mu zithuadusulu zi Yave. (Tanga Deutelonomi 30:11-14.) Ayi Yave wukanikisa ku kusadisa. (Yesa. 41:10, 13; 1 Ko. 10:13) Diawu bika kuvonga. Bika kuyindula ngolo mu bikaku widi mu kudengana, vayi tsikika thalu’aku mu mambu moso Yave ka kuvangilanga kubunda mvandi, khudulu. Bo luzolo luaku mu Yave lumbuelama, ngie wunkuiza mona ti zithumu zi Yave zisi ko phasi. —1 Yoa. 5:3.a
Yave ka tudindanga ko mambu tulendi nunga ko. Vayi nandi wala tusadisa kuzingila mu minsua miandi (Tala lutangu 6)
7. Mbi bana babutukila mu dikanda di Zimbangi zi Yave bafueti yindulanga?
7 Buabu benu bana babutukila mu dikandi di Zimbangi zi Yave? Benu mvinu muidi minlonguki mi Kibibila. Benu minlonguki mi Kibibila milutidi nkinza matata minu badi. Kibibila kintuba: “Fikamanu Nzambi ayi Nandi wala kulufikama.” (Tia. 4:8; 1 Bi 28:9) Bo ngie wuntuama ntuala muingi kufikama Nzambi, nandi wu kufikamanga. Yave katumisanga ko to kuidi nandi mangumba ma batu. Vayi mvandi wuntumisanga kadika mutu mu befu kubunda mvandi bana babutukila mu dikanda di Zimbangi zi Yave. Mbi binzibulanga nzila muingi ngie wuba kikundi kimboti na Yave? Khudulu. Diawu vanga dioso diambu muingi wuvutulanga matondo mu yawu. (Lom. 5:1, 2) Ava wulandakana Mbambukulu Moyo, botula thangu muingi wuyindula tsundu yi lufua lu Yesu mu ngiewu. kuvanga mawu, kinkuiza kusadisa kubaka makani ma kipheve mammonisa ti ngie wumvutulanga matondo mu khudulu Yave kavana mu nzila muan’andi.b
BAKLISTU BABOTAMA
8. Buidi Baklistu babotama bamana monisa kiminu kiawu mu khudulu?
8 Boti mana botama, buna ngie mana monisa kiminu mu khudulu mu ziphila ziwombo. Dedi, ngie wuvanga mangolo muingi kufikama Yave, ayi kuzingila mu minsua miandi. Ngie wuntumamananga lutumu lu Yesu lu kulonga bankaka matedi Yave, wukivana kuidi Yave ayi wubotama. Ngie mana viokila mu zikhuamusu mu kibila ki mambu wunkikininanga? (2 Ti. 3:12) Kukindama kuaku kummonisa ti ngie wunzolanga Yave ayi wumvutulanga matondo mu khudulu nandi kavana mu nzila Yesu Klistu.—Ebe. 12:2, 3.
9. Keba keba mbi Baklistu babotama bafueti ba?
9 Mu kuba kisadi kibotama ki Yave, ngie fueti ba keba keba. Mu kukhambu ba keba keba, tulenda tadila khudulu dedi kiuma kiphamba. Buidi mawu malenda monikina? Tala kifuani ki Baklistu mu thangu bapostolo ku Efeso. Bo Yesu kavulubuka, nandi wuba tonda mu lukuikumunu luawu. Nandi wuba kamba: “Vayi, yeku sembila mu diambu adidi: ngie wubika kubue monisa luzolo waba monisanga va thonono.” (Nzai. 2:3, 4) Mambu Yesu katuba mammonisa ti mbuongimini yi kisadi ki Yave, malembe malembe yilenda ba buka kiuma kamvanganga to mu lukuiku. Nandi kalenda sambilanga, kubasikanga mu kisalu ki kusamuna ayi kulandakananga zikhutukunu, vayi kasiala bue vanganga ko mawu mu nyenzi ayi mu luzolo. Mbi ngie wulenda vanga ngie kumona ti luzolo luaku mu Yave lusiedi ko lungolo dedi bo lubela?
10. Buidi ngie wulenda tatiminina kukivana mu mambu ma kipheve? (1 Timoti 4:13, 15)
10 Mvuala Polo wukamba Timoti muingi katatamana kupisuka mu kuvanga mambu ma kipheve. (Tanga 1 Timoti 4:13, 15.) Mu kulandakana dilongi adiodio, vanga mamoso wulenda nunga, muingi wubuela kifuza kiaku mu kisaku ki Yave. (Lom. 12:11) Dedi, ngie wulenda kubamanga buboti muingi kuteka matu mu zikhutukunu voti wulenda nyevisa ndongukulu’aku veka yi Kibibila mu kubotula thangu muingi wuyindula mu mambu wunlonguka. Dedi bo vantombuluanga bisuadi muingi mbazu yitatamana, bobuawu mvandi ngie kutomba ziphila zi kubuela kuvanganga mambu amomo, ngie wala monisa ti wumvutulanga matondo mu mamoso Yave ka kuvangilanga, bulutidi mu khudulu. Mvandi mua zisabala ava Mbambukulu Moyo, ngie wulenda botudila thangu muingi kuyindula mu lusakumunu widi mu kuba Mbangi yi Yave. Bukiedika, mawu mankuiza kusadisa kutonda mu khudulu kibila yawu yi tusadisanga kuba kikundi kimboti na Yave.
11-12. Boti kisadi ki Yave kasiedi ko kifuza nandi kaba, mansundula ti Yave kasiala bue mvana ko phev’andi? Sudikisa. (Tala mvandi foto.)
11 Ngie kumona ti mu mua thangu kifuza kiaku mu kisalu ki Yave kisi ko dedi bo wuntombila, bika kuvonga ayi bika kuyindula ti Yave kasiala bue kuvana ko phev’andi. Tebuka moyo mambu mvuala Polo kasonikina kuidi Bklistu ku Kolintu bo katuba: “Vayi minu kukhambu vangila mawu mu lutia luami, kheti bobo, yitambula kiyeku mu mawu.” (1 Ko. 9:17) Mbi nandi kaba tomba kutuba?
12 Khumbu zinkaka phuila mvuala Polo kaba banga muingi kuvanga kisalu ki Nzambi kiaba dekukanga. Kheti bobo, nandi wubaka makani ma kutatamana kuvanga kisalu ki kusamuna, ayi ngie mvaku wulenda baka makani amomo. Tatamana kuvanga mambu mamboti kheti thangu zinkaka wummuena ti wisi ko beni mangolo. Sambila kuidi Yave muingi ka kuvana “phuila ayi mangolo.” (Fil. 2:13) Ba thuadusulu yimboti yi mambu ma kipheve, ayi ba lufiatu ti bumviokila thangu mambu wumvanga mankuiza tuadisa mayindu maku ayi mala kindisa luzolo luaku mu Yave.
Tatamana kuba thuadusulu yimboti yi mambu ma kipheve, kheti thangu zinkaka wisi ko phuila yi kuvanga mawu (Tala lutangu 11-12)
13. Buidi befu tulenda kukifiongunina?
13 Bumviokila thangu, buboti beni kuyifiongunina mu kulandakana nsua widi mu 2 Kolintu 13:5: “Luyifiongunina boti luidi mu kudiatila mu kiminu, ayi tatamananu kuyifiongunina benu veka.” Mawu mammonisa ti, bumviokila thangu buboti beni kuyikuvusanga: ‘Bukiedika ti yintulanga Kintinu ki Nzambi va theti mu luzingu luama?’ (Mat. 6:33) ‘Biuma yinsola muingi kuviokisa thangu bimmonisa ti minu yinlendanga mambu mambi?’ (Minku. 97:10) ‘Bukiedika ti minu yintuadisanga kithuadi ayi ndembama na zikhomba?’ (Efe. 4:2, 3) Mbambukulu Moyo lufua lu Yesu yi tuvananga luaku lu kukifiongunina befu veka ayi kuba lufiatu ti tuidi mu kuzingila mu Klistu, bika kuandi mu befu veka.c
BATU BAVEKUKA MU KIMVUKA
14. Mambu mbi mavanga bankaka kuvekukila mu kimvuka?
14 Baklistu bankaka baviokisa mimvu miwombo mu kisalu ki Yave, vayi kuntuala bayiza bika kubue ba kithuadi na kimvuka ki Yave. Kibila mbi? Ḿba mu kubila ki kukuazukila ngolo mu mambu ma luzingu. (Luk. 21:34) Bankaka bavekukila mu kibila ki mambu khomba mueka katuba voti kavanga. (Tia. 3:2) Vayi bankaka bavola masumu mangolo ayi basa kikinina ko lusalusu. Boso kuandi bubela mambu ma kuvanga kuvekuka mu kimvuka, buidi nkhailu wu khudulu wulenda kukindisila?
15. Buidi Yave kammonisinanga ti nandi wumvuanga nkinza mamemi bavekuka mu kimvuka? (Ezekieli 34:11, 12, 16)
15 Yindula mabanza Yave kadi matedi batu bavekukila mu kimvuka. Nandi kasa bamanga ko, vayi nandi wuntombanga mamemi mazimbala, wu kuba dikisanga ayi wu kuba sadisanga kuvutuka kuidi nandi. (Tanga Ezekieli 34:11, 12, 16.) Bukiedika ti Yave kalenda vangila mawu mu ngiewu? Ngete! Mu kuzaba ti widi mu kulonguka dilongi adidi, mammonisa ti ngie ntima wumboti widi. Yave wumona mambu mamboti mu ngie diawu ka kutumisa mu kimvuka kiandi ayi kantomba muingi wuvutuka kuidi nandi.
16. Mbi mamemi mazimbala balenda vanga muingi bavutuka kuidi Yave? (Tala mvandi foto.)
16 Mu mua buku Volte para Jeová muidi mambu amama malenda kukindisa: “Ba lufiatu ti Yave wala kusadisa kuvutuka kuidi nandi. Nandi wunkuiza kusadisa kununga kiunda, kubika kukuazuka ayi kubaka ndembama mu ntima yinkuizilanga mu kuba kilunzi kidiodila. Bosi ngie wunkuiza bue baka mangolo ma kusadila Yave va kimueka na zikhomba zi kipheve. Tebuka mvandi moyo ti, bakulutu ba kimvuka badi phuila yi kusadisa. Bawu balenda ba buka kibuangu ki kusuamina phemu ayi kibuangu ki kusuamina kivuka kingolo. (Yesa. 32:2) Muingi kuvutula matondo mu khudulu wukiyuwusa: Mbi yilenda vanga muingi kuzonza mambu yidi na Yave? (Yesa. 1:18; 1 Pet. 2:25) Dedi, buidi wummuena, wulenda nunga kulandakana lukutukunu ku Nzo Kintinu? Wulenda nunga kukoluka na nkulutu mueka wu kimvuka ayi kudinda lusalusu boti kuba, muingi wuvutuka kubue longuka Kibibila? Ngie wulenda ba lufiatu ti Yave wala tambudila minsambu miaku ayi wala sakumuna mangolo wumvanga ma kuvutula matondo mu khudulu yi Yesu.
Wukiyuvusa: ‘Mambu mbi yilenda vanga bubu muingi yizonza mambu yidi na Yave?’ (Tala lutangu 16)
BUIDI WULENDA VUTUDILA MATONDO?
17-18. Mambu mbi tulenda vanga ava Mbambukulu Moyo?
17 Yesu wutuba ti Yave wuvana khudulu muingi “batu boso ba kunlekila kiminu babika kubungu, vayi muingi babaka luzingu lu mvu ka mvu” (Yoa. 3:16) Khudulu yizubula nzila muingi Yave ka tuvukisa mu masumu ayi lufua. Diawu tufueti vanga dioso diambu muingi kuvutulanga matondo. (Lom. 3:23, 24; 2 Ko. 6:1) Mu bilumbu ava Mbambukulu Moyo, befu tuidi luaku lu kuyindula luzolo Yave ayi Yesu ba tumonisa, ayi luzolo beni lufueti ku tunata kuba vutula matondo.
18 Mbi ngie wala vanga mu kibila ki khudulu? Mvutu widi disuasana mu kutadila kadika mutu. Vayi wulenda ba lufiatu ti Yave wala sakumuna mangolo wumvanga ma kuba kithuadi na mafunda na mafunda ma bisadi biandi binkaka, babika kuzingila muingi kuyikuangidika baveka vayi muingi kukuagidika mutu no wufuila mu kibila kiawu.—2 Ko. 5:15.
NKUNGA 14 Zitisa Yesu, Ntinu Wumona wu Ntoto
a Muingi kukusadisa kukonzuka mu kipheve bo wunlonguka Kibibila, sadila quadro “Makani mami” madi mu buku Baka Mayangi ma Mvu ka Mvu!
b Muingi wubuela zaba buidi wulenda konzukila mu kipheve, tala dilongi dintuba “Jovens—Vocês São Responsáveis Por Sua Própria Salvação” mu Kibanga ki Nsungi ki Ngonda Kumi Wadi mvu 2017.
c Muingi wubuela zaba buidi wulenda vutudila matondo, tala dilongi dintuba “O que o Motiva a Servir a Deus?” mu Kibanga ki Nsungi kilumbu 15 Ngonda Sambanu, mvu 1995.