Mambu mbi lenda kue mona ku zikhutukunu zieto?

Batu bawombo kabayendaka ko diaka ku sambila bila babakanga ko mimvutu mu biuvu bitadidi luzingu ayi babakanga ko lukindusu. Vayi, bila mbi yididi mbote wukutakananga ku zikhutakanu zi Zimbangi zi Yehova? Mambu mbi wela mona kuna?

Wela mona khini vuanda vakimosi ayi batu bobo beta zolana ayi beta banza badiawu. Baklisto ba thete baba bakubuku mu bimvuka, ayi babekutakananga mu diambu di sambila Nzambi, longuka Bibila, ayi kindasana. (Ebeleo 10:24, 25) Ku zikhutukunu beni, ko babemonisinanga nzola, babe kukimonanga ti badi kithuadi ayi bakundi ba kiedika, baphangi mu kipheve. (2 Tesalonika 1:3; 3 Yoane 14) Beto phe tueta landakana kifuani kiawu ayi tueta mona kiese ki phila yoyi.

Wela mona ti longuka sadila malongi ma Bibila kueta nata mambote mawombo. Dede kuandi mu thangu yi thama, bilumbu biabi phe, babakala, banketo ayi bana bawu betakutakana va kimosi. Babakala bobo bazebi bumbote longa beta sadila Bibila mu diambu di kutusadisa tuzaba sadila malongi mandi mu luzingu lueto lu lumbu ka lumbu. (5 Mose 31:12; Nehemia 8:8) Mutu woso lenda vana mimvutu ti disolo beni dilombidi ti bankutakani batuba, ayi mutu woso lenda yimbila. Yeta kutuvana diluaku di tubila vuvu kieto.—Ebeleo 10:23.

Wela mona ti minu kiaku kiela ba kingolo. Ntumua Polo wukamba kudi kimvuka kimosi ti: “Bila phuila yiwombo yidi yama mu kulumona, . . . muingi tubombasana va kimosi, beno ayi minu, mu minu kioki tuididi kithuadi.” (Loma 1:11, 12) Mu thangu tueta kutakana khumbu zioso kithuadi ayi ziphangi zieto baklisto, minu kieto ayi phuila eto yi kinzika minsiku mi Nzambi yeta buelama ngolo.

Tukulomba wiza ku lukutukunu lueto mu khumbu yinkuiza muingi wumona ngeyo veka mambu momo tumetubila. Tuela kuyamba mu kiese kiwombo. Wela futa ko zimbongo mu kota—tukongulanga zitsisani ko.

• Kifuani ki banani tueta landakana mu phila yi sadila zikhutukunu zieto e?

• Mambote mbi tulenda baka enati tueta kutakana?