Kiuvu kikondo phasi kioki nioso kuandi mutu kalenda yuvula

Marie ayi nnuni’andi John,a beta zingila ku tsi yoyi nsamu wumboti wulenda samununu kuidi bisadi biwombo biobi biba ku Philippines. Mu thangu yi vunga ki COVID-19, Marie wutona longuka Bibila ayi batu bika kaka bobo badi ku tsi yoyi keta vuanda vayi phe ayi mu bibuangu binkaka bi nza. Bue kabutudila?

Marie wuyuvula minlonguki miandi mi Bibila: “Luzebi mutu nioni wulenda yangalala longuka Bibila?” Bawu kikinina ti widi, weba kubalombanga muingi kakizabikisa kuidi bawu. Kubayuvula kiuvu beni kioki kikambulu phasi, kueba bimisanga mim’butu. Bila mbi? Bila batu bobo beta yangalala Mbembo Nzambi, khumbu ziwombo beta zola kuyitubila kuidi bakhomba ziawu ba dikanda ayi kuidi bakundi bawu bamfunu. Kiuvu beni mim’butu mbi kibimisa?

Jasmin, nlonguki wu Bibila wu Marie, wummonisa kuidi balonguki baya bamona bobo bayangalala longuka Bibila. Wumosi mu bawu, Kristine, wuyangalala buwombo ndongokolo’andi ayi wulomba Marie balongukanga khumbu wadi mu sabala. Mu thangu Marie kanyuvula enati zebi mutu wunkaka nioni lenda yangalala longuka Bibila, Kristine wumvutudila: “Ninga, ndiekumonisa kuidi bakundi bama.” Mu sabala kuandi yimosi, Kristine wumonisa Marie bakundi baya bobo bazola longuka Bibila. Kuntuala, Kristine wummonisa kuidi bakundi bandi bankaka ayi bawu phe babutudila diaka.

Kristine wutomba phe ti dikanda diandi ku Philippines dilonguka Bibila. Diawu, wukamba muan’andi wunketo Andrea. Va thonono, Andrea wutuba ti: ‘Bambangi zi Yehova badi mua dibundu, ayi bawilukilanga ko mu Yesu ayi bawu Bibila kaka ki Masonoko ma ki Ebelewo beta sadila.’ Vayi khumbu kuandi mosi kalongukila, wuyiza bakula ti mayindu beni momo maba kuandi ma luvunu. Mu thangu keba longukanga, weba tubanga ti: “Bo yidi ti Bibila kintuba mambu beni, madi kaka makiedika!”

Kuntuala, Andrea wumonisa Marie kuidi bakundi bandi buadi ayi kuidi nkundi’andi mosi wu kisalu, ayi bawu boso batona longuka Bibila. Mu buela, Marie mu kondo ku zaba, nguandi nleki Andrea nioni widi mu dizina di Angela nioni wuba phovo, mvandi phe weba landakananga kuandi ndongokolo yi Bibila. Ayi lumbu kimosi Angela wulomba Andrea kammonisa kuidi Marie muingi niandi phe kalongukanga Bibila ayi Marie. Angela weba yangalalanga mambu momo keba longukanga. Mu ngondi kuandi yimosi, wubuila mu ntu masonoko mawombo ma Bibila ayi wutomba ti kalongukanga mu khumbu ziya mu sabala! Mu lusadusu lu Andrea, Angela wuyiza tona kutakana mu zikhutukunu zioso mu nzila zoom.

Mu thangu Marie kayiza zaba ti nnuni Kristine, Josué, weba banga pfika pfika yi buangu kioki beba longukilanga, Marie wunyuvula ti kalenda kuandi yangalala kota mu ndongokolo beni. Josué wutuba ti: “Thidi kuama wa, vayi kadi kundiuvula kadi kiuvu kimosi; ngeyo kundiuvula, ndiedi kuama.” Miniti mitanu kuandi tutula mu ndongokolo, wuyuvula biuvu biwombo viokila Kristine ayi wuyangalala ti tutatamana tubila mambu ma Bibila.

Kiuvu ki Marie kioki kisi bandi phasi ko, kitula ti batu bawombo balonguka Bibila. Bo bayiza wokila ngolo, wubaka zikhubukulu ti bankaka balonguka ayi Bambangi zinkaka zi Yehova. Yawu yitula ti Marie katona longuka Bibila na 28 ki batu mu zitsi ziya ziviakana.

Jasmin, nlonguki wutheti wu Bibila nioni batubidi mu disolo beni diadi, wuyiza baka mbotama mu ngondi yi Avril 2021. Kristine wubaka mbotama mu ngondi yi Mai 2022 ayi wuvutuka ku Philippines mu diambu di kaba va kimosi ayi dikanda diandi. Balonguki buadi bankaka bobo Kristine kamonisa kuidi Marie bawu phe babaka mbotama. Mua ndambu zingondi kuntuala, Angela phe wuyiza baka mbotama ayi lumbu kiaki wuyika n’zibudi nzila wu thangu ka thangu. Nnuni Kristine, Josué ayi muan’awu wunketo, Andrea, ayi balonguki bawombo bankaka, bawu phe balembo monisa khulama yimboti.

Mu tandu kitheti, nsamu wumboti weba fika tembikininanga kuidi bakhomba zi dikanda ayi kuidi bakundi. (Yow. 1:41, 42a; Mav. 10:24, 27, 48; 16:25-33) Bila mbi ka wulendi yuvudila ko kuidi balonguki baku ba Bibila ayi kuidi batu bobo beta yangalala longuka Bibila kiuvu kiaki: “Luzebi mutu wunkaka nioni maka yangalala longuka Bibila?” Enati yuvudi kiuvu beni kioki kikambulu phasi kuidi balonguki baku, bulendakana ngeyo phe mawu baka batu bawombo bobo batidi longuka Bibila.