Bue bubela nkundi wukiedika

WUME keta kukimona ti widi ngeyo veka mu diambu di nuanisa diambu dimosi? Tulembo zingila mu bilumbu bi “zithangu ziphasi” biobi bilenda kutuvongisa ayi tukimona beto veka. (2 Tim. 3:1) Diawu, mu beto veka tulendi ko nunga nuanisa mambu maphasi ma luzingu. Bibila kimonisini mfunu wuba bakundi bakiedika mu “thangu yi ziphasi.”​—Zin. 17:17.

BUE NKUNDI WUKIEDIKA KALENDA SADISILA

Thumu Polo wubaka mamboti mu kikundi kioki katula ayi bakundi bandi bobo batula yandi vuayaje. (Kol. 4:7-11) Mu thangu bankanga mu buloko ku Loma, bakundi bandi badukisa biyeko biobi niandi veka ka kasi koka ko bue dukisa. Mu kifuani, Epafolodite wuvana kuidi Polo bima bimfunu biobi bakhomba ba babakala ayi ba ­baketo ba basi Filipi batinda. (Flp. 4:18) Titsike wutudisa minkanda mi Polo kuidi bimvuka biphila mu phila. (Kol. 4:7.) Mu lusadusu lu bakundi bandi, Polo wusala kisalu kiandi ki tsamununu kadiambu ko beba kunsunga kuidi disodi mu khati nzo voti mu thangu kaba niandi veka mu buloko. Bue wulenda bela nkundi wukiedika lumbu kiaki?

Bifuani bi batu ba bilumbu bieto biabi, bilembo monisa mfunu wuba nkundi wukiedika. Tubonga kifuani ki khomba mosi wunketo nioni wuyiza ba nkundi wukiedika wu Elisabet, nioni widi n’zibudi nzila wu thangu ka thangu ku Espagne. Mu thangu minganga mibakula nguandi Elisabet kimbevo ki kanser kioki kilenda kumvonda, khomba beni wunketo wuntindila zimesaje ziwombo zi lukindusu ziozi zisimbimina mu bibuku bi Bibila. Elisabet tubidi ti “Zimesaje beni zitsadisa ndiba wukinda kadika lumbu mu kondo kukimona ti minu veka ndidi.”​—Zin. 18:24.

Tulenda yonzula bukundi bueto na bakhomba zieto ba babakala ayi ba baketo mu thangu tulembo basadisa basala kisalu ki tsamununu ayi bakutakana mu zikhutukunu. Mu kifuani, wulenda sadisa khomba mosi wubakala voti wunketo nioni widi wuyonzuka mu kunnata ku lukutukunu voti mu kisalu ki tsamununu? Enati wubutudidi, bukiedika niandi ayi ngeyo malu vanasana lukindusu. (Loma 1:12) Vayi Bakristu bankaka basi ko diluaku dibimina ku nganda mu bila ki mambu maphasi. Bue tulenda bela bakundi bakiedika kuidi bawu?

BA NKUNDI WUKIEDIKA KUIDI BAKOTA NZO

Bakristu bankaka badi na zithatukusu zi nitu voti bankaka badi na mambu momo malembo bakakidila babika kutakana mu zikhutukunu mu nzo yi Kipfumu. Tubonga kifuani ki David nioni babakula kimbevo ki kanser. Viokila ngondi zisambanu kabakila mbukulu mu kimbevo ki kanser (chimiothérapie). Mu thangu yoyi beba kumvanina mbukulu, David ayi nketo’andi Lidia, balandikinina zikhutukunu mu nzila yi telefoni voti mu nzila yi oridinatere.

Lusadusu mbi babaka kuidi bakundi bawu ba kimvuka? Kumanima ma kadika lukutukunu, bakhomba bankaka beba tulanga ngolo mu solula ayi David na Lidia mu zoom. Mu buela, mu thangu David ayi Lidia beba vutulanga mimvutu mu lukutukunu, bilumbu bilandakana kuntuala beba kubatindilanga zimesaje zi lukindusu ziozi zieba banga kuidi bakhomba ziawu Bakristu. Mim’butu mbi dibimisa? David ayi Lidia beba thumbu kukimonga ko ti bawu veka badi.

Tulenda balula mua ndambu mambu mu momo tueta vanga kadika lumbu muingi tusala kisalu ki tsamununu ayi bawu. Mu phila beni yoyi, buawu tukuiza bamonisina ti tuisi kubazimbakana ko. (Zin. 3:27) Bila mbi dilenda bela diambu dimboti mu kubasonikinanga mu samuna ayi bawu mu nzila yi minkanda voti mu nzila yi telefoni? Batu bobo bakota nzo balenda nunga kutakana ayi beto mu zikhutukunu zi kisalu ki tsamununu mu nzila yi zoom. David ayi Lidia bayangalala buwombo mu khubukulu beni yoyi. David sudikisidi ti: “Ba va kimosi ayi minsamuni mi grupi’eto yi kisalu ki tsamununu mu diambu di mua disolo dikhufi ayi lusambulu, lukala lukindusu lunneni kuidi beto.” Mu buela, enati yisi kuandi ko vonza mu kubutudila, wulenda bakanga zikhubukulu zinata nlonguki’aku wu Bibila kuidi khomba nioni wukota nzo mu diambu di niandi phe kabaka bubela mu ndongokolo’eno yi Bibila.

Mu thangu tulembo sadi va kimosi na bakhomba ba babakala ayi ba baketo bobo bakota nzo ayi mu thangu tummona bikadulu biawu bimboti, tueta kuiza ba pfika pfika ayi bawu. Mu kifuani, mu thangu widi mu kisalu ki tsamununu ayi minsamuni miphila yoyi ayi mu thangu wummona madiela mawu masadila Mbembo Nzambi mu diambu di simba ntima wu mutu, bukiedika mawu luta kubayangalala. Mu thangu wulembo buedi bakhomba ziaku bakristu mioko wulenda baka bakundi bamona.​—2 Ko. 6:13.

Polo wubaka lukindusu mu ba va kimosi ayi nkundi’andi Tite. (2 Ko. 7:5-7) Disolo beni dieta kutubambula moyo ti tulenda vana mbombolo bika kaka mu kukitula va buangu ki batu bobo badi mu phuila, vayi mu banga phe va kimosi na batu bobo tulenda sadisa.​—1 Yow. 3:18.

BA NKUNDI WUKIEDIKA MU THANGU YI ZINZOMONO

Bakhomba zieto ba babakala ayi ba baketo ku Russie bamonisa kifuani kimboti mu salasana bawu na bawu. Tubonga kifuani ki Sergey ayi nketo’andi Tatyana. Mu thangu bafuya nzo’awu kuidi baphulusi, babanata muingi babayuvula biuvu. Tatyana batuamina yekula ayi wuvutuka ku nzo’awu. Sergey wutuba ti: “Mu thangu Tatyana kavutuka ku nzo, khomba mosi wunketo wumonisa kibakala ayi wuyiza va muelo wu nzo’eto. Bakundi bankaka bayiza kutusadisa mu mana bue kupika bima ku nzo’eto.”

Sergey buesidi bue tuba ti: “Ndieta luta zola buwombo Zingana 17:17, yoyi yitubidi ti: ‘Nkundi wukiedika weta monisa luzolo mu zithangu zioso ayi widi khomba nioni butukidi mu thangu yi ziphasi.’ Ziphova ziozi ziluta bue ba mfunu kuidi minu mu thangu beni yina yi zinzomono yoyi ndisi koka ko kuyinunga minu veka. Yehova wuphana bakundi bobo bakhindisa ayi batsadisa.”a

Bobuawu bobo tulembo luti denginina mambu mawombo maphasi, buawu tuididi phuila yi bakundi bobo balenda kutusadisa. Tuela luta ba phuila yi bakundi beni mu thangu yi ziphasi zinneni. Diawu tutula momo tulenda tula muingi tuba bakundi bakiedika tona thangu yayi!​—1 Pi. 4:7, 8.