Sokudila bambasi bakuikama

1-2. a) Mu mbi tuididi disuasanu ayi bambasi? b) Mu mambu mbi tudedikini ayi bambasi?

MU THANGU Yehova kabenda mu kiedika, wutedisa mu diambu di wukota mu dikanda di bisadi bi luzolo biobi bieta kunsambila biobi bidi mu zitsi ziphila mu phila, mu bawu, muidi diaka phe ayi zimilio zi bambasi bakuikama. (Dan. 7:9, 10) Mu thangu tueta yindula bambasi, tukala yindula phila yoyi badidi disuasanu ayi beto. Mu kifuani, tona thama, bambasi bakala mu luzingu viokila beto. (Yobi 38:4, 7) Bawu balutidi ngolo viokila beto. Bawu badi basantu ayi badi basonga mu phila yoyi tulendi ko bela banga bawu, bo tuidi batu bakambu lunga.​—Luka 9:26.

² Vayi, kadiambu ko disuasanu beni diodi, tuidi na mambu mawombo momo tudedikini ayi bambasi. Mu kifuani, banga bambasi, tulenda sokudila bikadulu bimboti bi Yehova. Banga bambasi, beto phe tulenda baka zinzengolo beto veka. Banga phila yoyi badidi, wumosi mosi mu beto widi na dizina diandi veka, ayi bumutu buandi, buba phe ayi biyeko biphila mu phila. Ayi banga bambasi, tufueti sambila mvangi’eto.​—1 Pi. 1:12.

3. Mambu mbi tulenda longuka kuidi bambasi bakuikama?

³ Bo tudedikini mu mambu mawombo ayi bambasi, kifuani kiawu kimboti kilenda kutukindisa ayi kutukienzula. Diawu, tulenda longuka malongi mawombo mamboti kuidi bawu. Mu disolo diadi, tueka mmona phila yoyi tulenda sokudila kadulu ki kukikulula ki bambasi bakuikama, luzolo luawu mu diambu di batu, mvibudulu’awu ayi zingolo ziozi beta tula mu diambu di tanina kimvuka muingi kitatamana ba kivedila.

BAMBASI BADI NA KADULU KI KUKIKULULA

4. a) Bue bambasi beta monisina kadulu ki kukikulula? b) Bila mbi bambasi badidi na kadulu ki kukikulula? (Minkunga 89:7)

⁴ Bambasi bakuikama bakala na kadulu ki kukikulula. Kadiambu ko bazebi mambu mawombo, badi na ngolo ayi nduenga, beta tumukina zithumunu zi Yehova. (Nku. 103:20) Mu biyeko biobi beta dukisa, kadi khumbu bakiniemisa ayi bamonisanga ko ti bawu balutidi zingolo viokila batu. Beta dukisa mu zikhini zioso luzolo lu Nzambi buba ti mazina mawu masi zabakana ko.a (1 Mo. 32:24, 29; 2 Mtn. 19:35) Beta manga tambula nkembo wowo wufueni kuidi Yehova. Bila mbi bambasi badidi kadulu ki kukikulula kiphila yoyi? Bila beta zola Yehova ayi beta kummonisina lukinzu luwombo.​—Tanga Minkunga 89:7.

5. Bue mbasi mosi kamonisina kadulu ki kukikulula mu vana thumu Yowani ndongi? (Tala phe foto.)

⁵ Tutala phe diaka disolo dimosi diodi dimmonisa ti bambasi kadulu ki kukikulula bakala. Mu mvu 96 T.E., mbasi yimosi nioni kasi zabakana ko dizina, wumonisa thumu Yowani kimona meso kingitukulu. (Tso. 1:1) Yowani mbi katula mu thangu kamona kimona meso beni? Wedi katomba sambila mbasi beni. Vayi vangu beni ki kipheve kikuikama kinkandika mu nsualu woso, mu tuba ti: ‘Kadi tula bobo! Minu ndidi sadi banga ngeyo! Ayi ndidi sadi ki zikhomba ziaku . . . sambila Nzambi!’ (Tso. 19:10) Wowo widi mvutu wukukikulula! Mbasi beni kasi yangalala ko ti bamvana nkembo voti ban’zitisa. Mu nsualu woso, wukamba Yowani kasambila Yehova Nzambi. Mbasi beni kasi monisa ko ti niandi lutidi mfunu viokila Yowani. Kadiambu ko mbasi beni wusadila Yehova mu mimvu miwombo ayi niandi wuluta ngolo viokila Yowani, mu kukikulula koso wusolula ayi Yowani banga mvika yandi. Ayi kadiambu ko mbasi beni wukolusa Yowani, kasi kunteminina ko ayi kasi monisina ko thumu beni nioni wuyonzuka mambu mangolo. Va buangu kabutudila, mbasi beni wunkambila mu zanti. Bulendakana wuzaba ti Yowani tsisi yingolo kaba.

6. Bue tulenda sokudila kadulu ki kukikulula ki bambasi?

⁶ Bue tulenda sokudila kadulu ki kukikulula ki bambasi? Beto phe tulenda dukisa biyeko bieto mu kondo kukiniemisa ayi mu kondo tomba nkembo mu mambu momo tumvanga. (1 Ko. 4:7) Tulendi ko yindula ti tulutidi batu bankaka mu bila tume sadila bilumbu biwombo voti mu bila kioki tuidi na biyeko biobi bawu bakambulu. Diawu, bobuawu bobo tum’bela na biyeko biwombo, buawu tufueti luta kukikuludila va ntuala batu bankaka. (Luka 9:48) Banga phila buididi bambasi, beto phe tufueti ba bisadi mu diambu di batu bankaka. Tubika kukitulanga va ntuala.

7. Mu thangu tueka nkolusa mutu ayi tueka mvana mutu zindongi, bue tulenda monisina kadulu ki kukikulula?

⁷ Tulenda monisa kadulu ki kukikulula mu thangu tunsemba mutu​—mu kifuani khomb’aku Mukristu voti muan’aku. Thangu zinkaka mu thangu tumvana ndongi, yeta tombana ti tuvana ndongi yingolo. Banga phila kuandi mbasi kakolusila Yowani mu zanti yonso, beto phe tulenda vana mutu ndongi yingolo mu kambu kunlueka. Enati tukadi kitadila ti beto tulutidi mutu nioni tumvana zindongi, tulenda vana zindongi zi Bibila mu phila yi luzitu ayi mu phila yi luzolo.​—Kol. 4:6.

BAMBASI BETA ZOLA BATU

8. a) Mu tadila Luka 15:10, bue bambasi beta monisina luzolo kuidi batu? b) Mambu mbi bambasi beta vanga mu diambu ditedi kisalu ki tsamununu? (Tala phe va baba.)

⁸ Bambasi basi ko thama voti batatukilanga ko batu. Beta zola batu. Beta mona khini mu thangu nsumuki kabaludi mavanga​—yin’zola tuba mu thangu dimemi dizimbala divutukidi kuidi Yehova voti mu thangu mutu kabaludi nzingulu’andi ayi kotidi mu kiedika. (Tanga Luka 15:10.) Mu kipfuzi kioso, bambasi beta buela phe mioko mu kisalu ki tsamununu ki Kipfumu. (Tso. 14:6) Kadiambu ko basamuninanga ko batu mu khumbu mosi, balenda tuadisa nsamuni kuidi mutu nioni widi phuila yi zaba Yehova. Kadiambu ko, tulendi ko tuba mu sikididi kioso ti bambasi bawu batutuadisidi kuidi mutu wumosi plina. Vayi Yehova kalenda kuandi sadila ziphila zinkaka banga pheve santu’andi mu diambu di sadisa batu ayi tuadisa bisadi biandi. (Mav. 16:6, 7) Kadiambu ko weta sadila phe buwombo bambasi bandi. Diawu, mu thangu tunsamuna nsamu wumboti wu Kipfumu ki Nzambi tulenda ba sikididi ti maba ba ayi beto muingi batubuela mioko.​—Tala ankadre “Minsambu miawu mivanunu mvutu.”b

9. Bue tulenda sokudila luzolo lu bambasi mu diambu di batu?

⁹ Bue tulenda sokudila luzolo lu bambasi mu diambu di batu? Mu thangu tuwilu ti mutu mevutuka mu kimvuka, tulenda ba mu zikhini banga phila bambasi beta bela mu zikhini. Tulenda tula momo tulenda tula mu diambu di tubue yakula khomba beni ayi kummonisa ti tueta kun’zola. (Luka 15:4-7; 2 Ko. 2:6-8) Tulenda phe sokudila bambasi mu tula zingolo mu diambu di kisalu ki tsamununu. (Mpo. 11:6) Bobuawu bobo bambasi beta kutubuedila mioko mu thangu tueta ba mu kisalu ki tsamununu, beto phe tulenda tomba maluaku mabuedila bakhomba zieto ba babakala ayi ba baketo mioko mu thangu badi mu kisalu kiawu ki tsamununu. Mu kifuani tulenda tomba maluaku ma samuna va kimosi ayi khomba nioni ka katudidi ko bilumbu biwombo mu kisalu ki tsamununu. Tulenda sadisa bakhomba ba babakala ayi ba baketo bobo bame yonzuka voti bobo badi bieta mu diambu di bawu phe basala kisalu ki tsamununu.

10. Dilongi mbi tulenda baka mu kifuani ki Sara?

¹⁰ Mambu mbi malenda salama enati mambu ma luzingu lueto malembo tukakidila mu sadila Yehova mu phila yoyi tuntombila? Tulenda phe tomba maluaku masadila va kimosi ayi bambasi mu thangu tuidi mu kisalu ki tsamununu. Tutadila kifuani ki Sara,c khomba wumosi wunketo ku Inde. Kumanima masala kisalu kin’zibudi nzila mu nduka nduka 20 ki mimvu, Sara wuyiza bela kimbevo ayi wuyiza ba va mbuka yi kimbevo thangu ka thangu. Wukitatikisa buwombo mu phila yoyi kayiza bela. Vayi mu lusadusu lu luzolo lu dikanda diandi di kipheve ayi mu lusadusu lu lutangulu lu Bibila, Sara wuyiza bue vutukila zikhini ziandi malembi malembi. Kadiambu ko wuyiza fuanikisa kisalu kiandi ki tsamununu mu tadila phila yoyi kayiza bela. Bo kasi bue kokanga ko kala mu diambu di sonika minkanda, kisalu kiandi ki tsamununu kiyiza sukila kaka mu nzila yi telefoni. Weba telanga mu telefoni batu bobo kabe vutukilanga ayi beba kunkambisanga batu bankaka bobo batidi longuka Bibila. M’butu mbi dibimisa? Mu mua ndambu zingondi kuandi, Sara wuyiza ba na 70 ki minlonguki mi Bibila ayi kasi kuiza mana bue koka ko kubatuadisanga! Diawu, wuyiza kabula bankaka kuidi bakhomba ba kimvuka. Balonguki bandi bawombo beta kutakana mu zikhutukunu zieto. Bambasi beta ba mu zikhini ziwombo zisala va kimosi ayi bakhomba ba babakala ayi ba baketo banga Sara nioni weta tula zingolo mu diambu di samuna nsamu wumboti wu Kipfumu ki Nzambi!

BAMBASI BETA MONISA MVIBUDULU

11. Bue bambasi bakuikama bamonisina mvibudulu wungolo?

¹¹ Bambasi bakuikama badi bifuani bimboti bi mvibudulu. Bamonisina kambu ku busonga ayi mavanga mambimbi mvibudulu mu zimili zi mimvu. Bamona Satana ayi bivangu bi kipheve biobi bisala yawu va kimosi mu thangu bitombukila Yehova. (1 Mo. 3:1; 6:1, 2; Yuda 6) Bibila kieta tubila mbasi yimosi wukuikama nioni wunuanisa mu bilumbu biwombo mbasi mosi yingolo yi Satana. (Dan. 10:13) Mu buela, tona mu na Adamu ayi Eva, bambasi batu kuandi bafioti bame mona bobo babaka kuawu nzengolo yisadila Yehova. Kadiambu ko mambu beni momo, bambasi bakuikama balembo tatamana sadila Yehova mu zikhini zioso ayi mu kipfuzi. Ayi bazebi ti mu thangu yoyi yifueni, Nzambi wela botula mambu moso momo makambulu masonga.

12. Mbi bilenda kutusadisa tumonisa mvibudulu?

¹² Bue tulenda sokudila mvibudulu wu bambasi? Banga bambasi, tulenda dengana kambu kubusonga ayi tulenda dengana kimbeni. Vayi banga bambasi, beto phe tueta kikinina ti mu thangu yoyi yifueni, Nzambi wela botula mambu moso mambimbi. Diawu, banga bambasi bakuikama, “tubika vonga vanganga mambu mamboti.” (Nga. 6:9) Ayi Nzambi wutuveni tsila yi kutusadisa muingi tutatamana monisa mvibudulu. (1 Ko. 10:13) Tulenda sambila Yehova muingi katuvana pheve santu’andi yoyi yim’butanga mvibudulu ayi zikhini. (Nga. 5:22; Kol. 1:11) Mambu mbi wufueti vanga ngeyo dengana kimbeni? Luta tudilanga buwombo Yehova ntima ayi kadi monanga tsisi. Yehova wela kusadisa ayi wela kuvana zingolo thangu zioso.​—Ebe. 13:6.

BAMBASI BETA SADISA MU DIAMBU DI TANINA KIMVUKA KIBA KIVEDILA

13. Kiyeko mbi bambasi badi mu bilumbu bitsuka? (Matayi 13:47-49)

¹³ Mu bilumbu bitsuka, Yehova wuvana bambasi kiyeko kimosi kimfunu. (Tanga Matayi 13:47-49.) Kisalu ki tsamununu kilembo bendi zimilio zi batu baphila mu phila. Bankaka mu bawu, beta baka zikhubukulu mu diambu di baba Bakristu bakiedika, vayi bankaka babutudilanga ko. Bambasi babaka kiyeko “kivasa batu bambimbi mu batu bamboti.” Bankaka babaka kiyeko kisadisa, tanina buvedila bu kimvuka. Yawu ko yinsundula ti muna batu bobo balembo kuawu kutakana ayi beto, buna balendi ko bue vutuka voti yawu ko yinsundula ti buna kadi khumbu kimvuka kiela bue ba mambu. Kadiambu ko buawu, tulenda ba na sikididi ti bambasi balembo sadi kisalu kingolo mu diambu di tanina buvedila bu kimvuka.

14-15. Bue tulenda sokudila bambasi ayi monisa ti tutidi kimvuka kitatamana ba kivedila? (Tala phe zifoto.)

¹⁴ Bue tulenda sokudila bambasi ayi monisa ti tutidi kimvuka kitatamana ba kivedila? Enati tulembo tudi ngolo mu tanina kimvuka kiba kivedila mu mavanga ayi mu kipheve. Diawu, tufueti tula ngolo mu tanina mintima mieto mu sobula bakundi bamboti ayi mu loza mavanga moso momo malenda kutubebisa. (Nku. 101:3) Tulenda phe sadisa bakhomba zieto Bakristu batatamana ba bakuikama kuidi Yehova. Mu kifuani, mbi tufueti tula enati tumueni khomb’eto mosi Mukristu vengi disumu dinneni? Luzolo lolo tuidi mu diambu di niandi lufueti kutupusa tunkindisa katuba disumu diandi kuidi bakulutu. Enati kakadi kamba bakulutu disumu diodi kavengi, beto veka matu kamba bakulutu disumu beni diodi kavengi. Tufueti tula ti khomba nioni widi wuvola mu kipheve, kabaka lusadusu lunsualu nsualu!​—Zaki 5:14, 15.

¹⁵ Diambu dikiadi, batu bankaka bobo beta vanga masumu manneni, bafueti botulu mu kimvuka. Diawu, enati batu baphila yoyi ba babotudi mu kimvuka, “tulendi ko bue tula kikundi” ayi bawu.d (1 Ko. 5:9-13) Khubukulu beni yoyi, yeta tula ti kimvuka kitatamana ba kivedila. Mu buela, beto kambu tula bukundi ayi batu bobo babotulu mu kimvuka, buawu matu bamonisina buphombo. Beto ba basiama mu kondu tula bukundi ayi bawu, kulenda kubapusa batomba vutukila Yehova. Bawu vutuka mu kimvuka, matu ba mu zikhini buba phe Yehova ayi bambasi.​—Luka 15:7.

16. Mu ziphila mbi wulenda tudila zingolo mu sokudila bambasi?

¹⁶ Luidi lukumu lunneni mu phila yoyi Yehova katusadisidi tuzaba bambasi ayi tusala kithuadi ayi bawu! Tusokudila bikadulu biawu bimboti: Kukikulula kuawu, luzolo luawu lumboti mu diambu di batu, mvibudulu’awu ayi mu phila yoyi beta buedila mioko mu diambu di vedisa mavanga ayi kipheve ki kimvuka. Beto sokudila bambasi bakuikama, beto phe tulenda ba mu khati dikanda di bisadi bi Yehova mvimba mvimba.