“Tatamana landakana” Yesu kumanima ma baka mbotama

1-2. Bue luzingi lueta balukila kumanima ma baka mbotama?

DIDI diambu dikhini baka mbotama ayi ba wumosi mu dikanda di Yehova. Bo babeki diluaku beni maba kikinina ziphova zi nsoniki wu minkunga Davidi, nio wutuba ti: “Mayangi [Yehova] kuidi bobo wusobula ayi wunata mu ba va widi muingi bazingila mu luphangu luaku.”​—Nku. 65:4.

² Yehova kakotisanga ko nionso kuandi mutu ku luphangu luandi. Banga phila tumuenini mu disolo dio diviokidi, weta sobula ba pfika pfika ayi batu bo beta monisa ti batidi ba nguizani yingolo ayi niandi. (Zaki 4:8) Mu thangu wukiveni kuidi Yehova ayi beki mbotama, mawu mfikama mu phila mosi yimfunu. Kumanima wulenda ba na sikididi ti wela “kudukudila lusakumunu tii wela sie kambu ko kadi kima.”​—Mal. 3:10; Yel. 17:7, 8.

3. Bakristu bobo bakivana ayi babaka mbotama kiyeko mbi badi kimfunu? (Mpovi 5:4, 5)

³ Mbotama, yidi thonono yi luzingu luaku mu kisalu ki Yehova. Kumanima ma baka mbotama, wela yangalala tula mambu mo wulenda tula muingi wudukisa ndevi’aku yi kukivana, buba dengini zithotolo voti mambu mo mantula minu kiaku mu nzomono. (Tanga Mpovi 5:4, 5.) Bo weka nlonguki wu Yesu, mawu landakana kifuani kiandi ayi zithumu ziandi mu phila mosi yimboti ti bulendakana. (Mat. 28:19, 20; 1 Pi. 2:21) Disolo diadi madi sadisa wubutudila.

“TATAMANA LANDAKANA” YESU BUBA TI WULEMBO DENGANA ZINZOMONO AYI ZITHOTOLO

4. Kuidi balonguki ba Yesu, “nata nti wu ziphasi” mbi yinsundula? (Luka 9:23)

⁴ Kadi banzila ti wela sie dengana ko zinzomono kumanima ma baka mbotama. Kutu, Yesu wumonisa mboti mboti balonguki bandi ti bela nata “nti wu ziphasi.” Bela kubutudila “kadika lumbu.” (Tanga Luka 9:23.) Yesu wutuba ti balonguki bandi bela kue dengananga kaka ziphasi? Nana, buawu ko buididi. Wutia tuba ti va mbata lusakumunu lo bela baka, bela dengana phe zinzomono. Zinzomono zinkaka zilenda ba phasi mu kuzinunga.​—2 Tim. 3:12.

5. Mamboti mbi Yesu kavanini tsila kuidi bobo beta kiyimina mu mambu mankaka?

⁵ Bulendakana wuteka dengana zinzomono zi dikanda, voti wubika bima binkaka bi kinsuni muingi wutula mambu ma Kipfumu va buangu kitheti mu luzingu luaku. (Mat. 6:33) Enati buawu buididi, wulenda ba sikididi ti Yehova weta mona mavanga maku makuikama. (Ebe. 6:10) Mu kondo finda phaka, wukikinina ziphova zikiedika zio zi Yesu zitubidi ti: “Kadi mutu mosi wubikidi nzo, zikhomba ziandi zi babakala, zikhomba ziandi zi baketo, ngudi’andi, dise diandi, bana bandi, voti zitsola ziandi mu diambu diama ayi mu diambu di nsamu wumboti wela kambu baka mu thangu yayi yi tuidi​—zinzo, zikhomba zi babakala ayi zi baketo, zingudi, bana, ayi zitsola, va kimosi ayi yamusu vioka zikhama zi zikhumbu—​bosi mu thangu yela kuiza, wela baka luzingu lukalumani.” (Mlk. 10:29, 30) Mamboti mo mebaka malutidi mambu momo wukiyimina.​—Nku. 37:4.

6. Bila mbi wufueti tatiminina nunga “zinzinunu zi kinsuni” kumanima ma baka mbotama?

⁶ Kumanima ma baka mbotama wela bue nuanisa “zinzinunu zi kinsuni.” (1 Yow. 2:16) Tusudika ti, widi kaka nkuna wunsumuki Adamu. Thangu zinkaka wulenda kimona banga thumu Polo phila kakimuena mu thangu kasonika ti: “Bila kutsi ntim’ama khini ndieti mona mu mina mi Nzambi, vayi mina minkaka ndieti mona mu binama biama mina miomi mieti nuanisa mina mi diela diama ayi mieti kukhitula mvika wu mina mi masumu madi mu binama biama.” (Loma 7:22, 23) Phuila yi vanga masumu yilenda kuvongisa nitu. Diawu, yindula mu tsila yoyi wuvana Yehova mu thangu wukivana kuidi niandi yela kindisa nzengolo’aku yi nunga zithotolo zio wulembo dengana. Diambu dikiedika didi ti mu thangu dengini zithotolo, ndevi’aku yikukivana yela luta tula luzingu luaku yaki yaki mu thangu wun’dengana zithotolo. Mu phila mbi?

7. Bue kukivana kuaku kuidi Yehova kulenda kusadisila wutatamana ba wukuikama?

⁷ Mu thangu wukiveni kuidi Yehova, wukiyimini. Yawu yinsundula manga zinzinunu ziaku ayi zikhanu zio kazi yangidikanga ko Yehova. (Mat. 16:24) Diawu mu thangu wela dengana nzomono, wela sie kitatikisa ko mu zaba mambu mo wela vanga. Diambu kuandi dimosi diela ba yaku mu mayindu​—ba wukuikama kuidi Yehova. Wela tatamana kaka tomba yangidika Yehova. Phila beni yina, wela ba banga Yobi. Buba ti wudengana zinzomono zingolo, mu kibakala kioso wutuba ti: “Ndilendi bika ko kuikama kuama!”​—Yobi 27:5.

8. Bue yindula lusambulu lo wutula mu thangu wukivana kulenda kusadisila wununga nzomono?

⁸ Ngeyo yindula lusambulu lo wutula mu thangu wukivana kuidi Yehova, wela baka ngolo yinungina yoso kuandi nzomono. Mu kifuani, mawu solulanga kuwombo voti ba pfika pfika ayi mutu nio kambulu nnuni’aku voti nketo’aku? Kadi khumbu wela butudila! Bila wuvana tsila kuidi Yehova wulendi ko vanga mambu ma phila yoyi. Ngeyo kubutudila wela sie mona ko phasi mu nuanisa ziphuila zimbimbi zio zikala phasi mu kuzibotula ziawu mana kikotila mu ntima. Wela sie “kota ko” mu “nzila yi batu bambimbi.”​—Zin. 4:14, 15.

9. Bue yindudila mu lusambulu lo wutula mu thangu wukivana kulenda kusadisila wutatamana tula mambu ma kipheve va buangu kitheti mu luzingu luaku?

⁹ Mbi wela tula enati baveni kisalu kio ki kukakidila mu bue kutakana mu zikhutukunu zi bukristu? Wela zaba mbi wela tula. Tuamina kutu bavana kisalu kiphila yoyi, wufueti kibakila nzengolo yi kukimanga. Diawu, yisi be ba ko mfunu mu teka tomba baka nzengolo yimbimbi bosi weba tomba bongisa mambu kumanima. Ngeyo bambukilanga moyo phila yo Yesu kabakila nzengolo yi yangidikanga Siandi, wela fika lozanga mu kibakala kioso mambu mo ka ma yangidikanga ko Nzambi yoyi wuvanina tsila yi kukivana kuidi niandi.​—Mat. 4:10; Yow. 8:29.

10. Bue Yehova kela kusadisila “wutatamana landakana” Yesu kumanima ma baka mbotama?

¹⁰ Diawu, zinzomono ayi zithotolo zieta kuvana diluaku dimonisa ti widi wukubama mu “tatamana landakana” Yesu. Ngeyo kubutudila, wulenda ba sikididi ti Yehova wela kusadisa. Bibila kitubidi ti: ‘Vayi Nzambi widi wukuikama, kalendi tala ko ti nzomono yiluviatukila ngolo. Vayi nzomono bu yizidi, niandi kafueti kuluvana diluaku di lufueti totukila muingi lubaka bu vibidila yawu.’​—1 Ko. 10:13.

BUE BU TATIMININA LANDAKANA YESU

11. Phila mbi yilutidi yimboti yitatamana landakana Yesu? (Tala phe foto.)

¹¹ Yesu kipfuzi kaba, ayi wutatamana ba pfika pfika kuidi Yehova mu lusambulu. (Luka 6:12) Kutu, phila yimboti yo yifueti kusadisa wutatamana landakana Yesu kumanima ma mbotam’aku yidi yiyonzula phila yimboti yivangila mambu yo yifueti kusadisa wuba pfika pfika kuidi Yehova. Bibila kitubidi ti: “Vayi mu tezo kiaki tueka, bika tudiatila mu mayindu mamosi.” (Flp. 3:16) Kadika thangu, wanga masolo ma bakhomba ba babakala ayi ba baketo bo bakivana kuwombo mu kisalu ki busantu. Bulendakana batu beni bakota Nzo nkanda yi Minsamuni wu nsamu mboti wu Kipfumu voti bayenda ko kuidi phuila yi minsamuni. Enati lukanu beni luawu luidi yaku, tula mamoso mo wulenda tula muingi wuludukisa. Dikanda di Yehova phuila yiwombo didi yi kukivana mu kisalu ki tsamununu. (Mav. 16:9) Buabu, mbi wulenda tula enati wisi ko diluaku di kubutudila mu thangu yayi? Kadi banzila ti bo babutudila balutidi. Dilutidi mfunu, tatamana monisa mvibudulu. (Mat. 10:22) Kadi vuezila mfunu wusadila Yehova mu tadila maluaku maku ayi mambu momo wun’dengana. Yawu phila yilutidi mfunu yo wulenda tatimina landakana Yesu kumanima ma baka mbotama.​—Nku. 26:1.

12-13. Mbi wulenda tula enati kipfuzi kiaku kitonini dekuka? (1 Kolinto 9:16, 17) (Tala ankadre “Tatamana kaka.”)

¹² Mbi wufueti tula enati wukadi bue sambila mu phila yimboti voti ti wukadi bue yangalala kisalu kiaku ki tsamununu banga phila wube kizodilanga? A buabu enati wukadi bue bakila mamboti mu lutangulu luaku lu Bibila banga phila bubela mu thama? Enati dengini mambu ma phila yoyi kumanima ma baka mbotama, kadi banzila ti wusiedi ko pheve santu yi Yehova. Widi mutu wukambu lunga, ayi phil’aku yitadila mambu yilenda baluka. Enati kipfuzi kiaku kitonini dekuka, yindula kifuani ki thumu Polo. Kadiambu ko wumeka sokudila Yesu, wuzaba ti thangu zinkaka weba kimonanga wulebakana mu kubutudila. (Tanga 1 Kolinto 9:16, 17.) Wutuba ti: “Vayi enati luisi mu luzolo luama ko, buna ndilembo sadi mu diambu di kisalu kioki nditambula.” Mu zithubulu zinkaka, Polo wuba wukubama mu diambu di dukisa kisalu kiandi kadiambu ko mambu mo meba kumvongisanga mu thangu beni yina.

¹³ Bo buawu, kadi bikila ziphuila ziaku zikondo lunga zibakila zinzengolo. Ba wukubama mu vanga mambu mo mafueni kadiambu ko phila yo wulembo kimuena. Enati tatimini vanga mambu mafuana, mu bilumbu binkuiza phil’aku yi kukimuena yilenda baluka. Boso kuandi bum’bela, ngeyo tatamana ba programi yimboti yi mambu ma kipheve yela kusadisa wutatamana landakana Yesu kumanima ma baka mbotama. Tatamana kuaku kuela ba phe lukindusu kuidi bakhomba ziaku bakristu.​—1 Tes. 5:11.

“TATAMANA KUKI FIONGUNINGA . . . AYI TATAMANA MONISA TI WIDI SADI KI YEHOVA”

14. Mu mambu mbi wufueti kuki fionguninanga thangu ka thangu, ayi bila mbi? (2 Kolinto 13:5)

¹⁴ Madi ba diaka diambu dimboti enati kumanima ma baka mbotama tatimini kukifiongunina thangu ka thangu. (Tanga 2 Kolinto 13:5.) Kadika thangu, fionguninanga bumboti mboti luzingu luaku ayi mambu momo weta vanga muingi wuzaba keni weta sambila kadika thangu, tanga ayi longuka Bibila, kutakananga mu zikhutukunu, ayi kuendanga mu kisalu ki tsamununu. Tombanga maluaku mo malenda tula ti mambu beni momo maluta ba mfunu mu tsambudulu’aku. Mu kifuani, wukiyuvula biuvu biabi: ‘Ndilenda sudikisa malongi mathonono ma Bibila kuidi batu bankaka? Kuidi na mambu momo ndilenda vanga muingi ndiluta yangalala kisalu kiama ki tsamununu? Zindombolo ziama zikala zifuana, ayi zieta monisa ti ndieta tudila Yehova ntim’ama woso? Ndieta kutakana mu zikhutukunu zioso zi bukristu? Mu phila mbi ndilenda bongisila mayindu mama ayi vana mimvutu mu zikhutukunu?’

15-16. Dilongi mbi beki mu kifuani ki Robert mu diambu ditedi nunga nzomono?

¹⁵ Madi ba diambu dimboti enati wulembo kifiongunina mu bukiedika mu diambu ditedi lebakana kuaku. Khomba mosi wu bakala widi dizina Robert budidi disolo dimosi ditadidi diambu beni: “Mu thangu ndiba 20 ki mimvu, ndibaka kisalu kio ndibe sadilanga mu ndambu thangu. Lumbu kimosi bo tumanisa sala, nketo mosi weba salanga yama wuthedisa ku nzo’andi. Wutuba ti matu ba beto veka ayi matu ‘viokisa thangu mosi yimboti.’ Vatheti, ndisi kunsudikisa ko mu phila yifuana, vayi tsuka tsuka ndinkamba mu kibakala kioso nana ayi ndinsudikisa bila mbi ndimangina.” Robert wununga nzomono beni, ayi diambu dimboti kavanga. Vayi kumanima, mu thangu kayiza yindula diambu beni, wuyiza mona ti nginu mu phila nkaka kaditudila. Kikinini ti: “Ndisi fika manga ko thedosolo yi nketo beni banga phila Yozefi kafika mangina yo yi nketo Potifali. (1 Mose 39:7-9) Kutu, ndiyituka mu phila ndimuena phasi mu manga thedosolo beni. Diambu beni ditsadisa ndimona ti ndifueti luta yedisa kikundi kiama ayi Yehova.”

¹⁶ Wulenda baka mamboti ngeyo kukifionguninanga banga phila Robert katudila. Buba thangu nungini nzomono, wulenda kukiyuvula: ‘Thangu zikua thudidi mosi ndituba nana?’ Enati mueni ti widi na mambu ma bongisa, kadi kukivana foti. Yangalala buabu bo zebi lebakana kuaku. Sambila Yehova mu bila ki lebakana kuaku, ayi vanga mambu mo mafueti kukindisa wuba na phuila yi kuntumukina.​—Nku. 139:23, 24.

17. Bue dizina di Yehova ditadila phe kuikama ku Robert mu mambu mo kadengana?

¹⁷ Disolo di Robert disi sukila ko vovo. Tatimini tuba ti: “Bo ndimanga thedosolo yi nketo beni nio weba salanga yama, wukhamba ti: ‘Wunungini teste yo nditudidi!’ Ndinyuvula mbi tidi tuba. Wukhamba ti: Nkundi’andi mosi, nio wuba Mbangi Yehova mu thama, wunkamba ti mintueni mi Bambangi zi Yehova beta vanga kuawu mambu mambimbi mu kitsueki ayi diluaku diawu monika beta nukumuka vanga mambu mambimbi. Ayi wukamba nkundi’andi ti makiza mekina kuidi minu muingi kazaba ti keni buawu buididi. Ndiyangalala mu zaba ti ndivana dizina di Yehova nkembo.”

18. Diambu mbi bakidi nzengolo yi vanga kumanima ma baka mbotama? (Tala phe ankadre “Masolo ma Bibila mo wukuiza yangalala.”)

¹⁸ Mu thangu wukiveni kuidi Yehova ayi beki mbotama, mawu monisa ti tidi zitisa dizina diandi buba dioso kuandi diambu di kubuilukila. Ayi wulenda ba sikididi ti Yehova zebi zinzomono zio wulembo dengana ayi zithotolo ziozi wulembo nungi. Wela sakumuna zingolo zio wulembo tudi mu tatamana ba wukuikama. Ba sikididi ti mu nzila yi pheve santu’andi, kalenda kuvana zingolo zi kubutudila. (Luka 11:11-13) Mu lusadusu lu Yehova, wela ba wufuana mu tatamana landakana Yesu kumanima ma baka mbotama.