Widi wukubama mu kukivana kuidi Yehova?

1-2. Mbi mutu kafueti teka tula tuamina kabaka mbotama?

MU MIMVU mitanu mio mime vioka, batu viokila milio mosi bame baka mbotama mo baba Bambangi zi Yehova. Bawombo mu bawu, banga nlonguki Timote mu tandu kitheti, balonguka kiedika “tona mu bumuana.” (2 Tim. 3:14, 15) Bankaka bame kuiza longuka mambu ma Yehova mu bukulutu, bankaka mu bununu. Mu bilumbu biviokidi, nketo mosi wulonguka Bibila ayi Bambangi zi Yehova wuyiza baka mbotama mu 97 ki mimvu!

² Enati widi nlonguki wu Bibila voti bambuta ziaku badi Bambangi zi Yehova, wulembo yindula diambu ditedi baka mbotama? Luawu luidi lukanu lumboti! Tuamina wubaka mbotama, wufueti teka kukivana kuidi Yehova. Disolo diadi madi sudikisa kukivana kuidi Yehova mbi yinsundula. Madi sadisa diaka wuzaba bila kioki ka wulendi muena ko tsisi mu kukivana kuidi Nzambi ayi baka mbotama mu thangu widi wukubama mu kubutudila.

KUKIVANA KUIDI YEHOVA MBI YINSUNDULA?

3. Vana bifuani bi Bibila bi batu bobo bakivana kuidi Yehova.

³ Mu Bibila, kukivana kuidi Yehova yinsundula dukisa kisalu kimosi ki busantu. Bana ba Iseli baba dikanda diodi dikivana kuidi Yehova. Vayi mu dikanda beni mu ba na batu bo bakivana kuidi Yehova mu phila yinkaka. Mu kifuani, Aloni wuvuata “dimbu ki busantu ki kukivana kuidi Nzambi”​—kinteka ki nolo voti mua kurone kio kieba lezamanga va ntuala mbulu’andi. Kinteka beni ki nolo kimonisa ti niandi wutulu va ndambu mu sala kiyeko kimosi kimfunu wombo​—kiba nganga-Nzambi yinneni yi Iseli. (3 Mose 8:9) Banazili phe bakivana kuidi Yehova mu phila mosi yinkaka. Kuma “Nazili,” kio kibedi mu ki Ebelewo nazir, kinsundula “kukivangula,” voti “kukivana.” Banazili beba zingilanga mu tumukinanga mambu mo babalomba mu minsiku mi Mose.​—4 Mose 6:2-8.

4. a) Mu phila mbi batu bakiveni mu sadila Yehova basobulu mu vanga lukanu lu busantu? b) “Kukizimbakana” mbi yinsundula? (Tala phe foto.)

⁴ Mu thangu wukiveni kuidi Yehova, sobudi ba nlonguki wu Yesu Kristu ayi vanga luzolo lu Nzambi madi ba diambu dilutidi mfunu mu luzingu luaku. Kukivana ku bukristu mbi yintombana? Yesu wutuba: “Enati mutu tidi kundandakana, buna kafueti kukizimbakana niandi veka.” (Mat. 16:24) Ziphova zio zibangulu mu “kukizimbakana niandi veka” zilenda sundula phe “kukiyimina.” Mu kukivana mu sadila Yehova yintombana manga vanga mambu moso mo masi ko nguizani ayi luzolo luandi. (2 Ko. 5:14, 15) Yinsundula diaka “manga mavanga ma nsuni,” banga kitsuza. (Nga. 5:19-21; 1 Ko. 6:18) Minsiku beni miomi mami tula luzingu luaku luba mu ziphasi? Nana. Enati weta zola Yehova, mawu kikinina ti minsiku beni midi mu diambu di mamboti maku. (Nku. 119:97; Yes. 48:17, 18) Khomba mosi wubakala widi mu dizina Nicolas wutuba ti: “Wulenda mona minsiku mi Yehova banga luphangu lu buloko lo lukukakidila mu vanga mambu mo tidi voti luphangu lu nzo yi zikhosi lo lukutanina mu diambu di vonza.”

5. a) Bue bukukivanina kuidi Yehova? b) Kukivana ayi baka mbotama luviakunu mbi bidi? (Tala phe foto.)

⁵ Bue bukukivanina kuidi Yehova? Wufueti kumvana tsila mu lusambulu ti niandi kaka wukuiza sambilanga ayi vanga luzolo luandi madi ba diambu dilutidi mfunu mu luzingu luaku. Bukiedika, mawu mvana tsila ti mawu tatamana kun’ zola “mu ntim’aku wumvimba, mu muel’aku wumvimba, mu mayindu maku moso ayi mu zingolo ziaku zioso.” (Mlk. 12:30) Kukivana kuaku maku salimina va ngeyo veka ayi Yehova. Vayi mbotama, va n’yalu nguba yeta salimina, yawu yeta monisa kuidi batu ti wukiveni. Kukivana yidi ndevi yi busantu, ayi Yehova wukulomba wudukisa ndevi beni. Wufueti ba ayi lukanu lu dukisa tsila beni.​—Mpo. 5:4, 5.

BILA MBI KUKIVANA KUIDI YEHOVA?

6. Diambu mbi dieta tuma mutu kakivana kuidi Yehova?

⁶ Luzolo lueto kuidi Yehova kiawu bila kilutidi mfunu ki kututuma tukivana kuidi niandi. Luzolo beni luisi simbulu ko kaka mu ziphuila ziaku. Vayi, lusimbulu mu “nzayilu yikiedika” ayi mu “phisulu yi kipheve”​—mambu mo wulonguka kuidi Yehova masadisa wuyonzula luzolo luaku kuidi niandi. (Kol. 1:9) Ndongokolo’aku yi masonoko yisadisa wukikinina ti 1) Yehova widi, 2) Bibila kidi Mbembo yo yisonimina mu lulendo luandi, ayi 3) weta sadila khubukulu’andi mu dukisa lukanu luandi.

7. Diambu mbi wufueti teka vanga tuamina wukivana kuidi Yehova?

⁷ Batu bo bakukivana kuidi Yehova bafueti zaba malongi mathonono mo madi mu Phova yi Nzambi ayi bazingila mu nguizani na zitsikudukusu ziandi. Beta tula mo balenda tula mu samuna mambu mo balongukidi kuidi batu bankaka. (Mat. 28:19, 20) Luzolo luawu kuidi Yehova luawu yonzuka, beta kuiza ba phuila yi sambila kaka Yehova. Buawu buididi phe kuidi ngeyo? Ngeyo ba na luzolo lu phila yoyi, wukuiza moni ko ti kukivana ayi baka mbotama yisi ko kaka mu diambu di yangidika nlongi’aku wu Bibila voti bambuta ziaku, ayi wulendi ko kudimona ti didi diambu wufueti vanga muingi wuba va kimosi ayi bakundi baku.

8. Bue phutudulu matondo yeta kusadisila wubaka nzengolo yi kukivana kuidi Yehova? (Minkunga 116:12-14)

⁸ Ngeyo yindula mambu moso Yehova kavangila mawu ba phutudulu matondo kuidi niandi ayi mawu zola kukivana kuidi niandi. (Tanga Minkunga 116:12-14.) Bibila kitedidi Yehova bumboti mboti ti widi Mvani wu “kadika dikaba dimboti ayi kadika dikaba difuana.” (Zaki 1:17) Dilutidi makaba moso mo Yehova katuvana didi nkayilu wu muan’andi, Yesu. Yindula buna phila yo dikaba beni dilembo tuyitukisila! Khudulu yilembo tusadisa tuba na nguizani yingolo ayi Yehova. Ayi wuvana diluaku di zinga luzingu lu mvu ka mvu. (1 Yow. 4:9, 10, 19) Kukivana kuidi Yehova yidi phila yimonisina phutudulu matondo mu luzolo lunneni lo kamonisina ayi mu lusakumunu loso lo Yehova kavana. (5 Mose 16:17; 2 Ko. 5:15) Phutudulu matondo beni yimonusunu mu dilongi 46, puen 4, yi buku Zinga mu mayangi mvu ka mvu!, yo yidi na video yi miniti mitatu Pesá makabo na yo epai ya Nzambe..

WIDI WUKUBAMA MU KUKIVANA AYI BAKA MBOTAMA?

9. Bila mbi mutu kalendi kimuena ko ti kuiku kakuiku mu baka mbotama?

⁹ Wulenda kukimona ti wisi ko wukubama mu kukivana ayi baka mbotama. Bulendakana wulenda teka balula mambu ma luzingu luaku muingi wuzitisa zitsikudukusu zi Yehova, voti bulendakana phuila yi thangu yiwombo widi muingi wuyonzula minu kiaku. (Kol. 2:6, 7) Minlonguki mionso miyonzukilanga ko mu phila mosi ayi mintueni mioso mikivananga ko ayi mibakanga ko mbotama mu mvu mosi. Meka tadila ndionzukulu’aku yi kiphevi mu landakana mambu mo wulenda vanga ayi mu kambu kukidedikisa ayi batu bankaka.​—Nga. 6:4, 5.

10. Mbi wulenda tula enati mueni ti wisi ko wukubama mu kukivana ayi baka mbotama? (Tala phe ankadre “Kuidi bobo bayonzukila mu kiedika.”)

¹⁰ Enati mueni wisi ko wukubama mu kukivana kuidi Yehova, kadi zimbakana lukanu beni. Sambila Yehova kasadisa muingi wutula zitsobolo zimfunu mu luzingu luaku. (Flp. 2:13; 3:16) Wulenda ba na sikididi ti makawa lusambulu luaku ayi makavana mvutu.​—1 Yow. 5:14.

BILA MBI BANKAKA BAKADILA ZIDUTI MU KUKIVANA AYI BAKA MBOTAMA

11. Bue Yehova kela tusadisila tutatamana ba bakuikama kuidi niandi?

¹¹ Batu bankaka bobo badi bakubama mu kukivana ayi baka mbotama balembo tatamana ba ziduti. Balenda kiyuvula, ‘Buabu enati phengi disumu dinneni, ndiela bimusu mu kimvuka?’ Enati tsisi beni yawu phe ngeyo wulembo moni, ba sikididi ti Yehova wela kuvana mamoso mo widi phuila mu diambu di “wudiatila mu phila yifuana mu Pfumu muingi wummonisa khini mu mambu moso ayi wela kuvana phe diaka ngolo yi vangila mambu mamboti.” (Kol. 1:10) Bila wume keta sadisa batu bawombo bavanga mambu mamboti. (1 Ko. 10:13) Yawu yimmonisa ti mu bila beni kioki mua ndambu batu kuandi babimusu mu kimvuka ki bukristu. Yehova weta sadisa batu bandi muingi batatamana ba bakuikama.

12. Mbi wulenda tula muingi wubika vanga disumu dinneni?

¹² Mutu woso wukambu duka weta totu mu vanga mambu mambimbi. (Zaki 1:14) Diawu, wufueti sobula mambu mo wela vanga mu thangu wela dengana thotolo. Diambu dilutidi mfunu ngeyo veka wufueti zaba phila wukuiza zingila. Batu bankaka beta tuba ti tulendi ko nunga kakidila ziphuila zieto zimbimbi mu mambu tueta vanga, vayi madi mayuya. Wulenda longuka kakidila ziphuila ziaku zimbimbi. Buba ti ziphuila zimbimbi zilembo nuanisa, vayi wulenda kuaku kuzinunga. Diawu muingi wununga, sambilanga kadika lumbu. Tatamana ba na programi yimboti yi ndongokolo yi ngeyo veka yi Mbembo Nzambi. Kutakananga mu zikhutukunu zi Bukristu. Samunanga nsamu wumboti kuidi batu bankaka. Ngeyo vanganga mambu momo kadika thangu, yawu mayi sadisa wudukisa ndevi’aku yi kukivana kuidi Nzambi. Ayi kadi khumbu wela zimbakana ti Yehova wela kusadisa muingi wubutudila.​—Nga. 5:16.

13. Kifuani mbi kimboti Yozefi katubikila?

¹³ Wela sie mona ko phasi mu dukisa lukanu luaku lukukivana enati beki nzengolo yi kukizabila mo wela vanga ngeyo dengana thotolo. Bibila kilembo tumonisa mua ndambu batu bo babutudila kadiambu ko basi ba ko batu baduka. Mu kifuani, nketo Potifali wutota Yozefi mu zikhumbu ziwombo muingi kasangisa yandi nitu. Vayi Yozefi wukizabila mo kafueti vanga niandi dengana thotolo beni. Bibila kieta tulonga ti “wumanga,” ayi wutuba ti: “Buna bue ndilenda vangila diambu diadi dimbimbi ayi vola masumu kuidi Nzambi?” (1 Mose 39:8-10) Bukiedika, Yozefi wuketa kizabila mbi kela vanga tuamina nketo beni kantota. Ya yinsadisa kabika mona phasi mu baka nzengolo yimboti mu thangu kadengana thotolo beni.

14. Bue wulenda longukila manga vanga mambu mambimbi?

¹⁴ Bue wulenda sokudila Yozefi muingi wununga thotolo? Wulenda tomba kizabila thangu yayi mbi wela tula mu thangu wela dengana nzomono. Longuka fika manganga mambu mo Yehova keta lenda, ayi manganga yindulanga mambu beni. (Nku. 97:10; 119:165) Ngeyo kubutudila wela sie bua ko mu thangu wela dengana thotolo. Wela fika kizabila bue wela nungina thotolo beni.

15. Bue mutu kalenda monisina ti ‘wulembo tatamana tomba Yehova’? (Ebelewo 11:6)

¹⁵ Bulendakana mebakula kiedika ayi tidi sadila Yehova mu ntim’aku woso vayi kuidi na diambu dimosi dilembo kakidila wukivana ayi wubaka mbotama. Wulenda bongila mu mfunu wombo kifuani ki Ntinu Davidi. Wulenda bombidila Yehova ti: ‘Wupfiongunina, a Nzambi, ayi zaba ntim’ama. Wuthota, ayi zaba mayindu mama. Tala kani nzila yimbimbi yidi mu minu, ayi wundiatisa mu nzila yi mvu ka mvu.’ (Nku. 139:23, 24) Yehova weta sakumuna batu boso ‘bobo bakuntombanga.’ Mamoso mo wulembo vangi muingi wudukisa lukanu lukukivana ayi baka mbotama malembo monisa ti wulembo tatamana kuntomba.​—Tanga Ebelewo 11:6.

TATAMANA BA PFIKA PFIKA AYI YEHOVA

16-17. Bue bo bayonzukila mu kiedika balenda fikimina kuidi Yehova? (Yowani 6:44)

¹⁶ Yesu wutuba kuidi banlonguki bandi ti Yehova weta kubabenda. (Tanga Yowani 6:44.) Yindula phila dididi diambu dingitukulu ayi mo dilenda tula kuidi ngeyo. Yehova weta mona diambu dimboti kuidi kadika mutu nio keta benda. Weta tadila mutu banga “vangu kiandi ki mfunu.” (5 Mose 7:6) Buawu phe ngeyo keta kutadila.

¹⁷ Bulendakana widi ntueni nio meyonzukila mu kiedika. Wulenda kimona banga natu wunatu voti kuiku wukuiku. Kadiambu ko buawu, Bibila kitubidi ti: “Lufikama vadi Nzambi, ayi niandi wela kulufikama.” (Zaki 4:8; 1 Lus. 28:9) Thangu beki diyindu difikama kuidi Yehova, niandi phe maka fikama. Yehova katadilanga ko banga ndukusulu yi mutu mu khati dingumba. Weta sobula kadika mutu​—buba phe bo bayonzukila mu khati kiedika. Mu thangu kadika mutu keta baka diyindu difikama kuidi Yehova, Niandi phe weta kumfikama, banga phila buididi mu Zaki 4:8.​—Dedikisa 2 Tesalonika 2:13.

18. Mbi tuela tadila mu disolo dinkuiza? (Minkunga 40:8)

¹⁸ Mu thangu wukiveni kuidi Yehova ayi baka mbotama, mawu monisa kadulu ki Yesu. Wukimonikisa mu luzolo loso kuidi Siandi muingi kavanga mambu moso momo bakunlomba. (Tanga Minkunga 40:8; Ebe. 10:7) Mu disolo dio dilandikini, tuela tadila diambu dio dilenda kusadisa wutatamana sadila Yehova mu kuikama koso kumanima ma mbotam’aku.