Baka malongi mu 40 ki bilumbu bitsuka biobi Yesu kabela va mbata ntoto

1-2. Mambu mbi masalama mu thangu balonguki buadi ba Yesu beba kuenda ku buala bumosi beba tedilanga Emawusi?

MU LUMBU ki 16 Nisani mu mvu 33 T.E, balonguki ba Yesu bayiza ba mu kiadi kiwombo ayi bayiza ba mu tsisi yingolo. Babuadi mu bawu babotuka ku Yelusalemi ayi bayenda ku Emawusi, buala bobo buba kielo ki 11 ki zikilometre ngeyo botuka ku Yelusalemi. Babakala beni bana bayiza vonga nitu mu bila kioki bavondila Yesu, nioni beba kue landakananga. Yimonika banga ti bazimbisa vuvu kiawu mu mambu momo Mesiya kela vanga. Vayi babakala beni bayiza mona diambu dingitukulu.

² Mutu mosi nioni kasi zabakana ko wutona diata ayi bawu. Balonguki beni batona nionga mu bila ki mambu momo mabuilukila Yesu. Mutu beni nioni ka kasi zabakana ko wutona kubabudila masolo momo basi zimbakana ko. “Tonina mu masonoko ma Mose tii Mim’bikudi mioso,” wubasudikisa bila kioki Mesiya kamuena ziphasi ayi kafuila. Mu thangu batula ku Emawusi, mutu beni nioni ka kasi zabakana ko wubakamba ti​—niandi Yesu nioni fulukidi! Balonguki beni bayangalala buwombo mu zaba ti Mesiya wuba kuandi mu luzingu!​—Luka 24:13-35.

3-4. Mambu mbi mabuilukila balonguki ba Yesu, ayi mambu mbi tueka nlonguka mu disolo diadi? (Mavanga 1:3)

³ Yesu wumonikina balonguki bandi mu khumbu ziwombo mu 40 ki bilumbu bitsuka biobi kaviokisa va mbata ntoto. (Tanga Mavanga 1:3.) Mu thangu beni yina balonguki ba Yesu bobo baba mu kiadi kingolo ayi mu tsisi, bayiza ba nkangu wu masodi ma zikhini, ma sikididi ayi ma kibakala mu samuna nsamu wumboti wu Kipfumu ki Nzambi.a

⁴ Tulenda baka mamboti mu longuka thangu beni yina yingitukulu yi luzingu lu Yesu. Mu disolo diadi matu mona phila yoyi Yesu kasadila thangu beni 1) mu kindisa balonguki bandi, 2) mu kubasadisa basudika mu buphinda masonoko, ayi 3) mu kubavana formasio muingi babaka biyeko binneni. Mu kadika diambu, matu mona phila yoyi tulenda sokudila kifuani ki Yesu.

KINDISA BATU BANKAKA

5. Bila mbi balonguki ba Yesu babela phuila yi lukindusu?

⁵ Balonguki ba Yesu phuila yi lukindusu baba. Bila mbi? Bankaka babika zinzo ziawu, makanda mawu ayi bisalu biawu mu diambu di landakana Yesu thangu ka thangu. (Mat. 19:27) Bankaka mu bawu bayiza kubatadila banga batu bakambulu mfunu mu bila kioki balandikinina Yesu. (Yow. 9:22) Bakiyimina mu diambu di balandakana Yesu bila bawilukila ti niandi Mesiya nioni wuvanunu tsila. (Mat. 16:16) Vayi mu thangu bavonda Yesu, vuvu kiawu kiyiza zimbala ayi bayiza vonga nitu.

6. Mambu mbi Yesu kavanga kumanima ma pfulukulu’andi?

⁶ Yesu wuzaba ti yisi bandi ko mbimbi balonguki bandi bamona kiadi kingolo mu thangu kafua, ayi wuzaba ti yisi bandi ko mu bila ki kondo ku minu bayiza bela mu kiadi. Diawu, kio kiawu lumbu kioki kafuluka, wutona kindisa bakundi bandi. Mu kifuani, wumonikina Maliya muisi Mangadala mu thangu yoyi keba didila va dibumbi diandi. (Yow. 20:11, 16) Wumonikina phe balonguki buadi bobo tutubidingi va thonono yi disolo diadi. Ayi wuyiza monikina thumu Piela. (Luka 24:34) Dilongi mbi tulenda baka mu kifuani ki Yesu? Tutadila mambu momo mavioka mu thangu kayiza monika mu khumbu yitheti.

7. Banga phila buididi mu Yowani 20:11-16, mambu mbi Yesu kamona Maliya keba vanga mu nsuka nsuka mu lumbu ki 16 Nisani, ayi mambu mbi Yesu katula mu diambu di niandi? (Tala phe foto.)

⁷ Tanga Yowani 20:11-16. Nsuka nsuka mu lumbu ki 16 Nisani, mua ndambu baketo bakuikama bayenda va ziami ki Yesu. (Luka 24:1, 10) Tuluta tula thalu mu wumosi mu baketo beni, Maliya muisi Mangadala. Maliya kasi kue bata ko mvumbi mu ziami beni. Mu zithinu zioso wuye bati Piela ayi Yowani mu kubakamba ti mu ziami mu siedi ko kadi mvumbi, ayi wubalandakana mu thangu beba nakuna mu kuenda va ziami beni. Mu thangu bayiza mona ti mu ziami beni muisi ba ko kadi mvumbi, Piela ayi Yowani bavutuka mu zinzo ziawu. Vayi Maliya wusiala kuandi va ziami beni. Wutona dila. Kadiambu ko kasi zaba ko ti Yesu wuba vana. Yesu wumona bidilu bi nketo beni wukuikama ayi wumona phasi mu ntima. Wumonikina Maliya ayi wuvanga mua diambu diodi dinkindisa buwombo. Wusolula ayi niandi ayi wumvana kiyeko kimfunu wombo​—ki tembikisa tsangu yi pfulukulu’andi kuidi bakhomba.​—Yow. 20:17, 18.

8. Bue tulenda sokudila Yesu?

⁸ Bue tulenda sokudila Yesu? Tulenda vanga mambu mawombo mu diambu di kindisa bakhomba zieto ba babakala ayi babaketo muingi batatamana sadila Yehova, ayi banga Yesu, tuzaba ziphasi ziawu ayi enati tulembo solula ayi bawu mu kukitula va buangu kiawu. Tutadila kifuani ki khomba mosi wunketo widi mu dizina di Jocelyn, nioni wufuilu khomb’andi wunketo mu kizida kingolo. Wutuba ti: “Mu zingondi ziwombo ndibela mu kiadi kingolo.” Diawu, khomba mosi wubakala ayi nketo’andi bantedisa ku nzo’awu, ban’wa mu kukitula va buangu kiandi ayi bamvana sikididi ti mfunu kadi va meso ma Yehova. Jocelyn tubidi diaka ti: “Ndikimona banga tsukidi kuama bila yiba banga minu ndilembo lalumuka mu m’bu wutombi wo wulembo kumbi ngolo. Vayi Yehova wubasadila muingi baphukisa. Batsadisa ndibaka diaka phuila yitatamana sadila Yehova.” Beto phe, tulenda kindisa bakhomba zieto Bakristu mu kubawa bumboti mboti mu thangu balembo tuzibudila ntim’awu ayi tufueti solula ayi bawu mu kukitula va buangu kiawu muingi tubakindisa batatamana sadila Yehova.​—Lom. 12:15.

SADISA BANKAKA BASUDIKA MBEMBO NZAMBI

9. Mambu mbi maphasi balonguki ba Yesu badengana, ayi bue Yesu kabasadisila?

⁹ Balonguki ba Yesu bakikinina Mbembo Nzambi ayi batula ngolo mu kuyisadila mu luzingu luawu. (Yow. 17:6) Bamona ziphasi ziwombo mu phila yoyi babandila Yesu va nti banga dovula. Yesu wuzaba ti balonguki bandi baba kuawu na minu ayi beba zolanga kuawu Yehova, vayi wuzaba ti bafueti luta bue sudika bumboti mboti masonoko muingi babotula ziduti. (Luka 9:44, 45; Yow. 20:9) Diawu, wubalongisa phila yiyindudila mu nzila yi Masonoko. Tutala phila yoyi kabutudila kuidi balonguki mu thangu kamonikina balonguki buadi mu nzila yi Emawusi.

10. Bue Yesu kasadisila balonguki bandi bakikinina ti niandi Mesiya? (Luka 24:18-27)

¹⁰ Tanga Luka 24:18-27. Zaba ti Yesu keba thumbu kambanga ko batu mu khumbu mosi nani kaba. Vayi biuvu keba sadilanga. Bila mbi? Bulendakana weba tombanga ti batuba mambu momo madi mu mayindu mawu ayi mu mintima miawu. Ayi buawu phe batudila. Ayi basudikisa Yesu ti bawu beba banzilanga ti niandi wela ba ntinu wu Iseli muingi kabakula mu kipfumu ki basi Loma. Kumanima mamana tuba mambu momo beba yindulanga, Yesu wusadila Masonoko mu diambu di kabasadisa basudika mambu momo mim’bikudi mituba.b Mu builu bu lumbu beni, Yesu wusadisa balonguki bankaka muingi basudika bumboti mboti zimbikudulu beni. (Luka 24:33-48) Dilongi mbi tulenda baka mu disolo beni?

11-12. a) Dilongi mbi tulenda baka mu phila yoyi Yesu kasudikisila zimbikudulu zi Bibila? (Tala phe foto.) b) Bue khomba nioni weba longukanga Bibila ayi Nortey kansadisila?

¹¹ Bue tulenda sokudila Yesu? Ditheti theti, mu thangu wulembo lunguka Bibila ayi mutu, wufueti kun’yuvulanga biuvu mu diela mu diambu di katuba mambu momo madi mu mayindu mandi ayi mu ntim’andi. (Zin. 20:5) Ngeyo thumbu sudika mayindu mandi, wummonisa phila yibakudila ziverse ziozi zilenda kunsadisa mu mambu momo mantadidi. Ayi kadi kum’bakila nzengolo mu mambu momo kafueti vanga. Vayi wunsadisa kayindula mu nzila yi masonoko muingi kasuasikisa phila yoyi kalenda sadila zitsikudukusu zi Bibila mu luzingu luandi. Tutadila kifuani ki khomba mosi wukala ku Ghana mu dizina di Nortey.

¹² Mu thangu Nortey kayiza ba 16 ki mimvu, wutona longuka Bibila. Vasi vioka ko bilumbu biwombo, dikanda diandi diyiza tona kun’zoma. Mbi binsadisa katatamana longuka Bibila? Mutu nioni weba longukanga yandi Bibila wusadila Matayi kapu 10 mu kunsudikisa ti Bakristu bakiedika bela zomo. Nortey tubidi ti: “Mu thangu nzomono beni yiyiza tona, ndiyiza kikinina ti mu tsambudulu yi kiedika ndidi.” Mutu nioni weba longukanga yandi Bibila wuyiza kunsadisa kayindudila mu Matayi 10:16 muingi kaba bunzumbi ayi lukinzu mu thangu bansoludila mambu ma mabundu ku nzo’awu. Mu thangu kayiza baka mbotama, Nortey wuyiza tomba ba n’zibudi nzila wu thangu ka thangu, vayi siandi wutomba ti kebue longuka mu zinzo zi nkanda zinila. Va buangu ki kum’bakila nzengolo mu mambu momo kafueti vanga, mutu nioni weba longukanga Bibila ayi Nortey wusadila biuvu muingi kansadisa kayindudila mu nzila yi zitsikudukusu zi Bibila. Mim’butu mbi yibimisa? Nortey wubaka nzengolo yikota mu kisalu ki thangu ka thangu. Siandi wunkuka ku nzo’awu. Nortey bue kakimuena mu mambu momo kadengana? Tubidi ti: “Ndieta kikinina ti nzengolo yimboti ndibaka.” Enati beto phe tulembo baki thangu yisadisila batu bankaka bayindudila mu nzila yi Masonoko, tulenda kubasadisa baba Bakristu bakinda.​—Efe. 3:16-19.

BAKULUTU LUSADISA BAKHOMBA ZIENO BA BABAKALA BABA “MAKABA MA BATU”

13. Mbi Yesu katula muingi kaba sikididi ti kisalu ki Siandi kiela tatamana kaka diata bumboti? (Efeso 4:8)

¹³ Mu thangu Yesu kaba va ntoto, weba kipanga bumboti mboti kisalu kioki Siandi kamvana. (Yow. 17:4) Vayi Yesu kasi ba ko diyindu diadi, dio ditubidi ti: ‘Enati tidi ti diambu disalama mu phila yimboti, muna ngeyo veka kaka fueti kudivanga.’ Mu mimvu mitatu ayi ndambu miomi kaviokisa mu kisalu kiandi ki tsamununu, Yesu wuvana batu bankaka formasio muingi bazaba sala kisalu ki tsamununu. Tuamina kavutuka ku diyilu, Yesu wuvana balonguki bandi bobo bankaka mu bawu bulendakana baba na 20 ki mimvu voti vioka kiyeko ki kipa bumboti mboti mamemi mamfunu ma Yehova ayi kidiatisa kisalu ki tsamununu ayi ki longa. (Tanga Efeso 4:8.) Mu phila mbi Yesu kasadila 40 kiandi ki bilumbu bitsuka va mbata ntoto mu diambu di sadisa babakala bobo bakivana, bobo baba bakuikama ayi bobo baba bisadi mu diambu di baba bafuana mu ba “makaba ma batu”?

14. Bue Yesu kasadisila balonguki bandi bayonzuka mu kipheve mu 40 kiandi ki bilumbu bitsuka va mbata ntoto? (Tala phe foto.)

¹⁴ Yesu wuvana balonguki bandi zindongi zifuana vayi wubutudila mu zanti. Mu kifuani, wuyiza bakula ti bankaka mu bawu baba na kifu kimemata, diawu wubavana zindongi. (Luka 24:25-27; Yow. 20:27) Wubasadisa basudika mfunu wuluta tula thalu mu kisalu ki mvungi mamemi va buangu kiluta tula thalu mu kisalu ki kinsuni. (Yow. 21:15) Wubabambula moyo babika dedikisa biyeko biawu ayi biobi bi batu bankaka mu kisalu ki Yehova. (Yow. 21:20-22) Ayi wukolusa mayindu mankaka mambimbi momo baba mu diambu ditedi Kipfumu ki Nzambi ayi wubasadisa baluta tula mayindu mawu mu kisalu ki tsamununu wu nsamu mboti. (Mav. 1:6-8) Bakulutu malongi mbi balenda baka kuidi Yesu?

15-16. a) Bue bakulutu balenda sokudila Yesu? Sudikisa. b) Mamboti mbi Patrick kabaka mu zindongi?

¹⁵ Bue bakulutu balenda sokudila Yesu? Bafueti vana formasio ayi sadisa babakala buba bobo bakhidi mintueni muingi baba bafuana mu baka biyeko binneni.c Bakulutu batombanga ko ti batu bobo bawu bamvana formasio baba baduka. Bafueti vana zindongi zi luzolo kuidi mintueni beni mi bakhomba ba babakala muingi bazaba diatisa mambu ayi bamona mfunu wuba kadulu ki kukikulula, ki kuikama ayi muingi baba bafuana mu sadila batu bankaka.​—1 Tim. 3:1; 2 Tim. 2:2; 1 Pi. 5:5.

¹⁶ Tutadila phila yoyi khomba mosi wubakala widi mu dizina di Patrick kabakila mamboti mu ndongi. Mu thangu kaba ntueni, wuba na kifu ki kambanga batu ziphova zinkata ayi weba vangilanga batu mambu mu makhemi buba phe kuidi bakhomba ba baketo. Nkulutu mosi wuyonzuka mu kipheve wumona bifu beni bina bi Patrick ayi wumvana zindongi zifuana vayi mu zanti. Patrick tubidi ti: “Ndiyangalala bo kabutudila. Ndiba na kifu ki lebakana nitu mu thangu ndieba monanga bakhomba bankaka balembo baki biyeko biobi minu ndieba tombanga. Vayi zindongi zi nkulutu beni zitsadisa ndivisa mfunu wusala mu kukikulula koso mu diambu di bakhomba ba babakala ayi babaketo ayi ndibika tomba buangu kizangama voti diluaku dimosi mu khati kimvuka.” Mu nzila yi zindongi ziozi kabaka, Patrick wuyiza ba nkulutu mu thangu kayiza ba 23 ki mimvu.​—Zin. 27:9.

17. Bue Yesu kamonisina ti weba tudilanga balonguki bandi ntima?

¹⁷ Yesu kasi sukila ko kaka mu vana balonguki bandi kiyeko ki samuna vayi wubavana phe kiyeko ki longa. (Tala noti yindongokolo “leur enseignant” mu Bibila kindongokolo ki kifalisi mu Matayi 28:20.) Bulendakana balonguki basi kimona ko bafuana mu dukisa biyeko beni. Diawu, Yesu kasi ba ko ziduti mu kikinina ti balenda dukisa biyeko beni ayi wubakamba diambu beni. Wubamonisa sikididi kioki kaba mu bawu, mu ziphova ziazi: “Banga buthumina tata, minu mamvama buawu ndikulutumina.”​—Yow. 20:21.

18. Bue bakulutu balenda sokudila Yesu?

¹⁸ Bue bakulutu balenda sokudila Yesu? Bakulutu bobo bazebi bumboti mboti kiyeko ki kikulutu beta kabula biyeko kuidi batu bankaka. (Flp. 2:19-22) Mu kifuani, bakulutu balenda sobula mintueni basala kisalu ki kombula ayi bongisa Nzo yi Kipfumu. Bawu mana vana mutu kiyeko, bafueti kummonisa mu ziphova ti balembo ntudila ntima ayi kumvana formasio muingi kasala kiyeko beni bumboti mboti. Matthieu nioni widi nkulutu wumona tubidi ti wuyangalala mu thangu bakulutu bo badi maluaku mafuana bammonisa bumboti mboti phila yidiatisila kiyeko kimosi ayi bantudila ntima ti maka kidukisa bumboti. Tubidi ti: “Mu thangu ndieba tulanga zinzimbala mu kiyeko beni, bakhamba ti didi diluaku diluta bue longukila bumboti mboti kiyeko beni ayi bayiza kutsadisa ndiluta kukisala mu phila yimboti.”d

19. Diambu mbi tufueti bakila nzengolo yivanga?

¹⁹ Yesu wusadila 40 kiandi ki bilumbu bitsuka va mbata ntoto mu diambu di kindisa, longa ayi vana batu formasio. Tuba bakubama mu sokudila kifuani kiandi. (1 Pi. 2:21) Maka tusadisa phe tubutudila. Diawu kavanina tsila ti: ‘Ndiela ba yeno tii muna tsukulu yi nza.’​—Mat. 28:20.