DISOLO DI NDONGOKOLO 42
NKUNGA 103 Babateli ya mpate—Makabo oyo ezali bato
Monisa phutudulu matondo mu diambu di “makaba ma batu”
‘Bu kakuma ku diyilu . . . , wuvana makaba ma batu.’ —EF. 4:8.
MAMBU MO MADI MU KHATI DISOLO DIADI
Tueka nlonguka mu disolo diadi phila bisadi mu kisalu, bakulutu, ayi minkengi mi zunga beta kutusadisila, ayi phila yoyi tulenda monisina phutudulu matondo kuidi babakala beni bobo bakuikama.
1. Mua ndambu makaba mbi Yesu katuvana?
KADI mutu viokidi Yesu mu kadulu ki kaba. Thangu kaba va mbata ntoto, khumbu ziwombo wube sadisanga batu mu nzila yi bikumu biandi. (Luka 9:12-17) Wuvana dikaba dilutidi tola mu thangu kavana luzingu luandi mu diambu dieto. (Yow. 15:13) Ayi kumanima ma pfulukulu’andi, Yesu wutatamana monisa kadulu ki kaba. Banga kuandi phila kavanina tsila, wulomba kuidi Yehova katudukudila pheve santu’andi muingi yitulonga ayi yitubomba. (Yow. 14:16, 17, nkp.; 16:13) Mu nzila yi zikhutukunu zieto zi kimvuka, Yesu wulembo tatamana kutuvana formasio muingi tukitula batu minlonguki mu ntoto wumvimba.—Mat. 28:18-20.
2. Banani badi ‘makaba ma batu’ bobo bayolukidi mu Efeso 4:7, 8?
2 Tutadila dimosi mu makaba momo Yesu katuvana. Thumu Polo wusonika ti mu thangu Yesu kakuma ku diyilu, ‘wuvana makaba ma batu.’ (Tanga Efeso 4:7, 8.) Polo wusudikisa ti Yesu wuvana makaba beni mu diambu di sadisa kimvuka mu ziphila ziwombo. (Efe. 1:22, 23; 4:11-13) Mu lumbu kiaki, ‘makaba ma batu’ beni madi bisadi mu kisalu, bakulutu mu kimvuka, ayi minkengi mi zunga.a Bukiedika, babakala beni badi batu bakambu lunga, diawu, beta vanga zinzimbala. (Zaki 3:2) Vayi weta kubasadila mu diambu di batusadisa ayi badi makaba mandi mu diambu dieto.
3. Vana kifuani kioki kimmonisa phila yoyi tulenda buedila mioko kisalu ki ‘makaba ma batu.’
3 Yesu wuvana ‘makaba ma batu’ kiyeko kitunga kimvuka. (Efe. 4:12) Vayi beto bankaka tulenda kubasadisa badukisa bumboti kiyeko beni kimfunu. Mu kifuani: Tulenda dedikisa kisalu beni banga thungulu yi Nzo yi Kipfumu. Bankaka bawu beta sala kisalu kitunga. Bankaka bawu beta kubasadisa mu kubalambila bidia, ku basumbila bima bi kisalu voti kubasadisa mu ziphila zinkaka. Bobuawu phe, mambu momo tueta tuba ayi momo tueta vanga malenda sadisa bisadi mu kisalu, bakulutu ba kimvuka, minkengi mi zunga mu kindisa kimvuka. Tutadila phila yoyi tulenda bakila mamboti mu kisalu kiawu kingolo ayi phila tulenda monisina kuidi bawu ayi Yesu, nioni wutuvana ‘makaba ma batu,’ ti tuidi na phutudulu matondo mu diambu di bawu.
BISADI MU KISALU BOBO “BANSADISANGA BANDIAWU”
4. Bue bisadi mu kisalu beba ‘sadisilanga badiawu’ mu tandu kitheti?
4 Mu tandu kitheti, mua ndambu bakhomba bankaka babieku bisadi mu kisalu. (1 Tim. 3:8) Dimonikini banga ti bawu ‘babe sadisanga badiawu’ mu tadila mambu momo Polo kasonika. (1 Ko. 12:28) Bisadi mu kisalu beba kipanga mambu mankaka manfunu mu diambu di vana kuidi bakulutu diluaku dikukivana mu longa ayi mu tanina mamemi ma Nzambi. Mu kifuani, bisadi mu kisalu beba kopanga masonoko voti sumba bima biobi bieba tombananga mu diambu di kubutudila.
5. Bisalu mbi bimfunu bisadi mu kisalu beta sala mu bilumbu bieto?
5 Tutadila mua ndambu bisalu biobi bisadi mu kisalu beta sala mu kimvuka kiaku. (1 Pi. 4:10) Balenda kubavana kiyeko ki tala zikesi zi zimbongo voti ki ziterituare zi kimvuka, tulanga zikomande zi minkanda ayi kumivana kuidi minsamuni, sala ku sonorizasio, sala va muelo mu diambu di yamba batu, voti buelanga mioko mu bongisa ayi tanina Nzo yi Kipfumu. Bisalu bioso biobi mfunu bidi mu diambu di kimvuka kidiatila mu kambu ku divunzi. (1 Ko. 14:40) Mu buela, bisadi binkaka bi kisalu beta tula masolo mu lukutukunu lu Luzingu ayi kisalu ayi beta tula zidiskur zi batu boso. Sadi mu kisalu kalenda kuandi sobulu mu diambu di kabuela nkengi wu grupi yi kisalu kitsamununu mioko. Mu thangu zinkaka, nkulutu kalenda lomba kuidi sadi mu kisalu kimosi kenda ayi niandi muingi betadi khomba mosi mu kisalu ki tanina mamemi (Visite pastorale).
6. Mua ndambu bibila mbi bidi yeto bimonisina phutudulu matondo mu kisalu kingolo ki bisadi mu kisalu?
6 Bue kisalu ki bisadi mu kisalu kieta natina kimvuka mamboti? Khomba mosi wunketo widi mu dizina Beberlyb wukala ku Bolivie tubidi ti: “Ndidi na phutudulu matondo kuidi bisadi bieto bi kisalu, ndieta yangalala buwombo zikhutukunu. Bila mu diambu di kisalu kiawu, ndilenda yimbila, vana mimvutu, wa zidiskur, ayi baka malongi mu zivideo ayi mu zifoto. Beta landakana mambu matedi lutanunu lueto ayi sadisa bakhomba bobo banlandakana zikhutukunu mu zoom. Kumanima ma lukutukunu, beta tuadisa kisalu kikombula, tadila makaba, ayi beta tula ti bakhomba babaka minkanda mu kambu mona phasi. Ndidi na phutudulu matondo mu diambu di bawu!” Leslie, nioni weta zingila ku Colombie ayi nioni nnuni’andi widi nkulutu tubidi ti: “Nnuni’ama weta baka lusadusu lungolo kuidi bisadi mu kisalu mu diambu di dukisa biyeko biphila mu phila. Mu kambu ku lusadusu luawu, nginu bisalu biwombo kakala, diawu ndilembo kubavutudila matondo mu kipfuzi kiawu ayi lusadusu luawu lu luzolo.” Bue wulembo kimuena mu diambu di kisalu kingolo kioki bisadi mu kisalu balembo sadi mu kimvuka kiaku?—1 Tim. 3:13.
7. Bue tulenda monisina phutudulu matondo mu diambu di bisadi mu kisalu? (Tala phe foto.)
7 Buba ti phutudulu matondo wukala mu diambu di bisadi mu kisalu, Bibila kitukindisidi ti: “Luzaba vutulanga matondo.” (Kol. 3:15) Krzysztof, nkulutu mosi ku Finlande, weba monisanga phutudulu’andi matondo mu phila yayi: “Ndieta tinda mua nkanda voti mua mesaje yoyi ndieta sonika verse yi Bibila ayi tubila phila yoyi sadi beni mu kisalu kakhindisila voti phila yoyi ndieta muena khini kisalu kiandi.” Pascal ayi Jael, bo beta zingila ku Nouvelle-Calédonie, beta sambila buwombo mu diambu di bisadi mu kisalu. Pascal tubidi ti: “Mu bilumbu biabi kuandi bime vioka, ndisambidi Yehova buwombo mu diambu di bisadi bieto mu kisalu, kumvutudila matondo mu diambu di bawu ayi kunlomba kaba yawu ayi kabasadisa.” Yehova weta wa minsambu mi phila yoyi, ayi kimvuka kieta kumibakila mamboti.—2 Ko. 1:11.
BAKULUTU BA KIMVUKA BOBO “BANSALANGA NGOLO VA KHATI TSIKꞌENO”
8. Bila mbi Polo kasonikina ti bakulutu mu tandu kitheti beba ‘salanga ngolo’? (1 Tesalonika 5:12, 13)
8 Bakulutu mu tandu kitheti beba salanga ngolo mu diambu di kimvuka. (Tanga 1 Tesalonika 5:12, 13; 1 Tim. 5:17) Bawu beba ‘tuadisanga’ kimvuka, diatisanga zikhutukunu ayi baka zinzengolo mu dingumba di bakulutu. Beba ‘lubulanga’ bakhomba ba babakala ayi ba baketo mu kubavananga zindongi ziozi zifueni mu luzolo muingi kimvuka kitanunu. (1 Tes. 2:11, 12; 2 Tim. 4:2) Bukiedika, babakala beni beba tulanga phe ngolo mu dukisa ziphuila zi makanda mawu ayi kukitanina phe bawu veka mu kipheve.—1 Tim. 3:2, 4; Tito 1:6-9.
9. Biyeko mbi bakulutu balembo dukisa mu bilumbu biabi?
9 Bakulutu badi na mambu mawombo masala bilumbu biabi. Badi minsamuni mi nsamu wumboti wu kipfumu ki Nzambi. (2 Tim. 4:5) Balembo diatisa kisalu ki tsamununu mu kipfuzi kioso, balembo kubika kisalu beni mu terituare yi kimvuka, ayi vana formasio mu phila yisamunina ayi longa. Beta sala phe banga bazuzi bo badi ntima kiadi, bobo basi ko thalu zizi. Thangu mukristu mosi kavengi disumu dinneni, bakulutu beta kunsadisa kavutula nguizani’andi ayi Yehova. Yo yawu thangu, bafueti kenga mu diambu di tanina kimvuka kiba kivedila mu kipheve. (1 Ko. 5:12, 13; Nga. 6:1) Ditheti theti, bakulutu bazabikini banga mimvungi mi mamemi. (1 Pi. 5:1-3) Beta tula zidiskur ziozi zibedi mu masonoko ziozi bakubikidi bumboti, tomba zaba kadika mutu mu kimvuka, ayi tula zivisiti kuidi bakhomba. Bakulutu bankaka beta buela mioko mu kisalu kithungulu yi Nzo yi Kipfumu ayi kuyibongisa, sala mu zikomite zi zikhutukunu zinneni, voti sala mu zikomite zinguizani ayi minganga ayi mu zigrupi zi minkengi ziozi zieta tula ziviziti kuidi bakhomba bobo bam’bela, ayi biyeko binkaka nkaka. Bakulutu beta sala ngolo mu diambu dieto!
10. Mua ndambu bibila mbi bidi yeto bimonisina phutudulu matondo mu kisalu kingolo ki bakulutu?
10 Yehova wuvana tsila ti mimvungi mi mamemi miela kutukipa bumboti ayi ‘tuela sie bue mona ko tsisi voti boma.’ (Yel. 23:4) Johanna, khomba mosi wunketo wukala ku Finlande wumona kiedika ki ziphova beni mu thangu nguandi kabela kimbevo kimosi kingolo. Tubidi ti: “Buba ti yiba diambu diphasi mu monisa kuidi bankaka phila yoyi ndieba kimuenanga, nkulutu mosi nioni ka ndisi zaba ko bumboti mboti wumbonisina mvibudulu, wusambila ayi minu, ayi wuphana sikididi ti Yehova weta kunzola. Ndikadi bue bambuka moyo mambu momo katuba, vayi ndilembo bambuka moyo ti ndikimona mu lutanunu kumanima ma solula yandi. Khikinini ti Yehova wuntuma kiza tsadisa mu thangu beni yina yoyi ndiba na phuila yi lusadusu.” Bue bakulutu ba kimvuka kiaku beta kusadisila?
11. Bue tulenda monisina phutudulu matondo mu diambu di bakulutu? (Tala phe foto.)
11 Yehova katidi tumonisa phutudulu matondo yoyi yibedi mu ntima kuidi bakulutu “mu diambu di kisalu kiawu.” (1 Tes. 5:12, 13) Henrietta, nioni weta zingila phe ku Finlande, weta mona ti: “Bakulutu beta sadisa bankaka mu luzolo loso, vayi diawu ko din’zola tuba ti thangu yiwombo bakala ayi zingolo bakala viokila bankaka voti badengananga ko ziphasi mu luzingu luawu. Thangu zinkaka ndieta kubakamba ti, ‘Zebi kuaku? Bukiedika widi nkulutu mosi wumboti. Thidi wuzaba diambu beni.’” Khomba mosi ku Turquie nioni widi mu dizina di Sera tubidi ti: “Bakulutu phuila yi lukindusu badi; diawu dilenda kubasadisa batatamana kisalu kiawu. Diawu tulenda kubasonikina nkanda, kubatedisa badia yeto mua kima, voti bimanga yawu mu kisalu ki tsamununu.” Kuidi na nkulutu nioni mawu yangalala vutudila matondo mawombo mu diambu di kipfuzi kioki kalembo monisa mu kimvuka? Tomba bue bu kubamonisina phutudulu matondo beni.—1 Ko. 16:18.
Wulenda vana bakulutu lukindusu lolo badi phuila muingi wubasadisa batatamana kisalu kiawu (Tala paragrafi 7, 11, 15)
MINKENGI MI ZUNGA MIOMI MILEMBO KINDISA BIMVUKA
12. Nkangu mbi wunkaka Yesu kabieka muingi wukindisanga bimvuka? (1 Tesalonika 2:7, 8)
12 Yesu Kristu wuvana kimvuka “makaba ma batu” bobo balembo sadi mu phila yinkaka. Mu lutuadusu luandi, bakulutu ba Yelusalemi babieka Polo, Balinabasi, ayi bakhomba bankaka minkengi mi zunga. (Mav. 11:22) Bila mbi? Mu bila kio kiawu kioki beta biekila bisadi mu kisalu ayi bakulutu: Mu diambu di kindisa bimvuka. (Mav. 15:40, 41) Babakala beni bakiyimina mamboti mawu ayi batula luzingu luawu mu vonza mu diambu di longa ayi kindisa bankaka.—Tanga 1 Tesalonika 2:7, 8.
13. Biyeko mbi minkengi mi zunga beta dukisa?
13 Kadika thangu minkengi mi zunga beta tula zivuayaje ziwombo. Bankaka muingi batula mu bimvuka binkaka, beta tula zikhama zi zikilometre. Kadika sabala, nkengi wu zunga weta tula zidiskur ziwombo, weta kue tala bakhomba mu kisalu kitanina mamemi (visite pastorale) ayi weta tuadisa lukutukunu ayi min’zibudi nzila, lukutukunu ayi bakulutu ayi zikhutukunu zi kisalu ki tsamununu. Weta kubika zi diskur ayi zikhutukunu zi zunga ayi zinneni. Weta tuadisa zinzo zi nkanda zi min’zibudi nzila, weta kubika lukutukunu lu sipesiali ayi min’zibudi nzila miomi midi mu zunga kiandi, ayi weta tadila phe mambu mankaka—thangu zinkaka mu nsualu nsualu mambu momo bilu ki filiali keta kuntuma.
14. Bibila mbi bidi yeto bimonisina phutudulu matondo mu kisalu kingolo ki minkengi mi zunga?
14 Bue kimvuka kieta bakila mamboti mu dikaba di minkengi mi zunga? Khomba mosi ku Turquie wutuba mu diambu ditedi ziviziti zi minkengi mi zunga ti: “Ndizulu’awu yeta kuthuma ndiviokisa thangu yiwombo mu diambu di sadisa bakhomba ziama ba babakala ayi ba baketo. Ndidengana minkengi mi zunga miwombo; vayi kadi wumosi mu bawu kasi tula ko ndiyindula ti kisalu kiwombo kadi voti kedi nunga ko kupfikama.” Johanna, nioni tutekidi yolukilanga, wusamuna ayi nkengi mosi wu zunga vayi basi kue bata ko kadi mutu mu zinzo ziozi baye samunina. “Buba buawu,” tubidi ti: “Kadi khumbu ndiela zimbakana lumbu beni. Bakhomba ziama buadi ba baketo bayiza botuka koko tube banga yawu, ndieba kubayindulanga buwombo. Nkengi wu zunga wukhindisa mu mayangi ayi wutsadisa ndimona ti mu kisalu ki Yehova, khumbu zinkaka tulendi ko zingila va kimosi ayi bakhomba voti bakundi beto, vayi mu nza yimona tuela ba na maluaku maviokisa thangu va kimosi mu kambu tsuka.” Bawombo mu beto banga Johanna, tuyangalala buwombo mu phila yoyi minkengi mi zunga mitusadisila.—Mav. 20:37–21:1.
15. a) Mu tadila 3 Yowani 5-8, bue tulenda monisina phutudulu matondo kuidi minkengi mi zunga? (Tala phe foto.) b) Bila mbi tufueti monisina phutudulu matondo kuidi baketo ba bakhomba ba babakala bobo balembo sadi kisalu kingolo mu kimvuka, ayi bue tulenda kubutudila? (Tala ankadre “Bambukila baketo bawu moyo.”)
15 Thumu Yowani wukindisa Ngayusi kamonisa kadulu kiyamba banzenza ayi kabasadisa “mu landakana nzietolo’awu mu phila yimmonisa Nzambi khini.” (Tanga 3 Yowani 5-8.) Phila yoyi tulenda kubutudila yidi yitedisa nkengi’eto wu zunga kiza dia yeto kithuadi. Phila yinkaka yidi yibuela mioko mu zikhubukulu zi kisalu ki tsamununu mu thangu kiza tutadi mu kimvuka. Leslie, nioni tutekidi tubilanga, wumonisa phutudulu matondo mu ziphila zinkaka. Wutuba ti: “Ndisambila Yehova muingi kadukisa ziphuila ziawu. Minu ayi nnuni’ama tubasonikina minkanda, mu kubakamba phila yoyi ziviziti ziawu zieta kutusadisila.” Bambuka moyo ti minkengi mi zunga badi kuandi banga beto. Thangu zinkaka, beta bela, kukitatikisa voti beti vonga nitu. Khumbu zinkaka ziphova ziaku zi buphombo voti mua dikabu dimosi dilenda ba mvutu mu lusambulu lu nkengi wu zunga!—Zin. 12:25.
PHUILA TUIDI YI ‘MAKABA MA BATU’
16. Mu tadila Zingana 3:27, biuvu mbi bakhomba ba babakala balenda kukiyuvula?
16 Mu nza yimvimba tuidi na phuila yi bakhomba bawombo ba babakala muingi basala banga ‘makaba ma batu.’ Enati widi khomba bakala nioni wubaka mbotama, diluaku didi yaku ‘disadisila mu phila beni yoyi’? (Tanga Zingana 3:27.) Mawu kikinina ba sadi mu kisalu? Wulenda tomba dukisa ziphuila zi bakhomba ziaku banga nkulutu?c Widi na diluaku di balula mambu ma luzingu luaku muingi wubaka bukotila Nzo nkanda yi minsamuni wu nsamu wumboti wu Kipfumu (École pour évangélisateurs du Royaume)? Nzo nkanda beni mayi vana formasio muingi Yesu kaluta bue kusadila. Enati wulembo kimoni ti wisi fuana ko mu kisalu beni, sambila Yehova. Lomba Yehova kavana pheve santu mu diambu di wununga dukisa kiyeko kioso kioki baveni.—Luka 11:13; Mav. 20:28.
17. ‘Makaba ma batu’ diambu mbi meta monisa mu diambu di Pfumu’eto, Yesu Kristu?
17 Bakhomba bobo Yesu kasobudi banga ‘makaba ma batu’ balembo monisa ti niandi wulembo tutuadisa mu bilumbu biabi bitsuka. (Mat. 28:20) Wisi ko na phutudulu matondo mu phila yoyi Pfumu’eto keta tuzodila, kutukabila ayi keta kututudila thalu mu kutuvana bakhomba ba babakala bobo bafueni muingi badukisa ziphuila zieto? Diawu tombanga maluaku ma monisina phutudulu’aku matondo mu diambu di babakala bobo beta sala kisalu kingolo. Ayi kadi kambu vutudilanga Yehova matondo, bila niandi weta vana “kadika dikaba dimboti ayi kadika dikaba difuana.”—Zaki 1:17.
NKUNGA 99 Tozali na bandeko ebele
a Bakulutu bobo badi mu Kimvuka kintuadisi, minsadisi mi Kimvuka kintuadisi, bakhomba bobo badi mu komite yi filiali, ayi bakhomba bobo badi biyeko binkaka badi phe ‘makaba ma batu.’
b Mazina mankaka balulu mabalulu.
c Muingi wuzaba mambu momo wulenda tula muingi wuba sadi mu kisalu voti nkulutu, tala masolo “Bakhomba ba babakala—Lulembo tombi luba bisadi mu kisalu?” ayi “Bakhomba ba babakala—Lulembo tombi luba bakulutu?” Mu Nzo yi Nkengidi yi Novembre 2024.