Nkanda wubedi kuidi Kimvuka kintuadisi

Bakhomba zi luzolo,

Luzolo mu diambu di Nzambi ayi mu diambu di batu lueta kututuma ‘tuenda . . . ayi tukitula batu ba zitsi zioso minlonguki [miandi], tubabotika.’ (Mat. 28:19, 20; Mlk. 12:28-31) Luzolo lukambulu buimi ngolo lukala. Lulenda simba mintima mi batu bo ‘badi bikadulu bifuana mu baka luzingu lukalumani.’​—Mavanga 13:48.

Mu thama, tube tulanga mayindu meto mu lunda mu ntu ziphova ziozi tulenda kue tubila mu kisalu ki tsamununu ayi bikila batu minkanda. Buabu tufueti tula ngolo mu bongisa mboti mboti bue busoludila ayi batu. Tutidi monisa luzolo kuidi batu bankaka mu kubakamba mambu mo maku bayangidika. Yawu yinsundula ti tu ba bakubama mu balula mambu ayi tadila mboti mboti mambu mo makubatatikisa ayi mambu mo meta yangidika balonguki. Bue mua nkanda fiafi filenda kutusadisila muingi tubutudila?

Mua nkanda beni fidi na 12 ki malongi mo malembo tubila bikadulu bio tufueti yonzula mu diambu di tumonisa luzolo ayi tukitula batu minlonguki. Kadika dilongi disimbulu mu disolo dimosi di Bibila dio dimmonisa phila Yesu voti nsamuni wunkaka mu tandu kitheti kamonisina kadulu kifuana mu kisalu ki tsamununu. Lukanu lueto, luisi ko mu lunda phila yi samunina mu ntu, vayi tubutudila mu phila yi monisina luzolo lueto kuidi batu. Kadiambu ko kadika kadulu mfunu kidi mu mintindu mioso mi kisalu kieto ki tsamununu, tutadila bue bikadulu binkaka bididi mfunu mu thangu tutonini disolo, tulembo vutukila batu, voti bo tulembo tuadisa ndongokolo yi Bibila.

Mu thangu wulembo tadila kadika dilongi, yindula phila yimboti yo wulenda monisina kadulu beni thangu wulembo solola ayi batu bobo bakala ko weta vuanda. Tula ngolo mu yonzula luzolo luaku mu diambu di Yehova ayi mu diambu di batu. Luzolo beni, lo lulutidi madiela moso momo tulenda sadila, lulenda kusadisa wudukisa lukanu luaku lukitula batu minlonguki.

Tueta yangalala mu diluaku dinneni dio tubeki di sala kithuadi ayi beno. (Sef. 3:9) Bika Yehova kalusakumuna buwombo bo lulembo tatamana zola batu ayi kubakitula minlonguki!