Bix jeʼel u kiʼimaktal k-óol yéetel le meyaj k-beetikoʼ

1-3. 1) Yaʼab máakeʼ, ¿bix u yilik le meyajoʼ? 2) ¿Baʼax ku yaʼalik le Biblia tu yoʼolal le meyajoʼ, yéetel baʼax ken k-núuk teʼ xookaʼ?

TEʼ KʼIINOʼOBAʼ, yaʼab máakoʼobeʼ ku yilkoʼob le meyaj bey upʼéel castigoeʼ. Maʼatech u taasiktiʼob kiʼimak óolal le meyaj ku beetkoʼoboʼ, yéetel ku yilkoʼob bey upʼéel baʼal jach nak óoleʼ. Baʼaleʼ maʼ unaj u tuukuloʼob beyaʼ, tumen yaan baʼax jeʼel u páajtal u beetkoʼob utiaʼal ka yanaktiʼob kiʼimak óolal yéetel le meyaj ku beetkoʼoboʼ.

² Le Bibliaoʼ ku yaʼalikeʼ jeʼel u páajtal u kiʼimaktal u yóol máak yoʼolal le meyaj ku beetkoʼ. Tumen ku yaʼalikeʼ tuláakal le meyaj ku beetaʼal bey xan le utsiloʼob ku taasikoʼ, upʼéel baʼal tiʼ Dios u taal. Le rey Salomonoʼ bey tu yaʼaliloʼ: «Tumen wa k-janal, yéetel ukʼul, [bey] xan ilik u yutsil tuláakal meyajeʼ, leloʼ chéen tumen [Dios] tsʼáa tiʼ toʼon» (Eclesiastés 3:13). Jéeobaeʼ jach u yaabilmoʼon yéetel u kʼáat ka xiʼiktoʼon maʼalob, u kʼáat xan ka yanaktoʼon kiʼimak óolal yéetel le meyaj yantoʼonoʼ bey xan ka k-il le utsiloʼob ku taasikoʼ. Wa k-ilik le meyaj jeʼex u yilaʼal tumen Dios yéetel k-chaʼik u nuʼuktikoʼon yéetel baʼaxoʼob ku yaʼalikoʼ, yaan k-pʼáatal mantatsʼ tiʼ u yaakunaj (Eclesiastés 2:24; 5:18).

³ Teʼ xookaʼ yaan k-núukik le kampʼéel kʼáatchiʼobaʼ: ¿Bix jeʼel k-ilik u «yutsil tuláakal [le] meyaj» k-beetikoʼ? ¿Baʼax meyajiloʼob maʼ maʼalob ka k-beetiʼ? ¿Bix jeʼel u páajtal k-jóoʼsik u súutukil utiaʼal k-meyaj yéetel utiaʼal k-beetik baʼaxoʼob yaan yil yéetel k-adorartik Dioseʼ? ¿Máakalmáak le meyaj maas kʼaʼabéet k-beetkoʼ? Baʼaleʼ táanil tiʼ k-ilik u núukil le kʼáatchiʼobaʼ, koʼox tʼaan tiʼ Jéeoba yéetel Jesucristo, máaxoʼob jach meeyjiloʼob.

LE KAʼATÚUL MÁAXOʼOB JACH MEEYJILOʼOBOʼ

4, 5. ¿Baʼax ku yaʼalik le Biblia yoʼolal le meyajoʼob ku beetik Jéeobaoʼ?

⁴ Jéeobaeʼ letiʼe máax maas yaʼab u meyajoʼ. Génesis 1:1 ku yaʼalik: «Tu yáax chuuneʼ [Dioseʼ] tu beetaj kaʼanoʼob yéetel luʼum». Ka tsʼoʼok u beetik le Luʼumaʼ Jéeobaeʼ tu yileʼ «tuláakal baʼax tu beetajoʼ sen maʼalob» (Génesis 1:31). Lelaʼ u kʼáat u yaʼaleʼ jach kiʼimakchaj u yóol yoʼolal le meyaj tu beetoʼ. Jéeoba, le «Dios kiʼimak u yóoloʼ», jach maʼalob tu yuʼubiluba úuchik u beetik le nojoch meyajaʼ (1 Timoteo 1:11, NM).

⁵ Jéeobaeʼ utúul Dios mantatsʼ táan u meyaj. Le oʼolaleʼ, kex tsʼoʼok u máan yaʼab jaʼaboʼob u beet le Luʼumaʼ, Cristoeʼ tu yaʼalaj: «In Taataeʼ tak bejlaʼa táan u meya[jeʼ]» (Juan 5:17). Baʼaleʼ ¿baʼax meyajiloʼob táan u beetik Jéeoba? Táan u kanáantik wíinik yéetel táan u tsʼáaik nuʼuktajtiʼ. Úuch joʼopʼok xan u yéeyik le máaxoʼob kun binoʼob gobernar yéetel Jesusoʼ (2 Corintoiloʼob 5:17). Maʼ xuʼuluk u meyaj utiaʼal u yantal kuxtal minaʼan u xuul tiʼ máaxoʼob yaabiltmailiʼ (Romailoʼob 6:23). Tsʼoʼoleʼ Jéeobaeʼ jach kiʼimak u yóol tumen yaʼab tiʼ le máaxoʼob ku yuʼubkoʼob le baʼaxoʼob ken u beet le Reinooʼ, tsʼoʼok u kʼexik u kuxtaloʼob utiaʼal ka pʼáatkoʼob tiʼ u yaabilaj (Juan 6:44).

6, 7. ¿Bix tu yeʼesil Jesús utúul máax jach meeyjil?

⁶ Jesús xaneʼ, jach yaʼab meyajoʼob tsʼoʼok u beetik. Táanil tiʼ u taal way Luʼumeʼ tu yáantaj xan Jéeoba utiaʼal u beet le «baʼax yaan teʼ kaʼanoʼ yéetel teʼ luʼumoʼ» (Proverbios 8:22-31; Colosailoʼob 1:15-17). Ka taal way Luʼumeʼ láayliʼ jach meyajnajeʼ. Desde tu chichnileʼ kʼuch kʼaj óoltbil bey «le carpintero[oʼ]» (Marcos 6:3). Teʼ kʼiinoʼob jeʼeloʼ minaʼan kaʼach tuʼux ku koʼonol tablas yéetel minaʼan maquinanoʼob utiaʼal u xoʼotoloʼob. Jach kʼaʼabéet yaan u muukʼ máak utiaʼal u beetik le meyajaʼ yéetel u yojéeltik bix ken u beetil. Chéen tukult bix u bin Jesús u chʼak le cheʼob yéetel u kuchik u bis tak teʼ tuʼux ku meyajoʼ. Tukult xan bix u naʼaksik kaʼach u vigai le najoʼoboʼ, yéetel bix u tsʼáaik u joonailoʼob wa u beetik uláakʼ nuʼukuloʼob. Tiʼ letiʼeʼ jach tu taasaj kiʼimak óolal u beetik maʼalob le meyajaʼ.

⁷ Jesuseʼ jach tu yilaj xan u tsʼoʼokbesik le meyaj túuxtaʼab u beetoʼ. Ichil óoxpʼéel jaʼab yéetel táankucheʼ tu jach tsʼáaj u yóol u beet le meyajaʼ. Jach tu yilaj u tsikbaltik tiʼ yaʼab máakoʼob le baʼaxoʼob ken u beet Diosoʼ, le oʼolal maʼ sáasak táan u líikʼliʼ yéetel tak tsʼoʼok u yáakʼabtaleʼ láayliʼ táan u beetik le meyajaʼ (Lucas 21:37, 38; Juan 3:2). Ku bin kaʼach «tiʼ yaʼabkach kaajoʼob yéetel tiʼ mejen kajtaliloʼob, táan u [kʼaʼaytik] yéetel táan u tsʼáaik kʼaj óoltbil u [reino] Jajal Dios» (Lucas 8:1). Tu xíimbaltaj yaʼab kilómetros tiʼ mejen bejoʼob utiaʼal u bisik tiʼ uláakʼ máakoʼob le maʼalob péektsiloʼ.

8, 9. ¿Tu yilaj wa Jesús «u yutsil tuláakal [le] meyaj» tu beetoʼ?

⁸ ¿Kiʼimakchaj wa u yóol Jesús yoʼolal le meyajoʼob tu beetoʼ? Jach kiʼimakchaj u yóol. Yaʼab tuʼuxoʼob tu yilaj u kʼaʼaytik le maʼalob péektsiloʼ, utiaʼal ka yanak yaʼab máaxoʼob meyajtik Dios. Le meyajaʼ jach tu taasaj kiʼimak óolal tiʼ, kex yaan kʼiinoʼob maʼ jaan utiaʼal u beetkiʼ (Juan 4:31-38). Ka tsʼoʼok u beetik le meyaj túuxtaʼab u beet way Luʼumeʼ, yéetel kiʼimak óolal tu yaʼalaj tiʼ Jéeoba: «Teneʼ tsʼoʼok in nojbeʼenkúuntikech way yóokʼol kaabeʼ. Tsʼoʼok in tsʼoʼoksik le meyaj ta túuxtajen in beetoʼ» (Juan 17:4).

⁹ Jeʼex tsʼoʼok k-ilkoʼ Jéeoba yéetel Jesuseʼ ku yeʼeskoʼobeʼ jeʼel u páajtal k-ilik «u yutsil tuláakal [le] meyaj» k-beetikoʼ. Le yaabilaj k-uʼuyik yoʼolal Diosoʼ, unaj u péekskoʼon k-beet «jeʼel bix letiʼeʼ» (Efesoiloʼob 5:1). Le yaabilaj xan k-uʼuyik tu yoʼolal Jesusoʼ, unaj u péekskoʼon k-kuxtal «jeʼel bix kuxlajik letiʼoʼ» (1 Pedro 2:21). Beoraaʼ koʼox ilik bix jeʼel k-jóoʼsik u «yutsil tuláakal [le] meyaj» k-beetikoʼ.

BIX JEʼEL K-ILIK «U YUTSIL TULÁAKAL [LE] MEYAJ» K-BEETKOʼ

10, 11. ¿Bix unaj k-ilik le meyajoʼ?

¹⁰ Le máaxoʼob meyajtik Diosoʼ jach meeyjil máakoʼob. Baʼaleʼ tumen yaan hora maʼ jach jatsʼuts k-ilik le meyaj yantoʼonoʼ, kex k-kʼáat ka yanaktoʼon kiʼimak óolaleʼ, maʼ chéen chʼaʼabiliʼ. Wa bey k-uʼuyikbaoʼ, ¿baʼax jeʼel u páajtal k-beetik utiaʼal k-ilik «u yutsil tuláakal [le] meyaj» k-beetkoʼ?

¹¹ Le bix unaj k-ilik le meyajoʼ. Maʼ xaaneʼ maʼ tu páajtal k-kaxtik yaanal meyaj, baʼaleʼ jeʼel u páajtal k-kʼexik bix k-ilikeʼ. Upʼéel baʼax jeʼel u yáantkoʼoneʼ letiʼe ka k-il le meyaj jeʼex u yilik Diosoʼ. Jeʼex wa utúul taatatsil kʼaʼabéet u meyaj utiaʼal u tséentik u paalaleʼ, kex ka ilaʼak bey maʼ jach nojoch le meyaj ku beetkoʼ, Dioseʼ maʼ bey u yilkiʼ tumen letiʼeʼ ku kiʼimaktal u yóol ken u yil táan u tsʼáaik máak baʼax kʼaʼabéet tiʼ u paalal. Le Bibliaoʼ ku yaʼalikeʼ máax maʼatech u tsʼáaik baʼax kʼaʼabéet ichil u yotocheʼ maas «kʼaas yanil tiʼ le máax maʼ tu yoksaj óoloʼ» (1 Timoteo 5:8). Wa k-ilik le meyaj bey upʼéel baʼal ku yáantkoʼon k-beet le baʼax ku yaʼaliktoʼon Jéeobaaʼ, yaan u yantaltoʼon le kiʼimak óolal minaʼan tiʼ k-éet meyajoʼoboʼ.

12. ¿Baʼaxten unaj k-tsʼáaik óol meyaj yéetel k-beetik maʼalob?

¹² Unaj k-tsʼáaik óol meyaj yéetel unaj k-beetik maʼalob. K-beetik beyaʼ ku taasiktoʼon yaʼab utsiloʼob, upʼéel tiʼ letiʼobeʼ letiʼe k-lúubul utsil tiʼ k-patronoʼ (Proverbios 12:24; 22:29). Tsʼoʼoleʼ, tumen maʼatech k-oklik mix baʼal yéetel tumen k-ilik meyaj le horaʼob ku kʼáataʼaltoʼonoʼ jach yaʼab utsiloʼob ku yantaltoʼon (Efesoiloʼob 4:28). Jeʼex t-ilaj teʼ xook máanikoʼ, wa k-beetik beyoʼ maʼ xaaneʼ jeʼel u tsʼaʼabaltoʼon upʼéel meyaj maas chan maʼalob tumen k-patroneʼ. Yéetel kex maʼ u tsʼáaik cuenta wa táan k-beetik maʼalob le meyajoʼ, k-ojleʼ «jeetsʼel yanil k-tuukul» yéetel táan k-beetik baʼax utstutʼaan Dios (Hebreob 13:18; Colosailoʼob 3:22-24).

13. ¿Baʼax utsiloʼob jeʼel u taasik k-beetik baʼax maʼalob teʼ tuʼux k-meyajoʼ?

¹³ Unaj k-nojbeʼenkúuntik Dios yéetel baʼaxoʼob k-beetik teʼ tuʼux k-meyajoʼ. Wa mantatsʼ k-ilik beetik baʼax maʼalobeʼ u maasil máakoʼobeʼ yaan u tsʼáaikoʼob cuenta. ¿Baʼax utsiloʼob jeʼel u taasikeʼ? Letiʼe k-jatsʼutskíintik «u kaʼansajoʼob Jajal Dios», le máax tsʼáaiktoʼon le salvacionoʼ (Tito 2:9, 10). Tsʼoʼoleʼ, le baʼaxoʼob k-beetikoʼ ku yeʼesik tiʼ yanoʼon teʼ religión ku kaʼansik u jaajiloʼ yéetel jeʼel u beetik u kʼexik u tuukul le máakoʼoboʼ. ¿Máasaʼ jach jeʼel u kiʼimaktal k-óol wa ka káajak u meyajtik Dios utúul k-éet meyaj ikil u yilik le baʼaloʼob maʼalobtak k-beetikoʼ? Yéetel le baʼax maas maʼaloboʼ, letiʼe k-ojéeltik táan k-kiʼimakkúuntik u yóol Diosoʼ yéetel táan k-nojbeʼenkúuntik u kʼaabaʼ (Proverbios 27:11; 1 Pedro 2:12).

UNAJ K-ILIK BAʼAX MEYAJIL KEN K-BEETE

14-16. ¿Baʼax jeʼel u yáantkoʼon k-il wa maʼalob upʼéel meyajeʼ?

¹⁴ Le Bibliaoʼ maʼatech u yaʼalik jach máakalmáak le meyajoʼob jeʼel u páajtal k-beetkoʼ yéetel máakalmáak maʼatechiʼ. Baʼaleʼ leloʼ maʼ u kʼáat u yaʼal wa jeʼel u páajtal k-kʼamik jeʼel baʼalak meyajileʼ. Le Bibliaoʼ ku yáantkoʼon k-yéey le meyajoʼob maʼatech u binoʼob tu contra le baʼaxoʼob ku yaʼalik Diosoʼ (Proverbios 2:6). ¿Bix jeʼel u páajtal k-ilik wa maʼalob upʼéel meyaj tu táan Dioseʼ? Le kaʼapʼéel kʼáatchiʼobaʼ jeʼel u yáantkoʼon k-ileʼ.

¹⁵ ¿Ku bin wa tu contra le baʼax ku yaʼalik le Bibliaoʼ? Le Bibliaoʼ ku yaʼalikeʼ maʼ maʼalob u yúuchul tuusiʼ, u yookol máak mix u beetaʼal baʼaloʼob utiaʼal adorartbil (Éxodo 20:4; Beetaʼanoʼob [Hechos] 15:29; Efesoiloʼob 4:28; Apocalipsis 21:8). Le oʼolaleʼ maʼ unaj k-meyaj tuʼux jeʼel u kʼaʼabéettal k-beetik baʼaloʼob beyaʼ. Le k-yaabilaj tiʼ Diosoʼ ku yáantkoʼon utiaʼal maʼ k-kʼamik meyajoʼob jeʼel u beetik k-bin tu contra le baʼax ku yaʼalik le Bibliaoʼ (1 Juan 5:3).

¹⁶ ¿Jeʼel wa u beetik in táakpajal tiʼ baʼaloʼob kʼaastakeʼ? Koʼox tuukul tiʼ utúul máax ku yaʼalaʼaltiʼ ka u beet u recepcionistai. Le meyajaʼ maʼ kʼaas lobaliʼ. Baʼaleʼ ¿kux túun wa le tuʼux ken u beet u recepcionistailoʼ, upʼéel clínica tuʼux chéen ku beetaʼal abortoʼob? Kex maʼ tu táakpajal utiaʼal u beetaʼal le abortoʼoboʼ baʼaleʼ tumen tiʼ ku meyajeʼ, ¿maʼ wa táan u yáantaj utiaʼal ka beetaʼak upʼéel baʼal ku bin tu contra le baʼax ku yaʼalik le Bibliaoʼ? (Éxodo 21:22-24.) Le oʼolaleʼ tumen k-yaabilmaj Jéeobaeʼ, maʼ k-kʼáat beet mix baʼal ku bin tu contraiʼ.

17. 1) ¿Baʼaxoʼob unaj k-chʼaʼik en cuenta ken k-il baʼax meyajil ken k-beete? (Ilaʼak le cuadro «¿Maʼalob wa ka in beet le meyajaʼ?».) 2) ¿Bix jeʼel k-kaʼansik k-conciencia utiaʼal u yáantkoʼon k-chʼaʼatukult baʼax ken k-beete?

¹⁷ Utiaʼal k-ilik baʼax meyajil ken k-beeteʼ, kʼaʼabéet jach k-tuukul tiʼ le kaʼapʼéel kʼáatchiʼob yanoʼob teʼ xóotʼol 15 yéetel 16. Baʼaleʼ yaan uláakʼ baʼaloʼob jeʼel u yáantkoʼoneʼ.a Le palitsil chúukpajaʼan u yóol yéetel yaan u naʼatoʼ maʼatech u jach aʼaliktoʼon baʼax unaj k-beetik tiʼ tuláakal baʼax yaan yil yéetel k-kuxtal. Le oʼolaleʼ unaj k-tuklik maʼalob baʼax meyajil ken k-beete. Teʼ kaʼapʼéel xookoʼ t-ilajeʼ utiaʼal k-kaʼansik concienciaeʼ kʼaʼabéet k-xokik sáamsamal le Bibliaoʼ yéetel unaj k-tsʼáaik ichil k-kuxtal le baʼax ku yaʼalikoʼ. Beyoʼ yaan k-chʼaʼatuklik beetik baʼax maʼalob tu táan Dios utiaʼal k-pʼáatal mantatsʼ tiʼ u yaabilaj (Hebreob 5:14).

UNAJ K-KANÁANTIKBA UTIAʼAL KA K-BEET BAʼAX MAʼALOB

18. ¿Baʼaxten maʼ chéen chʼaʼabil u beetaʼal baʼax utstutʼaan Jéeobaiʼ?

¹⁸ Teʼ «talam kʼiinoʼob[aʼ]» maʼ chéen chʼaʼabil u beetaʼal baʼax utstutʼaan Jéeobaiʼ (2 Timoteo 3:1). K-ojel jach talam u kaxtik máak upʼéel meyaj yéetel maʼ u luʼsaʼaltiʼ. Tsʼoʼoleʼ k-ojel unaj k-tsʼáaik tuláakal baʼax kʼaʼabéet ichil k-otoch. Baʼaleʼ, wa maʼ t-kanáantikbaeʼ maʼ xaaneʼ jeʼel u káajal k-beetik meyajoʼob maʼ maʼalobtakeʼ yéetel jeʼel u káajal k-ilik ka yanaktoʼon u maasil baʼaloʼobeʼ, leloʼ jeʼel u beetik k-náachtal tiʼ Dioseʼ (1 Timoteo 6:9, 10). Koʼox ilik baʼax jeʼel u yáantkoʼon k-beet «mantatsʼ baʼax [maas] maʼalob[eʼ]» (Filiposiloʼob 1:10).

19. ¿Baʼaxten chéen tiʼ Jéeoba unaj k-kʼubik óol, yéetel baʼax maʼ ken k-beet tumen k-ojel yaan u kanáantikoʼon?

¹⁹ Unaj k-kʼubik óol tiʼ Jéeoba (Proverbios 3:5, 6). ¿Máasaʼ jach chéen tiʼ letiʼ unaj k-kʼubik óol? Jach beyoʼ, tumen letiʼeʼ u yaabiltmoʼon yéetel ku kanáantikoʼon (1 Pedro 5:7). Letiʼeʼ jach u yojel baʼax kʼaʼabéettoʼon, yéetel mantatsʼ ku tsʼáaiktoʼon (Salmo 37:25). Le oʼolaleʼ maʼ unaj k-tuʼubsik le baʼax ku yaʼalik le Bibliaaʼ: «Maʼ a yaabiltikeʼex le taakʼinoʼ; kiʼimakchajak a wóoleʼex yéetel le baʼax yanteʼexoʼ, tumen Jajal Dioseʼ u yaʼalmaj: Mix bikʼin [ken] in pʼatech mix [ken] in xúumpʼattech» (Hebreob 13:5). Yaʼab sukuʼunoʼob jach u kʼubmubaʼob u meyajtoʼob Dioseʼ, ku yilkoʼobeʼ mantatsʼ ku tsʼaʼabaltiʼob tumen Dios le baʼax kʼaʼabéettiʼoboʼ. K-ojéeltik lelaʼ ku yáantkoʼon utiaʼal maʼ k-sen chiʼichnaktal ikil k-kaxtik baʼax kʼaʼabéet ichil k-otoch (Mateo 6:25-32). Le oʼolaleʼ maʼ unaj k-xulik k-jóokʼol kʼaʼaytajiʼ, k-bin teʼ muchʼtáambaloʼoboʼ mix pʼatik k-beetik uláakʼ baʼaloʼob yaan yil yéetel u meyajtaʼal Dios chéen utiaʼal k-chʼíikil meyaj (Mateo 24:14; Hebreob 10:24, 25).

20. ¿Baʼax unaj u chʼíikil u beet utúul máax meyajtik Dios, yéetel baʼax jeʼel u yáantkoʼon k-beet mantatsʼ beyoʼ?

²⁰ Maʼ unaj k-chʼíikil paakat tiʼ yaanal baʼaloʼobiʼ (Mateo 6:22, 23). Máax ku meyajtik Dioseʼ ku chʼíikil u beet baʼax u kʼáat Dios. Wa mantatsʼ k-beetik beyaʼ, maʼ ken k-kaxt u yantaltoʼon upʼéel meyaj maas maʼalob u boʼolil mix uláakʼ baʼaloʼob maʼ jach kʼaʼabéetoʼobiʼ. Yéetel maʼ ken kaxt ka yanaktoʼon u maas túumbenil tiʼ le baʼaloʼob ku yaʼalaʼal jeʼel u taasik kiʼimak óolaloʼ. ¿Baʼax jeʼel u yáantkoʼon k-beet baʼax u kʼáat Dios mantatsʼeʼ? Letiʼe maʼ u yantaltoʼon baʼaloʼob jeʼel u luʼsiktoʼon yaʼab tiempooʼ, yéetel maʼ k-pʼaxikba yoʼolal baʼaxoʼob maʼ jach kʼaʼabéetoʼobiʼ. Tsʼoʼoleʼ, jeʼex u yaʼalik le Bibliaoʼ wa yantoʼon «janal yéetel nookʼ» bey xan uláakʼ baʼaloʼob kʼaʼabéettoʼoneʼ unaj u kiʼimaktal k-óol (1 Timoteo 6:8). Jeʼex k-ilkoʼ, maʼ unaj k-chʼíikil kaxt yaʼab baʼaloʼob jeʼel u taasiktoʼon chiʼichnakiloʼobeʼ.

21. ¿Baʼaxten unaj k-jóoʼsik tiempo utiaʼal le baʼaloʼob maas kʼaʼanantakoʼ, yéetel baʼax maas kʼaʼanan k-tsʼáaik táanil ichil k-kuxtal?

²¹ Unaj k-tsʼáaik táanil ichil k-kuxtal k-meyajtik Dios. Tumen yaʼab baʼaloʼob yaan k-beeteʼ, unaj k-ilik jóoʼsik tiempo utiaʼal le baʼaloʼob maas kʼaʼanantakoʼ. Wa maʼ t-beetik beyoʼ, yaan k-máansik tiempo chéen tiʼ baʼaloʼob maʼ jach kʼaʼabéetoʼobiʼ. Baʼaleʼ ¿máakalmáak le baʼaloʼob maas kʼaʼanantakoʼ? Kex yaʼab máakoʼob ku yilkoʼob maas kʼaʼanan u kaʼantal u xookoʼob yéetel u yantaltiʼob upʼéel maʼalob meyajeʼ, Jesuseʼ tu yaʼalaj tiʼ u disipuloʼob ka u kaxtoʼob «táanil u [Reino] Jajal Dios» (Mateo 6:33). Le beetikeʼ unaj k-tsʼáaik u Reino Dios táanil ichil k-kuxtal. Yéetel le baʼaxoʼob k-chʼaʼatuklik beetikoʼ, k-eʼesik maas kʼaʼanan u Reino Dios yéetel k-beetik baʼax utstutʼaan ke uláakʼ baʼaloʼob.

UNAJ K-ILIK MAAS TÁAKPAJAL TEʼ KʼAʼAYTAJOʼ

22, 23. 1) ¿Máakalmáak le meyaj maas unaj k-beetkoʼ, yéetel bix k-eʼesik jach k-tsʼaamaj óol k-beete? (Ilaʼak le cuadro «Le baʼax tin chʼaʼatukloʼ tu taasajten kiʼimak óolal».) 2) ¿Baʼax maʼ unaj k-chaʼik u yúuchultoʼoniʼ?

²² Máaxoʼob meyajtik Dioseʼ u yojloʼob tiʼ yanoʼob tu tsʼook kʼiinoʼobeʼ. Le oʼolaleʼ ku yilkoʼob u tsʼoʼokbeskoʼob le meyaj maas unaj u beetkoʼoboʼ: u kʼaʼaytikoʼob le maʼalob péektsiloʼ yéetel u kaʼanskoʼob uláakʼ máakoʼob (Mateo 24:14; 28:19, 20). Jeʼex tu beetil Jesucristoeʼ, letiʼobeʼ jach u tsʼaamaj u yóol u beetoʼob le meyajaʼ. Yaʼabeʼ kex maʼ tu páajtal u beetik u precursoriloʼobeʼ ku jach tsʼáaik u yóoloʼob teʼ kʼaʼaytajoʼ. Uláakʼobeʼ ku meyajoʼob bey precursoroʼob wa misioneroʼobeʼ. Yéetel yaʼab taatatsiloʼobeʼ, tumen u yojloʼob jach kʼaʼabéet u meyajtaʼal Jéeobaeʼ, ku yáantik u paalaloʼob utiaʼal ka u máansoʼob maas yaʼab tiempo teʼ kʼaʼaytajoʼ. Tumen tuláakal le máaxoʼob meyajtik Dios jach ku tsʼáaik u yóoloʼob teʼ kʼaʼaytajoʼ, jeʼel u páajtal u yaʼalaʼaleʼ ku yilkoʼob «u yutsil tuláakal [le] meyaj» ku beetkoʼoboʼ. Minaʼan uláakʼ meyaj jeʼel u maas taasik kiʼimak óolal yéetel yaʼab utsiloʼob ke u kʼubikuba máak u meyajt Dioseʼ (Proverbios 10:22).

²³ Utiaʼal k-tsʼáaik tuláakal baʼax kʼaʼabéet ichil k-otocheʼ, yaʼab tiʼ toʼoneʼ ku kʼaʼabéettal k-meyaj yaʼab tiempo. Baʼaleʼ kex beyoʼ jeʼel u páajtal k-ilik «u yutsil tuláakal [le] meyaj» k-beetikoʼ jeʼex u kʼáat Jéeobaoʼ. Wa k-chaʼik u nuʼuktikoʼon le baʼaxoʼob ku yaʼalik Jéeobaoʼ, yaan u kiʼimaktal k-óol yéetel le meyaj k-beetkoʼ. Maʼ unaj k-chaʼik tiʼ mix baʼal ka u xul k-táakpajal tiʼ le meyaj maas kʼaʼabéetoʼ: le k-kʼaʼaytik u maʼalob péektsilil le Reinooʼ. Beyoʼ yaan k-eʼesik yaabilmaj Jéeoba yéetel k-kʼáat pʼáatal mantatsʼ tiʼ u yaakunaj.