Unaj k-baʼateʼel tu contra le Kʼaasilbaʼaloʼ yéetel tu contra u táabsajoʼob

1, 2. ¿Máaxoʼob ku jach kiʼimaktal u yóoloʼob ken u yiloʼob yaan máaxoʼob ku yokjaʼob?

¿ÚUCH wa káajak a meyajtik Jéeoba? Wa beyoʼ, maʼ xaaneʼ yaʼab utéenel tsʼoʼok a wuʼuyik le tsoltʼaan ku máansaʼal utiaʼal le máaxoʼob ku yokjaʼoboʼ. Baʼaleʼ kex yaʼab utéenel tsʼoʼok a wuʼuyikeʼ, ken a wil le máaxoʼob kulukbaloʼob táanil yéetel ken a wil u waʼataloʼob utiaʼal u núukikoʼob le kʼáatchiʼob ku beetaʼaltiʼoboʼ, techeʼ jach ku kiʼimaktal a wóol. Tsʼoʼoleʼ tumen jach kiʼimak u yóol máakeʼ ku joʼopʼol u papaxkʼab, wa yaan horaeʼ tumen jach kiʼimak u yóoleʼ ku kʼuchul tak okʼol. ¿Máasaʼ ku kiʼimaktal k-óol ken k-il táan u tsʼáaikuba uláakʼ máakoʼob tu tséel Jéeoba?

² Maʼ xaaneʼ lelaʼ maʼ yaʼab utéenel k-ilik u yúuchuliʼ. Baʼaleʼ le angeloʼoboʼ mantatsʼ táan u yilkoʼob u yúuchul. Chéen tukult bukaʼaj «kiʼimak óolal [ku yantal] ichil u angeloʼob Jajal Dios» ken u yiloʼob jaytúul máaxoʼob ku káajal u meyajtikoʼob Jéeoba cada semana (Lucas 15:7, 10.) Le angeloʼoboʼ jach ku kiʼimaktal u yóoloʼob ken u yiloʼob táan u maas nojochtal u kaajal Jéeoba way Luʼumeʼ (Ageo 2:7).

LE KʼAASILBAʼALOʼ «TÁAN U MÁAN JEʼEL BIX LEÓN KU YÁAKAMEʼ»

3. ¿Baʼaxten le Kʼaasilbaʼaloʼ «táan u máan jeʼel bix león ku yáakameʼ», yéetel baʼax u kʼáat u beete?

³ Baʼaleʼ maʼ tuláakal máax ku kiʼimaktal u yóol ken u yil yaʼab máaxoʼob táan u pʼatikoʼob le baʼaxoʼob kʼaastak ku beetaʼal way yóokʼol kaab utiaʼal u yokjaʼoboʼ. Le kʼasaʼan angeloʼoboʼ jach ku pʼuʼujuloʼob. Tsʼoʼoleʼ maʼ chéen letiʼob ku pʼuʼujloʼobiʼ tak Satanás. Kʼaʼajaktoʼoneʼ tu yaʼalaj maʼ yoʼolal yaabilaj ku meyajtaʼal Jéeoba tumen le wíinikoʼoboʼ, yéetel tu yaʼaleʼ wa ka yanaktiʼob talamiloʼobeʼ jeʼel u náachtaloʼob tiʼ Dioseʼ (Job 2:4, 5). Le oʼolaleʼ, ken u chʼaʼatukult máak u kʼubik u kuxtal tiʼ Jéeobaeʼ, ku yeʼesik chéen táan u tuus Satanás yéetel bey ka u táanlajteʼ. Cada semanaeʼ bey táan u laʼajleʼ, tumen yaʼab máakoʼob ku kʼubik u kuxtaloʼob tiʼ Jéeoba. Yoʼolal lelaʼ jach pʼujaʼan yéetel «táan u máan jeʼel bix león ku yáakameʼ, táan u kaxantik máax u lukʼe» (1 Pedro 5:8). Letiʼeʼ ku yilik u beetik tuláakal baʼal utiaʼal u náachkuntkoʼon tiʼ Dios yéetel utiaʼal ka xuʼuluk k-meyajtik (Salmo 7:1, 2; 2 Timoteo 3:12).

4, 5. 1) ¿Baʼax kaʼapʼéel baʼal aʼalaʼan tiʼ Satanás tumen Jéeoba maʼ tu páajtal u beetik? 2) ¿Baʼax ku yaʼalik le Biblia tiʼ le máaxoʼob meyajtik Diosoʼ?

⁴ Kex jach pʼujaʼan le «león ku yáakam[oʼ]», maʼ unaj k-chʼaʼik saajkil tiʼiʼ. ¿Baʼaxten? Tumen yaan kaʼapʼéel baʼal aʼalaʼan tiʼ tumen Jéeoba maʼ tu páajtal u beetik. ¿Baʼaxoʼobiʼ? Yáaxeʼ, mix bikʼin kun béeytal u xuʼulsik u kaajal Dios. Lelaʼ upʼéel baʼal jach u yojel Satanás, tumen Jéeobaeʼ tu yaʼaleʼ «yaʼabkach máakoʼob» meyajtikeʼ yaan u salvartaʼaloʼob tiʼ le «nojoch yaayaj óolaloʼ», yéetel k-ojleʼ le baʼaxoʼob ku yaʼalik Jéeobaoʼ mantatsʼ ku béeytal (Apocalipsis 7:9, 14).

⁵ U kaʼapʼéeleʼ, Satanaseʼ maʼ tu páajtal u beetik u lúubul tiʼ baʼax kʼaas le máax yaan naatsʼ tiʼ Jéeobaoʼ. Lelaʼ k-ojel tu yoʼolal le baʼax tu yaʼalaj le profeta Azarías tiʼ le rey Asaoʼ: «Yuumtsileʼ, tiʼ yaan ta wéeteleʼex, wa tiʼ yaneʼex tu yéeteleʼ» (2 Crónicas 15:2; 1 Corintoiloʼob 10:13). Le Bibliaoʼ ku tʼaan tiʼ máaxoʼob maʼ tu chaʼaj u lúuʼsaʼaloʼob tiʼ baʼal kʼaas tumen Satanasiʼ (Hebreob 11:4-40). Bey túunoʼ wa k-kanáantik maʼ k-náachtal tiʼ Dios jeʼex tu beetiloʼoboʼ, maʼ kun béeytal u lúuʼskoʼon tiʼ baʼaloʼob kʼaastak. Lelaʼ jach bey u yaʼalik le Bibliaoʼ: «Tokabaʼex tiʼ Kʼaasilbaʼal, letiʼ xaneʼ bíin áalkabnakteʼex» (Santiago 4:7).

«K-BAʼATEʼEL TU CONTRA [...] U MUUKʼ KʼAAKʼAS PIXANOʼOB»

6. ¿Bix u beetik Satanás u lúubul tiʼ baʼax kʼaas le máaxoʼob meyajtik Diosoʼ?

⁶ Jeʼex k-ilkoʼ, Satanaseʼ mix bikʼin ken u xuʼuls tiʼ u kaajal Dios. Baʼaleʼ jeʼel u beetik u lúubul tiʼ baʼax kʼaas le máaxoʼob maʼatech u kanáantikubaʼoboʼ. ¿Bix u beetik? Ku yilik u náachkuntkoʼob tiʼ Dios. Utiaʼal lelaʼ, maʼ tu xuʼulul u baʼateʼel tu contra u kaajal Dios, tu contra cada utúul tiʼ toʼon, yéetel ku meyajtiʼ jejeláas táabsajiloʼob. Koʼox ilik cada upʼéel tiʼ le baʼaloʼobaʼ.

7. ¿Baʼaxten táan u maas baʼateʼel Satanás tu contra u kaajal Dios?

⁷ Maʼ tu xuʼulul u baʼateʼel tu contra u kaajal Dios. Le apóstol Juanoʼ tu yaʼaleʼ «u túulisil yóokʼol kaabeʼ tiʼ yaan yáanal u páajtalil Kʼaasibaʼaleʼ» (1 Juan 5:19). Le baʼax tu yaʼalaʼ, ku yeʼesiktoʼoneʼ unaj k-kanáantikba. Satanaseʼ u yojel tiʼ yaan le yóokʼol kaab tu yáanal u páajtaliloʼ, le oʼolal jach chʼiikil u yil bix jeʼel u beetik u lúubul u kaajal Dios, le jach mix utéen u beet u lúubloʼ (Miqueas 4:1; Juan 15:19; Apocalipsis 12:12, 17). Tsʼoʼoleʼ tumen u yojel chéen upʼíit kʼiin pʼaataltiʼeʼ, maas jach pʼujaʼan yéetel táan u maas kaxtik bix jeʼel u náachkuntkoʼon tiʼ Dioseʼ. Teʼ kʼiinoʼobaʼ unaj k-maas baʼateʼel tu contra, tumen letiʼeʼ táan u maas kaxtik bix jeʼel k-lúubul tiʼ baʼax kʼaaseʼ, le oʼolaleʼ kʼaʼabéet k-ilik «baʼax unaj [k-beetik]» (1 Crónicas 12:32).

8. ¿Baʼax tu yóotaj u yaʼal Pablo le ka tu yaʼalaj yantoʼon upʼéel «baʼateʼel» tu contra le kʼasaʼan angeloʼoboʼ?

⁸ Ku baʼateʼel tu contra cada utúul tiʼ toʼon. Pabloeʼ tu yaʼalaj tiʼ le máaxoʼob meyajtik Diosoʼ: «Táan k-baʼateʼel tu contra [...] u muukʼ kʼaakʼas pixanoʼob [wa kʼasaʼan angeloʼob] yanoʼob tiʼ le kaʼanilbeʼen kúuchiloʼoboʼ» (Efesoiloʼob 6:12). ¿Baʼax tu yóotaj u yaʼal Pablo le ka meyajnajtiʼ le tʼaan «baʼatel[oʼ]»? Le tʼaan ich griego ku suʼutul «baʼatel[oʼ]» ku tsʼáaik naʼatbil upʼéel baʼateʼel tuʼux ku paklan muukʼ kaʼatúul máak. Yéetel lelaʼ, Pabloeʼ tu tsʼáaj naʼatbileʼ yantoʼon upʼéel baʼateʼel tu contra le kʼasaʼan angeloʼoboʼ, kex teʼ tuʼux kajaʼanoʼon ku creertaʼaloʼ wa maʼatech. Maʼ unaj k-tuʼubsikeʼ le ka t-kʼubaj k-kuxtal tiʼ Jéeobaeʼ, bey naʼakoʼon tiʼ upʼéel ring utiaʼal k-baʼateʼel yéetel le kʼasaʼan angeloʼoboʼ. Yéetel desde ka okjaʼanajoʼoneʼ maʼ xuʼuluk k-baʼateʼel tu contraʼobiʼ. Le oʼolal Pabloeʼ óoxtéen tu yaʼalaj tiʼ le cristianoʼob yanoʼob Éfeso ka u yil maʼ u lúubloʼob tiʼ u táabsajoʼob Satanasoʼ (Efesoiloʼob 6:11, 13, 14).

9. 1) ¿Baʼaxten jejeláas «táabsajiloʼob» ku meyaj tiʼ Satanás yéetel tiʼ le kʼasaʼan angeloʼoboʼ? 2) ¿Baʼaxten ku yilik Satanás u kʼaskúuntik k-tuukul, yéetel baʼax unaj k-beetik utiaʼal maʼ k-lúubuliʼ? (Ilaʼak le cuadro «Unaj k-kanáantikba tiʼ u táabsajoʼob Satanás».) 3) ¿Baʼax ken k-il beoraaʼ?

⁹ Ku meyajtiʼ jejeláas táabsajoʼob. Pabloeʼ tu yaʼalaj tiʼ le máaxoʼob meyajtik Diosoʼ maʼ u chaʼik u lúubloʼob tiʼ «u táabsajiloʼob» Satanás (Efesoiloʼob 6:11). ¿Baʼaxten tu yaʼalaj «táabsajiloʼob»? Tumen le Kʼaasilbaʼal yéetel le kʼasaʼan angeloʼoboʼ, ku yilik u táabskoʼonoʼob yéetel jejeláas baʼaloʼob. Letiʼobeʼ bey u beetkoʼoboʼ tumen tsʼoʼok u yilkoʼobeʼ yaan tiʼ le máaxoʼob meyajtik Diosoʼ ken u aktáantoʼob upʼéel talamileʼ maʼatech u pʼatikoʼob Jéeoba, le oʼolaleʼ ku kaxtikoʼob jejeláas baʼaloʼob utiaʼal u beetik u lúubloʼob tiʼ baʼax kʼaas. Mantatsʼ xan táan u yilkoʼob baʼaxoʼob k-beetik, tumen u kʼáat u kaxtoʼob baʼax yéetel jeʼel u beetikoʼob k-lúubleʼ. Baʼaleʼ le Bibliaoʼ ku yáantkoʼon k-il le baʼaxoʼob ku meyajtiʼoboʼ (2 Corintoiloʼob 2:11). Teʼ libroaʼ tsʼoʼok ilik jujumpʼéel tiʼ le baʼaxoʼob ku meyaj tiʼ Satanás utiaʼal u lúuʼskoʼon tiʼ baʼax kʼaas, jeʼex le u kaxtaʼal ayikʼaliloʼoboʼ, le k-bisikba yéetel máaxoʼob maʼatech u meyajtikoʼob Jéeobaoʼ, yéetel le u núupkʼebantal máakoʼ. Beoraaʼ yaan k-tʼaan tiʼ uláakʼ baʼax ku meyajtiʼ: le espiritismooʼ.

LE ESPIRITISMOOʼ KU BIN TU CONTRA DIOS

10. 1) ¿Baʼax táakaʼan ichil le espiritismooʼ? 2) ¿Bix u yilik Jéeoba le espiritismooʼ yéetel bix a wilik teech?

¹⁰ Teʼ espiritismooʼ táakaʼan baʼaloʼob jeʼex u jóoʼsaʼal suerte, j-meenil, pulyaʼajil, u tʼaan máak yéetel le kimenoʼoboʼ bey xan uláakʼ baʼaloʼob yaan yil yéetel magia. Le máax ku beetik le baʼaloʼobaʼ ku yantal baʼax u yil yéetel le kʼasaʼan angeloʼoboʼ. Jeʼex k-ojlileʼ Jéeobaeʼ jach u «pʼeek» le baʼaloʼobaʼ (Deuteronomio 18:10-12; Apocalipsis 21:8). Jéeobaeʼ ku yaʼalik tiʼ le máaxoʼob meyajtikoʼ ka u «pʼek[toʼob] le kʼaasoʼ», le oʼolal toʼoneʼ maʼ k-kʼáat ka yanak mix baʼal k-il yéetel le kʼasaʼan angeloʼoboʼ (Romailoʼob 12:9). Tak chéen k-tuukul tiʼ le baʼaloʼobaʼ k-ilikeʼ jach kʼaastakoʼob.

11. ¿Bix jeʼel u yuʼubikuba Satanás wa ka u beet k-táakpajal tiʼ le espiritismooʼ? Kete.

¹¹ Le espiritismooʼ upʼéel baʼal ku bin tu contra Jéeoba. Le oʼolaleʼ le Kʼaasibaʼaloʼ mantatsʼ táan u kaxtik bix jeʼel k-lúubul tiʼ le baʼal jach kʼaasaʼ. Cada ken u beet u lúubul wa máax tiʼ baʼax kʼaaseʼ ku kiʼimaktal u yóol. ¿Baʼaxten? Utiaʼal k-naʼatikeʼ koʼox tʼaan tiʼ utúul soldado. Wa le soldado ku yóotik máan tu yiknal le máaxoʼob yanoʼob tu contra kaʼachoʼ, u comandantei le uláakʼ soldadoʼoboʼ yaan u jach taaskuba nojbaʼalil, yéetel maʼ xaaneʼ yaan u mixbaʼalkúuntik u comandante kaʼach le soldado máan tu yiknaloʼ. Jeʼex le soldado ku chʼaʼatuklik u máan tu yiknal le máaxoʼob yanoʼob tu contra kaʼachoʼ, láayliʼ bey u yúuchul wa utúul máax meyajtik Dios ku káajal u yantal baʼax yil yéetel espiritismo. Kex u yojel maʼ maʼalob baʼax ku beetkeʼ táan u tsʼáaikuba yáanal u páajtalil Satanás. ¿Máasaʼ le Kʼaasilbaʼaloʼ jach jeʼel u yuʼubikuba nojbaʼal yoʼolal lelaʼ? Jach upuliʼ maʼ k-kʼáat beet u yuʼubikuba beyoʼ.

SATANASEʼ KU BEETIK K-TUKLIK MAʼ JAAJ LE BAʼAX KU YAʼALIK DIOSOʼ

12. ¿Baʼax ku beetik Satanás utiaʼal u k-kʼexik bix k-tuukul yoʼolal le espiritismooʼ?

¹² Wa k-ilik le espiritismo bey upʼéel baʼal jach kʼaasoʼ maʼ ken k-lúubuliʼ. Satanaseʼ u yojel, le oʼolaleʼ u kʼáat u kʼex bix k-tuukul. ¿Bix u beetik? Letiʼeʼ u kʼáat ka k-il bey kʼaas le baʼax utsoʼ yéetel le baʼax kʼaasoʼ ka k-il bey utseʼ (Isaías 5:20). Yaʼab utéeneleʼ ku beetik k-tuklik maʼ jach jaaj le baʼax ku yaʼalik Diosoʼ.

13. Aʼal bix tsʼoʼok u beetik Satanás u tuklaʼal maʼ jaaj le baʼax ku yaʼalik Diosoʼ.

¹³ Koʼox ilik bix tsʼoʼok u beetik Satanás u tuklaʼal maʼ jaaj le baʼax ku yaʼalik le Bibliaoʼ. Teʼ paraísooʼ, letiʼeʼ tu yaʼalaj tiʼ Eva: «¿[Jaaj wa Dioseʼ] tu yaʼalajteʼex maʼ a jaantikeʼex u yich mix junkúul cheʼ yaan tu kúuchil le paakʼalaʼ?». Tu kʼiiniloʼob xan Jobeʼ, Satanaseʼ bin teʼ tuʼux muchʼukbal kaʼach le angeloʼob yéetel Diosoʼ, ka tu yaʼalaj yoʼolal Job: «Letiʼeʼ, maʼ chéen kunel u meyajtikech yéetel chúukaʼan óolaliʼ». Le ka taal Jesús xan way Luʼumeʼ, le táant u káajsik u beetik le meyaj túuxtaʼab u beetoʼ, Satanaseʼ tu yaʼalajtiʼ: «Wa u paalech Jajal Dioseʼ aʼal ka suunak waajil le tuunichoʼobaʼ». Utiaʼal u yeʼesik chéen táan u pʼaʼastajeʼ, tiʼ letiʼeʼ meyajnaj le tʼaanoʼob tu yaʼalaj Jéeoba tiʼ Jesús óoliʼ seis semanaʼob táaniloʼ: «Lelaʼ in paal in yaabilaj, tu yoʼolal máax jach kiʼimak in wóol» (Génesis 3:1; Job 1:9; Mateo 3:17; 4:3).

14. 1) ¿Bix u beetik Satanás u yilaʼal maʼ kʼaas le espiritismooʼ? 2) ¿Baʼax ken k-il beoraaʼ?

¹⁴ Bejlaʼeʼ, le Kʼaasilbaʼaloʼ láayliʼ ku beetik u tuklaʼal maʼ jaaj le baʼax ku yaʼalik le Bibliaoʼ. Jeʼex le ken u beet ka ilaʼak maʼ kʼaas le espiritismooʼ. Yéetel yaan horaeʼ ku beetik u tuklik jujuntúul máaxoʼob meyajtik Dios wa jach tu jaajil kʼaas tuláakal baʼax yaan yil yéetel le espiritismooʼ. Lelaʼ u kʼáat u yaʼaleʼ táan xan u kʼáatikoʼob wa jach jaaj le baʼax ku yaʼalaʼaloʼ, jeʼex tu beetil Satanás teʼ tu jardinil Edenoʼ (2 Corintoiloʼob 11:3). ¿Bix túun jeʼel u páajtal k-áantikoʼob utiaʼal ka u kʼex u tuukuloʼoboʼ? ¿Baʼax jeʼel u yáantkoʼon utiaʼal maʼ k-tuukul beyoʼ? Utiaʼal k-núukik le kʼáatchiʼobaʼ koʼox ilik kaʼapʼéel baʼal ku meyaj tiʼ Satanás utiaʼal u beetik u lúubul máak tiʼ le espiritismooʼ: le náaysaj óoloʼoboʼ yéetel le bix u tsʼakikuba máakoʼ.

KU YILIK BAʼAX JATSʼUTS K-ILIK BEY XAN BAʼAX KʼAʼABÉETTOʼON

15. 1) ¿Bix u yilaʼal le espiritismo teʼ luʼumoʼob yanoʼob tu chikʼinil le yóokʼol kaabaʼ? 2) ¿Bix tsʼoʼok u káajal u tuukul jujuntúul sukuʼunoʼob yoʼolal le espiritismooʼ?

¹⁵ Yaʼab tuʼuxoʼobeʼ táan u bin u pʼáatal maʼ kʼaas u yilaʼal le baʼaxoʼob táakaʼanoʼob teʼ espiritismooʼ, lelaʼ maases teʼ luʼumoʼob yaan tu chikʼinil le yóokʼol kaabaʼ. Bejlaʼeʼ yaʼab peliculaʼob, libroʼob, programaʼob tiʼ televisión yéetel videojuegoʼobeʼ, ku chíikbesikoʼob le espiritismo bey upʼéel baʼal jatsʼutseʼ. Yaan libroʼob yéetel peliculaʼobeʼ ku tʼaanoʼob tiʼ bix u yáantaʼal máak tumen le kʼasaʼan angeloʼoboʼ, tsʼoʼoleʼ yaʼab máakoʼobeʼ jach jatsʼuts u yilik u chaʼantkoʼob. Jeʼex k-ilkoʼ le kʼasaʼan angeloʼoboʼ tsʼoʼok u beetikoʼob u yilaʼal maʼ kʼaas le espiritismooʼ. ¿Yaan wa máaxoʼob ichil u kaajal Jéeoba tsʼoʼok u joʼopʼol u tuukuloʼob beyoʼ? Yaan. ¿Bix u káajal u yantaltiʼob le tuukulaʼ? Maʼ xaaneʼ yaʼab sukuʼunoʼobeʼ ku tuukuloʼob jeʼex tuukulnajik utúul sukuʼun tu chaʼantaj upʼéel película yaan yil yéetel espiritismoeʼ, letiʼeʼ tu yaʼalaj: «Jaaj, tin chaʼantaj, baʼaleʼ leloʼ maʼ u kʼáat u yaʼal wa táakpajen tiʼ espiritismoiʼ». ¿Baʼaxten maʼ maʼalob ka joʼopʼok u tuukul máak beyoʼ?

16. ¿Baʼaxten jeʼel u beetiktoʼon kʼaas k-náaysik óol yéetel baʼaloʼob yaan yil yéetel espiritismoeʼ?

¹⁶ Ken u chaʼant máak baʼaloʼob yaan yil yéetel espiritismoeʼ, maʼ xaaneʼ maʼ jach táan u táakpajliʼ, baʼaleʼ maʼ u kʼáat u yaʼal wa maʼ ken u beet kʼaasiʼ. ¿Baʼaxten? Yáaxeʼ, tumen jeʼex u yaʼalik le Bibliaoʼ: Satanás yéetel le kʼasaʼan angeloʼoboʼ maʼ tu páajtal u yojéeltikoʼob baʼax táan k-tuklik.a Baʼaleʼ, tumen u kʼáat u yojéeltoʼob bix jeʼel u beetkoʼob k-lúubul tiʼ baʼax kʼaaseʼ, jeʼex tsʼoʼok k-ilkoʼ letiʼobeʼ mantatsʼ táan u yilkoʼob tuláakal baʼax k-beetik yéetel bix k-náaysik óol. Le oʼolaleʼ, wa yaan máax ku yeʼesik jatsʼuts u yilik le peliculaʼob yéetel le libroʼob ku tʼaanoʼob tiʼ j-meenil, tiʼ máaxoʼob chukaʼanoʼob tumen kʼaakʼas pixanoʼob yéetel tiʼ máaxoʼob ku tʼaanoʼob yéetel kimenoʼobeʼ, bey ka u yaʼal máak tiʼ le kʼasaʼan angeloʼoboʼ baʼax jeʼel u beetik u lúubul tiʼ baʼal kʼaaseʼ. Tsʼoʼoleʼ letiʼobeʼ yaan u yilkoʼob bix jeʼel u beetkoʼob u lúubul máak yéetel le baʼaloʼobaʼ. Yaʼab máakoʼobeʼ ikil u chaʼantik le baʼaloʼobaʼ tsʼoʼok u joʼopʼol u beetkoʼob xan (Galaciailoʼob 6:7).

17. ¿Bix jeʼel u beetik Satanás u lúubul tiʼ baʼax kʼaas utúul sukuʼun kʼojaʼan yéetel lubaʼan u yóoleʼ?

¹⁷ Satanaseʼ maʼ chéen ku yilik u túuntik k-óol yéetel le baʼaxoʼob k-náaysik óoloʼ, baʼaxeʼ tak yéetel le bix k-tsʼakikbaoʼ. Jeʼex wa utúul sukuʼun kʼojaʼaneʼ, ken u yil maʼ tu tsʼaʼakleʼ, maʼ xaaneʼ jach jeʼel u lúubul u yóoleʼ (Marcos 5:25, 26). Tsʼoʼoleʼ tumen bey u yuʼubikubaoʼ, ¿bix jeʼel u beetik Satanás yéetel le kʼasaʼan angeloʼob u lúubul tiʼ baʼax kʼaaseʼ? Letiʼobeʼ u yojloʼobeʼ le Bibliaoʼ ku yaʼalikeʼ maʼ maʼalob ka u kaxt máak u yáantaj «le loolob wíinikoʼoboʼ» (Isaías 31:2). Le oʼolal maʼ xaaneʼ u yojloʼobeʼ tumen jach chiʼichnak le sukuʼunoʼ, jeʼel u beetikoʼob u séeb lúubul tiʼ baʼax kʼaas ka tak u yóot ka tsʼaʼakak yéetel baʼaloʼob yaan yil yéetel espiritismo. Wa ka lúubuk le sukuʼun tiʼ upʼéel baʼal beyaʼ jach jeʼel u beetik u náachtal tiʼ Dioseʼ. ¿Baʼaxten?

18. Toʼon k-meyajtik Dioseʼ, ¿baʼax tsʼaakiloʼob maʼatech k-kʼamik ka tsʼaʼabaktoʼon, yéetel baʼaxten?

¹⁸ Tiʼ le israelitaʼob tu yoksubaʼob tiʼ espiritismoeʼ, Jéeobaeʼ tu yaʼalajtiʼob: «Ken a líikʼseʼex a kʼabeʼex utiaʼal a payalchiʼexeʼ, teneʼ bíin in sut in wich táanxel tuʼux; kex sen payalchiʼinakeʼexeʼ, maʼ bíin in chʼenxikintiʼ» (Isaías 1:15). Toʼoneʼ jach upuliʼ maʼ k-kʼáat beet baʼax kʼaas jeʼex tu beetiloʼoboʼ, tumen maʼ k-kʼáat ka xuʼuluk u yuʼubaʼal k-payalchiʼ tumen Jéeobaiʼ yéetel ka xuʼuluk u yáantkoʼoniʼ; maases wa kʼojaʼanoʼon (Salmo 41:3). Le oʼolaleʼ, ¿baʼax unaj k-beetik wa k-tsʼáaik cuenta yaan baʼax yil yéetel espiritismo le bix ken k-tsʼakbiloʼ? Maʼ ken k-kʼame (Mateo 6:13).b Beyoʼ maʼ ken k-beet mix baʼal jeʼel u náachkuntkoʼon tiʼ Jéeobaeʼ (ilaʼak le cuadro «¿Yaan wa baʼax yil yéetel espiritismo?»).

¿MAʼALOB WA KA K-TSIKBALT BAʼALOʼOB YAAN YIL YÉETEL LE KʼASAʼAN ANGELOʼOBOʼ?

19. 1) ¿Baʼax tsʼoʼok u beetik Satanás u tuklik yaʼabach máakoʼob? 2) ¿Tiʼ baʼax maʼ maʼalob ka tsikbalnak le máaxoʼob meyajtik Diosoʼ?

¹⁹ Teʼ luʼumoʼob yanoʼob teʼ tu chikʼinil le yóokʼol kaabaʼ maases maʼatech u yilaʼal Satanás bey utúul máax yaan u páajtalileʼ. Baʼaleʼ tiʼ uláakʼ tuʼuxoʼobeʼ yaʼabach máakoʼobeʼ ku yilkoʼob bey utúul máax jach yaan u páajtalil yéetel ku beetik baʼax kʼaaseʼ. Le oʼolal mantatsʼ saajkoʼob u beetaʼaltiʼob loob tumen le kʼasaʼan angeloʼoboʼ. Baʼaleʼ kex beyoʼ, maʼ kʼaas u yuʼubikoʼob mix u tsikbaltikoʼob baʼaxoʼob ku beetik le kʼasaʼan angeloʼoboʼ. Toʼon k-meyajtik Dioseʼ, ¿maʼalob wa ka k-uʼuy yéetel ka k-tsikbalt baʼaloʼob beyaʼ? Maʼatech, lelaʼ maʼ unaj k-beetik tu yoʼolal kaʼapʼéel baʼaloʼobiʼ.

20. ¿Bix jeʼel k-áantaj utiaʼal ka maas creertaʼak le baʼaxoʼob ku beetik Satanasoʼ?

²⁰ Yáax baʼax oʼolal maʼ maʼalob ka k-tsikbalt le baʼaxoʼob ku beetik le kʼasaʼan angeloʼoboʼ, tumen wa k-beetkeʼ yaan tiʼ baʼax jeʼel k-áantik Satanaseʼ. ¿Tiʼ baʼaxiʼ? Le Bibliaoʼ ku yaʼalikeʼ kex yaan u páajtalil Satanaseʼ, tiʼ letiʼeʼ ku meyaj «chíikulaloʼob yéetel tuusil jakʼbeʼen baʼaloʼob [...] utiaʼal u tusikoʼob le [máakoʼoboʼ]» (2 Tesalonicailoʼob 2:9, 10). Satanaseʼ letiʼe máax jach ku tuusoʼ, yéetel u yojel bix jeʼel u kʼaskúuntik u tuukul le máaxoʼob jatsʼuts u yilkoʼob le espiritismooʼ. Letiʼeʼ ku beetik u creerkoʼob ku yilkoʼob wa ku yuʼubikoʼob baʼaloʼob maʼ jach táan u yúuchloʼobiʼ. Maʼ xaaneʼ ku tsikbaltaʼal bey upʼéel baʼal uchaʼaneʼ, baʼaleʼ jeʼex u bin u maas tsikbaltaʼaleʼ bey u bin u maas jelbesaʼal le baʼax úuchoʼ. ¿Baʼax jeʼel u yúuchul wa utúul máax meyajtik Dios ku tsikbaltik le baʼaloʼobaʼ? Yaan u yáantik «u taata le tuusoʼ», utiaʼal ka maas creertaʼak le baʼaxoʼob ku beetkoʼ (Juan 8:44; 2 Timoteo 2:16).

21. ¿Tiʼ baʼaxoʼob maas maʼalob ka tʼaanakoʼon?

²¹ Kex wa tu jaajil tsʼoʼok u beetaʼaltoʼon baʼaloʼob kʼaastak tumen le kʼasaʼan angeloʼoboʼ, yaan uláakʼ baʼax oʼolal maʼ unaj k-tsikbalt tiʼ uláakʼ sukuʼunoʼobiʼ. Toʼoneʼ k-kʼáat tʼaan tiʼ le baʼaxoʼob ku beetik Cristooʼ, maʼ tiʼ le baʼaxoʼob ku beetik Satanasoʼ. Jeʼex u yaʼalik le Bibliaoʼ, unaj k-tsʼáaik «k-paakat tiʼ Jesús, tiʼ máax ku taal k-oksaj óolal yéetel máax ku yutsil chúukaʼankúuntik» (Hebreob 12:2). Le ka taal Jesús way Luʼumeʼ, maʼ chéen tu yilaj u tsikbaltik tiʼ u disipuloʼob baʼaloʼob yaan yil yéetel le kʼasaʼan angeloʼoboʼ, tsʼoʼoleʼ letiʼ kaʼacheʼ yaʼab baʼaloʼob u yojel tiʼ baʼax jeʼel u páajtal u beetik le Kʼaasilbaʼaloʼ. Baʼaxeʼ letiʼeʼ tu yilaj u tsikbaltik baʼaxoʼob ken u beet u Reino Diosoʼ. Le oʼolaleʼ jeʼex tu beetil Jesús yéetel u disipuloʼoboʼ, unaj k-ilik tʼaan tiʼ baʼaloʼob maʼalobtak jeʼex tiʼ «u kiʼichkelem meyajoʼob Jajal Dio[seʼ]» (Beetaʼanoʼob [Hechos] 2:11; Lucas 8:1; Romailoʼob 1:11, 12).

22. ¿Bix jeʼel k-beetik u yantal kiʼimak óolal teʼ kaʼanoʼ?

²² Jeʼex tsʼoʼok k-ilkoʼ, Satanaseʼ u kʼáat u beet k-náachtal tiʼ Jéeoba, utiaʼal lelaʼ ku meyajtiʼ jejeláas táabsajoʼob, jeʼex le espiritismooʼ. Baʼaleʼ wa k-pʼektik mantatsʼ le baʼaloʼob kʼaastak yéetel k-ilik yaabiltik le baʼaxoʼob utstakoʼ, maʼ ken k-chaʼa u lúuʼskoʼon tiʼ baʼaloʼob yaan yil yéetel le espiritismooʼ (Efesoiloʼob 4:27). Jach yaan u yantal kiʼimak óolal teʼ kaʼan wa k-ilik «jéetsʼel pʼáataleʼex tu contra u táabsajiloʼob Kʼaasilbaʼal» tak ken xuʼulsaʼak tiʼoʼ (Efesoiloʼob 6:11).