马太福音

7 “你哋唔好再挑人哋嘅错*，噉上帝就唔会挑你哋嘅错。 2 因为你哋点样挑剔人，亦都会点样被挑剔；你哋用乜嘢工具量嘢俾人，人哋都会用乜嘢工具量俾你哋。 3 你点解望实弟兄眼入面嘅嗰条刺，但系冇留意到自己眼里面有梁木*呢？ 4 你自己眼里面有条梁木，又点能够同弟兄讲，‘等我帮你拎走眼里面条刺啦’？ 5 虚伪嘅人啊！拎走你自己眼里面嘅梁木先啦，噉样你先睇得清楚点样帮弟兄拎走佢眼里面条刺。

6 “唔好将神圣嘅嘢俾啲狗，亦都唔好将珍珠掉去啲猪度，如果唔系，佢哋只会用脚乱咁踩，仲调转头攻击你哋。

7 “不断恳求，就会俾你哋；不断去揾，就会揾到；不断敲门，就会开门俾你哋。 8 因为恳求嘅，就会得到；去揾嘅，就会揾到；敲门嘅，就会开门俾佢。 9 如果你哋嘅仔问你哋攞饼，你哋有边个会俾嚿石头佢吖？ 10 又或者佢想要条鱼，但系就俾条蛇佢呢？ 11 你哋虽然系罪人*，都识得送好嘅嘢俾仔女，更何况你哋嘅天父，佢唔系更加会将好嘅嘢赐俾嗰啲恳求佢嘅人咩？

12 “所以，无论系乜嘢事，你哋希望人哋点样对你哋，你哋就要点样对人。其实，呢个就系法典同埋先知书所教嘅道理。

13 “你哋要穿过窄门。因为通向灭亡嘅门系阔嘅，路系容易行嘅，入去嘅人亦都多； 14 而通向生命嘅门系窄嘅，条路系唔易行嘅，揾到嘅人亦都少。

15 “你哋要小心假先知。佢哋系披住羊皮嘅狼，贪得无厌，嚟到你哋呢度，想吞噬你哋。 16 你哋睇佢哋嘅果实，就可以认得出佢哋嘞。人冇可能喺荆棘嗰度采摘到葡萄，喺野草嗰度采摘到无花果㗎嘛，系咪？ 17 同样，好嘅树会结好嘅果实，坏嘅树会结坏嘅果实。 18 好嘅树结唔出坏嘅果实，坏嘅树亦都结唔出好嘅果实。 19 所有结唔出好果实嘅树都要斩落嚟，揼落火度烧咗佢。 20 所以，只要睇佢哋嘅果实，就可以认到佢哋嘞。

21 “唔系每个同我讲‘主啊，主啊’嘅人，都可以入去天上嘅王国，只有嗰啲照住我天父吩咐*去做嘅人，先至可以入去。 22 到咗嗰个日子，会有好多人同我讲：‘主啊，主啊，我哋唔系奉你嘅名讲过预言，奉你嘅名驱赶过邪灵，奉你嘅名施行过好多奇迹咩？’ 23 到时我就要同佢哋讲：‘我完全唔识你哋！你哋呢啲唔遵守上帝法律嘅人，走开！’

24 “所以，听咗我呢啲说话又跟住去做嘅人，就好似一个睿智嘅人，将间屋起喺岩石上面。 25 就算落大雨，有洪水，打大风，间屋都冇因为噉而倒冧，因为佢嘅根基起喺岩石上面。 26 至于嗰啲听咗我嘅说话但系冇去做嘅人，就好似一个愚蠢嘅人，将间屋起喺沙上面。 27 噉落大雨，有洪水，打大风，间屋就因为噉而倒冧，被彻底摧毁。”

28 耶稣讲完呢啲说话之后，民众对于佢嘅教导方式觉得好惊讶， 29 因为耶稣教导嗰阵好似一个有权威嘅人，唔似得佢哋嗰啲抄经士。