馬太福音

20 「天上嘅王國就好似一個家主，好早就出去請工人嚟佢嘅葡萄園做嘢。 2 佢同工人商量好，人工係一日一銀元*，然後就派佢哋去葡萄園嘞。 3 上晝9點*左右，佢又出去，見到市集廣場有啲人企喺度冇工開， 4 就同佢哋講：『你哋都嚟葡萄園幫手吖，我俾你哋嘅人工一定係公道嘅。』 5 佢哋就去嘞。大概中午12點*同埋下晝3點*，個家主又出去請工人返嚟。 6 最後，下晝5點*左右，佢再出去見到有另一啲人企喺度，就問佢哋：『點解你哋企咗喺度成日，唔去做嘢呀？』 7 佢哋答：『因為冇人請我哋囉。』家主就話：『噉你哋都嚟葡萄園做嘢吖。』

8 「到咗黃昏，葡萄園嘅主人同總管講：『叫啲工人嚟吖，出糧俾佢哋，由最尾嚟嘅人開始，去到最先嚟嘅人。』 9 下晝5點嚟做嘢嘅人，每人得到一銀元。 10 輪到最早嚟做嘢嘅人嘞，佢哋以為自己嘅人工會多啲，但係每個人都係得到一銀元。 11 收到人工之後，佢哋就同主人投訴， 12 話：『最後嚟嘅呢班人淨係做咗一個鐘，但係我哋就做咗成日，仲要又曬又辛苦，你俾佢哋嘅人工竟然同我哋一樣！』 13 但係主人回答其中一個話：『朋友，我冇待薄你。你同我商量好嘅人工唔係一銀元咩？ 14 你拎咗你嘅人工就走啦。我想俾最後嚟做嘢嘅嗰班人同你一樣嘅人工。 15 啲錢係我嘅，唔通我冇權決定點樣用咩？我對佢哋好*，你就眼紅*？』 16 所以類似嘅係，有啲人而家係最後嘅，將來係最先嘅；又有啲人而家係最先嘅，將來係最後嘅。」

17 上去耶路撒冷嘅途中，耶穌帶12個門徒行埋一邊，私底下同佢哋講： 18 「而家我哋上去耶路撒冷，有人會將人子交俾祭司長同埋抄經士。佢哋會定佢死罪， 19 交佢俾外族人，等佢哋嘲笑同鞭打佢，然後喺木柱上處決佢，佢會喺第三日復活。」

20 嗰個時候，西庇太嘅老婆帶住兩個仔嚟見耶穌，向佢下拜，有件事想求佢。 21 耶穌同佢講：「有咩事呢？」佢同耶穌講：「請你俾我兩個仔喺你嘅王國同你一齊坐吖，一個坐喺你右邊，一個坐喺你左邊吖。」 22 耶穌就同佢兩個仔講：「你哋根本唔知自己求緊乜嘢。我將會飲嘅杯*，你哋能夠飲咩？」佢哋同耶穌講：「我哋得呀。」 23 耶穌就同佢哋講：「係！你哋係會飲我嘅杯，但係坐喺我嘅右邊同埋左邊，唔係我可以決定㗎，而係我爸爸準備俾邊個坐，就俾邊個坐。」

24 其餘嗰十個門徒聽到呢件事之後，就好嬲呢兩兄弟。 25 耶穌就叫啲門徒嚟，同佢哋講：「你哋知道㗎，列國嘅統治者轄制百姓，大臣掌權管轄人民。 26 你哋之間千祈唔好噉樣。邊個想喺你哋當中做大嘅，就要為人服務； 27 邊個想喺你哋當中做第一，就要做你哋嘅奴隸。 28 人子嚟到，都係噉樣㗎，佢唔係要人為佢服務，而係要為人服務，而且獻出自己嘅生命，作為代價，救贖好多人*。」

29 耶穌同啲門徒喺耶利哥城出嚟嗰陣，有一大班人跟住佢。 30 有兩個盲人坐喺路邊，聽講耶穌路過，就大嗌：「主啊，大衛嘅子孫，可憐吓我哋呀！」 31 不過啲民眾鬧佢哋，叫佢哋唔好嘈，點知佢哋更加大聲噉嗌：「主啊，大衛嘅子孫，可憐吓我哋啦！」 32 耶穌就停低，叫佢哋過嚟，話：「你哋想我為你哋做啲乜嘢呢？」 33 佢哋同耶穌講：「主啊，求你令我哋睇到嘢吖。」 34 耶穌好同情佢哋，就伸手摸佢哋對眼。佢哋即刻睇到嘢，亦都跟隨咗耶穌。