8 Bidii ti ejemplu galán ca xiiñiluʼ

¿XII NI YAʼ?

Zudiʼnu ti ejemplu galán pa laapenu gúninu guiráʼ ni gusíʼdinu ca xiiñinu. Qué zanda cueza ti padre guníʼ ca xiiñiʼ ni dxandíʼ pa laapeʼ qué rúnini. Casi ora chiyubi tuuxa laa ra lidxi ne qué naʼ guiree, guinabaʼ laacaʼ guiníʼcabe qué guinni.

David guníʼ: «Stale binni riníʼ: “Biʼniʼ ni cayabeʼ lii ne cadi ni cayuneʼ”, peru qué runi ca xiiñicabe ni nácabe, purtiʼ zeeda gaca ca xcuidi ca casi ti esponja ni rutopa guiráʼ ni riníʼ ne ni runi bixhózecaʼ».

CONSEJU ZEEDA LU BIBLIA: «Lii ni runi predicar “Cadi cuánaluʼ”, ¿ribáʼnaluʼ la?» (Romanos 2:21).

¿XIÑEE NABÉ RISACA NI?

Guiráʼ ni guni ca padre, ngaca zuni ca xiiñiʼ ora maʼ ziniisicaʼ. Ndiʼ riníʼ naquiiñeʼ gusiidiʼ ca padre ca xiiñicaʼ pa neza checaʼ. Nga runi, naquiiñeʼ gácacaʼ ti ejemplu galán.

Nicole ná: «Zanda gábinu xiiñinu xi guni stale biaje, peru qué gánnanu pa cayénecabe laanu, ne pa qué gúninu ni gábinu laacabe la? zábicabe ni laanu. Nánnacabe guiráʼ ni rúninu, neca qué riníʼcabe ni».

CONSEJU ZEEDA LU BIBLIA: Guendabiaaniʼ ni zeeda de guibáʼ cadi hipócrita laa (Santiago 3:17).

¿XI ZANDA GÚNILUʼ?

Gunabadiidxaʼ laca lii: «¿Ximodo runeʼ tratar xheelaʼ ne ca xiiñeʼ? ¿Xi ruuyaʼ lu televisión? ¿Tuu nga ca ni ridxagaʼ? ¿Ñee rizaaladxeʼ xcaadxi binni la?». Ni nuunu guininu nga ¿ñee racaláʼdxiluʼ gaca ca xiiñiluʼ casi lii la?

Christine bizeeteʼ: «Naa ne xheelaʼ qué rucaʼdu ca xiiñidu gúnicaʼ xiixa ni laadu qué rúnidu».

Gunabaʼ perdón. Nanna ca xiiñiluʼ binni ruchee lii. Nga runi, pa guinábaluʼ perdón xheelaluʼ o ca xiiñiluʼ ora maʼ bicheeluʼ, cusiidiluʼ laacabe laaca caquiiñeʼ gácacabe honradu ne humilde.

Robin guníʼ: «Nabé risaca guni aceptarnu ora maʼ bicheʼnu ne guinábanu perdón, purtiʼ pa qué gúninu ni la? qué zaziidiʼ ca xiiñinu gúnicaʼ ni».