Diciembre

Tobi de ca cosa ni jma runiibi ladxidoʼno de personalidad stiʼ Jesús nga randa riénebe gunáʼ nga ca guendanagana ridxaagalunu pur nácanu binni imperfectu. Biaʼ tiempu bibánibe ndaaniʼ Guidxilayú biechenebe ca ni cayecheʼ ne biinanebe ca ni cayuunaʼ (Rom. 12:15). Guzéʼtenu ti ejemplu, dxi biguetaʼ 70 discípulo stibe de ti campaña de predicación ne cayéchecaʼ pur ni guleenducaʼ, bidxá «ladxidóʼ Jesús de enda nayecheʼ» (Luc. 10:17-21). Peru dxi bíʼyabe pabiáʼ cayacaná binni dxi gutiʼ Lázaro guyuu yuubaʼ ladxidoʼbe dede gucaditibe (Juan 11:33). Neca perfectu Jesús, biabe ne biénebe binni neca imperfectu laacaʼ. ¿Xi gucané laabe gácabe zacá yaʼ? Gúpabe ti cariñu especial binni (Prov. 8:31). Nga nga ni bicaa laabe gunibiaʼbe modo riníʼ íquecaʼ. Nga runi guníʼ apóstol Juan: «Nanna be xi nuu ndaani ladxidóʼ cada» binni (Juan 2:25). w19.03 20 párr. 1, 2

Guxha Binidxabaʼ guiráʼ ni napa Job, xpueltu, ca siervu stiʼ ne reputación sicarú stiʼ. Ne laaca biiti chii xiiñiʼ Job, cani guizáʼ nadxii. Ne de raqué bicaabe Job ti guendahuará nabé feu ni gundisaʼ guiʼdxuʼ guidubi ladi. Tantu nuu xheelaʼ Job xizaa ne qué guidxela xi guni pur yuubaʼ cadíʼdibe que dede gudxi laabe gusaanabe Dios, cúʼdibe laa ne gátibe. Gunabaʼ Job ñati, peru qué nusaana de ñaca íntegro. Óraque bicaalú Binidxabaʼ Job de sti modo. Biquiiñebe chonna xhamigu Job, ni yeganna laa chupa chonna dxi peru qué niguixhedxicaʼ ladxidoʼbe. Lugar de nga la? laga gúdxicaʼ laabe jma diidxaʼ ne guizáʼ feu modo biʼniʼ criticarcaʼ laabe. Guniʼcaʼ Dios ngue cutiidiʼ laabe guiráʼ ca yuubaʼ que ne qué rizaalaʼdxiʼ pa gácabe íntegro o pa coʼ. Dede bicaacaʼ laabe guiníʼ íquebe nácabe ti binni malu ne runi merecerbe guiráʼ ni cadíʼdibe que (Job 1:13-22; 2:7-11; 15:4, 5; 22:3-6; 25:4-6). w19.02 4 párr. 7, 8

Nuu cosa ni cadi malu guidxíbinu. Guzéʼtenu ti ejemplu, normal nga guidxíbinu gúninu xiixa ne guchéʼnenu Jiobá. Pa ñaca nidxibi Adán Dios la? qué nucheené laabe. Peru dxi maʼ qué nidxíbicabe Jiobá la? bixeleʼ lúcabe ne bidiicabe cuenta maʼ nápacabe pecadu. Ne cadi ngasi, sínuque laaca zutiidicabe pecadu ne guendaguti ca xiiñicabe. Cumu bidiicabe cuenta xieeládicabe la? bituilúcabe ngue runi biyúbicabe xi guchiicabe ládicabe (Gén. 3:7, 21). Normal nga guidxíbinu guchéʼnenu Jiobá. Peru cadi naquiiñeʼ guidxibi xhaatanu guendaguti. ¿Xiñee yaʼ? Purtiʼ maʼ bidii Dios laanu esperanza de guibáninu para siempre. Peru pa gueeda guni cometernu ti pecadu ne gaca arrepentirnu de guidubi ladxidoʼno la? zuni perdonarbe laanu pa gápanu fe sacrificiu stiʼ Xiiñibe. Ti modo zanda gusihuínninu nápanu fe Jiobá nga ra gudiʼnu xquendanabáninu laa ne chuʼnísanu (1 Ped. 3:21). w19.03 5, 6 párr. 12, 13

Gupa ca israelita que stale razón para nusihuínnicaʼ agradecidu laacaʼ. Biseendaʼ Jiobá chii plaga guidxi Egipto para gulee laacabe de esclavu. Ne ti tiempu despué, bilabe laacaʼ ra biitibe ejércitu stiʼ ca egipciu ndaaniʼ nisadóʼ Xiñáʼ. Guizáʼ bidiicabe xquíxepeʼ Jiobá dede biindacabe ti canción para laa pur biʼniʼ ganárcabe. Peru ¿pabiáʼ tiempu bisihuínnicabe nuucabe agradecidu yaʼ? Ora bidxaagalúcabe xcaadxi guendanagana, bisiaandacabe guiráʼ ni maʼ biʼniʼ Jiobá pur laacabe, ne maʼ qué ñácacabe agradecidu (Sal. 106:7). Biblia ná: «Bizulú biʼniʼ criticar ca israelita que Moisés ne Aarón pur ni cayúnicaʼ» ne nga rusihuinni laaca biʼniʼ criticárcabe Jiobá (Éx. 16:2, 8). Qué ñuulaʼdxiʼ Jiobá ni bíʼnicabe que, ngue runi gudxi laacabe záticabe lu desiertu, peru Josué ne Caleb qué záticaʼ (Núm. 14:22-24). w19.02 17 párr. 12, 13

Qué ñuni Jesús ti eventu nagana ne naroʼbaʼ para gaca conmemorar guendaguti stibe. Ni gúdxibe ca discípulo stibe nga guietenaláʼdxicaʼ guendaguti stibe ora gúnicaʼ ti eventu sencillu ne apropiadu (Juan 13:15; 1 Cor. 11:23-25). Zaqué bisihuínnibe cadi orgulloso laabe. Guizáʼ riéchenu humilde Rey stinu ni nuu guibáʼ njaʼ (Filip. 2:5-8). Ti modo zanda gácanu humilde casi guca Jesús nga ora rizaaláʼdxinu xcaadxi jma que laanu (Filip. 2:3, 4). Guzéʼtenu xi bíʼnibe gueelaʼ ante gátibe. Neca nánnabe guizáʼ naná modo chiguuticabe laabe la? guizáʼ guyuube xizaa pur ca yuubaʼ chiguidxaagalú ca discípulo fiel stibe. Ngue runi bisiidibe laacaʼ, guluube gana ne gudixhedxibe ladxidoʼcaʼ guidubi gueelaʼ que (Juan 14:25-31). Bisihuinni Jesús jma rizaalaʼdxiʼ ni caquiiñeʼ xcaadxi binni que ni caquiiñeʼ. Guizáʼ galán ejemplu de humildad ni bisaanabe para laanu njaʼ. w19.01 21 párr. 5, 6

¿Ñee ridxíbiluʼ ora riníʼ íqueluʼ guidisanaluʼ ra reunión la? Pa rizaacaluʼ ni la? cadi lii siouʼ rizaacaluʼ zacá. Casi de guiranu riuʼnu nervioso ora runi comentarnu. Pa rizaacaluʼ zacá, cadi malu ni, purtiʼ rusihuínnini humilde lii ne riníʼ íqueluʼ jma risaca xcaadxi que lii. Guizáʼ riuulaʼdxiʼ Jiobá ca binni humilde (Sal. 138:6; Filip. 2:3). Peru laaca racaláʼdxibe gusisácaluʼ laabe ne cuʼluʼ gana ca hermanu stiluʼ ra reunión (1 Tes. 5:11). Nadxiibe lii ne zudiibe valor ni caquiiñeluʼ para guni comentarluʼ. Guidúʼyanu caadxi principiu zeeda lu Biblia. Rusietenalaʼdxiʼ Stiidxaʼ Dios laanu guiranu rucheʼnu ora rininu (Sant. 3:2). Qué ribeza Jiobá gácanu perfectu, ne laaca qué ribézabe gaca ca hermanu stinu zacá (Sal. 103:12-14). Nadxii ca hermanu laanu purtiʼ nácacabe familia espiritual stinu (Mar. 10:29, 30; Juan 13:35). Ne riénecabe nuu biaje rucheʼnu ora rininu. w19.01 8 párr. 3; 10, 11 párr. 10, 11

Tiempu riʼ, cadi fácil nga guni tuuxa ni bizéʼtenu riʼ, peru laaca cadi nagana ni. Zanda gacané Jiobá lii guibániluʼ galán, cadi ora si joven lii, sínuque lu guidubi xquendanabániluʼ. Para guiénenu ximodo nga zanda gacanebe lii la? guidúʼyanu xi gucané ca israelita ganda guni ganarcaʼ ne chuʼcaʼ lu Tierra Prometida ne xi gucané David para guni ganar Goliat. Dxi mayaca chuʼ ca israelita que ndaaniʼ Tierra Prometida que la? qué ñabi Dios laacabe guni entrenárcabe para chécabe lu guerra nin para gácacabe ti buen soldadu (Deut. 28:1, 2). Lugar de nga la? gúdxibe laacaʼ chinándacaʼ ca mandatu stibe ne gápacaʼ confianza laabe (Jos. 1:7-9). Zándaca para ti binni cadi biaʼsi ni canabaʼ Jiobá laacabe que, peru jneza conseju bidii Jiobá laacabe, purtiʼ gucanebe laacaʼ guni ganarcaʼ ca cananeu stale biaje (Jos. 24:11-13). Nga runi, para guzúʼbanu stiidxaʼ Dios la? caquiiñeʼ gápanu fe, ne pa gápanu fe la? siempre zabáninu galán, cásica bibani ca binni de dxiqué. w18.12 25 párr. 3, 4

Nuu tu laa maʼ bixeleʼ purtiʼ qué ñuulaʼdxiʼ xiixa ni bisiene xquidxi Dios. Ne zándaca nuu tu laa dede runi apoyar ni runi ca apóstata ne rucaalú cani runi crenu. Intiica si cosa bicaa laacabe gúnicabe ni, maʼ gucuaacabe decisión de guixélecabe de Jiobá ne de congregación stiʼ (Heb. 3:12-14). Jma jneza cadi nusaana de ñápacabe fe ne confianza Jesús cásica biʼniʼ apóstol Pedro. Peru nuu xcaadxi la? chaahuiʼ chaahuiʼ maʼ bixhélecaʼ de cani dxandíʼ rusiidiʼ Stiidxaʼ Dios, zándaca sin gudiicaʼ cuenta. Biblia ná zeeda gácacabe casi ti barcu ni zixeleʼ de ruaa nisadóʼ chaahuidugá chaahuidugá (Heb. 2:1). Zándaca qué niníʼ íquecabe nixélecabe, peru bidiicabe lugar guca debilitar amistad ni napanécabe Jiobá dede ra bisaana de gaca xhamígucabe laabe. w18.11 9 párr. 5, 6

Pa racaláʼdxinu guizíʼdinu jma para guni servirnu Jiobá la? zúninu stipa para chuunu Escuela para Evangelizadores del Reino. Runi preparar scuela riʼ ca hombre ne gunaa espiritual ni cayuni dxiiñaʼ de tiempu completu para ganda iquiiñeʼ organización stiʼ Jiobá laacabe jma. Ca hermanu ni rié scuela riʼ, nuucaʼ dispuestu chiguni servircaʼ ratiica guseendacabe laacaʼ despué de gaca graduarcaʼ. ¿Nuunu dispuestu chuunu scuela riʼ para guninu jma lu xhiiñaʼ Jiobá la? (1 Cor. 9:23). Guiranu, ca xpinni Jiobá, racaláʼdxinu gudiʼnu de ni nápanu, gannaxhiinu ne gácanu nachaʼhuiʼ, ne guizaaláʼdxinu binni guiráʼ dxi. Pa gúninu ni zuni sentirnu nayecheʼ ne zápanu guendariuudxi (Gál. 5:22, 23). Neca gadxé gadxé circunstancia stinu, guiranu zanda guibáninu nayecheʼ ra chinándanu ejemplu stiʼ Jiobá ora rudiʼnu de ni nápanu. Ne chuʼnu lade ca binni ni nadxiibe, cani runiné laabe dxiiñaʼ (Prov. 3:9, 10). w18.08 27 párr. 16-18

Zándaca nuu tu guinabadiidxaʼ: «¿Ñee nuu razón para gaca divorciar ti xpinni Cristu ne guichaganáʼ sti biaje la?». Ti biaje bisiene Jesús ximodo ruuyaʼ gaca divorciar binni, sicaríʼ guniʼbe: «Ora ilaa né ti hombre xheelaʼ ne ichaganá adxé gunaa la? cuchee né xheelaʼ. Ne pa usaana ti gunaa xheelaʼ ne ichaganá stobi la? laca cuchee ne xheelaʼ» (Mar. 10:11, 12; Luc. 16:18). Nanna dxíchinu runi respetar Jesús guendaxheelaʼ, ne laaca racaláʼdxibe guni respetar xcaadxi binni ni. Nga runi, tutiica gaca divorciar de xheelaʼ pur intiica si pretextu ne guichaganáʼ sti gunaa maʼ cayuni cometer adulterio. Ne zacá ni purtiʼ tutiica gaca divorciar de xheelaʼ pur intiica si cosa la? qué rixá xquendaxheelaʼ nezalú Dios. Para Dios la? guirópacabe «zeeda gácacabe tobi si». Ne laaca guníʼ Jesús pa gaca divorciar hombre de xheelaʼ cusaana laabe en peligru ne zándaca guni cometer xheelabe adulterio. ¿Xiñee yaʼ? Purtiʼ tiempu que, ti gunaa ni gaca divorciar xheelaʼ de laa la? zucaa ni laa guyubi guichaganáʼ sti biaje para gapa guiráʼ ni iquiiñeʼ. Peru pa gúnibe ni la? maʼ cayuni cometerbe adulterio. w18.12 11 párr. 8, 9

Ora guniʼné Habacuc Jiobá gucané ni laabe gatadxí ladxidoʼbe. Ngue runi gúpabe confianza Jiobá ne gulézabe dede ora guni xiixa. Ne cadi málasi guníʼ íquebe zacá, purtiʼ despué bizeetebe zabézabe dede dxi guedandá dxi stiʼ Jiobá (Hab. 3:16). ¿Xi rizíʼdinu de actitud ni gupa Habacuc yaʼ? Primé, cadi naquiiñeʼ gusaana de guni orarnu Jiobá neca cadxaagalunu guendanagana. Guiropa, caquiiñeʼ gucaʼdiáganu laabe ora guidúʼndanu Stiidxabe ne ora gabi organización stibe laanu xi gúninu. Ne guionna, caquiiñeʼ cuézanu dede ora gúnibe xiixa, ne gápanu confianza zuni chaahuibe ca guendanagana stinu. Pa gúninu guiráʼ ndiʼ, cásica biʼniʼ Habacuc la? qué zunítinu paz ni nuu ndaaniʼ ladxidoʼno ni zacané laanu guni huantarnu. Esperanza ni nápanu Dios zacané ni laanu gápanu paciencia, ne laaca zacané ni laanu chuʼnu nayecheʼ neca gápanu guendanagana. Ne zacané esperanza riʼ laanu gápanu confianza maʼ cadi candaa zuni Jiobá, Bixhózenu ni nuu guibáʼ xiixa pur laanu (Rom. 12:12). w18.11 15, 16 párr. 11, 12

¿Xi riníʼ ique Jiobá ora gúninu xiixa ni gucaa stobi guni tropezar, guchee o gusaana de guni servir Jiobá pur ni gúninu yaʼ? Sicaríʼ guníʼ Jesús: «Tutiica guni xiixa para guniná ti binni napa fe naa, ne guni nga gusaana de guni adorarbe Dios la? jma galán para laa nugaandacabe ti guié molinu yanni casi guié ni rucaa bieque ti burru ne dxandipeʼ nusábacabe laa ndaaniʼ nisadóʼ» (Mar. 9:42, TNM). Rihuinni dxiichicaʼ guizáʼ malu para Jesús nga gucaʼnu tuuxa guni tropezar. Ne cumu rusihuínnibe ximódopeʼ nga Bixhózebe la? nuunu seguru laaca malu para Jiobá nga guiníʼ ique tuuxa qué gapa donda pa gucaa ti xpinni Cristu guchee pur xiixa ni guni (Juan 14:9). ¿Laanu yaʼ? ¿Ñee riníʼ íquenu casi riníʼ ique Jiobá ne Jesús la? ¿Ñee rihuinni riníʼ íquenu casi riníʼ ique Jiobá lu ca cosa ni rúninu la? Guzéʼtenu ti ejemplu, zándaca nápanu ti estilu de modo rácunu lari, peru málasi gúnnanu runi incomodar ni caadxi hermanu o dede rucaa ni laacaʼ guiníʼ íquecaʼ gúnicaʼ xiixa cosa malu. ¿Xi gúninu yaʼ? ¿Ñee zucaa guendarannaxhii ni nápanu laacabe gusaana de gácanu lari né estilu ni riuuláʼdxinu la? w18.11 25 párr. 9, 10

¿Xiñee nabé risaca gaca cada tobi de laanu binni íntegro yaʼ? Purtiʼ maʼ biʼniʼ desafiar Binidxabaʼ Jiobá ne cada tobi de laanu. Biʼniʼ biidibe lá sicarú napa Jiobá ora bicaabe binni guiníʼ ique naca Jiobá ti gobernante malu, egoísta ne cadi jneza guiráʼ ni runi. Triste guininu ni peru guyuu Adán ne Eva pur Binidxabaʼ ne bidxiidéchecaʼ Dios (Gén. 3:1-6). Dxi nabánicabe ndaaniʼ jardín de Edén que, gúpacabe stale oportunidad para ñannaxhiicabe Jiobá jma. Peru ora bidxiideche Binidxabaʼ Jiobá, bisihuinni Adán ne Eva cadi completu o íntegro guendarannaxhii ni runi sentircaʼ pur Jiobá. Gudiʼdiʼ si stale tiempu, ca dxi nabani Job, guluu Binidxabaʼ sti duda: ¿Ñee ziuu binni ni gaca leal né Jiobá pur nadxiicaʼ laabe la? Laaca zanda guininu ni sicaríʼ, ¿ñee zanda gaca binni íntegro la? (Job 1:8-11). Neca imperfectu Job ne bichee, cásica laanu la? Gunnaxhii Dios laabe purtiʼ qué nusaanabe laa. w19.02 3, 4 párr. 6, 7

Guníʼ Jesús de ti comerciante ni rizíʼ perla chaʼhuiʼ para gusihuinni pabiáʼ risaca cani dxandíʼ rusiidiʼ Reinu stiʼ Dios. Ora bidxela hombre riʼ tobi de laacani la? nagueendaca «yeutoo irá ni napa para uzíʼ ni» (Mat. 13:45, 46). Zacaca nga ora rizíʼdinu cani dxandíʼ rusiidiʼ Reinu stiʼ Dios ne xcaadxi ni rusiidiʼ Biblia, guizáʼ rusisácanu cani dede nuunu dispuestu gúninu intiica sacrificiu para cadi gunítinu cani. Mientra jma gusisácanu cani la? qué lica zaníʼ íquenu gutoʼno cani (Prov. 23:23). Triste guininu ni, peru stale xpinni Dios maʼ bisaana de gusisaca cani dxandíʼ rusiidiʼ Biblia dede nuu tu laa casi ñaca maʼ bitoo cani. Qué chuʼ dxi gúninu nga. Ni jma jneza gúninu nga chinándanu mandatu ni zeeda lu Biblia ra ná cadi gusaananu de sanu «lu ni dxandíʼ» rusiidiʼ Stiidxaʼ Dios (3 Juan 2-4). Ndiʼ nga ni jma risaca gúninu lu xquendanabáninu. w18.11 9 párr. 3

Gudxi Jiobá ca israelita cadi gucaalucaʼ Jericó. Ni naquiiñeʼ gúnicabe nga gudiicabe buelta guidxi que ti biaje ti dxi pur xhoopaʼ gubidxa ne lu gadxé gubidxa la? gudiicabe ni gadxe buelta. Zándaca niníʼ ique ca soldadu que zunítisicaʼ tiempu ne stipa pa gúnicaʼ ni. Peru Jiobá, Xaíque stiʼ guidxi Israel, nanna dxiichiʼ xi cayuni. Ora yenanda ca Israelita que modo gudixhe Jiobá para chuʼcaʼ ndaaniʼ guidxi Jericó la? gucané ni laacaʼ guni ganarcaʼ ne gaca fe sticaʼ jma naguidxi. Ne laaca bilá Jiobá laacaʼ de nidíndenecaʼ ca soldadu nadipaʼ stiʼ Jericó (Jos. 6:2-5). ¿Xi rusiidiʼ relatu riʼ laanu yaʼ? Zándaca nuu biaje cadi cayénenu xiñee cayuni organización stiʼ Dios caadxi cosa. Guzéʼtenu ti ejemplu, zándaca dxiqué gunabadiidxanu xiñee canabaʼ xquidxi Dios laanu iquiiñenu ca dispositivo electrónico ora gápanu estudiu personal stinu, ora chuunu reunión o para guni predicarnu. Cadi guiráʼ hermanu napa ti dispositivo electrónico, peru cani riquiiñeʼ cani la? huabeenducaʼ stale cosa galán. Nga runi neca gápanu duda, naquiiñeʼ chinándanu ni gabi organización stiʼ Dios laanu. Ne ora guidúʼyanu xi cosa galán ribeendunu ora guidxaa xiixa ndaaniʼ xquidxi Dios la? jmaruʼ si zaguidxi fe stinu ne ziuʼnu tobi si. w18.10 23 párr. 8, 9

Cabeza ca judíu que ne ca discípulo stiʼ Jesús guni chaahuiʼ Mesías guiráʼ guendanagana sticaʼ, ngue runi gucalaʼdxiʼ ca binni de Galilea ñúnicaʼ Jesús rey. Biiyacabe biáʼsipeʼ Jesús nga naquiiñeʼ guni mandar xquídxicabe, purtiʼ guizáʼ galán modo rusiidibe, nápabe poder para gusiándabe binni ne dede biyaanabe cani candaana. Despué de bidii Jesús ni gudó biaʼ gaayuʼ mil hombre bidii cuenta «ma caníʼ stiidxa cabe gueda naaze cabe laa para guni cabe laa rey», ngue runi bireechube de laacaʼ ne gudxíʼbabe stúbibe lu dani que sti biaje (Juan 6:10-15). Sti dxi que, ora guyebe sti ladu nisadóʼ ni nuu Galilea, zándaca maʼ nuudxí ca binni que. Ngue runi bisiene Jesús laacabe beeda lu Guidxilayú riʼ para gacané laacabe en sentidu espiritual ne cadi en sentidu material. Sicaríʼ gúdxibe laacaʼ: «Cadi ucaa ique tu guni tu dxiiña para gapa tu endaró ni iquiiñe si tu ndaani guidxilayú riʼ, purti qué zandaa ni, sínuque laucaa ique guni tu dxiiña sti Dios para gapa tu enda nabani ni qué zaluxe» (Juan 6:25-27). w18.06 4 párr. 4, 5

Biene Jesús ximodo cayuni sentir ca binni ni nuu casi ti ubaguí ni maʼ caluuza ne cani naca casi ti mecha stiʼ ti lámpara ni mayaca guizuíʼ. Ngue runi gúcabe nadóʼ, gúpabe paciencia ne biénebe binni (Mar. 10:14). Neca qué zanda guiénenu ne gusíʼdinu binni cásica biʼniʼ Jesús la? zanda guiénenu ca binni ni runi predicarnu ne naquiiñeʼ gúninu ni. Guidúʼyanu ximodo guinínenu ca binni ni runi predicarnu, pora ne pabiáʼ tiempu naquiiñeʼ gúninu ni. Ca dxi stinu riʼ, qué rizaalaʼdxiʼ ca políticu, ca xaíque yuʼduʼ ne ca xaíque stiʼ ca empresa binni purtiʼ nácacaʼ corrupto ne runinacaʼ laacabe, ne pur nga la? stale binni riuu triste (Mat. 9:36). Stale binni qué gapa confianza xcaadxi ne qué gápacaʼ esperanza. Nga runi risaca gusihuínninu nacháʼhuinu ne riénenu laacabe pur modo guininu ne ni gábinu laacabe. Stale biaje rucaadiaga binni laanu cadi pur nánnanu stale o pur jneza modo rusiénenu laacaʼ xiixa, sínuque rúnicabe ni purtiʼ dxandipeʼ rizaaláʼdxinu laacabe ne runi respetarnu laacabe. w18.09 31, 32 párr. 13, 14

Pa rudiʼnu cuenta caquiiñenu Dios la? zúninu stipa pur gunibiaʼnu laa ne zudiʼnu lugar gacanebe laanu. Para ganda gúninu ni la? naquiiñeʼ guni estudiarnu Biblia, guzúʼbanu stiidxabe ne gúninu ni ná Reinu primé lu xquendanabáninu. Pa gúninu ni bizéʼtenu riʼ la? zabáninu nayecheʼ ne zápanu confianza zuni cumplir Dios ni maʼ biʼniʼ prometer laanu (Tito 2:13). Pa racaláʼdxinu guibáninu nayecheʼ neca guidxaagalunu intiica guendanagana la? caquiiñeʼ gaca xhamígunu Jiobá. Apóstol Pablo bicaa: «Laguieche irá dxi purti xpinni Señor [Jiobá] laatu. Ne sti tiru rabe laatu, laguiecheʼ» (Filip. 4:4). Para ganda gaca xhamígunu Jiobá, caquiiñenu guendabiaaniʼ ni zeeda de Dios (Prov. 3:13, 18). Para cadi gusaana de chuʼnu nayecheʼ caquiiñeʼ gúninu cani rizíʼdinu lu Biblia. Ne Jesús peʼ bizeeteʼ xiñee risaca ni ora guníʼ: «Pa nanna tu ca nga ne guni tu cani la? dichoso de laatu» (Juan 13:17; Sant. 1:25). Ne ndiʼ peʼ nga ni caquiiñeʼ gúninu para ganda gácanu ti binni espiritual ne cadi gusaana de chuʼnu nayecheʼ. w18.09 18 párr. 4-6

Binibiáʼ chaahuiʼ Epafras ca hermanu riʼ ne nabé guyuu xizaa pur laacabe. Neca deguyoonebe Pablo la? guyuu ora dede qué ñásibe purtiʼ qué nusaana de niníʼ íquebe ni caquiiñeʼ ca hermanu que en sentidu espiritual (Filem. 23). Ni bíʼnibe nga gucanebe laacaʼ ne zaqué bisihuínnibe rizaaláʼdxibe laacaʼ. Ca oración ni rúninu pur ca hermanu stinu guizáʼ racané ni laacabe, ne jmaruʼ si ora ruzéʼtenu lácabe lu oración ni rúninu (2 Cor. 1:11; Sant. 5:16). Guníʼ ique tuu nga ca hermanu ni zanda guzeeteluʼ lu oración stiluʼ ne tu lácabe. Tiempu riʼ, stale hermanu runi cásica biʼniʼ Epafras, purtiʼ runi orarcaʼ pur ca hermanu de congregación sticaʼ, pur familia sticaʼ ni napa xiixa responsabilidad nadipaʼ o pur cani cudxiilú xiixa guendanagana. Ne cadi guiaandaʼ laanu guzéʼtenu lá ca hermanu ni gutiʼ tuuxa binnilidxi, cani cayacaná pur xiixa desastre o guerra, ne cani cadiʼdiʼ lu xiixa guendanagana purtiʼ huaxiéʼ bueltu nápacaʼ. Rihuinni dxíchica nuu stale hermanu ni caquiiñeʼ guni orarnu pur laacaʼ. w18.09 5, 6 párr. 12, 13

Cadi caníʼ diʼ Pablo gudíʼsinu cosa material, sínuque laaca caniʼbe cuʼnu gana ne gacanenu cani caquiiñeʼ gacanécabe laacaʼ (Hech. 20:31-35). Pur ni biʼniʼ ne guníʼ apóstol Pablo bisiidibe laanu nabé risaca nga gudiʼnu de stipa stinu, tiempu stinu, gacanenu ne gannaxhiinu xcaadxi. Huayuuyaʼ ca sociólogo ca ora rudii tuuxa de ni napa la? racané ni laa guni sentir nayecheʼ. Lu ti información ná, stale binni riníʼ runi sentir nayecheʼ despué de gacané o guni xiixa pur xcaadxi. Ca investigador ca nacaʼ ora racanenu sti binni racané ni laanu guni sentirnu napa xquendanabáninu sentidu. Ne ca especialista ni nanna de tema riʼ rábicaʼ binni chigacanecaʼ xcaadxi purtiʼ zacané ni laacaʼ chuʼcaʼ nazaaca ne chuʼcaʼ nayecheʼ. Qué ridxagayaanu ni, purtiʼ nánnanu Biblia ca zeeda ni de Jiobá, Dios ni bizáʼ laanu ne ni nadxii laanu (2 Tim. 3:16, 17). w18.08 22 párr. 17, 18

Sicaríʼ guníʼ Isaías lu ti profecía ni caníʼ de Jesús: «Qué zuni juzgarbe binni pur cani gúʼyasibe, qué zugaanibe donda íquecaʼ pur cani gunadiágasibe. Jneza zuni juzgarbe ca pobre» (Is. 11:3, 4). Nabé riguu ca diidxaʼ riʼ gana laanu. ¿Xiñee yaʼ? Purtiʼ ndaaniʼ Guidxilayú riʼ nabé napa binni prejuiciu o runi juzgar xcaadxi ante gunibiáʼ laacabe. Guiranu racaláʼdxinu guedandá dxi guni juzgar Jesús laanu, purtiʼ laa naca ti Juez perfectu ne qué zuni juzgar pur ni guʼyaʼ si. Guiráʼ dxi riníʼ íquenu xiixa cosa de xcaadxi binni. Peru cumu imperfectu laanu la? qué runi juzgarnu binni jneza casi runi Jesús ni. Stale biaje runi juzgarnu binni pur ni ridúʼyasinu. Nga runi, dxi guyuu Jesús lu Guidxilayú riʼ biʼniʼ mandar laanu cadi guni juzgarnu «pur ni rihuinni si», sínuque guni juzgarnu «jneza». Ca diidxaʼ riʼ rusihuinni cani racaláʼdxibe chinándanu ejemplu stibe ne cadi guni juzgarnu binni pur ni ridúʼyasinu. w18.08 8 párr. 1, 2

Qué runadiáganu stidxi Dios de guibáʼ. Peru riquiiñebe Stiidxabe, Biblia, para gábibe laanu xi gúninu. Ne racané espíritu santu mayordomo ni runi ni jneza para gudii laanu alimentu espiritual, casi ca publicación ni raca imprimir, ni nuu lu sitiu de Internet, ca videu ne ca audio (Luc. 12:42). ¿Cadi dxandíʼ stale alimentu espiritual ricaanu la? Ne zacané ca diidxaʼ stiʼ Dios ni zeeda lu Biblia laanu para gápanu confianza zápabe laanu ne zuni chaahuibe intiica cosa malu guni Binidxabaʼ ne ca xpinni laanu. Quixhe íquenu gucaʼdiáganu stidxi Jiobá né stale atención. Pa gúninu ni la? zanda gudxíʼlunu intiica guendanagana guidxaagalunu yanna ne despué. Biblia rusietenalaʼdxiʼ laanu: «Caquiiñeʼ guni huantartu, ti ora maʼ bíʼnitu ni ná Dios la? guicaatu ni maʼ biʼniʼ prometerbe laatu» (Heb. 10:36, TNM). w19.03 13 párr. 17, 18

Cumu Moisés nga guca xaíque stiʼ guidxi Israel stale iza la? zándaca guníʼ ique Josué ximodo guʼyaʼ ca binni que laa casi xaíque (Deut. 34:8, 10-12). Ti libru ruzeeteʼ xiixa de ni zeeda lu Josué 1:1, 2 ná ni: «Cásica dxiqué ne zaqueca yanna, ora ridxaa ti gobernante la? riguu bieque ni ti guidxi». Gupa Josué razón para guidxibi, peru neca zaqué gúpabe stale confianza Jiobá ne bíʼnibe ni biʼniʼ mandar laabe (Jos. 1:9-11). Ne jneza ni bíʼnibe riʼ purtiʼ Biblia ruzeeteʼ biquiiñeʼ Jiobá ti ángel para biluíʼ laabe ne guidxi Israel pa neza chécabe. Ne zanda guininu ángel riʼ nga «Diidxa» ni guyuu ra nuu Dios, primé Xiiñiʼ Dios (Éx. 23:20-23; Juan 1:1). Cumu gucané Jiobá guidxi Israel la? qué ñácapeʼ nagana para laacabe ninándacabe ni gudxi Josué laacabe, xaíque cubi stícabe. w18.10 22, 23 párr. 1-4

Runibiáʼ Jiobá tuu nga ca ni runi ni ná né stale gana ne pur nga rucaabe lacaʼ lu «libru» stibe para guietenaláʼdxibe laacaʼ. Para guicá lanu lu «libru» stiʼ Jiobá la? caquiiñeʼ gúninu caadxi cosa. Malaquías guníʼ naquiiñeʼ guidxíbinu Jiobá ne guiníʼ íquenu lu labe. Pa guni adorarnu sti cosa o sti binni ne cadi Jiobá la? zuxhiabe lanu de lu libru simbólicu ni nápabe (Éx. 32:33; Sal. 69:28). Gudiʼnu laanu Jiobá qué riníʼ ni guni prometérsinu laabe zúninu ni nabe ne chuʼnísanu. Ti biaje si nga rudiʼnu laanu Jiobá ne ti biaje si nga riuʼnísanu lu xquendanabáninu. Peru para gusihuínninu nuunu pur Jiobá ne nácanu xpínnibe la? naquiiñeʼ gusihuínninu ruzúʼbanu stiidxabe lu ca cosa ni rúninu guiráʼ dxi (1 Ped. 4:1, 2). w18.07 23, 24 párr. 7-9

Peru cadi ti dxi sti dxi si zanda guiniisinu lu Stiidxaʼ Dios, naquiiñeʼ gúninu stipa guiráʼ dxi. Para ganda gácanu ti xpinni Cristu ni maʼ riene casi ti binni ni maʼ huaniisi la? naquiiñeʼ guizíʼdinu jma de Stiidxaʼ Dios ne guyúbinu guiénenu ni. Nga runi nabé riguucabe gana laanu guidúʼndanu Biblia guiráʼ dxi (Sal. 1:1-3). Pa guidúʼndanu Stiidxaʼ Dios guiráʼ dxi zacané ni laanu guiénenu ca ley ne ca principiu stiʼ Dios. Ti ley ni jma risaca ni naquiiñeʼ chinanda ca xpinni Cristu nga gannaxhiicaʼ. Nga runi gudxi Jesús ca xpinni: «Pa ganaxhii saa tu zacá la? zanna binni xpinne laatu» (Juan 13:35). Santiago, medio hermanu stiʼ Jesús, guníʼ laani nga ti ley ni jma risaca (Sant. 2:8). Ne Pablo guníʼ: «Ra ganaxhii tu binni ma cayuni tu irá xixé ni na ley» (Rom. 13:10). Nabé ruzeeteʼ Biblia pabiáʼ risaca nga gannaxhiinu «purti de Dios nga reeda enda ranaxhii» (1 Juan 4:8). w18.06 19 párr. 14, 15

Neca Jiobá nga bicaalú ca israelita que la? peru bidxiichi Moisés pur ni bíʼnicabe que. Cumu qué ñanda nucueezabe laca laabe la? guniʼbe cosa sin niníʼ íquebe. Bidii Moisés lugar guchiichi ni biʼniʼ xcaadxi laa ne pur ngue maʼ qué ñuni ni gudxi Jiobá laa. Primé biaje gudicheruaa ca israelita que pur gastiʼ nisa la? qué nidxiichi Moisés ne biʼniʼ ni jneza (Éx. 7:6). Maʼ stale iza de cayuni huantarbe guidxi ni qué ruzuubaʼ diidxaʼ que, ngue runi zándaca maʼ bidxágabe ne maʼ bireebe gana. Zándaca jma gucuá íquebe ni cayuni sentirbe lugar de nicá íquebe nusisácabe Jiobá. Pa guca Moisés ti profeta stiʼ Dios ne bidii lugar guni distraer ni biʼniʼ xcaadxi laa ne bichee la? laanu laaca zanda guizaacanu ni bizaacabe ca. Cadi guiaandaʼ laanu laaca mayaca chuʼnu ndaaniʼ guidxilayú cubi ni biʼniʼ prometer Dios laanu (2 Ped. 3:13). Nin tobi de laanu qué racaláʼdxinu gunítinu privilegiu sicarú riʼ. Peru pa racaláʼdxinu chuʼnu ndaaniʼ guidxilayú cubi ca la? naquiiñeʼ guidúʼyadxinu Jiobá guiráʼ ora ne gúninu stipa pur gúninu ni nabe (1 Juan 2:17). w18.07 15 párr. 14-16

Qué zanda gucaa Binidxabaʼ laanu gúninu xiixa ni qué racaláʼdxinu (Sant. 1:14). Stale binni qué rudii cuenta pa cayuni ni nabe. Peru ora riziidicabe ni dxandíʼ rusiidiʼ Biblia la? maʼ ricaacabe decisión tu gúnicabe ni ná (Hech. 3:17; 17:30). Pa gucuaanu decisión gúninu ni ná Dios la? gastiʼ qué zanda guni Binidxabaʼ para gucaa laanu guchéʼnenu Jiobá (Job 2:3; 27:5). Nuu xcaadxi cosa ni qué zanda guni Binidxabaʼ ne ca demonio stiʼ. Guzéʼtenu ti ejemplu, qué ruzeeteʼ diʼ Biblia pa zanda ganna Binidxabaʼ ne ca demonio stiʼ xi riníʼ íquenu ne xi nuu ndaaniʼ ladxidoʼno. Jiobá ne Jesús si zanda guni ni (1 Sam. 16:7; Mar. 2:8). Pa gúninu stipa pur guininu cosa ni riuulaʼdxiʼ Jiobá ne gúninu ni nabe la? zanda gápanu confianza qué zudii Jiobá lugar guniná Binidxabaʼ laanu dede gucaa laanu gunítinu guendanabani ni qué zaluxe (Sal. 34:7). Naquiiñeʼ gunibiaʼnu enemigu stinu, peru cadi naquiiñeʼ guidxibi xhaatanu laabe. Neca nácanu imperfectu, zanda guni ganarnu Binidxabaʼ purtiʼ zacané Jiobá laanu. Pa gudxíʼlunu Binidxabaʼ la? zaxélebe de laanu (Sant. 4:7; 1 Ped. 5:9). w18.05 26 párr. 15-17

Bixuiʼlú cheluʼ de viaje lu ti autobús para cheluʼ ti lugar ra chigaca ti cosa nabé risaca. Ora yendaluʼ ra terminal que, nuu stale autobús raqué. Peru cumu nánnaluʼ paraa racaláʼdxiluʼ cheluʼ la? qué zaguíʼbaluʼ lu ti autobús ni ziné lii gadxé lugar. Zeeda gaca ca joven casi ca binni ni cabeza quibaʼ lu ti autobús purtiʼ guendanabani stinu nácani casi ora ziyuni viajarnu. Cumu napa xidé gúʼyacabe xi gúnicabe lu xquendanabánicabe la? zándaca nuu biaje qué zadxélacabe xi gúnicabe. Peru pa maʼ nánnacabe xi racaláʼdxicabe gúnicabe lu xquendanabánicabe la? jma nagueenda zacaacabe decisión jneza. ¿Naguixhe íqueluʼ gusiécheluʼ Jiobá la? Ndiʼ riníʼ guiníʼ íqueluʼ ximodo ruuyabe guiráʼ ni gúniluʼ lu xquendanabániluʼ, casi ora chiguicaluʼ decisión xi guni estudiarluʼ, xi dxiiñaʼ gúniluʼ ne pa zachaganaluʼ. Ne laaca caquiiñeʼ gúniluʼ stipa pur ugaandaluʼ xiixa meta espiritual. Ca joven ni ricá ique guni xhiiñaʼ Jiobá, zanda chuʼcaʼ seguru zaguube ndaayaʼ laacaʼ ne zabeenducaʼ ni galán lu xquendanabánicaʼ. w18.04 25 párr. 1-3

Biʼniʼ Jefté ni bidii stiidxaʼ, ne biseendaʼ xiiñidxaapaʼ Siló para chiguni xhiiñaʼ Jiobá ndaaniʼ tabernáculo biaʼ dxi guibani (Juec. 11:30-35). Nagana gúcani para Jefté, peru jma nagana gúcani para xiiñidxaapabe. Neca zaqué, guyuube dispuesta gúnibe ni bidii stiidxaʼ bixhózebe (Juec. 11:36, 37). Neca nánnabe maʼ qué zachaganabe, qué zápabe xiiñibe ne qué zadale familia stiʼ bixhózebe purtiʼ maʼ qué gapa xiiñiʼ, guizáʼ caquiiñebe tu quixhedxí ladxidoʼbe ne tu cuʼ gana laabe. Nga runi guiráʼ iza, tapa dxi lu ti iza riganna ca baʼdudxaapaʼ de Israel xiiñidxaapaʼ Jefté galaadita que, para uguucaʼ gana laabe» ne beeda gaca ni ti costumbre ndaaniʼ guidxi Israel (Juec. 11:39, 40). Ca dxi stinu riʼ, laaca caquiiñeʼ guni felicitarnu ne uguʼnu gana cani caʼruʼ guichaganáʼ, cani maʼ gudixhe ique guni jma lu «xhiiña Señor» (1 Cor. 7:32-35). w18.04 17 párr. 10, 11

Stale ángel malu gúcacaʼ tobi si né Binidxabaʼ para gucaalucaʼ Dios. Ante guiaba nisaguié naroʼbaʼ que, bicaa Binidxabaʼ caadxi de ca ángel riʼ gápacaʼ relación sexual né ca gunaa ni nuu lu Guidxilayú. Biblia ruzeeteʼ ni bizaaca riʼ de manera simbólicu, gudiñe xcola dragón que caadxi estrella de guibáʼ ne bisábabe laacaʼ ndaaniʼ Guidxilayú (Gén. 6:1-4; Apoc. 12:3, 4). Dxi bisaana ca ángel riʼ familia stiʼ Jiobá, bidiicaʼ lugar guni mandar Binidxabaʼ laacaʼ. Peru cadi guiníʼ íquenu modo tisi runi Binidxabaʼ ne ca ángel malu stiʼ dxiiñaʼ. Runi copiarbe modo runi Reinu stiʼ Dios dxiiñaʼ ne maʼ bíʼnibe laabe rey. Laaca maʼ bíʼnibe ca demonio ca xaíque ne bidiibe laacaʼ autoridad para gácacaʼ gobernante stiʼ guidxilayú cahui riʼ (Efes. 6:12). Riquiiñeʼ Binidxabaʼ ca demonio stiʼ para guni controlar ca gobiernu ni nuu lu Guidxilayú riʼ. w18.05 23 párr. 5, 6

Cumu naca Jiobá ti buen Padre ne nadxii laanu la? nuu biaje riguu jnézabe laanu. Ne David qué ñuu ora nidxiichi ora guluu jneza Jiobá laa. Guníʼ íquebe ni ná ca conseju stiʼ Dios ne bíʼnibe stipa pur guiziidibe guiníʼ íquebe casi riníʼ ique Dios. Bidiibe lugar guchaa ca conseju riʼ laabe, o guchaa ni laabe ne gácabe ti binni jma nachaʼhuiʼ. Pa gúniluʼ ni biʼniʼ David la? jma zannaxhiiluʼ Jiobá ne qué zusaana de guzuubaluʼ stiidxabe. Ne laaca zácaluʼ ti cristianu maduru. Ti hermana láʼ Christin guníʼ: «Ora runeʼ estudiar ne runeʼ meditar ni ruundaʼ la? runeʼ sentir naapeʼ nga caniʼné Jiobá». Pa nácaluʼ ti binni espiritual la? zacané Jiobá lii gácaluʼ ti binni ni nanna ne ni riene para gúʼyaluʼ ca cosa ni rizaaca lu guidxilayú riʼ ne futuro stiluʼ modo ruuyabe ni. Ne zúnibe ni purtiʼ racaláʼdxibe gánnaluʼ xii nga ni jma risaca para lii, para guicaaluʼ decisión jneza ne para cadi guidxíbiluʼ futuro stiluʼ. Profeta Isaías guníʼ zapa Jiobá ca ni gapa confianza laa si ne qué zusaana de gudiibe paz laacaʼ (Is. 26:3). w18.12 26 párr. 9, 10