Marzo

Qué riuuláʼdxinu gaca nanalaʼdxiʼ binni laanu ne qué ruyúbinu guninácabe laanu. Yanna, ¿ximodo zanda chuʼnu nayecheʼ neca gaca nanalaʼdxiʼ binni laanu yaʼ? Guidúʼyanu chonna cosa xi pur zanda chuʼnu nayecheʼ. Primé, ora runi huantarnu riuulaʼdxiʼ Jehová ni rúninu (1 Ped. 4:13, 14). Guiropa, raca fe stinu jma naguidxi (1 Ped. 1:7). Ne guionna, zacaanu ti ndaayaʼ nabé galán, ti guendanabani ni qué zaluxe (Rom. 2:6, 7). Despué de biasa Jesús de lade gueʼtuʼ guyuu ca apóstol que nayecheʼ casi maca gudxi Jesús laacaʼ. Neca guluu binni golpe laacabe ne biʼniʼ mandarcaʼ gusaana de guni predicárcabe, qué nusaana de ñuucaʼ nayecheʼ «purtiʼ cudii Dios lugar laacaʼ guni sufrircaʼ pur lá Jesús» (Hech. 5:40-42). Cumu nadxiicabe Jesús la? qué nidxíbicabe ca enemigu stícabe. Ne bisihuínnicabe guendarannaxhii ca purtiʼ qué nusaana de ñuni predicárcabe. Tiempu riʼ stale hermanu cayuni ni ná Jehová neca cadíʼdicaʼ ra nagana. Ne nánnacaʼ qué zusiaandaʼ Jehová guiráʼ ni rúnicaʼ ne dede yanna cayúnirucaʼ ni ná Jehová purtiʼ rusihuínnicaʼ nadxiicaʼ nombre stibe. w21.03 24, 25 párr. 18, 19

Cadi maca ralené ca xpinni Cristu ungidu esperanza checaʼ guibáʼ, sínuque Jehová nga riguuni ndaaniʼ ladxidóʼcabe. Riníʼ íquecabe esperanza stícabe, ruzeetecabe ni lu ca oración stícabe ne racaláʼdxicabe guicaacabe ndaayaʼ de chécabe guibáʼ. Neca qué ganna ca ungidu ximodo zaca cuerpu de espíritu sticaʼ, racaláʼdxicaʼ chuʼcaʼ ra nuu Jehová, Jesús, ca ángel ne xcaadxi ungidu ne guicaacaʼ puestu sticaʼ lu Reinu ni nuu guibáʼ (Filip. 3:20, 21; 1 Juan 3:2). Napa ca xcaadxi dendxuʼ esperanza de guibánicaʼ para siempre ndaaniʼ Guidxilayú. Guizáʼ maʼ racaláʼdxicabe guedandá dxi gacanecaʼ gaca Guidxilayú riʼ ti paraísu ne gucuicaʼ lídxicaʼ, gudxiibacaʼ lu ca layú sticaʼ ne gúnicaʼ jardín sticaʼ, ne guibánicaʼ né familia sticaʼ sin gaca huaracaʼ (Is. 65:21-23). Maʼ racaláʼdxicabe guni viajárcabe lu guidubi Guidxilayú, gúʼyacabe dani, bosque ne nisadóʼ, ne gunibiáʼcabe guiráʼ ni maʼ bizáʼ Jehová. Peru ni jma rusiecheʼ laacabe nga cada dxi tidiʼ jma zaca xhamígucabe Jehová. w21.01 18, 19 párr. 17, 18

Despué de binduuxeʼ ca babilonio guidxi Jerusalén, ca binni ni ridiʼdiʼ neza raqué riniʼcaʼ: «Guirutiʼ nabeza racá, nin hombre nin maniʼ, ne maʼ lu náʼ ca caldeu nuuni» (Jer. 32:43). Biaʼ chupa gayuaa iza despué de guníʼ Joel profecía stiʼ la? biquiiñeʼ Jehová Jeremías para guiníʼ sti cosa de modo gaca ataque riʼ: guniʼbe zuyubi chaahuiʼ ca soldadu que ca israelita malu guiráʼ ladu ne zanaazecabe guiracaʼ. Biblia ná: «Zuseendacaaʼ stale pescador —ná Jehová—, ne zanaazecaʼ laacabe. Despué zuseendacaaʼ stale hombre ni rié guuzeʼ ndaaniʼ guiʼxhiʼ, ne zanaazecaʼ laacabe lu ca dani ne lu ca danihuiiniʼ ne lade ca huecu nuu lade ca dani». Ne laaca guniʼruʼ: «Zudieeʼ laatu ni runi merecertu pur bicheetu ne pur ca pecadu stitu». Neca cheʼ ca israelita ni qué ñaca arrepentir ndaaniʼ nisadóʼ bani ne ndaaniʼ guiʼxhiʼ para cadi igaacaʼ zadxela ca babilonio que laacabe (Jer. 16:16, 18). w20.04 5 párr. 12, 13

Ti biaje, dxi guyuu xquendanabani Lot ra naxoo, bindaa para biʼniʼ ni gunabaʼ Jehová laa. Ñándaca niníʼ íquenu qué nulabi Lot Jehová o naca ti binni ni qué ruzuubaʼ diidxaʼ. Peru qué niree Jehová gana. Biá «Jehová laabe», ngue runi gunaaze ca ángel que náʼ Lot ne familia stiʼ ne guleecaʼ laacabe de ndaaniʼ guidxi que (Gén. 19:15, 16). ¿Xiñee biá Jehová Lot yaʼ? Guzéʼtenu caadxi razón. Zándaca qué ninabe nusaanabe lídxibe purtiʼ bidxíbibe ca binni nabeza fuera de guidxi Sodoma. Peru cadi ngasi bidxíbibe. Zándaca nánnabe biaba chupa rey ndaaniʼ ca bizé de alquitrán ni nuu ndaaniʼ ti valle gaxha de raqué (Gén. 14:8-12). Laaca zándaca guyuube xizaa pur xheelabe ne ca xiiñidxaapabe, ne cumu ricu laabe la? zándaca nápabe ti yoo galán (Gén. 13:5, 6). Peru cadi pur nga guininu nápabe razón para cadi guzuubabe stiidxaʼ Jehová ora gudxi laabe guireebe. Peru qué nidxiichiné Jehová Lot, sínuque biiyaʼ laabe casi «ti hombre nachaʼhuiʼ» (2 Ped. 2:7, 8). w20.04 18 párr. 13, 14

Joven, zándaca gaca nagana para tuuxa ni runibiáʼ lii dede dxi nahuiiniluʼ guʼyaʼ lii casi ti jovenhuiiniʼ responsable. Peru gunna dxichi, nanna Jehová xi nuu ndaaniʼ ladxidoʼloʼ, laaca runibiaʼbe lii ne nánnabe xi zanda gúniluʼ (1 Sam. 16:7). Biʼniʼ stipa gaca xhamíguluʼ Jehová. Nga peʼ nga ni biʼniʼ David, guleebe tiempu para gúʼyabe guiráʼ ni maʼ bizáʼ Jehová ne guiníʼ íquebe xi rusiidini laabe de Jehová (Sal. 8:3, 4; 139:14; Rom. 1:20). Naquiiñeʼ guinábaluʼ Jehová gudii stipa lii. Guzéʼtenu ti ejemplu, pa guni burla ca compañeru de scuela lii purtiʼ Testigu lii, gunabaʼ Jehová gacané lii guni huantarluʼ. Laaca zanda chinándaluʼ ca conseju ni zeeda lu Stiidxaʼ Dios, lu ca publicación ne lu ca videu. Cada biaje guinábaluʼ Jehová gacané lii tídiluʼ xiixa guendanagana zaca confianza ni nápaluʼ laabe jma naguidxi. Ne ora guʼyaʼ xcaadxi ruyúbiluʼ Jehová para gacané lii la? zaca xhamígucaʼ lii. w21.03 4 párr. 7

Ca binni ni nabé xhamígucaʼ riuuláʼdxicaʼ guiniʼcaʼ de ni riníʼ íquecaʼ ne ni runi sentircaʼ. Ngaca nga rizaaca ora raca xhamígunu Jehová. Riquiiñebe Stiidxabe para guiníʼnebe laanu ne luni rábibe laanu xi riníʼ íquebe ne xi runi sentirbe. Laanu zanda iquiiñenu oración para gábinu laabe ni riníʼ íquenu ne ni runi sentirnu. Cumu nadxiibe laanu la? rucaadiágabe ne ricábibe ca oración stinu. Nuu biaje nagueenda ricábibe laanu. Peru nuu tiru la? caquiiñeʼ ruʼ guni orarnu. Modo tiica si, nanna dxíchinu zacábibe laanu ora peʼ caquiiñenu ni ne de ti modo jma galán. Zándaca qué zacábibe laanu modo peʼ cabézanu gúnibe ni. Guzéʼtenu ti ejemplu, nuu biaje lugar de cueebe ca guendanagana nápanu, rudiibe laanu guendabiaaniʼ ne stipa ni caquiiñenu para guni huantarnu (1 Cor. 10:13). ¿Ximodo zanda gusihuínninu rudiʼnu xquixe peʼ Dios pur randa runi orarnu laa? Ora rinándanu conseju stibe ra ná: «Cadi gusaana de guni orartu» (1 Tes. 5:17). w20.05 27, 28 párr. 7, 8

Ca binni ni ziguxooñeʼ lu ti carrera ruuyadxicaʼ ra ziguxooñecaʼ para cadi guirenda ñeecaʼ. Peru neca zacá, zándaca guiaba ñeecabe ndaaniʼ ti barranca o guidxelasaa sti corredor laacabe. Pa guiábacabe la? riásacabe ne runi seguírcabe lu carrera ca. Qué riuucabe xizaa xiñee biábacabe, sínuque riguixhe íquecabe chindácabe lu meta ne guicaacabe premiu ni guni ganárcabe. Laanu ca xpinni Cristu, zándaca guirenda ñeenu stale biaje lu carrera ra ziguxóʼñenu pur ni guininu o pur ni gúninu, o purtiʼ biʼniʼ ti hermanu laanu xiixa ni qué ñuuláʼdxinu. Peru cadi naquiiñeʼ guidxagayaanu, purtiʼ binni ruchee guiranu ne cuxóʼñenu lu ti neza nabéʼ ni ziné laanu guicaanu ti guendanabani ni qué zaluxe. Nga runi, normal nga guidxelasaanu ca ni ziguxóʼñenenu lu carrera riʼ. Pablo guníʼ zándaca ziuu razón para gaca quejarnu pur ni guni tuuxa laanu (Col. 3:13). Peru cadi guidúʼyadxinu xiñee birenda ñeenu, sínuque quixhe íquenu premiu ni chiguicaanu. Cadi maʼ néxhenu layú maʼ cadxiichinu ne cayaca quejarnu, purtiʼ pa gúninu ni, qué zindanu lu meta ca ne qué zacaanu premiu ca. Ne zándaca guchíʼñanu ca ni ziguyooñeʼ para guicaa guendanabani ni qué zaluxe. w20.04 26 párr. 1; 28 párr. 8, 9

Guníʼ profeta Daniel de ti estatua naroʼbaʼ de gadxé gadxé material. Cada parte de estatua riʼ runi representar ti gobiernu ni bicaalú xquidxi Dios. De guiibaʼ ne de beñe ñee estatua riʼ, ne laani nga gobiernu stiʼ Gran Bretaña ne Estados Unidos. Ne profecía riʼ ná nuuruʼ últimu potencia mundial riʼ ora gunitilú Reinu stiʼ Dios ca gobiernu nuu lu Guidxilayú. Laaca guníʼ apóstol Juan de caadxi potencia mundial ni maʼ bicaalú xquidxi Jehová. Ne runi representar profecía riʼ laacani casi ti bestia salvaje ni napa gadxe ique. Últimu ique bestia riʼ nga Gran Bretaña ne Estados Unidos. Ne nabé risaca gánnanu ndiʼ, purtiʼ maʼ gástiruʼ sti ique despué de laani. Cayuni mandar ruʼ últimu ique bestia salvaje riʼ ora gunitilú Cristu ne ca ángel stiʼ laame ne ca xpínnime (Apoc. 13:1, 2; 17:13, 14). w20.05 14 párr. 11, 12

Neca ruluíʼ sencillu ca diidxaʼ riʼ peru nabé risaca ca ni, ra nuu Dios nga ridá guendanabani ne laaca ra nuube nga ridá guendarannaxhii. Nadxii Jehová laanu, ne pur laani ribáninu galán, nayecheʼ ne nuudxí ladxidoʼno. Laanu, ca xpinni Cristu, ti mandatu maʼ gucuaanu nga gannaxhiinu (Mat. 22:37-40). Ra jma gunibiaʼnu Jehová, qué zaca nagana para laanu gúninu ni ná primé mandamientu stiʼ, cumu perfectu laabe la? runi tratarbe laanu galán ne rusihuínnibe rizaaláʼdxibe laanu. Peru zándaca gaca nagana para laanu gúninu ni ná guiropa mandamientu stibe. ¿Xiñee yaʼ? Purtiʼ ca hermanu —ni naca prójimo stinu— imperfectu laacaʼ ne nuu biaje riniʼcaʼ o rúnicaʼ xiixa ni runiná laanu. Nga runi biquiiñeʼ Jehová caadxi hombre ni bicaa Biblia para guiniʼcaʼ ximodo ne xiñee naquiiñeʼ gannaxhiisaanu. Ne tobi de ca hombre ca nga apóstol Juan (1 Juan 3:11, 12). w21.01 8 párr. 1, 2

Pa maʼ stale iza zinenu o huaxiéʼ tiempu de cayúninu ni ná Jehová, caquiiñeʼ guinabadiidxanu: «¿Ñee cayuneʼ stipa para gucaanaʼyaʼ ca ni culaa Binidxabaʼ luguiaʼyaʼ para guni dividir ladxiduáʼ la?». Guzéʼtenu ti ejemplu, ¿xi rúninu ora rihuinni ti imagen o ti película lu televisión o lu Internet ni ñanda nucaa laanu ñápanu deseu inmoral? Fácil nga guiníʼ íquenu cumu cadi pornografía ni la? zanda guidúʼyanu ni. Peru ¿ñee zanda iquiiñeʼ Binidxabaʼ ni para guni dividir ladxidoʼno la? Zanda guchaaganu ni né ti cuña ni riquiiñeʼ para guichézacabe ti trozo yaga. Ni rizaaca primeru nga ruzulú riaaziʼ punta ni lu yaga ca. Ne laga jma ziyaazini la? zireza yaga ca. Ca imagen ni rucaa tuuxa gapa deseu malu nga zeeda gaca casi punta cuña riʼ. Zándaca guzulú guiníʼ íquenu cadi malu cani, peru zándaca nagueendaca guni dividir ni ladxidoʼno ne gucaani laanu guni cometernu ti pecadu ni guxheleʼ laanu de Jehová. Nga runi, cadi gudiʼnu lugar chuʼ xiixa cosa malu ndaaniʼ ladxidoʼno. Gúninu stipa chuʼni tobi si ne guidxibi ni lá Jehová. w20.06 11, 12 párr. 14, 15

Ora maʼ bibiguetaʼ ca hermanu nuu inactivu la? cadi naquiiñeʼ gusaana de gacanenu laaca. Zándaca naparúcabe yuubaʼ ndaaniʼ ladxidóʼcabe, cásica biʼniʼ sentir hijo pródigo ni bizeeteʼ Jesús lu parábola que (Luc. 15:17-24). Ne cumu zeedacabe de guidxilayú stiʼ Binidxabaʼ la? zándaca nuucabe débil purtiʼ bixélecabe de Jehová. Nga runi caquiiñeʼ gacanenu laacabe gaca fe stícabe naguidxi sti biaje. Lu parábola ni guníʼ Jesús de dendxuʼ ni biniti que, bizeetebe ruaʼ pastor que dendxuʼ ni biniti ne riné laame ra nuu ca xcaadxi dendxuʼ. Maʼ gulee pastor riʼ tiempu ne maʼ biʼniʼ stipa para guyubi laame. Peru nánnabe caquiiñeʼ gacanebe laame para guibiguétame purtiʼ qué gápame stipa para gúnime ni stúbime (Luc. 15:4, 5). Zándaca caquiiñeʼ cueenu tiempu ne gúninu stipa para gacanenu ca hermanu inactivu gácacaʼ nadipaʼ ti ganda gudxiilucaʼ xiixa guendanagana ni cucueeza laacaʼ chuʼcaʼ gaxha de Jehová. Nga runi, pa guinabaʼ ca ancianu laanu gacanenu ti hermanu nuu inactivu la? gúninu ni de guidubi ladxidoʼno. w20.06 28 párr. 14, 15

Guiranu caquiiñeʼ gusihuínninu guendarannaxhii ni napa ca ni dxandíʼ xpinni Cristu. Peru laaca caquiiñeʼ guiziidiʼ chaahuinu xi racalaʼdxiʼ Dios ne guiene chaahuinu ni (Filip. 1:9). Pa qué gúninu ni la? zanda «chinándanu ca cosa ni cadi jneza rusiidiʼ ca hombre ni riguite binni» cásica runi ca apóstata (Efes. 4:14). Lu primé siglu, dxi bisaana stale discípulo Jesús, guníʼ apóstol Pedro Jesús si napa diidxaʼ ni rudii «guendanabani ni qué zaluxe» (Juan 6:67, 68). Neca óraque qué ñene Pedro ni riníʼ ca diidxaʼ que la? qué nusaanabe Jesús purtiʼ biénebe ni dxandíʼ de Cristu. Pa chuʼnu seguru dxandíʼ ni rusiidiʼ Biblia la? zaca fe stinu naguidxi ora tídinu prueba ne zacanenu xcaadxi gaca fe sticaʼ naguidxi (2 Juan 1, 2). w20.07 8 párr. 2; 13 párr. 18

Zanda gacanenu ca hermanu stinu sacaʼ lu ni dxandíʼ pa guianu laacaʼ (1 Juan 3:10, 11, 16, 17). Caquiiñeʼ gannaxhiisaanu ora nuunu galán ne ora cadídinu ra nagana. Guzéʼtenu ti ejemplu, ¿ñee runibiaʼnu tuuxa hermanu ni maʼ guti ti familia stiʼ ne caquiiñeʼ tu quixhedxí ladxidóʼ o gacané laa la? ¿Ñee gúnnanu guca ti desastre natural ne caquiiñeʼ ca hermanu stinu gacanenu laacaʼ cuí Yoo stiʼ Reinu sticaʼ o lídxicaʼ la? Zanda gábinu ca hermanu riʼ diidxaʼ ni uguu gana laacaʼ, peru zusihuínninu nadxiinu ne rianu laacabe pa gacanenu laacabe. Ora nadxiisaanu la? rinándanu ejemplu stiʼ Bixhózenu ni nuu guibáʼ ni nadxii laanu (1 Juan 4:7, 8). Ti modo zanda gusihuínninu guendarannaxhii nga ora guni perdonarnu xcaadxi. Guzéʼtenu ti ejemplu, pa guniná tuuxa laanu la? guendarannaxhii ca zucaa laanu guni perdonarnu laabe ne gusiáʼndanu ni bíʼnibe laanu (Col. 3:13). w20.07 24 párr. 14, 15

¿Ñee zudiʼnu estudiu cada binni ni guiasa de lade gueʼtuʼ cásica rúninu ni tiempu riʼ la? ¿Ñee zaca asignárcabe ti congregación para guiziidicabe ti zacá gusiidicabe ca ni guiasa despué de laacabe la? Caquiiñeʼ cuézanu para gánnanu ni. Ni nánnanu nga «guidxilayú riʼ zadxá tipa ni de guiráʼ ni rusiidiʼ Jehová» ora maʼ ziluxe ti mil iza de cayuni mandar Cristu (Is. 11:9). ¡Nabé stale dxiiñaʼ galán ziuu lu ti mil iza ca! Lu ti mil iza, guiráʼ ca xpinni Jehová zúnicaʼ stipa guchaacaʼ ti chuuláʼdxibe ni rúnicaʼ. Nga runi, caquiiñeʼ gápacabe paciencia ora gacanécabe ca binni ni guiasa de lade gueʼtuʼ para gúnicaʼ stipa cadi gucheecaʼ ne guibánicaʼ modo riuulaʼdxiʼ Jehová (1 Ped. 3:8). Ora guʼyaʼ ca binni ni guiasa de lade gueʼtuʼ humilde ca xpinni Dios ne cayúnicaʼ stipa pur guchaacaʼ ne gúnicaʼ ni ná Dios cásica laacabe la? zucaa ni laacabe guni adorárcabe Dios (Filip. 2:12). w20.08 15, 16 párr. 6, 7

Pa chinándanu conseju ni bidii apóstol Pablo ne guidúʼyanu ca ni rúninu, zándaca zudiʼnu cuenta nápanu habilidad ni qué gapa xcaadxi. Guzéʼtenu ti ejemplu, zándaca nuu ancianu huaxiéʼ galán rudii discursu, peru guizáʼ racané binni gaca discípulo. O zándaca qué gánnabe quixhe chaahuibe xiixa dxiiñaʼ casi runi xcaadxi ancianu ndaaniʼ congregación, peru nabé runibiáʼcabe laabe purtiʼ nácabe ti pastor ni nadxii ca hermanu ne zanda guidxiña tutiica laabe para guinábacaʼ conseju laabe. O zándaca runibiáʼcabe laabe purtiʼ galán modo ridxaagalube ca hermanu ra lídxibe (Heb. 13:2, 16). Ora maʼ nánnanu gunáʼ nga ca habilidad ni nápanu la? zápanu razón para guiéchenu pur ca cosa ni rúninu ndaaniʼ congregación. Ne laaca zacané ni laanu para cadi gápanu envidia ca hermanu stinu ni napa gadxé habilidad que laanu. Intiica dxiiñaʼ nápanu ndaaniʼ congregación, guiranu naquiiñeʼ quixhe íquenu gúninu dxiiñaʼ ni nápanu jma galán ne gusíʼdinu jma jneza. w20.08 24 párr. 16, 18

Bitiidiʼ hermanu Joseph Rutherford discursu ni biree lá «Ti gran muchedumbre» lu ti asamblea ni guca ndaaniʼ guidxi Washington (Estados Unidos) lu iza 1935. Lu discursu ca bisiene hermanu Rutherford tuu nga «stale binni» o «gran muchedumbre» ni riete lu Apocalipsis 7:9. Para tiempu que, guníʼ ique ca hermanu riʼ zié «gran muchedumbre» guibáʼ neca jma huaxiéʼ fiel gúcacaʼ. Lu discursu ca biquiiñeʼ hermanu Rutherford Biblia para gusiene qué zié ca ni nuu lu gran muchedumbre guibáʼ, sínuque laacabe nga xcaadxi dendxuʼ stiʼ Cristu ni zalá lu «gran tribulación» ne zabánicaʼ para siempre ndaaniʼ Guidxilayú (Apoc. 7:14, nota). Jesús guníʼ: «Napaʼ xcaadxi dendxuʼ ni cadi nuu ndaaniʼ currá riʼ; naquiiñeʼ chicaaʼ laacaʼ ne zunadiágacaʼ stidxeʼ. Zácacaʼ ti grupu si ne zápacaʼ ti pastor si» (Juan 10:16). Grupu riʼ nga ca testigu stiʼ Jehová leal ni napa esperanza de guibani para siempre ndaaniʼ Guidxilayú ora maʼ gácani ti paraísu (Mat. 25:31-33, 46). w21.01 14 párr. 1, 2

Cadi naquiiñeʼ guireʼnu gana pa racaláʼdxinu guni huantarnu dede ora gunduuxenu dxiiñaʼ stinu (Mat. 28:19, 20). Cumu binni ruchee laanu la? jma nagueenda nga guireʼnu gana que gúninu jma lu dxiiñaʼ stinu. Nga runi, para cadi guireʼnu gana caquiiñeʼ gucueezanu laca laanu. Pa racaláʼdxinu gúninu xiixa cosa ni raca nagana para laanu gúninu, caquiiñenu tu gacané laanu. Ne riquiiñeʼ Jehová espíritu santu stiʼ para gacané laanu (Gál. 5:22, 23). Qué niree apóstol Pablo gana, peru guniʼbe biʼniʼ «castigarbe» cuerpu stibe para gúnibe ni jneza (1 Cor. 9:25-27). Gúdxibe ca xpinni Cristu cadi guireecaʼ gana ne gúnicaʼ «guiráʼ cosa jneza ne» gaca cani «né orden» (1 Cor. 14:40). Nga runi caquiiñeʼ gúninu dxiiñaʼ nadipaʼ para cadi gusaana de guni predicarnu (Hech. 2:46). w20.09 6, 7 párr. 15-17

Tiempu riʼ, stale lugar randa runi predicarnu purtiʼ libre laanu. Pa nabézanu ndaaniʼ ti guidxi ra qué rucueezacabe laanu para guni adorarnu Dios, guiníʼ íquenu ndiʼ: «¿Ñee caquiiñeʼ libertad stinneʼ jneza la?». Lu ca últimu dxi riʼ, dxiiñaʼ jma risaca para organización stiʼ Jehová nga guni predicarnu ne gusíʼdinu binni. ¡Guizáʼ galán ndiʼ purtiʼ laanu, ca xpinni Jehová, nápanu stale dxiiñaʼ ni gúninu! Pa nabézanu ti lugar ra nuu paz, ¿xi zanda gúninu para iquiiñenu libertad stinu jneza yaʼ? (2 Tim. 4:2). Guníʼ ique pa zanda gúniluʼ o pa zanda guni ti familia stiluʼ jma lu predicación o gaca precursor. Tiempu riʼ maʼ cadi naquiiñeʼ guyúbinu gápanu stale bueltu ne stale cosa risaca, purtiʼ zanitilúcani lu gran tribulación (Prov. 11:4; Mat. 6:31-33; 1 Juan 2:15-17). Stale publicador maʼ biziidiʼ sti idioma para guni predicarcaʼ ne gusiidicaʼ jma binni. Para gacané organización stiʼ Jehová laacabe la? rúnicaʼ stale publicación lu jma de ti mil idioma. w20.09 16 párr. 9-11

Ti buen soldadu leal laa. Rudxiilú né guiráʼ stipa stiʼ para guni proteger tuuxa ni nadxii o ni rusisaca. Guluu Pablo gana Timoteo guibani modo ná Dios, ndiʼ riníʼ gannaxhiibe Dios ne gácabe leal (1 Tim. 4:7). Laga jma gannaxhiinu ne gácanu leal Jehová, jma zanaazeʼ dxiichinu ca ni dxandíʼ rusiidibe (1 Tim. 4:8-10; 6:6). Pa racalaʼdxiʼ ti soldadu guni cumplir né dxiiñaʼ stiʼ la? cadi naquiiñeʼ guiree gana. Guca Timoteo ti buen soldadu stiʼ Cristu purtiʼ yenándabe conseju stiʼ Pablo ora gudxi laabe gucaanabe deseu malu, gápabe cualidad ni riuulaʼdxiʼ Dios ne guidxaagabe ca hermanu (2 Tim. 2:22). Ne para ganda gúnibe ni la? cadi naquiiñeʼ guireebe gana. Laanu laaca ngaca nga naquiiñeʼ gúninu pa racaláʼdxinu gudxíʼlunu ca deseu malu stinu (Rom. 7:21-25). Cadi naquiiñeʼ guireʼnu gana pa racaláʼdxinu guchaʼnu modo laanu ne guibáninu modo ná Dios (Efes. 4:22, 24). Ne pa maʼ bidxáganu despué de bibiguétanu de dxiiñaʼ, zándaca caquiiñeʼ gúninu stipa para chuunu reunión (Heb. 10:24, 25). w20.09 28 párr. 9-11

Naquiiñeʼ gápanu paciencia para gacanenu estudiante stinu gaca dedicar ne chúʼnisa. Peru zedandá hora naquiiñeʼ guidúʼyanu pa racaláʼdxibe gúnibe ni ná Jehová o coʼ. ¿Ñee rúnibe stipa gúnibe ni ná ca mandatu ni bidii Jesús la? ¿O runi estudiarbe purtiʼ si nuube gánnabe caadxi cosa de Biblia? Gatigá guidúʼyanu pabiáʼ ziyuni progresar estudiante stinu. Guzéʼtenu caadxi ejemplu, ¿ñee riniʼbe xi runi sentirbe pur Jehová la? ¿Runi orarbe la? (Sal. 116:1, 2). ¿Ñee riuuláʼdxibe gúʼndabe Biblia la? (Sal. 119:97). ¿Riebe guiráʼ reunión la? (Sal. 22:22). ¿Ñee cuchaabe modo nabánibe la? ¿Maʼ riníʼnebe familia stibe ne ca xhamígube de ni caziidibe la? (Sal. 9:1). Ne ni jma risaca, ¿ñee racaláʼdxibe gácabe testigu stiʼ Jehová la? (Sal. 40:8). Pa cadi cayúnibe nin tobi de ca ni bizéʼtenu riʼ, guidúʼyanu xiñee cadi cayúnibe ni ne despué guinínenu laabe né diidxaʼ nadóʼ de laani. w20.10 18 párr. 14, 15

Bixhoze Jesús ni nuu guibáʼ siempre ricaa decisión galán, ne zaqueca biʼniʼ bixhózebe ne jñaabe ni gúpabe lu Guidxilayú riʼ. Peru ra ziniisi Jesús, gucuaa ca decisión stiʼ (Gál. 6:5). ¿Xiñee yaʼ? Purtiʼ cásica laanu, gúcabe libre para guicaabe ca decisión stibe. Ñanda ñúnibe ni ñápabe gana, peru gulibe gaca xhamígube Jehová. Ora biene Jesús xi racalaʼdxiʼ Jehová gúnibe la? bíʼnibe ni (Juan 6:38). Gúnnabe zaca nanalaʼdxiʼ binni laabe ne zuninacaʼ laabe. Peru gudixhe íquebe gúnibe ni ná Jehová. Dxi guyuunísabe lu iza 29, bicaa íquebe gúnibe ni ná Jehová lu xquendanabánibe (Heb. 10:5-7). Ne neca cayátibe lu yaga que gudixhe íquebe cadi gucheenebe Jehová (Juan 19:30). w20.10 29 párr. 12; 30 párr. 15

¿Ñee runibiaʼnu tuuxa hermanu ni napa ti guendahuará, ni cadiʼdiʼ ra nagana o ni gutiʼ ti familia stiʼ la? Pa gánnanu cadiʼdiʼ tuuxa ra nagana guinábanu Jehová gacané laanu para gábinu laabe caadxi diidxaʼ galán o gúninu xiixa pur laabe. Pa gúninu ni, zaguʼnu gana laabe (1 Ped. 4:10). Nánnanu nuu Jehová para gacané laanu. Ne para gúnibe ni, zanda iquiiñebe Jesús ne ca ángel. Laaca zanda iquiiñebe ca binni ni napa ti puestu risaca pa nga nga ni racaláʼdxibe. Ne laaca nánnanu riquiiñebe espíritu santu stibe para gucaabe laanu gacanenu ca hermanu stinu. Nga runi, cásica biʼniʼ apóstol Pablo, laaca zanda guininu né stale confianza «Jehová nga racané naa. Qué zadxibeʼ diaʼ. ¿Xi zanda guni binni naa yaʼ?» (Heb. 13:6). w20.11 17 párr. 19, 20

Gunna dxichi ca apóstol nuu Jehová pur laacaʼ, purtiʼ bidii poder laacabe para gúnicabe milagru (Hech. 5:12-16; 6:8). Tiempu riʼ qué rudii Jehová poder laanu para gúninu milagru, peru riquiiñebe Biblia para gábibe laanu zacanebe ne zudiibe espíritu stibe laanu pa cayacananu pur cayúninu ni jneza (1 Ped. 3:14; 4:14). Nga runi cadi naquiiñeʼ guiníʼ íquepenu xi guizaacanu despué pa sanándacabe laanu, ni jma jneza nga guidúʼyanu xi zanda gúninu para gápanu jma confianza zacané ne zulá Jehová laanu. Naquiiñeʼ guietenaláʼdxinu promesa stiʼ Jesús ora guníʼ: «Zudieeʼ laatu ni guiniʼtu ne zudieeʼ laatu guendabiaaniʼ, ne guiráʼ ca enemigu stitu qué zadxélacaʼ xi guiniʼcaʼ». Ne laaca guniʼbe: «Pa guni huantartu zulatu xpídatu» (Luc. 21:12-19). Ne cadi guiaandaʼ laanu ora rati ti xpinni Jehová, rietenaláʼdxibe ximodo laa ne zusibánibe laa. w21.01 4 párr. 12

Cadi apóstol Pablo si guníʼ zusibani Dios ca binni ni maʼ guti, Job laaca guníʼ nanna dxichi zietenalaʼdxiʼ Dios de laa ne zusibánibe laa (Job 14:7-10, 12-15). Biblia ná «zabani ca ni maʼ guti» ne laani nga tobi de ca cosa ni «maʼ bizíʼdinu» o ni runi crenu laanu ca xpinni Cristu (Heb. 6:1, 2). Bisiene chaahuiʼ Pablo de tema riʼ lu capítulo 15 stiʼ 1 Corintios. Nanna dxíchinu ni bisiénebe de tema riʼ guluuni gana ca xpinni Cristu ni bibani lu primé siglu, ne laaca zanda uguuni gana laanu tiempu riʼ neca maʼ xadxí de nápanu esperanza riʼ. Ra biasa Jesús de lade gueʼtuʼ, rucaani laanu guni crenu ziasa ca familia stinu ni maʼ guti. Laani nga tobi de «ca noticia galán» ni bidii Pablo ca xpinni Cristu de Corinto (1 Cor. 15:1, 2). Ne gúdxibe laacaʼ pa qué guni crecaʼ biasa Jesús de lade gueʼtuʼ, qué zasaca fe sticaʼ (1 Cor. 15:17). w20.12 2 párr. 2-4

¿Xi gucané Pedro cadi guiree gana yaʼ? Bietenaláʼdxibe gunabaʼ Jesús lu oración cadi guirá fe stibe. Bicabi Jehová oración stiʼ Jesús. Despué bihuinni Jesús ra nuube, zándaca para cuʼ gana laabe (Luc. 22:32; 24:33, 34; 1 Cor. 15:5). Sti biaje bihuinni Jesús ra nu ca apóstol stiʼ despué de bíʼnicaʼ guuzeʼ guidubi ti gueelaʼ ne qué ninaazecaʼ gastiʼ. Dxi que, bisihuinni Jesús nadxii Pedro ne maʼ biʼniʼ perdonar laabe ra bidii laabe caadxi dxiiñaʼ (Juan 21:15-17). Modo biʼniʼ tratar Jesús Pedro rusihuinni riá binni, cásica runi Bixhoze ni. Nga runi, ora gucheʼnu, cadi guiníʼ íquenu qué ziuu dxi guni perdonar Jehová laanu. Cadi guiaandaʼ laanu nga nga ni racalaʼdxiʼ Binidxabaʼ guiníʼ íquenu. Ni jma galán gúninu nga gannaxhiinu laca laanu ne gannaxhiinu xcaadxi, cásica runi Jehová ni (Sal. 103:13, 14). w20.12 20, 21 párr. 17-19

Laaca zanda guizíʼdinu de ni bizaaca ca binni ni guca luguʼ ca ni qué ñapa confianza Jehová. Ora guni estudiarnu ca ejemplu riʼ zacaneni laanu para cadi gúninu ni biʼniʼ ca binni riʼ. Dxi bizulú biʼniʼ mandar rey Asá biyubi Jehová para gacané laa ora napa problema. Peru gudiʼdiʼ si tiempu maʼ qué nuyúbibe Dios para gacané laabe ne maʼ bíʼnibe ca cosa ca modo nabe (2 Crón. 16:1-3, 12). Ruluíʼ jneza ngue ni biʼniʼ Asá ora gunabaʼ gacané ca siriu laa para tindené rey de Israel. Peru despué bihuinni cadi biaʼsi ni bíʼnibe. Biquiiñeʼ Jehová ti profeta para gabi laabe ca diidxaʼ riʼ: «Cumu gúpaluʼ confianza rey stiʼ Siria ne qué ñápaluʼ confianza Jehová, Dios stiluʼ la? nga runi maʼ zeʼ rey stiʼ Siria de lu naluʼ» (2 Crón. 16:7). Laanu laaca naquiiñeʼ chuʼnu cuidadu cadi gúninu ca cosa ca modo rábinu, lugar de nga la? guyúbinu gacané Jehová laanu né Stiidxaʼ. Nuu biaje naquiiñeʼ guicaanu decisión nagueenda. Neca zacá pa qué gaca lúgunu ne gápanu confianza Jehová zacaanu decisión jneza. w21.01 6 párr. 13-15

Tiempu riʼ, caadxi xpinni Jehová cayuni sufrircaʼ pur hambre, qué gápacaʼ bueltu, cayacanacaʼ pur cadinde binni o pur guerra. Xcaadxi de ca hermanu stinu deguyoocaʼ pur ni runi crecaʼ. Peru guizáʼ riecheʼ ca ni naca parte de gran muchedumbre ora guiníʼ íquecaʼ zalacaʼ ora guinitilú guidxilayú malu riʼ, zápacabe ni gócabe ne qué zusaana de gusiidiʼ Jehová laacabe. Ora gunitilú Jehová guidxilayú malu stiʼ Binidxabaʼ riʼ, zápabe ca xpínnibe ni nuu lu gran muchedumbre de xiana stibe, ni zeeda gaca casi ti «calor» nadipaʼ. Despué de gran tribulación, ziné Jesús binni ni guilá ra daʼ «nisa de guendanabani» ni qué zaluxe (Apoc. 7:17). Bixuiʼlú pabiáʼ sicarú esperanza napa ca ni nuu lu gran muchedumbre: de stale mil millón de binni ni huabani ndaaniʼ Guidxilayú riʼ, zándaca laasicabe nga ca ni qué zati (Juan 11:26). Rudii ca xcaadxi dendxuʼ xquixe peʼ Jehová ne Jesús pur esperanza galán nápacaʼ. w21.01 17 párr. 11, 12

Últimu gueelaʼ guyuu Jesús lu Guidxilayú, gunna zadxaagalú ca discípulo stiʼ guendanagana. Cumu nadxiibe ca discípulo stibe la? gunábabe Bixhózebe gapa laacaʼ de Binidxabaʼ (Juan 17:14, 15). Nanna Jesús dxi guibiguetaʼ guibáʼ, zucaalú Binidxabaʼ tutiica gacalaʼdxiʼ guni ni ná Jehová. Bihuinni dxichi zaquiiñeʼ xquidxi Jehová chuʼ tu gapa laacaʼ. Tiempu riʼ, jma caquiiñenu gapa Jehová laanu. Maʼ guládxicabe Binidxabaʼ de guibáʼ «ne guizáʼ cadxiichi» (Apoc. 12:12). Maʼ bicaa Binidxabaʼ caadxi binni guiníʼ ique cayúnicaʼ «xhiiñaʼ Dios» ora sanándacaʼ laanu (Juan 16:2). Ne xcaadxi ni qué runi cré Dios, rizanándacaʼ laanu purtiʼ qué rúninu ni nacaʼ. Peru cadi naquiiñeʼ guidxíbinu. ¿Xiñee yaʼ? Pur ni ná textu ni cadúʼndanu yannadxí. w21.03 26 párr. 1-3

Guiráʼ ni runi Jehová rúnini purtiʼ nadxii binni. Cumu nadxiibe laanu la? rizaaláʼdxibe laanu, riguu jnézabe laanu ora rucheʼnu, peru qué rusaana de gannaxhiibe laanu. Ne pur nga la? bidiibe Xiiñibe para gulá binni, ne Jesús laaca nadxii laanu, nga runi guyuu dispuestu gatiʼ pur laanu (Juan 3:16; 15:13). Gastiʼ qué zanda gucueeza Jehová ne Jesús de gannaxhiicaʼ ca ni qué rusaana laacaʼ (Juan 13:1; Rom. 8:35). Guiráʼ ni guni ti xaíque stiʼ familia naquiiñeʼ gúnini purtiʼ nadxii familia stiʼ. ¿Xiñee nabé risácani yaʼ? Apóstol Juan guníʼ: «Pa cadi nadxiibe hermanu [o familia] stibe nin ne ruuyabe laa, ximodo zanda gannaxhiibe Dios pa qué ruuyabe laa» (1 Juan 4:11, 20). Nga runi, ti hombre ni nadxii familia stiʼ ne racalaʼdxiʼ chinanda ejemplu stiʼ Jehová ne Jesús zuni stipa gacané familia stiʼ chuʼ jma gaxha de Jehová, guni sentircaʼ seguru ne gudiibe ni caquiiñecaʼ (1 Tim. 5:8). Zusiidibe ne zaguu jnézabe ca xiiñibe. Laaca zaziidiʼ ruʼ hombre ca guicaa decisión ni gusisaca Jehová ne ni gacané familia stiʼ. w21.02 5 párr. 12, 13

Nanna Bixhózenu ni nuu guibáʼ pa guiníʼ ique xhaatanu ca ni bizaacanu dxiqué zanda cueecani gana laanu. Laaca ruuyaʼ Jehová ca cualidad ni nápanu, neca nuu biaje qué ridúʼyanu cani (1 Juan 3:19, 20). Pa tuuxa cayuni stipa gusaana ti viciu ne guiaba luni sti biaje la? zándaca guiree gana. Ora runi cometer tuuxa ti pecadu, napa razón para guni sentir napa donda (2 Cor. 7:10). Peru cadi naquiiñeʼ guiníʼ íquenu sicaríʼ: «Maʼ qué gapaʼ remediu; qué ziuu dxi guni perdonar Jehová naa». Cadi jneza guiníʼ íquenu sicaríʼ purtiʼ zanda guixélenu de Jehová. Ni naquiiñeʼ gúninu nga gúninu oración ra guinábanu Jehová guni perdonar laanu (Is. 1:18). Nanna Jehová ora maʼ guca arrepentirnu de guidubi ladxidoʼno ne runi perdonar laanu. Laaca zanda guinínenu ca ancianu, zápacaʼ paciencia ne zacanecaʼ laanu para guibiguétanu ra nuu Jehová (Sant. 5:14, 15). w20.12 23 párr. 5, 6

Biʼniʼ respetar Jesús ca gunaa. Qué ñácabe casi ca fariseu, purtiʼ laacaʼ bíʼnicaʼ menu ca gunaa, qué rinacaʼ guiníʼnecaʼ laacabe nezalú stale binni ne qué niníʼnecaʼ laacabe de Stiidxaʼ Dios. Peru maʼ gadxé guca Jesús, purtiʼ laa bisiidiʼ hombre ne gunaa de Stiidxaʼ Dios (Luc. 10:38, 39, 42). Laaca bidii Jesús lugar chinanda caadxi gunaa laa dxi biʼniʼ predicar (Luc. 8:1-3). Ne caadxi gunaa nga gúdxibe chitídxicaʼ ca apóstol stibe maʼ biásabe de lade gueʼtuʼ, ti privilegiu guizáʼ risaca (Juan 20:16-18). Biʼniʼ mandar apóstol Pablo Timoteo guni respetar ca gunaa. Neca gucané Pablo Timoteo para iguidxi fe stiʼ, gúnnabe jñaa ne jñaabiidaʼ Timoteo nga gucané laa guiziidiʼ «ni cá lu Stiidxaʼ Dios» (2 Tim. 1:5; 3:14, 15). Ne lu carta ni bicaa Pablo para ca hermanu de Roma, biseendaʼ diuxi para caadxi hermana ne bizeeteʼ lácabe. Bidiibe cuenta guizáʼ runi ca hermana que dxiiñaʼ ne bisisácabe ni rúnicaʼ (Rom. 16:1-4, 6, 12; Filip. 4:3). w21.02 15 párr. 5, 6