Abril

¿Ñee cadídinu xiixa guendanagana la? Zándaca bininá ti hermanu laanu (Sant. 3:2). O zándaca runi burla ca compañeru de scuela o de dxiiñaʼ laanu purtiʼ rúninu ni ná Jehová (1 Ped. 4:3, 4). ¿Ñee cucueeza ti familia stinu laanu para cadi chuunu reunión o gusaana de guininu de ni runi crenu la? (Mat. 10:35, 36). Pa cayaca nagana para laanu gudxíʼlunu ca guendanagana riʼ, zándaca zareʼnu gana. Peru cadi guiaandaʼ laanu intiica guendanagana gápanu, zudii Jehová laanu guendabiaaniʼ ne stipa laanu para gudxíʼlunu cani. Guníʼ Jehová guicá lu Biblia xi biʼniʼ caadxi binni para gunda bidxiilucaʼ ca guendanagana ni gúpacaʼ. Biʼniʼ Jehová ni para guizíʼdinu de ca binni riʼ. Nga peʼ nga ni bicaa apóstol Pablo. Pa guidúʼndanu ca relatu ca, zatadxí ladxidoʼno ne zápanu ti esperanza. Peru cadi caquiiñeʼ si guidúʼndanu Biblia, sínuque laaca caquiiñeʼ gudiʼnu lugar guchaani modo riníʼ íquenu ne chindani ndaaniʼ ladxidoʼno. w21.03 14 párr. 1, 2

¿Ximodo ridúʼyanu ca binni ni riguni predicarnu? ¿Ñee riníʼ íquenu nácacabe casi ti cosecha ni maʼ nuu listu para guiasa la? Pa zacá ridúʼyanu laacabe, zúninu chonna cosa. Primé, jma zaguixhe íquenu guni predicarnu. Cumu cadi naquiiñeʼ tidiʼ stale tiempu para guiasa ti cosecha la? naquiiñeʼ gácani nagueenda. Guiropa, ziuʼnu nayecheʼ ora gúninu dxiiñaʼ riʼ né stale gana. Biblia ná riecheʼ binni tiempu cayasa cosecha (Is. 9:3). Ne guionna, zadúʼyanu laacabe casi ca binni ni zanda gueeda gaca xpinni Cristu, nga runi zanínenu laacabe de tema ni jma riuuláʼdxicabe. Qué niníʼ ique Jesús qué ziuu dxi guchaa ca samaritanu, sínuque biiyabe laacaʼ casi binni ni zanda gueeda gaca discípulo stibe, peru zándaca cadi zacá guníʼ ique ca xpínnibe. Ne zacá naquiiñeʼ guidúʼyanu binni ni nabeza neza ra runi predicarnu. Ne apóstol Pablo bisaana ti ejemplu galán para laanu. Purtiʼ, binibiaʼbe caadxi de ca ni biʼniʼ cré binni ni biʼniʼ predicarbe, gúnnabe xi riuuláʼdxicaʼ, ne, biiyabe laacaʼ casi binni ni zanda gueeda gaca xpinni Cristu. w20.04 8, 9 párr. 3, 4

Lugar de guni juzgarnu ti binni pur ni runi, gúninu stipa guiénenu ximodo runi sentir. Jehová si nga zanda guiene chaahuiʼ laanu. Nga runi, guni orarnu laabe para guinábanu laabe gacanebe laanu guidúʼyanu binni modo ruuyabe laacaʼ ne gánnanu ximodo guianu laacaʼ. Qué zanda diʼ cuinu tu naquiiñeʼ guianu. Guiráʼ napa guendanagana, cásica gupa Jonás, Elías, Agar ne Lot. Nuu biaje laapecabe biyúbicabe ni. Peru gácanu sinceru, ¿tu tobi de laanu qué huayapa guendanagana? Nga runi, biaʼsi nga guinabaʼ Jehová laanu guni sentirnu ni cayuni sentir sti hermanu stinu (1 Ped. 3:8). Ora rúninu ni nabe, racanenu para chuʼ xquidxi Dios ni nuu lu guidubi Guidxilayú riʼ tobi si, neca gadxé gadxé laacaʼ. Nga runi, gúninu stipa pur gucaʼdiáganu, guiénenu ne guianu ca hermanu stinu. w20.04 18, 19 párr. 15-17

Bisaana Jesús ti ejemplu galán para laanu. Nga runi, pa racaláʼdxinu guzúʼbanu stiidxaʼ Jehová la? caquiiñeʼ chinándanu ejemplu stiʼ Jesús dede ra gándatiʼ (Juan 8:29). Para cadi gusaana de sanu lu ni dxandíʼ la? caquiiñeʼ chuʼnu seguru Jehová nga Dios ni dxandíʼ ne dxandíʼ guiráʼ ni rábibe laanu lu Stiidxabe. Laaca caquiiñeʼ chuʼnu seguru Jesús nga Mesías ni maca nexheʼ gueeda. Tiempu riʼ, stale binni qué runi cré pa Jesús nga ni gulí Dios para gaca Rey lu Reinu stiʼ. Apóstol Juan guníʼ nuu «stale tu canagusiguii», ne zanda gucaacaʼ ca xpinni Cristu cadi guni cré ni dxandíʼ de Jehová ne Jesús (2 Juan 7-11). Laaca bicaabe ca diidxaʼ riʼ: «¿Tuu nga ni rusiguii pue? ¿Ñee cadi laabe nga ni runi negar pa Jesús nga Cristu la?» (1 Juan 2:22). Para cadi quítecabe laanu la? caquiiñeʼ guidúʼndanu Stiidxaʼ Dios. Zacatiʼ nga zanda gunibiaʼnu Jehová ne Jesús (Juan 17:3). Ne óraca nga ziuʼnu seguru nápanu ni dxandíʼ. w20.07 20, 21 párr. 4, 5

Pa qué racaláʼdxinu guchíʼñanu ca hermanu stinu ni ziguxóʼnenu lu carrera la? ziuu ora zudiʼnu lugar gúnicabe xiixa modo nácabe ne cadi gacaláʼdxinu gaca ni modo peʼ rábinu (Rom. 14:19-21; 1 Cor. 8:9, 13). Qué raca ni bizéʼtenu riʼ lu ti carrera. Purtiʼ lu ti carrera, pa ñanda tobi si nga ñuni ganar ne qué riníʼ íquecabe ca xcaadxi binni ziguxooñenécabe. Nga runi zándaca rúnicabe stipa para tídicabe lú xcaadxi ne sanírucabe lu carrera ca. Peru laanu qué rúninu stipa pur tídinu lú ca hermanu stinu (Gál. 5:26; 6:4). Purtiʼ ni jma racaláʼdxinu nga gacanenu guiráʼ ca ni ganda para chindánenu laacaʼ lu meta ne guicaanu guendanabani ni qué zaluxe. Nga runi, rúninu stipa chinándanu conseju ni ná cadi guyúbinu para laasinu, sínuque guizaaláʼdxinu xcaadxi binni (Filip. 2:4). Nadxii Jehová laanu, nga runi cayábibe laanu zudiibe ti premiu ca ni chindá lu meta, laani nga ti guendanabani ni qué zaluxe, zándaca guibáʼ o lu guidxilayú. w20.04 28 párr. 10; 29 párr. 12

Millón de xpinni Cristu ziuucaʼ ndaaniʼ Guidxilayú cubi. Ca hombre ne ca gunaa riʼ zuuyacaʼ ximodo guni ganar Cristu ne ca ungidu guendaguti. ¿Ximodo yaʼ? Dxi guiasa millón de binni ni bibani dxiqué de lade gueʼtuʼ. ¡Guizáʼ galán ni chigaca riʼ! (Hech. 24:15). Ne guiráʼ ca ni cadi gucheené Jehová laaca zuni ganarcaʼ guendaguti ni bisaanané Adán binni ne zabánicaʼ para siempre. Laanu, ca xpinni Cristu ni nabáninu tiempu riʼ, rudiʼnu xquixe peʼ pur ca diidxaʼ galán ni bicaa Pablo ra nuu ca hermanu de Corinto ni caníʼ ziasa ca ni maʼ guti. Nga runi, nápanu stale razón para chinándanu conseju ni bidii Pablo ni ná cadi gusaana de gúninu «xhiiñaʼ Señor» (1 Cor. 15:58). Pa cadi guchéʼnenu Dios ne gúninu biaʼ gándatiʼ lu dxiiñaʼ riʼ, zabáninu jma nayecheʼ lu ca dxi ni zeeda ca, jma de biaʼ guníʼ íquenu. Ne óraca zudiʼnu cuenta cadi pur gana bíninu xhiiñaʼ Señor. w20.12 13 párr. 16, 17

Ca profecía ni riete lu Ezequiel 38:10-23; Daniel 2:43-45; 11:44-12:1 ne Apocalipsis 16:13-16, 21 ruluíʼ caníʼcani de ti tiempu si ne de ti cosa si. Pa zacá ni la? zanda cuézanu guizaaca ca ni chiguzéʼtenu riʼ. Ora maʼ nuunu lu gran tribulación, zuni «ca rey nuu lu guidubi guidxilayú» ti grupu de guidxi roʼ o ti coalición de nación (Apoc. 16:13, 14). Biblia ná grupu de guidxi roʼ riʼ nga «Gog de guidxi Magog» (Ezeq. 38:2). Zucaalú ca guidxi roʼ riʼ xquidxi Dios ne zacaláʼdxicaʼ gunitilucaʼ laacabe tobi si tiru. Lu ti visión, biiyaʼ Apóstol Juan ziaba guié naroʼbaʼ de granizu luguiáʼ ca enemigu stiʼ Dios. Zándaca runi representar ca guié naroʼbaʼ de granizu riʼ mensaje ni ziné ca xpinni Jehová ra nuu binni purtiʼ zábicabe laacaʼ zusabanáʼ Jehová laacaʼ, ndiʼ nga ni gucaa Gog de Magog gucaalú xquidxi Dios ne gacalaʼdxiʼ gunduuxeʼ laacabe tobi si tiru (Apoc. 16:21). w20.05 14, 15 párr. 13, 14

Naca stipa stiʼ Dios ti regalu ni naquiiñeʼ gusisácanu. Ora guiníʼ íquenu guiráʼ ni cayuni espíritu santu tiempu riʼ, jmaruʼ si zudiʼnu xquixe peʼ Jehová pur laani. Ante cheʼ Jesús guibáʼ, gúdxibe ca discípulo stibe ca diidxaʼ riʼ: «Peru zacaatu poder ora gueeda espíritu santu luguiatu. Ne zácatu testigu stinneʼ [...] dede ra jma zitu lu guidxilayú» (Hech. 1:8). Maʼ gucané espíritu santu jma de xhono millón arondaʼ binni nabeza gadxé gadxé lugar lu Guidxilayú para gácacaʼ xpinni Jehová. Ne nuunu ndaaniʼ ti paraísu espiritual, purtiʼ cayacané espíritu santu laanu para gusihuínninu «ca cualidad stiʼ espíritu», casi guendarannaxhii, guendanayecheʼ, guendariuudxi, paciencia, guendaracané, guendanachaʼhuiʼ, fe, guendanadóʼ ne gucueeza tobi laca laa (Gál. 5:22, 23). Rihuinni dxichi ti regalu nabé risaca nga espíritu santu. w20.05 28 párr. 10; 29 párr. 13

Nápanu stale razón para guni crenu zunibiáʼ binni familia stiʼ ni guiasa de lade gueʼtuʼ. Guzéʼtenu ti ejemplu, pur ca resurrección ni riete lu Biblia, zándaca ora gusibani Jehová ca ni maʼ guti, zandísabe laacaʼ modo gúcacaʼ ante gáticaʼ, modo riniʼcaʼ ne modo riníʼ íquecaʼ. Ne cadi guiaandaʼ laanu guníʼ Jesús ora maʼ guti tuuxa, casi ora nisiaasiʼ ne ora guiasa de lade gueʼtuʼ casi ora nibani (Mat. 9:18, 24; Juan 11:11-13). Cásica modo naca binni ora maʼ zigasi la? zacaca nga ora guibani, ngueca ridxi stiʼ ne ni riníʼ ique. Guzéʼtenu ni bizaaca Lázaro. Dxi bisibani Jesús laabe la? maʼ tapa gubidxa de gútibe, ngue runi mápeca cayuudxuʼ xcuérpube. Peru ora biásabe de lade gueʼtuʼ nagueendaca binibiáʼ ca bizáʼnabe laabe, ne laaca binibiaʼbe laacaʼ (Juan 11:38-44; 12:1, 2). w20.08 14 párr. 3; 16 párr. 8

Nabé risaca ca ungidu ne xcaadxi dendxuʼ para Dios. Nadxiibe guiropaʼ grupu riʼ. Biaʼ queca gudíxebe —xquendanabani Xiiñibe— para sibe ca ungidu ne ca xcaadxi dendxuʼ. Maʼ gadxé esperanza napa guiropaʼ grupu riʼ, peru guirópacaʼ naquiiñeʼ gácacaʼ leal Dios ne Cristu (Sal. 31:23). Ne cadi guiaandaʼ laanu zanda iquiiñeʼ Dios espíritu stiʼ para gudii stipa guiráʼ ca xpinni. Zanda gudii Jehová espíritu stiʼ binni biaʼ caquiiñeʼ ni, gastiʼ naca pa ungidu o de xcaadxi dendxuʼ laa. Maʼ bidii Jehová ca xpinni ni maʼ guca dedicar ti esperanza guizáʼ galán (Jer. 29:11). Dxi Conmemoración, nápanu oportunidad de gusisácanu Dios ne Cristu pur guiráʼ ni maʼ bíʼnicabe para guibáninu para siempre. Dxi ca nga dxi jma risaca para ca ni dxandíʼ xpinni Cristu. w21.01 18 párr. 16; 19 párr. 19

Stale de ca ni rié Conmemoración nápacaʼ esperanza de guibánicaʼ ndaaniʼ Guidxilayú. Yanna, ¿xiñee riécabe yaʼ? Purtiʼ risaca ni para laacabe, cásica risaca cheʼ tuuxa guendaxheelaʼ stiʼ xhamigu. Riecaʼ purtiʼ nadxiicaʼ ne racaláʼdxicaʼ gacanecaʼ ca ni cachaganáʼ. Zacaca nga runi ca xcaadxi dendxuʼ, riecaʼ Conmemoración purtiʼ nadxiicaʼ ne racaláʼdxicaʼ gacanecaʼ Cristu ne ca ungidu. Ne laaca rusihuínnicabe rudiicabe xquixe peʼ pur sacrificiu stiʼ Jesús, ni rudii laacabe ti guendanabani ni qué zaluxe lu Guidxilayú riʼ. Laaca rié ca xcaadxi dendxuʼ Conmemoración purtiʼ racaláʼdxicaʼ chinándacaʼ mandatu bidii Jesús laacaʼ. Dxi gudoxhinebe ca apóstol, gúdxibe laacaʼ: «Cadi gusaana de gúnitu ndiʼ para guietenaláʼdxitu naa» (1 Cor. 11:23-26). Nga runi qué zusaana ca xcaadxi dendxuʼ de checaʼ Guendaroxhí stiʼ Señor laga nuuruʼ ca ungidu ndaaniʼ Guidxilayú. Laaca runi invitárcabe guiráʼ binni cheʼ dxi nabé risaca riʼ. w21.01 17, 18 párr. 13, 14

Ora nadxii ti binni sti binni naquiiñeʼ gusihuínninu ni pur ni gúninu (bichaaga ni né Santiago 2:17, 26). Nadxii Jehová laanu (1 Juan 4:19). Ne riquiiñebe Biblia para gábibe ni laanu (Sal. 25:10; Rom. 8:38, 39). Peru nadxiibe laanu cadi pur ni rabisibe laanu, sínuque pur ni rúnibe. Bidii Jehová lugar gacaná ne gatiʼ Xiiñiʼ pur laanu (Juan 3:16). Nga runi, nanna dxíchinu nadxiibe laanu. Rusihuínninu nadxiinu Jehová ne Jesús ora ruzúʼbanu stiidxacaʼ (Juan 14:15; 1 Juan 5:3). Laaca biʼniʼ mandar Jesús laanu gannaxhiisaanu (Juan 13:34, 35). Naquiiñeʼ gannaxhiinu ca hermanu cadi pur ni guinísinu, sínuque pur ni gúninu (1 Juan 3:18). w21.01 9 párr. 6; 10 párr. 8

Cabeza ca xpinni Cristu ungidu chuʼcaʼ gaxha de Jesús para siempre ne guni mandárnecaʼ laabe lu Reinu stiʼ Dios. Zuuyacaʼ laabe, zaníʼnecaʼ laabe ne siempre ziuucaʼ gaxha de laabe (Juan 14:2, 3). Ca ni cabeza guibani ndaaniʼ Guidxilayú cubi laaca zannaxhii ne zapa Jesús laacaʼ. Neca qué zuuyacaʼ laabe, zaca xhamígucaʼ laabe jma laga nabánicaʼ nayecheʼ ndaaniʼ Guidxilayú chigudii Jehová ne Jesús laacaʼ (Is. 9:6, 7). Ora raca xhamígunu Jesús, ricaanu stale ndaayaʼ. Guzéʼtenu ti ejemplu, nadxiibe laanu ne cayacanebe laanu tiempu riʼ. Laaca nápanu privilegiu guibáninu para siempre. Ne ni jma risaca nga pa gaca xhamígunu Jesús zanda gaca xhamígunu Bixhózebe, Jehová. Nga runi, nabé risaca nga gaca xhamígunu Jesús. w20.04 25 párr. 15, 16

Bicaa apóstol Pablo ti carta para ca hermanu de Corinto, ca ni naca ungidu ne ni napa esperanza guiasa de lade gueʼtuʼ para cheʼ guibáʼ. «Ca ni maʼ guleechú Dios para chuʼ tobi si né Cristu Jesús», ne «maʼ gulibe» laacaʼ para gácacaʼ xpínnibe. Laaca bizeeteʼ Pablo de «ca xpinni Cristu ni nisiaasiʼ lu guendaguti» ni nuu «tobi si né Cristu» (1 Cor. 1:2; 15:18; 2 Cor. 5:17). Ne lu sti carta ni bicaabe guniʼbe: «Pa maʼ gúcanu tobi si né laabe ra gútibe la? laaca zácanu tobi si né laabe ra guiásanu de lade gueʼtuʼ cásica biásabe» (Rom. 6:3-5). Biasa Jesús casi espíritu ne guyé guibáʼ. Ngaca nga ni cabeza guiráʼ ca ni nuu «tobi si né Cristu» o ca ungidu. Pablo guníʼ Cristu nga «primé» ni «biasa lade ca ni maʼ guti» (1 Cor. 15:20). Jesús nga «primé» ni biasa casi espíritu ne gucuaa ti guendanabani sin gatiʼ guibáʼ. w20.12 6 párr. 15, 16

Tiempu riʼ ca ungidu ni gatiʼ maca zecaʼ guibáʼ. Nánnanu zaca ni pur ca diidxaʼ bicaa apóstol Pablo lu 1 Corintios 15:51, 52. Ora guiasa ca xpinni Cristu riʼ zabánicaʼ jma nayecheʼ. Biblia cusiene xi chiguni ca ungidu guibáʼ, ca ni zadxaa «biaʼ riguiñe laga si binni». Sicaríʼ guníʼ Jesús: «Binni guni ganar ne guiaana lu ca neza stinneʼ dede dxi gueeda fin la? zudieeʼ laa autoridad luguiáʼ guiráʼ guidxi, cásica maʼ bidii Bixhozeʼ autoridad naa. Ne laa zuni mandar binni né vara de guiibaʼ, ne óraque zacadé ca binni que casi guisu de yu» (Apoc. 2:26, 27). w20.12 12 párr. 14, 15

Ora guníʼ Pablo Jesús nga «primé» caniʼbe ziuuruʼ jma binni ni ziasa de lade gueʼtuʼ para cheʼ guibáʼ. Ne ra tidiʼ tiempu guiráʼ ca ni nuu «tobi si né Cristu» —ládecabe nuu ca apóstol— ziásacaʼ de lade gueʼtuʼ para checaʼ guibáʼ, cásica Jesús (1 Cor. 15:18). Dxi bicaa Pablo carta para ca hermanu de Corinto, caʼruʼ diʼ guzulú guiasa ca ni nuu «tobi si né Cristu» para checaʼ guibáʼ. Ne guniʼbe zácani lu ca dxi ni zeeda ca. Sicaríʼ guniʼbe: «Peru maca nexheʼ chaahuiʼ modo gaca ni: zabani Cristu primé, despué zabani ca xpinni Cristu lu presencia stiʼ» (1 Cor. 15:23; 1 Tes. 4:15, 16). Ndiʼ rusihuinni naquiiñeʼ cueza ca apóstol ne xcaadxi ungidu presencia stiʼ Cristu para checaʼ guibáʼ ne gácacaʼ «tobi si né laabe» ra guiásacaʼ «de lade gueʼtuʼ cásica biásabe». Ne yanna riʼ nga nabáninu «lu presencia» stiʼ Cristu (Rom. 6:5). w20.12 5 párr. 12; 6 párr. 16, 17

Raríʼ caníʼ apóstol Pablo de ca binni ni guiasa né «ti cuerpu de espíritu» para guibani guibáʼ (1 Cor. 15:43, 44). Dxi guyuu Jesús lu Guidxilayú gupa ti cuerpu de beela. Peru ora biásabe de lade gueʼtuʼ, gucuaabe ti cuerpu de «espíritu ni rudii guendanabani» ne guyebe guibáʼ. Ngaca zazaaca ca ungidu, ziásacaʼ de lade gueʼtuʼ casi espíritu. Pablo guníʼ: «Nácanu casi hombre ni bizáʼ Dios de yu que, ne laaca zácanu casi hombre ni beeda de guibáʼ que» (1 Cor. 15:45-49). Nabé risaca guietenaláʼdxinu qué ñasa Jesús né ti cuerpu ni napa binni guidxilayú. Sicaríʼ guníʼ Pablo: «Qué zanda chuʼ beela ne rini lu Reinu stiʼ Dios» ni nuu guibáʼ (1 Cor. 15:50). Qué zié ca apóstol ne xcaadxi ungidu guibáʼ né ti cuerpu de beela ne rini ni rinitilú. w20.12 11 párr. 10-12

Gucané Dios caadxi xpinni Cristu de primé siglu para gucaacaʼ jma de esperanza ni napa ca ni cheʼ guibáʼ. Apóstol Juan bicaa: «Maʼ xiiñiʼ Dios laanu, peru caʼruʼ diʼ guihuinni ximodo chigácanu. Nánnanu zácanu casi laabe» (1 Juan 3:2). Nga runi, qué ganna ca ungidu ximodo nga guibánicaʼ guibáʼ ne gápacaʼ ti cuerpu de espíritu. Ni nánnacabe nga zuuyacabe Jehová. Biblia ná maʼ nuu ca ungidu ra nuu Jesús ora gunduuxebe «guiráʼ gobiernu ne guiráʼ autoridad ne poder», ne laaca zunitilube guendaguti, «últimu enemigu». Últimu la? Jesús ne guiráʼ ni guni mandarné laa zuzuubacaʼ stiidxaʼ Dios, ne maʼ Jehová guni mandar guiráʼ xixé ni nuu (1 Cor. 15:24-28). ¡Guizáʼ galán dxi gaca ni bizéʼtenu riʼ! w20.12 8 párr. 2

¿Xi zazaaca ca xpinni Cristu ni qué gapa esperanza para guni mandarné Cristu guibáʼ yaʼ? Laaca cabézacabe guiásacabe de lade gueʼtuʼ. Nánnanu ni purtiʼ Biblia ná apóstol Pablo ne xcaadxi xpinni Cristu nga «de ca primé binni ni guibani» de lade gueʼtuʼ (Filip. 3:11). ¿Cadi dxandíʼ rusihuinni ca diidxaʼ riʼ zabani xcaadxi binni de lade gueʼtuʼ despué la? Ndiʼ rusihuinni biaʼsi ni guníʼ Job ni chiguni Dios pur laa despué (Job 14:15). Ca «xpinni Cristu» o ca ungidu, maʼ nuucaʼ guibáʼ ora gunduuxeʼ Jesús «guiráʼ gobiernu ne guiráʼ autoridad ne poder». Óraque laaca zunduuxebe guendaguti, «últimu enemigu». Rihuinni dxichi guiráʼ ca ni guiasa de lade gueʼtuʼ para cheʼ guibáʼ qué ziuu dxi gáticaʼ. Yanna, ¿xi zazaaca né ca binni ni napa esperanza de guibani ndaaniʼ Guidxilayú riʼ yaʼ? (1 Cor. 15:23-26). Guiráʼ ca ni cabeza guibani lu Guidxilayú zanda guiniʼcaʼ casi guníʼ Pablo lu textu ni cadúʼndanu yannadxí. Cumu Biblia ná qué zanda cheʼ ca ni qué ñuni ni jneza guibáʼ la? ndiʼ rusihuinni ziasa binni de lade gueʼtuʼ para guibani lu Guidxilayú riʼ. w20.12 6, 7 párr. 18, 19

Zándaca guinabadiidxanu: «¿Ximodo zanda gannaʼ maʼ biʼniʼ perdonar Jehová naa yaʼ?». Pa huayúniluʼ pregunta riʼ, cusihuínniluʼ racaláʼdxiluʼ guni perdonar Jehová lii. ¿Xiñee yaʼ? Raca caadxi iza sicaríʼ bisiene revista La Atalaya ni: «Zándaca maʼ bicheʼnu chupa chonna biaje pur ti cosa cadi jneza bíninu ne huayaca nagana para laanu gusaananu xiixa cosa cadi jneza bíninu ante gunibiaʼnu Jehová». Laaca bizeeteʼ ni: «Cadi guireeluʼ gana ne cadi guiníʼ íqueluʼ maʼ qué zuni perdonar Jehová lii. Purtiʼ nga nga ni racalaʼdxiʼ Binidxabaʼ guiníʼ íqueluʼ. Pa nuuluʼ triste ne cadxíchineluʼ laca lii, nga rusihuinni cadi malu lii ne zanda guni perdonar Jehová lii. Guca humilde ne cadi gusaana de guni orarluʼ Jehová para guni perdonar lii, gacané lii gápaluʼ ti conciencia nayá ne para maʼ cadi gucheeluʼ sti biaje». Guiníʼ íquenu ni bizaaca apóstol Pablo. Bíʼnibe stale cosa malu ante gácabe xpinni Cristu. Ne qué ñaandaʼ ca ni laabe (1 Tim. 1:12-15). Peru bisisácabe ni biʼniʼ Jehová pur laabe ra bidii xiiñiʼ para gatiʼ pur laabe. Zacá qué niníʼ íquerube nápabe donda ne gudixhe íquebe gúnibe ni ná Jehová biaʼ dxi guibánibe. w20.11 27 párr. 14; 29 párr. 17

Riquiiñeʼ Binidxabaʼ stale tentación para gucaa laanu gucheʼnu. ¿Xi rúninu ora ridxaagalunu ca tentación ca yaʼ? Zándaca guiníʼ íquenu: «Laaca si qué zuni expulsárcabe naa pa guneʼ ndiʼ, purtiʼ cadi malu peʼ ni». Peru cadi jneza guiníʼ íquenu zacá. Jma galán guinabadiidxanu: «¿Ñee caquiiñeʼ Binidxabaʼ tentación riʼ para guni dividir ladxiduáʼ la? Pa guneʼ ni ná ca deseu malu ni gapaʼ, ¿ñee zuneʼ biideʼ lá Jehová la? ¿Ñee zuchiña ni chiguneʼ riʼ naa jma gaxha de Jehová la? o zuxhéleni naa de laabe?». Guiníʼ íquenu ca pregunta riʼ ne guinábanu Jehová gudii laanu sabiduría para guicábinu cani sin quítenu laca laanu. Pa gúninu ni, zapa ni laanu. Zacané ni laanu gucáʼnanu ca tentación ca tobi si tiru, cásica biʼniʼ Jesús ni ora guníʼ: «¡Biree de ra nuaaʼ, Binidxabaʼ!» (Mat. 4:10). Cadi guiaandaʼ laanu, cadi galán diʼ nga gaca dividir ladxidoʼno. w20.06 12, 13 párr. 16, 17

Laanu, ca xpinni Jehová, nácanu humilde ne rúninu ni ná ca ley stibe, purtiʼ riénenu nánnabe xii nga ni jma galán para laanu (Efes. 4:22-24). Ne humildad ca racané laanu gúninu ni nabe primeru ne cadi ni rábinu ne guiníʼ íquenu jma risaca xcaadxi que laanu. Ni zabeendunu nga ziuʼnu jma gaxha de Jehová ne de ca hermanu stinu (Filip. 2:3). Peru pa qué gápanu cuidadu, zanda gácanu orgulloso ne guyúbinu puru para laasinu casi ca binni nabeza ndaaniʼ guidxilayú stiʼ Binidxabaʼ riʼ. Zándaca ngaca nga ni bizaaca ca xpinni Cristu de primé siglu, nga runi bidii apóstol Pablo conseju riʼ laacabe: «Cayabeʼ cada tobi de laatu cadi guiníʼ ique jma risaca que biaʼ naca, sínuque gusihuinni riníʼ ique jneza». Pur ni guníʼ apóstol Pablo, biénebe risaca guiráʼ binni. Peru pa humilde laanu qué zaníʼ íquenu jma risácanu que xcaadxi ne zacané ni laanu cadi guiníʼ íquenu jma risácanu. w20.07 2 párr. 1, 2

Ca dxi bibani Asá biluxe paz ni guyuu ndaaniʼ guidxi Israel, purtiʼ bicaalú ti ejércitu etíope ni napa biaʼ ti millón soldadu guidxi que. Zérah, comandante stícabe, guyuu seguru zuni ganárcabe guidxi Judá. Peru napa Asá confianza Jehová. Ngue runi biʼniʼ rogarbe Jehová: «Gucané laadu, Jehová, Dios stidu, purtiʼ dxandipeʼ nápadu confianza lii ne pur laluʼ nga biúpadu para gucáʼludu guiráʼ binni riʼ» (2 Crón. 14:11). Neca napa ejércitu etíope doble de soldadu biaʼ napa ejércitu stiʼ Judá la? nanna Asá napa Jehová poder para gacané xquidxi. Ne qué nusaana Jehová laabe. Guizáʼ feu modo biniti ejércitu etíope que (2 Crón. 14:8-13). Neca qué gánnanu xi peʼ guizaaca cada xpinni Dios la? ni nánnanu nga zedandá dxi zaluxe tiempu de paz ni zándaca nápanu tiempu riʼ. Cadi guiaandaʼ laanu maca guníʼ Jesús «zaca nanalaʼdxiʼ guiráʼ guidxi» ca discípulo stiʼ (Mat. 24:9). w20.09 17, 18 párr. 14-16

Guirutiʼ riuulaʼdxiʼ cuʼdícabe laa. Peru, pa chuʼ xhaatanu xizaa ora cuʼ diʼ ca enemigu stinu laanu la? zanda guireʼnu gana (Prov. 24:10). Yanna, ¿xi zanda gúninu ora gucaalúcabe laanu yaʼ? Zanda gúninu cásica biʼniʼ apóstol Pablo ne guiéchenu ora cuʼdícabe laanu. ¿Xiñee yaʼ? Purtiʼ ora cuʼdícabe ne gucaalúcabe laanu rihuinni dxandíʼ xpinni Cristu laanu (1 Ped. 4:14). Guníʼ Jesús zazananda binni ca xpinni (Juan 15:18-20). Ne nga peʼ nga ni bizaaca lu primé siglu. Guzéʼtenu caadxi ejemplu, para ca binni ni yenanda cultura stiʼ ca griegu la? qué ganna ca xpinni Cristu gastiʼ ne qué risácacaʼ. Ne para ca judíu qué risácacabe ne qué nizácabe scuela, casi guníʼcabe de apóstol Pedro ne Juan (Hech. 4:13). Stale binni guníʼ ique débil ca xpinni Cristu, purtiʼ qué riuucaʼ lu política nin lu ejércitu, ne bíʼnicaʼ menu laacabe. Peru ¿ñee bidiicabe lugar nucueeza ca ndiʼ laacabe la? Coʼ. w20.07 14, 15 párr. 3, 4

Nabé gunnaxhii apóstol Juan ca hermanu stiʼ ne gucalaʼdxiʼ ñaca fe stícabe naguidxi. Ne bisihuínnibe ni pur guionnaʼ carta ni bicaabe pur espíritu santu. Riéchenu stale ora ránnanu ca hombre ne ca gunaa ni cheʼ guibáʼ para guni mandarné Cristu laaca nácacaʼ casi apóstol Juan (1 Juan 2:27). Gusisácanu ca conseju ni bidiibe. Quixhe íquenu sanu lu ni dxandíʼ ne guzúʼbanu stiidxaʼ Jehová lu guiráʼ ni gúninu. Guni estudiarnu Stiidxaʼ Dios ne gápanu confianza ni cá luni. Guquídxinu fe ni nápanu Jesús. Gucáʼnanu modo riníʼ ique binni ne ni riníʼ ca apóstata. Cadi guiníʼ íquenu zanda gúninu cosa malu ne gúninu ni ná Jehová ne cadi guiábanu lu pecadu. Gudiʼnu lugar gacané ca ley stiʼ Jehová laanu. Ne gacanenu ca hermanu stinu cadi guixélecaʼ de Jehová ora guni perdonarnu ca ni guni laanu xiixa ne gacanenu ca ni caquiiñeʼ tu gacané laacaʼ. Nga runi, intiica prueba tídinu, qué zusaananu de sanu lu ni dxandíʼ. w20.07 24, 25 párr. 15-17

Nadxii ne rusisaca Jehová cada tobi de ca xpinni ni nuu ndaaniʼ congregación. Neca gadxé gadxé dxiiñaʼ rúninu, guiranu risácanu ne caquiiñeʼ gacanésaanu. Gucané apóstol Pablo laanu guiénenu xiñee rizaaca ni bizéʼtenu riʼ. Laa guníʼ qué zanda guidúʼyanu sti xpinni Jehová ne guiníʼ íquenu «Cadi caquiiñeʼ diaʼ lii» (1 Cor. 12:21). Para chuʼ paz ndaaniʼ congregación la? caquiiñeʼ gusisácanu ca hermanu ne gacanésaanu (Efes. 4:16). Ora tobi si nuu ca hermanu la? guiracaʼ runi sentircaʼ nadxiicabe laacaʼ ne riuu congregación ca naguidxi. Guiráʼ ca ancianu raca nombrar pur espíritu santu stiʼ Jehová, peru cada tobi napa gadxé gadxé gracia ne habilidad (1 Cor. 12:17). Zándaca nuu de laacaʼ deruʼ guca nombrarcaʼ ne qué gápacaʼ stale experiencia, ne xcaadxi maʼ qué randa rúnicaʼ stale cosa purtiʼ maʼ huaniisicaʼ o maʼ huaracaʼ. Peru nin ti ancianu cadi naquiiñeʼ guyadxí sti ancianu ne guiníʼ ique «Cadi caquiiñeʼ diaʼ lii». Ni jma jneza gúnicabe nga chinándacabe conseju bidii apóstol Pablo ni zeeda lu Romanos 12:10. w20.08 26 párr. 1, 2; 27 párr. 4

Riquiiñeʼ Jehová xquidxi ni nuu lu Guidxilayú riʼ para gacané laanu sanu lu neza ni ziné laanu lu guendanabani. Ora rusiene xquidxi Dios xiixa enseñanza nacubi o xiixa tema ni cusiene naquiiñeʼ gaca ti xpinni Cristu nayá nezalú Dios, naquiiñeʼ chinándanu ni. Peru ¿xi rúninu ora ruchaacabe xiixa cosa ni maʼ biaʼnu gúninu yaʼ? Casi pa guidoo Yoo stiʼ Reinu ra riuunu. Ti cosa ni zacané laanu para cadi gusaana de chuʼnu nayecheʼ nga guietenaláʼdxinu cayúninu dxiiñaʼ para Jehová ne laabe nga cayuni dirigirbe xquídxibe (Col. 3:23, 24). Bisaana rey David ti ejemplu galán para laanu purtiʼ bidii bueltu para cuí templu stiʼ Dios. Sicaríʼ guniʼbe: «¿Tu nacaʼ naa ne tu naca ca binni xquidxeʼ para chuʼdu lugar ra gudiʼdu ofrenda de guidubi ladxidoʼdo yaʼ? Purtiʼ de lii zeeda guiráʼ ni, ne de ni rudiiluʼ laadu nga maʼ bidiʼdu lii» (1 Crón. 29:14). Ora rudiʼnu donación rudiʼnu Jehová de ni maʼ bidii laanu. Neca zacá, rudii Jehová xquixe peʼ laanu pur tiempu, stipa ne ca cosa ni rudiʼnu para gaca dxiiñaʼ ni racaláʼdxibe gúninu (2 Cor. 9:7). w20.11 22, 23 párr. 14-16

Pa cayacanenu binni gaca testigu stiʼ Jehová o coʼ, cadi nga diʼ nga ni rusihuinni pa cabeendunu ni galán lu dxiiñaʼ stinu (Luc. 8:11-15). Pa qué gusaana de guni predicarnu ca noticia galán ne gusíʼdinu xcaadxi binni, ziecheʼ Jehová pur dxiiñaʼ stinu. ¿Xiñee yaʼ? Purtiʼ cuzúʼbanu stiidxabe ne stiidxaʼ Xiiñibe (Mar. 13:10; Hech. 5:28, 29). Laaca nápanu sti razón para cadi gusaana de guni predicarnu tiempu riʼ: jma maʼ zedadxiña dxi guinitilú guidxilayú malu riʼ. Qué gápapenu stale tiempu para gúninu dxiiñaʼ riʼ ne gulanu xpida binni. Cadi cuézaluʼ dede ora maʼ qué gápaluʼ guendanagana para guzulú gúniluʼ dxiiñaʼ nabé risaca riʼ. Yanna nga tiempu para gucaaluʼ lii gúniluʼ xhiiñaʼ Dios jma jneza, para guiziidiluʼ jma de lu Biblia, para gápaluʼ valor ne para cadi guireeluʼ gana. Guyuu lade xhono millón pescador de binni ni nuu lu guidubi Guidxilayú, ne zuni sentirluʼ «guendanayecheʼ stiʼ Jehová» (Neh. 8:10; Luc 5:10). Gudixhe ique gúniluʼ dxiiñaʼ riʼ biaʼ gándatiʼ dede ora guiníʼ Jehová maʼ biluxe ni. w20.09 7 párr. 18-20

Cadi naquiiñeʼ chuuláʼdxinu gápanu stale cosa material ni zanda cueechú laanu. Zanda gusirá «poder stiʼ bidxichi» guendarannaxhii ni nápanu Jehová, maʼ cadi gusisácanu Stiidxabe ne maʼ cadi guinínenu binni de laani (Mat. 13:22). Pa racaláʼdxinu gápanu ca cosa ni maʼ bidii Jehová laanu la? caquiiñeʼ gúninu xiixa nagueendaca ora guidúʼyanu zedadxiña ti peligru. Naquiiñeʼ gánnanu xi gúninu pa málasi guiree xiixa información stiʼ ca apóstata o xiixa cosa inmoral o ni napa violencia ora caquiiñenu Internet, cadúʼyanu ti película o ti programa lu televisión. Pa nuunu listu, zúninu xiixa nagueendaca para cadi gusaana de gaca xhamígunu Jehová ne chuʼnu nayá nezalube (Sal. 101:3; 1 Tim. 4:12). Laanu ca xpinni Cristu, caquiiñeʼ gápanu ca cosa galán ni maʼ bidii Jehová laanu: ca ni dxandíʼ ni zeeda lu Biblia ne privilegiu de gusíʼdinu ni xcaadxi binni. Pa gúninu ni la? Qué zuchiiñaʼ conciencia stinu laanu, zabáninu galán ne ziuʼnu nayecheʼ ora gacanenu binni gunibiáʼ Jehová. w20.09 30 párr. 16-19

Pa maʼ guyuunísanu, maʼ bisihuínninu nezalú binni nápanu fe Jehová ne nuunu dispuestu gúninu ni ná organización stiʼ. Tiempu riʼ, rihuinni ximodo naca Jehová pur modo cayuni dirigir Jehová organización stiʼ, xi naguixhe ique guni ne gunáʼ nga ca ley stiʼ. Rihuinni chonna de ca cualidad stiʼ Jehová lu organización stiʼ. Primé, «biaʼca risaca guiráʼ binni» nezalube (Hech. 10:34). Cumu nadxii Jehová binni, bidiibe Xiiñibe gatiʼ pur guiráʼ (Juan 3:16; 1 Tim. 2:6). Para gacané guendaguti stiʼ Jesucristu stale binni la? riquiiñeʼ Jehová xquidxi para chinecaʼ ca noticia galán ra nuu binni ni racalaʼdxiʼ gunadiaga ni. Guiropa, Jehová la? «cadi ti Dios de desorden laa, sínuque ti Dios de paz» (1 Cor. 14:33, 40). Nga runi, naquiiñeʼ gaca ca xpínnibe ordenadu ne chuʼcaʼ tobi si. Guionna, Jehová nga Instructor ni jma nanna gusiidiʼ (Is. 30:21). Pur nga la? rusiidiʼ organización stibe ni ná Stiidxabe, ne rúnicaʼ ni ndaaniʼ congregación ne ora runi predicarcaʼ. w20.10 20 párr. 1-3