Julio

Caquiiñeʼ gaca xhamígunu Jesús para guicabi Jehová ca oración stinu. Ndiʼ riníʼ cadi caquiiñeʼ si guininu «de lu lá Jesús» cada guilúxenu oración stinu. Caquiiñeʼ guiénenu ximodo riquiiñeʼ Jehová laabe para guicabi ca oración stinu. Sicaríʼ gudxi Jesús ca apóstol stiʼ: «Intiica cosa ni guinábatu lu laʼyaʼ, zuneʼ ni» (Juan 14:13). Jehová nga ni rucaadiaga ne ricabi ca oración stinu, peru maʼ bidiibe Jesús autoridad para guni ni maʼ gudixhe íquebe. Peru ante guicábibe laanu, ruuyabe pa maʼ zinándanu ca conseju stiʼ Jesús, tobi de laani ná: «Pa guni perdonartu ni gucheené binni laatu, laaca zuni perdonar Bixhózetu ni nuu guibáʼ laatu. Peru pa qué guni perdonartu ni gucheené binni laatu, laaca qué zuni perdonar Bixhózetu ni gucheetu» (Mat. 6:14, 15). ¿Cadi dxandíʼ caquiiñeʼ gácanu nachaʼhuiʼ né sti binni cásica nachaʼhuiʼ Jehová ne Jesús né laanu la? w20.04 22 párr. 6

Biiyaʼ apóstol Pablo xi riuulaʼdxiʼ ca binni ni bicaadiaga laa ne guníʼnebe laacaʼ de ni caquiiñecaʼ. Guzéʼtenu ti ejemplu, ca binni de Listra ni biʼniʼ predicarbe zándaca huaxiéʼ o qué lica gánnacaʼ de Biblia. Ngue runi guniʼné Pablo laacabe de ca cosa ni maca runibiáʼcabe, guníʼnebe laacaʼ de ora riasa stale cosecha ne ximodo guibánicaʼ nayecheʼ. Biquiiñebe ejemplu ne diidxaʼ ni ganda guiénecaʼ. Gúninu stipa gánnanu xi jma riuulaʼdxiʼ ca binni nabeza lu territorio stinu ne guinínenu laacabe de laani. ¿Ximodo gánnanu xi riuulaʼdxiʼ ti binni ante guidxíñanu laa o ante guidxíñanu ra lidxi yaʼ? Pur ni guidúʼyanu. Zándaca cusiabe ra lídxibe, cayuundabe periódicu o cayuni chaahuibe moto stibe. Pa guidúʼyanu zanda la? guzulú guinínenu laabe de ni cayúnibe (Juan 4:7). Dede ni nacu binni ca zanda gacané laanu gánnanu padé laabe, xi dxiiñaʼ rúnibe ne xi equipo favorito stibe. w20.04 11 párr. 11, 12

Pur guendahuará ni runibiáʼcabe casi ansiedad, stale hermanu nabé ridxibi o qué runi sentircaʼ galán ora nuucaʼ lade stale binni, neca zacá qué riaadxacabe ca reunión ne ca asamblea. Neca raca nagana para laacabe guiniʼnécabe tuuxa ni qué runibiáʼcabe peru riguni predicárcabe. Pa zacá runi sentirnu, cadi laasinu nga rizaacanu zacá. Stale hermanu ridiʼdiʼ ca guendanagana ni bizéʼtenu riʼ. Peru cadi guiaandaʼ laanu rusisaca Jehová stipa ni rúninu de guidubi ladxidoʼno. Cumu cadi cusaana de gúninu ni nabe la? nga rusihuinni caguube ndaayaʼ laanu ne cudiibe laanu stipa ni caquiiñenu (Filip. 4:6, 7). Laaca cadi naquiiñeʼ guiaandaʼ laanu pa gúninu ni ná Jehová neca nápanu intiica guendahuará zusiéchenu laa. Stale de laanu nápanu xiixa guendahuará ni zanda gucueeza laanu, peru neca zacá cayuni huantarnu (2 Cor. 4:16). Cumu cayacané Jehová laanu la? cuxóʼñenu lu carrera riʼ dede ra guilúxenu ni. w20.04 31 párr. 20, 21

Pa guiduʼyaʼ chaahuinu ximodo bizáʼ Jehová Guidxilayú, zudiʼnu cuenta pabiáʼ nuu xpiaanibe (Heb. 3:4). Lu Guidxilayú si stinu nga zanda guidxela binni guiráʼ ni caquiiñeʼ para guibani. Zanda guchaaganu Guidxilayú stinu ni nuu lu universu casi ti barcu ra zeʼ stale binni. Peru maʼ gadxé nga ti barcu ne Guidxilayú stinu. ¿Xiñee yaʼ? Guzéʼtenu ti ejemplu, ¿pabiáʼ tiempu ñanda nibani binni ni zeʼ lu ti barcu pa ñaca laacaʼ ñuni producircaʼ oxígeno, guendaró ne nisa sticaʼ, ne sin nusáʼbicaʼ guixi sticaʼ yaʼ? ¿Cadi dxandíʼ nagueenda ñáticabe la? Peru lu Guidxilayú riʼ nuu stale mil millón de binni, maniʼ ne yaga. Ne runi producir ni oxígeno, guendaró ne nisa ni caquiiñenu. Ne qué rirá diʼ cani. Ne guiráʼ guixi ni ribee binni riaana cani lu Guidxilayú. Peru neca zacá, sicarú ruʼ Guidxilayú stinu ne zanda guibani binni luni. ¿Xiñee yaʼ? Purtiʼ bizáʼ Jehová Guidxilayú riʼ para ganda iquiiñenu guiráʼ ni runi producir ni jma de ti biaje. w20.05 20 párr. 3, 4

Ni cayabi Binidxabaʼ Eva nga cusiguii Jehová. Zacá nga beeda gaca Binidxabaʼ diablu, tobi ni riníʼ mal de tuuxa para guniná laa. Zaqué nga gudxite Binidxabaʼ Eva ne biʼniʼ cré laabe (1 Tim. 2:14). Jma biʼniʼ crebe Binidxabaʼ que Jehová ne ngue bicaa laabe guicaabe decisión jma feu: maʼ qué nuzuubabe stiidxaʼ Dios ne gudobe cuananaxhi ni gudxi Dios laabe cadi gobe. Despué, laaca bidiibe ni Adán (Gén. 3:6). Guiníʼ íquenu xi ñanda nicabi Eva Binidxabaʼ. Ñanda ñábibe laa ca diidxaʼ riʼ: «Qué runebiaʼyaʼ lii, peru runebiaʼyaʼ Bixhozeʼ Jehová. Nadxieeʼ laa ne napaʼ confianza laa. Maʼ bidiibe naa ne Adán guiráʼ xixé ni nápadu. ¿Paraa bireeluʼ para guiniʼluʼ mal de laabe pue? ¡Biree de luaʼ!». Nanna pabiáʼ ñecheʼ Jehová pa nusihuinni xiiñiʼ nadxii laa ne qué zusaana laabe yaʼ (Prov. 27:11). Peru nin laabe ne nin Adán cadi dxandíʼ nadxiicaʼ Jehová ne qué nusihuínnicaʼ qué zusaanacaʼ laabe. Ngue runi qué ñuni defendércabe lá Bixhózecabe. w20.06 4 párr. 10, 11

Caquiiñeʼ gudiʼnu xquixe peʼ ca hermana stinu pur guiráʼ ni rúnicaʼ lu xhiiñaʼ Jehová. Caadxi de ca dxiiñaʼ ni rúnicabe nga racanécabe lu construcción ne rudiicabe mantenimientu ca edificiu stiʼ organización, runi predicárcabe lu sti idioma ne rúnicabe dxiiñaʼ de voluntaria Betel. Laaca racanécabe ora rizaaca ti desgracia ne runi traducírcabe ca publicación, nácacabe precursora o misionera. Laaca nuu hermana ni maʼ bichaganáʼ ni cayacané xheelaʼ para ganda guni tender ca responsabilidad ni napa ndaaniʼ congregación ne ndaaniʼ organización stiʼ Dios. Pa qué ñacané ca hermana riʼ xheelacaʼ, ca hombre ni zeeda gaca casi ti regalu, qué ñanda ñuni ca hermanu riʼ xhiiñacaʼ (Efes. 4:8). Ca buen ancianu nánnacaʼ naca ca hermana ca casi «ti ejércitu naroʼbaʼ» ni nuu dispuestu guni dxiiñaʼ, ne stale de ca hermana riʼ guizáʼ nánnacaʼ guni predicarcaʼ ca noticia galán. Laaca nanna ca ancianu zanda gacané ca hermana fiel riʼ ca hermana ni jma nahuiiniʼ ora nápacaʼ guendanagana (Tito 2:3-5). Ndiʼ rusihuinni caquiiñeʼ gudiʼnu xquixe peʼ ca hermana riʼ ne gannaxhiinu laacaʼ. w20.09 23, 24 párr. 13, 14

Qué rusiaandaʼ diʼ Jehová ca xpinni neca bixélecaʼ de laabe ti tiempu ne qué rusiaandabe guiráʼ ni maʼ bíʼnicaʼ pur laabe (Heb. 6:10). Biquiiñeʼ profeta Isaías ti ilustración nabé galán para gusihuinni pabiáʼ nadxii ne rapa Jehová ca xpinni. Sicaríʼ guniʼbe: «Zápabe ca dendxuhuiiniʼ stibe cásica runi ti pastor. Ne nabe zutópabe ca dendxuhuiiniʼ, ne ndaaniʼ nabe zinebe laacaʼ» (Is. 40:11). Cumu Jehová nga pastor chaʼhuiʼ stinu, ¿ximodo runi sentirbe ora rixeleʼ ti dendxuʼ de ra nuu ca xcaadxi dendxuʼ stibe yaʼ? Biluíʼ Jesús ca discípulo stiʼ gunáʼ nga ca sentimientu stiʼ Jehová ora gúdxibe laacaʼ: «¿Xi rábitu yaʼ? Pa napa ti hombre 100 dendxuʼ ne guiniti tobi de laacame, ¿cadi dxandíʼ zusaanabe 99 que lu ca dani ne ziyúbibe ni cananiti que la? Ne pa guidxélabe laame, dxandíʼ peʼ cayabeʼ laatu jma ziéchebe pur laame que pur 99 ni qué niniti que» (Mat. 18:12, 13). w20.06 19, 20 párr. 8, 9

Para laanu la? ti privilegiu nga gúninu ni ná Jehová de guidubi ladxidoʼno (Sal. 27:4; 84:10). Galán ora riguixhe ique ti hermanu guni jma ndaaniʼ xquidxi Jehová. Peru pa maʼ gucuaabe ti responsabilidad la? cadi naquiiñeʼ gudxiibabe laca laabe (Luc. 17:7-10). Ni jma naquiiñeʼ guicá íquebe nga gacanebe xcaadxi ne gácabe humilde ora gúnibe ni (2 Cor. 12:15). Biblia ruzeeteʼ de binni ni guníʼ ique jma risaca que xcaadxi. Guzéʼtenu caadxi de laacabe. Guca nagana para Diótrefes gudii cuenta nuu cosa ni qué zanda guni ne «riuulaʼdxiʼ gaca xaíque lade ca hermanu» (3 Juan 9). Bisihuinni Uzías naca orgulloso ora gucalaʼdxiʼ ñuni ti dxiiñaʼ ni qué ñuni mandar Jehová laa guni (2 Crón. 26:16-21). Cumu guizáʼ nexhená Absalón la? guyuu ñuni ganar cariñu stiʼ guidxi que purtiʼ nuu gaca rey (2 Sam. 15:2-6). Casi rihuinni lu ca relatu riʼ, qué riuulaʼdxiʼ Jehová ora ruyubi binni gusisácacabe laacaʼ (Prov. 25:27). Ca binni orgulloso ne ca ni rachelú gapa jma la? qué ribeenducaʼ ni galán (Prov. 16:18). w20.07 4 párr. 7, 8

Nuu familia maʼ yendeza sti guidxi purtiʼ cuxooñecaʼ de xquídxicaʼ o purtiʼ cuyúbicaʼ dxiiñaʼ. Zándaca guseendaʼ ca hermanu riʼ xiiñicaʼ scuela lu idioma ni riníʼ binni lugar ca ne laaca napa xidé guiziidicabe idioma ca para guidxélacabe dxiiñaʼ. Peru guiníʼ íquenu nuu ti congregación o ti grupu lu idioma ni riníʼcabe lugar que. ¿Xi congregación naquiiñeʼ chécabe yaʼ? ¿Ra riníʼcabe idioma stiʼ guidxi ca la? o ni nuu lu stiidxacabe? Ca ni naca xaíque ndaaniʼ familia nga naquiiñeʼ cuí xi congregación checaʼ. Peru naquiiñeʼ gúʼyacaʼ xii nga ni jma galán para familia sticaʼ. Cumu cada hermanu nga naquiiñeʼ cuí xi guni la? naquiiñeʼ guni respetarnu decisión ni guicaa ca ni naca xaíque ndaaniʼ familia. Cadi guiníʼ íquenu cadi jneza ni gudixhe íquecabe ne guidxaagalunu laacabe né guendanayecheʼ ndaaniʼ congregación (Rom. 15:7). w20.08 30 párr. 17, 18

Pa racaláʼdxinu gápanu poder stiʼ Jehová la? cadi naquiiñeʼ guiníʼ íquenu risácanu purtiʼ nazaacanu, purtiʼ guyuunu scuela, pur cultura stinu ne purtiʼ nápanu bueltu. Purtiʼ cadi ca cosa riʼ nga runi laanu ti binni risaca nezalú Jehová. Ne ndaaniʼ xquidxi Dios, chupa chonna si de laanu nga nuu xpiaaniʼ para binni guidxilayú, chupa chonna si de laanu napa ti puestu ni rudii poder binni ne chupa chonna si de laanu zeeda de familia risaca (1 Cor. 1:26). Nga runi, pa cadi nazaacanu, pa qué ñuunu scuela, pa gadxé cultura stinu ne pa qué gápanu bueltu, cadi guiníʼ íquenu qué zanda gúninu ni ná Jehová, sínuque guidúʼyanu cani casi ti oportunidad para gudiʼnu cuenta ximodo riquiiñeʼ Jehová poder stiʼ para gacané laanu. Guzéʼtenu ti ejemplu, pa gacalaʼdxiʼ tuuxa gucaa laanu guiníʼ íquenu cadi dxandíʼ ni runi crenu ne guituí lunu, guinábanu Jehová gudii valor laanu para guni defendernu ni runi crenu (Efes. 6:19, 20). O pa nápanu ti guendahuará malu, guinábanu Jehová stipa para cadi gusaana de gúninu ni ná. Cada biaje guidúʼyanu modo racanebe laanu la? jma zápanu fe laabe ne jma zápanu stipa. w20.07 16 párr. 9

Pa racaláʼdxinu quíxhenu primé Reinu lu xquendanabáninu, caquiiñeʼ chinándanu ejemplu stiʼ Abrahán, purtiʼ bidii sacrificiu Dios para gusiecheʼ laabe (Mar. 10:28-30; Heb. 11:8-10). Cadi guiníʼ íquenu qué zápanu guendanagana. Dede ca ni rudii xquendanabani Jehová zadxaagalucaʼ guendanagana (Sant. 1:2; 1 Ped. 5:9). Yanna nga jma naquiiñeʼ guicá íquenu ni chiguicaanu despué. Ca cosa ni cazaaca lu ca últimu dxi riʼ cusihuínnicani maʼ nabáninu ra mayaca guiluxe ca últimu dxi. Lade guiráʼ ca ndaayaʼ ni chigueedané Reinu stiʼ Dios nga guidúʼyanu ca binni ni nadxiinu guibánicaʼ sti biaje. Ne óraque zusibani Jehová Abrahán ne familia stiʼ raríʼ ndaaniʼ Guidxilayú pur gúpacaʼ fe ne paciencia. ¿Ñee ziuuluʼ racá para guidxaagaluluʼ laacabe la? Zanda chuʼluʼ racá, pa cásica Abrahán, chuʼluʼ dispuestu gúniluʼ sacrificiu pur Reinu stiʼ Dios, pa gápaluʼ fe neca guidxaagaluluʼ guendanagana ne pa gápaluʼ paciencia zuni cumplir Jehová guiráʼ ni maʼ guníʼ (Miq. 7:7). w20.08 5, 6 párr. 13, 14; 7 párr. 17

Nánnanu pa guuti ca enemigu stinu laanu, zusibani Jehová laanu sti biaje. Nanna dxíchinu qué zanda gúnicabe xiixa ni guxheleʼ laanu de Dios stinu (Rom. 8:35-39). Rihuinni dxichi pabiáʼ nuu xpiaaniʼ Jehová ra bidii laanu ti esperanza de guiasa ca ni maʼ guti. Nga runi, qué ridxíbinu ca xpinni Binidxabaʼ ora guiniʼcaʼ zuuticaʼ laanu pa qué gúninu ni nacaʼ. Ne laaca rudii Jehová valor laanu para cadi gusaananu laa. Pa guiníʼ ca enemigu stinu zuuticaʼ laanu, ¿ñee nápanu confianza zusibani Jehová laanu sti biaje la? Para gánnanu ni, guiníʼ íquenu ndiʼ: «¿Ñee rusihuinni ca decisión ni ricaaʼ guiráʼ dxi napaʼ confianza Jehová la?» (Luc. 16:10). «¿Ñee rusihuinneʼ pur modo nabaneʼ napaʼ confianza zudii Jehová naa guiráʼ ni caquiiñeʼ pa guyubeʼ Reinu primé lu xquendanabaneʼ la?» (Mat. 6:31-33). Pa rusihuinni respuesta stinu nápanu confianza Jehová, zacané ni laanu gudxíʼlunu intiica prueba guidxaagalunu (Prov. 3:5, 6). w20.08 17, 18 párr. 15, 16

Laanu ca xpinni Cristu, laaca naquiiñeʼ guizíʼdinu iquiiñenu Stiidxaʼ Dios. Ora riuunu reunión rizíʼdinu caadxi modo zanda gúninu ni. Peru pa racaláʼdxinu gacanenu binni gudii cuenta pabiáʼ risaca ca ni dxandíʼ rusiidiʼ Biblia la? naquiiñeʼ gápanu ti programa personal para guni estudiarnu Biblia. Caquiiñeʼ guidúʼndanu Stiidxaʼ Dios para iguidxi fe stinu. Peru cadi naquiiñeʼ guidúʼndasinu ni. Caquiiñeʼ guni meditarnu ni ná ca versículo stini ne guni investigarnu xi maʼ bisiene ca publicación stinu de laani para guiénenu ni ne ganda gusiénenu ni binni (1 Tim. 4:13-15). Zacá ziuʼnu listu para iquiiñenu Biblia ne gusíʼdinu xcaadxi. Peru cadi naquiiñeʼ guiduʼndanésinu laacabe ti textu. Racaláʼdxinu guiénecabe ni ne gúʼyacabe ximodo zacané ni laacabe. Nga runi, pa guidúʼndanu Biblia guiráʼ dxi, zusíʼdinu jma jneza (2 Tim. 3:16, 17). w20.09 28 párr. 12

Ti cosa ni zacané laanu guicá íquenu guni predicarnu nga guiníʼ íquenu guiráʼ ni runi Jehová para gacané laanu. Guzéʼtenu ti ejemplu, rudiibe laanu stale guendaró espiritual: publicación ni raca imprimir ne ni nuu lu Internet, grabación de audio ne videu, ne programa ni nuu lu JW Broadcasting®. Guiníʼ íquenu ndiʼ: sitiu oficial de Internet stinu nuuni lu jma de ti mil idioma (Mat. 24:45-47). Sti cosa ni zacané laanu guicá íquenu guni predicarnu nga chinándanu ejemplu stiʼ Jesús. Qué nudiibe lugar nucueeza xiixa laabe para guni predicarbe (Juan 18:37). Qué ñábabe lu trampa stiʼ Binidxabaʼ ora gudxi laabe zudii laabe «guiráʼ guidxi nuu lu guidxilayú ne guiráʼ cosa risaca stícani» nin ora gucalaʼdxiʼ binni ñuni laabe rey (Mat. 4:8, 9; Juan 6:15). Laaca qué nuyúbibe gápabe stale cosa risaca ne qué nidxíbibe ora bicaalú binni laabe (Luc. 9:58; Juan 8:59). Ora tidiʼ fe stinu prueba, ni zacané laanu cadi gusaana de guni predicarnu nga chinándanu conseju bidii Pablo ni riete lu textu ni cadúʼndanu yannadxí. w20.09 9, 10 párr. 6, 7

Guizáʼ riéchenu purtiʼ nuu stale hermana ni cayuni dxiiñaʼ nadipaʼ ndaaniʼ congregación. Runi participarcaʼ lu reunión, runi predicarcaʼ ne rizaaláʼdxicaʼ ca hermanu sticaʼ. Ne nuu de laacaʼ racané lu mantenimientu stiʼ ca Yoo stiʼ Reinu. Peru laaca ridxaagalúcabe guendanagana. Nuu de laacabe cayápacabe bixhózecabe ni maʼ huaniisi. Xcaadxi cayuni huantar purtiʼ cucaalú familia stiʼ laa. Ne xcaadxi cusiniisi ca xiiñiʼ stubi ne cayúnicaʼ stipa para gudiicaʼ ni caquiiñecabe. ¿Xiñee caquiiñeʼ gúninu stipa para gacanenu ca hermana stinu yaʼ? Purtiʼ cadi guiráʼ binni runi respetar ca gunaa. Ne lu Biblia ná caquiiñeʼ gacanenu laacabe. Guzéʼtenu ti ejemplu, gunabaʼ apóstol Pablo ca hermanu de congregación ni nuu Roma guidxaagalucaʼ hermana Febe ne gacanecaʼ laabe né ni caquiiñebe (Rom. 16:1, 2). Guyuu ti tiempu biʼniʼ Pablo menu ca gunaa purtiʼ zaqué cultura stiʼ. Peru dxi gúcabe xpinni Cristu, yenándabe ejemplu stiʼ Jesús, gúcabe nachaʼhuiʼ ne biʼniʼ respetarbe ca gunaa. w20.09 20 párr. 1, 2

Naquiiñeʼ gacanenu ca estudiante stinu chuuláʼdxicaʼ guni predicarcaʼ ca noticia galán, zándaca naquiiñeʼ gúninu estudiante stinu ca pregunta riʼ: «¿Ximodo maʼ bichaa xquendanabániluʼ dede dxi caziidiluʼ de Jehová? ¿Ñee rábiluʼ caquiiñeʼ gunibiáʼ xcaadxi binni de Reinu stiʼ Dios la? ¿Xi zanda gúniluʼ para gacaneluʼ laacabe?» (Prov. 3:27; Mat. 9:37, 38). Cadi guiaandaʼ laanu guníʼ Jesús gusíʼdinu xcaadxi guni guiráʼ ni biʼniʼ mandar. Lade cani nuu guiropaʼ mandamientu jma risaca, gannaxhiinu Dios ne prójimo stinu (Mat. 22:37-39). Guendarannaxhii ca rucaa laanu guni predicarnu binni. Normal nga guidxibi ca estudiante guni predicarcaʼ, peru zanda gábinu laacabe zacané Jehová laacabe para cadi guidxíbicabe binni (Sal. 18:1-3; Prov. 29:25). w20.11 3 párr. 6-8

Ti modo zanda gaca prepararnu nga gábinu Jehová xi caquiiñeʼ estudiante stinu. Guinábanu laabe gacanebe laanu iquiiñenu Biblia para chindanu ndaaniʼ ladxidóʼ estudiante stinu. Cadi guiaandaʼ laanu ni racaláʼdxinu nga gacanenu laabe chuʼnísabe. Laaca naquiiñeʼ guiníʼnebe ne gucaadiágabe Jehová. Ti modo zanda gucaadiágabe Jehová nga gúʼndabe Biblia guiráʼ dxi (Jos. 1:8; Sal. 1:1-3). Cuʼnu gana estudiante stinu guni orar Jehová guiráʼ dxi. Guni orarnu ora guzulunu ne ora guilúxenu gudiʼnu estudiu, ne guininu lá estudiante stinu lu oración ca. Zacá zaziidibe guni orarbe de guidubi ladxidoʼbe ne guiníʼnebe Jehová lu lá Jesucristu (Mat. 6:9; Juan 15:16). Guiníʼ íquenu pabiáʼ zadxíñabe Jehová ora gucaadiágabe laa ra gúʼndabe Biblia guiráʼ dxi ne ora guiníʼnebe laa lu oración (Sant. 4:8). w20.10 8 párr. 8; 9 párr. 10, 11

Guyuu orden ne paz ndaaniʼ ca congregación ni guyuu lu primé siglu, ne ngaca nga ni rihuinni ndaaniʼ organización stiʼ Jehová tiempu riʼ (Hech. 16:4, 5). Guzéʼtenu ti ejemplu, pa ñuunu reunión sti congregación o ndaaniʼ sti guidxi ne cayaca estudiar Torre stiʼ ni rapa, ñánnanu ximodo raca estudiar ni ne xi artículo chiguiuunda, ne laaca ñuni sentirnu galán. Nuu xquidxi Dios tobi si purtiʼ cayacané espíritu santu laanu (Sof. 3:9, nota). ¿Xi zanda gúninu yaʼ? Racalaʼdxiʼ Jehová chuʼnu «tobi si casi ná espíritu ne cadi» tíndenu. Nga runi, guiníʼ íquenu ca pregunta riʼ: «¿Ñee runeʼ stipa para chuʼ paz ndaaniʼ congregación ne chuʼ ca hermanu tobi si la? ¿Ñee ruzuubaʼ stiidxaʼ ca hermanu ni zániru ndaaniʼ congregación la? ¿Ñee napa ca hermanu confianza naa, jmaruʼ si pa napaʼ ti responsabilidad ndaaniʼ congregación la? ¿Ñee puntual naa, ruuyaʼ xi caquiiñeʼ xcaadxi ne nuaaʼ dispuestu gacaniáʼ la?» (Sant. 3:17). Pa gudiʼnu cuenta cayaadxaruʼ gúninu caadxi de ca ni bizéʼtenu riʼ la? guinábanu Jehová gudii laanu espíritu santu stiʼ. Pa gudiʼnu lugar guchaa espíritu santu modo laanu ne ca ni rúninu, jma zannaxhii ne zusisaca ca hermanu laanu. w20.10 23 párr. 12, 13

Zanda gaca Stiidxaʼ Dios casi ti espeju para laanu (Sant. 1:23-25). Guiráʼ siadóʼ, ruuyadxí binni laa lu espeju ante guiree de ra lidxi, zacá ruuyaʼ paraa naquiiñeʼ quixhe chaahuiʼ ante guʼyaʼ xcaadxi laa. Zacagá rizaaca ora ridúʼndanu Biblia guiráʼ dxi, racaneni laanu guidúʼyanu pa naquiiñeʼ guchaʼnu modo riníʼ íquenu o modo laanu. Stale hermanu ruundaʼ folletu ni láʼ Guidúʼndanu Stiidxaʼ Dios guiráʼ dxi ante guiree de ra lidxi ne rudiicaʼ lugar gacaneni laacaʼ guchaacaʼ modo riníʼ íquecaʼ. Ne cada dxi rúnicabe stipa chinándacabe conseju ni biree de lu Stiidxaʼ Dios. Laaca naquiiñeʼ guidúʼndanu Biblia guiráʼ dxi ne guiníʼ íquenu ni zeeda luni. Neca ruluíʼ huaxiéʼ risácani, pa gúninu ca ni bizéʼtenu riʼ, zacaneni laanu sanu lu neza nabéʼ ni riné laanu lu guendanabani. Zeeda gaca Stiidxaʼ Dios casi ti aparatu ni ribee rayos X, ni racané laanu guidúʼyanu xi nuu dentru de laanu. Nga runi, pa racaláʼdxinu cueendunu ni galán de ca conseju ni zeeda lu Biblia ne ca ni rudii ca hermanu ni zániru ndaaniʼ xquidxi Dios, caquiiñeʼ gácanu humilde. w20.11 18 párr. 3; 20 párr. 8

Neca stale biaje guzanándacabe ca xpinni Cristu de primé siglu la? laaca guyuu ora gúpacaʼ paz. ¿Ximodo biquiiñecaʼ tiempu sticaʼ jneza yaʼ? Gudixhe íquecaʼ guni predicarcaʼ ca noticia galán. Lu relatu ni zeeda lu Hechos ná runi congregación que ni ná «Jehová», ne cumu qué nusaana de ñuni predicarcaʼ la? «bidale ca hermanu que». Rihuinni dxichi guluu Jehová ndaayaʼ laacaʼ purtiʼ bíʼnicaʼ stipa guni predicarcaʼ tiempu nuu paz (Hech. 9:26-31). Ca discípulo ni bibani lu primé siglu biquiiñecaʼ tiempu sticaʼ jneza para guni predicarcaʼ ca noticia galán. Guzéʼtenu ti ejemplu, gudixhe ique apóstol Pablo guiaana ndaaniʼ guidxi Éfeso ora biʼyaʼ casi ora zuxeleʼ «ti puertaʼ naroʼbaʼ» para guni predicar ne gacané ca binni que gácacaʼ discípulo stiʼ Cristu (1 Cor. 16:8, 9). Biʼniʼ ca discípulo que guiráʼ ni nuu lu nacaʼ para guni predicarcaʼ «ca noticia galán de stiidxaʼ Jehová» (Hech. 15:30-35). ¿Xi bizaaca pur ngue yaʼ? Lu textu ni cadúʼndanu yannadxí riete jma naguidxi guca fe stiʼ ca congregación que. w20.09 16 párr. 6-8

Bichee Adán ne pur ngue guti ne laaca zati ca ni zá de laa. Tiempu riʼ laaca cayuni sufrirnu purtiʼ qué nuzuubabe diidxaʼ. Peru nápanu ti esperanza galán purtiʼ gundisaʼ Dios Xiiñiʼ de lade gueʼtuʼ. Apóstol Pablo guníʼ: «Pur ti hombre zabani ca ni maʼ guti. Cásica rati guiráʼ binni pur Adán, zaqueca zabani guiráʼ binni pur Cristu» (1 Cor. 15:22). ¿Tudé caníʼ Pablo ora guníʼ «rati guiráʼ binni pur Adán»? Caniʼbe de ca ni zá de Adán, ca ni gulené donda ne pecadu, ne pur nga záticaʼ (Rom. 5:12). Cadi nuu diʼ Adán lade ca binni ni «zabani». Qué zanda cueendube ni galán pur guendaguti stiʼ Cristu, purtiʼ gúcabe perfectu ne qué nuzuubabe stiidxaʼ Dios neca nánnabe naquiiñeʼ gúnibe ni. Gucuaabe ni chiguicaa ca binni ni zuni juzgar «Xiiiʼ Hombre» casi chiva: chiguinitilucaʼ para siempre (Mat. 25:31-33, 46; Heb. 5:9). w20.12 5 párr. 13, 14

Pa cadi cacaanu ti privilegiu ni racaláʼdxinu galán guiníʼ íquenu ejemplu stiʼ ca ángel. Ti biaje gunabaʼ Jehová ca ángel guiniʼcaʼ ximodo zanda quítecaʼ rey Acab. Chupa chonna de laacaʼ guniʼcaʼ ximodo zanda gúnicaʼ ni, peru guyuulaʼdxiʼ Jehová ni guníʼ tobi si de laacabe ne gúdxibe laa zaree ni modo maʼ guníʼ (1 Rey. 22:19-22). ¿Ñee biree xcaadxi ángel que gana ne guniʼcaʼ: «¿Xi para gunieeʼ?»? Qué niníʼ íquecabe zacá. Guizáʼ humilde ca ángel ne racaláʼdxicaʼ guisaca Jehová (Juec. 13:16-18; Apoc. 19:10). Privilegiu jma galán nápanu nga nácanu testigu stiʼ Jehová ne runi predicarnu Reinu stiʼ Dios. Ne cadi ca privilegiu ca nga ni runi laanu ti binni risaca nezalú Jehová ne ca hermanu stinu, sínuque pa humilde laanu ne nánnanu nuu cosa ni qué zanda gúninu. Nga runi guinábanu Jehová gacané laanu para cadi gunítinu ca cualidad riʼ. Lu Biblia zeeda ejemplu stiʼ binni ni guca humilde ne gunna nuu cosa ni qué zanda guni, nga runi guidúʼndanu ne guiníʼ íquenu ejemplu stícabe. Laaca zanda gacanenu ca hermanu stinu dede ra ganda gúninu ni (1 Ped. 5:5). w20.12 26 párr. 16, 17

Runi representar cascu ni rulá, esperanza ni rudii Jehová laanu, esperanza nápanu zulabe laanu de lu náʼ guendaguti ne zaguu ndaayabe ca ni guni ni nabe (1 Tes. 5:8; 1 Tim. 4:10; Tito 1:1, 2). Rapa esperanza nápanu Jehová xquendabiaaninu. Racaneni laanu guiníʼ íquenu ca promesa stiʼ Dios ne guidúʼyanu ca guendanagana ca modo ruuyaʼ Dios cani. Riguu íquenu cascu riʼ ora rúninu stipa guiníʼ íquenu casi riníʼ ique Jehová. Guzéʼtenu ti ejemplu, qué riguíxhenu esperanza stinu lu ca cosa risaca ni nápanu purtiʼ zadxiñaʼ dxi zará ca ni, sínuque riguíxhenu esperanza stinu lu náʼ Dios (Sal. 26:2; 104:34; 1 Tim. 6:17). Runi representar espada stiʼ espíritu Stiidxaʼ Dios, Biblia. Napa espada riʼ poder para gacaneni binni gudii cuenta gunáʼ nga ca cosa ni cadi dxandíʼ rusiidiʼ ca religión, guixeleʼ de laacani ne gusaana de guni cosa malu (2 Cor. 10:4, 5; 2 Tim. 3:16, 17; Heb. 4:12). Rizíʼdinu iquiiñenu espada riʼ jneza ora runi estudiarnu stúbinu ne ora rinándanu ni rusiidiʼ xquidxi Dios (2 Tim. 2:15). w21.03 27 párr. 4; 28, 29 párr. 10, 11

Neca biseguyoocabe apóstol Juan pur cayuni predicar, bisihuinni rizaalaʼdxiʼ xcaadxi. Guzéʼtenu ti ejemplu, bicaabe revelación ni bidii Dios laabe ne biseendabe ni ra nuu ca congregación para gánnacaʼ «ca cosa ni mayaca guizaaca» (Apoc. 1:1). Ne zándaca despué de bireebe lu isla que, bicaabe ni bizaaca lu xquendanabani Jesús ne tiempu biʼniʼ predicar. Ne laaca bicaabe chonna carta ra nuu ca hermanu stibe para uguube gana laacaʼ. ¿Ximodo zanda chinándanu ejemplu stiʼ Juan yaʼ? Ra gusihuínninu nadxiinu binni pur ni gúninu né xquendanabáninu. Racalaʼdxiʼ Binidxabaʼ ne ca xpinni iquiiñenu tiempu ne stipa stinu para gácanu ricu o famoso. Peru lu guidubi Guidxilayú nuu xpinni Cristu ni cayuni predicar ca noticia galán ne cayacanecaʼ binni guidxiñaʼ ra nuu Jehová. w21.01 10 párr. 9, 10

Laaca ñándaca nidxiichi Jonatán ne nicá tema laa nga napa derechu de gaca rey despué de bixhoze (1 Sam. 20:31). Peru lugar de nga la? guca Jonatán humilde ne leal Jehová, biʼniʼ apoyarbe decisión stiʼ Jehová ora guníʼ David nga gaca rey. Laaca qué nusaanabe David neca guizáʼ bidxiichiné Saúl laabe (1 Sam. 20:32-34). Cumu nabé nadxii Jonatán David la? qué ñuuyabe laa casi ti enemigu. Guizáʼ gunna Jonatán gundaa flecha ne guca nadxibalú dxi guyé lu guerra. Guníʼ binni jma nagueenda Jonatán ne Saúl «que ca águila ne jma nadípacaʼ que ca lión» (2 Sam. 1:22, 23). Nga runi, ñándaca ñuni presumir Jonatán guiráʼ ni biʼniʼ dxi guyé lu guerra. Peru qué ñacaláʼdxibe nidíʼdibe lú David ne qué nidxiichibe pur guiráʼ ni cayuni, sínuque bisisácabe laa purtiʼ nadxibalú ne napa confianza Jehová. Ne bizulú gunnaxhii Jonatán David né stale cariñu despué de biiti Goliat. w21.01 22 párr. 6, 8, 9

Xaíque stiʼ guiranu nga Jesucristu ne gástiruʼ stobi casi laa. Peru ora richaganáʼ ti gunaa xpinni Cristu, nuu biaje raca nagana para laa guzuubaʼ stiidxaʼ xheelaʼ. Nga runi pa cá ique ti gunaa guichaganáʼ ti xpinni Cristu naquiiñeʼ guiníʼ ique: «¿Ximodo nannaʼ zaca hermanu ca ti buen xaíque ndaaniʼ familia? ¿Ñee risaca para laabe gúnibe xhiiñaʼ Jehová la? Peru pa cadi zacá ni, ¿ximodo ga gannaʼ zacanebe naa chuaaʼ jma gaxha de Jehová yaʼ?». Laaca caquiiñeʼ guiníʼ ique hermana riʼ: «¿Xi zanda guneʼ para chuʼ xquendaxheelaʼ galán yaʼ? ¿Ñee nacaʼ ti binni nachaʼhui ne napaʼ paciencia la? ¿Ñee nuaaʼ gaxha de Jehová la?» (Ecl. 4:9, 12). Pa racalaʼdxiʼ ti gunaa chuʼ nayecheʼ ora maʼ bichaganáʼ, naquiiñeʼ guicaa decisión jneza ante guichaganáʼ. Guizáʼ galán ejemplu stiʼ stale hermana purtiʼ ruzuubacaʼ stiidxaʼ xheelacaʼ. Riuuláʼdxinu guninenu laacabe xhiiñaʼ Jehová ne runi felicitarnu laacabe purtiʼ qué rusaanacabe de gúnicabe xhiiñaʼ Dios. w21.02 8 párr. 1, 2

Lu ca últimu iza riʼ, stale publicador maʼ gudixhe ique guiziidiʼ sti diidxaʼ para gúnicaʼ jma lu xhiiñaʼ Dios. Ne gacanecaʼ ndaaniʼ ca congregación ra jma caquiiñeʼ tu guni predicar. Cada hermanu nga riguixhe ique xi guni. Neca ridiʼdiʼ stale iza para guiziidiʼ chaahuicabe ti idioma la? nabé racanécabe congregación. Pur ca cualidad galán ni nápacabe ne experiencia stícabe, racanécabe ca hermanu iguidxi fe sticaʼ. ¿Cadi dxandíʼ rusisácanu stipa ni rúnicabe la? ¿Ñee jneza nga cadi guni recomendar ca ancianu ti hermanu para gaca ancianu o siervu ministerial purtiʼ si qué riníʼ diidxaʼ sticaʼ la? Coʼ. Ni caquiiñeʼ guni ca ancianu nga gúʼyacaʼ pa runi cumplir hermanu riʼ né ca requisitu ni zeeda lu Biblia para gaca ancianu o siervu ministerial, ne cadi pa riníʼ chaahuibe ti diidxaʼ (1 Tim. 3:1-10, 12, 13; Tito 1:5-9). w20.08 30 párr. 15, 16

Stale binni riníʼ ique zabani nayecheʼ ora gaca nazaaca, gapa stale bueltu ne guibaniné familia stiʼ nayecheʼ. Peru cadi caníʼ diʼ Santiago de ca cosa ni riguu laanu nayecheʼ, sínuque caniʼbe de ca cualidad ni rudii espíritu stiʼ Dios laanu (Gál. 5:22). Laanu ca xpinni Cristu riuʼnu nayecheʼ purtiʼ nánnanu riuulaʼdxiʼ Jehová ni rúninu ne zinándanu ejemplu stiʼ Jesús (Luc. 6:22, 23; Col. 1:10, 11). Cásica qué rizuíʼ ti belehuiiniʼ ni nuu ndaaniʼ ti linterna neca cayaba nisaguié ne cundubi bi la? laanu laaca qué zusaana de chuʼnu nayecheʼ neca qué gápanu bueltu, huaranu, guni búrlacabe laanu o gucaalú familia stinu laanu. Ne qué zareʼnu gana neca gacalaʼdxiʼ ca enemigu stinu gucaalucaʼ laanu. Ca guendanagana ni tídinu zusihuínnicani dxandíʼ xpinni Cristu laanu (Mat. 10:22; 24:9; Juan 15:20). Ngue runi guníʼ Santiago ca diidxaʼ ni zeeda lu textu ni cadúʼndanu yannadxí. w21.02 28 párr. 6

Ora gúʼndaluʼ ti relatu ni zeeda lu Biblia ra riete cadi gaca lúgunu ne gápanu confianza Jehová zudiini stipa laanu, nga runi biʼniʼ stipa guiziidiluʼ caadxi versículo ni zeeda lu relatu ca de memoria. Laaca galán gúʼndaluʼ cani en voz alta, gucaaluʼ ni biziidiluʼ ne guni repasarluʼ cani gatigá. Biʼniʼ mandar Jehová Josué guʼndaʼ libru ra cá Ley dxi né gueelaʼ ne guni meditar ni zeeda luni ti guni ni jneza. Ti gacaneni laabe para cadi guidxíbibe pur guiráʼ ni cazaacabe tiempu que (Jos. 1:8, 9). Lu Stiidxaʼ Dios zanda guidxélanu ni zacané laanu para cadi gaca lúgunu ora guidxaagalunu xiixa ni cuʼ laanu xizaa o ni guchibi laanu (Sal. 27:1-3; Prov. 3:25, 26). Lu ca reunión stinu rizíʼdinu stale de ca discursu ne de ca comentariu ni rudii ca hermanu stinu ne ora ruínenu laacaʼ diidxaʼ (Heb. 10:24, 25). Pa gábinu ti xhamígunu de congregación stinu xi riguu xizaa laanu zanda cuʼ gana laanu. w21.01 6 párr. 15, 16

Dxi guyuunísaluʼ bisihuínniluʼ nápaluʼ fe ne confianza Jehová ne beeda gácaluʼ parte de familia stibe. ¡Ti ndaayaʼ guizáʼ naroʼbaʼ! Nga runi, biyubi gacané Jehová lii, nga zacané lii ante guicaaluʼ ti decisión, casi xi entretenimientu gúʼyaluʼ o quíteluʼ, xi dxiiñaʼ guicaaluʼ ne xi meta nápaluʼ gana ugaandaluʼ. Lugar de gúniluʼ ni ná si xquendabiaaniluʼ, biiyaʼ xi ná Biblia ne yenanda ni (Prov. 3:5, 6). Zacá zusiécheluʼ Jehová ne zuni respetar ca hermanu de congregación lii. Joven, cadi guiaandaʼ lii imperfectu lii ne nuu biaje zucheeluʼ, peru cadi cuee nga gana lii para gúniluʼ ni ná Jehová. w21.03 6 párr. 14, 15

¿Ñee ribee familia stinu gana laanu para cadi gúninu ni ná Jehová la? O ¿nabézanu ndaaniʼ ti guidxi ra qué riná gobiernu gúninu xhiiñaʼ Dios la? Pa zacá ni, guidúʼndanu 2 Timoteo 1:12-16 ne 4:6-11, 17-22, zacané ca textu riʼ laanu. Nuu apóstol Pablo ndaaniʼ cárcel dxi bicaa carta riʼ. Ante guidúʼndanu ca textu ca, gábinu Jehová xi peʼ guendanagana cadídinu ne ximodo cayuni sentirnu. Ora guidúʼndanu ca guendanagana bidxaagalú Pablo, guinábanu Jehová gacané laanu guidxélanu xiixa conseju ni gacané laanu para gudxíʼlunu ca guendanagana stinu. Maca gudxi Jehová Pablo zazananda binni laa purtiʼ naca xpinni Cristu (Hech. 21:11-13). ¿Ximodo gucané Jehová Pablo yaʼ? Bicábibe ca oración stiʼ ne bidiibe stipa laa. Gucuaa Pablo premiu ni gudxi Jehová chigudii laa, purtiʼ qué nusaana laabe ne laaca biquiiñeʼ Jehová ca xhamigu Pablo para gacanecaʼ laabe. w21.03 17, 18 párr. 14, 15, 19