Agosto

Ca binni si ni gaca xhamigu Jesús nga zabeenducaʼ ni galán pur guendaguti stibe. ¿Ximodo nánnanu ni yaʼ? Purtiʼ Jesús guníʼ zudii «xpida pur ca xhamigu» (Juan 15:13). Ca xpinni Dios ni bibani ante gueeda Jesús lu Guidxilayú riʼ napa xidé guiziidicaʼ de laabe ne gannaxhiicaʼ laabe. Ziasa hombre ne gunaa casi Abrahán, Sara, Moisés ne Rahab para guibánicaʼ sti biaje, peru caquiiñeʼ gaca xhamígucabe Jesús para guicaacabe guendanabani ni qué zaluxe (Juan 17:3; Hech. 24:15; Heb. 11:8-12, 24-26, 31). Nápanu privilegiu guninenu Jesús dxiiñaʼ de gaca predicar ne gusíʼdinu binni ca noticia galán stiʼ Reinu. Dxi guyuube ndaaniʼ Guidxilayú riʼ, bisiidibe binni ni dxandíʼ de Dios. Ne despué biguétabe guibáʼ, maʼ nácabe Xaíque stiʼ congregación, ne cayuni dirigirbe dxiiñaʼ de gaca predicar. Ruuyabe ne rusisácabe stipa ni rúninu para gacanenu biaʼ tiica si binni gunibiáʼ laabe ne Bixhózebe. Ne qué zanda gúninu dxiiñaʼ riʼ pa qué gacané Jehová ne Jesús laanu (Juan 15:4). w20.04 22 párr. 7, 8

Dxiqué la? ca rey ni biʼniʼ gobernar ladu guiáʼ ne ladu gueteʼ de guidxi Israel nga gucuaa título de «rey del norte» ne «rey del sur» (Dan. 10:14). Guca ruʼ guidxi Israel xquidxi Dios hasta lu Pentecostés stiʼ iza 33. Peru dede lu iza ca la? bisiene Jehová ca discípulo stiʼ Jesús ca ni guzuubaʼ diidxaʼ nga ca ni gueeda gaca xquídxibe. Nga runi, casi guiráʼ ni zeeda lu profecía stiʼ Daniel capítulo 11 cadi caníʼ diʼ ni de guidxi Israel ni guyuu dxiqué, sínuque caniʼni de ca xpinni Cristu (Hech. 2:1-4; Rom. 9:6-8; Gál. 6:15, 16). Ra gudiʼdiʼ tiempu gadxé gadxé gobernante ne gobiernu beeda gaca rey del norte ne rey del sur. Ne nuu chonna cosa ni huayuni ca gobernante riʼ. Primé, huazanándacabe xquidxi Jehová. Guiropa, pur modo huayuni tratárcabe xquidxi Dios, rusihuínnicabe nanaláʼdxicabe Dios ni dxandíʼ. Ne guionna, huadindesaa guiropaʼ rey riʼ. w20.05 3 párr. 3, 4

Zanda gaca Jehová ni caquiiñeʼ para gaca cumplir ni maʼ naguixhe ique. Neca nácanu binni ruchee, zanda gacané Jehová laanu gueeda gácanu ni caquiiñeʼ para gúninu intiica cosa ti gúnibe ni naguixhe íquebe (Is. 64:8). Sicaríʼ nga runi Jehová para gaca ni naguixhe ique. Gastiʼ qué zanda gucueeza laabe para gúnibe xiixa (Is. 46:10, 11). ¿Xi zacané laanu jmaruʼ si gannaxhiinu ne guni respetarnu Bixhózenu ni nuu guibáʼ yaʼ? Ti modo zanda gúninu ni nga guni meditarnu lu ca ni maʼ bíʼnibe ne ca ni maʼ gucanebe laanu gúninu. Guzéʼtenu ti ejemplu, nabé ridxagayaanu ora runi meditarnu lu guiráʼ ni maʼ bizaʼbe (Sal. 8:3, 4). Ne ora riníʼ íquenu guiráʼ ni maʼ bíʼnibe para gácanu ni gacaláʼdxibe ti guni cumplirbe ni maʼ gudixhe íquebe la? rápanu stale respetu laabe. Nabé ridxagayaanu lá Jehová, purtiʼ rugaandani modo nácabe, guiráʼ ni huayúnibe ne guiráʼ ni chigúnibe (Sal. 89:7, 8). w20.06 9, 10 párr. 6, 7

Oxígeno nga ti gas ni riquiiñeʼ binni ne maniʼ para ganda guibánicaʼ. Según cálculo ni huayaca, lu ti iza riquiiñeʼ binni ne maniʼ gayuaa mil millón tonelada de oxígeno, ne ora ricaacaʼ bi, ribeecaʼ dióxido de carbono. Neca riquiiñecaʼ stale oxígeno, qué rirá diʼ ni, peru laaca qué ridxá tipa Guidxilayú riʼ de dióxido de carbono ni ribeecaʼ. Ne randa raca ni bizéʼtenu riʼ pur ni runibiáʼcabe casi ciclo del oxígeno. Bizáʼ Jehová gadxé gadxé tipu yaga, nahuiiniʼ ne naroʼbaʼ, laacani nga ricaa cani guiráʼ dióxido de carbono ni ribeenu ne rudiicani laanu oxígeno. Ndiʼ rusihuinni dxandíʼ nga ni ná textu ni cadúʼndanu yannadxí. Para jma gusisácanu Guidxilayú stinu riʼ ne guiráʼ ca cosa galán ni nuu luni la? caquiiñeʼ cueenu tiempu para guiníʼ íquenu pabiáʼ galán guiráʼ ca cosa ni maʼ bizáʼ Jehová (Sal. 115:16). Pa gúninu ni la? zucaani laanu gudiʼnu xquixe peʼ laabe guiráʼ dxi pur guiráʼ ca cosa ni rudiibe laanu. Ne laaca zusihuínninu rudiʼnu xquixe peʼ Jehová pa gusianu ra nabézanu. w20.05 22 párr. 5, 7

Runi Jehová ni jneza, nga runi né stale guendanuuxpiaaniʼ ne paciencia bisihuinni cadi dxandíʼ ni guníʼ Binidxabaʼ. Laaca stale modo maʼ bisihuinni Jehová guizáʼ napa poder. Ne jmaruʼ si rihuinni guendarannaxhii stibe lu guiráʼ ni huayúnibe (1 Juan 4:8). Qué huayuu dxi gusaana Jehová de guni dxiiñaʼ para gaca santificar lá. Ca dxi stinu riʼ, caniʼruʼ Binidxabaʼ mal de lá Jehová para guninabe laa. Rucaabe binni guiníʼ ique qué gapa Dios poder, qué runi ni jneza, cadi nuu xpiaaniʼ ne cadi nadxii binni. Guzéʼtenu ti ejemplu, racaláʼdxibe gucaabe binni guni cré cadi dxandíʼ nuu Jehová. Ne pa nuu tuuxa runi cré Dios la? racaláʼdxibe gucaabe laa guiníʼ ique cadi jneza ca ley stiʼ Dios o qué rudii lugar guni binni stale cosa. Dede rucaabe binni guiníʼ ique naca Jehová ti Dios ni ruzaaquiʼ binni ndaaniʼ infiernu. Né ca ni guni cré ca cosa feu ni rusiidibe dede maʼ qué rinacaʼ guni mandar Jehová laacaʼ. Ne cumu caʼruʼ guinitilú Binidxabaʼ la? zacaláʼdxibe guxhélebe lii de Jehová. Peru ¿ñee zudiiluʼ lugar gúnibe ni la? w20.06 5 párr. 13-15

Ndaaniʼ stale congregación nuu hermanu ni cayuni stipa pur guiziidiʼ sti idioma. Peru zándaca gaca nagana para laacabe guiníʼ chaahuicabe idioma ca. Pa qué guidúʼyanu puru si ra cucheecabe la? zudiʼnu cuenta pabiáʼ nadxiicabe Jehová ne pabiáʼ racaláʼdxicabe gúnicabe ni ná. Ne zucaani laanu guni respetarnu ne gusisácanu laacabe. Qué zaníʼ íquenu cadi caquiiñenu laacabe purtiʼ si qué riníʼ chaahuicabe stiidxanu (1 Cor. 12:21). Rudiʼnu xquixe peʼ Jehová purtiʼ risácanu ndaaniʼ congregación stiʼ. Gastiʼ naca pa hombre o gunaa laanu, pa maʼ bichagananu o pa caʼruʼ, pa maʼ huaniisinu o pa joven laanu, pa riníʼ chaahuinu ti idioma o coʼ: guiranu risácanu para Jehová ne para ca hermanu (Rom. 12:4, 5; Col. 3:10). Nga runi, guyúbinu modo gusisácanu ca hermanu stinu ne guiníʼ íquenu laaca risácanu ndaaniʼ congregación stiʼ Jehová. w20.08 31 párr. 20-22

Biʼniʼ adorar ca binni de Atenas Dios ni cadi dxandíʼ, biʼniʼ practicárcabe pecadu sexual ne biʼniʼ crecaʼ filosofía. Peru qué niníʼ ique Pablo qué zuchaacabe ne neca gudindenécabe laabe qué nireebe gana. Laapebe beeda gácabe ti xpinni Cristu neca dxiqué guniʼbe mal de Dios, guzanándabe ca xpinni ne gúcabe ti binni orgulloso (1 Tim. 1:13). Cásica qué niníʼ ique Jesús qué zuchaa Pablo la? laaca qué niníʼ ique Pablo zacá de ca binni de Atenas. Ne biaʼsi ni guníʼ íquebe de laacaʼ (Hech. 9:13-15). Lu primé siglu, binni de guiráʼ clase beeda gaca discípulo stiʼ Jesús. Dxi bicaa Pablo ra nuu ca xpinni Cristu de Corinto guniʼbe nuu de laacaʼ gúcacaʼ binni malu ne biʼniʼ practicarcaʼ pecadu sexual. Ne despué guniʼbe: «Peru yanna maʼ nayá nuutu» (1 Cor. 6:9-11). ¿Ñee laaca niníʼ íquenu ñanda nuchaa ca binni que ne ñeeda gácacaʼ xpinni Cristu la? w20.04 12 párr. 15, 16

Cadi casi zeʼ ca ancianu naquiiñeʼ guni juzgarcaʼ ca hermanu ni ruzulú rinabadiidxaʼ pa risaca gúnicaʼ ni ná Jehová. Lugar de guiníʼ íquecaʼ cadi jneza nuucabe la? naquiiñeʼ gúnicaʼ stipa guiénecaʼ xiñee riníʼcabe o rúnicabe xiixa cosa. Pa gúnicabe ni bizéʼtenu riʼ, zanda iquiiñecabe Biblia para uguucabe gana ca hermanu riʼ. Bixooñelú profeta Elías de reina Jezabel (1 Rey. 19:1-3). Guníʼ íquebe qué risaca ni cayúnibe dede gunábabe gátibe (1 Rey. 19:10). Peru qué niníʼ ique Jehová cadi jneza nuu Elías. Sínuque gudxi laabe cadi stúbibe nuube, zanda gápabe confianza poder stiʼ ne nuuruʼ stale dxiiñaʼ ni chigúnibe. Né stale cariñu bicaadiaga Jehová laga caníʼ Elías xi guiráʼ naguu xizaa laa, ne bidiibe laa xcaadxi responsabilidad (1 Rey. 19:11-16, 18). ¿Xi rizíʼdinu de ni bizaaca riʼ yaʼ? Ni rizíʼdinu nga guiranu, jmaruʼ si ca ancianu, naquiiñeʼ guni tratarnu ca dendxuʼ stiʼ Jehová né cariñu. Pa gabi ti binni ca ancianu cadxiichi o runi sentir maʼ qué zuni perdonar Jehová laa la? naquiiñeʼ gucaadiágacaʼ laabe para gánnacaʼ xi nuu ndaaniʼ ladxidoʼbe. Despué zábicabe dendxuhuiiniʼ ni biniti riʼ nabé risaca para Jehová. w20.06 21, 22 párr. 13, 14

Riuulaʼdxiʼ Jehová chúʼnenu familia ne ca xhamígunu ti ratu nayecheʼ (Sal. 133:1). Jesús peʼ gupa xhamigu (Juan 15:15). Laaca ruzeeteʼ Biblia ribeendú binni ni galán pa gapa ti buen amigu (Prov. 18:24). Ne laaca rabi ni laanu cadi guixélenu de ca hermanu stinu (Prov. 18:1). Stale binni riníʼ ique riquiiñeʼ ca red social ca para gapa stale amigu ne para cadi guni sentir stubi. Peru, pa riquiiñenu ni la? caquiiñeʼ gápanu stale cuidadu. Según ca estudiu ni huayaca, ca binni ni ruuyaʼ ca comentariu ne ca foto ni rudxiibaʼ xcaadxi lu ca red social la? zándaca guni sentircaʼ stúbicaʼ ne dede gaca deprimircaʼ. ¿Xiñee yaʼ? Zándaca purtiʼ jma stale binni rudxiibaʼ ca foto ni jma riuuláʼdxicaʼ: ca foto ra rihuínnicaʼ jma galán, ra rihuinni ca xhamígucaʼ ne ca lugar ra yezacaʼ. Ca binni ni guʼyaʼ ca foto ni rudxiibacabe, zándaca guchaagacaʼ modo nabánicaʼ né modo nabánicabe ne guni sentircaʼ qué risaca xquendanabánicaʼ ne triste modo nuucaʼ. w20.07 5, 6 párr. 12, 13

Revista La Atalaya 1 de octubre de 1988, ná: «Nanna ca ancianu zaquiiñeʼ Cristu espíritu santu ti gacané tobi de laacabe para guidxela ti principiu zeeda lu Biblia ni gacané laacabe guicaacabe ti decisión nabé risaca (Hech. 15:7-15). Racané espíritu santu guiráʼ ca ancianu ni nuu ndaaniʼ congregación ne cadi tobi si de laacabe». Pa runi respetar ti ancianu xcaadxi ancianu de congregación, qué zuyubi siempre laa guiníʼ xi gaca ora nápacaʼ reunión de ancianu. Cadi puru si laa zaníʼ ne qué zaníʼ ique laa nga napa razón lu guiráʼ ni riníʼ. Lugar de nga la? ora guiníʼ ni caníʼ ique zusihuinni humilde laa ne nuu cosa ni qué zanda guni, ne zucaadiaga ora guiníʼ xcaadxi. Laaca zinándabe ni ná ca principiu zeeda lu Biblia ne zúnibe ni ná «mozo ni nuu xpiaaniʼ ne ni runi jneza» (Mat. 24:45-47). Ora guni tratar ca ancianu xiixa asuntu ne gúnicaʼ ni né guendarannaxhii ne respetu, riuu espíritu santu stiʼ Dios ládecabe ne racané ni laacabe guicaacabe decisión jneza (Sant. 3:17, 18). w20.08 27 párr. 5, 6

Bidxaagalú apóstol Pablo guendanagana. Gúpabe enemigu jma nadipaʼ que laabe. Biʼniʼ mandarcaʼ guniná binni laabe ne ni guluucaʼ laabe ndaaniʼ cárcel. Laaca bininá ca xhamigu Pablo laa. Ne caadxi de ca hermanu de congregación bicaalucaʼ laabe (2 Cor. 12:11; Filip. 3:18). Peru qué nudii Pablo lugar nucueeza ca xhenemigu laa ne qué nusaana de ñuni predicar neca bicaalú binni laa. Qué nusaanabe ca hermanu stibe neca bidxiidéchecaʼ laabe. Ne ni jma risaca nga gúcabe fiel Dios dede dxi gútibe (2 Tim. 4:8). Neca stale binni bicaalú laabe, biʼniʼ ganarbe purtiʼ gúpabe confianza Jehová ne qué ñápabe confianza laca laabe. Caquiiñeʼ guni huantarnu ora cuʼ diʼ o sanándacabe laanu. Ora gucaalú binni laanu, racaláʼdxinu iquiiñenu Stiidxaʼ Dios para gusíʼdinu laacabe de Jehová. ¿Ximodo zanda gúninu ni yaʼ? Ora iquiiñenu Biblia para guicábinu ca pregunta ni runi binni, ora nacháʼhuinu ne runi respetarnu ca ni runi tratar laanu mal, ne ora gacanenu xcaadxi binni, dede ca xhenemígunu (Mat. 5:44; 1 Ped. 3:15-17). w20.07 17, 18 párr. 14, 15

¿Ñee humilde Jehová la? Humilde pue, gunna David dxandíʼ ni pur ca diidxaʼ ni guníʼ (Sal. 18:35). Ora bicaa David ca diidxaʼ riʼ la? zándaca caníʼ íquebe dxi guyé profeta Samuel ra lidxi bixhózebe para cuí tu gaca rey de guidxi Israel. Neca David nga ni jma nahuiiniʼ lade xhono xiiñiʼ bixhoze, gulí Jehová laabe para gácabe rey lugar stiʼ Saúl (1 Sam. 16:1, 10-13). Nanna dxíchinu guyuu David de acuerdu né ni guníʼ ti salmista de Jehová: «Ratagudaabe para gúʼyabe guibáʼ ne guidxilayú, para guindísabe ca humilde de layú. Rindísabe pobre [...] para gucuibe laacaʼ cueʼ ca binni nachaʼhuiʼ» (Sal. 113:6-8). Ni rusihuinni humilde Jehová nga modo runi tratarbe ca xpínnibe ni naca imperfectu. Qué rudiisibe lugar guni adorarnu laabe, sínuque laaca ruuyabe laanu casi xhamígube (Sal. 25:14). Zanda gaca xhamígunu laabe purtiʼ bidiibe xiiñibe para gatiʼ pur ca pecadu stinu. ¡Rihuinni dxíchica guizáʼ riabe laanu! w20.08 8 párr. 1-3

Maʼ gudixhe Jehová dxi ne hora para gunitilú guidxilayú malu riʼ (Mat. 24:36). Neca maʼ racaláʼdxibe guindísabe ca ni maʼ gutiʼ, cusihuínnibe nápabe paciencia ne qué zúnibe ni ante (Job 14:14, 15). Cabézabe gúnibe ni ora maʼ naguíxhebe ni (Juan 5:28). Nápanu stale razón para gudiʼnu xquixe peʼ Jehová purtiʼ napa paciencia. Ne pur paciencia stibe, stale binni maʼ guca arrepentir, dede né laanu. Racalaʼdxiʼ Jehová gusibani stale binni ni maʼ guti. Nga runi, gúninu stipa para guidxélanu «ca ni nachaʼhuiʼ ladxidóʼ ni maʼ nuu para guicaa guendanabani ni qué zaluxe» ne gacanenu laacaʼ gannaxhiicaʼ ne gúnicaʼ ni ná Jehová (Hech. 13:48). Zacá zabeendúcabe ni galán pur paciencia stiʼ Jehová. w20.08 18 párr. 17

Naquiiñeʼ chindá ni caziidiʼ estudiante ca ndaaniʼ ique, peru ni jma risaca nga chindá ni ndaaniʼ ladxidoʼbe. ¿Xiñee yaʼ? Purtiʼ ladxidóʼ binni —ra nuu ca deseu, ca emoción ne ca ni runi sentir— nga ni rucaa laa guni xiixa. Dxi bisiidiʼ Jesús binni la? bicaabe laacaʼ guiníʼ íquecaʼ. Peru stale binni guca xpínnibe purtiʼ yendabe ndaaniʼ ladxidoʼcaʼ (Luc. 24:15, 27, 32). Naquiiñeʼ guʼyaʼ estudiante ca Jehová casi ti Dios ni dxandíʼ nabani, casi tuuxa ni zanda gaca Bixhózebe, Xhamígube ne Dios stibe (Sal. 25:5). Ora maʼ cudiʼnu estudiu laabe la? guluinu laabe ca cualidad sicarú stiʼ Dios (Éx. 34:5, 6; 1 Ped. 5:6, 7). Intiica tema cadúʼndanenu laabe, guluinu laabe ximodo peʼ nga Jehová. Gacanenu estudiante stinu gusisaca guendarannaxhii, guendanachaʼhuiʼ ne guendariáʼ stiʼ Jehová. Jesús guníʼ: «Ndiʼ nga primé mandamientu ne ni jma risaca. Gunnaxhii Jehová Dios stiluʼ» (Mat. 22:37, 38). Gúninu stipa para gacanenu estudiante stinu gannaxhii Dios de guidubi ladxidóʼ. w20.10 10 párr. 12

Biʼniʼ tratar Jesús guiráʼ gunaa né respetu (Juan 4:27). Ne jmaruʼ si biʼniʼ respetarbe ca gunaa ni runi ni ná Bixhózebe. Ora bizeeteʼ Jesús tuu nga ca binni ni ruuyaʼ casi familia stiʼ la? guniʼbe de caadxi hombre ne gunaa (Mat. 12:50). Guyuu Jesús dispuestu gacané ca xhamigu. Guca xhamígube María ne Marta, chupa gunaa soltera (Luc. 10:38-42). Rihuinni dxichi pur modo guniʼbe ne modo biʼniʼ tratarbe laacaʼ biʼniʼ sentircaʼ galán ora guyuucaʼ ra nuube. Ne pur nga gurí María xañee maestru stiʼ para guiziidiʼ de laabe. Ne Marta la? qué nituí lú ora gudxi Jesús cadxiichi purtiʼ cadi cayacané María laa. Óraque bisiidiʼ Jesús laacabe caadxi cosa nabé risaca. Laaca bisihuínnibe rizaaláʼdxibe laacaʼ ne bizáʼnacaʼ Lázaro, purtiʼ yegánnabe laacaʼ xcaadxi biaje (Juan 12:1-3). Nga runi yeyubi María ne Marta Jesús para gacanebe laacaʼ dxi guca huará Lázaro (Juan 11:3). w20.09 20 párr. 3; 21 párr. 6

Guníʼ ique ca discípulo stiʼ Jesús zuuyaʼ «binni Reinu stiʼ Dios» ne zulá Jesús laacaʼ de lu náʼ ca romano. Laanu laaca cabézanu guedandá dxi cuee Dios cosa malu ne gueedanebe ti Guidxilayú cubi ra gaca ni jneza (2 Ped. 3:13). Peru caquiiñeʼ gápanu paciencia ne cuézanu dede ora maʼ gudixhe Jehová gúnini. Bidii Jehová Noé stale tiempu para guzáʼ arca que ne gaca «predicador de justicia» (1 Ped. 3:20; 2 Ped. 2:5, nota). Bicaadiágabe Abrahán ora gunabaʼ laabe cadi gunitilube ca binni malu ni nabeza Sodoma ne Gomorra (Gén. 18:20-33). Stale iza gupa Jehová paciencia guidxi Israel (Neh. 9:30, 31). Ne tiempu riʼ laaca napa Jehová paciencia purtiʼ cudiibe binni tiempu para gaca arrepentircaʼ ne gácacaʼ xhamígube (Juan 6:44; 1 Tim. 2:3, 4; 2 Ped. 3:9). Ejemplu stiʼ Jehová rusiidiʼ laanu naquiiñeʼ gápanu paciencia ora runi predicarnu ne rusíʼdinu binni. w20.09 10 párr. 8, 9

Ora gusibani Jehová ca binni ni maʼ guti, zusibánibe laacaʼ modo gúcacaʼ dxiqué ne zietenaláʼdxicaʼ ni bizaacacaʼ ante gáticaʼ. Guiníʼ íquenu xi riníʼ ca diidxaʼ riʼ. Guizáʼ nadxii Jehová laanu dede nánnabe xi riníʼ íquenu, xi runi sentirnu, xi rininu ne xi rúninu. Nga runi, pa caquiiñeʼ gusibánibe laanu la? qué zaca nagana para laabe gudxiguétabe ca recuerdu stinu, modo laanu ne ni riníʼ íquenu. Gunna dxichi rey David runibiáʼ chaahuiʼ Jehová cada tobi de laanu (Sal. 139:1-4). ¿Ximodo runi sentirnu ora ridúʼyanu pabiáʼ rizaaláʼdxibe laanu yaʼ? Ora guiníʼ íquenu runibiáʼ chaahuiʼ Jehová laanu, cadi naquiiñeʼ chuʼnu xizaa. ¿Xiñee coʼ yaʼ? Cadi guiaandaʼ laanu guizáʼ nadxiibe laanu ne cada tobi de laanu risaca para laabe. Ne nánnabe xi guiráʼ maʼ bizaacanu lu xquendanabáninu ne xi bicaa laanu gápanu personalidad ni nápanu yanna. ¿Cadi dxandíʼ ratadxí ladxidoʼno gánnanu ndiʼ la? Qué chuʼ dxi guni sentirnu stúbinu, purtiʼ nuu Jehová gaxha de laanu para gacané laanu (2 Crón. 16:9). w20.08 17 párr. 13, 14

Guizáʼ riuulaʼdxiʼ Jehová gusiidiʼ xquidxi. Racaláʼdxibe gunibiáʼ, gannaxhii ca xiiñibe laabe ne guibánicaʼ para siempre. Zanda gaca guiráʼ ni bizéʼtenu riʼ purtiʼ cusiidibe laanu (Juan 17:3). Lu primé siglu, biquiiñebe congregación cristiana para gusiidibe xquídxibe (Col. 1:9, 10). Ne gucanebe xquídxibe ra bidiibe laacaʼ espíritu santu ni biʼniʼ prometer Jesús laacaʼ (Juan 14:16). Ndiʼ gucané ca discípulo guiénecaʼ Stiidxaʼ Dios ne bisietenalaʼdxiʼ ni laacaʼ ca cosa ni biʼniʼ ne ni guníʼ Jesús, ne yanna naca cani parte de ca Evangeliu. Ni biziidiʼ ca xpinni Cristu riʼ gucané ni laacaʼ iguidxi fe sticaʼ, gannaxhiicaʼ Dios, Jesús ne ca hermanu sticaʼ. Maca guníʼ Jehová «ora mayaca guiluxe ca dxi que», zaguiʼbaʼ binni de guiráʼ guidxi lu dani stiʼ para gusiidibe laacaʼ ca neza stibe (Is. 2:2, 3). Tiempu riʼ nga cayaca cumplir profecía riʼ. w20.10 24 párr. 14, 15

¿Xi zándaca gucaa tuuxa cadi gucaadiaga conseju ni gudii ti xhamigu laa? Orgullo. Ti binni orgulloso rucaadiaga ca cosa si ni riuulaʼdxiʼ ganna ne qué rucaadiaga «ni dxandíʼ» (2 Tim. 4:3, 4). Qué rucaadiaga purtiʼ riníʼ ique jma nuu xpiaaniʼ ne jma risaca que xcaadxi. Peru apóstol Pablo guníʼ: «Pa nuu tu riníʼ ique risaca, peru cadi zacá ni la? caguite laca laa» (Gál. 6:3). Ne ngaca guníʼ rey Salomón, sicaríʼ guníʼ: «Jma risaca ti xcuidi pobre ni nuu xpiaaniʼ que ti rey maʼ nagola ni nahuati, ni maʼ qué riná guicaa conseju» (Ecl. 4:13). Bisaana apóstol Pedro ti ejemplu galán para laanu dxi guluu jneza apóstol Pablo laa nezalú stale binni (Gál. 2:11-14). Ñándaca nidxiichinebe apóstol Pablo pur modo guluu jneza laabe ne ra biʼniʼ ni. Peru cumu nuu xpiaaniʼ Pedro la? gucuaa conseju bidii Pablo laa ne qué nidxiichiné laabe, lugar de nga la? ra gudiʼdiʼ tiempu gúdxibe Pablo hermanu ni nadxieeʼ (2 Ped. 3:15). w20.11 21 párr. 9, 11, 12

¿Xi zacané estudiante stinu guni progresar? Nabé risaca cadi guiaadxabe reunión. Ni gunadiágabe ra reunión zacaneni laabe guiziidibe jma, gaca fe stibe jma naguidxi ne gannaxhiibe Dios jma (Hech. 15:30-32). Laaca zanda gabi ti publicador estudiante stiʼ ximodo bicaa guendarannaxhii ni napa Jehová chinanda ca principiu ni zeeda lu Biblia (2 Cor. 7:1; Filip. 4:13). Ne ora runibiáʼ estudiante stinu xcaadxi hermanu ruuyabe ximodo nga rinanda tuuxa mandatu ni bidii Jesús de gannaxhiinu Dios ne gannaxhiinu prójimo stinu (Juan 13:35; 1 Tim. 4:12). Laaca zanda guiziidibe ejemplu stiʼ ca hermanu ni cadiʼdiʼ lu ca guendanagana ni cadíʼdibe. Zacá zudiibe cuenta zanda guchaabe para gácabe discípulo stiʼ Cristu (Deut. 30:11). Guiranu zanda gacanenu para guni progresar ti estudiante (Mat. 5:16). w20.11 5 párr. 10-12

Zándaca caníʼ apóstol Pablo bidxelasaa caadxi maniʼ duxhuʼ lu circo ndaaniʼ guidxi Éfeso (2 Cor. 1:8; 4:10; 11:23). O zándaca caniʼbe dxi guzananda ca judíu ne xcaadxi enemigu laabe ca ni beeda gaca casi «maniʼ duxhuʼ» (Hech. 19:26-34; 1 Cor. 16:9). Modo tiica si gúcani, bidxiilú Pablo ca guendanagana que sin niree gana (1 Cor. 15:30, 31; 2 Cor. 4:16-18). Laanu laaca nabáninu ti tiempu ra nuu cosa malu. Caadxi hermanu stinu huayuniná binni malu laacaʼ. Laaca nuu tu laa nabeza lugar ra cadi seguru pur ca guerra. Ne nuu guidxi qué rudiicabe lugar guni predicar ca hermanu, peru runi ca hermanu riʼ stipa gúnicaʼ ni ná Jehová neca riuu xquendanabánicaʼ ra naxoo. Neca zacá, cayuni adorárcabe Jehová ne nácacabe ti ejemplu para laanu. Qué ridxíbicabe purtiʼ nánnacabe, neca gáticabe, zusibani Jehová laacabe lu ca dxi ni zeeda ca. w20.12 9 párr. 3, 4

¿Ñee runi predicarnu ti territorio ra huaxiéʼ ridxélanu binni ra lidxi ne qué rinacaʼ gucaadiágacaʼ la? Pa ribee ca ni bizéʼtenu riʼ gana laanu, ¿xi zanda gúninu para cadi guireʼnu gana ne chuʼnu jma nayecheʼ yaʼ? Ni zacané laanu nga cadi guiaandaʼ laanu runi predicarnu purtiʼ racaláʼdxinu gunibiáʼ binni lá Dios ne gánnacaʼ jma de laabe. Ni jma risaca para laanu nga gusíʼdinu binni lá Dios ne guininu de Reinu stiʼ. Jesús guníʼ huaxiéʼ si binni zadxela neza ni riné laacaʼ lu guendanabani (Mat. 7:13, 14). Ora runi predicarnu rúninenu Jehová, Jesús ne ca ángel dxiiñaʼ tobi si (Mat. 28:19, 20; Apoc. 14:6, 7). Cadi guiaandaʼ laanu Jehová nga ruchiña binni ra nuu para gúnicaʼ ni nabe (Juan 6:44). Ne zándaca qué zucaadiaga binni laanu ora guni predicarnu laacaʼ primé biaje, peru sti biaje guinínenu laacaʼ zándaca maʼ zucaadiágacaʼ. Sicaríʼ guníʼ ti hermana láʼ Deborah: «Ora rireʼnu gana, zanda iquiiñeʼ Binidxabaʼ ni para guxheleʼ laanu de Dios». Peru jma napa Jehová poder que Binidxabaʼ. w20.12 26 párr. 18, 19; 27 párr. 21

Stale xpinni Cristu napa xidé gúnicaʼ dxiiñaʼ para gudiicaʼ ni caquiiñeʼ familia sticaʼ. Peru neca zacá, racanécabe organización stiʼ Dios biaʼ gándatiʼ. Nuu de laacabe racanécabe lu labor de socorro, nuu tu racané ra cabí ti lugar para gaca adorar Jehová ne guiranu zanda gudiʼnu donación para obra mundial. Zacá rusihuínnicabe nadxiicabe Dios ne prójimo stícabe. Guiráʼ semana rusihuínninu nadxiinu ca hermanu stinu ora riuunu reunión neca maʼ bidxáganu, runi participarnu lu reunión neca riuʼnu nervioso ne riguʼnu gana ca hermanu stinu ante o despué de reunión neca laaca nápanu problema (Heb. 10:24, 25). Guizáʼ rudiʼnu xquixe peʼ pur guiráʼ ni runi ca hermanu stinu riʼ. w21.01 10 párr. 11

Raca nagana para ca binni orgulloso guni felicitarcaʼ xcaadxi ne racaláʼdxicaʼ guni felicitárcabe laacaʼ. Ruchaagacaʼ ni rúnicaʼ né ni runi xcaadxi ne ruyúbicaʼ guni ganarcaʼ laacabe. Ne lugar de gusiidicaʼ sti binni ne gudiicaʼ autoridad laacabe, guiráʼ ni laacaʼ rúnicaʼ, purtiʼ riníʼ íquecaʼ pa gúnicaʼ ni zaree ni jneza o modo racaláʼdxicaʼ. Ruyubi ca binni riʼ puru si para laacaʼ ne rápacaʼ envidia xcaadxi. Nga runi, pa gudiʼnu cuenta cayácanu orgulloso, guinábanu Jehová gacané laanu guchaʼnu modo riníʼ íquenu ne cueenu ni de ndaaniʼ ladxidoʼno (Rom. 12:2). Rudiʼnu xquixe peʼ Jehová purtiʼ humilde laa (Sal. 18:35). Ridúʼyanu modo rusihuínnibe cualidad riʼ ora runi tratarbe ca xpínnibe, ne racaláʼdxinu chinándanu ejemplu stibe. Laaca racaláʼdxinu chinándanu ejemplu stiʼ ca xpinni Dios de dxiqué ni guca humilde ne ni gupa privilegiu de sánecaʼ Dios. Qué chuʼ dxi gusaana de guni respetarnu ne gusisácanu Jehová purtiʼ laasibe runi merecerbe ni (Apoc. 4:11). w20.08 13 párr. 19, 20

Dios gudixhe guichaganáʼ binni (1 Juan 1:8). Peru Stiidxaʼ Dios ná zapa ca ni maʼ bichaganáʼ «problema lu xquendanabánicaʼ» purtiʼ binni ruchee laacaʼ. Racalaʼdxiʼ Jehová gudii ca hermanu ni maʼ bichaganáʼ ni caquiiñeʼ familia sticaʼ ne gacanecaʼ laacabe chúʼcabe gaxha de Jehová (1 Tim. 5:8). Peru de lade guiráʼ ni runi ca hermana ni maʼ bichaganáʼ, laaca naquiiñeʼ cueecaʼ tiempu para gúʼndacaʼ Biblia guiráʼ dxi, guiníʼ íquecaʼ ni cayuundacaʼ ne guni orarcaʼ Jehová. Zándaca gácani nagana para laacabe purtiʼ guizáʼ riuu xhiiñacabe, peru nabé risaca gúnicabe ni. ¿Xiñee yaʼ? Purtiʼ racalaʼdxiʼ Jehová guni cada tobi de ca xpinni stipa para chuʼ gaxha de laabe (Hech. 17:27). Zándaca naquiiñeʼ guni ti gunaa ni maʼ bichaganáʼ stipa para guni respetar ne guzuubaʼ stiidxaʼ xheelaʼ, purtiʼ binni ruchee hombre ca. Peru pa chinándabe ni rusiidiʼ Biblia, ne guiénebe xi dxiiñaʼ maʼ bidii Jehová laabe ndaaniʼ familia qué zaca nagana para laabe guni respetarbe autoridad stiʼ xheelabe. w21.02 9 párr. 3, 6, 7

Ca prueba ni ridídinu zeeda gácacani casi guí ni riquiiñeʼ tuuxa para gudii forma ti espada. Ora rianda espada riʼ, rácani jma naguidxi. Zacaca nga laanu, ora ridídinu lu prueba jma riguidxi fe stinu. Nga runi, guníʼ Santiago ca diidxaʼ riʼ: «Pa qué gusaana de guni huantartu la? qué zápatu ra quiñeyúcabe laatu, ne zúnitu guiráʼ cosa jneza» (Sant. 1:4). Ora tídinu prueba riguidxi fe stinu, nga racané laanu guni huantarnu ni ne chuʼnu nayecheʼ. Lu carta ni bicaa Santiago bizeeteʼ caadxi de ca guendanagana ni zanda gucaa laanu maʼ cadi chuʼnu nayecheʼ. Tobi de laacani nga ora qué gánnanu xi gúninu. Ora tídinu lu xiixa guendanagana la? gúninu stipa guicaanu decisión ni chuulaʼdxiʼ Jehová, ni gacané ca hermanu ne ni gacané laanu cadi guchéʼnenu Jehová (Jer. 10:23). Caquiiñeʼ gácanu ti binni nuu xpiaaniʼ para guicaanu decisión jneza ne gánnanu xi guicábinu ca enemigu stinu. Ora qué gánnanu xi gúninu la? zándaca guiníʼ íquenu maʼ qué zanda gúninu gastiʼ ne pur laani maʼ cadi chuʼnu nayecheʼ. w21.02 28 párr. 7-9

Maʼ bisaana Jehová ti ejemplu galán para laanu. Nabé nadxiibe laanu, nga runi, pa gácanu leal laabe la? gastiʼ zanda guxheleʼ laanu de laabe (Rom. 8:38, 39). Ca diidxaʼ «de guidubi ladxidoʼto» caniʼni naquiiñeʼ guni tuuxa stipa para gannaxhii, ne ngaca nga ni naquiiñeʼ gúninu né ca hermanu stinu nuu biaje. Biblia cayabi laanu xi naquiiñeʼ gúninu ora guchiichi tuuxa hermanu laanu, sicaríʼ ná ni: «Lagusihuinni nadxiisaatu ora guni huantartu ni guni stobi laatu; laguni stipa pur chuʼtu tobi si casi ná espíritu ne cadi tíndetu» (Efes. 4:1-3). Cadi naquiiñeʼ guidúʼyasinu ra cucheecabe, sínuque naquiiñeʼ gúninu stipa guidúʼyanu laacabe casi ruuyaʼ Jehová laacabe (1 Sam. 16:7; Sal. 130:3). Nuu biaje raca nagana para laanu gannaxhiinu ca hermanu stinu né stale cariñu, jmaruʼ si ora ridúʼyanu puru si ra cucheecabe. Maca rizaaca ni bizéʼtenu riʼ lu primé siglu. Casi bizaaca Evodia ne Síntique. Ngue runi, gudxi Pablo laacaʼ «chuʼcaʼ tobi si lu ni riníʼ íquecaʼ ra cayúnicaʼ xhiiñaʼ Señor» (Filip. 4:2, 3). w21.01 22, 23 párr. 10, 11

Joven, riecheʼ ca hermanu de congregación ora ruuyacaʼ runineluʼ laacaʼ xhiiñaʼ Jehová tobi si (Sof. 3:9). Nabé riuuláʼdxicaʼ gúʼyacaʼ rúniluʼ xhiiñaʼ Jehová né stale gana. Runi respetar ca hermanu riʼ lii ne nápacabe confianza lii. Joven, cadi guiaandaʼ lii nadxii ne napa Jehová confianza lii. Guniʼbe lu ca últimu dxi riʼ ziuu stale joven ni zuni ni nabe de guidubi ladxidóʼ (Sal. 110:1-3). Nanna Jehová nadxiiluʼ laa ne racaláʼdxiluʼ gúniluʼ ni ná. Nga runi, gupa paciencia ne cadi guireeluʼ gana. Ora gucheeluʼ la? gucuaa ca conseju gudiicabe lii ne cadi guidxiichiluʼ ora uguu jnézacabe lii. Cadi guiaandaʼ lii zeedacani de Jehová (Heb. 12:6). Biʼniʼ ca dxiiñaʼ gudiicabe lii jneza. Ne ni jma risaca, biʼniʼ stipa gusiécheluʼ Jehová, Dios ni nadxii lii (Prov. 27:11). w21.03 7 párr. 17, 18

Nuu stale cosa ni zanda cuee gana laanu. Nuu de laacani rihuinni ne nuu ni coʼ. Zanda guireʼnu gana purtiʼ imperfectu laanu, rucheʼnu, raca huaranu, caʼruʼ guicaanu privilegiu ni racaláʼdxinu o purtiʼ runi predicarnu ti territorio ra qué riná binni gucaadiaga laanu. Pa guiníʼ ique xhaatanu imperfectu laanu ne rucheʼnu stale biaje, zanda chuʼnu triste ne dede guiníʼ íquenu qué zudii Jehová lugar chuʼnu ndaaniʼ guidxilayú cubi. Pa guiníʼ íquenu sicaríʼ zanda gacananu. Ni dxandíʼ la? binni ruchee de guiranu, ne Jesús si nga perfectu (Rom. 3:23). Peru cadi guiaandaʼ laanu, cadi puru si ra cucheʼnu cayuuyaʼ Jehová ne qué ribézabe gácanu perfectu. Nadxiibe laanu ne nápabe paciencia laanu. Nánnabe pabiáʼ stipa rúninu para gúninu ni jneza, riénebe laanu, ne nuube listu para gacanebe laanu (Rom. 7:18, 19). w20.12 22 párr. 1-3

Zanda guchaaganu xquendanabani ca xpinni Cristu casi ora zeʼ tuuxa de viaje, lugar ra racaláʼdxinu chindanu nga lu Guidxilayú cubi ra zuni mandar Jehová, Dios ni nadxii laanu. Guiráʼ dxi rúninu stipa sanu lu neza ni riné laanu lu guendanabani. Peru casi guníʼ Jesús nabéʼ neza riʼ ne nuu tiru nagana para sáʼ tobi luni (Mat. 7:13, 14). Cumu binni ruchee laanu la? nuu biaje rireechunu de lu neza riʼ (Gál. 6:1). Para cadi guireechunu de lu neza ni ziné laanu lu guendanabani, caquiiñeʼ guchaʼnu modo riníʼ íquenu, ni rúninu ne modo laanu. Nga runi caguu apóstol Pablo gana ca xpinni Cristu guchaacaʼ modo riníʼ íquecaʼ. Nagana nga gudii tobi cuenta pa jneza ni riníʼ ique ne ni runi sentir. ¿Xiñee yaʼ? Purtiʼ riguite ladxidoʼno laanu ne qué gánnanu xi zándaca gucaani laanu gúninu (Jer. 17:9). Ne nuu biaje riguítenu laca laanu (Sant. 1:22). Nga runi nabé risaca iquiiñenu Stiidxaʼ Dios para guidúʼyanu pa nuu xiixa ra naquiiñeʼ guchaʼnu. Racané Biblia laanu para gánnanu ximodo nácanu pur dentru, «xi riníʼ íquenu ne xi deseu nuu ndaaniʼ ladxidoʼno» (Heb. 4:12, 13). w20.11 18 párr. 1-3

Pa humilde laanu ne nánnanu nuu cosa ni qué zanda gúninu, zándaca jma nayecheʼ zabáninu. ¿Xiñee yaʼ? Purtiʼ ora nánnanu nuu cosa ni qué zanda gúninu, zudiʼnu lugar gacané xcaadxi laanu. Guietenaláʼdxinu dxi bisianda Jesús chii hombre napa lepra. Tobi si bibiguetaʼ para gudii xquixe peʼ laabe pur bisiándabe laa. Guca hombre riʼ humilde ne gúnnabe qué ñuu dxi ñándabe laasibe, ngue runi bidiibe xquixe peʼ ne bisisácabe Dios (Luc. 17:11-19). Guiráʼ ca binni humilde ne ca ni nanna nuu cosa ni qué zanda guni raca llevarcaʼ tutiica binni ne rápacaʼ jma xhamígucaʼ. ¿Xiñee yaʼ? Purtiʼ nánnacabe nuu binni napa cualidad galán ne rápacabe confianza laacaʼ. Laaca riéchecabe ora ruuyacabe cabeendú xcaadxi ni galán ra cayúnicaʼ ni ná Jehová, runi felicitárcabe ne runi respetárcabe laacaʼ. w20.08 12 párr. 17, 18