Marzo

«Ca dendxuʼ» ni riete lu parábola ni zeeda lu Mateo 25:31-36, laacabe nga ca binni nachaʼhuiʼ ni nabani lu ca últimu dxi ne nápacaʼ esperanza de guibánicaʼ lu Guidxilayú, laacabe nga grupu de xcaadxi dendxuʼ. Racanécabe xcaadxi biʼchiʼ Cristu ni nuuruʼ lu Guidxilayú ora runi predicárcabe lu guidubi naca Guidxilayú ne gusiidicabe binni (Mat. 24:14; 28:19, 20). Guiráʼ iza, caadxi semana ante gaca Conmemoración, rusihuinni xcaadxi dendxuʼ cayacanecaʼ ca biʼchiʼ Cristu. ¿Ximodo rúnicabe ni yaʼ? Ra guni invitárcabe binni cheʼ Conmemoración. Lu guidubi naca Guidxilayú, raca preparar grupu de xcaadxi dendxuʼ para gúnicaʼ Conmemoración. Guizáʼ riecheʼ grupu de xcaadxi dendxuʼ purtiʼ randa racanecaʼ ca biʼchiʼ Cristu. Nánnacabe nanna Jesús guiráʼ ni cayúnicabe para ca ungidu cayúnicabe ni para laa (Mat. 25:37-40). w22.01 22 párr. 11, 12

Rinándanu ejemplu stiʼ Jehová ora rúninu stipa gápanu ca cualidad ni bisihuinni Jesús ne guni tratarnu binni casi biʼniʼ tratarbe laacaʼ. Guzéʼtenu caadxi ejemplu, guca Jesús nachaʼhuiʼ né ti hombre ni napa lepra, biʼniʼ sentirbe ni cayuni sentir ti gunaa ni napa ti guendahuará nabé malu ne biabe ca binni ni gutiʼ familia stiʼ (Mar. 1:40, 41; 5:25-34; Juan 11:33-35). Pa gúninu stipa chinándanu ejemplu stiʼ Jehová, jma ziuʼnu gaxha de laa. Pa chinándanu ca pasu stiʼ Jesús qué zudiʼnu lugar cueechú guidxilayú malu stiʼ Binidxabaʼ riʼ laanu. Últimu gueelaʼ guyuu Jesús lu Guidxilayú, guníʼ: «Maʼ bineʼ ganar guidxilayú» (Juan 16:33). Ni ná Jesús nga qué nudii lugar nuchaa binni guidxilayú ni naguixhe ique guni ne modo riníʼ ique. Bíʼnibe stipa guni cumplirbe dxiiñaʼ ni gucuaabe lu Guidxilayú: gusiabe o guni santificarbe lá Jehová. Tiempu riʼ nuu stale cosa ni zanda cueechú laanu. Peru pa quixhe íquenu gúninu ni ná Jehová, cásica biʼniʼ Jesús, laaca zanda guni ganarnu Guidxilayú (1 Juan 5:5). w21.04 3, 4 párr. 7, 8

Gunna dxichi apóstol Pablo guiráʼ tu gapa fe Jesús zacaa «guendanabani ni qué zaluxe» (Juan 3:16; Rom. 6:23). Nanna dxíchinu gupa Pablo fe guti Cristu pur binni. Laaca gunna dxíchibe racalaʼdxiʼ Jehová guni perdonar ca ni biʼniʼ xiixa pecadu grave pa maʼ guca arrepentircaʼ de guidubi ladxidoʼcaʼ (Sal. 86:5). Biʼniʼ cré Pablo guizáʼ nadxii Dios laa purtiʼ nanna biseendaʼ Dios Jesús gatiʼ pur laa. Guidúʼndanu ca diidxaʼ bicaa Pablo ra maʼ ziluxe Gálatas 2:20. Laa bicaa: «Xiiñiʼ Dios, ni nadxii naa ne ni bidii xpida pur naa». Qué niníʼ ique Pablo zusaana Dios de gannaxhii laa, casi ñaca niníʼ ique: «Rieneʼ xiñee nadxii Jehová ca hermanu stinneʼ, peru nagana gannaxhiibe naa». Lugar de niníʼ íquebe zacá la? sicaríʼ gúdxibe ca romano: «Guti Cristu pur laanu dxi nácarunu pecador» (Rom. 5:8). Qué rusaana Dios de gannaxhii laanu. Gunna Pablo guizáʼ nadxii Dios laa. Gúnnabe gupa Jehová paciencia guidxi Israel. w21.04 22 párr. 8-10

Ora gudiʼnu estudiu, gacanenu estudiante stinu gannaxhii Jehová. Guidúʼyanu pora zanda guinínenu laabe de ca cualidad ni napa Jehová. Gacanenu laabe gúʼyabe naca Jehová ti Dios nayecheʼ ne racané ca binni ni nadxii (1 Tim. 1:11; Heb. 11:6). Guluinu laabe xi zabeendube pa gúnibe ni caziidibe ne gusiénenu laabe zusihuinni ca ni cueendube nadxii Jehová laabe (Is. 48:17, 18). Ra jma gannaxhii estudiante stinu Jehová, jma ziuulaʼdxiʼ guchaa modo nabani. Para ganda chúʼnisa ti estudiante naquiiñeʼ guni caadxi sacrificiu. Zándaca caquiiñeʼ gusaana de gaca xhamigu ca binni ni cadi nadxii Jehová. Ne nuu tu laa rucaanáʼ familia stiʼ laa purtiʼ qué riuuláʼdxicaʼ ni rusiidiʼ ca testigu stiʼ Jehová. Guníʼ Jesús zaguu Jehová ndaayaʼ ca discípulo stiʼ ra gudiibe laacaʼ ti familia, ca hermanu ne ca hermana (Mar. 10:29, 30). w21.06 4 párr. 8, 9

Dxiiñaʼ ni rúninu ora racanenu binni gaca discípulo bichaaga apóstol Pablo ni né dxiiñaʼ ni runi ti binni ni rusaba ti semiá para gapa ti yagahuiiniʼ. Sicaríʼ bisietenaláʼdxibe ca xpinni Cristu de Corinto: «Naa bidxiibaʼ, Apolos bizee [...]. Laatu nga layú ra cayuni Dios dxiiñaʼ» (1 Cor. 3:6-9). Laanu, ca ni rúninu dxiiñaʼ lu «layú ra cayuni Dios dxiiñaʼ», cadi rusábasinu ti semiá, sínuque laaca ruzeʼnu ni ne ridúʼyanu guiniisi ni. Peru nánnanu Dios nga rusiniisi ti semiáhuiiniʼ ni gudxíʼbanu. Ti privilegiu naroʼbaʼ nga guni predicarnu ne gusíʼdinu binni de lu Biblia. Laani nga dxiiñaʼ ni riguu laanu nayecheʼ. Apóstol Pablo, ni gucané stale binni de Tesalónica gaca discípulo, guníʼ ximodo biʼniʼ sentir: «¿Tuu nga gaca esperanza stidu, guendanayecheʼ stidu ne premiu ni gusiecheʼ laadu nezalube yaʼ? ¿Ñee cadi laatu la? Laatu nga ruchá típatu ladxidoʼdo ne rusiéchetu laadu» (1 Tes. 2:19, 20; Hech. 17:1-4). w21.07 3 párr. 5; 7 párr. 17

Maʼ bichiña Jehová cada tobi de laanu ra nuu (Juan 6:44). ¿Xi riníʼ ndiʼ yaʼ? Guníʼ ique ndiʼ, ora biʼyaʼ Jehová xi nuu ndaaniʼ ladxidóʼ guiráʼ binni nabeza lu Guidxilayú, biiyabe xiixa nabé risaca ndaaniʼ ladxidoʼno, biiyabe zanda gannaxhiinu laabe (1 Crón. 28:9). Runibiáʼ Jehová laanu, riene ne nadxii laanu. ¿Cadi dxandíʼ riguixhedxí ndiʼ ladxidoʼno la? Guizáʼ nadxii Jehová lii ne laaca nadxiibe ca hermanu stinu. Para ganda guiénenu guendarannaxhii stiʼ Jehová, gudixhe Jesús ti ejemplu. Pa napa ti pastor 100 dendxuʼ ne guiniti tobi de laacame, ¿xi zúnibe? «Zusaanabe 99 que lu ca dani ne ziyúbibe ni cananiti que», ne ora guidxélabe dendxuʼ ca la? qué zadxiichinebe laame, sínuque guizáʼ ziéchebe. ¿Xi rusiidiʼ ejemplu riʼ laanu? Rusiidiʼ ni laanu guizáʼ risaca cada dendxuʼ para Jehová, ni zeeda gaca casi ti pastor. Jesús guníʼ qué racalaʼdxiʼ Jehová «guiniti nin tobi de ca ni nahuiiniʼ» (Mat. 18:12-14). w21.06 20 párr. 1, 2

Ora guiníʼ íquenu pabiáʼ nadxii Jehová laanu, jma rannaxhiinu laa ne riuʼnu jma gaxha de laa (Rom. 8:38, 39). Purtiʼ rucaani laanu chinándanu ejemplu stiʼ Jesús (1 Ped. 2:21). Ca dxi ante gaca Conmemoración, ridúʼndanu ca relatu ni zeeda lu Biblia ni caníʼ xi biʼniʼ Jesús últimu semana bibani lu Guidxilayú, dxi gutiʼ ne dxi biasa de lade gueʼtuʼ. Ne gueelaʼ raca Conmemoración, rusietenalaʼdxiʼ discursu ca laanu pabiáʼ nadxii Jesús laanu (Efes. 5:2; 1 Juan 3:16). Ora guidúʼndanu ne guiníʼ íquenu modo bizuubaʼ Jesús stiidxaʼ Bixhoze rucaani laanu sanu cásica guzabe (1 Juan 2:6). Purtiʼ racané ni laanu cadi guixélenu de Dios ni nadxii laanu (Jud. 20, 21). Qué rixélenu de Jehová, Dios ni nadxii laanu, ora rúninu stipa guzúʼbanu stiidxaʼ, gusisácanu lá ne gusiéchenu ladxidóʼ (Prov. 27:11; Mat. 6:9; 1 Juan 5:3). Ora riuunu Conmemoración jma riuʼnu gana gábinu Jehová guiráʼ dxi: «¡Qué racalaʼdxeʼ gusaanaʼ de gacaʼ xhamíguluʼ!». w22.01 23 párr. 17; 25 párr. 18, 19

Bidii Jehová laanu libertad para cuinu xi gúninu. Ne pur regalu riʼ zanda cuinu xi gúninu né xquendanabáninu. Riecheʼ Dios ni nadxii laanu ora riguixe íquenu gúninu ni ná (Sal. 84:11; Prov. 27:11). Zanda iquiiñenu libertad ni bidii Dios laanu para gúninu ni jneza. Zanda chinándanu ejemplu stiʼ Jesús purtiʼ jma bizaalaʼdxiʼ ni caquiiñeʼ xcaadxi. Ti biaje, guizáʼ maʼ bidxaga Jesús ne ca apóstol stiʼ, ngue runi biyúbicaʼ ti lugar para guiziiláʼdxicaʼ. Peru qué ñanda niziiláʼdxiʼcabe purtiʼ yendá ti grupu de binni ra nuucabe para gucaadiágacaʼ Jesús. Lugar de nidxiichibe, biabe ca binni que ne «bizulú bisiidibe laacaʼ stale cosa» (Mar. 6:30-34). Rinándanu ejemplu stiʼ Jesús ora riquiiñenu tiempu stinu ne stipa stinu para gacanenu xcaadxi, ne ra gúninu ni rusisácanu Bixhózenu ni nuu guibáʼ (Mat. 5:14-16). w21.08 3 párr. 7, 8

Bizáʼ Jehová stale cosa. Gadxé tipu manihuiiniʼ, gadxé tipu yagahuiiniʼ ne dede gadxé modo bizaʼbe cada binni. Gastiʼ stobi casi laanu, nga runi qué ruchaaga Jehová laanu né xcaadxi. Ruuyaʼ Jehová ni nuu ndaaniʼ ladxidoʼno (1 Sam. 16:7). Laaca nánnabe xi zanda gúninu ne xi qué zanda gúninu ne modo biniisinu. Ne qué rinábabe laanu gúninu jma de biaʼ qué zanda gúninu. Naquiiñeʼ chinándanu ejemplu stibe ne guiníʼ íquenu modo riníʼ íquebe. Pa gúninu nga zaníʼ íquenu jneza ne qué zaníʼ íquenu jma risácanu o huaxiéʼ risácanu que xcaadxi (Rom. 12:3). Gastiʼ naca chinándanu ejemplu stiʼ ti hermanu ni nanna guni predicar (Heb. 13:7). Nga zacané laanu guni predicarnu jma jneza (Filip. 3:17). Galán nga guidúʼyanu ejemplu stiʼ tuuxa, peru cadi galán diʼ gúninu ni para si guchaaganu laanu ne laa. w21.07 20 párr. 1, 2

Pa guiduʼyaʼ chaahuinu ca manihuiiniʼ, ca yagahuiiniʼ ne ca beleguí ca, zaguidxi fe ni nápanu Dios ni bizáʼ guiráʼ cosa (Sal. 19:1). Ora jma guni estudiarnu ca cosa riʼ jma zuni crenu Jehová nga bizáʼ guiráʼ ni. Ora guni estudiarnu guiráʼ ni bizáʼ Dios, galán guiníʼ íquenu xi guiráʼ rusiidiʼ ni laanu de Jehová (Rom. 1:20). Guzéʼtenu ti ejemplu, rudii Gubidxa ca laanu biaaniʼ ne calor ni caquiiñeʼ para chuʼ guendanabani lu Guidxilayú, peru laaca rudiini laanu caadxi xtuxhu ni rábicabe rayos ultravioleta, ne malu ca xtuxhu riʼ. ¿Xi rapa binni guidxilayú para cadi guniná ca xtuxhu ca laa yaʼ? Nuu Guidxilayú riʼ ndaaniʼ ti capa de gas ni rábicabe ozono, ne zeeda gácani casi ti escudu ni rucueeza ca xtuxhu malu ca. Ora jma maʼ stale xtuxhu malu ca cundaa Gubidxa ca la? laaca jma stale gas ca riuu para gucueeza ni. Nga runi, ¿cadi dxandíʼ rábitu nuu tobi ni bizáʼ guirani ne nuu xpiaaniʼ ne nadxii binni la? w21.08 17 párr. 9, 10

Ora chúʼnisa tuuxa cadi naquiiñeʼ gusaana de gannaxhiinu ne guni respetarnu laa (1 Juan 4:20). Laaca cadi naquiiñeʼ guiníʼ íquenu biʼniʼ ti hermanu xiixa para si guniná stobi, sínuque guni respetarnu ca hermanu ne guiníʼ íquenu jma risácacaʼ que laanu (Rom. 12:10; Filip. 2:3). Laaca naquiiñeʼ guianu ne gácanu nachaʼhuiʼ né guiráʼ binni. Pa qué racaláʼdxinu guireʼnu de ndaaniʼ familia stiʼ Dios caquiiñeʼ gúninu guiráʼ ni rusiidiʼ Biblia. Guzéʼtenu ti ejemplu, bisiidiʼ Jesús naquiiñeʼ guianu ne gácanu nachaʼhuiʼ né guiráʼ binni dede né ca enemigu stinu (Luc. 6:32-36). Zándaca nuu biaje guiníʼ íquenu nagana gúninu ndiʼ. Pa zacá cazaacanu, naquiiñeʼ gúninu ne guiníʼ íquenu cásica biʼniʼ Jesús. Ora gúninu stipa pur guzúʼbanu stiidxaʼ Jehová ne chinándanu ejemplu stiʼ Jesús rusihuínninu racaláʼdxinu gácanu parte de familia stiʼ Jehová. w21.08 6 párr. 14, 15

Biziidi’ gápalu’ confianza Jehová. Maʼ guníʼ Jehová zundaateʼ ndaayaʼ stiʼ luguianu pa gápanu confianza laa ne gúninu ni ná de guidubi ladxidoʼno. Lu Biblia zeeda ejemplu stiʼ binni ni biʼniʼ stale stipa guni xhiiñaʼ Dios. Stale de laacabe gupa xidé primeru bisihuínnicaʼ nápacaʼ confianza Jehová, ne despué gucuaacaʼ ca ndaayaʼ stibe. Guzéʼtenu ti ejemplu, gucuaa Abrahán ndaayaʼ stiʼ Dios despué de bisaana lidxi ne zeʼ sti lugar «neca qué ganna paraa zeʼ» (Heb. 11:8). Ne Jacob la? gucuaa ndaayaʼ stiʼ Dios despué de bidxelasaané ti ángel (Gén. 32:24-30). Ne dxi mayaca chuʼ guidxi Israel ndaaniʼ Tierra Prometida, primeru guyuu ca sacerdote que ndaaniʼ guiiguʼ Jordán ne oraqueruʼ gudiʼdiʼ guidxi que (Jos. 3:14-16). Laaca zanda guiziidiluʼ de ejemplu stiʼ caadxi Testigu de tiempu riʼ ni napa confianza Jehová ne huayúbicaʼ modo gúnicaʼ jma lu xhiiñabe. w21.08 29, 30 párr. 12-14

Laatu, ca hermanu ne ca hermana ni maʼ huaniisi, nánnatu ximodo guca caadxi dxiiñaʼ ndaaniʼ xquidxi Jehová dxiqué, peru laaca nánnatu naquiiñeʼ guchaatu modo rúnitu ca dxiiñaʼ ca tiempu riʼ, ne pa nuu de laatu deruʼ guyuunisa, laaca zanda gacanetu xcaadxi. Guizáʼ ziecheʼ ca ni nahuiiniʼ gucaadiaga ca experiencia stitu ne guiráʼ ca ni maʼ biziiditu. Pa nápaluʼ costumbre de guiníʼneluʼ xcaadxi de ca experiencia stiluʼ, guizáʼ zaguu Jehová ndaayaʼ lii (Luc. 6:38). Ora guidxiña ca hermanu ni maʼ huaniisi ca hermanu ni nahuiiniʼ zanda gacanésaacaʼ (Rom. 1:12). Cada tobi zanda gacané stobi. Ca hermanu ni maʼ huaniisi nánnacaʼ stale ne nápacaʼ experiencia pur ca iza ni huabánicaʼ, ne ca ni nahuiiniʼ la? nápacaʼ stipa ne daʼcaʼ gana. Ora runi ca hermanu ni nahuiiniʼ né ca ni huaniisi dxiiñaʼ juntu, rusisácacaʼ Bixhózenu ni nuu guibáʼ ne nácacaʼ ti ndaayaʼ para congregación. w21.09 8 párr. 3; 13 párr. 17, 18

¿Xiñee qué ñuni cré ca judíu Jesús yaʼ? Purtiʼ guníʼ íquecabe pa ñaca Jesús nga Mesías qué ñátibe lu ti yaga casi ti gubaanaʼ ne ti pecador (Deut. 21:22, 23). Qué ñuni cré stale judíu Jesús ne qué ninacaʼ niniʼcaʼ qué gápabe donda. Cadi dxandíʼ guiráʼ donda ni bigaanicabe luguiabe ne cadi jneza modo biʼniʼ juzgárcabe laabe. Nánnanu cadi jneza guca juiciu que purtiʼ qué ninanda Sanedrín que modo ná ley naquiiñeʼ gaca juzgar ti binni (Luc. 22:54; Juan 18:24). Lugar de nucaadiágacaʼ ca prueba ni cusihuinni qué gapa Jesús donda, laga biyúbicaʼ «ti testimonio falsu contra Jesús para gúticaʼ laabe» (Mat. 26:59; Mar. 14:55-64). Despué de biasa Jesús de lade gueʼtuʼ, bidii ca juez riʼ «stale moneda de plata» ca soldadu stiʼ Roma ni cayapa ra baʼ que para gusiguiicaʼ ne guiniʼcaʼ xiñee guirutiʼ nuu ndaaniʼ baʼ que (Mat. 28:11-15). w21.05 11 párr. 12, 13

Ñanda nunitilú Jehová guidxilayú riʼ ora tiica si. Peru guizáʼ huabeendunu ni galán pur paciencia stibe. Cumu guiranu nga zanu de Adán ne Eva la? ralenenu donda. Peru neca zacá nadxii ne rapa Jehová laanu, ne laa maʼ guníʼ zabee guiráʼ cosa malu ni nuu tiempu riʼ (1 Juan 4:19). Ne Jehová maʼ gudixhe ti dxi para gunduuxeʼ ca cosa ni cayuniná ca xiiñiʼ. Pur nadxii Jehová laanu, naquiiñeʼ guni huantarnu casi cayuni huantarbe. Jehová nga ni jma nanna guni huantar. Ne laaca bisihuinni Jesús ni dxi guyuu lu Guidxilayú, purtiʼ biʼniʼ huantar ca diidxaʼ naná ni gúdxicabe laa, bisituícabe lú ne guti lu ti yaga pur laanu (Heb. 12:2, 3). Ejemplu stiʼ Bixhoze Jesús gucaneni laa guni huantar. Laanu laaca zanda gacané ejemplu stiʼ Jehová laanu guni huantarnu. w21.07 12, 13 párr. 15-17

Guiráʼ dxi, rusihuinni Bixhózenu ni nuu guibáʼ riá laanu (Sal. 103:10-14). Zaqueca biʼniʼ Jesús né ca discípulo stiʼ, neca binni ruchee laacaʼ biabe ne biʼniʼ perdonarbe laacaʼ. Dede bidiibe xquendanabánibe para ganda gaca perdonar ca pecadu stinu (1 Juan 2:1, 2). Jma rannaxhiinu ca hermanu ne ca hermana stinu ora runi perdonarnu laacaʼ (Efes. 4:32). Nuu biaje zaca nagana para laanu guni perdonarnu, peru naquiiñeʼ gúninu stipa gúninu ni. Ti hermana guníʼ gucané ti artículo ni biree lu Torre stiʼ ni rapa laa ni láʼ «Lagutiidilaʼdxiʼ donda stiʼ stobi casi runi Jiobá». Sicaríʼ bizeetebe: «Ora runi perdonarnu tuuxa qué riníʼdini jneza ni bíʼnibe, o qué ñuninabe lii. Peru ora runi perdonarluʼ maʼ qué ridxiichineluʼ binni ca ne maʼ zuni sentirluʼ galán». Ora runi perdonarnu ca hermanu stinu, rusihuínninu nadxiinu laacaʼ ne zinándanu ejemplu stiʼ Bixhózenu, Jehová. w21.09 23, 24 párr. 15, 16

Gunnaxhii Jesús ni dxandíʼ, ¿xii nga ni dxandíʼ ca yaʼ? Laani nga ni dxandíʼ de Dios ne de ca propósitu stiʼ. Guiráʼ ni biʼniʼ Jesús bisihuinni ni xi runi cré ne bisiidini xcaadxi binni (Juan 18:37). Laaca riuulaʼdxiʼ ca ni dxandíʼ xpinni Jesús gusihuínnicaʼ dxandíʼ ni runi crecaʼ pur modo nabánicaʼ (Juan 4:23). Pedro guníʼ naca religión stiʼ ca xpinni Cristu «neza ni dxandíʼ» (2 Ped. 2:2). Ca xpinni Cristu ni bibani lu primé siglu gunaazeʼ dxiichicaʼ ni runi crecaʼ, ngue runi bicaanacaʼ ni rusiidiʼ religión ni cadi dxandíʼ, tradición ne qué nucaadiágacaʼ ni zeeda si de xquendabiaaniʼ binni (Col. 2:8). Zacaca nga tiempu riʼ, ca ni dxandíʼ xpinni Cristu rúnicaʼ stipa pur sacaʼ «lu ni dxandíʼ» (3 Juan 3, 4). ¿Ximodo nga rizácabe lu ni dxandíʼ yaʼ? Ra gúnicabe stipa guni crécabe ne guibánicabe modo rusiidiʼ Stiidxaʼ Jehová (3 Juan 3, 4). Qué riníʼ diʼ ca testigu stiʼ Jehová nánnacaʼ guiráʼ ni zeeda lu Biblia. Huayuu biaje huacheecabe modo bisiénecabe xiixa tema ni zeeda lu Biblia o modo gudixhe chaahuicabe gaca xiixa ndaaniʼ congregación. Ora guizaaca nga la? runi chaahuicabe ca ni. w21.10 21, 22 párr. 11, 12

Tiempu bibani ca binni ni riete lu Biblia, rapa ca muru stiʼ ti guidxi ca binni que de ca enemigu sticaʼ. Zaqueca nga laanu, guendarannaxhii stiʼ Jehová rapa ni laanu de ca cosa ni zanda gusirá fe stinu. Ne pur guendarannaxhii stiʼ Jehová, ruchiña laanu ra nuu (Jer. 31:3). Biquiiñeʼ salmista David sti cosa para gusiene ximodo rapa Dios xquidxi. Sicaríʼ bicaabe: «Ra nuu Dios dxandíʼ zanda guilaʼyaʼ, Dios ni qué rusaana de gannaxhii naa». Ne laaca guniʼbe: «Laabe nga ni qué rusaana de gannaxhii naa ne ti lugar nadipaʼ para naa, ra zanda guilaʼyaʼ ne ni rulá naa, escudu stinneʼ ne ra nuusibe zanda chaaʼ» (Sal. 59:17; 144:2). ¿Xiñee guníʼ David naca guendarannaxhii stiʼ Jehová casi ti lugar ra zanda guilá ne ti lugar nadipaʼ para laa? Purtiʼ ra tiica si nabézanu, pa nácanu xpinni Jehová, zápabe laanu ne qué zudiibe lugar chuʼ xiixa ni guxheleʼ laanu de laabe. w21.11 6 párr. 14, 15

Ti biaje zeʼ Jesús né ca discípulo stiʼ ndaaniʼ ti canuá, málasi biasa ti tormenta lu nisadóʼ biquiiñeʼ Jesús ni bizaacaʼ riʼ para gacané laacabe gánnacabe caquiiñeʼ gápacabe jma fe (Mat. 8:23-26). Nadipaʼ tormenta que dede ruchii ca ola que canuá que, peru nisiaasiʼ Jesús. Guizáʼ cadxibi ca discípulo que ne guyecaʼ yegucuaanicaʼ Jesús para gulá laacaʼ. Para bicabi Señor laacabe né diidxaʼ nadóʼ: «¡Aque huaxiéʼ fe nápatu xa, hombre caʼ! ¿Xiñee nabé cadxíbitu pue?». ¿Ñee cadxaagaluluʼ ti guendanagana ni zeeda gaca casi ti tormenta la? Zándaca cayacanaluʼ pur ti desastre natural. O zándaca nápaluʼ ti guendahuará nabé malu ni maʼ bisidxaga lii ne maʼ qué guidxélaluʼ xi gúniluʼ. Nuu biaje, ziuuluʼ xizaa peru cadi gudiiuʼ lugar guirá confianza ni nápaluʼ Jehová. Bixheleʼ ladxidoʼloʼ nezalube ne gudxi laabe guiráʼ ni cayuni sentirluʼ. Zaguidxi fe stiluʼ pa guiníʼ íqueluʼ guiráʼ biaje huayacané Jehová lii (Sal. 77:11). Zanda chuʼluʼ seguru qué ziuu dxi gusaana Jehová lii. w21.11 22 párr. 7, 10

Zándaca nuu tu laa guiníʼ ique guendaribaʼnaʼ nga guicaa xiixa ni cadi stiʼ. Peru zándaca cuánabe de sti modo sin gudiibe cuenta. Guzéʼtenu ti ejemplu, pa iquiiñeʼ ti binni ti balanza o ti pesa ni qué riguubiáʼ jneza cabaʼnaʼ cliente stiʼ. Levítico 19:13 ruchaagani guendaribaʼnaʼ né ora cadi naca tuuxa honradu lu negocio stiʼ, purtiʼ luni ná: «Cadi quíteluʼ prójimo stiluʼ para guiaananeluʼ stiʼ». Nga runi pa cadi honradu tuuxa lu negocio stiʼ o lu xhiiñaʼ, cabaʼnaʼ. Mandamientu xhono que ná cadi naquiiñeʼ cuanaʼ binni, peru xcaadxi conseju ni riete lu Levítico que racaneni laanu gánnanu ximodo chinándanu ni ná ley que. Nga runi nabé risaca gánnanu ximodo ruuyaʼ Jehová ti binni ni ribaʼnaʼ ne ni cadi naca honradu. Pur ni ná Levítico 19:11-13, galán guiníʼ íquenu ndiʼ: «¿Ñee caquiiñeʼ guchaaʼ modo runeʼ negocio stinneʼ o modo runeʼ xhiiñaʼ la?». w21.12 10 párr. 6-8

Lu ca oración stinu, caquiiñeʼ guinábanu Jehová guni perdonar laanu pa bíninu xiixa cosa ni cadi jneza, peru pa biʼniʼ cometernu ti pecadu grave, naquiiñeʼ guinábanu ca ancianu gacanecaʼ laanu. Zucaadiágacaʼ ne zaquiiñecaʼ Biblia para gudiicaʼ conseju laanu, laaca zuni orarnécabe laanu ne zanábacabe Jehová guni perdonar laanu pur sacrificiu stiʼ Jesús, ti zacá ganda chuʼnu gaxha de Jehová sti biaje (Sant. 5:14-16). Laaca galán guiníʼ íquenu ni biʼniʼ Jesús ra gutiʼ pur laanu. Zándaca guiuubaʼ ladxidoʼno ora guiníʼ íquenu pabiáʼ bininácabe Xiiñiʼ Dios. Peru ra jma cueenu tiempu para guiníʼ íquenu sacrificiu biʼniʼ Jesús, jma zannaxhiinu laabe ne Bixhózebe. Guiráʼ iza, ora riuunu ne runi invitarnu binni cheʼ Conmemoración, rusihuínninu cudiʼnu xquixe peʼ Jehová ne Jesús pur ni bíʼnicaʼ pur laanu. ¡Ti privilegiu guizáʼ galán bidii Jehová laanu nga gusíʼdinu binni de Xiiñiʼ! w21.04 18, 19 párr. 13-16

Guiníʼ íquenu xi biʼniʼ Jesús ora yeyubi stale binni laabe dxi nuube gaxha de ti dani. Ti dxi ante, guidubi gueelaʼ biʼniʼ orar Jesús, ngue runi zándaca guizáʼ maʼ bidxaga. Peru ora bíʼyabe zeeda stale binni ra nuube, biabe ca pobre ne ca ni huará. Cadi bisiándasibe laacaʼ, sínuque laaca bidiibe tobi de ca discursu ni jma huayacané binni, laani nga Sermón del Monte (Luc. 6:12-20). Laaca biquiiñeʼ Jesús tiempu stiʼ para gacané binni. ¿Ñee riníʼ íquenu xi biʼniʼ sentir Jesús dxi gunna gutiʼ xhamígube Juan Bautista la? Biblia ná: «Ora gunna Jesús ni, gudxiʼbaʼ ndaaniʼ ti canuá ne guyé zitu de raqué para chuʼ stubi» (Mat. 14:10-13). Peru qué ñanda purtiʼ maʼ cabeza stale binni laabe lugar ra zebe que (Mar. 6:31-33). Bidiibe cuenta caquiiñeʼ ca binni que tu quixhedxí ladxidoʼcaʼ ne guiziidicaʼ de Dios (Luc. 9:10, 11). w22.02 21 párr. 4, 6

¿Xi caquiiñeʼ gúninu pa gudiʼnu cuenta maʼ bininanu ti xpinni Cristu yaʼ? Caquiiñeʼ guni orarnu Jehová de guidubi ladxidoʼno ne guinábanu laa uguu ndaayaʼ stipa ni gúninu pur guni chaahuinu guendanagana napanenu tuuxa. Ne sti cosa, naquiiñeʼ cueenu tiempu para guidúʼyanu ximodo nuunu. Guzéʼtenu ti ejemplu, zanda guiníʼ íquenu: «¿Ñee nuaaʼ dispuestu gusabaʼ iqueʼ, guinabaʼ gutiidiláʼdxicabe naa ne guneʼ chaahueʼ guendanagana napaniaʼ tuuxa la? ¿Ximodo zuni sentir Jehová ne Jesús pa naa peʼ guyubeʼ modo guneʼ chaahueʼ guendanagana napaniaʼ ti hermanu o ti hermana yaʼ?». Ora guiníʼ íquenu ca pregunta ca, zacanécani laanu gucaʼdiáganu Jesús ne guidxíñanu né stale humildad ca hermanu stinu para guni chaahuinu ca guendanagana napanenu laacaʼ. Ora guinínenu ti hermanu para guni chaahuinu ti guendanagana la? caquiiñeʼ gúninu ni né diidxaʼ nadóʼ (Efes. 4:2,3). Caquiiñeʼ guidxíñanu laabe para gusiándanu ca herida ni nápabe. Cadi guiaandaʼ laanu, jma risaca nga guni chaahuinu guendanagana napanenu tuuxa hermanu o hermana que guidúʼyanu tu biʼniʼ ni jneza o tu qué ñuni ni jneza (1 Cor. 6:7). w21.12 25, 26 párr. 13-16

Guyuu Jesús triste purtiʼ nanna qué zaná stale judíu gucaadiaga mensaje stiʼ Reinu. Ngue runi zanitilú Jerusalén ne ca judíu ni guilá la? zinécabe laacaʼ de esclavu (Luc. 21:20-24). Triste guininu ni, peru casi guníʼ Jesús, jma stale binni qué niná nucaadiaga laabe. ¿Ñee rucaadiaga binni mensaje stiʼ Reinu lugar ra nabézaluʼ la? Pa rúniluʼ stipa guni predicarluʼ peru huaxiéʼ binni riuulaʼdxiʼ gucaadiaga mensaje stiʼ Reinu yaʼ. ¿Xi zanda guiziidiluʼ de ora biʼnaʼ Jesús? Rizíʼdinu nadxii Jehová binni. Ora biʼnaʼ Jesús, bisihuínnini pabiáʼ rizaalaʼdxiʼ Jehová binni, purtiʼ «qué racaláʼdxibe guinitilú nin tobi, ni racaláʼdxibe nga gaca arrepentir guiráʼ binni» (2 Ped. 3:9). Zusihuínninu nadxiinu prójimo stinu ra gúninu stipa pur guni predicarnu ne chindá ca noticia galán ca ndaaniʼ ladxidóʼcabe (Mat. 22:39). w22.01 16 párr. 10-12

Zaca fe stinu naguidxi pa guiníʼ íquenu guiráʼ ni maʼ biʼniʼ Jehová pur xquidxi ne guiráʼ ni maʼ biʼniʼ pur laanu. Jma zannaxhiinu Jehová. Ndiʼ nga ndaayaʼ ni jma risaca. ¿Xiñee yaʼ? Purtiʼ racané cualidad riʼ laanu guzúʼbanu stiidxaʼ Jehová, gúninu xhiiñaʼ para gusiéchenu laa ne guni huantarnu intiica prueba (Mat. 22:37-39; 1 Cor. 13:4, 7; 1 Juan 5:3). Gastiʼ sti cosa jma risaca que gaca xhamígunu Dios ni jma nadxiinu, Jehová (Sal. 63:1-7). Cadi guiaandaʼ laanu cayuni adorarnu Jehová nga ora guni orarnu, ora guni estudiarnu ne ora guni meditarnu. Gúninu cásica biʼniʼ Jesús ne cueenu tiempu ne guyúbinu xiixa lugar para chuʼnu gaxha de Jehová. Gúninu stipa para cadi gaca distraernu. Ne ora chuunu reunión o cayuni estudiarnu, guinábanu Jehová gacané laanu cadi gaca distraernu. Pa gúninu stipa iquiiñenu tiempu stinu jneza, zaguu Jehová ndaayaʼ laanu ne zabáninu ndaaniʼ guidxilayú cubi para siempre (Mar. 4:24). w22.01 30, 31 párr. 18-20

Pur ca ni rúninu rihuinni xi riníʼ íquenu. Nga runi, Jesús bisiidiʼ naquiiñeʼ cueenu de ndaaniʼ íquenu intiica cosa malu ni zándaca gucaa laanu guni cometernu ti pecadu grave (Mat. 5:21, 22, 28, 29). Pa racaláʼdxinu gusiéchenu Bixhózenu ni nuu guibáʼ la? nagueendaca naquiiñeʼ cueenu de ndaaniʼ íquenu intiica cosa malu. Jesús guníʼ: «Intiica cosa guiree de ruaa binni la? zeeda ni de ndaaniʼ ladxidóʼ» (Mat. 15:18). Ni rininu rusihuinni ni xi nuu ndaaniʼ ladxidoʼno. Guníʼ ique ndiʼ: «¿Ñee siempre rinieeʼ ni dxandíʼ neca nannaʼ zapaʼ guendanagana la? Pa maʼ bichaganaʼyaʼ, ¿ñee rapaʼ cuidadu cadi guneʼ coquetearniáʼ sti binni la? ¿Ñee qué rinieeʼ o qué rucaadiagaʼ diidxaʼ inmoral la? ¿Ñee ricabeʼ né diidxaʼ nadóʼ ora chuʼ tu guchiichi naa la?». Gulee tiempu para guiníʼ íqueluʼ ca pregunta riʼ. Pa gúninu stipa cadi guininu mal de binni, cadi gusiguiinu ne cadi guininu diidxaʼ inmoral, jma nagueenda zusaananu modo gúcanu dxiqué. Casi ñaca nibeenu ti lari yooxhoʼ ládinu. w22.03 5 párr. 12-14

Ca ni rinabaʼ gudiicabe laa conseju lugar de cueza ni, jma nagueenda runi progresar. Nga runi, gúninu stipa guinábanu gudiicabe laanu conseju. ¿Pora nga zanda guinábanu conseju ca hermanu de congregación? Guidúʼyanu pora zanda gúninu ni. Primé, zanda guinabaʼ ti hermana ti publicador ni napa experiencia chiné laa para gudii estudiu ne despué zanda guinabadiidxabe laa xi zanda gúnibe para gusiidibe jma jneza. Guiropa, pa racalaʼdxiʼ ti hermana soltera siʼ pantalón, zanda guluiʼbe ti hermana ni maʼ huaniisi xii nga ni racaláʼdxibe sibe ne gacané laabe gúʼyabe gunáʼ nga ni zanda sibe. Ne guionna, ora chigudii ti hermanu primé discursu públicu ndaaniʼ congregación, zanda guinábabe ti hermanu ni maʼ napa experiencia gucaadiaga laabe ne gudii laabe caadxi sugerencia. Dede né ca hermanu ni maʼ napa stale iza de cudii discursu, zanda guinábacaʼ conseju xcaadxi hermanu ne chinándacaʼ ni (Prov. 19:20). w22.02 13 párr. 15-17

Cásica gunnaxhii Jehová Jesús dxi guyuu lu Guidxilayú riʼ, zacaca nadxiibe laanu (Juan 5:20). Gucanebe Jesús gaca fe stiʼ naguidxi, guluube gana laa dxi cadiʼdiʼ ra nagana ne bidiibe ni caquiiñeʼ para guibaniné. Ne gúdxibe Jesús nadxiibe laa ne rusiecheʼ laabe (Mat. 3:16, 17). Qué ñuu dxi ñuni sentir Jesús stubi, purtiʼ nanna siempre cayacané Bixhoze ni nuu guibáʼ laa. Cásica Jesús, guiranu huayuni sentirnu stale biaje pabiáʼ nadxii Jehová laanu. Guníʼ ique ndiʼ: Maʼ bidii Jehová lugar gaca xhamígunu laa, maʼ bidiibe laanu stale hermanu ne hermana ni nadxii laanu ne ni rusiecheʼ laanu ne ni racané laanu ora careʼnu gana (Juan 6:44). Rudiibe laanu ni caquiiñenu para iguidxi fe stinu. Ne laaca rudiibe laanu ni caquiiñenu para guibaninenu (Mat. 6:31, 32). Ora guiníʼ íquenu pabiáʼ nadxii Jehová laanu, jma rannaxhiinu laa. w21.09 22 párr. 8, 9

¿Ximodo gúcaluʼ ante guni estudiarluʼ Biblia né ca testigu stiʼ Jehová? Nuu de laanu qué lica racaláʼdxinu guietenaláʼdxinu ni. Zándaca pur modo gúcanu ne ni bíninu bisihuinni ni rinándanu modo nabani binni ni qué runibiáʼ Dios. Pa zacá bizaacanu, qué ñápanu esperanza, purtiʼ qué ñunibiaʼnu Dios stinu (Efes. 2:12). Peru ra cayuni estudiarluʼ Biblia, biziidiluʼ Jehová nga Bixhózeluʼ ne guizáʼ nadxiibe lii. Biziidiluʼ pa racaláʼdxiluʼ gusiécheluʼ Jehová, ne chuʼluʼ ndaaniʼ familia stiʼ, caquiiñeʼ guchaaluʼ modo nabániluʼ ne modo riníʼ íqueluʼ ne laaca biziidiluʼ naquiiñeʼ guibániluʼ modo ná ca ley stiʼ Dios (Efes. 5:3-5). Cumu Jehová nga bizáʼ laanu ne nácabe Bixhózenu la? nápabe derechu de guiniʼbe ximodo naquiiñeʼ guibani ca binni ni nuu ndaaniʼ familia stibe ne ndiʼ nga ni cayabi Jehová ca ni racalaʼdxiʼ chúʼnisa: «Lagusaana modo gúcatu dxiqué ne ca cosa ni bíʼnitu». w22.03 2 párr. 1-3

Rié xcaadxi dendxuʼ Conmemoración para gúʼyacaʼ ne guiéchecaʼ. Laaca riníʼ íquecaʼ esperanza ni nápacaʼ. Riuuláʼdxicabe gucaadiágacabe discursu stiʼ Conmemoración, purtiʼ luni riete xi chiguni Reinu stiʼ Cristu ne ca 144,000 pur binni lu ti mil iza. Ora maʼ guni mandar Rey, Jesucristu, zacané ca 144,000 gaca Guidxilayú riʼ ti Paraísu ne zacanécabe ca binni ni ruzuubaʼ diidxaʼ gácacaʼ perfectu. Guizáʼ riecheʼ millón de binni ni rié Conmemoración ora riníʼ íquecaʼ dxi maʼ gaca cumplir ca profecía ni zeeda lu Biblia casi Isaías 35:5, 6; 65:21-23 ne Apocalipsis 21:3, 4. Ora guiníʼ íquecabe maʼ nuucabe ndaaniʼ guidxilayú cubi né familia stícabe ne ca xhamígucabe, riguidxi esperanza stícabe ne racané ni laacabe gúnicabe jma lu xhiiñaʼ Jehová (Mat. 24:13; Gál. 6:9). w22.01 21 párr. 5-7

¿Xii nga rescate? Laani nga preciu ni gudixe Jesús para gudxiguetaʼ ni biniti Adán (1 Cor. 15:22). ¿Xiñee caquiiñenu ni yaʼ? Purtiʼ lu Ley stiʼ Jehová ná naquiiñeʼ gudiicabe guendanabani pur guendanabani (Éx. 21:23, 24). Biniti Adán guendanabani perfectu stiʼ. Ngue runi, para gaca cumplir Ley stiʼ Dios, naquiiñeʼ gudii Jesús guendanabani perfectu stiʼ pur binni (Rom. 5:17). Zacá qué zusaana Jesús de gaca Bixhoze guiráʼ ca ni gapa fe lu rescate o guendaguti stiʼ (Is. 9:6; Rom. 3:23, 24). Guyuu Jesús dispuestu gudii xquendanabani purtiʼ guizáʼ nadxii Bixhoze ne laanu (Juan 14:31; 15:13). Pur guendarannaxhii riʼ, qué nucheenebe Bixhózebe dede ra gútibe ne bíʼnibe ni ná. Pur guti Jesús pur laanu, zedandá dxi zaca cumplir ni gudixhe ique Jehová para binni ne Guidxilayú. w21.04 14 párr. 2, 3