Abril

Bisihuinni Jesús nadxii laanu ra guyuu dispuestu gatiʼ pur laanu (Juan 15:13). Dxandíʼ, qué zanda quíxenu laacabe guiráʼ ni maʼ bíʼnicabe pur laanu, peru pur modo nabáninu zusihuínninu rudiʼnu xquixe peʼ laacabe (Col. 3:15). Pur guti Jesús zanda gapa ca ungidu esperanza de checaʼ guibáʼ (Mat. 20:28). Pur fe ni nápacabe lu sacrificiu stiʼ Cristu, ruuyaʼ Jehová nácacabe binni nachaʼhuiʼ ne runi adoptar laacabe casi xiiñiʼ (Rom. 5:1; 8:15-17, 23). Laaca rusisaca xcaadxi dendxuʼ ni biʼniʼ Jesús, purtiʼ ra gápacaʼ fe lu rini ni bixhii Cristu, zanda chuulaʼdxiʼ Dios ni rúnicaʼ ne guilacaʼ de lu «gran tribulación» (Apoc. 7:13-15, nota). Ora rié guiropaʼ grupu riʼ Conmemoración guiráʼ iza, rusihuínnicaʼ rudiicaʼ xquixe peʼ ni biʼniʼ Jesús pur laacaʼ. w22.01 23 párr. 14, 15

Guyuu Jesús xizaa purtiʼ nácabe caniʼbe contra Dios o cadi cayuni respetarbe laa ne nombre stiʼ ne pur ngue biiticabe laa (Mat. 26:64-66). Guizáʼ gucaná ladxidoʼbe, ngue runi gulézabe ñuni Bixhózebe xiixa para cadi nugaanicabe donda íquebe (Mat. 26:38, 39, 42). Gupa xidé gucuá Jesús lu ti yaga para gulá ca judíu que de maldición stiʼ Ley (Gál. 3:10). Biaba maldición luguiácabe purtiʼ guníʼcabe zúnicabe ni ná Ley stiʼ Dios, peru qué ñúnicabe ni. Ne laaca nápacabe pecadu ni bisaanané Adán laacabe (Rom. 5:12). Ley bidii Dios dxiqué ná naquiiñeʼ gatiʼ ti hombre pa biʼniʼ cometer ti pecadu guizáʼ malu, ne guyuu biaje bicaacabe cuerpu stiʼ binni ni maʼ guti ca lu ti yaga (Deut. 21:22, 23; 27:26). Nga runi, pur gucuá Jesús lu yaga que, guleendú guidxi ni bicaanáʼ laabe stale cosa galán pur sacrificiu stibe. w21.04 16 párr. 5, 6

Guxuíʼlunu xi bizaaca Jesús últimu dxi guyuu lu Guidxilayú. Gudiñe ca soldadu romanu laabe (Mat. 26:52-54; Juan 18:3; 19:1). Gudíñecabe laabe né ti chicote dede gúxhani guidi ládibe. Despué biguáʼcabe laabe ti poste de yaga neca maʼ naze rini déchebe. Bizulú Jesús zixubiyú poste que para chiné ni ra chiguuticabe laa, peru nagueendaca biʼniʼ obligar ca soldadu que ti hombre guáʼ ni (Mat. 27:32). Ora yendá Jesús lugar ra chiguuticabe laa, bitaabicabe clavu náʼ ne ñee, ne ra maʼ cá lu yaga que, pur pesu stiʼ jmaruʼ si caxeleʼ ca herida stiʼ. Cayuunaʼ ne cayacaná jñaa ne ca xhamigu Jesús ne cayuni burla ca gobernante judíu laabe (Luc. 23:32-38; Juan 19:25). Xadxí biʼniʼ sufrir Jesús, maʼ apena cayuni corazón ne ca pulmón stibe dxiiñaʼ ne cayaca nagana para laabe guicaabe bi. Cumu nanna Jesús qué nucheené Bixhoze la? ora mayaca gátibe, biʼniʼ orarbe Jehová, óraque bigaanda íquebe ne bidiibe xquendanabánibe (Mar. 15:37; Luc. 23:46; Juan 10:18; 19:30). ¡Aque naná modo gutiʼ Jesús ne nabé feu modo biʼniʼ tratárcabe laabe! w21.04 16 párr. 4

Guniʼné Jesús ca apóstol stiʼ de chupa pactu: pactu nacubi ne pactu para ti Reinu (Luc. 22:20, 28-30). Pur ca pactu riʼ zanda gaca ca apóstol que ne xcaadxi xpinni Cristu rey ne sacerdote guibáʼ (Apoc. 5:10; 14:1). Nuu xcaadxi ungidu lu guiropaʼ pactu riʼ, ne pur nga laasicabe zanda gócabe pan ne guécabe vinu lu Conmemoración. Maʼ bidii Jehová laacabe ti esperanza nabé galán, guibánicabe guibáʼ né ti cuerpu ni qué ziuu dxi guinitilú ne ni qué ziuʼdxuʼ, zuninécabe Jesucristu dxiiñaʼ ne xcaadxi de ca 144,000 ne ziuucabe ra nuu Jehová (1 Cor. 15:51-53; 1 Juan 3:2). Nanna ca ungidu cadi naquiiñeʼ gucheenecaʼ Jehová dede dxi gáticaʼ (2 Tim. 4:7, 8). w22.01 21 párr. 4, 5

Ra gucuá Jesús lu yaga, laaca gucuá chupa gubaanaʼ cueʼbe (Luc. 23:40, 41). Tobi de ca gubaanaʼ riʼ biiyadxí Jesús ne guníʼ: «Jesús, bietenalaʼdxiʼ de naa ora guiuuluʼ lu Reinu stiluʼ» (Luc. 23:42). Nanna Jesús riá Bixhoze binni, ngue runi bidiibe esperanza gubaanaʼ que ante gatiʼ (Sal. 103:8; Heb. 1:3). Racalaʼdxiʼ Jehová guni perdonar ne gusihuinni riá laanu pa gaca arrepentirnu de ca cosa malu ni bíninu ne gusihuínninu runi crenu guti Jesús pur laanu (1 Juan 1:7). Peru ¿xi zanda gúninu pa nuu tiru raca nagana para laanu guni crenu maʼ biʼniʼ perdonar Jehová laanu yaʼ? Guiníʼ íquenu ndiʼ: pa Jesús bisihuinni riá ti gubaanaʼ ni deruʼ cusihuinni napa fe laabe, ¿ñee cadi laaca ziá Jehová ca xpinni ni runi adorar laa la? (Sal. 51:1; 1 Juan 2:1, 2). w21.04 9 párr. 5, 6

¿Xi guleendú Jesús pur qué nucheené Jehová dede ra gutiʼ yaʼ? Primé, bisihuínnibe rusiguii Binidxabaʼ, purtiʼ zanda guni ti binni perfectu ni ná Jehová neca gucaa Binidxabaʼ laa guchee. Guiropa, bidiibe xquendanabánibe para guilá stale binni. Pur ni bíʼnibe riʼ, zanda gaca binni ruchee xhamigu Dios ne gápacaʼ ti esperanza de guibánicaʼ para siempre. Ne guionna, bisihuinni Jesús Jehová si nga napa derechu para guni mandar ne bisiabe lá Bixhózebe. Guibáninu cada dxi casi ñaca laani nga últimu dxi nabáninu, ti zacá, pa gátinu la? zanda gábinu Jehová: «Bineʼ dede ra gúndatiʼ para cadi gucheeniaʼ lii, bisihuinneʼ rusiguii Binidxabaʼ, gucaniaʼ guiá laluʼ ne bisihuinneʼ lii si nápaluʼ derechu para guni mandarluʼ». w21.04 12 párr. 13, 14

Bigaaniʼ ca enemigu stiʼ Jesús donda ique pur xiixa ni qué ñuni, laaca biʼniʼ búrlacaʼ laabe, bininacaʼ ne bicaacaʼ laabe lu ti yaga. Cá clavu náʼ ne ñee Jesús ne naná para guicaa bi ne para guiníʼ. Neca zacá, caniʼbe purtiʼ nuu cosa risaca ni naquiiñeʼ guiniʼbe. Maʼ bizíʼdinu stale cosa risaca de ca últimu diidxaʼ ni guníʼ Jesús ante gatiʼ. Bizíʼdinu naquiiñeʼ guni perdonarnu xcaadxi ne gápanu confianza zuni perdonar Jehová laanu. Riéchenu nuunu ndaaniʼ ti familia ni runi ni ná Dios ne ni nuu listu para gacané laanu. Ne zanda guinábanu gacanécabe laanu ora caquiiñenu ni. Nánnanu zacané Jehová laanu guni huantarnu intiica prueba ni tídinu. Laaca riénenu pabiáʼ risaca nga guzúʼbanu stiidxaʼ Jehová cada dxi ne nanna dxíchinu zandisaʼ Jehová laanu de lade gueʼtuʼ pa gátinu. w21.04 8 párr. 1; 13 párr. 17

Pa chinándanu pasu stiʼ Jesús zacaanu guendanabani ni qué zaluxe. Dxi gunabadiidxaʼ ti joven ricu Jesús xi caquiiñeʼ guni para guicaa guendanabani ni qué zaluxe, gudxi Jesús laabe: «Gudáʼ ne dananda naa» (Mat. 19:16-21). Ne gudxi Jesús caadxi judíu ni qué runi cré pa laabe nga Cristu: «Runebiaʼyaʼ ca dendxuʼ stinneʼ [...] ne rinándacaʼ naa. Rudieeʼ laacaʼ guendanabani ni qué zaluxe» (Juan 10:24-29). Rusihuínninu nápanu fe Jesús ora rúninu guiráʼ ni bisiidiʼ ne ora rinándanu ejemplu stiʼ. Pa gúninu ni, qué zaréʼchunu de lu neza ni ziné lu guendanabani ni qué zaluxe (Mat. 7:14). Para ganda chinándanu ca pasu stiʼ Jesús né stale cuidadu, caquiiñeʼ gunibiaʼnu laabe primé. Para ganda gunibiáʼ chaahuinu Jesús, cadi naquiiñeʼ gusaana de gunibiaʼnu ca cualidad stibe, modo riníʼ íquebe ne ca mandamientu stibe. Guiranu naquiiñeʼ gúninu stipa guizíʼdinu de Jehová ne de Xiiñiʼ neca maʼ xadxí de nuunu ndaaniʼ xquidxi Dios o coʼ. w21.04 4 párr. 9, 10

Nánnanu guyuu biaje biʼniʼ sentir apóstol Pablo napa donda pur ca cosa ni cadi jneza biʼniʼ dxiqué. Laabe guniʼbe nácabe «ni jma pecador» lade guiráʼ pecador (1 Tim. 1:15). Ante gúnibe ni ná Jehová, nabé feu modo guzanándabe ca xpinni Cristu ndaaniʼ stale guidxi, biseguyoobe caadxi de laacaʼ ne bidiibe lugar guuti binni laacaʼ (Hech. 26:10, 11). Guxuíʼlunu dxiqué bidii Pablo lugar guuti binni ti guendaxheelaʼ ni naca xpinni Cristu ne yanna runibiaʼbe xiiñicaʼ. ¿Ximodo biʼniʼ sentir Pablo yaʼ? Guyuube triste pur ca cosa ni cadi jneza bíʼnibe. Peru nánnabe qué zanda gúnibe gastiʼ para gudxiguétabe tiempu. Gunna dxíchibe guti Cristu pur laabe ngue runi gunda bicaabe ca diidxaʼ riʼ: «Yanna maʼ nacaʼ ni nacaʼ purtiʼ guca Dios nachaʼhuiʼ né naa» (1 Cor. 15:3, 10). ¿Xi rizíʼdinu de ejemplu stiʼ Pablo yaʼ? Laaca naquiiñeʼ guni crenu guti Cristu pur cada tobi de laanu ne zacá zanda gaca xhamígunu Jehová (Hech. 3:19). Ni risaca para Dios nga ni gúninu yanna ne lu ca dxi ni zeeda ca, ne cadi ca cosa ni cadi jneza ni bíninu dxiqué (Is. 1:18). w21.04 23 párr. 11

Stale judíu ni bibani tiempu stiʼ Jesús cadi cabézacaʼ gatiʼ Mesías, guidúʼyanu xi maca bicaa ca profeta: «Bixhiibe rini stibe dede ra gútibe ne guluucabe laabe lade ca binni pecador; guyuaʼbe pecadu stiʼ stale binni, ne guniʼbe pur ca binni pecador» (Is. 53:12). Nga runi, neca biiticabe Jesús casi ti binni pecador, cadi naquiiñeʼ diʼ nucaa ngue ca judíu nusaanacaʼ laabe. Tiempu riʼ, ni zacané laanu cadi gusaana de gápanu fe nga ra guni estudiarnu ca cosa ni riete lu Biblia. Lu Sermón del Monte que guníʼ Jesús ziuu binni ni zusiguii ne zaníʼ «stale cosa malu» de ca discípulo stiʼ (Mat. 5:11). Zeedacani de Binidxabaʼ purtiʼ cadi dxandíʼ cani. Rucaabe ca enemigu stinu guiniʼcaʼ cosa ni cadi dxandíʼ de laanu (Apoc. 12:9, 10). Cadi guni creluʼ ca cosa ni cadi dxandíʼ ca ne cadi gudiiluʼ lugar guchibi cani lii ne gusirá cani fe stiluʼ. w21.05 11 párr. 14; 12 párr. 16

Gacanenu estudiante stinu gapa confianza Jehová. Gudxi Jesús ca discípulo stiʼ nadxii Jehová laacaʼ ne zacanebe laacaʼ (Mat. 10:19, 20, 29, 30). Gusietenaláʼdxinu estudiante stinu laaca zacané Jehová laa. Zanda gusíʼdinu laabe guyúbibe gacané Jehová laabe ora guni orarnenu laabe ne guzéʼtenu ca cosa ni naguixhe íquebe gúnibe. Franciszek, ti hermanu ni nabeza Polonia, guníʼ: «Lu ca oración ni biʼniné maestru stinneʼ naa, stale biaje bizeetebe ca cosa ni cá iqueʼ ugaandaʼ. Ora biiyaʼ ximodo bicabi Jehová oración stibe, naa laaca bineʼ orar. Bineʼ sentir gucané Jehová naa ora gunabaʼ dxi ra dxiiñaʼ para chaaʼ reunión ne asamblea». Yanna, pa qué gápanu nin ti estudiu yaʼ. ¿Ñee zándaruʼ gacanenu ca estudiante guni progresarcaʼ ne chuʼnísacaʼ la? Zanda. ¿Ximodo zanda gúninu ni yaʼ? Ora chinenu sti publicador chigudii estudiu. Cadi guiaandaʼ laanu rizaalaʼdxiʼ Jehová ca binni ni ricaa estudiu. Ne laaca rusisácabe stale ni rúninu para gacanenu binni guidxiña laabe ne nadxiibe laanu pur ca ni rúninu (Is. 52:7). w21.06 7 párr. 17, 18

Zanda gusihuínninu rusisácanu Stiidxaʼ Dios pa guidúʼndanu ni guiráʼ dxi. Qué zanda diʼ gápanu estudiu personal stinu ora si gápanu tiempu. Pa quíxhenu ti horariu para gápanu estudiu personal stinu, zacané ni laanu iguidxi fe stinu. Maʼ gadxé laanu de «ca binni nuu xpiaaniʼ» para binni guidxilayú, purtiʼ nápanu fe lu guiráʼ ni zeeda lu Stiidxaʼ Dios (Mat. 11:25, 26). Pur runi estudiarnu ni, nánnanu xiñee ziguchaa xpiaʼ binni ne xi chiguni Jehová pur laani. Nga runi, quixhe íquenu guquídxinu fe stinu ne gacanenu binni biaʼ gándatiʼ gápacaʼ fe Dios ni bizáʼ laanu (1 Tim. 2:3, 4). Nga runi, cadi gusaana de cuézanu né guendanayecheʼ guedandá dxi gusisaca guiráʼ ni nabeza lu Guidxilayú riʼ Jehová ne guiniʼcaʼ ca diidxaʼ ni cá lu Apocalipsis 4:11: «Jehová Dios stidu, lii nga runi merecerluʼ guicaaluʼ gloria, [...] purtiʼ lii bizaʼluʼ guiráʼ xixé ni nuu». w21.08 19 párr. 18-20

Napa ca ancianu responsabilidad de gudiicaʼ conseju ca hermanu ni caquiiñeʼ ni. Nga runi naquiiñeʼ gúnicabe stipa gudiicabe conseju ni gacané purtiʼ nga «nga ni rusiecheʼ ladxidóʼ binni» (Prov. 27:9). Nadxii ca ancianu ca hermanu. Nga runi, nuu biaje rudiicabe conseju tuuxa ni maʼ careechú (Gál. 6:1). Ora chigudii ti ancianu conseju tuuxa, naquiiñeʼ guiníʼ ique ximodo naquiiñeʼ gusihuinni guendarannaxhii ni bizeeteʼ apóstol Pablo: «Ti binni ni napa amor la? napa paciencia ne nachaʼhuiʼ. […] Runi soportar guiráʼ cosa, runi cré guiráʼ cosa, ribeza guiráʼ cosa, runi huantar guiráʼ cosa» (1 Cor. 13:4, 7). Pa guiníʼ ique ti ancianu ni ná ca versículo riʼ, zacané ni laa gudii cuenta pur nadxii binni nga chigudii conseju. Ne jma nagueenda ricaa ti binni conseju ora gudii cuenta dxandíʼ cazaaláʼdxicabe laa. w22.02 14 párr. 3; 15 párr. 5

Dxi bizáʼ Jehová ca ángel ne binni bíʼnibe laacaʼ perfectu. Peru ti ángel perfectu ni qué nuzuubaʼ stiidxaʼ Dios ni biree lá Binidxabaʼ (ni riníʼ tobi ni rucaalú) bicaa Adán ne Eva gudxiidéchecaʼ Jehová. Laaca bidxiideche xcaadxi binni ne xcaadxi ángel Dios (Jud. 6). Guizáʼ gucaná Jehová pur ngue. Peru cayuni huantarbe ne cabézabe guedandá dxi gunitilube cani cucaalú laabe. Guizáʼ ziecheʼ ca xpinni Jehová dxi guedandá dxi riʼ, purtiʼ laaca cayuni huantarcaʼ guiráʼ cosa malu ni nuu ndaaniʼ Guidxilayú riʼ. Ora guníʼ Binidxabaʼ mal de Job laaca guniʼbe runi ca xpinni Dios ni ná purtiʼ racaláʼdxicaʼ gudiibe laacaʼ xiixa ni galán (Job 1:8-11; 2:3-5). Ngaca nga ni riníʼ Binidxabaʼ dede yanna (Apoc. 12:10). Laanu zanda gusihuínninu rusiguii Binidxabaʼ ra guni huantarnu ca guendanagana ni nápanu ne ra cadi guchéʼnenu Jehová purtiʼ nadxiinu laa. w21.07 9 párr. 7, 8

Biquiiñeʼ apóstol Pablo ti ejemplu para gacané laanu guiénenu pabiáʼ risaca guchaʼnu modo laanu. Laabe guniʼbe naquiiñeʼ gucaʼnu modo gúcanu dxiqué lu ti yaga (Rom. 6:6). Guyuu Jesús dispuestu gucaacabe laa lu ti yaga purtiʼ racalaʼdxiʼ gusiecheʼ Jehová. Zacaca nga laanu pa racaláʼdxinu gusiéchenu Dios, naquiiñeʼ chuʼnu dispuestu gusaana de gúninu xiixa cosa malu ne costumbre ni nanalaʼdxiʼ Dios. Pa gúninu nga, zápanu ti conciencia nayá ne zápanu esperanza de guibáninu sin qué chuʼ dxi gátinu (Juan 17:3 ; 1 Ped. 3:21). Qué zuchaa diʼ Jehová ca ley stiʼ para si gusiecheʼ laanu, sínuque laanu nga naquiiñeʼ guchaʼnu ne chinándanu ca ley stibe (Is. 1:17-18; 55:9). Neca maʼ guyuunísaluʼ, biʼniʼ stipa gusaanaluʼ ca cosa malu ni ñuuláʼdxiluʼ ñúniluʼ. Gunabaʼ Jehová gacané lii né espíritu santu stiʼ ne cadi guiníʼ íqueluʼ stúbisiouʼ zanda gúniluʼ ni (Gál. 5:22; Filip. 4:6). Para gusaananu ca cosa ni bíninu dxiqué ne maʼ cadi gúnirunu ni, naquiiñeʼ gúninu stale stipa w22.03 6, 7 párr. 15-17.

Jehová cayabi laanu pa gúninu ni ná Reinu primé lu xquendanabáninu ne gúninu ni ná ca ley stiʼ zudii laanu ni guidoʼno, lari gácunu ne ti lugar ra cuézanu (Mat. 6:33). Nga runi cadi naquiiñeʼ guiníʼ íquenu zapa ca cosa material ni nuu lu Guidxilayú riʼ laanu ne zacanécani laanu guibáninu nayecheʼ. Nánnanu pa gúninu ni ná Jehová zápanu guendariuudxi (Filip. 4:6, 7). Dede pa nápanu bueltu para sinu stale cosa caquiiñeʼ guiníʼ íquenu pa nápanu tiempu ne stipa para iquiiñenu ne gápanu ca ni. Guiníʼ íquenu ndiʼ: «¿Ñee runiteʼ stale tiempu lu ca cosa ni napaʼ la?». Cadi guiaandaʼ laanu, ribeza Jehová guni ca ni nuu ndaaniʼ familia stiʼ xhiiñaʼ. Nga runi cadi naquiiñeʼ gudiʼnu lugar chuʼ xiixa ni gucueeza laanu para cadi gúninu ni. Qué racaláʼdxinu gácanu casi xa hombre ni bibani tiempu stiʼ Jesús, ni qué niná ñuni ni ná Jehová ne ñaca tobi de ca xiiñibe. ¿Xiñee qué ñúnibe ni yaʼ? Purtiʼ qué ninabe nusaanabe ca cosa material ni nápabe (Mar. 10:17-22). w21.08 6 párr. 17

Ra guni estudiarnu Biblia, zunibiaʼnu ca cualidad stiʼ Jehová, ne rihuinni ca cualidad riʼ lu guiráʼ ni bizaʼbe. Pa gunibiaʼnu ca cualidad ca, zuni crenu dxandíʼ nuu Jehová (Éx. 34:6, 7; Sal. 145:8, 9). Ra jma gunibiáʼ chaahuinu Jehová, jma zaguidxi fe ni nápanu laabe, jma zannaxhiinu laabe ne zaca xhamígunu laabe. Guinínenu binni xiñee nápanu fe Dios. Peru pa chuʼ tuuxa ni cayuni predicarnu guinabadiidxaʼ laanu pa dxandíʼ nuu Dios ne qué gánnanu xi guicábinu yaʼ? Guyúbinu lu ca publicación stinu respuesta stiʼ pregunta ni biʼniʼ binni ca laanu ne despué guluinu ni laabe. Laaca zanda guinábanu ti hermanu ni napa experiencia gacané laanu. Neca qué gucaadiaga binni ni biʼniʼ predicarnu ca laanu, zacané ni biʼniʼ investigarnu iguidxi fe stinu. w21.08 18 párr. 14, 15

Para gusiéchenu Jehová cadi caquiiñeʼ peʼ gusaananu guiráʼ ca cosa ni riuuláʼdxinu (Ecl. 5:19, 20). Peru pa qué gúninu jma lu xhiiñaʼ Dios purtiʼ si qué racaláʼdxinu gúninu xiixa sacrificiu la? zándaca gueeda guizaacanu casi hombre ni guníʼ Jesús purtiʼ laa bibani galán peru qué ñetenalaʼdxiʼ pa nuu Dios (Luc. 12:16-21). Ora nápanu guendanagana, runi orarnu Jehová ne riníʼ íquenu ximodo guni chaahuinu ni (Prov. 3:21). Stale modo riguu Jehová ndaayaʼ laanu. Zanda gudiʼnu xquixe peʼ laabe ra gúninu guiráʼ ni nuu lu nanu para gusisácanu laabe (Heb. 13:15). Zanda gúninu ni ra gúninu jma lu xhiiñaʼ Jehová. Pa gúninu ni la? jma zaguu Jehová ndaayaʼ laanu. Nga runi, guiráʼ dxi guyúbinu gánnanu ne guidúʼyanu pabiáʼ nachaʼhuiʼ Jehová (Sal. 34:8). Ne zacá zaninu casi guníʼ Jesús: «Guendaró stinneʼ nga guneʼ ni ná ni biseendaʼ naa ne guiluxe xhiiñaʼ» (Juan 4:34). w21.08 30, 31 párr. 16-19

Racalaʼdxiʼ Binidxabaʼ gácanu binni orgulloso. Purtiʼ nánnabe pa gácanu binni orgulloso, zácanu casi laabe ne zunítinu guendanabani ni qué zaluxe. Nga runi, gudixhená apóstol Pablo laanu ora guníʼ pa gácanu binni orgulloso zacaanu «condena ni gucuaa Binidxabaʼ» (1 Tim. 3:6, 7). Guiranu zanda gueeda guiábanu lu trampa stiʼ Binidxabaʼ neca huaxiéʼ tiempu zinenu de cayúninu ni ná Jehová o maʼ zinenu stale iza. Ti binni orgulloso ruyubi puru si para laa. Racalaʼdxiʼ Binidxabaʼ guiníʼ íquenu stúbinu zanda gúninu intiica cosa sin gacané Jehová laanu, jmaruʼ si ora nápanu guendanagana. Guzéʼtenu ti ejemplu, ¿ñee huagaanicabe donda íquenu pur ti cosa ni cadi laanu bíninu la? ¿Ñee huayúnicabe laanu ti cosa ni cadi jneza la? Ñuulaʼdxiʼ Binidxabaʼ nugáʼninu donda ique Jehová ne ca hermanu stinu. Ne laaca racaláʼdxibe guiníʼ íquenu zanda gúninu intiica cosa modo racaláʼdxinu lugar de chinándanu ca conseju stiʼ Jehová ni zeeda lu Stiidxaʼ (Ecl. 7:16, 20). w21.06 15 párr. 4, 5

Bidii Jehová ti dxiiñaʼ risaca profeta Ageo. Zándaca né Ageo nga biree de Babilonia ne biguetaʼ Jerusalén lu iza 537 ante de ca dxi stiʼ Jesús. Qué nindaa de yendá ca xpinni Dios Jerusalén, gudíxhecaʼ base stiʼ templu stiʼ Jehová (Esd. 3:8, 10). Triste guininu ni purtiʼ qué nindaa de bizulúcabe dxiiñaʼ que bicaalú binni laacabe ngue runi bireecabe gana ne bisaanacabe ni (Esd. 4:4; Ageo 1:1, 2). Ngue runi, lu iza 520 biseendaʼ Jehová Ageo chinduu gana ca binni que para gunduuxecaʼ templu que (Esd. 6:14, 15). Mensaje ni gucuaa Ageo que zeeda ni de Jehová. Nánnanu nabé guyuu ca judíu que gana ora binadiágacaʼ guníʼ Ageo «Jehová, Dios stiʼ ca ejércitu». Pa racalaʼdxiʼ ca judíu que gunduuxecaʼ dxiiñaʼ ni gucuaacaʼ que, naquiiñeʼ gápacaʼ confianza Jehová purtiʼ laa napa ti ejércitu naroʼbaʼ de ángel. w21.09 15 párr. 4, 5

Tiempu riʼ, ca testigu stiʼ Jehová ni nuu lu guidubi naca Guidxilayú nadxiisaacaʼ ne nuucaʼ tobi si. Maʼ gadxé laanu que xcaadxi religión purtiʼ nácanu ti familia neca de gadxé gadxé guidxi ne cultura laanu. Ne rihuinni nadxiisaanu lu ca reunión ne lu ca asamblea ni rápanu. Ndiʼ racané laanu ganna dxiichinu laasinu nga runi adorarnu Jehová modo riuulaʼdxiʼ (Juan 13:34). Biblia ná: «Ni jma naquiiñeʼ gúnitu nga gannaxhiisaatu» (1 Ped. 4:8). Ti modo zanda gusihuínninu nadxiisaanu nga ra guni perdonarnu ne guni huantarnu ni guni xcaadxi laanu purtiʼ binni ruchee laacaʼ. Laaca ruyúbinu modo gacanenu ne gácanu hospitalariu né guiráʼ hermanu dede né ca ni huayuniná laanu (Col. 3:12-14). Guendarannaxhii riʼ rusihuinni ni dxandíʼ xpinni Cristu laanu. w21.10 22 párr. 13, 14

Ora gaca expulsar ti binni ni biʼniʼ ti pecadu zanda gacaneni laa gaca arrepentir ne guchaa. Stale de ca binni ni biʼniʼ ti pecadu grave, maʼ biiyacaʼ biaʼsi ngue disciplina ni bidii ca ancianu laacaʼ, purtiʼ gucaneni laacaʼ gudiicaʼ cuenta cadi jneza ni bíʼnicaʼ, guchaacaʼ ne guibiguétacaʼ ra nuu Jehová sti biaje (Heb. 12:5, 6). Guzéʼtenu ejemplu riʼ. Biiyaʼ ti pastor huará tobi de ca dendxuhuiiniʼ stiʼ. Nánnabe naquiiñeʼ cueechube laame de xcaadxi dendxuʼ para ganda gusiándabe laa. Peru cadi biaa diʼ ca dendxuhuiiniʼ ca chuʼcaʼ stúbicaʼ. Riuuláʼdxicame chúʼcame lade xcaadxi dendxuʼ ne ridxíbicame ora rireecame de lade xcaadxi. Yanna, pa cueechú pastor ca ti dendxuhuiiniʼ para gusiándabe laa, ¿ñee riníʼ nga cayuninabe laame la? ¡Coʼ xa! Nánnabe pa gudiibe lugar guiaana dendxuhuiiniʼ ca lade xcaadxi dendxuʼ la? zacá guendahuará ca laacame. Nga runi napa xidé cueechube dendxuhuiiniʼ ni huará ca para gápabe xcaadxi dendxuʼ. w21.10 10 párr. 9, 10

Nuunu nayecheʼ purtiʼ nuunu lade stale hermanu ne hermana ni nadxiisaa ni nuu lu guidubi Guidxilayú. Ne racaláʼdxinu gacanenu stale binni guni adorarnecaʼ laanu Jehová. Nga runi qué racaláʼdxinu gúninu xiixa ni gucaa binni guiníʼ mal de Bixhózenu ni nuu guibáʼ o de ca Testigu. Siempre rúninu stipa gúninu ni riuulaʼdxiʼ Dios ti chuulaʼdxiʼ binni gucaadiaga ca noticia galán. Nuu biaje zuni binni menu laanu o dede zazanándacaʼ laanu purtiʼ ruzúʼbanu stiidxaʼ Bixhózenu ni nuu guibáʼ. ¿Xi zanda gúninu pa ridxíbinu guinínenu binni de ni runi crenu yaʼ? Cadi guiaandaʼ laanu zacané Jehová ne Jesús laanu. Gudxi Jesús ca discípulo stiʼ cadi chuʼcaʼ xizaa xi guiniʼcaʼ o ximodo guiniʼcaʼ. Sicaríʼ gúdxibe laacaʼ: «Zánnatu xi guiniʼtu ora peʼ maʼ caquiiñetu ni. Purtiʼ cadi laasitu nga chiguiniʼtu, sínuque espíritu stiʼ Bixhózetu nga guiníʼ pur laatu» (Mat. 10:19, 20). w21.09 24 párr. 17, 18

Laaca guníʼ Moisés naca Dios ti lugar ra zanda guilá binni (Sal. 90:1, nota). Ante gátibe, guniʼbe caadxi diidxaʼ nabé galán. Sicaríʼ bicaabe: «Maʼ xadxí nga naca Dios ti lugar ra zanda guilá binni, né ca nabe ni qué ziuu dxi guinitilú nuabe lii» (Deut. 33:27). Ca diidxaʼ «né ca nabe ni qué ziuu dxi guinitilú nuabe lii», ¿xi rusiidiʼ ni laanu de Jehová? Ora ruyúbinu guilanu ra nuu Jehová, ratadxí ladxidoʼno purtiʼ nánnanu zápabe laanu. Neca zacá, zándaca ziuu biaje zuni sentirnu triste ne zareʼnu gana. ¿Xi zuni Jehová pur laanu ora guizaacanu nga yaʼ? (Sal. 136:23). Né stale cariñu zandísabe laanu né ca nabe (Sal. 28:9; 94:18). Ra gánnanu qué zusaana Dios laanu zacané ni laanu guietenaláʼdxinu chupa ndaayaʼ ni maʼ ricaanu. Primé, ra tiica si nabézanu nánnanu ra nuu si Jehová zanda guilanu. Ne guiropa, guizáʼ rizaalaʼdxiʼ Bixhózenu ni nuu guibáʼ laanu. w21.11 6 párr. 15, 16

Nanna Jesús zahuinni pa naguidxi nuu fe stiʼ ca discípulo stiʼ ora guni binni laacaʼ cosa ni cadi jneza. Para gacanebe laacaʼ guni huantarcaʼ, guniʼbe ti historia ni zanda guidxélanu lu libru stiʼ Lucas. Bizeetebe de ti viuda ni nabé guyé ra nuu ti juez ni qué runi ni jneza para guinabaʼ laabe gúnibe justicia. Nanna viuda riʼ, pa qué gusaana de guinabaʼ gacané juez que laa, zuni ni. Ne zaqué gúcani. ¿Xi rusiidiʼ ndiʼ laanu yaʼ? Nánnanu jneza runi Jehová ne cadi casi juez ni bizeeteʼ Jesús que laabe. Nga runi, guníʼ Jesús: «¿Ñee qué zuuyaʼ Dios gaca justicia pur ca binni ni maʼ gulí, ca ni rucaa ridxi laabe ridxíʼ ne huaxhinni [...] la?» (Luc. 18:1-8). Despué guníʼ Jesús: «Ora gueeda Xiiñiʼ Hombre, ¿ñee zadxélabe fe riʼ lu guidxilayú la?». Ora guni binni laanu cosa ni cadi jneza, naquiiñeʼ gusihuínninu naguidxi fe stinu cásica viuda que ra gápanu paciencia ne cadi guireʼnu gana. Fe ca zacané laanu gánnanu zacané Jehová laanu. Laaca naquiiñeʼ guni crenu zacané oración laanu. w21.11 23 párr. 12; 24 párr. 14

Joven, ¿ñee runi sentirluʼ nuu biaje rucueezaʼ ca ley stiʼ Jehová lii de gúniluʼ stale cosa la? Nga peʼ nga ni racalaʼdxiʼ Binidxabaʼ guiníʼ íqueluʼ, racaláʼdxibe gúʼyaluʼ ni runi ca ni zeʼ lu neza xilaga ne gúʼyaluʼ galán modo raca divertircaʼ. Racaláʼdxibe gucaabe lii guiníʼ íqueluʼ qué raca divertirluʼ casi ca compañeru de ra scuela stiluʼ o casi ca binni ni ruuyaluʼ lu internet ne racaláʼdxibe guiníʼ íqueluʼ cayaxha ca ley stiʼ Jehová lii stale cosa galán. Peru cadi guiaandaʼ lii qué lica racalaʼdxiʼ Binidxabaʼ guʼyaʼ ca ni zeʼ lu neza xilaga riʼ xi cabeza laacaʼ ra riluxe ni (Mat. 7:13, 14). Peru Jehová maʼ biluíʼ lii xi zacaa ca ni guiaana lu neza ni ziné lu guendanabani (Sal. 37:29; Is. 35:5, 6; 65:21-23). w21.12 23 párr. 6, 7

Nánnanu caquiiñeʼ guni perdonarnu. Neca zacá, zándaca gácani nagana para laanu. Nga ca nga ni bizaaca apóstol Pedro caadxi biaje (Mat. 18:21, 22). ¿Xi zanda gacané laanu yaʼ? Primé, naquiiñeʼ guiníʼ íquenu panda biaje maʼ biʼniʼ perdonar Jehová laanu (Mat. 18:32, 33). Qué gapa Jehová xi pur guni perdonar laanu, peru rúnibe ni stale biaje (Sal. 103:8-10). Zaqueca laanu «laaca nuunu obligadu gannaxhiisaanu». Nga runi, cadi cayabi Jehová laanu pa zanda guni perdonarnu, naquiiñeʼ gúninu ni (1 Juan 4:11). Guiropa cosa ni zacané laanu nga guiníʼ íquenu xi rizaaca ora runi perdonarnu. Racanenu binni ni biʼniʼ tratar laanu mal, racanenu chuʼ congregación tobi si, qué rusaana de gaca xhamígunu Jehová ne riuʼnu nayecheʼ (2 Cor. 2:7; Col. 3:14). Guionna cosa ni zacané laanu nga guni orarnu Jehová purtiʼ laa rinabaʼ laanu guni perdonarnu xcaadxi. Cadi gudiʼnu lugar guxheleʼ Binidxabaʼ laanu de ca hermanu stinu (Efes. 4:26, 27). Caquiiñenu gacané Jehová laanu para cadi guiábanu lu ca trampa stiʼ Binidxabaʼ. w21.06 22 párr. 11; 23 párr. 14

Canagucachilú David de rey Saúl purtiʼ nuu guuti laabe. Cumu qué gapa David ni gó la? ngue runi biaanabe ndaaniʼ guidxi Nob ne gunábabe gudiicabe laabe gaayuʼ si pan (1 Sam. 21:1, 3). Despué yegucaachilú David né ca xpinni ndaaniʼ ti cueva (1 Sam. 22:1). ¿Xiñee cadxaagalú David ca guendanagana riʼ yaʼ? Ora biʼyaʼ Saúl maʼ biʼniʼ ganar David stale guerra ne maʼ stale binni runibiáʼ laa bizulú gupa envidia laabe. Laaca gunna Saúl pur qué nuzuubaʼ diidxaʼ maʼ qué ni ná Jehová ñácabe rey de Israel ngue runi gulí David para gacaʼ rey (1 Sam. 23:16, 17). Cumu nácaruʼ Saúl rey stiʼ guidxi Israel la? náparuʼ ti ejércitu naroʼbaʼ ne stale binni ni cayacané laa, ngue runi gupa xidé bixooñeʼ David para cadi guutibe laa. ¿Ñee zanda xa gucueeza Saúl ni guníʼ Jehová de David? (Is. 55:11). Qué ruzeeteʼ diʼ Biblia pa nga nga ni guníʼ íquebe ni nánnanu nga ca binni ni rucaalú Dios la? siempre runíticaʼ. w22.01 2 párr. 1, 2

Guizáʼ biʼniʼ predicar Jesús. Cumu nadxiibe binni la? Ora tiica guleebe tiempu para gusiidibe laacaʼ (Luc. 19:47, 48). Ne cumu biabe binni, bicaani laabe gusiidibe laacaʼ. Guyuu biaje bidxiña stale binni Jesús ne ca discípulo stiʼ para gucaadiágacaʼ ni cusiidibe dede qué ñápacabe tiempu para gócabe (Mar. 3:20). Ne ora yeyubi ti hombre laabe huaxhinni, guyuube dispuestu guiníʼnebe laa. Dxandíʼ nga stale binni bicaadiaga Jesús neca zaqué qué ñácacaʼ discípulo stibe peru guiracaʼ gúnnacaʼ xi bisiidibe. Tiempu riʼ, racaláʼdxinu gunadiaga binni mensaje stiʼ Reinu (Hech. 10:42). Para ganda gúninu ni la? laaca naquiiñeʼ guchaʼnu modo runi predicarnu. Nga runi lugar de guni predicarnu hora rábinu la? naquiiñeʼ chuʼnu dispuestu guchaʼnu hora runi predicarnu para guidxélanu jma binni. Pa gúninu ni, ziuʼnu seguru zusiéchenu Jehová. w22.01 17 párr. 13, 14

Tiempu riʼ raca nagana para stale binni gapa confianza ca ni napa autoridad. ¿Xiñee yaʼ? Purtiʼ ruuyacabe racané ley ca binni ni naca ricu ne ca ni napa autoridad, peru ca binni pobre la? qué racanécabe laacaʼ. Ne pur ni runi caadxi líder stiʼ ca religión ca rucaa ni binni cadi gapa confianza Dios. Nga runi naquiiñeʼ gacanenu ca estudiante stinu gápacaʼ confianza Dios ne ca ni maʼ gulibe para guni dirigir laanu. Cadi ca estudiante si stinu nga naquiiñeʼ gapa confianza Jehová ne organización stiʼ. Laanu, ca ni maʼ zinenu stale iza ndaaniʼ xquidxi Jehová, cadi naquiiñeʼ gusaana de gápanu confianza jneza guiráʼ ni runi Jehová. Purtiʼ zándaca guizaaca xiixa cosa ra naquiiñeʼ gusihuínninu pa naguidxi nuu fe stinu. w22.02 2 párr. 1, 2