Mayo

Cumu nadxii Jehová laanu la? Guniʼbe guicá lu Biblia tapa Evangeliu ni zacané laanu gunibiaʼnu Xiiñibe. Lúcani zadxélanu modo bibani Jesús ne modo biʼniʼ xhiiñaʼ Dios, laaca riete xi guniʼbe, xi bíʼnibe ne xi biʼniʼ sentirbe. Racané guidapaʼ libru riʼ laanu guiníʼ ique chaahuinu ejemplu stiʼ Jesús. Laaca racanécani laanu chinándanu ca pasu stiʼ Jesús. Pa guidúʼndanu ca Evangeliu riʼ, zanda gunibiáʼ chaahuinu laabe ne chinándanu ca pasu stibe né stale cuidadu. Cadi naquiiñeʼ guidúʼndanu ca Evangeliu para si gánnanu ximodo bibani Jesús, laaca caquiiñeʼ cueenu tiempu para guni estudiarnu ni nácani ne guiníʼ íquenu ni cadúʼndanu (bichaagani né Josué 1:8). Naquiiñeʼ guiníʼ íquenu nuunu lu relatu ni cadúʼndanu ca. Guxuíʼlunu, cadúʼyanu, cayunadiáganu ne cayuni sentirnu ni cazaaca lugar ca. Zanda gacané ca publicación ni rudii xquidxi Jehová laanu para guyúbinu jma información. w21.04 5 párr. 11-13

Stale iza ante gueeda Jesús lu Guidxilayú maca guníʼ Jehová lu Stiidxaʼ zuni traicionárcabe Mesías pur 30 moneda de plata (Zac. 11:12, 13). Ne tobi de ca xhamígube nga guni traicionar laabe (Sal. 41:9). Laaca bicaa Zacarías, zuni herírcabe pastor ne zareechendase ca dendxuʼ (Zac. 13:7). Ca binni ni dxandíʼ nadxii Dios, qué zucaanacaʼ Jesús pur ca cosa riʼ. Lugar de nga la? zaguidxi fe sticaʼ purtiʼ cayuuyacaʼ cayaca cumplir ca profecía que luguiáʼ Jesús. ¿Ñee ngaca rizaaca tiempu riʼ la? Ngaca. Caadxi testigu stiʼ Jehová maʼ bisaanacaʼ ni runi crecaʼ ne maʼ gúcacaʼ apóstata ne maʼ bicaacaʼ xcaadxi guixeleʼ de Dios. Riquiiñecabe Internet ne ca mediu de comunicación para guiníʼcabe cosa ni cuee gana binni ne guiníʼcabe cosa ni cadi dxandíʼ de ca testigu stiʼ Jehová. Peru ca binni ni dxandíʼ nadxii Dios, qué runi crecaʼ ca cosa riʼ purtiʼ nánnacabe maca cá lu Biblia zazaaca cani (Mat. 24:24; 2 Ped. 2:18-22). w21.05 11 párr. 12; 12 párr. 18, 19

Maca cá lu Stiidxaʼ Dios chaahuiʼ chaahuiʼ nga ziene xquidxi Dios xi racaláʼdxibe gúnicaʼ (Col. 1:9, 10). Chaahuiʼ chaahuiʼ nga rusiene Jehová laanu xii nga ni dxandíʼ, nga runi naquiiñeʼ gápanu paciencia ne cuézanu dede ora guiene chaahuinu ni dxandíʼ. Ora rudii ca hermanu ni runi dirigir xquidxi Dios cuenta caquiiñeʼ guchaacaʼ modo riénenu xiixa o modo raca xiixa, nagueendaca rúnicaʼ ni. Stale religión ni cadi dxandíʼ ruchaacaʼ ni rúnicaʼ o ni runi crecaʼ para gusiéchecaʼ ca xpínnicaʼ o para chuulaʼdxiʼ binni ni rúnicaʼ. Peru ca testigu stiʼ Jehová ruchaacaʼ xiixa para chuʼcaʼ jma gaxha de Dios ne para guni adorarcaʼ laabe modo bisiidiʼ Jesús (Sant. 4:4). Ora ruchaʼnu xiixa, rúninu ni cadi purtiʼ zinándanu modo riníʼ ique binni tiempu riʼ, sínuque purtiʼ maʼ biene chaahuinu ni rusiidiʼ Biblia. Dxandíʼ peʼ naaze dxiichinu ni dxandíʼ (1 Tes. 2:3, 4). w21.10 22 párr. 12

¿Xi zanda gúninu pa cayuni sentirnu nuunu stúbinu? Galán guiníʼ íquenu ximodo cayacané Jehová laanu (Sal. 55:22). Ndiʼ zacané laanu cadi guiníʼ íquenu nuunu stúbinu. Laaca zanda guiníʼ íquenu ximodo cayacané Jehová ca hermanu ni runi sentir nuu stubi (1 Ped. 5:9, 10). Ti hermanu láʼ Hiroshi ni laasi naca Testigu ndaaniʼ familia stiʼ maʼ xadxí, guníʼ: «Ora qué riaandaʼ laanu cayúninu ni ná Jehová de guidubi ladxidoʼno, riguuni gana ca hermanu ne ca hermana ni napa familia ni cadi Testigu». Laaca cadi gusaana de guni orarnu, guidúʼndanu Biblia ne chuunu reunión. Nabé risaca gábinu Jehová guiráʼ ni nuu ndaaniʼ ladxidoʼno ne ni runi sentirnu. Laaca nabé risaca guidúʼndanu Stiidxaʼ Dios guiráʼ dxi ne guiníʼ íquenu lu ca relatu ni rusietenalaʼdxiʼ laanu pabiáʼ nadxii Jehová laanu. Nuu xcaadxi hermanu riziidicaʼ textu de memoria ni riguu gana laacaʼ, casi Salmo 27:10 ne Isaías 41:10. Ne nuu tu laa raca preparar para reunión o riquiiñeʼ grabación ni nuu lu audio ora ruundaʼ Biblia. Racané ca cosa riʼ laacabe para cadi guni sentírcabe nuucabe stúbicabe. w21.06 9, 10 párr. 5-8

¿Ñee guti ti binni ni nadxiiluʼ la? Pa zacá ni, gulee tiempu para gúʼndaluʼ ca relatu stiʼ ca binni ni riete lu Biblia ni biasa de lade gueʼtuʼ ti gaca fe stiluʼ jma naguidxi. ¿Ñee nuuluʼ triste pur guca expulsar ti familia stiluʼ la? Biʼniʼ estudiar para chuʼluʼ seguru jneza nga disciplina stiʼ Dios. Intiica guendanagana ni gápaluʼ, biquiiñeʼ ni para guquídxiluʼ fe stiluʼ. Gudxi Jehová guiráʼ ni nuu ndaaniʼ ladxidoʼloʼ ne lugar de guixéleluʼ de ca hermanu guyuu gaxha de laacaʼ (Prov. 18:1). Biʼniʼ xhiiñaʼ Jehová purtiʼ zacaneni lii guni huantarluʼ neca gúʼnaluʼ ora guietenaláʼdxiluʼ guiráʼ ni bizaacaluʼ (Sal. 126:5, 6). Cadi gusaana de cheluʼ reunión, biʼniʼ predicar, biindaʼ Biblia ne cadi gusaana de guiníʼ íqueluʼ ca ndaayaʼ ni maʼ biʼniʼ prometer Jehová lii. Jmaruʼ si naguidxi zaca fe stiluʼ ora gúʼyaluʼ modo cayacané Jehová lii. w21.11 22 párr. 11; 24 párr. 17

¿Ximodo zeeda gaca ca xpinni Jesús casi «ca ni nahuiiniʼ»? Guiníʼ íquenu, ¿tuu nga ca ni rusisaca binni guidxilayú? Ca binni ricu, ca famoso ne ca ni napa autoridad. Peru ca xpinni Jesús cadi zacá diʼ laacaʼ. Nga runi, ruuyaʼ binni laacabe casi «ca ni nahuiiniʼ» o ca ni huaxiéʼ risaca (1 Cor. 1:26-29). Peru cadi zacá ruuyaʼ Jehová laacabe. ¿Xiñee guníʼ Jesús de «ca ni nahuiiniʼ» yaʼ? Purtiʼ gunabadiidxaʼ ca discípulo stibe laabe: «¿Tuu nga ni jma risaca lu Reinu ni nuu guibáʼ?» (Mat. 18:1). Tiempu que, nabé guyuulaʼdxiʼ ca judíu guʼyaʼ xcaadxi laacaʼ casi binni risaca. Ti hombre ni nanna de Biblia guníʼ: «Nabé guyuulaʼdxiʼ ca binni que chuʼ tu gusisaca laacaʼ, gácacaʼ famoso, chuulaʼdxiʼ binni ni rúnicaʼ ne guni respetárcabe laacaʼ». Nanna Jesús caquiiñeʼ guni ca discípulo stiʼ stipa ti gusaana de guiníʼ íquecaʼ casi riníʼ ique ca judíu. w21.06 20 párr. 2; 21 párr. 6, 8, 9

Bisaana apóstol Pablo ti ejemplu galán para ca ancianu. Guzéʼtenu ti ejemplu, bidiibe conseju ca hermanu de Tesalónica purtiʼ biiyabe caquiiñecaʼ ni. Peru lu ca carta ni bicaabe ra nuucaʼ, primeru biʼniʼ felicitarbe laacaʼ pur dxiiñaʼ ni rúnicaʼ, pur nadxiicaʼ Dios ne pur runi huantarcaʼ. Laaca guníʼ íquebe xi cazaaca ca hermanu que ne gúdxibe laacaʼ nánnabe canazananda binni laacaʼ ne xi guendanagana cadíʼdicaʼ (1 Tes. 1:3; 2 Tes. 1:4). Ne dede gúdxibe laacaʼ nácacaʼ ti ejemplu galán para xcaadxi xpinni Cristu (1 Tes. 1:8, 9). ¡Guizáʼ biecheʼ ca hermanu que pur ni gudxi Pablo laacaʼ! Gunna dxíchicaʼ guizáʼ nadxiibe laacaʼ. Ngue runi gucané ca conseju ni bidii Pablo laacabe lu guiropaʼ carta ni biseendaʼ ra nuucabe (1 Tes. 4:1, 3-5, 11; 2 Tes. 3:11, 12). w22.02 15 párr. 6

Riquiiñeʼ Binidxabaʼ ca líder stiʼ ca religión ni cadi dxandíʼ para guiníʼ malu Jehová ne laa nga napa donda pur ca yuubaʼ napa binni lu Guidxilayú. Ne ora rati ti baʼduhuiiniʼ riniʼcaʼ Dios nga ziné laabe purtiʼ caquiiñeʼ ti ángel huiiniʼ guibáʼ. ¡Nabé runinácabe Jehová ora riníʼcabe zacá! Peru laanu nánnanu cadi dxandíʼ ni. Nga runi, pa gápanu ti guendahuará malu o gatiʼ ti binni ni nadxiinu qué zugáʼninu donda ique Dios, sínuque zuni crenu zedandá dxi zabee Dios ca yuubaʼ nápanu. Zanda gábinu guiráʼ binni naca Jehová ti Dios ni rannaxhii. Ne zacá ricábibe ca ni rucaalú laabe (Prov. 27:11). Naca Jehová ti Dios ni riaʼ. Nga runi racanabe ora gúʼyabe cayacananu pur canazánanda binni laanu purtiʼ nácanu Testigu, pa huaranu o purtiʼ binni ruchee laanu (Sal. 22:23, 24). Runi sentirbe yuubaʼ ni nápanu, nga runi zabeebe ca ni (bichaaga ni né ni ná Éxodo 3:7, 8; Isaías 63:9). w21.07 9, 10 párr. 9, 10

Ca binni ni guzuubaʼ diidxaʼ, ziéchecaʼ purtiʼ zápacaʼ privilegiu de gannaxhiicaʼ ne guni adorarcaʼ Jehová para siempre. Zabee Jesús guiráʼ ca guendananá ni bisaanané Adán ne Eva laanu pur bidxiidéchecaʼ familia stiʼ Dios. Ne zusibani Jehová millón binni ni maʼ guti ne zanda guibánicaʼ sin gaca huaracaʼ ne sin gáticaʼ lu Guidxilayú riʼ ndaaniʼ ti paraísu (Luc. 23:42, 43). Ora maʼ gaca ca ni nuu ndaaniʼ familia stiʼ Jehová perfectu, cada tobi de laacaʼ zusihuínnicaʼ guendanandxóʼ ne guendarisaca ni bizeeteʼ David. Pa lii nga tobi de ca «stale binni» riʼ, nápaluʼ ti esperanza guizáʼ galán (Apoc. 7:9). Cadi guiaandaʼ lii nadxii Dios lii ne racalaʼdxiʼ gácaluʼ parte de familia stiʼ. Nga runi biʼniʼ stipa gúniluʼ ni riuuláʼdxibe. Guníʼ ique ca promesa stiʼ Dios guiráʼ dxi ne cadi gusiaandaluʼ ca ni. Bisisaca privilegiu ni nápaluʼ de guni adorarluʼ Bixhózenu ni nuu guibáʼ ne gusisácaluʼ laabe para siempre. w21.08 7 párr. 18, 19

Xadxí biʼniʼ predicar profeta Jeremías neca qué niná binni nucaadiaga laa ne bicaalúcabe laa. Gudindené binni laabe ne biʼniʼ búrlacaʼ laabe ne ngue gulee ni gana profeta riʼ dede guníʼ ique maʼ qué zuni predicar (Jer. 20:8, 9). Peru qué nireebe gana. ¿Xi gucané laabe para cadi guiníʼ íquebe cosa ni cuee gana laabe ne chuʼbe nayecheʼ ora guni predicarbe yaʼ? Gucuá íquebe chupa cosa nabé risaca. Primé, mensaje ni zeeda de Dios ni zinebe ra nuu binni zanda gudiini laacaʼ «ti futuro ne ti esperanza» (Jer. 29:11). Ne guiropa, gulí Jehová laabe para chinebe nombre stiʼ ra nuu binni (Jer. 15:16). Laanu laaca zinenu ti mensaje galán ra nuu binni ni nuu lu gueelacahui ne zinenu nombre stiʼ Jehová purtiʼ nácanu Testigu stiʼ. Ora riníʼ íquenu ca cosa riʼ, riuʼnu nayecheʼ ora runi predicarnu neca qué gucaadiaga binni laanu. Nga runi cadi guireʼnu gana pa cadúʼyanu chaahuiʼ chaahuiʼ cayuni progresar estudiante stinu. Naquiiñeʼ gápanu paciencia para gacanenu ti binni gaca discípulo (Sant. 5:7, 8). w21.10 27 párr. 12, 13

Pa maʼ zinenu stale tiempu de cayúninu ni ná Jehová o huaxiéʼ, cadi gusaana de guquídxinu ne gápanu fe ni nápanu laabe. ¿Xiñee yaʼ? Purtiʼ pa qué gúninu ni la? zará fe stinu. Cadi guiaandaʼ laanu, fe ca nga ti prueba ni rusihuinni dxandíʼ ni runi crenu neca qué ridúʼyanu ni. Ne ca cosa ni qué rihuinni nagueenda riaandaʼ ni laanu. Nga runi Pablo guníʼ pa qué gápanu fe zeeda gácani «pecadu ni ruchenda laanu nagueendaca». Yanna, ¿xi caquiiñeʼ gúninu para cadi gusaana de gaca fe stinu naguidxi yaʼ? (2 Tes. 1:3). Primé, guinábanu Jehová gatigá gudii laanu espíritu santu stiʼ. ¿Xiñee yaʼ? Purtiʼ espíritu santu ca nga racané laanu gápanu fe (Gál. 5:22, 23). Qué zanda diʼ guquídxinu ne gápanu fe Dios ni bizáʼ laanu pa qué gacané espíritu santu laanu. Nga runi, cadi gusaana de guinábanu Jehová espíritu stiʼ, ne laa zudiini laanu (Luc. 11:13). Zanda gábinu laabe: «Dané laadu jma fe» (Luc. 17:5). Laaca cadi gusaana de guni estudiarluʼ Stiidxaʼ Dios (Sal. 1:2, 3). w21.08 18, 19 párr. 16-18

Zándaruʼ gacané ca hermanu ni maʼ huaniisi ndaaniʼ xquidxi Jehová. Neca maʼ huaxiéʼ stipa nápacaʼ, peru nápacaʼ stale experiencia pur ca iza ni huabánicaʼ. Caquiiñeruʼ Jehová laacabe de stale modo. Ndaaniʼ Biblia zeeda stale ejemplu stiʼ binni ni biʼniʼ ni ná Jehová neca maʼ huaniisicaʼ. Tobi de laacabe nga Moisés, laa napa biaʼ 80 iza dxi guca profeta ne líder stiʼ guidxi Israel. Ne stobi de laacabe nga Daniel, neca napa jma de 90 iza, gúcaruʼ profeta stiʼ Jehová. Ne laaca zándaca maʼ napa apóstol Juan jma de 90 iza dxi gucané Dios laa gucaa libru stiʼ Apocalipsis. Huaxiéʼ ruzeeteʼ Biblia de «ti hombre chaʼhuiʼ láʼ Simeón» ne runi adorar Dios, peru runibiáʼ Jehová laabe ne bidii privilegiu de gúʼyabe Jesús dxi nahuiiniʼ ne guiniʼbe ti profecía de laa ne de jñaa (Luc. 2:22, 25-35). w21.09 3, 4 párr. 5-7

Cadi naquiiñeʼ guchaaga ca padre ca xiiñicaʼ né xcaadxi, ne cadi naquiiñeʼ guinábacaʼ gúnicabe xiixa ni qué zanda gúnicabe. Pa guni ca padre sicaríʼ la? zuchiichicaʼ ne zabeecaʼ gana ca xiiñicaʼ (Efes. 6:4). Sicaríʼ guníʼ ti hermana láʼ Sachiko: «Gucalaʼdxiʼ jñaa nibeeʼ puru diez lu examen, peru nagana gúcani para naa. Neca maʼ stale iza de binduuxeʼ scuela, nuu biaje riníʼ iqueʼ qué riuu diʼ Jehová nayecheʼ pur guiráʼ stipa ni cayuneʼ lu xhiiñaʼ». Rey David guníʼ: «Qué ruyubeʼ gapaʼ cosa naroʼbaʼ nin cosa ni qué zanda guneʼ». Pur guca David humilde ne gunna nuu cosa ni qué zanda guni, gucané ni laa ganda gatadxí ladxidóʼ ne chuʼ nayecheʼ (Sal. 131:2). Ndiʼ rusiidiʼ ca padre naquiiñeʼ gácacaʼ humilde ne gánnacaʼ nuu cosa ni qué zanda gúnicaʼ ne cadi naquiiñeʼ guinábacabe xiiñicabe gúnicaʼ cosa ni qué zanda gúnicaʼ. Zanda gacané ca padre ca xiiñicaʼ gánnacaʼ xi zanda gúnicaʼ ne xi qué zanda gúnicaʼ, ne despué quíxhecaʼ meta ni zanda ugaandacabe. w21.07 21 párr. 5, 6

Guiranu rudii Jehová lugar laanu guicaanu decisión stinu. Nga runi cada tobi de laanu zanda cuí pa zúninu ni nabe o coʼ. Nuu caadxi joven qué nusiidiʼ bixhózecaʼ ne jñaacaʼ laacaʼ de Jehová peru maʼ gudixhe íquecaʼ gúnicaʼ ni nabe ne qué huasaanacaʼ laabe. Ne xcaadxi la? biʼniʼ bixhózecaʼ ne jñaacaʼ stipa pur gusiidicaʼ laacaʼ de Jehová peru ora biniisicaʼ, bisaanacaʼ Jehová. Cada tobi de laanu nga naquiiñeʼ cuí pa zuni ni ná Jehová o pa coʼ (Jos. 24:15). Nga runi, pa maʼ bixeleʼ xiiñiluʼ de Jehová cadi ugaaniluʼ donda íqueluʼ. Peru nuu biaje la? bixhoze o jñaa binni nga rusaana Jehová ne nuu tu laa rixeleʼ de familia stiʼ (Sal. 27:10). Guizáʼ runiná ndiʼ xiiñiʼ binni purtiʼ ruuyacaʼ bixhózecaʼ ne jñaacaʼ casi ti ejemplu. Joven caʼ, pa maʼ guca expulsar bixhózetu o jñaatu, nánnadu xi cayuni sentirtu. Ne cadi guiaandaʼ laatu nanna Jehová xi cayuni sentirtu, nadxiibe laatu ne guizáʼ riéchebe purtiʼ cadi cusaanatu laabe. Ne cadi guiaandaʼ laatu qué gápatu donda pur ca decisión ni guicaa bixhózetu o jñaatu. w21.09 27 párr. 5-7

Zanda guininu zeeda gaca ti binni ni guca expulsar casi ti dendxuhuiiniʼ ni huará ne zanda gucaame guendahuará ca xcaadxi dendxuhuiiniʼ (Sant. 5:14). Cásica zanda guicá ti guendahuará binni, ora maʼ bixeleʼ tuuxa de Jehová, zanda gucaa xcaadxi guni cosa ni cadi jneza. Nga runi nuu biaje napa xidé cueechúcabe binni ca de ndaaniʼ congregación. Ora ricaacabe disciplina riʼ, rusihuinni ni pabiáʼ nadxii Jehová ca dendxuhuiiniʼ ni nuu ndaaniʼ congregación, zanda chindani ndaaniʼ ladxidóʼ binni ni biʼniʼ pecar ca ne gucaani laa gaca arrepentir. Peru neca nuube expulsadu, zándaruʼ chebe reunión ne gucaadiágabe stiidxaʼ Dios ni zacané laabe guquídxibe fe stibe sti biaje. Laaca zanda guicaabe publicación para gúʼndabe ne gúʼyabe programa JW Broadcasting^®. Ne ora guʼyaʼ ca ancianu cuchaabe, gatigá zanda gudiicaʼ conseju laabe ne zacanecaʼ laabe chuʼbe gaxha de Jehová ne gácabe testigu stiʼ Jehová sti biaje. w21.10 10 párr. 9, 11

Tiempu riʼ, runi adorarnu Dios cásica biʼniʼ congregación stiʼ ca xpinni Cristu ni guyuu lu primé siglu ni. Guzéʼtenu ti ejemplu, nuunu organizadu casi modo gudixhe ca apóstol ni bibani lu primé siglu ni —nápanu superintendente viajante, ancianu ne siervu ministerial— (Filip. 1:1; Tito 1:5). Ne cásica bíʼnicabe, laanu laaca runi respetarnu ca ley stiʼ Jehová ni caníʼ de pecadu sexual ne guendaxheelaʼ, laaca runi respetarnu rini ne rápanu congregación de ca binni ni maʼ biʼniʼ cometer pecadu grave ne qué raca arrepentir (Hech. 15:28, 29; 1 Cor. 5:11-13; 6:9, 10; Heb. 13:4). Ne Biblia ná «ti fe si» nga nuu ne laa si ni nga riuulaʼdxiʼ Dios (Efes. 4:4-6). Ti privilegiu naroʼbaʼ nga nuunu ndaaniʼ xquidxi Dios, nánnanu ni dxandíʼ de Jehová ne runibiaʼnu propósitu stiʼ. Nga runi guinaazeʼ dxiichinu ni runi crenu ne cadi gundaʼnu ni. w21.10 23 párr. 15-17

Bidxaagalú rey Jehosafat ti guendanagana. Bicaalú ti ejércitu naroʼbaʼ ni zeeda de Ammón, Moab ne ca binni nabeza lade dani stiʼ Seír laabe, familia stibe ne guidxi que (2 Crón. 20:1, 2). ¿Xi biʼniʼ rey Jehosafat yaʼ? Gunábabe Jehová gacané laabe ne gudii stipa laabe. Lu 2 Crónicas 20:5-12, zeeda oración ni bíʼnibe. Rusihuinni ni pabiáʼ gúpabe confianza Bixhózebe ni nuu guibáʼ. Biquiiñeʼ Jehová ti levita láʼ Jahaziel para guicabi oración stiʼ Jehosafat, casi riete ni lu textu ni cadúʼndanu yannadxí. Cumu napa Jehosafat confianza Dios stiʼ la? bizuubaʼ diidxaʼ. Ora biree rey que ne guidxi que zitíndenecaʼ ca enemigu sticaʼ, qué nusanírube ca soldadu stibe ni jma nanna tinde, sínuque bisanírube hombre ni ziyuundaʼ ne ni cadi naaze guiibaʼ. Biʼniʼ ganárcabe guerra que, casi peʼ modo gudxi Jehová Jehosafat (2 Crón. 20:18-23). w21.11 15, 16 párr. 6, 7

Ora tídinu lu guendanagana, nanna dxíchinu zacané Jehová laanu para cadi guixélenu de laa (2 Cor. 4:7-9). Zanda guni crenu, qué ziuu dxi gusaana Jehová de gusihuinni nadxii laanu, purtiʼ sicaríʼ guníʼ ti hombre ni bicaa ti salmo, «cayuuyaʼ Jehová ca ni ridxibi laa, ca ni cabeza cadi gusaana de gannaxhiibe laacaʼ» (Sal. 33:18-22). Dede ante gúninu ni ná Jehová, maca rusihuínnibe nadxiibe laanu, cásica nadxiibe guiráʼ binni. Peru ora bizulú biʼniʼ adorarnu laabe, bidúʼyanu jmaruʼ si gunnaxhiibe laanu. Ne guendarannaxhii ca rucaani laabe gápabe laanu. Qué zudiibe lugar chuʼ xiixa ni guxheleʼ laanu de laabe ne zuni cumplirbe ni maʼ guníʼ stiidxabe gudiibe laanu. Racaláʼdxibe guibáninu galán (Sal. 46:1, 2, 7). Nga runi, intiica si guendanagana cadxaagalunu, zudii Jehová laanu stipa ni caquiiñenu para cadi gusaananu laa. w21.11 7 párr. 17, 18

Zándaca runibiaʼnu tuuxa binni neca maʼ gudiʼdiʼ stale iza peru náparuʼ xiana ti compañeru de scuela, tuuxa runiné dxiiñaʼ o familia stiʼ. Nga nga ni bizaaca ca chii biʼchiʼ José, tantu guca nanaláʼdxicabe laabe dede bíʼnicabe xiixa para guninácabe laabe (Gén. 37:2-8, 25-28). Peru qué nuquixe diʼ José ni bíʼnicabe laa, neca gúpabe oportunidad de ñúnibe ni la? biabe laacaʼ. Ne lugar de nidaabe xiana né ca bíʼchibe, bíʼnibe ni gucuá despué lu Levítico 19:18 (Gén. 50:19-21). Xpinni Cristu ni racalaʼdxiʼ gusiecheʼ Dios napa xidé chinanda ejemplu stiʼ José naquiiñeʼ guni perdonar, cadi guidaa xiana ne cadi guquixe ni gúnicabe laa. Guníʼ Jesús naquiiñeʼ guni perdonarnu ca ni maʼ bicheené laanu (Mat. 6:9, 12). Laaca bidii apóstol Pablo conseju riʼ ca xpinni Cristu: «Hermanu ni nadxieeʼ caʼ, cadi uquíxetu ni gúnicabe laatu» (Rom. 12:19). w21.12 11 párr. 13, 14

Huaxhinni 14 de nisán iza 33, guyé Jesús ndaaniʼ jardín de Getsemaní ne gúdxibe Jehová guiráʼ ni nuu ndaaniʼ ladxidoʼbe (Luc. 22:39-44). Ne ora nuu Jesús raqué «gunábabe ne biʼniʼ rogarbe Dios de guidubi ladxidoʼbe [...] dede biinabe ne bicaabe ridxi» (Heb. 5:7). ¿Xi gunabaʼ Jesús gueelaʼ ante gatiʼ yaʼ? Gunábabe Jehová gudii stipa laabe para cadi gucheenebe laa ne gúnibe ni ná. Bicaadiaga Jehová oración stiʼ Xiiñiʼ ne biseendaʼ ti ángel para gudii stipa laabe. Gunna Jesús napa ti dxiiñaʼ nabé risaca. Laani nga guni defenderbe lá Bixhózebe. Bicaadiaga Jehová ni gunabaʼ Xiiñiʼ laa lu oración. ¿Xiñee yaʼ? Purtiʼ ni jma bisaca para Jesús nga cadi gucheené Bixhoze ne guni defender labe. Laaca zacabi Jehová oración stinu pa ni jma risaca para laanu nga cadi guchéʼnenu laa ne guni defendernu nombre stiʼ (Sal. 145:18). w22.01 17, 18 párr. 15-17

Stale binni qué riná guni cré ni rusíʼdinu purtiʼ qué riuʼnu lu política. Riníʼ íquecabe naquiiñeʼ ñuni votarnu. Peru nánnanu zudxiʼdéchenu Jehová pa guni votarnu pur ti binni para guni mandar laanu (1 Sam. 8:4-7). Zándaca laaca nuu binni riníʼ ique naquiiñeʼ nucuí ca testigu stiʼ Jehová hospital, ñúnicaʼ scuela ne ñúnicaʼ xcaadxi cosa para gacanecaʼ binni. Nga runi, stale binni qué riná guni cré ni rusíʼdinu purtiʼ jma ricá íquenu guni predicarnu, lugar de nicá íquenu ñuni chaahuinu ca guendanagana napa binni. ¿Xi zacané lii cadi gusaana de gápaluʼ fe yaʼ? (Mat. 7:21-23). Cadi guiaandaʼ lii xi dxiiñaʼ jma risaca bisaana Jesús gúninu. Cadi naquiiñeʼ guicá íquenu guni chaahuinu ca guendanagana ni nuu lu política ne ca guendanagana ni napa binni. Ca testigu stiʼ Jehová nadxiinu binni ne rizaaláʼdxinu laacaʼ, peru ni jma galán gúninu pur binni nga gusíʼdinu laacaʼ de Reinu stiʼ Dios ne gacanenu laacaʼ gaca xhamígucaʼ Jehová. w21.05 7 párr. 19, 20

Neca stale de ca ni runi mandar yanna riniʼcaʼ rúnicaʼ ni ná Dios, peru qué nacaʼ gusaanacaʼ autoridad ni nápacaʼ. Cásica bizaaca tiempu bibani Jesús, rucaalú ca hombre riʼ Ungidu stiʼ Jehová ora rucaalucaʼ ca xpínnibe (Hech. 4:25-28). ¿Xi runi Jehová yaʼ? Salmo 2:10-12 ná: «Nga runi yanna, rey caʼ, lagaca binni nuu xpiaaniʼ; laguni ni maʼ gúdxicabe laatu, juez caʼ ni nuu lu guidxilayú. Laguidxibi Jehová ora gúnitu ni ná, lachuu nayecheʼ dede lagacaditi. Lagusisaca xiiñibe, pacaa zadxiichi Dios ne zátitu lu neza stitu, purtiʼ nagueenda ridxiichibe. ¡Nayecheʼ riuu guiráʼ ca ni ruyubi guilá ra nuube!». Nachaʼhuiʼ Jehová ne cudii tiempu ca ni rucaalú laa para guchaacaʼ ne chuʼcaʼ pur Reinu stibe. Peru maʼ huaxiéʼ tiempu nuu (Is. 61:2). Tiempu riʼ guizáʼ caquiiñeʼ ganna binni de Biblia ne gúnicaʼ ni ná Jehová. w21.09 15, 16 párr. 8, 9

Ni caníʼ Pablo nga naquiiñeʼ chuʼnu nayecheʼ né biaʼ nápanu (Filip. 4:12). Ni jma risaca para laanu nga gaca xhamígunu Dios ne cadi ca cosa material ca (Hab. 3:17, 18). Sicaríʼ gudxi Moisés ca israelita despué de guzacaʼ 40 iza lu desiertu: «Maʼ guluu Jehová Dios stiluʼ ndaayaʼ lii lu guiráʼ ni maʼ bíʼniluʼ. [...] Lu 40 iza riʼ qué huasaana Jehová Dios stiluʼ lii ne qué huayaadxaʼ gastiʼ lii» (Deut. 2:7). 40 iza bidii Jehová maná laacabe para gócabe ne qué ñuxe lari stícabe ni bireenécabe de Egipto (Deut. 8:3, 4). Ziecheʼ Jehová pa guizíʼdinu chuʼnu nayecheʼ né biaʼ ni nápanu ra gusisácanu guiráʼ cosa rudiibe laanu, guidúʼyanu ca ni casi ti ndaayaʼ ne gudiʼnu xquixe peʼ laabe. w22.01 5 párr. 10, 11

Ca hombre ni maʼ bichaganáʼ, laatu nga naquiiñeʼ gúʼyatu chuʼ familia stitu galán, nga runi, rúnitu stipa gacanetu ne gápatu laacabe. Ne ora gápatu guendanagana, zándaca guiníʼ íquetu laasitu zanda guni chaahuitu ni. Peru cadi gúnitu zacá, sínuque laguni orar Jehová ne laguinabaʼ laabe gacanebe laatu. Laaca laguni orar né xheelatu. Laguyubi gacané Jehová laatu ra guni estudiartu Biblia ne ca publicación ni rudii xquídxibe laanu, ne laguni ni ná ca conseju ni guidxélatu. Zándaca chuʼ binni gabi laatu cadi jneza nga guicaatu decisión ni zeeda lu Biblia. Zándaca gábicabe laatu jma risaca nga gápatu bueltu ne stale cosa risaca para gápatu familia stitu. Peru cadi guiaandaʼ laatu ejemplu stiʼ rey Jehosafat (2 Crón. 20:1-30). Laa gupa confianza Jehová ne bisihuinni ni lu ca cosa ni biʼniʼ. Qué nusaana Jehová hombre riʼ ne laaca qué zusaanabe laatu (Sal. 37:28; Heb. 13:5). w21.11 15 párr. 6; 16 párr. 8

Cumu bizáʼ Dios laanu casi laa la? qué riuuláʼdxinu ora guidúʼyanu cayaca xiixa cosa ni cadi jneza (Gén. 1:26). Peru cumu binni ruchee laanu la? zándaca cadi jneza modo guni juzgarnu tuuxa neca riníʼ íquenu nánnanu xi guiráʼ bizaaca. Cadi guiaandaʼ laanu ni bizaaca Jonás. Guizáʼ bidxiichibe ora biá Jehová ca binni de Nínive (Jon. 3:10–4:1). Peru pur decisión ni gucuaa Jehová bilá jma de 120,000 binni de Nínive. Racá ridúʼyanu Jonás ngue cadi jneza modo biʼniʼ juzgar ne cadi Jehová. Qué gapa Jehová xi pur gusiene binni xiñee ricaa xiixa decisión. Dxiqué bidii Jehová lugar guinabadiidxaʼ ca xpinni laa xiñee gucuaa xiixa decisión o xi pur chiguni xiixa (Gén. 18:25; Jon. 4:2, 3). Ne nuu biaje bisiene Jehová xiñee gucuaa xiixa decisión (Jon. 4:10, 11). Peru qué gapa Jehová xi pur guinabadiidxaʼ laanu ante o despué de guni xiixa (Is. 40:13, 14; 55:9). w22.02 3, 4 párr. 5, 6

Para ganda gácanu «casi tobi ni jma nahuiiniʼ» caquiiñeʼ guiníʼ íquenu jma risaca xcaadxi que laanu (Filip. 2:3). Ora jma gúninu stipa pur guiníʼ íquenu zacá qué zuninanu ne qué zucaʼnu xcaadxi guchee. Guiráʼ hermanu ne hermana nánnacaʼ gúnicaʼ xiixa ni laanu qué gánnanu. Ne qué raca nagana para laanu guiénenu ndiʼ ora ridúʼyanu ca cosa galán ni rúnicabe. Naquiiñeʼ chinándanu conseju bidii apóstol Pablo ca hermanu de Corinto, sicaríʼ gúdxibe laacaʼ: «¿Tu ná jma risácaluʼ que stobi yaʼ? ¿Cadi dxandíʼ nuu tu bidii lii guiráʼ ni nápaluʼ la? Yanna, pa nuu tu bidii ni lii, ¿xiñee runi presumirluʼ casi ora guirutiʼ nudii ni lii yaʼ?» (1 Cor. 4:7). Nga runi, cadi guyúbinu gusisaca xcaadxi laanu o guiníʼ íquenu jma risácanu que xcaadxi. Pa nanna ti hermanu gudii discursu o pa napa ti hermana stale estudiu, siempre naquiiñeʼ gudiicaʼ xquixe peʼ Jehová. w21.06 21, 22 párr. 9, 10

Raca nagana para stale Testigu guni predicar purtiʼ qué ridxélacaʼ binni ra lidxi. Nuu binni nabeza ndaaniʼ edificiu o colonia ra nuu stale seguridad. Ne nápacaʼ tu cayapa entrada stiʼ ca lugar riʼ. Ne nuu hermanu huaxiéʼ ridxélacaʼ binni ni nuu ra lidxi o nápacaʼ territorio ra huaxiéʼ nabeza binni. Zándaca nuu publicador runi viajar zitu para guni predicar tuuxa binni peru ora rindacaʼ ra yoo ca guirutiʼ guinni. Peru pa guchaʼnu de hora, zándaca jma zadxélanu binni ra lidxi para guni predicarnu laacaʼ. Purtiʼ neca riécabe dxiiñaʼ nuu ti hora maʼ nuucabe ra lídxicabe. Stale hermanu runi predicar huadxí o huaxhinni purtiʼ óraca jma ridxélacaʼ binni. Ne zándaca óraca maʼ caziilaʼdxiʼ binni ne zanda guinínenu laacaʼ. w21.05 15 párr. 5, 7

¿Ñee ngaca rizaaca tiempu riʼ la? Ngaca. Stale binni ridxiichiné ca testigu stiʼ Jehová purtiʼ qué rinándanu tradición ni cadi zeeda lu Biblia casi lanibidóʼ ne Navidad. Ne nuu tu laa ridxiichi purtiʼ qué runi celebrarnu dxi festivu ne ca costumbre ni runi binni ora gatiʼ tuuxa jmaruʼ si pa gucaani laanu guchéʼnenu Dios. Zándaca nuu binni runi cré Dios ne riníʼ ique riuuláʼdxibe ni rúnicaʼ. Peru rinándacabe tradición stiʼ binni guidxilayú lugar de ninándacabe ni rusiidiʼ Biblia, ne pur nga qué riuulaʼdxiʼ Jehová ni rúnicabe (Mar. 7:8, 9). ¿Xi zacané lii cadi gusaana de gápaluʼ fe? Gunnaxhii Jehová ne ca ley stiʼ (Sal. 119:97, 113, 163-165). Pa nadxiiluʼ Jehová, zacaneni lii gucaanaluʼ ca costumbre ni qué riuuláʼdxibe. Ne qué zudiiluʼ lugar gucueezaʼ xiixa lii para cadi gannaxhiiluʼ Jehová. w21.05 6 párr. 15, 16

¿Ximodo zanda gúninu ni ná conseju ni bidii apóstol Pablo? Cadi gusaana de guni estudiarluʼ para gápaluʼ ti fe naguidxi, biʼniʼ orar guiráʼ dxi ne cadi gusaana de gúniluʼ dxiiñaʼ ni bisaanané Jehová laanu gúninu (2 Tim. 4:4). Pa nápaluʼ fe, qué zadxíbiluʼ ora gunadiágaluʼ guiníʼcabe cosa ni cadi dxandíʼ de laanu (Is. 28:16). Pa nadxiiluʼ Jehová, Stiidxaʼ ne ca hermanu stiluʼ zacaneni lii cadi guni creluʼ guiráʼ ni riníʼ ca binni ni maʼ bisaana xquidxi Dios. Lu primé siglu que stale binni qué ñuni crecaʼ Jesús ne bicaanacaʼ laabe. Peru laaca guyuu stale tu biʼniʼ cré laabe, ládecabe nuu ti hombre ni guyuu lu Sanedrín ne zaqueca biʼniʼ cré «ti grupu naroʼbaʼ de sacerdote» laabe (Hech. 6:7; Mat. 27:57-60; Mar. 15:43). Tiempu riʼ, millón de binni maʼ zinanda Jesús. ¿Xiñee yaʼ? Purtiʼ nadxiicabe guiráʼ ni zeeda lu Biblia. Stiidxaʼ Dios ná: «Nexhedxí ladxidóʼ ca ni nadxii ley stiluʼ ne gastiʼ qué zanda gusaba laacaʼ» (Sal. 119:165). w21.05 13 párr. 20, 21

Bidii apóstol Pablo cuenta Jehová ngue bidii stipa laa para gunda biʼniʼ xhiiñabe. Biquiiñeʼ Jehová espíritu santu stiʼ para gudii stipa Pablo ti ganda guni xhiiñabe de guidubi ladxidóʼ neca guzananda binni laa, biseguyoocabe laa ne gupa xcaadxi guendanagana. Laaca bidii Dios stipa Timoteo para gunda biʼniʼ xhiiñabe. Yené Timoteo Pablo lu ca viaje ni biʼniʼ dxi yeganna ca congregación ne biʼniʼ predicar. Despué biseendaʼ Pablo laabe para chigánnabe ne cuʼbe gana caadxi congregación (1 Cor. 4:17). Zándaca biʼniʼ sentir Timoteo qué zanda guni dxiiñaʼ que. Ne zándaca pur nga gudxi apóstol Pablo laabe ca diidxaʼ riʼ: «Cadi gudiiluʼ lugar gúnicabe menu lii purtiʼ si nahuiiniluʼ» (1 Tim. 4:12). Ne para tiempu que gupa Timoteo ti guichi lu beela ladi purtiʼ Biblia ná gatigá raca huarabe (1 Tim. 5:23). Peru nanna Timoteo zudii Jehová espíritu santu laa para ganda guni predicar ca noticia galán ne gacané ca hermanu (2 Tim. 1:7). w21.05 21, 22 párr. 6, 7

Ni zeeda lu Santiago 1:19 racané ni ca hermanu ni rudii conseju. Sicaríʼ bicaa Santiago: «Naquiiñeʼ chuʼtu listu para gucaadiágatu, cadi casi zetu gundaa ruaatu xiixa diidxaʼ ne cadi casi zetu guidxiichitu». Cadi naquiiñeʼ guiníʼ ique ti ancianu maʼ nanna guiráʼ ni cazaaca ti hermanu ni chigudii conseju. Proverbios 18:13 ná: «Ora guicabi tuuxa xiixa cosa ante gucaadiaga zusihuinni nahuati ne zatuilú». Ni jma jneza nga guinabadiidxacabe binni ca xi cazaaca, ne gucaadiágacabe laa ante guiníʼcabe. Sicaríʼ zanda guinabadiidxaʼ ca ancianu ca hermanu: «¿ximodo nuuluʼ?», «¿ximodo cayuni sentirluʼ?», «¿ximodo zanda gacaniáʼ lii?». Pa guizaaláʼdxicabe ximodo nuu ca hermanu, jma zacanécabe ne zaguucabe gana laacaʼ. Para ganda gacanenu tuuxa ora gudiʼnu conseju laa, cadi caquiiñeʼ si guidúʼndanenu laabe chupa chonna textu ne gudiʼnu caadxi sugerencia laabe. Naquiiñeʼ gudii ca hermanu ca cuenta dxandíʼ rizaaláʼdxinu laacaʼ, riénenu ni cazaacacaʼ ne racaláʼdxinu gacanenu laacaʼ. w22.02 17 párr. 14, 15