Agosto

Zándaca caníʼ Jesús de ca soldadu romanu ni bicaa clavu náʼ ne ñee purtiʼ qué runibiaʼcaʼ laabe. Peru qué nidaa Jesús xiana pur ca cosa ni cadi jneza bíʼnicabe laa (1 Ped. 2:23). Cásica Jesús, laanu laaca naquiiñeʼ guni perdonarnu xcaadxi (Col. 3:13). Zándaca gucaalú caadxi binni laanu o dede né familia stinu purtiʼ qué riénecaʼ ni runi crenu ne modo nabáninu. Zándaca guiniʼcaʼ cosa ni cadi dxandíʼ de laanu, gusituicaʼ lunu, guichézacaʼ ca publicación stinu o dede gábicaʼ laanu zuninacaʼ laanu. Lugar de guidaʼnu xiana, guinábanu Jehová gacané laacabe para guiziidicabe de lu Biblia (Mat. 5:44, 45). Zándaca nuu biaje zaca nagana para laanu guni perdonarnu, jmaruʼ si pa cadi galán modo biʼniʼ tratárcabe laanu. Peru cadi naquiiñeʼ guidaʼnu xiana purtiʼ zándaca guninani laanu cásica runiná venenu (Sal. 37:8). Ora maʼ biʼniʼ perdonarnu, maʼ qué zudiʼnu lugar guniná ca cosa ni bíʼnicabe laanu (Efes. 4:31, 32). w21.04 8, 9 párr. 3, 4

Ora raca expulsar tuuxa de ndaaniʼ congregación, nánnanu guizáʼ racaná ladxidóʼ familia stiʼ. Guiníʼ íquenu pabiáʼ gucaná ladxidóʼ Jehová dxi bidxiideche stale ángel stiʼ laa, familia ndaʼ stibe laacaʼ (Jud. 6). Ne ¿ñee riníʼ íquenu pabiáʼ gucaná ladxidoʼbe dxi bicheené ca israelita laabe stale biaje, laandacaʼ nácacaʼ guidxi ni nabé nadxiibe la? (Sal. 78:41). Pa guixeleʼ ti binni ni nadxiiluʼ de Jehová. Cadi guiaandaʼ lii laaca racaná ladxidóʼ Bixhózenu ni nuu guibáʼ. Nánnabe xi yuubaʼ cayuni sentirluʼ, riabe lii stale ne zacanebe lii ra gudiibe lii stipa ni caquiiñeluʼ. Ora rusaana xiiñiʼ ca hermanu Jehová, stale de laacaʼ riníʼ íquecaʼ xi biaadxaʼ ñúnicaʼ para ñacanecaʼ xiiñicaʼ cadi nixeleʼ de Jehová. Ti hermanu láʼ Luke guníʼ: «Guníʼ iqueʼ napaʼ donda ne dede guníʼ xcaandaʼ cosa feu». Ne ti hermana láʼ Elizabeth ni laaca guca expulsar xiiñiʼ guníʼ: «Guníʼ iqueʼ zándaca cadi jneza modo bisiniiseʼ xiiñeʼ ne biaadxaruʼ ñacaniaʼ laabe ñánnaxhiibe Jehová». w21.09 26 párr. 1, 2, 4

Nuu binni riníʼ ique qué zanda gusíʼdinu de Biblia purtiʼ qué ñuunu ti scuela risaca ra rusiidicabe de religión. Peru naquiiñeʼ guni investigar chaahuicabe. Ndiʼ nga ni biʼniʼ Lucas. Ante gucaabe Evangeliu stibe, biʼniʼ investigar chaahuibe. Racaláʼdxibe chuʼ ca ni guʼndaʼ Evangeliu stibe seguru «dxandíʼ ca cosa» ni bicaabe de Jesús (Luc. 1:1-4). Ngaca nga biʼniʼ ca judíu ni bibani ndaaniʼ guidxi Berea. Primé biaje binadiágacabe ca noticia ni caníʼ de Jesús, biindaʼ chaahuicabe Stiidxaʼ Dios para gúʼyacabe pa dxandíʼ ni caziidicabe (Hech. 17:11). Ngaca nga ni naquiiñeʼ gúniluʼ, naquiiñeʼ guni investigarluʼ. Bichaaga ni rusiidiʼ ca testigu stiʼ Jehová ne ni ná Biblia. Laaca zanda guni estudiarluʼ historia stiʼ ca testigu stiʼ Jehová. Pa guni investigar chaahuiluʼ, qué zuni creluʼ ca cosa ni cadi dxandíʼ ni guiníʼ binni de ca Testigu. w21.05 3 párr. 7, 8

¿Ñee nuu tuuxa ndaaniʼ congregación stinu ni ñanda nusihuínninu nácanu hospitalariu né laa la? Nuu dxi, guizáʼ ñuulaʼdxiʼ ca hermanu ñuʼnu gaxha de laacaʼ. Guzéʼtenu caadxi ejemplu, zándaca raca ni nagana para hermanu ni cadi Testigu familia stiʼ ora runi familia sticaʼ xiixa saa. Ne xcaadxi hermanu riuucaʼ triste ora rusaa tuuxa binni ni nadxiicaʼ iza de guti. Ora cueenu tiempu para chuʼnu gaxha de ca hermanu riʼ, rusihuínninu dxandíʼ rizaaláʼdxinu laacaʼ (Filip. 2:20). Nuu stale cosa ni zanda gucaa laanu guni sentirnu nuunu stúbinu. Peru cadi guiaandaʼ laanu nanna Jehová ximodo runi sentirnu ne zanda iquiiñeʼ ca hermanu ne ca hermana para gacané laanu (Mat. 12:48-50). Zanda gusihuínninu rudiʼnu xquixe peʼ Jehová ora gacanenu ca hermanu ne ca hermana stinu. Neca chuʼ ora guni sentirnu stúbinu la? cadi zacádini purtiʼ cayacané Jehová laanu ne nuu gaxha de laanu. w21.06 13 párr. 18-20

Qué niree Jesús gana ne biʼniʼ predicar neca qué niná binni nucaadiaga laa. ¿Xiñee yaʼ? Purtiʼ nánnabe caquiiñeʼ gunibiáʼ binni ni dxandíʼ ne racaláʼdxibe gacanebe laacaʼ. Laaca gúnnabe ziuu binni qué zanagá gucaadiaga mensaje stiʼ Reinu, peru ra tidiʼ tiempu maʼ zanacaʼ guiziidicaʼ. Ne nga peʼ nga ni bizaaca familia stibe. Lu chonna iza arondaʼ biʼniʼ predicar Jesús, nin tobi de ca bíʼchibe ne ca bizáʼnabe qué ñácacaʼ discípulo stibe (Juan 7:5). Peru despué de biásabe de lade gueʼtuʼ, gúcacaʼ xpínnibe (Hech. 1:14). Qué gánnanu tu laa zaca xpinni Jehová. Nuu binni naquiiñeʼ tidiʼ tiempu para guiziidicaʼ ni dxandíʼ. Dede ca binni ni qué rucaadiaga laanu ruuyacaʼ ximodo laanu ne xi rúninu ne zándaca ra tidiʼ tiempu «gusisácacabe Dios». w21.05 18 párr. 17, 18

Dxi guyuu Jesús lu Guidxilayú riʼ, biʼniʼ mandarbe ca discípulo stibe gúnicaʼ chupa cosa. Gúdxibe laacaʼ guni predicarcaʼ ca noticia galán stiʼ Reinu ne biluiʼbe laacaʼ ximodo gúnicaʼ ni (Luc. 8:1). Bisiene Jesús xi naquiiñeʼ gúnicabe ora gucaadiaga binni mensaje ni zinécabe ne xi naquiiñeʼ gúnicabe ora qué gucaadiaga binni laacabe (Luc. 9:2-5). Guniʼbe dede pa guidubi zaca predicar, ora guniʼbe zuni predicar ca xpínnibe «para gunadiaga guiráʼ xixé guidxi» (Mat. 24:14; Hech. 1:8). Laaca gudxi Jesús ca discípulo stiʼ gusiidicaʼ binni guni ni biʼniʼ mandarbe. Guniʼbe zaca dxiiñaʼ riʼ dede ca dxi stinu, laani nga «dede ora guiluxe guidxilayú riʼ» (Mat. 28:18-20). Ne lu revelación ni gucuaa Juan bisihuinni Jesús racalaʼdxiʼ gacané ca discípulo stiʼ xcaadxi binni para guiziidicaʼ de Jehová (Apoc. 22:17). w21.07 2, 3 párr. 3, 4

Tiempu riʼ, stale binni runi intiica cosa para tidiʼ lu stobi. Guzéʼtenu ti ejemplu, zándaca ti hombre ni napa negocio guni xiixa cosa ni cadi jneza para tidiʼ lu xcaadxi binni ni napa negocio. Ti binni ni runi deporte zándaca laa peʼ guniná sti jugador para guni ganar. O zándaca guni ti estudiante trampa lu examen para ganda guiaana ndaaniʼ ti universidad. Ca xpinni Cristu, nánnanu cadi jneza gúninu ca cosa riʼ, purtiʼ laacani nga «ca deseu stiʼ xcuerpu binni» (Gál. 5:19-21). Yanna, ¿ñee nuu caadxi xpinni Jehová ni cuyubi modo tidiʼ lu stobi ndaaniʼ congregación ne cadi cudii cuenta la? Galán guiníʼ íquenu pregunta riʼ. Purtiʼ pa nuu tuuxa ni cuyubi tidiʼ lu stobi la? maʼ qué ziuu diʼ congregación tobi si. Galán gúninu pa guidú’yanu ejemplu stiʼ ca xpinni Dios ni bibani dxiqué, ca ni qué niníʼ ique jma nanna que xcaadxi. w21.07 14 párr. 1, 2

Guendarannaxhii nga ni rucaa laanu gacanenu ca ni nuu triste. Tiempu riʼ, laaca nuu stale hermanu nachaʼhuiʼ qué rixélecaʼ de tuuxa ni nuu triste o deprimidu. Nadxiicaʼ ca hermanu ne racaláʼdxicaʼ gúnicaʼ guiráʼ ni nuu lu nacaʼ para gacanecaʼ laacabe (Prov. 12:25, nota; 24:10). Zacá rusihuínnicabe zinándacabe conseju ni bidii apóstol Pablo: «Laquixhedxí ladxidóʼ ca ni nuu deprimidu, lagacané ca ni caʼruʼ guzuhuaa chaahuiʼ lu neza stiʼ Dios ne lagapa paciencia guiráʼ binni» (1 Tes. 5:14). Stale biaje jma racanenu ti hermanu ni nuu triste ora gucaʼdiáganu laa ne gábinu laa nadxiinu laa. Ruuyaʼ Jehová guiráʼ ni rúninu para gacanenu ti dendxuhuiiniʼ stiʼ. Proverbios 19:17 ná: «Ni guiá ti binni ni caquiiñeʼ tu gacané laa la? cutiiñeʼ Jehová, ne laabe zaguíxebe laa ni guni». w21.11 10 párr. 11, 12

¿Xi zanda gúninu dede ca yanna ti chuʼnu listu para ca dxi ni zeeda ca yaʼ? Ti cosa ni zanda gúninu nga chuʼnu nayecheʼ né biaʼ nápanu ne chuʼnu nayecheʼ purtiʼ nácanu xhamigu Jehová. Ra jma gunibiaʼnu Dios stinu jma zápanu confianza zápabe laanu ora gucaalú Gog de Magog laanu. Lu textu ni cadúʼndanu yannadxí rihuinni xiñee gunna David zacané Jehová laa, nabé biyúbibe gacané Dios laabe ne siempre gucané Jehová laabe. Dxi joven David bidxiilú ti soldadu nasoo ni lá Goliat ne gudxi laabe: «Yannadxí zudii Jehová lii lu nayaʼ» (1 Sam. 17:46). Despué bíʼnibe dxiiñaʼ para rey Saúl ne stale biaje gucalaʼdxiʼ hombre riʼ ñuuti laabe peru «qué nusaana Jehová David» (1 Sam. 18:12). Cumu biiyaʼ David ximodo gucané Jehová laa dxiqué la? gúnnabe zacaneruʼ Jehová laabe. Ngaca nga ni zanda gacané laanu ti chuʼnu listu para ca prueba ni guidxaagalunu. w22.01 6 párr. 14, 15

Ora runi Jehová xiixa, rusihuinni napa paciencia ne riquiiñeʼ biaʼ tiempu caquiiñeʼ para gúnini. Ne rúnibe ni para gusisaca binni labe ne gacanebe xcaadxi. Guidúʼyanu ximodo bíʼnibe dxi bizaʼbe Guidxilayú para binni. Biblia ná, «gudíxhebe medida stini», «base stini» ne «guié risaca stini» (Job 38:5, 6). Dede guleebe tiempu para guiníʼ íquebe lu ca cosa ni bizaʼbe (Gén. 1:10, 12). ¿Ñee riníʼ íquenu ximodo biʼniʼ sentir ca ángel ca ora bíʼyacaʼ cuzáʼ Jehová cada cosa la? Zándaca guizáʼ biéchecabe, ne dede bicaacabe ridxi para gusisácacabe Dios. ¿Xi rusiidiʼ ndiʼ laanu yaʼ? Rizíʼdinu biquiiñeʼ Jehová stale iza para bizáʼ Guidxilayú, beleguí, manihuiiniʼ ne binni ne ora biiyadxibe guiráʼ ni bizaʼbe que, guniʼbe: «Nabé galán cani» (Gén. 1:31). w21.08 9 párr. 6, 7

Lu parábola ni guníʼ Jesús, bizeeteʼ de ti hombre ni cheʼ sti guidxi. Ante chebe, biseendacaabe ca esclavu stibe ne bidiibe cada tobi de laacaʼ talentu para gúnicaʼ negocio. Bidiibe tobi de laacaʼ gaayuʼ talentu, ne stobi bidiibe chupa, ne stobi bidiibe tobi, bidiibe cada tobi biaʼ laa. Ni gucuaa gaayuʼ ne ni gucuaa chupa talentu que, bíʼnicaʼ dxiiñaʼ ne biʼniʼ ganarcaʼ jma bueltu para xpixuaanacaʼ. Peru guionna esclavu ni gucuaa ti talentu que, qué ñuni gastiʼ, ngue runi guladxi xpixuaanaʼ laa. Cásica primé esclavu que, guiropa que laaca bisisaca dxiiñaʼ ni gucuaa ne guizáʼ biʼniʼ dxiiñaʼ para xpixuaanaʼ ne pur dxiiñaʼ bíʼnibe, biʼniʼ ganarbe xhupa talentu. Bisisaca xpixuaanabe dxiiñaʼ ni bíʼnibe ne bidii laabe jma dxiiñaʼ. w21.08 21 párr. 7; 22 párr. 9, 10

Maʼ bisihuinni Jehová guizáʼ napa paciencia lu ca últimu dxi riʼ. Qué racaláʼdxibe guinitilú nin ti binni (2 Ped. 3:9). Cudiibe tiempu guiráʼ binni para gaca arrepentir. Peru zedandá ora zará paciencia stibe. Ca binni ni qué náʼ guidxiña laabe zazaacacaʼ ni bizaaca faraón ni bibani tiempu stiʼ Moisés. Sicaríʼ gudxi Jehová faraón: «Dede biaa padxí ñanda nusigaanaʼyaʼ ne ñuneʼ castigar lii ne xquídxiluʼ né ti guendahuará malu, ne maʼ qué ñuuluʼ lu guidxilayú riʼ. Peru cudieeʼ lugar guibániluʼ pur razón riʼ: para gulueeʼ lii poder stinneʼ ne para gunibiáʼ binni laʼyaʼ lu guidubi guidxilayú» (Éx. 9:15, 16). Últimu la? guiráʼ guidxi ca zánnacaʼ Jehová si nga Dios ni dxandíʼ (Ezeq. 38:23). Guendariniibi dxacha ni riete lu textu sti’ yannadxí riʼ, zunitilú ni ca binni ni qué náʼ guni mandar Jehová laa, cásica binitilube faraón. w21.09 18, 19 párr. 17, 18

¿Ñee nuuluʼ triste purtiʼ guca expulsar ti binni ni nadxiiluʼ la? Ne, ¿pa gabi ti hermanu o ti hermana lii xiixa ni cuee gana lii yaʼ? Ziuu ora zuchee ca hermanu ora gábicaʼ laanu xiixa (Sant. 3:2). Guiranu rucheʼnu, nga runi cadi naquiiñeʼ guidxagayaanu pa qué guidxela tuuxa xi gabi laanu o chuʼ tuuxa guiníʼ xiixa ni guniná laanu. Naquiiñeʼ chinándanu conseju bidii apóstol Pablo ni ná: «Laguni huantarsaa ne laguni perdonar de guidubi ladxidoʼto» (Col. 3:13). Cadi gusaana de gacanenu ca hermanu ni guca expulsar familia stiʼ. Yanna nga jma naquiiñeʼ gusihuínninu nadxiinu laacabe (Heb. 10:24, 25). Ca hermanu ni guca expulsar ti familia stiʼ nuu biaje ruuyacaʼ maʼ qué riná ca hermanu de congregación guidxaaga laacaʼ, casi ñaca laaca guca expulsárcabe. ¡Qué chuʼ dxi gúninu nga! Naquiiñeʼ cuʼnu gana ne guni felicitarnu ca joven ni guca expulsar bixhoze o jñaa. w21.09 29 párr. 13, 14; 30 párr. 16

Ora riniʼné ti hermanu ni nahuiiniʼ ti hermanu ni maʼ huaniisi, guirópacaʼ riuucaʼ gana (Rom. 1:12). Jmaruʼ si zatadxí ladxidóʼ hermanu ni nahuiiniʼ ca purtiʼ nanna rapa Jehová ca xpinni ni qué rusaana laa, ne hermanu huaniisi ca ziuu nayecheʼ purtiʼ nadxiicabe laa ne ziecheʼ ora gabi xcaadxi ximodo huayacané Jehová laa lu xquendanabani. Ora maʼ ziniisi tuuxa, ruchaa modo rihuinni. Peru cada iza tidiʼ jma sicarú ruuyaʼ Jehová ca xpinni ni qué rusaana laa (1 Tes. 1:2, 3). ¿Xiñee zacá ruuyaʼ Jehová laacabe yaʼ? Purtiʼ biaʼ iza huabánicabe huadiicabe lugar guchaa espíritu stiʼ Dios modo nácacabe ne gápacabe cualidad sicarú. Ra jma ziyunibiaʼnu ca hermanu ni maʼ huaniisi ne guizíʼdinu de laacaʼ la? jma zadúʼyanu laacaʼ casi ti tesoro ni nabé risaca. Nánnanu riuu congregación stinu nayecheʼ ora rusisaca ca ni nahuiiniʼ ca hermanu ni maʼ huaniisi, peru laaca riuʼnu nayecheʼ ora rusisaca ca ni huaniisi ca ni nahuiiniʼ. w21.09 7 párr. 15-18

Cadi gácanu naduxhuʼ né binni ne gúninu stipa guianu xcaadxi casi runi Dios stinu purtiʼ laa «nabé riá» laanu (Efes. 2:4). Cadi naquiiñeʼ guinísinu rianu binni, sínuque laaca naquiiñeʼ gusihuínninu ni. Guiranu zanda guiníʼ íquenu tu binni gacanenu ndaaniʼ familia stinu, ndaaniʼ congregación o lu territorio stinu. Zándaca zadxélanu stale modo gusihuínninu rianu laacabe. ¿Ñee runibiaʼnu tuuxa ni caquiiñeʼ quixhedxinu ladxidóʼ la? ¿Ñee zanda gudiʼnu ni gobe o guyúbinu xcaadxi modo gacanenu laabe? ¿Ñee nuu tuuxa ni deruʼ biguetaʼ de ndaaniʼ xquidxi Jehová, ni caquiiñeʼ tu cuʼ gana laa ne tu quixhedxí ladxidóʼ la? ¿Ñee zanda chinenu esperanza stiʼ ca noticia galán ra nuu xcaadxi binni la? (Job 29:12, 13; Rom. 10:14, 15; Sant. 1:27). Pa chuʼnu listu, zudiʼnu cuenta nuu stale hermanu ni zanda gusihuínninu rianu laacaʼ. Pa gusihuínninu cualidad riʼ, zusiéchenu Bixhózenu ni nuu guibáʼ, Dios ni nabé riá laanu. w21.10 13 párr. 20-22

Lu Salmo 23 bizeeteʼ David ca ndaayaʼ ni bidii Jehová laa purtiʼ biiyaʼ laabe casi pastor stiʼ, laaca guníʼ David riné Jehová laa lu neza de justicia stiʼ ne qué rusaanabe laa neca cadiʼdiʼ ra nagana, laaca gunna David neca nuu lu layú ni napa guixi gaʼ stiʼ Jehová zapa guendanagana. Zándaca guyuu ora bireebe gana casi ñaca nizabe lu ti valle nacahuidóʼ ne laaca guniʼbe zápabe enemigu. Peru cumu Jehová nga pastor stibe la? sicaríʼ guníʼ David: «Qué zadxibeʼ». ¿Ximodo nga qué ñaadxaʼ «gastiʼ ni galán» David yaʼ? Laani nga ra gúpabe guiráʼ ni caquiiñebe para chuʼbe gaxha de Jehová. Cadi caquiiñeʼ David gapa stale cosa material para chuʼ nayecheʼ, guyuube nayecheʼ né ca cosa ni bidii Jehová laabe, ni jma bisaca para David nga uguu ndaayaʼ Jehová laa ne gápabe laa. Ca diidxaʼ ni guníʼ David rusiidiʼ ca ni laanu cadi naquiiñeʼ gusisácanu ca cosa material. w22.01 3, 4 párr. 5-7

Maʼ xadxí nga runi predicar ca xpinni Jehová ca binni ni qué riná gucaadiaga mensaje stiʼ Reinu. Guininu de Noé, laa biʼniʼ predicar ni jneza zándaca stale iza (2 Ped. 2:5). Guleza Noé nucaadiaga binni laa peru Jehová qué ñabi laabe zazaaca ni. Ora gudxi Jehová laabe ximodo gúnibe arca que la? biʼniʼ mandar laabe: «Napa xidé chuʼluʼ ndaaniʼ arca ca, lii ne ca xiiñiluʼ, ne xheelaluʼ ne ca xuaalídxiluʼ» (Gén. 6:18). Ne ora gudxi Jehová Noé pabiáʼ guni arca que la? bidii cuenta huaxiéʼ binni zucaadiaga laa (Gén. 6:15). Ne zaqué gúcani. Nin ti binni qué nucaadiaga mensaje ni yenebe que (Gén. 7:7). ¿Ñee guníʼ ique Jehová cadi jneza modo biʼniʼ predicar Noé la? Coʼ, qué lica niníʼ ique Jehová zacá. Para Jehová la? jneza biʼniʼ Noé dxiiñaʼ ni bidiibe laa purtiʼ biʼniʼ casi peʼ biʼniʼ mandarbe laa guni (Gén. 6:22). w21.10 26 párr. 10, 11

¿Ñee ruxuíʼlunu xi biʼniʼ sentir Rut ora binadiaga ni guníʼ suegra la? Bíʼnibe guiráʼ ni nuu lu nabe para gacanebe Noemí: biinanebe laa, gudixhedxibe ladxidóʼ ne guzanebe laa zitu. Neca zaqué, guníʼ Noemí: «Bidxiguetaʼ Jehová naa xieenayaʼ». Neca qué nusaana Rut Noemí, peru ruluíʼ qué nusisaca Noemí guiráʼ ni bíʼnibe pur laa. Zándaca gucaná ladxidóʼ Rut pur ni guníʼ suegra. Peru neca zaqué, qué nixélebe de Noemí (Rut 1:3-18). Ti hermana ni nuu triste, zándaca gabi laanu diidxaʼ ni guniná laanu neca cayúninu stipa pur gacanenu laa. Peru galán gúninu stipa cadi gudiʼnu lugar guniná ni laanu. Cadi guixélenu de laabe ne guinábanu Jehová gacané laanu guidxélanu modo quixhedxinu ladxidoʼbe (Prov. 17:17). Nuu hermana zándaca caquiiñeʼ tu gacané laa peru zándaca qué zanabe gacanécabe laabe. Neca zacá, guendarannaxhii ca rucaani laanu gúninu guiráʼ ni nuu lu nanu ne cadi guixélenu de laabe (Gál. 6:2). w21.11 11 párr. 17-19

Lu Biblia, diidxaʼ santo riníʼ ni gaca tuuxa nayá lu ca ni runi, lu ni riníʼ ique ne guibani modo riuulaʼdxiʼ Dios. Ndiʼ riníʼ zácanu ti binni santo pa gúninu ne guiníʼ íquenu cosa ni jneza, guni adorarnu Dios modo riuulaʼdxiʼ ne gaca xhamígunu laa. Ne ridxagayaanu purtiʼ neca nácanu binni ruchee, zanda gaca xhamígunu Jehová ti Dios ni naca santo. Naca Jehová santo lu guiráʼ ni runi. Zacá guníʼ caadxi serafín, laacabe nga caadxi ángel ni nuu gaxha de trono stiʼ Jehová. Laacaʼ gúnicaʼ: «Santo, santo, santo nga Jehová stiʼ ca ejércitu» (Is. 6:3). Cumu laaca naca ca ángel riʼ santo la? nga runi nácacabe xhamigu Jehová. Ne ora reeda ti ángel lu Guidxilayú raca lugar ra ruseendaʼ Dios laabe ca santo. w21.12 3 párr. 4, 5

Ti cosa ni nabé riguu xizaa ca joven nga xi gúnicaʼ né xquendanabánicaʼ. Zándaca ca maestru o ca familia stícabe ni cadi naca Testigu gabi laacabe naquiiñeʼ guni estudiárcabe ti carrera ne guyúbicabe ti dxiiñaʼ ra guni ganárcabe stale bueltu. Peru zaquiiñecabe stale tiempu para gúnicabe ni bizéʼtenu riʼ. Bixhózecabe ne jñaacabe ne ca hermanu de congregación zándaca cuʼcaʼ gana laacabe para iquiiñecabe xquendanabánicabe para gúnicabe ni ná Jehová. ¿Xi zacané ti joven ni nadxii Jehová guicaa decisión jneza yaʼ? Zanda gúʼndabe Efesios 5:15-17. Despué de guiníʼ íquebe ni ná ni, zanda guiníʼ íquebe ca pregunta riʼ: «¿Xi racalaʼdxiʼ Jehová guneʼ? ¿Ñee ziuuláʼdxibe decisión ni guicaaʼ la? ¿Xi zacané naa iquiiñeʼ tiempu stinneʼ jneza?». Cadi guiaandaʼ laanu, nabé nagana ca dxi nabáninu riʼ ne maʼ cadi candaa zanitilú guidxilayú stiʼ Binidxabaʼ. w22.01 27 párr. 5

¿Padxí nga beeda gaca Santiago discípulo stiʼ Jesús yaʼ? Despué de biasa Jesús de lade gueʼtuʼ bihuinni «nezalú Santiago; despué maʼ nezalú guiráʼ ca apóstol» (1 Cor. 15:7). Ra bihuinni Jesús nezalú Santiago bichaani xquendanabani. Né laabe nuube ndaaniʼ cuartu ra nuu ca apóstol, ndaaniʼ guidxi Jerusalén, dxi biaba espíritu santu luguiacaʼ (Hech.1:13, 14). Despué, laaca biecheʼ Santiago purtiʼ guyuu lade grupu ni zániru ni guyuu lu primé siglu (Hech. 15:6, 13-22; Gál. 2:9). Ne ante de iza 62, biquiiñeʼ Jehová laabe para gucaabe ti carta ra nuu ca xpinni Cristu ni bibí. Racané carta riʼ ca xpinni Cristu tiempu riʼ, ca ni napa esperanza de cheʼ guibáʼ ne ca ni chiguibani lu Guidxilayú (Sant. 1:1). Historiador Josefo, ni bibani lu primé siglu, bicaa biʼniʼ ordenar sumo sacerdote judíu Anán, guuticabe Santiago. Peru qué nusaana Santiago de ñuni ni ná Jehová lu Guidxilayú dede dxi gutiʼ. w22.01 9 párr. 3, 5

Xi rizíʼdinu de textu ni cadúʼndanu yannadxí nga cadi naquiiñeʼ cuézanu gulá Jehová laanu lu guiráʼ ca prueba ni tídinu. Cásica Jesús, naquiiñeʼ chuʼnu listu para cadi guchéʼnenu Jehová neca gátinu (Mat. 16:24, 25). Peru nánnanu qué zudii Dios lugar gueeda xiixa prueba luguianu ni qué zanda guni huantarnu (1 Cor. 10:13). Sti cosa ni rizíʼdinu nga, cásica Jesús, zándaca zuninácabe laanu neca qué gápanu donda (1 Ped. 2:19, 20). Rucaalú binni laanu purtiʼ cadi nácanu parte de guidxilayú riʼ ne rusíʼdinu ni dxandíʼ, ne cadi purtiʼ rúninu cosa malu (Juan 17:14; 1 Ped. 4:15, 16). Biene Jesús xiñee cudii Jehová lugar gacaná. Peru caadxi de ca xpinni Dios ni cadiʼdiʼ lu prueba rinabadiidxacaʼ xiñee cudii Jehová lugar gacanacaʼ (Hab. 1:3). Cumu riá Jehová ne napa paciencia la? riene cadi pur qué gapa ca xpinni fe nga riniʼcaʼ zacá, sínuque purtiʼ caquiiñecaʼ quixhedxibe ladxidoʼcaʼ (2 Cor. 1:3, 4). w21.04 11 párr. 9, 10

Zacaa Jehová adoración stinu pa gúninu ni modo racalaʼdxiʼ ne pa gúninu ni né respetu ne guendarannaxhii. Nga runi racaláʼdxinu guni adorarnu laabe jneza. Ti modo runi adorarnu Jehová ora runi orarnu laa. Ruchaaga Stiidxaʼ Dios ca oración ni rúninu né inciensu ni guca preparar né stale cuidadu para iquiiñeʼ ndaaniʼ tabernáculo ne despué ndaaniʼ templu. Nabé guyuulaʼdxiʼ Dios inciensu que. Zaqueca nga zeeda gaca ca oración ni rúninu de guidubi ladxidoʼno, riuulaʼdxiʼ Jehová ca ni ne cadi guiníʼ íquenu caquiiñeʼ iquiiñenu diidxaʼ nagana para chuuláʼdxibe ca ni (Prov. 15:8; Deut. 33:10). Riuulaʼdxiʼ Jehová gábinu laa pabiáʼ nadxiinu laa ne rudiʼnu xquixe peʼ laa. Ne racaláʼdxibe gábinu laabe xi naguu xizaa laanu, xi racaláʼdxinu gúninu ne xi esperanza nápanu. Nga runi ante guni orarnu, galán guiníʼ íquenu xi racaláʼdxinu gábinu Jehová. Pa gúninu ni casi ñaca cudiʼnu Bixhózenu ni nuu guibáʼ inciensu ni jma galán. w22.03 20 párr. 2; 21 párr. 7

Lu Armagedón, cadi laadinu nga guininu tu guilá ne tu laa coʼ (Mat. 25:34, 41, 46). ¿Zápanu confianza Jehová la? o zudxiidéchenu laabe purtiʼ cadi cayuuláʼdxinu decisión stibe? Ndiʼ nga laani: yanna nga naquiiñeʼ gápanu jma confianza Jehová para cadi gusaana de gápanu confianza laabe lu ca dxi ni zeeda ca. Guiníʼ íquenu ximodo zuni sentirnu ndaaniʼ guidxilayú cubi ca. Maʼ qué ziuuruʼ religión ni cadi dxandíʼ, nin negocio ni raxha xpueltu binni ne nin ca gobiernu ni ruquiichináʼ ne ni runiná binni. Maʼ qué ziuu guendahuará, guendarioʼxhoʼ ne maʼ qué zati binni. Zieguyoo Binidxabaʼ ne ca demonio stiʼ 1,000 iza. Guiráʼ ca cosa malu biʼniʼ Binidxabaʼ zareecani (Apoc. 20:2, 3). Guizáʼ nayecheʼ zuni sentirnu purtiʼ gúpanu confianza jneza guiráʼ ni runi Jehová. w22.02 6, 7 párr. 16, 17

Biyubi Jesús modo chuʼ tobi si né binni ne gucanebe laacaʼ guni chaahuicaʼ ca guendanagana ni napanecaʼ sti binni. Bisiidibe laacaʼ naquiiñeʼ guni chaahuicaʼ guendanagana ni napanecaʼ bíʼchicaʼ pa racaláʼdxicaʼ guicaa Jehová adoración sticaʼ (Mat. 5:23, 24). Ne stale biaje gúdxibe ca apóstol stibe cadi tinde diidxacaʼ pur gánnacaʼ tuu nga ni jma risaca ládecaʼ (Luc. 9:46-48; 22:24-27). Cadi caquiiñeʼ siʼ gacanenu binni para cadi chúʼdinde, laaca caquiiñeʼ guni chaahuinu guendanagana ni gapanenu tuuxa. Ne gacanenu ca hermanu para guni chaahuicaʼ guendanagana ni napanecaʼ sti hermanu (Filip. 4:2, 3; Sant. 3:17, 18). Guiníʼ íquenu ndiʼ: «¿Ñee nuaaʼ dispuestu guneʼ chaahueʼ guendanagana napaniaʼ tuuxa la? ¿Ñee rapaʼ xiana ora guni ti hermanu xiixa ni guniná naa la? ¿Ñee ribezaʼ hermanu ni bininá naa nga guidxiña ra nuaaʼ para guni chaahuidu ca guendanagana nápadu la? ¿O naa nga ruyubeʼ laabe para guni chaahuidu guendanagana ca neca laabe nápabe donda?». w22.03 10 párr. 10,11

Maca cá lu Biblia ziale de ndaaniʼ ladxidóʼ xquidxi Jehová gúnicaʼ ni nabe né stale gana ne zinándacaʼ ca instrucción stiʼ Xiiñibe (Sal. 110:3). Cayaca cumplir profecía ca tiempu riʼ. Guiráʼ iza, né stale gana runi predicar ca xpinni Dios stale hora ne rúnicabe ni de guidubi ladxidóʼcabe ne sin guiáxacabe. Laaca riquiiñecabe tiempu stícabe para gacanécabe ca hermanu chuʼcaʼ gaxha de Jehová ne gudiicabe ni caquiiñecaʼ. Laaca ribee ca ancianu ne siervu ministerial stale tiempu para guni prepararcaʼ ca asignación ne discursu ni chitiidiʼ lu reunión, ne rúnicaʼ visita de pastoreu. ¿Xi pur rúnicabe ni yaʼ? Purtiʼ nadxiicabe Jehová ne prójimo stícabe (Mat. 22:37-39). Biyubi Jesús modo gacané xcaadxi, lugar de ñuni ni racalaʼdxiʼ, ne laanu, ca xpínnibe, rúninu stipa chinándanu ejemplu stibe (Rom. 15:1-3). Pa gúninu ni, zabeendunu stale cosa ni galán. w22.02 20 párr. 1, 2

Ndaaniʼ guidxi Israel dxiqué, stale binni biʼniʼ dxiiñaʼ lu layú, ne ca binni ni runi dxiiñaʼ para sti binni napa xidé guiáxacaʼ ora guiluxe dxi. Pa ti israelita qué guiaxa ora guiluxe dxiiñaʼ stiʼ, ziaanabe sin bueltu ne qué zapa familia stibe ni gó. Sicaríʼ guníʼ Jehová: «Purtiʼ pobre laabe ne caquiiñebe ni para guibánibe» (Deut. 24:14, 15; Mat. 20:8). Tiempu riʼ, stale binni riaxa pur semana o pur quincena. Peru naquiiñeruʼ chinándanu conseju ni zeeda lu Levítico 19:13. Nuu binni qué riguixe ca trabajador stiʼ biaʼ naquiiñeʼ guiáxacaʼ. Nánnacabe nuu ca trabajador ca conforme biaʼ riáxacaʼ para cadi guiaanacaʼ sin dxiiñaʼ. Ti binni ni cayuni zacá la? cayanané sueldu stiʼ ti trabajador. Nga runi, pa ti xpinni Cristu napa ti negocio ne napa trabajador naquiiñeʼ chinanda ni ná conseju stiʼ Dios. w21.12 10 párr. 9, 10

Guizáʼ cayati Jesús nisa purtiʼ nabé cayacaná ra cá lu yaga que ne guizáʼ maʼ bidxaga. Ngue runi canábabe gudiicabe laabe nisa. Qué niníʼ ique Jesús débil laa pa guiníʼ ni cayuni sentir, ne laanu laaca cadi naquiiñeʼ guiníʼ íquenu zacá. Zándaca qué zuni sentirnu galán pa gábinu tuuxa ni cazaacanu. Peru galán nga guyúbinu tu gacané laanu ora caquiiñenu ni. Guzéʼtenu ti ejemplu, pa maʼ huaniisinu o huaranu, zándaca caquiiñeʼ guinábanu ti xhamígunu chisiné laanu o chiné laanu doctor. Pa guni sentirnu careʼnu gana, zándaca caquiiñeʼ guinábanu ti ancianu o sti hermanu gucaadiaga laanu o gabi laanu «ti diidxaʼ galán» ni cuʼ gana laanu (Prov. 12:25). Cadi guiaandaʼ laanu nadxii ne racalaʼdxiʼ ca hermanu stinu gacanecaʼ laanu «ora nápanu xiixa guendananá» (Prov. 17:17). Peru qué zanda diʼ gánnacabe xi cazaacanu pa qué gábinu ni laacabe. w21.04 11, 12 párr. 11, 12

Stale de laanu raca nagana para laanu gudxíʼlunu ora guchaa xiixa lu xquendanabáninu. Stale hermanu ni maʼ ziné stale iza lu serviciu especial de tiempu completu maʼ bidxaa asignación sticaʼ. Ne nuu tu laa maʼ bisaana asignación ni riuulaʼdxiʼ purtiʼ maʼ huaniisi. Ne ora rizaacaʼ ndiʼ normal nga chuʼ tobi triste. Ora guizaaca nga, ti cosa ni zacané laanu nga guidúʼyanu ca cosa ca modo ruuyaʼ Jehová ca ni. Cayuni Jehová stale cosa galán ca dxi riʼ, ne nápanu privilegiu guninenu laabe dxiiñaʼ (1 Cor. 3:9). Qué zusaana Jehová de gannaxhii laanu. Nga runi pa guchaacabe lii de asignación ndaaniʼ xquidxi Jehová, cadi tan guiníʼ íqueluʼ xiñee bichaacabe lii. Lugar de guibánaluʼ asignación ni gúpaluʼ dxiqué, gunabaʼ Dios gacané lii guiécheluʼ né dxiiñaʼ ni cayúniluʼ yanna (Ecl. 7:10). Nabé risaca guiníʼ íquenu ca cosa ni zanda gúninu yanna, para chuʼnu nayecheʼ ne cadi gusaananu Dios neca guchaa modo nabáninu. w22.03 17 párr. 11, 12

¿Tuu nga ca ni qué rusaana Jehová de gannaxhii? Biblia ná zanda gannaxhiinu ley stiʼ Dios, disciplina stiʼ, gannaxhiinu guendanabani ne cadi gannaxhiinu guidxilayú (Sal. 119:97; Prov. 12:1; 1 Pe 3:10; 1 Juan 2:15). Peru guendarannaxhii stiʼ Jehová riʼ binni si ruluiʼbe ni. ¿Ñee riníʼ nga qué rusaana Jehová de gannaxhii guiráʼ binni la? Coʼ, ca xhamigu si Jehová nga qué rusaana de gannaxhii. Qué rusaana Dios stinu ca xhamigu. Nápabe ti cosa galán para laacaʼ ne qué ziuu dxi gusaana de gannaxhiibe laacaʼ. Rusihuinni Jehová nadxii guiráʼ binni. Sicaríʼ gudxi Jesús ti hombre láʼ Nicodemo: «Nabé gunnaxhii Dios guidxilayú [guiráʼ binni], nga runi bidii tobi lucha Xiiñiʼ, ti guiráʼ tu gapa fe Xiiñibe cadi guinitilú, sínuque guicaa guendanabani ni qué zaluxe» (Juan 3:1, 16; Mat. 5:44, 45). w21.11 2 párr. 3; 3 párr. 6, 7

Nagana nga guibani binni ndaaniʼ guidxilayú riʼ peru zándaca jma nagana zaca ni despué (Mat. 24:21). ¿Cadi dxandíʼ guiranu racaláʼdxinu guedandá dxi maʼ cadi gápanu ca guendanagana la? Zusiáʼndanu guiráʼ ca ni ne maʼ qué zazaaca ca ni (Is. 65:16, 17). Nga runi naquiiñeʼ guizíʼdinu guni huantarnu. Bisiene Jesús xiñee naquiiñeʼ gúninu ni ora guníʼ: «Pa guni huantartu zulatu xpídatu» (Luc. 21:19). Ti cosa ni zacané laanu guni huantarnu nga guiníʼ íquenu xi cayuni ca binni ni cadiʼdiʼ lu ca guendanagana ni cadídinu. Peru ¿tu laa jma nanna guni huantar yaʼ? Jehová. Pa bidxagayaanu ora gúnnanu Jehová nga jma nanna guni huantar la? guiníʼ íquenu ndiʼ. Nuu stale guendanagana ndaaniʼ guidxilayú riʼ purtiʼ Binidxabaʼ nga cayuni mandar ndaaniʼ ni. Ñanda nunitilú Jehová guidxilayú malu riʼ nagasi ca, peru cabézabe guedandá dxi maʼ gudíxhebe para gúnibe ni (Rom. 9:22). Laga cabeza Jehová guedandá dxí ca, cayuni huantar. w21.07 8 párr. 2-4